Iragarkia

14. ALDIZKARIA - 2017ko urtarrilaren 20a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

1543/2016 EBAZPENA, abenduaren 30ekoa, Landa Garapeneko, Nekazaritzako eta Abeltzaintzako zuzendari nagusiak emana, Nafarroako 2014-2020 Landa Garapeneko Programaren barnean, “Nekazaritzaz bestelako jarduerak sortzeko eta garatzeko inbertsioak” 6.4 azpineurrirako laguntzen 2016ko deialdia eta oinarri arautzaileak onesten dituena.

Nafarroak, bere foru araubideari esker, eskumen osoa du nekazaritza eta abeltzaintza gaietan, ekonomiaren antolamendu orokorrarekin bat, hala ezarrita baitago Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 50.1.a) artikuluan. Bestalde, lege organiko horren 56.1.a) artikuluan ezarritakoaren arabera, eta jarduera ekonomiko orokorraren oinarriekin eta antolamenduarekin bat, Nafarroako Foru Komunitateari dagokio Nafarroaren barnean jarduera ekonomikoa planifikatzeko eta garapen ekonomikoa sustatzeko eskumen osoa.

Landa Garapenerako Europako Nekazaritza Funtsaren (LGENF) bidezko landa garapeneko laguntzei buruzko Europako Parlamentuaren eta Kontseiluaren 2013ko abenduaren 17ko 1305/2013 (EB) Erregelamenduak, Kontseiluaren 1698/2005 (EE) Erregelamendua indargabetzen duenak, 19.1.b) artikuluan, nekazaritzaz bestelako jarduerak sortzeko eta garatzeko inbertsioetarako laguntza ezartzen du.

2014ko urriaren 30ean, Batzordeak eta Espainiak 2014-2020 Elkartzeko Akordioa sinatu zuten, Europar Batasunaren EIE Funtsak erabiltzeari buruz. Gero, 2015eko otsailaren 13an, 2014-2020 Landa Garapenerako Esparru Nazionala onetsi zen, Nekazaritza, Elikadura eta Ingurumen Ministerioak egina.

Batzordearen azaroaren 18ko 8143/2015 Betearazpen Erabakiaren bidez, Europar Batasunaren erakundeek Nafarroako 2014-2020 Landa Garapeneko Programa onetsi zuten. Programaren “Nekazaritza eta enpresa ustiategien garapena” 6. neurrian, “Nekazaritzaz bestelako jarduerak sortzeko eta garatzeko inbertsioak” 6.4 azpineurria dago.

Nekazaritzaz bestelako jarduerak sortzeko eta garatzeko inbertsioetarako laguntzaren xedea da lan aukera berriak bultzatzea landa lurraldearen ekonomia eta gizartea dinamizatzeko, landa eremuen despopulatzea saihestuz. Horretarako, lehiakortasuna sustatzen da nekazaritzako sektorean, nekazaritzaz bestelako jardueretara dibertsifikatuz.

Nafarroan ugari dira nekazaritzako familia ustiategiak, egitura txikikoak, eta, horren ondorioz, merkatuen bilakaerak eta arau berrien eskakizunek eragin handia dute haietan. Ildo horretatik, negozio-linea berrien bilaketa erraztu behar da, nekazaritzako jarduera osatzeko, urtarokotasuna murriztuz eta sektorearen independentzia handituz.

Beraz, neurri honen esparru juridikoa 1305/2013 (EB) Erregelamendua izanen da, Landa Garapenerako Europako Nekazaritza Funtsaren (LGENF) bidez landa garapenari laguntzeari buruzkoa, eta, orobat, hura garatzeko erregelamenduak:

–Batzordearen 2014ko martxoaren 11ko 807/2014 (EB) Erregelamendu Delegatua, 1305/2013 (EB) Erregelamendua osatzen duena.

–Batzordearen 2014ko uztailaren 17ko 808/2014 (EB) Betearazpen Erregelamenduak xedapenak ezartzen ditu aplikatzeko Europako Parlamentuaren eta Kontseiluaren 2013ko abenduaren 17ko 1305/2013 (EB) Erregelamendua, FEADER-Landa Garapenerako Europako Nekazaritza Funtsaren bidezko landa garapenerako laguntzari buruzkoa.

–Batzordearen 2014ko uztailaren 17ko 809/2014 (EB) Betearazpen Erregelamendua, xedapenak ezartzen dituena Europako Parlamentuaren eta Kontseiluaren 1306/2013 (EB) Erregelamendua aplikatzeko, landa garapenerako neurriak kudeatu eta kontrolatzeko sistema integratuari eta baldintzazkotasunari dagokienez.

–Batzordearen martxoaren 31ko 640/2014 (EB) Betearazpen Erregelamendua, Europako Parlamentuaren eta Kontseiluaren 1306/2013 Erregelamendua osatzen duena kudeaketaren eta kontrolaren sistema integratuari dagokionez, ordainketak ukatu edo kentzeko baldintzei dagokienez eta zuzeneko ordainketei, landa garapenerako laguntzari eta baldintzazkotasunari aplika dakizkiekeen zehapen administratiboei dagokienez.

Neurri honi Diru-laguntzei buruzko azaroaren 9ko 11/2005 Foru Legea aplikatzen zaio.

Ebazpen honen aldeko txostena eman du Nafarroako 2014-2020 Landa Garapeneko Programaren kudeaketa agintaritzak.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak eta Landa Garapeneko, Ingurumeneko eta Toki Administrazioko Departamentuaren egitura organikoa ezarri zuen irailaren 21eko 78/2016 Foru Dekretuak eman dizkidaten eskudantziak erabiliz, eta urtarrilaren 23ko 7/2013 Foru Dekretuaren bidez eman dizkidaten ahalmenak baliatuz, izan ere, dekretu horren bidez Nekazaritza Bermatzeko Europako Funtsak (NBEUF) eta Landa Garapenerako Europako Nekazaritza Funtsak (LGENF) finantzaturiko gastuak Nafarroako Foru Komunitatean ordaintzen dituen erakundea baimendu eta haren antolamendua eta funtzionamendua ezarri baitziren,

EBATZI DUT:

1. Nafarroako 2014-2020 Landa Garapeneko Programaren barnean, “Nekazaritzaz bestelako jarduerak sortzeko eta garatzeko inbertsioak” 6.4 azpineurrirako laguntzen oinarri arautzaileak onestea. Oinarri horiek ebazpen honen I. eranskinean jaso dira.

2. Nekazaritzaz bestelako jarduerak sortzeko eta garatzeko inbertsioetarako laguntzen 2016ko deialdia onestea, betiere Batzordeak 2014-2020 LGPren aldaketa onesten badu.

3. Deialdi honetarako eskaerak aurkezteko epea 2 hilabetekoa izanen da, ebazpen hau Nafarroako Aldizkari Ofizialean argitaratu eta biharamunetik hasita.

4. 490.000,00 euroko gastua baimentzea 2018ko ekitaldirako, Nafarroako Gobernuaren 2016ko Gastuen Aurrekontuetako ‘’Nekazaritzaz bestelako enpresak landa eremuetan sortu eta garatzea. 2014-2020 LGP LGENF’’ izeneko 720007 71720 7709 414200 kontu-sailaren kargura, ebazpen honek dakartzan konpromisoei aurre egiteko. Baimendutako gehieneko kreditua handitzen ahalko da laguntzak emateko, aurrekontuetan bidezkoa den aldaketa edo mugimendua onetsi ondoren. Nolanahi ere, diru kopuru gehigarria onesteko, ezinbestekoa izanen da aurrekontuan horretarako diru erabilgarririk izatea.

5. Oinarri arautzaileak Diru-laguntzen Datu Base Nazionalean (BDNS) erregistratzea.

6. Ebazpen hau eta eranskinak Nafarroako Aldizkari Ofizialean argitaratzea.

7. Ebazpen honek ez du administrazio bidea amaitzen, eta interesdunek gora jotzeko errekurtsoa jartzen ahal dute haren kontra, Landa Garapeneko, Ingurumeneko eta Toki Administrazioko kontseilariari zuzendua, argitara eman eta biharamunetik hilabeteko epean.

Iruñean, 2016ko abenduaren 30ean.–Landa Garapeneko, Nekazaritzako eta Abeltzaintzako zuzendari nagusia, Ignacio Gil Jordán.

1. ERANSKINA

Nafarroako 2014-2020 Landa Garapeneko Programaren barnean, “Nekazaritzaz bestelako jarduerak sortzeko eta garatzeko inbertsioak” 6.4 azpineurrirako laguntzen oinarri arautzaileak

1. oinarria.–Xedea.

1. Oinarri hauen xedea da Nafarroako 2014-2020 Landa Garapeneko Programaren barreneko “Nekazaritzaz bestelako jarduerak sortzeko eta garatzeko inbertsioak” 6.4 azpineurrirako laguntzak arautzea, Europako Parlamentuaren eta Kontseiluaren 2013ko abenduaren 17ko 1305/2013 (EB) Erregelamenduaren 19.1.b) artikulua aplikatuz.

2. Nekazaritzaz bestelako jarduerak sortzeko eta garatzeko inbertsioetarako laguntzaren xedea da lan aukera berriak bultzatzea landa lurraldearen ekonomia eta gizartea dinamizatzeko, landa eremuen despopulatzea saihestuz. Horretarako, lehiakortasuna sustatzen da nekazaritzako sektorean, nekazaritzaz bestelako jardueretara dibertsifikatuz.

2. oinarria.–Lurralde eremua.

1. Nafarroako Foru Komunitateko landa eremuetan nekazaritzaz bestelako jarduerak sortu eta garatzeari aplikatzen ahal zaio laguntza. Ondorio horietarako, landa eremutzat joko dira Nafarroako 2014-2020 Landa Garapeneko Programaren ezarritakoak, hau da, DEGURBA sailkapenak landa eremutzat eta dentsitate ertaineko eremutzat jotzen dituenak.

2. Horrenbestez, ez dira diru-laguntza honen xedea hiri eremu zabaletan sortutako edo garatutako nekazaritzaz bestelako jarduerak. Nafarroako 2014-2020 Landa Garapeneko Programan ezarritakoaren arabera, Iruñeko udalerria da hiri eremu zabal bakarra.

3. III. eranskinean jasotzen dira Nafarroako landa eremuko udalerriak, beraien ezaugarri sozio-demografikoekin eta naturako edo ingurumeneko ezaugarriekin batera.

3. oinarria.–Aurreikusitako proiektu motak.

1. Diru-laguntza jasotzeko, proiektuen xedea nekazaritzaz bestelako ekoizte-jarduerak izan behar dira, hau da, salduko diren edo merkaturatzen ahal diren ondasun eta/edo zerbitzu pribatuak, edo titulartasun pribatuko ondasunen balioa handitzen dutenak.

2. Diru-laguntzaren xedeko proiektua proiektu handiago baten zatia bada, diru-laguntza jasotzeko baldintza da berezko entitatea eta izaera finalista izatea, independenteki eta bera bakarrik hartuta.

3. Dibertsifikazio proiektuak arlo hauetako batekoak izan behar dira:

a) Ingeniaritzako, arkitekturako, aholkularitzako edo albaitaritzako zerbitzu profesionalak, zerbitzu teknikoak edo bestelakoak.

b) Informazioaren teknologiei, informatikari edo bestelakoei lotutako jarduerak.

c) Jarduera artistikoak eta/edo artisautzakoak garatzea.

d) Gizarte zerbitzuak ematea.

e) Nekazaritzaz bestelako jardueretarako lantegiak, industriak, lokalak edo instalazioak ezartzea.

f) Produktuak eraldatzea eta merkaturatzea, ondoriozko produktua Europar Batasunaren Funtzionamenduari buruzko Tratatuaren I. eranskinean agertzen ez bada.

g) Edozein sektore ekonomikotarako zerbitzuak ematea, nekazaritza eta basogintza barne, edo landa eremuko populaziorako zerbitzuak.

h) Nekazaritza-turismoko, landa turismoko, aisialdiko edo ostalaritzako jarduerak, jolas edo kirol jarduerak, edo lurralde garapen ekonomikoari lotutakoak.

i) Landa Garapeneko, Ingurumeneko eta Toki Administrazioko Departamentuak hautagarritzat jotzen dituen beste eragiketa batzuk.

4. oinarria.–Laguntzaren xede diren pertsonak.

Pertsona hauek izan daitezke laguntzen onuradun:

a) Pertsona fisikoak:

–Nafarroako Nekazaritzako Ustiategien Erregistroan inskribatutako nekazari profesionalak.

–Aurreko atalean sartutako pertsonen lehen graduko ahaideak.

b) Pertsona juridikoak:

–Nekazaritzako mikroenpresak edo enpresa txikiak.

–Nekazaritzako elikagaien mikroenpresak edo enpresa txikiak.

c) Nafarroako 2014-2020 Landa Garapeneko Programaren “Nekazaritzaz bestelako jardueretarako enpresak landa eremuetan sortzea” izeneko 6.2 azpineurriaren laguntzarekin sortutako enpresak.

5. oinarria.–Laguntza jasotzeko baldintzak.

1. Laguntzen araubide honetan sartzeko, eskatzaileek ondoko baldintza hauek bete behar dituzte:

a) Pertsona fisikoei dagokienez:

–Eskaera egiten denean 18 urte beteak izatea.

–Nekazari profesional titularra izatea, edo Nafarroako Nekazaritzako Ustiategien Erregistroan inskribatutako ustiategi baten bazkidea, edo pertsona horren lehen graduko ahaidea.

Nekazari gazteak nekazari profesionaltzat hartzeko, “Nekazari gazteak beren gain jartzea” neurrirako laguntza emateko ebazpena izan behar dute eta/edo Nafarroako Nekazaritzako Ustiategien Erregistroan ogibide nagusia nekazaritza duen nekazari gisa inskribaturik egon.

Ustiategia mikroenpresa edo enpresa txikia izan behar da, Mikroenpresen, enpresa txikien eta enpresa ertainen definizioari buruz Batzordeak emandako 2003/361/EE Gomendioan ezarritakoaren arabera.

b) Pertsona juridikoei dagokienez:

–Mikroenpresa edo enpresa txikia izatea, Mikroenpresen, enpresa txikien eta enpresa ertainen definizioari buruz Batzordeak emandako 2003/361/EE Gomendioan ezarritakoaren arabera.

–Helbide soziala Nafarroan izatea.

–Helburu soziala nekazaritzako jarduera edo nekazaritzako elikagaien jarduera izatea.

–Nekazaritzako jarduera egiten badu:

• i. Nafarroako Nekazaritza Ustiategien Erregistroan inskribatutako ustiapen baten titularra izatea.
• ii. Bazkideen %50, gutxienez, nekazari profesional izatea.
• iii. Gutxienez nekazaritzako 0,50 lan unitateko jarduera izatea guztira.

–Nekazaritzako elikagaien jarduera egiten badu:

• i. Nafarroako Industria Erregistroan inskribatua egotea.
• ii. Europar Batasuna eratzeko Tratatuaren I. eranskinean agertzen diren nekazaritzako produktuak eraldatzeko, merkaturatzeko edo garatzeko jardueraren bat egitea. Salbuespena dira arrantzaren sektoreko enpresak, baita beren emaitza den produktua I. eranskinean jasoa dutenak ere.
• iii. Jarduera ekonomikoa landa eremuetan garatzea.

c) LGPren 6.2 azpineurriaren ondorioz sortua bada:

–Emandako laguntzaren azken ordainketa jaso izana.

d) Zerga betebeharrak eta Gizarte Segurantzarekikoak egunean izatea.

e) Diru-laguntzei buruzko azaroaren 9ko 11/2005 Foru Legearen 13.2 artikuluan laguntzen onuradun izateko ezarritako debeku-egoeretan ez egotea.

2. Gainera, egin beharreko proiektuari dagokionez, honako betebehar hauek bete beharko dira:

a) Nafarroako 2014-2020 Landa Garapeneko Programak landa eremutzat jotzen dituen udalerrietako batean kokatzea.

b) Nafarroako Gobernuaren adostasuna izatea proiektuak ukitzen dituen eremuei dagokienez. Honelako jarduerei lotutako proiektuen kasuan:

–Turismo, ostatu zerbitzuak, aisialdia, jolasaldia eta antzekoak: Garapen Ekonomikorako Departamentuaren aldeko txostena.

–Landa eta kultur ondarea, eta antzekoak: Kultura, Kirol eta Gazteria Departamentuaren aldeko txostena.

–Proiektuaren motagatik behar den beste edozein txosten.

Hala bada, ingurumen eraginaren balorazioa egin beharko da, Ingurumen Babesteko Esku-hartzeari buruzko 4/2005 Foru Legearen arabera, ingurumenean eta biodibertsitatean ondorio kaltegarriak baditu.

Nolanahi ere, unitate arduradunek erabakitzen dituzten neurri zuzentzaileak aplikatuko dira, halakorik bada.

c) Laguntza eskaeraren xedeko inbertsioak edo gastuak ez hastea eskaera aurkezten den eguna baino lehen, kostu orokorrak eta/edo proiektua garatzeko lizentziak kenduta, betiere 2015eko azaroaren 18aren ondorengoak badira (Batzordeak egun horretan eman zuen 8143/2015 Betearazpen Erabakia, Nafarroako 2014-2020 LGPa onesten duena). Horri dagokionez, bidezkoa bada, instrukzio organoak proiektuaren kokalekua bisitatuko du inbertsioak hasi ez direla egiaztatzeko, eta emaitzaren akta eginen du.

d) Deskripzio memoria aurkeztea, Nafarroako Gobernuaren Interneteko atariko izapideen katalogoan laguntza hauen fitxan dagoen ereduaren arabera.

e) Enpresa plana aurkeztea, proiektua identifikatu, deskribatu eta aztertzeko eta proiektuaren bideragarritasun tekniko, ekonomiko eta finantzarioa frogatzeko; gutxienez eduki hau izanen du:

–Proiektua/Jarduera: helburu nagusia, deskribapena eta ezaugarriak, kokalekua, hasierako egoera eta bukaerako egoera.

–Produktuak/Zerbitzuak: deskribapena, betetzen dituen beharrak eta merkatuan dauden beste batzuen aldean dituen abantailak.

–Produkzio plana: produkzio prozesuaren edo zerbitzuaren deskribapena, kontrol sistemak eta kalitate kudeaketa, erabilitako teknologia, instalazioak eta makinak, hornitzaileak eta biltegiratzea.

–Marketin plana: merkatu azterketa, kokapena eta merkatu helburua, prezioen estrategia, salmenten politika, sustapena eta publizitatea, banaketa eta saldu ondoko zerbitzuak eta garantia.

–Antolaketa eta langileria: jarduerak sortzen eta mantentzen dituen lanpostuen azterketa, lan kategoria, egin beharreko zereginak eta prestakuntza plana.

–Plan ekonomiko eta finantzarioa: finantzaketa plana, behin-behineko emaitzen kontua, behin-behineko balantzea, diruzaintza plana eta emaitza ekonomiko-finantzarioen azterketa eta balorazioa.

Planaren informazioak eta deskripzio memoriarenak bat egin behar dute.

f) Proiektuaren konpromiso ekonomikoak bere gain hartzeko finantzaketa ahalmen nahikoa izatea, berezko baliabideen bidez eta/edo laguntza hauekin bateragarriak diren kanpo finantzaketaren bidez.

6. oinarria.–Konpromisoak eta betebeharrak.

Pertsona edo entitate onuradunek konpromiso hauek hartuko dituzte:

a) Gardentasun betebeharraren gaineko aitorpena aurkeztea diru-laguntza eman zaiola jakinarazi eta hilabeteko epean, Gardentasunari eta Gobernu Irekiari buruzko ekainaren 21eko 11/2012 Foru Legean eta irailaren 11ko 59/2013 Foru Dekretuan ezarritakoari jarraikiz.

b) Proiektua gauzatzea aplikatzen ahal zaizkion Europar Batasuneko, Espainiako eta tokiko arauekin bat, batez ere, honako arlo hauen gaineko arauei jarraikiz: gastuetarako diru-laguntzak emateko baldintzak, bateraezintasuna, estatuko laguntzak, kontratazio publikoa, publizitatea, ingurumenaren babesa eta aukera-berdintasuna.

c) Proiektua Nafarroako Foru Komunitateko landa udalerrietan egitea, Nafarroako 2014-2020 LGPko sailkapenaren arabera.

d) Proiektua gauzatzea diru-laguntza emateko ebazpenean adierazten den epean, deusetan galarazi gabe bidezko arrazoiak daudenean onartzen ahal diren luzapenak.

e) Laguntzak jasotzeko ordainketak eta gastuak justifikatzea laguntza emateko ebazpenean ezartzen diren epeetan, eta behar diren agiriak gutxienez bost urtez gordetzea, baita agiri elektronikoak ere.

f) Kostuen moderazioaren gainean ezarritakoa betetzea, 14. oinarrian xedatutakoari jarraikiz.

g) Kontabilitate sistema berezitu bat edo kontabilitate kode egoki bat edukitzea diruz laguntzen den proiektuari lotutako eragiketa guztietarako.

h) Diru-laguntzaren kobrantza erregistratzea kontabilitatean edo erregistro liburuan, Europar Batasunaren (LGENF) eta Nafarroako Gobernuaren partaidetza adierazita, testu honen bidez: 2014-2020 LGP (LGENF-NG).

i) Xede berarekin eskatu edo jaso diren bestelako diru-laguntzen berri ematea.

j) Laguntza eskaera aurkezten den unean, azken hiru zergaldietan jasotako diru-laguntzen berri ematea, de minimis araubidea bete den egiaztatzeko.

k) Bost urtez mantentzea laguntzaren xedeko jarduera, diru-laguntzaren azken ordainketaren ebazpenaren egunetik hasita, ezinbesteko kasuetan izan ezik.

l) Jendeari eragiketaren helburuaren berri eta LGENFek emandako laguntzaren berri ematea, 25. oinarrian ezarritako errekerimenduak betez.

m) Landa Garapeneko, Ingurumeneko eta Toki Administrazioko Departamentuari jakinaraztea azpineurriaren ebaluaziorako eta jarraipenerako adierazleak prestatzeko behar diren datuak.

n) Laguntza ongi eman dela eta gerora konpromisoei eutsi zaiela egiaztatzeko behar diren kontrolak eta egiaztapenak onartzea. Egiaztapen lan horiek Europako Batzordeak, FEAGA-LGENF laguntzen erakunde ordaintzaileak, Nafarroako Landa Garapenerako 2014-2020 Plana kudeatzeko agintaritzak, Estatuko Administrazioaren Kontu-hartze Orokorrak, Kontuen Auzitegiak, Nafarroako Kontuen Ganberak eta Nafarroako Gobernuaren organo fiskalizatzaileek egin ditzakete.

o) Nafarroako Landa Garapenerako 2014-2020 Plana kudeatzeko agintaritzak finkatzen duen beste edozein.

7. oinarria.–Diruz laguntzen ahal diren kostuak.

1. Kostu hauek jaso dezakete diru-laguntza:

a) Ondasun higiezinak eskuratzea; diruz laguntzen ahal den kostu osoaren %25 gehienez.

b) Ondasun higiezinak eraikitzea edo hobetzea: premia berrietara egokitzeko inbertsioak, ez konponketa hutsak edo mantentze lanak.

c) Ekipamendu ondasunen zuzkidura: ekipamendu eta makineria berria erostea, ekipo informatikoak barne; makineriarako eta ekipamendurako instalazioak; erremintak; eta garraiorako edo banaketarako egokitzapena.

d) Diruz laguntzen ahal diren b) eta c) ataletako kostuei lotutako kostu orokorrak (atal horien %12 gehienez): proiektuaren erredakzioa, obra zuzendaritzak, analisiak, saiakuntzak, muntaketako eta eragiketako ingeniaritza, prestakuntza eta/edo informazio jarduerak, bideragarritasunari eta merkatuari buruzko azterlan eta planak, lege eta finantza arloko aholkularitza, peritu lanak, ingurumen arloko aholkularitza eta ekonomiaren eta ingurumenaren arloko iraunkortasunari buruzko aholkularitza.

e) Inbertsio ukiezinak, konparazio batera, programa informatikoak eta lizentziak erosi eta garatzekoak.

f) Proiektuaren sustapena eta zabalkundea.

2. Honako hauen ondoriozko kostuak ez dira diruz lagungarriak:

a) Lurren erosketa eta eskurapen horiekin lotutako gastuak.

b) Ordezpen huts diren inbertsioak, salbu eta erosten diren makinak edo ekipamendua aurrekoak ez bezalakoak badira, erabiltzen duten teknologiagatik, haien errendimenduagatik edo 10 urtetik gorako antzinatasuna izateagatik.

c) Errentamendu finantzarioa eta/edo erosteko aukera duen errentamendua makineria eta ekipoak eskuratzeko.

d) Bigarren eskuko ekipamendua erostea.

e) Ibilgailuak, salbu eta proiektuaren helburua lortzeko egokitzapenen bat egina dutenak, dauzkaten ezaugarriengatik helburu horretarako bakarrik erabil badaitezke.

f) Material suntsikorra.

g) Eskura egindako ordainketak.

h) Enpresa baten ohiko funtzionamendua, hornidurak, interesak eta horien birfinantzaketa, pertsonal-gastua, dietak eta kilometrajea, aseguruak eta beste gastu orokor batzuk.

i) Gastu orokorrak eta industria mozkina.

j) Eskaera aurkeztu baino lehen hasitako inbertsioak edo gastuak, 1.d) atalean definitutako kostu orokorrak eta proiektua garatzeko lizentziak kenduta, betiere 2015eko azaroaren 18aren ondorengoak badira (Batzordeak egun horretan eman zuen 8143/2015 Betearazpen Erabakia, Nafarroako 2014-2020 LGPa onesten duena).

k) BEZa eta/edo pertsona edo entitate onuradunak berreskura ditzakeen zergak ordaintzearen gastuak, interes zordunak eta eragiketa finantzarioen gastuak.

l) Ezkontideen edo lehen mailako ahaideen artean ondasunak eta zerbitzuak eskualdatzea, baita pertsona fisiko eta juridikoen arteko eskualdaketak, baldin horiek bazkide gisa parte hartzen badute.

m) Diruz lagundutako proiektuaren jarduerarekin bat ez datozenak.

8. oinarria.–Laguntza kalkulatzeko sistema.

1. Laguntza kapital diru-laguntza zuzena da, eta haren zenbatekoa kalkulatzeko, diruz laguntzen ahal diren kostuei %40eko laguntza-intentsitatea edo portzentajea aplikatuko zaio.

2. Laguntzaren gehieneko zenbatekoa 200.000 eurokoa da proiektu bakoitzeko.

3. LGENFen parte-hartzea guztirako laguntzaren %31koa izanen da.

9. oinarria.–Diru-laguntzak emateko modua eta hautatzeko irizpideak.

1. Norgehiagokako prozedurari jarraikiz ematen da laguntza, aurkeztutako eskaerak alderatuta, haien arteko hurrenkera ezartzeko.

3. Laguntza hartu ahal izateko gutxienez ere 20 puntu lortu behar dira. Hortik beherako puntuazioa lortzen duten eskaerak ezetsiko dira.

4. Berdinketa gertatuz gero, ingurumeneko alderdietan puntuaziorik altuena duen eskaerak lehenetsiko da. Berdinketak badirau, eskatzailearen izaeran puntuazio altuena lortzen duen eskaera lehenetsiko da. Hala ere berdinketak badirau, proiektuaren kokalekuan puntuazio altuena duena lehenetsiko da. Azkenik, berdinketak jarraitzen badu, “Kalitate deiturei eta/edo sektoreko elkarteei atxikitzea” atalean puntuaziorik altuena duen eskaera lehenetsiko da.

5. Deialdirako dagoen aurrekontu-kreditua nahikoa ez bada laguntzarako eskubidea duten eskaera guztiei diru-laguntza emateko, ezetsi eginen dira aurrekontuan zuzkidura nahikoa ez izateagatik aintzat hartu ezin direnak.

6. Deialdian finkatutako gehieneko kreditua gainditzeagatik, eskaera batek legokiokeen laguntzaren zati bat bakarrik jaso baldin badezake, eskubidea izanen du dagokion kopurua jasotzeko, aurrekontu-kontsignazioaren mugaraino. Dena dela, beste pertsona onuradunen batek diru-laguntza kobratzeko eskubidea galtzen badu, laguntza osatuko zaio, aurrekontu-kontsignazio aski egon izan balitz egokituko zitzaion kopurua berdindu arte.

10. oinarria.–Laguntza eskaerak eta eskatutako dokumentazioa aurkeztea.

1. Eskaerak aurkezteko epea bi hilabetekoa izanen da. Deialdia Nafarroako Aldizkari Ofizialean argitaratu eta biharamunean hasiko da, eta argitalpen egunaren egun baliokidean bukatuko da.

2. Eskaerak telematika bidez aurkeztu behar dira nahitaez, Nafarroako Gobernuak Interneten duen Atariaren (www.nafarroa.eus) izapideen katalogoko fitxa erabiliz. Tramitea egiteko, eskatzailea egiaz bera dela egiaztatu behar da, bere ziurtagiri digitalaren bidez edo IFZ+PIN erabilita.

Behar diren baliabideak ez dituzten edo aholkularitza behar duten eskatzaileei tramitazioa errazteko, Nafarroako Gobernuak erabiltzaileentzako arretaguneak jarriko ditu, eta izapideen katalogoaren fitxan behar bezala iragarriko.

3. Laguntza eskaera 2. eranskinean adierazitako agiriekin batera aurkeztu behar da (dokumentuak eskaneatuta, bereizita eta behar bezala identifikatuta egonen dira).

4. Laguntza eskaera bakarra aukez daiteke deialdiko.

11. oinarria.–Instrukzio organoa.

Neurri honetan aurreikusitako laguntzak emateko prozeduren instrukzioa Landa Garapeneko, Nekazaritzako eta Abeltzaintzako Zuzendaritza Nagusiko Landa Aniztasunerako eta Garapenerako Zerbitzuari atxikitako Landa Aniztasunerako Atalari dagokio.

12. oinarria.–Laguntza eskaerak egiaztatu eta balidatzea.

1. Landa Aniztasunerako Atalak laguntza eskaerak jasotakoan, eskatzen den dokumentazio guztia duten egiaztatuko da. Akatsen bat baldin badago, laguntza eskatzen duen pertsonari eskatuko zaio 15 egun naturaleko epean zuzendu dezala, eta adieraziko zaio, zuzendu ezean, eskaerari uko egiten diola ondorioztatuko dela eta espedientea artxibatzeko ebazpena emanen dela.

2. Dokumentazioa oso-osorik dagoenean, behar diren kontrolak eginen dira, eskatzen diren baldintzak betetzen diren egiaztatzearren.

3. Landa Aniztasunerako Atalak espedientea behar bezala tramitatzeko beharrezkotzat jotzen duen edozein argibide edo dokumentazio eskatzen ahalko du.

13. oinarria.–Kostuen moderazioa.

1. Batzordearen 809/2014 (EB) Betearazpen Erregelamenduaren 48. artikuluak eta Diru-laguntzei buruzko azaroaren 9ko 11/2005 Foru Legearen 28. artikuluak eskatzen dute proposatutako kostuak moderatuak direla egiaztatzea, eta hori ebaluatzeko metodologia zehazten dute.

2. Ondorio horietarako, kostuen moderazioaren printzipioa aplikatu dela bermatzeko, Landa Aniztasunerako Atalak sistema hauek erabiliko ditu, kasuan-kasuan:

a) Erreferentziako kostuak: Modulu hauek aplikatuko dira:

–Ostalaritzarako eraikina egitea eta/edo birgaitzea: 1.328,50 euro/m² erabilgarri.

–Merkataritzako lokala, bulegoa edo antzekoa egitea eta/edo egokitzea: 600 euro/m² erabilgarri.

–Produkzio zentroa egitea eta/edo egokitzea: 380 euro/m².

–Biltegia egitea eta/edo egokitzea: 150 euro/m².

Diruz lagun daitekeen zenbatekoa bi hauen arteko txikiena izanen da: eskatzaileak aurkeztua (proformako fakturaren edo aurrekontuaren bidez) eta modulua aplikatzearen ondoriozkoa.

b) Eskaintza ezberdinak erkatzea: gutxienez hiru aurrekontu edo proformako fakturaren artean hautatzea. Pertsona eskatzaileak horiek aurkeztu beharko ditu, honako kopuru hauek gainditzen direnean:

–30.000 euro, obrak gauzatzeko kostuen kasuan, edo

–12.000 euro, ekipamendu ondasunen horniduren kasuan, edo

–12.000 euro, aholkularitza edo laguntza enpresek ematen dituzten zerbitzuen kasuan.

Eskaintzak hornitzaile independenteek eginak izan beharko dira, eta obra, ondasun edo zerbitzu proiektu berearen gainean prestatuko aurrekontuekin edo proformako fakturekin justifikatu behar dira, merkatuko preziora egokitzen dela justifikatzeko.

Horrez gain, legeak eskatzen duen informazioa izan behar dute, entitatea identifikatzen duten datuen informazio fidagarria bilduta eta, orobat, entregatu beharreko ondasunaren ezaugarri teknikoak, lan egiteko gaitasunak, tamaina eta abar zehatz-mehatz azalduta.

Diruz laguntzen ahal den zenbatekoa finkatzeko, ikuspuntu ekonomikotik onuragarriena den proposamenean agertzen den zenbatekoa hartuko da oinarri.

c) Ebaluazio batzordea: Inbertsioen ezaugarri bereziak direla-eta ezinezkoa baldin bada xedeko lana edo hornidura egiten duten enpresak aurkitzea, entitate eskatzaileak memoria bat aurkeztu beharko du eskaintza bakarra justifikatzeko. Ebaluazio batzordeak txosten bat eginen du azaltzeko ebaluazioa nola egin den eta zein aurrekontu aurkeztu duen: aurkeztutakoa edo beste aurrekontu alternatibo bat. Batzorde hori Landa Aniztasunerako Ataleko talde teknikoko hiru pertsonak osatuko dute.

3. Eskatzaileak aurkeztutako agiriak nahikotzat jotzen ez badira, kostuen moderazioa behar den bermearekin aplikatu ezin zaien kostuak ez dira diruz lagungarritzat joko.

4. Kostuen moderazioa behar bezala aplikatu dela egiaztatzeko kontrolak laguntza esleitu aurretik eginen dira, laguntza eskaeran oinarrituta, eta, beharrezkoa bada, azken ordainketa egin aurretik osatuko dira, pertsona onuradunak aurkeztutako ordainketa eskaeran oinarrituta. Pertsona onuradunak eskatutako aldaketen kasuan ere eginen da egiaztapena.

14. oinarria.–Laguntza emateko ebazpena.

1. Eskaerak balidatu eta ebaluatu ondoren, haien lehentasun ordena ezarriko da 9. oinarrian ezarritako irizpideen arabera.

Ebaluazioa ikusirik, ebazpen proposamena eginen da, non jasoko baita pertsona onuradunek diru-laguntza eskuratzeko behar diren baldintza guztiak betetzen dituztela.

2. Ordainketa bakar batean emanen dira diru-laguntzak, ekitaldiko zein aurrekontu adierazten den deialdian, haren kargura.

3. Ebazpen proposamena ikusirik, Landa Garapeneko, Nekazaritzako eta Abeltzaintzako zuzendari nagusiak diru-laguntzen gaineko ebazpena emanen du, gehienez ere hiru hilabeteko epean, eskaerak aurkezteko epea bukatzen denetik hasita.

Epe hori berariazko ebazpenik eman gabe bukatzen bada, eskaera ezetsitzat joko da.

Aurkeztutako eskaeraren berariazko edo presuntziozko ezespenaren aurka interesdunek gora jotzeko errekurtsoa jartzen ahalko dute, Landa Garapeneko, Ingurumeneko eta Toki Administrazioko kontseilariari zuzendua, administrazio prozedura erkideari buruzko legeriari jarraikiz.

4. Ebazpenean, gutxienez, datu hauek agertuko dira: laguntza eman zaien eskatzaileen zerrenda, laguntzaren zenbatekoa, proiektuak gauzatzeko eta justifikatzeko epeak eta laguntza finantzatzeko funtsen jatorria. Eskaerarik ezetsiz gero, horiek ere espresuki agertuko dira eta, horien artean, aurrekontu-baliabideen esleipena mugatzearen ondorioz ezetsitakoak.

15. oinarria.–Diru-laguntza emateko ebazpenaren aldaketak.

1. Laguntza emateko ebazpenean ezartzen den epean eta moduan gauzatu behar dira proiektuak. Hala ere, aurkeztutako proiektuaren aldaketa nabarmenak dakartzaten inguruabarrak gertatzen direnean, pertsona onuradunak horren berri eman behar du, aldaketak aplikatu baino lehen aldaketa eskaera bat aurkeztuz.

2. Aldaketa nabarmen horiek gauzatu ahal izateko, Landa Aniztasunerako Atalaren baimena behar da. Aldaketa baimentzen ez bada, hasierako proiektua bete beharko da.

3. Proiektuaren aldaketa nabarmentzat hartuko da ondorio hauetako bat duena:

a) Ekoizpen orientazioa aldatzea.

b) Pertsona/entitate onuradunaren titulartasuna aldatzea. Titularrak proiektuaren titulartasuna laga ahalko dio entitate onuradunaren fusioaren, xurgapenaren edo sozietate mota aldatzearen ondoriozko beste titular bati.

c) Laguntzaren oinarri izan diren kostu diruz lagungarriak nabarmenki aldatzea.

d) Aurreikustea laguntzaren oinarri izan diren kostu diruz lagungarrien zenbateko osoaren %60 edo gutxiago gauzatuko direla.

e) Inbertsioen kokalekua aldatzea.

f) Proiektua gauzatzeko epea luzatzea.

4. 16.4 oinarrian ezarritako mugak gainditzen ez dituzten gehikuntzen kasuan, ez da aurreko baimena eskatu behar. Dena dela, pertsona onuradunak behar bezala arrazoitu beharko ditu aldaketa horiek ordainketa eskaeran.

5. Aldaketa eskaerak pertsona onuradunak egin nahi dituen aldaketak azaldu behar ditu, laguntza eskaeran erabilitako zehaztasun maila berarekin, eta bideragarritasuna bermatu behar da.

Aldaketa aplikatu baino lehen egin behar da eskaera.

6. Laguntzak esleitzeko emandako puntuazioa gutxitzea dakarten aldaketak ez dira inola ere onartuko, ez eta proiektua burutzeko epea luzatzeko eskaerak ere, baldin eta, laguntza zein ekitaldiren kargura ematen den, ekitaldi horretako azaroaren 15etik haratago luzatzea eskatzen bada, salbu eta ezinbesteko kasuetan. Hasieran emandako laguntza ez da handituko.

16. oinarria.–Ordainketa eskaera.

1. Laguntza jasotzeko, pertsona onuradunak ordainketa eskaera aurkeztu behar du, 4. eranskinean adierazitako dokumentazioarekin batera, deialdian zehazten den azken ordainketa eginen den aurrekontu ekitaldiari dagokion urteko irailaren 30a baino lehen.

2. Ordainketa eskaera aurkezten ez bada laguntza emateko ebazpenean ezartzen den egunaren aurretik, ondorioztatuko da berariaz uko egiten diola emandako laguntzari, deusetan galarazi gabe Diru-laguntzei buruzko 11/2005 Foru Legearen 35. artikuluan ezarritakoari jarraikiz bidezko diren erantzukizunak.

3. Inbertsio edo gastu bat diruz lagungarritzat jotzeko, baldintza hauek bete behar ditu: faktura edo froga balio bera duen agiria izatea, sartutako kontzeptuak materialki gauzatu izana eta ordainketa, bankuko ziurtagiriaren bidez frogatua, ordainketa eskaeraren egunaren aurretik egin izana.

4. Proiektua nabarmenki aldatzen ez bada eta azken helburua mantentzen badu, onetsitako aurrekontuaren honelako ordezpenak onar daitezke:

a) %10eraino, kostu diruz lagungarrien artean;

b) %35eraino, kostu diruz lagungarri bereko kontzeptuen artean.

5. Landa Aniztasunerako Atalak espedientea behar bezala tramitatzeko beharrezkotzat jotzen duen edozein argibide edo dokumentazio eskatzen ahalko du.

17. oinarria.–Beste laguntza batzuekiko bateragarritasuna.

1. Deialdi honetako diru-laguntzak bateraezinak dira 1305/2013 EB Erregelamenduaren 59.8 artikuluaren arabera Europako funtsekin finantzatuta helburu bererako ematen den beste edozeinekin.

2. Deialdi honetako diru-laguntzak bateraezinak dira gainerako diru-laguntzekin, kasuan kasuko araudiak kontrakoa ezartzen ez badu, deusetan galarazi gabe de minimis araubidearen babespeko beste laguntza batzuen konkurrentziari buruz ezarrita dagoena.

3. Laguntza hauen entitate onuradunek, ordainketa eskaerarekin batera aurkeztu beharreko zinpeko aitorpenaren bidez, justifikatuko dute xede eta helburu bererako beste laguntzarik eskatu duten edo ez, betiere Batasuneko, Espainiako eta Nafarroako araudian eta Nafarroako Foru Komunitateko Landa Garapenerako 2014-2020 Programan ezarritakoaren arabera. Beste laguntzarik jaso badute, dokumentu horretan idatziko dute zein entitatek eman zien eta/edo laguntzaren zenbatekoa.

4. Hartutako laguntzen zenbatekoa, bakarka edo beste batzuekin batera, ezin da inola ere izan egin beharreko inbertsioaren kostua baino handiagoa.

18. oinarria.–Murrizketak eta zehapenak ordainketetan.

1. Alde batetik, murrizketa egin daiteke aldea badago pertsona onuradunak eskatutako ordainketa zenbatekoaren eta bere onargarritasuna aztertu ondoren zehaztutakoaren artean.

Administrazio kontrolak eta tokian bertan egin beharreko kontrolak egin ondoren, ordainketa eskaeran azaltzen den zenbatekoa %10 handiagoa bada onargarritasun azterketa egin ondoren ordaindu beharreko zenbatekoa baino, ordaindu beharreko diru-laguntza zenbateko onargarrira egokituko da, eta bi zenbateko horien arteko aldearen zenbatekoa duen zehapena aplikatuko da. Zehapen hori ez da laguntza osoa kentzeaz haratago joanen.

Ordainketa eskaeraren zenbatekoa emandakoa baino handiagoa bada, ulertuko da aurkeztutako zenbatekoa emandakoa dela.

Edonola ere, ez da zehapenik aplikatuko baldin pertsona onuradunak frogatzen badu, agintari eskudunak onartzeko moduan, bera ez dela onargarri ez den zenbatekoa sartzearen erantzulea, edo agintari eskuduna beste nonbaitetik jabetzen bada pertsona onuraduna ez dela horren erantzulea.

2. Bestetik, murrizketa egin daiteke aldea badago emandako inbertsioaren/gastuaren eta ordainketa eskaeran justifikatutakoaren artean:

a) Justifikatutako inbertsioa/gastua emandakoaren %30etik %60era bitarte bada, ordaindu beharreko diru-laguntza benetako gauzatzeari dagokion zenbatekora doituko da, betiere proiektuaren helburua mantentzen bada, eta %25eko zehapena aplikatuko da.

b) Justifikatzen den inbertsioa/gastua emandako zenbatekoaren %30etik beherakoa bada, emandako laguntza kobratzeko eskubidea galduko da.

3. Aurreko zehapenak ez dira aplikatuko baldin eta pertsona onuradunak frogatzen badu ezinbesteko arrazoiengatik gertatu direla aldaketa horiek, edo gerora sortutako eta pertsona onuradunari egotzi ezin zaizkion arrazoien frogagiriak aurkezten baditu.

19. oinarria.–Ordaintzeko ebazpena.

1. Landa Aniztasunerako Atalak kontrolak eginen ditu, hala agiri bidezkoak nola bertatik bertara, pertsona onuradunak hartutako konpromisoak bete diren egiaztatzeko, bai, orobat, gauzatzen den proiektua onartutakoaren araberakoa den. Kontrolen emaitzak ikusirik, laguntza ordaintzeko ebazpen proposamena prestatuko du.

2. Landa Garapeneko, Nekazaritzako eta Abeltzaintzako Zuzendaritza Nagusiak laguntza emateko edo ukatzeko ebazpena emanen du. Ebazpen hori arrazoitua izan behar da, eta oinarriak egiaztatuak egonen dira. Laguntzaren onuradunak jaso behar dira bertan. Administrazio egintza hori proiektuaren pertsona onuradunari igorriko zaio, eta, bidezkoa bada, laguntzaren ordainketa haren banku-kontuan eginen da.

20. oinarria.–Ez-betetzeen mailakatzea, murrizketak eta salbuespenak.

1. Ezarritako konpromiso eta betebeharrak betetzen ez badira, laguntza egokitu edo laguntza osoa itzuli beharko da. Ez-betetzea nolakoa den, laguntza honenbeste murriztu edo itzuli beharko da:

a) Gardentasun betebeharrari buruzko aitorpena aurkezten ez bada diru-laguntza eman dela jakinarazi eta hilabeteko epean: %100.

b) Proiektua gauzatzen ez bada Europar Batasuneko, Espainiako eta tokiko araudiaren arabera: %100.

c) Proiektua gauzatzen ez bada laguntza emateko ebazpenean ezarritako epean edo onartzen diren luzapenen barrenean: %100.

d) Hautatzeko irizpideen puntuazioa aldatzea, atal jakin batzuetan (jardueraren kokalekua, jarduera berriaren sektoreko elkarte espezifikoen bazkidea, energia berriztagarriko berokuntza eta etxeko ur beroaren instalazioa, energia elektriko berriztagarriaren kontsumoa eta azpiproduktuak lehengai gisa erabiltzea), horren ondorioz onuradun izaera galduko zukeena: %100.

e) Jarduera bertan behera uztea: %100. Ulertuko da jarduera ez dela bertan behera utzi baldin eta, azken ordainketaren ebazpena eman ondoren, pertsona onuradunak jardueraren titulartasuna beste pertsona edo entitate bati laga badio, betiere lehenbizikoari onuradunaren izaera eman zizkioten baldintza guztiak betetzen baditu eta hasierako onuradunak hartutako konpromisoak onartzen baditu, edo entitate onuradunaren fusioaren, xurgapenaren edo sozietate mota aldatzearen ondoriozko bati.

f) Kostuen moderazioari buruz ezarritakoa betetzen ez bada: horrek eragindako kostuei dagokien laguntzaren %100.

g) Porrota: %100.

h) Kudeaketa agintaritzak egiten dituen kontrolak onartzen ez badira: %100.

i) Segimendu eta ebaluazioari buruzko datuak jakinarazten ez bazaizkio kudeaketa agintaritzari: %25.

j) Publizitatearen gainean ezarritakoa betetzen ez bada: %25. Ez-betetze hori errepikatzen bada: %50.

k) Gainerako betebeharrak betetzen ez badira: %10.

2. Ezinbesteko kasu edo salbuespenezko inguruabar hauetako bat gertatzen denean, ez da ondorioztatuko konpromisoak ez direla bete, betiere pertsona onuradunak edo haren eskubidedunak idatziz jakinarazten badu eta behar diren probak eransten baditu:

a) Onuraduna hiltzea.

b) Onuradunak lanerako ezintasun luzea izatea.

c) Hondamendi natural larria.

d) Jardueraren eraikinen eta/edo instalazioen suntsipena, istripuz.

e) Enpresa osoa edo haren zati handi bat desjabetzea, baldin eta eskaera aurkeztu zenean ezin bazen desjabetzea aurreikusi.

3. Egiaztatzen bada pertsona onuradunak gezurrezko adierazpen bat egin duela nahita, emandako laguntza bertan behera utziko da eta ordaindutako zenbateko guztiak berreskuratuko dira. Gainera, onuraduna neurri horretarako laguntzetatik bazterturik geldituko da, ekitaldi horretan eta hurrengoan, deusetan galarazi gabe Diru-laguntzei buruzko azaroaren 9ko 11/2005 Foru Legean ezarritako zehapenak edo adierazpen hori aurkezteko unean iruzurraren kontrako borrokarako indarrean dagoen arauditik datozenak.

4. Artikulu honen 1. eta 2. zenbakietako xedapenak aplikatuko dira, baita NBEFren zirkularretan landa garapenerako laguntzen murrizketak eta bazterketak aplikatzeko irizpideei buruz ezarrita dagoena ere.

21. oinarria.–Itzulketak, arau-hausteak eta zehapenak.

1. Europar Batasuneko araudian xedatutakoa galarazi gabe, itzulketak, arau-hausteak eta administrazio zehapenak Diru-laguntzei buruzko azaroaren 9ko 11/2005 Foru Legean xedatutakoarekin bat etorriko dira.

2. Arau-hausteak finkatzeko eta zehapenak ezartzeko prozedura Administrazio Publikoen Administrazio Prozedura Erkideari buruzko urriaren 1eko 39/2015 Legean ezarritakoaren araberakoa izanen da.

22. oinarria.–Publizitatea.

1. Oinarri arautzaile hauen esparruan ematen diren laguntzen publizitateari dagokionez, Nafarroako 2014-2020 Landa Garapeneko Programan eta Europar Batasuneko, Espainiako eta eskualdeetako arauetan ezarritakoari jarraikiko zaio. Horretarako, pertsona onuradunek Batasunaren laguntza finantzarioaren berri eman beharko dute;

a) Informazio eta komunikazio jarduera guztietan.

b) Pertsona onuradunaren erabilera profesionalerako webgunean, baldin eta loturaren bat ezarri baldin badaiteke webgunearen xedearen eta eragiketari emandako laguntzaren artean.

c) Laguntza publikoa 50.000 eurotik gorakoa bada, gutxienez A3 neurriko informazio panel bat jarri beharko da jendeak ongi ikusteko moduko toki batean.

Informazio hau agerrarazi behar da: jardueraren azalpen laburra; Batasunaren ikurra, web-orri honetan dauden arau grafikoekin bat: http://europa.eu/european-union/about-eu/symbols/flag_es Ikurraren ondoan, Batasunaren eginkizunaren azalpena agertuko da, “Landa Garapenerako Europako Nekazaritza Funtsa: Europak landa eremuetan inbertitzen du” testuaren bidez, eta Nafarroako Gobernuaren logotipoa.

2. Oinarri arautzaile honen babesean ematen diren diru-laguntzak jendaurrean jarriko dira, 1306/2013 (EB) Erregelamenduaren 111. artikuluan xedatutakoarekin bat.

2. ERANSKINA

Laguntza eskaerarekin batera aurkeztu beharreko dokumentazioa

Laguntza eskaerarekin batera honako dokumentazio hau aurkeztuko da:

1. IFZ

2. Familia liburua

3. Estatutuak eta eraketaren eskriturak

4. Laguntza eskatzeko akordioa

5. Nekazaritzako ustiategiaren titularraren edo bazkideen baimena

6. Proiektu teknikoa edo memoria baloratua

7. Lurzati zedula

8. Errentamendu-kontratua

9. Erabilera lagatzea/beste modalitate batzuk

10. Salerosketaren eskriturak

11. Tasatzaile independente baten ziurtagiria

12. Lizentziak eta baimenak, edo horiek eskatu izanaren agiriak

13. Ekonomia-jardueren gaineko zergaren ordainketan egunean egotearen ziurtagiria

14. Proiektuak ukituko dituen esparruetako erakunde eskudunen txostena

15. Inbertsioen proformako fakturak

16. Deskripzio memoria, Nafarroako Gobernuaren Interneteko atariko izapideen katalogoan dagoen ereduaren arabera

17. Enpresa plana

18. De minimis adierazpena

19. ETEren deklarazioa

20. Transferentzia bidez ordaintzeko eskaera

21. Jarduera berriaren sektoreko elkarte espezifikoen bazkidea dela frogatzen duen agiria

Espedientearen tramitazioan beste agiri batzuk eska daitezke, jarduera berriaren arabera.

Pertsona edo entitate eskatzaileak Landa Aniztasunerako Atalari baimenik ematen ez badio eskabide-orrian adierazitako datuen artetik laguntza tramitatu eta ebazteko beharrezkoak direnak egiaztatzeko Nafarroako Gobernuko edo beste Administrazio Publiko batzuetako organoen bitartez, behar den dokumentazioa erantsi beharko du.

4. ERANSKINA

Ordainketa eskaerarekin batera aurkeztu beharreko dokumentazioa

Ordainketa eskaerari agiri hauek erantsi behar zaizkio:

1. Azken gauzatze-memoria, Nafarroako Gobernuaren Interneteko atariko izapideen katalogoan dagoen ereduaren arabera

2. Egindako ekintzen fakturak eta dagozkien bankuko ordainagiriak.

3. Alta jarduera ekonomikoen gaineko zergan eta nekazaritzaz bestelako jardueraren azken ordainagiria.

4. Hala bada, obra-lizentzia, jarduera sailkatuaren lizentzia, obraren bukaerako ziurtagiria eta/edo irekitzeko lizentzia.

5. Hautatzeko irizpide hauek betetzen direla justifikatzeko agiriak, laguntza eskaerak horiengatik puntuak jaso baditu:

i. Jarduera berriaren sektoreko elkarte espezifikoen bazkidea.

ii. Energia berriztagarriko berokuntza eta etxeko ur beroaren instalaziorako inbertsioen edo horniduraren justifikazioa.

iii. %100ean berriztagarria den energia elektrikoaren kontsumoaren justifikazioa, zerbitzu hori eskaintzen duen entitate merkaturatzaile batekin sinatutako kontratu baten bidez eta/edo bere instalazio berriztagarri baten bidez.

iv. Azpiproduktuak lehengai gisa erabiltzen dituen jarduera.

6. Publizitate plakaren argazkia.

7. Bestelakoak, jardueraren eta enpresa planean eta laguntza emateko ebazpenean adierazitakoaren arabera.

Pertsona eskatzaileak Landa Aniztasunerako Atalari baimenik ematen ez badio eskabide-orrietan adierazitako datuen artetik laguntza tramitatu eta ebazteko beharrezkoak direnak egiaztatzeko Nafarroako Gobernuko edo beste Administrazio Publiko batzuetako organoen bitartez, behar den dokumentazioa erantsi behar du.

Iragarkiaren kodea: F1700146