272. ALDIZKARIA - 2020ko azaroaren 20a

1. NAFARROAKO FORU KOMUNITATEA

1.1. XEDAPEN OROKORRAK

1.1.1. Foru legeak eta legegintzako foru dekretuak

16/2020 FORU LEGEA, azaroaren 17koa, kreditu-gehigarri bat eta aparteko kreditu bat ematen dituena Nafarroako Unibertsitate Publikoa finantzatzeko.

NAFARROAKO FORU KOMUNITATEKO LEHENDAKARIA NAIZEN HONEK

Aditzera ematen dut Nafarroako Parlamentuak onetsi duela honako:

Foru Legea, kreditu-gehigarri bat eta aparteko kreditu bat ematen dituena Nafarroako Unibertsitate Publikoa finantzatzeko.

ZIOEN AZALPENA

2020rako Nafarroako Aurrekontu Orokorrei buruzko martxoaren 4ko 5/2020 Foru Legean guztira 68.500.000 euroko finantzaketa aurreikusten da Nafarroako Unibertsitate Publikorako, partida hauetan jasotzen dena:

–“NUPen finantzaketarako hitzarmena” izeneko G10001 G1110 4455 322300 partida, 66.120.116 eurokoa.

–“NUPen finantzaketarako hitzarmena: hobekuntzak” izeneko G10001 G1110 4455 322303 partida, 1.368.884 eurokoa.

–“NUPen finantzaketarako hitzarmena: inbertsioak” izeneko G10001 G1110 7455 322300 partida, 1.011.000 eurokoa.

Maiatzaren 5eko 17/2020 Errege Lege-dekretuak, zeinaren bidez onesten baitira, Covid-2019aren inpaktu ekonomiko eta sozialari aurre egitearren, kulturgintzari laguntzeko neurriak eta zerga arlokoak, azken xedapenetako seigarrenean aldatu egin zuen Unibertsitateei buruzko abenduaren 21eko 6/2001 Lege Organikoaren 81. artikuluko 3. apartatuko b) paragrafoa, halako moduz non honako testu hau baitauka orain:

“b) Zerbitzu akademikoengatik ezartzen diren prezio publikoen eta legez ezartzen diren gainerako eskubideen ondorioz eskuratutako diru-sarrerak. Nazio-lurralde osoan balio duten titulu ofizialetarakoak diren ikasketen prezio publikoak eta eskubideak autonomia erkidego bakoitzak ezarriko ditu, Unibertsitate Politikarako Konferentzia Nagusiak ezartzen dituen gehieneko mugen barruan eta zerbitzu-ematearen kostuekin lotura daukatela.

Era berean, prezio publikoen eta gainerako eskubideen arloan legez agintzen diren salbuespen eta murriztapenen ondoriozko zenbatekoei dagozkien konpentsazioak ere ezarriko dira.”

Unibertsitate Politikarako Konferentzia Nagusiak, 2020ko maiatzaren 27an egindako osoko bilkuran, matrikula-prezio publikoen eredu berri bat onetsi zuen 2020-2021 ikasturteko graduko ikasketa ofizialetarako; Nafarroaren kasuan, horrek esan nahi du 2020-2021 ikasturteko prezioa izanen dela 2011-2012 ikasturterako ezarri zena. Doikuntza horren ondorioz, kredituaren prezioa %7,14 jaitsiko da 2019-2020 ikasturterako ezarri ziren prezio publikoen mailak oinarritzat hartuta.

Unibertsitateko, Berrikuntzako eta Eraldaketa Digitaleko kontseilariaren ekainaren 3ko 8E/2020 Foru Aginduaren bidez ezarri ziren Nafarroako Unibertsitate Publikoko prezio publikoak 2020-2021 ikasturterako. Foru agindu horretan, eta Unibertsitate Politikarako Konferentzia Nagusiaren 2020ko maiatzaren 27ko Osoko Bilkurak hartutako erabakiarekin bat, proposatzen da %2,38ko jaitsiera egitea lehen matrikulako kredituaren prezioan graduko ikasketetan. Foru aginduan halaber jasotzen da jaitsiera hori hurrengo ikasturteetan mantenduko dela, harik eta kredituaren prezioaren jaitsiera %7,14koa izan arte.

Aurrekoaren ondorioz, Nafarroako Unibertsitate Publikoak 2020ko ekitaldian tasen bidez eskuratu dituen diru-sarrerak nabarmen txikiagoak izan dira ekitaldi horretarako bere aurrekontuan hasiera batez aurreikusitakoak baino. Prezio publikoen eredu berrirako egokitzapen partzialak ekarri du tasengatiko dirusarrerak 164.243 euro gutxiagokoak izatea. Aurreko guztiagatik, beharrezko gertatzen da Nafarroako Unibertsitate Publikoari konpentsazioa ematea haren aurrekontuan hasiera batez aurreikusi zituenen aldean txikiagoak diren dirusarrera horiengatik; horretarako, aipatu 164.243 euroko kopuru hori gehituko zaio “NUPen finantzaketarako hitzarmena” izeneko G10001 G1110 4455 322300 aurrekontu-partidako kredituari.

Bestalde, ekainaren 16ko 22/2020 Errege Lege-dekretuaren bidez, Covid-19 Funtsaren eraketa arautu zen, eta haren banaketari eta ordainketei buruzko arauak ezarri ziren, transferentzien bidezko finantzaketa handiagoa emateko autonomia erkidegoei eta autonomia estatutua duten hiriei, Covid-19aren ondoriozko krisiak ekarri duen aurrekontu-eraginari aurre egite aldera. Funts horren tarteen artean 3. tartea dago, Hezkuntzako gastuarekin lotuta; guztira 2.000 milioi euroko zenbatekoa du, eta horren %20 goi mailako hezkuntzako gastura bideratuta dago.

Ondoren, irailaren 1eko HAC/8509/2020 ministro-aginduaren bidez zehaztu ziren Hezkuntzako gasturako 3. tartean aurreikusitako baliabideez autonomia erkidegoen eta Ceuta eta Melilla hirien artean egin beharreko behin betiko banaketaren zenbatekoak. Tarte horretako 2.000 milioi euroko kopurutik, Nafarroako Foru Komunitateari 29.287.530 euro esleitu zitzaizkion.

Aurrekoaz esan beharra dago Covid-19aren pandemiaren eraginez Nafarroako Unibertsitate Publikoak 2020ko ekitaldiko aurrekontuan bere gain hartu behar izan dituela bere aurrekontuan hasiera batean aurreikusirik ez zeuden zenbait gastu eta inbertsio. Unibertsitateak kalkulatzen du jarduketa horien inpaktua 750.000 eurokoa dela.

Aurreko guztiagatik, indarreko hitzarmenaren “Finantzaketako doikuntzak” izeneko 10. klausula aplikatuz, 2018-2020 eperako Nafarroako Unibertsitate Publikoaren Finantzaketarako Hitzarmenaren Jarraipen Batzordeak erabaki zuen, 2020ko irailaren 28an egindako bileran, unibertsitatearen finantzaketa handitzea 2020an, bi gertaera horien inpaktuari dagokion zenbatekoa gehituz; hau da, Unibertsitate Politikarako Konferentzia Nagusiak erabakitakoa den unibertsitate-tasen jaitsierari dagokiona eta Covid-19aren pandemiari dagokiona.

Bi gertaera horiek Nafarroako Unibertsitate Publikoan izan duten inpaktu ekonomikoa kontuan hartuz, bidezkoa da, unibertsitateak berak egin dituen kalkuluei heldurik, Nafarroako Unibertsitate Publikoaren 2020ko finantzaketa handitzea, guztira 914.243 euro gehituz: 164.243 euro, tasen inpaktuagatik; eta 750.000 euro, Covid-19aren inpaktuagatik.

Nafarroako Ogasun Publikoari buruzko apirilaren 4ko 13/2007 Foru Legearen 48. artikuluak lehen paragrafoan ezartzen du ezen, hurrengo ekitaldira arte berandutu ezin daitekeen gasturen bat aurrekontu indardunaren kargura egin behar bada eta krediturik ez badago edo kontsignatuta dagoena aski ez bada eta ezin bada handitu aipatutako foru legean jasotako xedapenen arabera, Nafarroako Gobernuak, Ekonomia eta Ogasuneko kontseilariak proposaturik, foru lege proiektu bat bidaliko diola Nafarroako Parlamentuari, aparteko kreditu bat ematekoa, lehen kasuan, edo kreditu-gehigarri bat ematekoa, bigarrenean.

Era berean, bigarren paragrafoan xedatzen du kreditu-gehigarria eta aparteko kreditua edozein gastu programatako beste kreditu erabilgarri batzuekin finantzatzen ahalko direla, are Parlamentuak zuzenketen ondorioz edo foru lege honen xedapenak direla-eta berariaz onetsitako kredituetatik datozenekin, edo ekitaldi ekonomiko berean egiaz izandako edo aurreikusitako diru-sarrera handiagoen kargura.

1. artikulua. Kreditu-gehigarri bat ematea.

164.243 euroko kreditu-gehigarria ematen da, Nafarroako Unibertsitate Publikoaren finantzaketa beharrei erantzuteko.

Kreditu-gehigarri hori aurrekontu-partida honetan aplikatuko da:

PARTIDA

ZENBATEKOA

G10001 G1110 4455 322300 NUPen finantzaketarako hitzarmena

164.243 euro

Kreditu-gehigarria aurrekontu-partida honetako kreditu erabilgarriaren kargura finantzatuko da:

PARTIDA

ZENBATEKOA

G10001 G1110 4800 323100 Bekak eta laguntzak unibertsitate ikasketetarako

164.243 euro

2. artikulua. Aparteko kreditu bat ematea.

750.000 euroko aparteko kreditua ematen da, Nafarroako Unibertsitate Publikoaren finantzaketa beharrei erantzuteko.

Aparteko kreditu hori aurrekontu-partida honetan aplikatuko da:

PARTIDA

ZENBATEKOA

G10001-G1110-4455-322305 COVID-19 NUPen finantzaketarako hitzarmena

750.000 euro

Aparteko kreditua aurrekontu-partida honetako kreditu erabilgarriaren kargura finantzatuko da:

PARTIDA

ZENBATEKOA

110000-11000-4000-000000 COVID-19 Estatuko Administrazioaren transferentzia

750.000 euro

Azken xedapen bakarra.–Indarra hartzea.

Foru lege honek Nafarroako Aldizkari Ofizialean argitaratu eta biharamunean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta “Estatuko Aldizkari Ofizialera” igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2020ko azaroaren 17an.–Nafarroako Foru Komunitateko Lehendakaria, María Chivite Navascués.

Iragarkiaren kodea: F2013736