Iragarkia

45. ALDIZKARIA - 2020ko martxoaren 5a

1. NAFARROAKO FORU KOMUNITATEA

1.7. BESTELAKOAK

2/2020 FORU AGINDUA, urtarrilaren 15ekoa, Ekonomia eta Ogasuneko kontseilariak emana, erabilitako ibilgailuen eta itsasontzien salmentako batez besteko prezioak onesten dituena, Oinordetzen eta dohaintzen gaineko zergaren, Ondare eskualdaketen eta egintza juridiko dokumentatuen gaineko zergaren eta Zenbait garraiobideren gaineko zerga bereziaren kudeaketan aplikatzeko.

Erabilitako ibilgailuen eta itsasontzien eskualdaketetan, zerga-oinarria finkatzeko Oinordetzen eta dohaintzen gaineko zergarako, Ondare eskualdaketen eta egintza juridiko dokumentatuen gaineko zergarako eta Zenbait garraiobideren gaineko zerga berezirako, urtero ematen diren foru aginduetan horretarako ezarritako batez besteko prezioak aplikatzen dira.

Erabilitako ibilgailuen eta itsasontzien parkearen berritzea eta ibilgailu horiek merkatuan dituzten prezioen berezko aldaketak direla-eta, bidezko da indarra duten batez besteko prezioak eguneratzea, eta horretarako prestatu dira foru agindu honen I., II., III. eta IV. eranskinetako taulak.

Modeloen eta prezioen taulak prestatzeko, garraiobideen fabrikatzaileen eta saltzaileen elkarteen argitalpenak erabili dira, baita fabrikatzaileek beraiek ibilgailu berriei buruz aurkeztutako jarraibide eta ezaugarri teknikoak ere.

Foru agindu honetan aurreko urteetako balio-galeren taulari eusten zaio, irizten baita ibilgailuen merkatuaren errealitateari eta ibilgailuen balio-galerari egokitzen zaiela oraindik ere.

Idazpuru berean sartzen dira ibilgailuei dagozkien datu teknikoak, potentzia kilowattetan adierazita (kW), eta CO2-ren isurtze maila kentzen da (2008ko urtarriletik aurrera merkaturatzen diren ibilgailuen kasuan agertzen zen). Izan ere, 2018ko irailaren 1ean indarrean jarri zen Europar Batasun osoan 2017ko ekainaren 1eko Batzordearen 2017/1151 (EB) Erregelamendua. Aipatutako erregelamenduaren bidez, honako hauek egiten dira: osatu egiten da Europako Parlamentuaren eta Kontseiluaren 715/2007 (EE) Erregelamendua, motorrezko ibilgailuen mota turismo eta ibilgailu komertzial arinetatik (Euro 5 eta Euro 6) eratorritako isurpenei dagokienez homologatzekoa eta ibilgailuen konponketari eta mantentze-lanei buruzko informazioa eskuratzekoa; aldatu egiten dira Europako Parlamentuaren eta Kontseiluaren 2007/46/EE Zuzentaraua eta Batzordearen 692/2008 (EE) Erregelamendua eta 1230/2012 (EB) Erregelamendua; eta, azkenik, indarrik gabe uzten da Batzordearen 692/2008 (EB) Erregelamendua. Indarrean jarri den erregelamenduak derrigortzen du kilometroko gramotan (g/km) neurtutako CO2-ren isurtze maila neurtzeko Worldwide Harmonized Light Vehicles Test Procedure (WLTP) saiakuntza protokolo berria aplikatzera. Horrek berekin dakar ibilgailu bakoitzari muga zehatz bat jartzea, modelo bererako gerta daitezkeen isurpenen balioa nabarmen biderkatuta. Modelo jakin bakoitzerako isurpen bolumenak kudeatzea ezinezkoa denez, eta erroreak saihesteko, zuhurragotzat hartzen da datu hori marka eta modeloen tauletatik kentzea.

Aurreko urteetan bezala, modeloen informazio eta identifikazio gisa, zaldi potentziatan (ZP) adierazten da motorren potentzia, merkataritza arloan interesa duen datua baita, nahiz eta ez den inola ere Neurketa Unitateen Legezko Sisteman onartutako unitate bat (Metrologiari buruzko abenduaren 22ko 32/2014 Legea). Halaber, merkaturatze aldia mantentzen da ibilgailuen modelo batzuk bereizteko bestelako elementu gisa, zeren, zenbait ibilgailuren kasuan, desberdinak badira ere, merkataritzako izenari eusten baitzaio urte askoan. Aldi berean, motozikleta moten batez besteko prezioak motorraren tamainaren arabera bereizten dira (zentimetro kubikoen arabera adierazita), eta zilindrada handieneko zenbatekoak handitzen dira, merkatu balio handiagoa mantentzen baitute denboran zehar.

Zenbait garraiobideren gaineko zerga bereziari dagokionez, dagoenean gelditzen da erabilitako ibilgailu batek jasandako zeharkako zerga merkatu baliotik kentzeko formula, balorazioa Europar Batasunaren irizpideetara egokitze aldera.

Horiek horrela, bidezkoa da salmenta prezioak eta horiei aplikatzen zaizkien portzentajeak eguneratzea 2020. urterako.

Horrenbestez,

AGINTZEN DUT:

1. artikulua. Batez besteko prezio aplikagarrien taulak.

I., II., III. eta IV. eranskinetako taulek Ogasuneko eta Finantza Politikako kontseilariaren urtarrilaren 21eko 6/2019 Foru Aginduaren bidez onetsitakoak ordeztuko dituzte ondorio guztietarako.

2 artikulua. Turismo, lur orotako ibilgailu eta motozikleten balioa finkatzea.

Matrikulatutako turismo, lur orotako ibilgailu eta motozikleten balioa finkatzeko, I. eranskineko batez besteko prezioei dagozkien portzentajeak aplikatuko zaizkie, kontuan hartuta erabilera urteak eta, egoki bada, ibilgailuaren jarduera. Portzentajeak IV. eranskinean jasotako taulan eta jarraibideetan daude.

3 artikulua. Jostetako itsasontzien eta itsas motorren balioa finkatzea.

Jostetako itsasontzien eta itsas motorren balioa finkatzeko, banaka baloratuko dira ontzia motorrik gabe eta motorra, eta, horretarako, foru agindu honen II. eta III. eranskinetan jasotako balioei III. eranskineko portzentajeak aplikatuko zaizkie, erabilera urteak kontuan hartuta, eta gero balio eguneratuak gehituko zaizkie, ontziaren guztizko balioa lortzeko.

4 artikulua. Zenbait garraiobideren gaineko zerga berezirako balioa finkatzeko arau berezia.

Zenbait garraiobideren gaineko zerga bereziari dagokionez, honako arau hauek aplikatuko dira:

Lehena.–Foru agindu honen I., II. eta III. eranskinetan ageri diren batez besteko prezioei erabilitako urteen arabera dagozkien portzentajeak aplikatuko zaizkie eta, egoki bada, ibilgailuaren jarduerari dagokiona. Portzentajeak foru agindu honen IV. eranskinean jasotako taulan eta jarraibideetan daude.

Ibilgailu modelo beraren kasuan, batez besteko prezio batzuk badaude, modeloaren motaren arabera, zergadunak egiaztatu beharko du, horretarako eskatzen diotenean, ibilgailu modeloaren zein mota matrikulatu nahi duen. Hala egiten ez badu, zerga administrazioak ibilgailu modelo horren mota garestienaren balioa hartuko du aintzat.

Bigarrena.–Aurretik atzerrian matrikulatuta egon eta behin betiko lehen matrikulazioa Espainian izan behar duten erabilitako garraiobideak direnean, zeharkako zergetako kuoten hondarra kenduko zaio merkatu balioari, betiere merkatu balioa aurreko lehen arauan adierazitakoa kontuan hartuta kalkulaturik. Horretarako, formula hau erabil daiteke:

Bertan:

ZO: Zenbait garraiobideren gaineko zerga bereziko garraiobide erabilien zerga-oinarria.

MB: merkatu balioa, IV. eranskineko portzentajeak aplikatu ondoren batez besteko prezioen taulek finkatutakoa.

BEZtasa: zerga-tasa, bateko hainbestean, garraiobideari orain Espainiako lurralde eremuan matrikulatzeko lehen matrikulazioan eskatuko zitzaiokeen balio erantsiaren gaineko zergarena (BEZa).

ZGZBtasa: zerga-tasa, bateko hainbestean, garraiobideari orain Espainiako lurralde eremuan matrikulatzeko lehen matrikulazioan eskatuko zitzaiokeen Zenbait garraiobideren gaineko zerga bereziarena.

BESTELAKOtasak: bestelako zeharkako zerga-tasak batzearen emaitza, bateko hainbestean, baldin eta garraiobidearen erosketari kargatu bazaizkio, eta merkatu balioan sartuta badaude.

Azken xedapen bakarra.–Foru agindu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2020ko urtarrilaren 15ean.–Ekonomia eta Ogasuneko kontseilaria, Elma Saiz Delgado.

Jaitsi dokumentu osoa (PDFa).

Iragarkiaren kodea: F2000614