275. ALDIZKARIA - 2020ko azaroaren 25a

1. NAFARROAKO FORU KOMUNITATEA

1.7. BESTELAKOAK

680/2020 EBAZPENA, azaroaren 19koa, Nafarroako Kirolaren Institutuko zuzendari kudeatzaileak emana, zeinaren bidez luzatzen baitira Nafarroako Kirolaren Institutuko zuzendari kudeatzailearen urriaren 13ko 625/2020 Ebazpenaren bidez hartutako neurriak eta neurri berri bat hartzen baita kirol jarduera eta instalazioetan aldagelak eta dutxak erabiltzeari lotuta. Ebazpen horren bidez, berariazko prebentzio neurri apartekoak hartu ziren Nafarroako Foru Komunitatean garatzen diren kirol jardueretarako, COVID-19ak eragindako egoera epidemiologikoak izan zuen bilakaeraren ondorioz.

Osasuneko kontseilariaren urriaren 21eko 57/2020 Foru Aginduaren bidez berariazko prebentzio neurri apartekoak hartu ziren Nafarroako Foru Komunitaterako, COVID-19ak eragindako egoera epidemiologikoak izan zuen bilakaeraren ondorioz. Foru agindu horrek aparteko neurri murriztaile batzuk onetsi zituen. Besteak beste, “osasun-hesi” bat ezartzen zen, Nafarroako Foru Komunitate osoaren perimetroko sarrerak eta irteerak mugatzeko. Gainera, eta berariaz kirol arlorako, mugak ezarri ziren kirol instalazioen erabileran eta erabiltzeko ordutegian.

Horri guztiari gehitu behar zaio urriaren 25eko 926/2020 Errege Dekretuaren bidez alarma-egoera deklaratu zela SARS-CoV-2ak eragindako kutsatzeen hedapena geldiarazteko. Errege dekretu horren 2.2 artikuluak eskuordetutako agintari eskudunaren izaera ematen zion autonomia-erkidegoetako lehendakaritza duenari.

Emandako eskumen horiek erabiliz onetsi zen Nafarroako Foru Komunitateko lehendakariaren 24/2020 Foru Dekretua, urriaren 27koa. Horren bidez, prebentzio neurriak ezarri ziren Nafarroako Foru Komunitatean, SARS-CoV-2ak eragindako kutsatzeen hedapena geldiarazteko. Zehazki, pertsonen zirkulazio-askatasuna mugatu zen gauez Nafarroako Foru Komunitatean, 23:00etatik 06:00etara bitartean; mugatu egin zen Nafarroako Foru Komunitatera sartzea eta bertatik irtetea, salbu foru dekretu horretan aipatutako eta behar bezala justifikatutako joan-etorrien kasuan; eta mugatu egin ziren pertsonen arteko bilerak: sei lagun, gehienez ere, eremu publikoan, eta bizikidetza-unitatea eremu pribatuan, salbuespenak salbuespen.

Lehendakariak hartutako neurri horiek luzatu egin dira, 2020ko abenduaren 18ra arte luzatu ere, Nafarroako Foru Komunitateko lehendakariaren azaroaren 4ko 26/2020 Foru Dekretuaren bidez eta Nafarroako Foru Komunitateko lehendakariaren azaroaren 16ko 28/2020 Foru Dekretuaren bidez.

Halaber, Osasuneko kontseilariak 58/2020 Foru Agindua eman zuen azaroaren 4an, eta horren bidez luzatu eta zati batean aldatu zen Osasuneko kontseilariaren urriaren 21eko 57/2020 Foru Agindua, berariazko prebentzio neurri apartekoak hartu zituena Nafarroako Foru Komunitaterako, COVID-19ak eragindako egoera epidemiologikoak izandako bilakaeraren ondorioz. Foru agindu hori luzatu eta zati batean aldatu zuen Osasuneko kontseilariaren azaroaren 16ko 59/2020 Foru Aginduak. Foru agindu horretan ezarritako neurriek 2020ko abenduaren 2ra arte izanen dute indarra (egun hori barne).

Nafarroako Foru Komunitateko lehendakariak zein Osasuneko kontseilariak ondoz ondo onetsitako neurri guztiak betez, Nafarroako Kirolaren Institutuak kirol arlorako berariazko neurriak hartu ditu: Nafarroako Kirolaren Institutuak, zuzendari kudeatzailearen urriaren 13ko 625/2020 Ebazpenaren bidez, berariazko prebentzio neurri apartekoak hartu zituen Nafarroako Foru Komunitatean garatzen diren kirol jardueretarako, COVID-19ak eragindako egoera epidemiologikoak izan zuen bilakaeraren ondorioz. Neurri horiek Nafarroako Kirolaren Institutuko zuzendari kudeatzailearen urriaren 27ko 659/2020 Ebazpenaren bidez luzatu ziren, 2020ko azaroaren 10era arte. Nafarroako Kirolaren Institutuko zuzendari kudeatzailearen azaroaren 11ko 672/2020 Ebazpenak berriro ere luzatu zituen aipatu neurriak, 2020ko azaroaren 20ra arte, eta neurri horietako bat edo beste aldatu zuen.

Nafarroako Foru Komunitateko lehendakariak eta Osasuneko kontseilariak azken neurriak hartu zituztenetik, nabarmen egin du behera birusaren zirkulazioak, eta, hartara, kutsatzeak ere gutxitu egin dira. Hori horrela izanda ere, larritasunaren adierazleak oso handia izaten jarraitzen du, ZIUko oheen okupazio-indizeagatik eta heriotza-kopuruagatik. Horrek guztiak beharrezko egiten du onetsitako neurriei eustea, barne harturik kirol arloari dagozkionak, Nafarroako Kirolaren Institutuaren eskumenekoak.

Ezarritako neurriak luzatzeaz gain, bidezkoa da neurri berri bat ezartzea kirol jarduera eta instalazioetako aldagela eta dutxen erabilerari dagokionez. Horrela, erabilera baimenduta dagoen kasuetan, bermatu beharko da erabiltzaile bakoitzak gutxienez 4 metro koadroko tokia duela, eta erabiltzaileen arteko 1,5 metroko segurtasun-tartea gorde daitekeela.

Horrenbestez, Nafarroako Kirolaren Institutuaren estatutuak onesten dituen azaroaren 15eko 326/2019 Foru Dekretuak eskuordetu dizkidan ahalmenekin bat,

EBAZTEN DUT:

1. Luzatzea Nafarroako Kirolaren Institutuko zuzendari kudeatzailearen urriaren 27ko 625/2020 Ebazpenaren bidez onetsitako neurriak. Ebazpen horrek, gerora Nafarroako Kirolaren Institutuko zuzendari kudeatzailearen azaroaren 11ko 672/2020 Ebazpenaren bidez aldatuak, berariazko prebentzio neurri apartekoak hartu zituen Nafarroako Foru Komunitatean garatzen diren kirol jardueretarako, COVID-19ak eragindako egoera epidemiologikoak izan zuen bilakaeraren ondorioz.

2. Kirol jarduera eta instalazioetan aldagela eta dutxak erabiltzea baimenduta dagoen kasuetan, bermatu beharko da erabiltzaile bakoitzak gutxienez 4 metro koadroko tokia duela, eta erabiltzaileen artean 1,5 metroko segurtasun-tartea gorde daitekeela.

3. Neurri hauek indarrean egonen dira 2020ko azaroaren 21etik abenduaren 2ra bitarte, biak barne, eta uneko egoera epidemiologikoaren arabera, luzatu, aldatu edo bertan behera uzten ahalko dira.

Halaber, indarrean jarraituko dute Nafarroako Kirolaren Institutuko zuzendari kudeatzaileak emandako ondoko ebazpenetan ezarritako xedapenek, ebazpen honetan xedatutakoari aurka egiten ez dioten heinean: 459/2020 Ebazpena, ekainaren 23koa; 551/2020 Ebazpena, abuztuaren 27koa, eta 593/2020 Ebazpena, irailaren 25ekoa.

4. Ebazpen hau Nafarroako Aldizkari Ofizialean argitaratzea. Horrez gain, informazioa emateko xedez, ebazpen hau Nafarroako Kirolaren Institutuaren webgunean argitaratuko da, eta, gainera, Nafarroako Kirolaren Institutuaren sare sozialetan eta hedabide orokorretan zabalduko da.

5. Ebazpen hau igortzea Kirolaren Zuzendariordetzari eta Administrazio eta Kudeaketa Atalari eta Nafarroako Osasun Publikoaren eta Lan Osasunaren Institutuari, behar diren ondorioak izan ditzan.

Iruñean, 2020ko azaroaren 19an.–Nafarroako Kirolaren Institutuko zuzendari kudeatzailea, Miguel Ángel Pozueta Uribe-Echeverría.

Iragarkiaren kodea: F2014054