Iragarkia

53. ALDIZKARIA - 2013ko martxoaren 18a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

88/2013 FORU AGINDUA, martxoaren 5ekoa, Ekonomia, Ogasun, Industria eta Enpleguko kontseilariak emana, 216 eredu berria onesten duena ez-egoiliarren errentaren gaineko zergako atxikipenen eta konturako sarreren aitorpena eta diru-sarrera egiteko, finkagune iraunkorrik gabe lortutako errentei buruz.

Estatuaren eta Nafarroako Foru Komunitatearen arteko hitzarmen ekonomikoak 28. artikuluan ezartzen du Estatuak uneoro ezartzen dituenen eduki bereko arau substantibo eta formalak aplikatuko dituela Foru Komunitateak ez-egoiliarren errentaren gaineko zerga ordainarazteko, eta eskumena esleitzen dio zergaren aitorpenerako eta diru-sarrerarako ereduak onesteko, lurralde komunekoen datu berak badituzte gutxienez ere, baita diru-sarrerarako Estatuko Administrazioak adierazitakoetatik funtsean aldentzen ez diren epeak emateko ere.

Ez-egoiliarren errentaren gaineko zergari buruzko Legearen Testu Bategineko 31. artikuluak (martxoaren 5eko 5/2004 Legegintzako Errege Dekretuak onetsia) atxikipenak eta konturako sarrerak egiteko betebehar orokorra arautzen du zergadunek finkagune iraunkorrik gabe lortutako zerga honen menpeko errentei buruz.

Ekonomia eta Ogasuneko kontseilariaren maiatzaren 14ko 82/1999 Foru Aginduak 216 eredua onetsi zuen ez-egoiliarren errentaren gaineko zergako atxikipenen eta konturako sarreren aitorpena eta diru-sarrera egiteko, finkagune iraunkorrik gabe lortutako errentei buruz, eta maiatzaren 2ko 102/2001 Foru Aginduak 216 eredua onetsi zuen eurotan. Biek dituzte aipamenak Ez-egoiliaren Errentaren gaineko Zergari buruzko Legearen egungo Testu Bateginaren (martxoaren 5eko 5/2004 Legegintzako Errege Dekretuak onetsia) aurreko araudiari buruz eta hura garatzeko uztailaren 30eko 1776/2004 Errege Dekretuaren bidez onetsitako Erregelamenduari buruz. Arrazoi horrek eta ondoren azaltzen direnek justifikatzen dute beste foru agindu bat prestatu beharra 216 eredua onesteko.

Tributuak kudeatzeko, bai Zerga Administrazioari bai zergadunei abantailak ematen dizkienez, komenigarri da aitorpena eta diru-sarrera egiteko eredu hau telematika bidez aurkeztu ahal izatea; bide hori nahitaezkoa izanen da Ekonomia eta Ogasuneko kontseilariaren uztailaren 3ko 132/2009 Foru Aginduan ezarritako kasuetan. Foru agindu horren bidez, aitorpen-likidazioak, autolikidazioak, urteko aitorpen-laburpenak, informazio-aitorpenak, jakinarazpenak eta zerga arloko araudiak eskatutako beste agiri batzuk telematika bidez eta ordenagailuz irakurtzeko euskarriaren bidez aurkeztera behartzen duten kasuak arautzen dira. Orobat, paper aurreinprimatua desagertzea ezartzen da; hortaz, 216 eredua paperean aurkezten ahalko da, hura Nafarroako Zerga Ogasunak inprimakiak sortzeko duen zerbitzuan lortuta, ez beste inon.

Bestetik, aldaketa txikiak egin dira aurkezteko eta diru-sarrera egiteko epean, luzatu egin baita bigarren eta laugarren hiruhilekoetako aitorpenentzat abuztuaren 5a arte eta urtarrilaren 31 arte, hurrenez hurren. Enpresa handiak diren atxikitzaile edo tributudunentzat, balio erantsiaren gaineko zergaren erregelamenduko (martxoaren 8ko 86/1993 Foru Dekretuak onetsia) 62.3 artikuluaren 1. eta 1. bis ataletan xedatutakoari jarraituz, luzatu eginen da ekaineko, uztaileko eta abenduko aitorpenak aurkeztu eta diru-sarrera egiteko epea abuztuaren 5a, irailaren 20a eta urtarrilaren 31 arte, hurrenez hurren.

Aurreko ereduan bezala, ez da aitorpenean sartzen finkagune iraunkorrik gabeko ez-egoiliarrei ondasun higiezinak erosi dizkietenek egin beharreko atxikipena edo konturako sarrera, hala aurreikusita baitago Ez-egoiliarren Errentaren gaineko Zergari buruzko Legearen Testu Bategineko 25.2 artikuluan eta zergaren erregelamenduaren 14. artikuluan garatua. Horrenbestez, atxikipena edo konturako sarrera orain arte bezala eginen da, “Ez-egoiliarren errentaren gaineko zerga. Finkagune iraunkorrik gabeko ez-egoiliarrei ondasun higiezinak erosteko atxikipenak” izeneko 211 eredua erabiliz.

Azkenik, foru agindu honen azken xedapenetako lehenengoan, Ekonomia eta Ogasuneko kontseilariaren apirilaren 23ko 80/2008 Foru Agindua aldatu da, Nafarroako Foru Komunitateko Diru-bilketaren Erregelamendua hein batean garatzen baitu, zergen aitorpen-likidazio edo autolikidazio batzuei dagozkien ordainketak helbideratzeari dagokionez; izan ere, jaso egiten dira arau honek indarra hartzean ordaintzeko modu gisa helbideratzea onartzen duten eredu guztiak.

Tributuei buruzko abenduaren 14ko 13/2000 Foru Lege Orokorraren zazpigarren xedapen gehigarriak baimena eman zion Ekonomia eta Ogasuneko kontseilariari foru agindu bidez arautu dezan zergadunek eta entitateek zein kasu eta baldintzatan aurkezten ahal dituzten baliabide elektroniko, informatiko eta telematikoak erabiliz aitorpenak, jakinarazpenak, aitorpen-likidazioak, autolikidazioak edo tributuen arloko arautegiak eskatutako beste agiri guztiak.

Horrenbestez, eta Tributuei buruzko abenduaren 14ko 13/2000 Foru Lege Orokorraren 6. artikuluan jasotako eskudantziarekin bat,

AGINDU DUT:

1. artikulua. 216 eredua onestea.

1. “Ez-egoiliarren errentaren gaineko zerga. Finkagune iraunkorrik gabe lortutako errenten gaineko atxikipenak eta konturako sarrerak” izeneko 216 eredu berria onetsi da, foru agindu honen eranskinean ageri dena.

2. 216 ereduaren aurkezpena, foru agindu honen 3. artikuluan xedatutakoarekin bat, bide hauetako bat erabiliz eginen da:

a) Paper inprimatuan, foru agindu honen eranskinean ezarritako ereduaren arabera; bi ale ditu, “Administrazioarentzako alea” eta “Interesdunarentzako alea”.

b) Telematika bidez, Internet erabiliz, foru agindu honen 6. eta 7. artikuluetan ezarritako baldintza orokorrei eta prozedurari jarraikiz.

2. artikulua. 216 eredua aukeztera behartuta daudenak.

1. Atxikipena edo konturako sarrera egitera behartutako subjektuek erabili beharko dute eredu hau, ez-egoiliarren errentaren gaineko zergadunek finkagune iraunkorrik gabe Nafarroako lurraldean lortu edo sortutakotzat jotzen diren errentei buruz, atxikitako kopuruak edo kontura egindako sarrerak Nafarroako Ogasun Publikoan ordaintzeko, salbu inbertsio kolektiboko erakundeen kapitala edo ondarea ordezkatzen duten akzio edo partaidetzen eskualdaketa eta errenboltsoetan atxikipena edo konturako sarrera egitera behartutako subjektuak, berariazko aitorpena eginen baitute. Aipatu subjektuei buruzkoa da uztailaren 30eko 1776/2004 Errege Dekretuaren bidez onetsi zen ez-egoiliarren errentaren gaineko zergaren erregelamenduko 11. artikulua.

2. Aipatu tributudunek ere erabiliko dute 216 eredua atxikipena edo konturako sarrera egitea bidezkoa ez den kasuetan, Ez-egoiliarren Errentaren gaineko Zergari buruzko Legearen Testu Bategineko 31.4 artikuluan xedatutakoari jarraituz, martxoaren 5eko 5/2004 Legegintzako Errege Dekretuak onetsi baitzuen.

3. Aurreko 2 zenbakian xedatutako ondorioetarako, hurrengo errentak ez dira kontuan hartuko:

a) Ez-egoiliarren Errentaren gaineko Zergari buruzko Legearen Testu Bategineko 14.1.a) artikuluan aipatzen diren errentak.

b) Finkagune iraunkorrik gabe pertsona fisiko edo entitate ez-egoiliarrek Espainian jaulkitako baloreetatik datozen errentak, zeinahi dela ere ordaintzeko agente gisa edo baloreak jaulki edo eskualdatzeko lanetan diharduten finantza erakundeen egoitza.

c) Zerga honen zergadunei ordaintzen zaizkien ez-egoiliarren kontuen etekinak, salbu eta ordainketa Espainiako lurraldean dagoen finkagune iraunkor bati egiten badio Espainiako Bankuak edo atzerriko eskualdaketa ekonomikoen gaineko araudian aipatzen diren entitate erregistratuek.

d) Nafarroako zorraren interesak, idatzoharretakoak, horiek ordaintzeko edo atxikipenak itzultzeko prozedura berezi bati lotuak baitaude.

e) Atxikipena eta konturako sarrera egin beharretik salbuetsitako errentak, ez-egoiliarren errentaren gaineko zergaren erregelamenduaren 10.3 artikuluan aipatuak.

f) Sozietateen gaineko Zergari buruzko Legearen Testu Bategineko (martxoaren 5eko 4/2004 Legegintzako Errege Dekretuak onetsia) 118.1.c) artikuluak eta Sozietateen gaineko Zergari buruzko abenduaren 30eko 24/1996 Foru Legearen 149.1.c) artikuluak aipatzen dituzten errentak.

3. artikulua. 216 eredua aurkezteko moduak.

216 eredua honela aurkezten ahalko da:

1. Telematika bidez, Internet erabiliz; bide hori nahitaezkoa izanen da Ekonomia eta Ogasuneko kontseilariaren uztailaren 3ko 132/2009 Foru Aginduan ezarritako kasuetan. Foru agindu horren bidez, aitorpen-likidazioak, autolikidazioak, urteko aitorpen-laburpenak, informazio-aitorpenak, jakinarazpenak eta zerga arloko araudiak eskatutako beste agiri batzuk telematika bidez eta ordenagailuz irakurtzeko euskarriaren bidez aurkeztera behartzen duten kasuak arautzen dira.

2. Paper inprimatuan, telematika bidez aurkeztea nahitaezkoa ez den kasuetan, aurreko 1. atalarekin bat. Inprimaki hori Nafarroako Zerga Ogasunak inprimakiak sortzeko duen zerbitzuan lortuko da, beste inon ez, eta Interneteko http://www.hacienda.navarra.es helbidean eskuratzen ahal da.

4. artikulua. 216 eredua aurkezteko eta diru-sarrera egiteko tokia.

216 eredua Nafarroako Zerga Ogasuna erakunde autonomoaren edozein bulegotan aurkeztuko da.

Nafarroako Ogasun Publikoaren edozein erakunde laguntzailetan eginen da diru-sarrera, foru agindu honen eranskinean datorren “782 ordainketa gutuna” izeneko eredua erabilita. Orobat, telematika bidez ordainduta edo banku bidez helbideratuta egiten ahalko da diru-sarrera.

5. artikulua. 216 eredua aurkezteko eta diru-sarrera egiteko epea.

Hiruhileko bakoitzaren ondoko lehen hogei egun naturalak dira 216 ereduaren hiru hilean behineko aitorpena aurkeztu eta diru-sarrera egiteko epea, salbu bigarren eta laugarren hiruhilekoetako aitorpenen kasuan, horien epeak abuztuaren 5ean eta urtarrilaren 31n bukatuko baitira, hurrenez hurren.

Dena dela, balio erantsiaren gaineko zergaren erregelamenduko (martxoaren 8ko 86/1993 Foru Dekretuak onetsia) 62.3 artikuluko 1. eta 1. bis ataletan aipatzen diren inguruabarretakoren bat dela-eta, enpresa handitzat jotako atxikitzaile edo tributudunak direnean, hilabeteko likidazio aldiari dagokion hurrengo hilabeteko lehen 20 naturalak izanen dira aurkezteko eta diru-sarrera egiteko epea, salbu ekaineko, uztaileko eta abenduko aitorpenen kasuan, horien epeak abuztuaren 5ean, irailaren 20ean eta urtarrilaren 30ean bukatuko baitira, hurrenez hurren.

6. artikulua. 216 ereduari dagozkion aitorpenen Internet bidezko aurkezpen telematikoa egiteko baldintza orokorrak.

1. 216 ereduari dagozkion aitorpenen aurkezpen telematikoa baldintza hauei jarraikiz eginen da:

a) Aitortzaileak identifikazio fiskaleko zenbakia eduki beharko du (IFZ).

b) Aitortzaileak ziurtagiri elektronikoa eduki beharko du, Nafarroako Zerga Ogasunak onartua, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuan ezarrita dagoenari jarraikiz.

Baimenduta dauden ziurtagiri elektronikoak eta ziurtapen zerbitzuak dagokien atalean aipatzen dira; hartara, Interneteko http://www.hacienda.navarra.es helbidetik iristen ahal da.

c) Aitorpenak, jakinarazpenak eta zerga arloko beste agiri batzuk hirugarren pertsonen izenean telematika bidez aurkezteko eta tributu zorren ordainketa telematika bidez tramitatzeko kanpo-lankidetzarako akordioa onesten duen Ekonomia eta Ogasuneko kontseilariaren ekainaren 29ko 130/2009 Foru Aginduan xedatutakoarekin bat, aurkezleak, aitorpenak hirugarrenen izenean egiteko baimendutako pertsona edo entitate bat baldin bada, Nafarroako Zerga Ogasunak onartutako ziurtagiri elektronikoa, aurreko b) letran aipatzen dena, eduki beharko du.

d) 216 ereduaren aurkezpen telematikoa egiteko, aitortzaileak edo baimendutako aurkezleak, halakorik bada, Nafarroako atarian eskuragarri dagoen web inprimakia erabili beharko du.

e) Aitortzaileek aurkezpen telematiko hori egiteko eskatzen diren arau teknikoak bete beharko dituzte. Arau horiek Nafarroako Zerga Ogasunaren web orrian daude ikusgai, Interneteko http://www.hacienda.navarra.es helbidean.

2. Telematika bidez igortzen diren aitorpenetan akats formalak agertzen direnean, sistemak berak emanen dio horren berri aitortzaileari akatsak azaltzeko mezuen bitartez, behar den zuzenketa egin dezan.

7. artikulua. 216 ereduari dagozkion aitorpenen Internet bidezko aurkezpen telematikoa egiteko prozedura.

Aitorpenen aurkezpen telematikoa Internet bidez, web inprimakia baliatuz, egiteko, prozedura hau erabiliko da:

1. Nafarroako Ataritik, Ogasunarekin egiten diren izapideen zerbitzuan sartu.

2. Egin nahi den aitorpenaren eredua hautatu, eta aitorpena aurkeztu ahal izateko datu guztiak bete.

3. Aitorpena bete ondoren, igortzeko aukera erabili. Aitorpena egokia bada, sistemak balioztatuko du. Akatsik atzemanez gero, inprimakiaren bidez jakinaraziko da, eta haiek zuzendu arte ezin izanen da aitorpena aurkeztu. Aitorpena zuzen bete ondoren, sistemak jakinaraziko du aurkeztutako aitorpen bakoitzari esleitutako zenbakia eta, orobat, inprimatzeko aukera eskainiko du, frogagiri gisa erabiltzeko.

Xedapen indargabetzaile bakarra.–Arauen indargabetzea.

1. Indarrik gabe uzten dira foru agindu honetan ezarritakoari kontra egiten dioten maila bereko edo baxuagoko xedapenak.

2. Bereziki, indarrik gabe utzi da Ekonomia eta Ogasuneko kontseilariaren maiatzaren 14ko 82/1999 Foru Agindua, ez-egoiliarren errentaren gaineko zergaren atxikipenak eta konturako sarrerak aitortzeko eta diru-sarrera egiteko 216 eredua onetsi zuena finkagune iraunkorrik gabe lortutako errentei buruz; orobat, maiatzaren 2ko 102/2001 Foru Agindua, 216 eredua eurotan onetsi zuena ez-egoiliarren errentaren gaineko zergaren atxikipenak eta konturako sarrerak aitortzeko eta diru-sarrera egiteko finkagune iraunkorrik gabe lortutako errentei buruz.

Azken xedapenetako lehena.–Banku-helbideratzea duten ereduen zerrenda.

Ekonomia eta Ogasuneko kontseilariaren apirilaren 23ko 80/2008 Foru Aginduaren bidez, hein batean garatu zen Nafarroako Foru Komunitateko Diru-bilketaren Erregelamendua, zergen aitorpen-likidazio edo autolikidazio batzuei dagozkien ordainketak bankuan helbideratzeari dagokionez, eta agindu horren eranskina honela idatzita agertuko da:

“ERANSKINA

Foru agindu honen arabera ordainketak bankuan helbideratzea onartzen duten zerga ereduak

130 eredua. “Pertsona fisikoen errentaren gaineko zergaren konturako ordainketa zatikatuen autolikidazioa”.

715 eredua. “Pertsona fisikoen errentaren gaineko zerga. Laneko etekinei, enpresa eta lanbide batzuen jarduerei, sariei eta errenta egozketa batzuei buruzko atxikipenak eta konturako sarrerak” (hiruhilekoa).

716 eredua. “Pertsona fisikoen errentaren gaineko zerga eta sozietateen gaineko zerga. Higigarrien kapitalaren atxikipenak (hiruhilekoa).

745 eredua. “Pertsona fisikoen errentaren gaineko zerga. Laneko etekinei, enpresa eta lanbide batzuen jarduerei, sariei eta errenta egozketa batzuei buruzko atxikipenak eta konturako sarrerak” (hilekoa).

746 eredua. “Pertsona fisikoen errentaren gaineko zerga eta sozietateen gaineko zerga. Higigarrien kapitalaren atxikipenak. Banku kontuetako interesak” (hilekoa).

747 eredua. “Pertsona fisikoen errentaren gaineko zerga eta sozietateen gaineko zerga. Higigarrien kapitalaren atxikipenak. Banku kontuetako interesak eta etekin inplizituak izan ezik” (hilekoa).

748 eredua. “Pertsona fisikoen errentaren gaineko zerga eta sozietateen gaineko zerga. Higigarrien kapitalaren atxikipenak. Etekin inplizituak (hilekoa).

759 eredua. “Pertsona fisikoen errentaren gaineko zerga eta sozietateen gaineko zerga. Hiri-lurreko higiezinen errentamenduengatiko atxikipenak (hiruhilekoa).

760 eredua. “Pertsona fisikoen errentaren gaineko zerga eta sozietateen gaineko zerga. Hiri-lurreko higiezinen errentamenduengatiko atxikipenak (hilekoa).

780 eredua. “Pertsona fisikoen errentaren gaineko zerga, sozietateen gaineko zerga eta ez-egoiliarren errentaren gaineko zerga. Atxikipenak eta konturako sarrerak. Ondare gehikuntzak” (hilekoa).

781 eredua. “Pertsona fisikoen errentaren gaineko zerga, sozietateen gaineko zerga eta ez-egoiliarren errentaren gaineko zerga. Atxikipenak eta konturako sarrerak. Ondare gehikuntzak” (hiruhilekoa).

785 eredua. “Pertsona fisikoen errentaren gaineko zerga, sozietateen gaineko zerga eta ez-egoiliarren errentaren gaineko zerga. Atxikipenak eta konturako sarrerak. Higigarrien kapitalaren errenta edo etekinak kapitalizazioagatik eta bizitza edo baliaezintasun aseguruengatik” (hilekoa).

S-91 eredua. “Sozietateen gaineko zerga. Ordainketa zatikatua”.

S-90 eredua. “Sozietateen gaineko zerga eta finkagune iraunkorra duten ez-egoiliarren errentaren gaineko zerga” (urtekoa). Urte naturalarekin bat datozen zergaldiei buruzkoa.

216 eredua. “Ez-egoiliarren errentaren gaineko zerga. Atxikipenak eta konturako sarrerak. Finkagune iraunkorrik gabe lortutako errentak”.

220 eredua. “Sozietateen gaineko zerga. Talde fiskalen tributazio araubidea” (urtekoa). Urte naturalarekin bat datozen zergaldiei buruzkoa.

610 eredua. “Ondare eskualdaketen eta egintza juridiko dokumentatuen gaineko zerga. Egintza juridiko dokumentatuak. Kreditu erakundeek negoziatutako ordainagiri eta zor-agirien gaineko zerga eskudirutan ordaintzea”.

640 eredua. “Ondare eskualdaketen eta egintza juridiko dokumentatuen gaineko zerga. Egintza juridiko dokumentatuak. Efektu tinbredunak”.

F66 eredua. “Balio erantsiaren gaineko zerga. Hileko aitorpen-likidazioa”.

F69 eredua. “Balio erantsiaren gaineko zerga. Hiruhileko aitorpen-likidazioa. Araubide orokorra eta erraztua”.

309 eredua. “Balio erantsiaren gaineko zerga. Ez-aldizkako aitorpen-likidazioa”.

353 eredua. “Balio erantsiaren gaineko zerga. Entitateen multzoa. Eredu erantsia. Hileko aitorpen-likidazioa”.

560 eredua. “Elektrizitatearen gaineko zerga. Aitorpen-likidazioa”.

561 eredua. “Garagardoaren gaineko zerga. Aitorpen-likidazioa”.

562 eredua. “Tarteko produktuen gaineko zerga. Aitorpen-likidazioa”.

563 eredua. “Alkoholaren eta edari eratorrien gaineko zerga. Aitorpen-likidazioa”.

564 eredua. “Hidrokarburoen gaineko zerga. Aitorpen-likidazioa”.

566 eredua. Tabakogaien gaineko zerga. Aitorpen-likidazioa”.

569 eredua. “Zenbait hidrokarburoren txikizkako salmenten gaineko zerga. Aitorpen-likidazioa (hiruhilekoa).

581 eredua. “Hidrokarburoen gaineko zerga. Aitorpen-likidazioa” (hilekoa).

430 eredua. “Aseguru primen gaineko zerga. Hileko aitorpen-likidazioa”.

J-20 eredua. “Jokoaren gaineko zerga tasa. Bingo aretoak. Aitorpen-likidazioa” (hiruhilekoa).

J-50 eredua. “Zozketen, tonbolen, apustuen eta ausazko konbinazioen gaineko zerga tasa. Apustuak. Aitorpen-likidazioa” (hiruhilekoa).

Azken xedapenetako bigarrena.–Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra, eta egun horretatik aurrera aurkezten diren aitorpenei aplikatuko zaie.

Iruñean, 2013ko martxoaren 5ean.–Ekonomia, Ogasun, Industria eta Enpleguko kontseilaria, Lourdes Goicoechea Zubelzu.

Iragarkiaren kodea: F1303467