I. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
204/2007 FORU AGINDUA, maiatzaren 25ekoa, Ekonomia eta Ogasun kontseilariak emana, 2006ko urtarrilaren 1etik abenduaren 31ra bitartean hasitako ekitaldietako Sozietateen gaineko Zergaren autolikidazioaren 220 eredua onesten duena zergak bateratze-erregimenaren bidez ordaintzen dituzten taldeentzat, eta aitorpenak aurkezteko arauak ematen dituena.
Sozietateen gaineko Zergari buruzko abenduaren 30eko 24/1996 Foru Legearen X. tituluaren VIII. kapituluak zergen bateratze-araubidea finkatzen du, eta ezartzen du zerga kontuetarako taldeak, tributazio araubide hori aukeratzen dutenean, zergaren subjektu pasibotzat hartuko direla.
Sozietateen gaineko Zergari buruzko abenduaren 30eko 24/1996 Foru Legearen 116.2 artikuluak ezartzen duenez, sozietate nagusiak izanen du zerga-taldearen ordezkaritza, eta behartua egonen da, bestetik, zergen bateratze-araubidearen ondoriozko betebehar material eta formalak betetzera.
Horrenbestez,
AGINDU DUT:
1. artikulua. Sozietateen gaineko Zergaren autolikidaziorako 220 eredua onestea, Sozietateen gaineko Zerga arautzen duen abenduaren 30eko 24/1996 Foru Legeko X. tituluko VIII. kapituluan ezarria dagoen bateratze-araubidea aukeratu duten zerga-taldeentzat.
1. Sozietateen gaineko Zergaren autolikidaziorako 220 eredua onetsi da, Sozietateen gaineko Zerga arautzen duen abenduaren 30eko 24/1996 Legeko X. tituluko VIII. kapituluan ezarria dagoen bateratze-araubidea aukeratu duten zerga-taldeentzat. Eredua foru agindu honen I. eranskinean dago, eta 2006ko urtarrilaren 1etik abenduaren 31ra bitartean hasitako ekitaldietarako balio du.
2. Halaber, aitorpena telematikaren bidez ere aurkezten ahalko da, eta nahitaez bete beharko dute aurreko urtean 300.000 eurotik goitiko eragiketa multzoa izan duten subjektu pasibo guztiek. Kalkulua egiten da Balio Erantsiaren gaineko Zergari buruzko abenduaren 30eko 19/1992 Foru Legearen 66. artikuluan ezarritakoaren arabera.
2. artikulua. Aitortu beharra.
Sozietateen gaineko Zerga arautzen duen abenduaren 30eko 24/1996 Foru Legeko X. tituluko VIII. kapituluan ezarria dagoen bateratze-araubidea aukeratu duten zerga-taldeei dagokien autolikidazioa, hots, Sozietateen gaineko Zergaren autolikidazioa, 220 ereduaren arabera egina, Estatuaren eta Nafarroako Foru Komunitatearen arteko Hitzarmen Ekonomikoaren 27. artikuluari jarraikiz Nafarroako foru araudia aplikatzen duten zerga-taldeek egin behar dute.
3. artikulua. Sozietateen gaineko Zergaren autolikidaziorako 220 eredua aurkezteko modua.
1. Foru agindu honen bidez autolikidaziorako onetsitako eredua taldearen sozietate edo entitate nagusiaren ordezkari legalek sinatuta aurkeztu behar da, bertan eskatzen diren datuetatik dagozkien guztiak behar bezala beteta.
2. Sozietateen gaineko Zerga arautzen duen Foru Legearen 116. artikuluaren 3. atalean xedatutakoarekin bat, taldeko sozietate bakoitzak eta taldeko sozietate edo entitate nagusiak egin behar dituzten aitorpen-likidazioak S-90 ereduan aurkeztuko dira. S-90 eredua oso-osorik beteko da, banakako tributazio erregimenean entitate horiek ordaindu edo jaso beharko lituzketen zenbateko likido teorikoetara ailegatu arte. Bestetik, aitorpen horietan dagoen likidazioa zerga-oinarria negatiboa edo zero baldin bada ere, berdin-berdin bete behar dira, S-90 ereduaren orrietan, hobariei eta kenkariei buruzko datu guztiak.
4. artikulua. Aurkezteko tokia eta epea, eta ordaindu edo itzultzeko modua.
1. Foru agindu honen bitartez onetsitako autolikidazioaren eredua Nafarroako Foru Komunitateko Administrazioaren Ekonomia eta Ogasun Departamentuan aurkeztu beharko da edo posta ziurtatuaz bertara igorri, beste administrazio batzuetan aurkeztu behar diren aitorpenak galarazi gabe, Nafarroako Foru Komunitateko Administrazioaz gainera beste baten zergapekoa izanez gero.
Nafarroako Foru Komunitatearen dirubilketa erregelamendua onesten duen uztailaren 2ko 177/2001 Foru Dekretuaren xedapen gehigarrian xedatutakoaren arabera, entitate laguntzaileetan ere aurkezten ahalko da.
Hurrengo atalean ezartzen den epez kanpo aurkeztutako aitorpenak Ekonomia eta Ogasun Departamentuko bulego iraunkorretan aurkeztuko dira edo, bestela, posta ziurtatuaz igorriko.
2. 220 eredua taldeko sozietate edo entitate nagusiaren banakako tributazio-erregimeneko aitorpenari dagokion epean aurkeztu behako da.
3. Taldeen sozietate edo entitate nagusiak, 220 ereduaren aitorpen-likidazioa aurkeztu behar dutenean, behartuta egonen dira autolikidaziotik ateratako tributu-zorra Nafarroako Ogasun Publikoaren lankide den edozein finantza entitatetan sartzera. Dirusarrera egiteko, "741 ordain-gutuna" erabiliko da.
Egindako autolikidaziotik dirua itzultzeko ateratzen bada, zein entitate eta kontutan ordaindu behar den adierazi beharko da, aitorpenak horretarako duen atalean.
5. artikulua. 220 ereduaren aurkezpen telematikorako baldintza orokorrak.
1. Aitorpenen aurkezpen telematikoa baldintza hauen pean egonen da:
a) Aitortzaileak identifikazio fiskaleko zenbakia eduki beharko du (IFZ).
b) Aitortzaileak 2CA motako erabiltzaile-ziurtagiri bat izan behar du, Diru eta Tinbre Fabrika Nazionala-Diruaren Errege-Etxeak emana eta bere nabigatzailean instalatua.
c) Aurkezlea hirugarren pertsonen izenean aitorpenak aurkezteko pertsona edo entitate baimendua baldin bada, Diru eta Tinbre Fabrika Nazionala-Diruaren Errege-Etxeak emandako 2CA motako erabiltzaile ziurtagiria izan beharko du eskura bere nabigatzailean.
d) Aurkezpen mota hau hautatzen duten aitortzaileek kontuan hartuko dituzte aurkezpena egin ahal izateko behar diren arau teknikoak, foru agindu honen II. eranskinean ageri direnak.
2. 220 ereduaren aurkezpen telematikoa eta, hala behar baldin bada, diru-sarrera, foru agindu honen 3. artikuluan ezarritako epe orokorretan eginen dira.
3. Telematika bidez igortzen diren aitorpenetan akats formalak agertzen direnean, sistemak berak emanen dio horren berri aitortzaileari akatsak azaltzeko mezuen bitartez, behar den zuzenketa egin dezan.
AZKEN XEDAPENA
Foru agindu honek Nafarroako ALDIZKARI OFIZIALean argitaratzen den egun berean hartuko du indarra.
Iruñean, 2007ko maiatzaren 25ean._Ekonomia eta Ogasun kontseilaria, Francisco J. Iribarren Fentanes.
I. ERANSKINA
II. ERANSKINA
Tributu aitorpenak telematika bidez aurkezteko arau teknikoak
Aitorpena aurkezteko modalitate hau aukeratzen duten aitortzaileek ondoko baldintzak bete beharko dituzte:
1. Aurkezlearen ekipo informatikoak honako hau izan beharko du instalatua:
_Prozesadorea: Pentium II edo berriagoa.
_RAM Memoria: 64 MB; ahal bada, 256 MB.
_Bete gabeko tartea disko gogorrean: 20 MB.
_CD-ROM unitatea.
_800 x 600eko edo hortik gorako bereizmena duen monitorea.
_Sistema eragilea: Windows 98, Me, NT 4.0 SP6 duena, 2000 edo XP.
_Softwarea: Microsoft Internet Explorer 5.5 edo berriagoa.
_Interneterako sarbidea.
2. Igorpen prozesuan honako prozesu hau abiaraziko da, urratsez urrats aurrera egiteko modukoa, baldin eta igorlearen ekipoak lehenago deskribatutako baldintzak betetzen baditu eta nabigatzailearen konfigurazioak javascript, javaren applet-ak eta cookie-ak exekutatzen uzten badu, eta, gainera, eskatzen ahal diren baimenak ematen badira:
Erabiltzailearen eta zerbitzariaren ziurtagiriak erabiliz, bi muturretan "SSL-V3" protokoloaren estandarrei jarraituz konektatzen diren ekipoak kautotzea, aitorpenaren aurkezlearen eta hartzailearen (Nafarroako Zerga Ogasuna) ekipoak, alegia.
Iragarkiaren kodea: F0708797
