1. NAFARROAKO FORU KOMUNITATEA
1.7. BESTELAKOAK
1860/2014 EBAZPENA, azaroaren 25ekoa, Nafarroako Unibertsitate Publikoko errektoreak emana. Haren bidez agintzen da argitaratzeko “Gobernu Kontseiluaren Erabakia, Nafarroako Unibertsitate Publikoko Administrazio eta Zerbitzuetako langile funtzionarioen prestakuntza eta hobekuntza profesionala arautzen dituena”. 2014ko azaroaren 25eko Gobernu Kontseiluak hartutako erabaki baten bidez onetsi zen.
Maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitaratzeko 2014ko azaroaren 25eko Gobernu Kontseiluak hartutako erabakia, “Nafarroako Unibertsitate Publikoko Administrazio eta Zerbitzuetako langile funtzionarioen prestakuntza eta hobekuntza profesionala arautzen dituena”.
ERABAKIA, NAFARROAKO UNIBERTSITATE PUBLIKOKO ADMINISTRAZIO ETA ZERBITZUETAKO LANGILE FUNTZIONARIOEN PRESTAKUNTZA ETA HOBEKUNTZA PROFESIONALA ARAUTZEN DITUENA
Unibertsitateko Gobernu Kontseiluaren 2006ko abenduaren 20ko erabakiaren bidez Nafarroako Unibertsitate Publikoaren administrazio eta zerbitzuetako langileei aplikatzen zaien araubide juridikoa Nafarroako Foru Erkidegoaren araudira egokitzeko prozesua hasi zen, 2003ko maiatzaren 12ko 110/2003 Foru Dekretuak, Nafarroako Unibertsitate Publikoaren Estatutuak onesten dituenak, 106.1 artikuluan ezarritako arau-agindua betez.
Nafarroako Unibertsitate Publikoaren zerbitzupeko administrazio eta zerbitzuetako langile funtzionarioen prestakuntza eta hobekuntza profesionala eskaintzea beharrezkotzat jotzen da. Hori dela-eta Nafarroako Unibertsitate Publikoari egokituta aplikatuko dira esparru horretako foru arau hauek: 1997ko apirilaren 14ko 96/1997 Foru Dekretua eta 2004ko abenduaren 30eko 199/2004 Foru Agindua.
Premisa horiek kontuan hartuta, Unibertsitateko Kudeatzailetzak Unibertsitatearen arau propio bat prestatu du, NUPeko funtzionarioen prestakuntza arautuko duena. Hona hemen hitzez hitz.
Kudeatzailetzak proposatuta eta Nafarroako Unibertsitate Publikoan ordezkaritza duten sindikatuekin aurretik negoziatuta, honako hau da bere kideek aurretik eztabaidatu eta gero, Gobernu Kontseiluak, 2014ko azaroaren 25ean egindako bileran, hartu duen
ERABAKIA:
Lehena.–Nafarroako Unibertsitate Publikoko administrazio eta zerbitzuetako langile funtzionarioen prestakuntza eta hobekuntza profesionala arautzen dituen erabakia, erabaki honi atxiki zaiona, onestea.
Bigarrena.–Erabaki hau Kudeatzailetzari eta Giza Baliabideen Zerbitzuari igortzea.
Hirugarrena.–Erabaki honek indarra hartuko du Nafarroako Aldizkari Ofizialean argitaratu eta biharamunean.
Iruñean, 2014ko azaroaren 25ean.–Errektorea, Julio Lafuente López.
ERANSKINA
Erabakia, Nafarroako Unibertsitate Publikoko Administrazio
eta Zerbitzuetako langile funtzionarioen prestakuntza
eta hobekuntza profesionala arautzen dituena
1. artikulua. Xedea.
Erabaki honen xedea da Nafarroako Unibertsitate Publikoko Administrazio eta Zerbitzuetako Langile (AZL) funtzionarioen garapen profesionala sustatzea, bere prestakuntzaren eta hobekuntza profesionalaren bidez.
2. artikulua. Prestakuntza erregimenean dauden langileak.
Zerbitzu berezien egoeran deklaratuko da hurrengo artikuluetan ezarritako betekizun eta erregimenarekin, bere prestakuntzarako eta hobekuntzarako jarduerak egiteko agindua jasotzen duen langilea. Langile horrek, goragoko maila edo talde batean zerbitzu aktiboan egoteko modua ematen dioten irakaskuntza titulazioak ez diren beste irakaskuntza titulazioetako jardun profesionalen bidez, egingo ditu jardun horiek.
Aldi berean egingo dira, hala egin behar bada, prestakuntzarako izangaien zerrendak osatzeko hautaprobak eta aldi baterako kontratatzeko izangaien zerrendak osatzeko deialdietan ezarritakoak.
Hala egiten bada, bi zerrenda desberdin osatuko dira hautaprobak gainditzen dituztenekin, eta prestakuntzarako izangaien zerrendak lehentasuna izango du aldi baterako kontrataziorako zerrendaren aurrean.
3. artikulua. Ezaugarriak.
Aldi baterako kontratazioa egin baino lehen, Nafarroako Unibertsitate Publikoak bete nahi dituen lanpostuetan aritzeko aukera eskainiko die bere langile funtzionarioei, betiere langile horiek beren lanpostuan zerbitzu ematen hiru urtez aritu badira gutxienez ere.
Aurreko paragrafoan ezarritakoa gorabehera, lege edo erregelamendu batek hala aginduta, lanpostu batzuk, modu iraunkorrean betetzeko, aldi berean lanpostu jakin batzuetan ari den langileentzat erreserbatuta daude, eta, hortaz, lanpostu horiek langile horiei eskainiko zaizkie era murriztuan.
Nafarroako Unibertsitate Publikoak onetsitako deialdi publikoen bidez, deialdi horietan ezarritako hautaprobak gaindituta, sartuko dira langile funtzionarioak prestakuntza izangaien zerrendetan.
4. artikulua. Betekizunak.
1. Prestakuntzarako izangaien zerrendak osatzeko deialdietan onartua izateko, langile bakoitzak betekizun hauek bete behar ditu:
a) Deialdiaren xede diren lanpostuena baino maila edo talde baxuago bati atxikia egotea.
b) Bere lanpostuan zerbitzu ematen hiru urteko antzinatasuna izatea, gutxienez.
c) Ez egotea eszendentzian, ez bada eszedentziak lanpostua erreserbatzeko eskubidea ezartzen duela.
d) Dagokion deialdian eskatutako titulazioaren jabe izatea, zerbitzu aktiboan egoteko modua ematen dion titulazioa ez den beste bat izango dena.
2. Dagozkion deialdietan ezarritako eskaerak aurkezteko epearen amaiera-egunerako bete beharko dira aurreko betekizunak, eta izangaiari deitzen zaion unean eta prestakuntza-aldian ere bete beharko dira.
3. Euskara edo beste hizkuntza batzuk jakitea nahitaezkoa den lanpostuetara aurkezteko, eskatutako hizkuntza maila badaukala egiaztatu beharko du izangaiak, plantilla organikoan ezarritako ezagutza mailekin bat etorriz.
5. artikulua. Prestakuntzako izangaien lehentasuna.
1. Prestakuntzarako izangaien lehentasuna dagozkion hautaprobak egiteko ordena kronologikoak ezarriko du (zerrenda zaharrenak lehentasuna izango du zerrenda berrienaren aurrean), eta, horren barruan, probetan lortutako puntuazio handienaren arabera antolatuko dira.
2. Puntuazioan berdinketak badaude, antzinatasun handiena duenaren alde ebatziko dira, eta antzinatasun hori deialdi bakoitzean eskaerak aurkezteko epearen amaieran bakoitzak aitortuta daukana izango da.
6. artikulua. Izangaiei deitzea.
Prestakuntzarako izangaien zerrendak erabaki honetan ezarritako irizpideekin bat etorriz ordenatu eta gero, izangaiei dei egiterakoan administrazio zerbitzu edo unitateetan gertatzen diren beharrak hartuko dira kontuan, irizpide hauekin bat etorriz:
a) Orokorrean banaka dei egingo zaie izangaiei, zerbitzuko beharrekin bat etorriz.
Izangaiak errazago aurkitzeko, AZL izangaiak harremanetarako telefonoak eta posta elektronikoko helbideak jakinarazi beharko ditu, eta uneoro eguneratuak eduki beharko ditu.
Justifikatutako arrazoiengatik lanpostuan ez badago, eta ezin bada aurkitu zerrendako izangai bat, hurrengo izangaiari edo izangaiei deituko zaie eskaintzen den lanpostua betetzen den arte.
Izangaiek beren lekuan jarraituko dute zerrendan, baldin eta beraiekin harremanetan jartzerik lortzen ez bada.
b) Aurrez ikusten bada lanpostu bat hiru hilabeterako edo gehiagorako izango dela orduan bakarrik eskainiko da prestakuntzarako zerrendetarako.
c) AZL funtzionario bat zerbitzu berezien egoerara igarotzen bada, prestakuntzako beste AZL funtzionario bat izendatuko da, beharrezkoa bada.
d) Prestakuntzarako zerbitzu berezien egoerako lanpostu bat betetzen ari direnei, ez zaie deituko izangai gisa agertzen diren beste ezein zerrendatatik, dei berria zerrenda berri desberdin batetik egindakoa ez bada, eta, gainera, goragoko maila bateko lanpostu bati dagokiona.
e) Aurreko idatz-zatian ezarritakoa galarazi gabe, lanpostua erreserbatzeko eskubidea eskaintzen duten administrazio egoeretan daudenei bakarrik dei egingo zaie, baldin eta dei egindako unean zerbitzu aktiboan badaude. Nolanahi ere, deia onartzeko administrazio-egoera horri uko egin behar zaio aurretiaz.
Deia egiten den unean eginkizunik gabeko egoeran daudenei ez zaie deituko, baina dagokion zerrendan beren tokia izaten jarraituko dute, egoera horiek amaitzen direnean berriro dei egiteko.
f) Deia egiten den unean lanean aritzeko ezintasun egoeran edo norberaren kontuengatik ordaindu gabeko baimen egoeran daudenei ez zaie eskainiko prestakuntzako lanposturik, baina dagokion zerrendan beren lekua izaten jarraituko dute, egoera horiek amaitzen diren unean berriro deitzeko.
Aurreko paragrafoan adierazitako egoeretako batean daudenek zerbitzu emateko prest daudela jakinarazi beharko dute dagokion dokumentazioaren bidez. Dokumentazio horretan jasoko da noiz amaitu diren egoera horiek, eta izangaiei ez zaie deituko jakinarazpen hori egiten ez duten bitartean.
Deia egiten den unean haurdunaldiaren, amatasunaren edo adopzioaren ondorio den edozein gorabehera dutenei prestakuntzako lanpostua erreserbatuko zaie egoera amaitzen den arte, gehienez ere 6 hilabete.
7. artikulua. Deiari uko egitea.
Dei egiteko bidea eman duen zerrendako norbaitek uko egiten badio eskainitako lanpostua prestakuntza erregimenean betetzeari, zerrendatik kanpo utziko dute, eta bere eskubideak galduko ditu, ez bada eskainitako lanpostua jatorrizko lanpostuaren hiria ez den beste batean dagoela.
8. artikulua. Prestakuntzarako zerbitzu berezien egoeran deklaratzea.
Lanpostu bat prestakuntzan betetzea onartzen dutenak arrazoi horregatik zerbitzu berezien egoeran daudela deklaratuko da, gehienez ere urte bateko aldirako hasiera batean, eta aldi hori urte bateko aldietan luzatzeko aukera izango da, gehienez ere sei urte bete arte.
Prestakuntzan sei urteko gehieneko epe hori bete eta gero, langile funtzionarioek automatikoki hasi beharko dute berriz ere zerbitzu aktiboan zerbitzu berezietan deklaratu zituztenean betetzen ari ziren lanpostuan, eta ezin izango dira berriz ere zerbitzu berezietan deklaratu arrazoi beragatik.
Izendapen librearen edo behin-behineko izendapenaren bidez izendatutako lanpostu batetik badatoz, egoera amaitutzat joko da.
Hainbat prestakuntza zerrendatan daudenak, gehienez ere eta guztira sei urte egongo dira prestakuntzarako zerbitzu berezien egoeran.
Prestakuntzarako zerbitzu berezien egoera, hasierako deklarazioa eta bere luzapen guztiak barne, sei urtetik beherako aldi baterako bada, aldi horren amaieran, zerrendan dagokion lekua izango du berriz ere izangaiak, erabaki honen 5. artikuluan ezarritako irizpideekin bat etorriz.
Prestakuntzarako zerbitzu berezien egoeran deklaratzeko berariazko administrazio ebazpen bat emango da aldi jakin baterako.
Egoera horretan dagoen bitartean, langile funtzionarioa ez da izango ezein unitate organikotako buru edo zuzendaria.
Langile funtzionarioak lortzen duen lanpostua nolakoa den alde batera utzita, zerbitzu berezien egoeran deklaratzeak ez du aldatuko, inola ere, izendapena baino lehenago zuen araubide juridikoa.
Halaber, bere gizarte segurantzaren erregimena ere ez da aldatuko, eta bere jatorrizko lanpostuan zeukan erregimen bera izango du.
9. artikulua. Prestakuntzarako zerbitzu berezien egoeraren amaiera.
Prestakuntzarako zerbitzu berezien egoera automatikoki amaituko da arrazoi hauetako bat gertatzen denean:
a) Prestakuntzarako zerbitzu berezien egoeran sei urteko gehienezko aldia betetzeagatik.
b) Prestakuntzarako zerbitzu berezien egoeraren hasierako deklarazioan edo luzapenetan ezarritako aldia betetzeagatik.
c) Nafarroako Unibertsitate Publikoko organo eskumendunak erabakita, izangaiaren izendatzeko premia arrazoiak ez daudela justifikatzen badu, edo erabaki hori hartzea aholkatzen duten zerbitzu edo antolaketa arrazoiak daudela justifikatzen badu.
d) Interesdunak uko egin diolako edo prestakuntzan onartutako lanpostuan lanean hasi ez delako.
e) Lanpostua bete delako, dela behin-behinean, aldi baterako edo behin betiko, bere lanpostua betetzeko egokitua edo gaitua ez dagoen langile funtzionario bati beste lanpostu bat ematen zaiolako.
f) AZL funtzionarioa prestakuntzan betetzen ari den lanpostuaren maila edo talde bereko edo goragoko lanpostu batean hasi delako modu iraunkorrean.
Aurreko idatz-zatian ezarritako arrazoiak galarazi gabe, lanpostua erreserbatzeko eskubidea duen AZL funtzionarioa ordeztu behar denean, prestakuntzarako zerbitzu berezien egoera iraungi egingo da, horrez gainera, ordeztutako pertsona berriz lanean hasten denean, legearen edo erregelamenduaren bidez ezarritako epearen mugaeguna iristen denean, edo, arrazoia zeinahi dela ere, lanpostua erreserbatzeko eskubidea iraungitzen denean.
Halaber, lanpostu hutsak aldi baterako betetzen diren kasuetan, prestakuntzarako zerbitzu berezien egoera iraungi egingo da, horrez gainera, erregelamenduaren bidez ezarritako prozeduretako baten bidez lanpostua betetzen denean, edo lanpostua amortizatzen denean.
10. artikulua. Zerrendatik kanpo uztea.
Deia egiteko bidea eman duen zerrendatik kanpo utziko dira eta beren eskubideak galduko dituzte egoera hauetako batean daudenek:
a) Inolako arrazoirik eman gabe deia egin den unean eskainitako lanpostua betetzeari uko egiten dutenek.
b) Prestakuntzarako zerbitzu berezien egoerari uko egiten diotenek, ez bada prestakuntzako langile funtzionarioa eszedentzia bereziko egoeran deklaratzea izan dela uko egiteko arrazoia.
c) Prestakuntzako langile funtzionarioa ez hastea lanean lortu duen lanpostuan.
Maila edo talde desberdineko lanpostu batean modu iraunkorrean hasten den funtzionarioa prestakuntzako izangaien zerrendetatik kanpo utziko dituzte eta bere eskubideak galduko ditu, baldin eta zerrenda horietako lanpostuek maila berdina edo baxuagoa badute, betetzen hasi den lanpostuak baino.
Agertzen diren prestakuntzako izangaien zerrenda guztietatik kanpo utziko dituzte eta beren eskubideak galduko dituzte erabaki honen aplikazio eremutik kanpo geratzen diren langile funtzionarioek, bai eta borondatezko eszedentziaren egoerara igarotzen direnek (lanpostu erreserbak irauten duen lehenengo 18 hilabeteak salbu).
Halaber, agertzen diren zerrenda guztietatik kanpo utziko dituzte prestakuntzako 6 urteko gehieneko aldia betetzen duten langile funtzionarioak.
Prestakuntzako izangaien zerrendetatik kanpo utzitako langile funtzionarioek zerrenda horietan berriz onartuak izatea eskatzeko aukera izango dute, Nafarroako Unibertsitate Publikoak berariaz onartzen dituen deialdietan parte hartu, eta dagozkien hautaprobak gainditzen badituzte.
Nolanahi ere, prestakuntzako izangaien zerrendetan berriz sartuko da, bakar-bakarrik, prestakuntzako sei urteko gehienezko epea bete arte.
11. artikulua. Lansariak.
1. Egoera honetan deklaratutako langile funtzionarioak lehenago zituen lansariak jasotzen jarraituko du, eta, horretaz gainera, titularra den lanpostuari dagokion lansaria, zerbitzu berezietan betetzen ari den lanpostuaren lansariekin parekatzeko beharrezkoa den kopurua, graduari eta antzinatasunari dagozkionak kanpo utzita, ez baitira aldatuko.
2. Aurreko idatz-zatian aipatutako aldea lansarietan langile funtzionarioari aldi baterako emandako eginkizunak betetzeagatik ordaintzen zaiona da, eta, hortaz, jasotzeari utziko dio automatikoki lanpostua uzten duenean, eta inolaz ere ez da izango eskuratutako eskubidea, ez du eskubide pasiborik sortuko edo behin betiko hartzeko eskubiderik emango.
12. artikulua. Ebaluazioa eta jarraipena.
1. Giza Baliabideen Zerbitzuari ematen zaio langile funtzionarioen prestakuntza ebaluatu, haren jarraipena egin eta ikuskatzeko ardura, zerbitzu ematen duten atalarekin edo zerbitzuarekin lankidetzan.
Ebaluazioa lanpostuaren betetzeari eta eraginkortasunari buruzko balioespen bat izango da, eta zerbitzu ematen den administrazio unitateko arduradunak, Langileen Kudeaketa Ataleko buruak eta Giza Baliabideen Zerbitzuko zuzendariak osatutako batzorde batek egingo du.
Kudeatzaileak zilegi du prestakuntza aldia bukatutzat jotzea, gehieneko epea bete baino lehen, aurreko paragrafoan aipatzen den ebaluazioa aurkakoa bada.
2. Egoera honetan deklaratutako langile funtzionarioak lehentasuna izango du prestakuntza-ikastaroak egiteko, betiere NUPek antolatzen baditu eta langile funtzionario horrek betetzen duen lanpostuarekin lotuta badaude.
13. artikulua. Kudeaketaren eskumena.
Erabaki honetan aipatutako zerbitzu berezien egoeran deklaratzeko eskumena errektoreari edo berak eskuordetzen duenari dagokio. Eskaintza egiteko eskumena Langileen Kudeaketako Atalari dagokio.
Xedapen Gehigarria.–Akordio honetan, gaztelaniaz, genero maskulinoan emandako izendapenak genero femeninoan emanda daudela ulertuko da, emakumeak badira izendatuak.
Xedapen Indargabetzailea.–Arau honetan ezarritakoa urratzen duten maila bereko edo txikiagoko xedapen guztiak indargabetu dira.
Azken Xedapena.–Indarra hartzea.
Nafarroako Aldizkari Ofizialean argitara eman, eta biharamunean hartuko du indarra Erabaki honek.
Iragarkiaren kodea: F1416214
