1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
805/2023 EBAZPENA, uztailaren 26koa, Osasunbidea-Nafarroako Osasun Zerbitzuko zuzendari kudeatzaileak emana, Nafarroako toki entitateentzako transferentzien gastua baimendu, nola banatuko den ezarri, eta ordaintzeko betebeharra aitortzen duena, 2023. urtean herrietako osasun kontsultategien eta kontsultategi lagungarrien funtzionamendu gastuak finantzatzeko.
Nafarroako 2023ko Aurrekontu Orokorrei buruzko abenduaren 28ko 35/2022 Foru Legeak hamaseigarren xedapen gehigarrian ezartzen duenez, Osasunbidea-Nafarroako Osasun Zerbitzuko zuzendari kudeatzaileak urtero onesten dituen moduluen eta gehieneko kopuruen arabera banatuko da aurrekontuko 547001-52300-4609-312200 proiektuko partidan ageri den zenbatekoa, eta ez zaio Dirulaguntzei buruzko azaroaren 9ko 11/2005 Foru Legea aplikatuko. Partida horrek "Osasun zentroen funtzionamendurako transferentziak" du izena, eta udalenak diren herrietako kontsultategien eta kontsultategi lagungarrien funtzionamendu gastuak finantzatzea du helburu. Edozein kasutan, kontsultategi mota eta azalera hartuko dira kontuan modulu horietan.
Nafarroako 2023ko Aurrekontu Orokorretan "Osasun zentroen funtzionamendurako transferentziak" izeneko 547001-52300-4609-312200 partida dago, toki entitateei kontsultategien funtzionamendu gastuak finantzatzeko. 1.006.697,00 euroko kreditua du.
Osasun Departamentuan dagoen kontu-hartzailetza delegatuaren adostasunarekin, Oinarrizko Osasun Laguntzako Kudeaketa Ekonomikoaren eta Zerbitzu Orokorren Zerbitzuko buruak eman duen txostenean hauek proposatzen dira: osasun kontsultategien funtzionamendu gastuak finantzatzeko erreferentzia gisa erabili beharreko modulu ekonomikoaren onespena, bai eta haren zuzenketa faktorearena ere, etengabeko arretako gune diren zenbait kontsultategiri aplikatzeko; Nafarroako toki entitateen gastuak 2023an finantzatzeko egin behar diren transferentzien gasturako baimena; horien banaketa, eta ordaintzeko betebeharraren aitorpena.
Hori dela eta, irailaren 3ko 171/2015 Foru Dekretuaren bidez onetsitako Osasunbidea-Nafarroako Osasun Zerbitzuaren Estatutuek ematen dizkidaten ahalmenak erabiliz,
EBAZTEN DUT:
1. Onestea 46,29 euroko modulu ekonomikoa, urtean, metro koadro bakoitzeko, erreferentzia gisa, Nafarroako Foru Komunitateko herrietako osasun kontsultategien eta kontsultategi lagungarrien funtzionamendu gastuak finantzatzeko 2023an, bai eta zuzenketa faktorea ere (2,0651), modulu horren biderkatzailea izanen dena, bakarrik II eta III motako kontsultategiei aplikatzeko; izan ere, etengabeko arretako gunetzat jotzen dira horiek, lanaldi arruntetik kanpo lanpostuan bertan egon beharreko modalitatekoak dira, eta haien azalera ez da 110 metro koadrokoa baino handiagoa.
2. 1.006.616,15 euroko gastua baimentzea Nafarroako Foru Komunitateko herrietako osasun kontsultategien eta kontsultategi lagungarrien 2023ko funtzionamendu gastuak finantzatzeko transferentzia gisa.
3. Nafarroako toki entitateei transferitu beharreko zenbatekoak nola banatuko diren ezartzea, herrietako osasun kontsultategien eta kontsultategi lagungarrien 2023. urteko funtzionamendu gastuak finantzatzeko, ebazpen honi gehitutako eranskinean zehazten den moduan; guztira, 1.006.616,15 euro dira.
4. Nafarroako toki entitate bakoitzari eranskin horretan ageri diren zenbatekoak ordaintzeko betebeharra aitortzea, guztira 1.006.616,15 euro, herrietako osasun kontsultategien eta kontsultategi lagungarrien 2023. urteko funtzionamendu gastuak finantzatzeko.
5. 2023. urteko Gastuen Aurrekontuko "Osasun zentroen funtzionamendurako transferentziak" izeneko 547001-52300-4609-312200 partidari egotziko zaio gastua.
6. Ebazpen hau eta eranskina Nafarroako Aldizkari Ofizialean argitara daitezela agintzea.
7. Ebazpen hau igortzea Osasun Departamentuko kontu-hartzailetza delegatura; Osasunbidea-Nafarroako Osasun Zerbitzuko Kudeaketa Ekonomikoaren eta Zerbitzu Orokorren Zuzendaritzara; Oinarrizko Osasun Laguntzako Kudeatzailetzara, Kudeaketa Ekonomikoaren eta Zerbitzu Orokorren Zerbitzura eta Kontabilitate-kudeaketaren eta Fakturazioaren Atalera, behar diren ondorioak izan ditzan. Toki entitateei aditzera ematen zaie honen kontra administrazioarekiko auzi-errekurtsoa jartzen ahalko dutela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, argitaratu eta biharamunetik hasita; horrek ez du galaraziko Nafarroako Gobernuan aldez aurreko errekerimendua egiteko aukera, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epean.
Iruñean, 2023ko uztailaren 26an.–Osasunbidea-Nafarroako Osasun Zerbitzuko zuzendari kudeatzailea, Gregorio Achutegui Basagoiti.
ERANSKINA.–Transferentziak kontsultategien 2023ko funtzionamendu gastuetarako (PDFa).
Iragarkiaren kodea: F2311112
