2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
IGARI
Ordenantza, Herri-larreen aprobetxamendua arautzen duena. Behin betiko onespena
Igariko Kontzejuak, 2019ko irailaren 28an egin bilkuran, erabaki zuen hasiera batean onestea Igariko Kontzejuko herri-larreen aprobetxamenduak arautzen dituen ordenantza.
Onespenaren erabakia 2019ko 205. Nafarroako Aldizkari Ofizialean argitaratu zen, urriaren 16an, eta jendaurreko epea inork alegaziorik aurkeztu gabe iragan denez gero, delako ordenantza behin betiko onetsi da eta oso-osorik ematen da argitara, behar diren ondorioak izan ditzan; hori guztia, Nafarroako Toki Administrazioari buruzko 6/1990 Foru Legearen 325. artikuluan xedatuari jarraikiz.
Igarin, 2019ko azaroaren 19ean.–Kontzejuko burua, Celestino Larrambe Pascualena.
HERRI-LARREEN APROBETXAMENDUA ARAUTZEN DUEN ORDENANTZA
Ordenantza honen xedea da arautzea Igariko Kontzejuko herri-larreen adjudikazioa eta aprobetxamendua, bat etorriz uztailaren 2ko 6/1990 Foru Legearekin, zeinak hizpide baitu Nafarroako Toki Administrazioa, eta urriaren 18ko 280/1990 Foru Dekretuarekin, zeinaren bidez onesten baita Nafarroako Toki Entitateen Ondasunen Erregelamendua.
I. KAPITULUA
Xedapen orokorra
1. artikulua. Aprobetxamendu moduak.
Honako hauek dira Igariko Kontzejuko herri-larreak:
–“Boyeral-Zabaleta” itxitura, 83 ha-koa. Bat dator antolamenduko planean definitzen den izen bereko larratze unitatearekin.
–Kontzejuko gainerako larreak, “herri-larreak” deitutakoak.
Herri-larreen aprobetxamendua, baldin tradizioz beste finka partikular batzuekin batera osatzen badute baterako ustiapen unitate bat, ondotik adierazi bezala egingo da:
a) Herritarrentzako zuzeneko adjudikazioaren bidez, herriko erabilera eta ohiturei jarraikiz.
b) Enkante publikoan adjudikatuz.
II. KAPITULUA
Herri-lurretako larreen aprobetxamendua, herritarrentzako zuzeneko adjudikazioaren bidez
2. artikulua. Onuradunak.
Herri-larreen aprobetxamenduaren herritarrentzako zuzeneko adjudikazioaren onuradun izanen dira hurrengo artikuluan adierazten diren baldintzak betetzen dituzten familia unitateak.
Etxebizitza berean bizi diren guztiak hartuko dira familia unitateko kidetzat. Nolanahi ere, familia unitate independentetzat hartuko da guraso erretiratuek osatua, baita familiakoekin bizi badira ere, baldin haien diru-sarrerak badira lanbide arteko gutxieneko soldata baino apalagoak.
3. artikulua. Onuradunen betebeharrak.
Onuradun diren familia-unitateetako titularrek baldintza hauek bete beharko dituzte:
a) Adinduna izatea, edo adingabe emantzipatua, edo judizialki gaitua.
b) Udal erroldan bizilagun gisa inskribatua egotea gutxienez urte bateko antzinatasunez.
c) Igarin bizitzea urtean bederatzi hilabetez jarraian gutxienez.
d) Igariko Kontzejuan nahiz udalean ordaindu beharreko zergak ordainduak izatea.
Betebehar hori ez da betetzat joko, baldin eskabidea aurkezten den unean onuradunak mugaeguna gainditu duten zor galdagarriak baditu aipatutako entitateekin, betiere dagokion organo eskudunaren ziurtagiriaren arabera.
b) Azienda Igarin erregistratua izatea, urtebete lehenagotik.
4. artikulua. Azienda kargak.
Igariko Kontzejuak kalkulatuko ditu bazkalekuen balioa eta jasan ditzaketen azienda kargak.
5. artikulua. Kanona.
Urtero ezarriko da zer kanon ordaindu behar duten herri-larreen aprobetxamenduaren onuradun diren familia-unitateek, aurrekontuen aurreikuspenen arabera. Kanon hori urtero eguneratuko da, nekazaritza eta abeltzaintzako produktuen balio-gehikuntzaren arabera. Larreen balio errealaren %90 izanen da kanona.
Kanona urteroko martxoaren 31 baino lehen ordainduko da.
6. artikulua. Epea.
Herritarrentzako zuzeneko adjudikazioaren bidez egiten den aprobetxamenduaren epea zortzi urtekoa izanen da.
7. artikulua. Zuzeneko aprobetxamendua.
Herri-larreen aprobetxamendua zuzenean eginen da, eta ez da baimenik emanen azpierrentamendua egiteko edo beste batzuei lagatzeko.
8. artikulua. Osasun babesa.
Herri-larreetan bazkatzen den aziendak beharko du ziurtagiri bat, frogatzen duena betetzen direla osasun babesari buruzko legerian eskatzen diren baldintzak, eta bete beharko ditu aipatutako legean eta haren erregelamenduetan ezarritako baldintza guztiak.
III. KAPITULUA
Adjudikatzeko prozedura
9. artikulua. Eskabideak.
Udalbatzaren erabakiaren bidez, eta iragarkia argitaratuz Nafarroako Aldizkari Ofizialean eta iragarki-taulan, prozedura hasiko da eskabidea aurkez dezaten, 15 egun balioduneko epean, beren ustez herri-larreak aprobetxatzeko eskubidea duten herritarrek, hau da, beren ustez 3. artikuluko baldintzak betetzen dituzten herritarrek.
Eskabidearekin batera, aurkeztuko dira aziendaren osasun babesari buruzko ziurtagiria, 8. artikuluan aipatutakoa, gozatu nahi diren larreen zerrenda ordenatua, eta larre bakoitzean bazkatuko den abelburu kopurua.
Baldintzak betetzeari buruzko frogagiria eskatzen ahal die Kontzejuak eskatzaileei. Aurreko c) letrako ohiko bizilekua egiaztatzeko, eska ditzake: PFEZeko azkeneko aitorpena, Gizarte Segurantzaren ondorioetarako helbidea, Osasun Zerbitzurako helbidea, etab., baita argiaren, uraren eta abarren fakturak ere.
10. artikulua. Herritarrentzako behin-behineko adjudikazioa.
Eskabideak ikusirik, Kontzejuak behin-behineko adjudikazioa eginen du. Zozketa erabil dezake. Zozketa horretan, zenbaki bat aterako da ausaz, eta horren araberakoa izanen da larreak hautatzeko familia onuradunen hurrenkera.
Behin-behineko adjudikazioa eginik, iragarriko da Kontzejuaren ediktuen iragarki-taulan, eta bost eguneko epea emanen da erreklamazioak aurkezteko. Halakorik ez bada, behin betikoz onetsitzat joko da epea bukatutakoan.
11. artikulua. Herritarrentzako behin betiko adjudikazioa.
Osoko bilkurak behin betiko adjudikazioa onetsi aurretik, Kontzejuak itxituraren egoera ikuskatuko du. Halaber, adjudikaziodunarekin elkarlanean, aztertuko du nola segurtatu aziendarentzako ur-guneak, zeinak lehorteetan kaltetu baitaitezke.
Abeltzainaren erantzukizuna izanen dira haren aziendak eragindako era guztietako kaltegalerak, hala itxitura barnean nola kanpoan. Horregatik, exijituko zaio erantzukizun zibileko aseguru bat aurkez dezala.
Ondorio horietarako, adjudikaziodunak 500 euroko fidantza bat jarriko du.
Baldin aprobetxamenduak iraun bitartean Kontzejuak kalteren bat aurkitzen badu, eskatuko dio ezarritako epean konpon dezala. Bete ezean, fidantza betearaziko da, eta bukaera emanen zaio adjudikazioari.
12. artikulua. Enkante publikoa.
Herritarrentzako zuzeneko adjudikazioaren bidez ez badira herri-larre guztiak adjudikatzen, sobera gelditu direnak enkante publikoaren bidez adjudikatuko dira, erabakitzen den eperako, ordenantza honetan eta indarra duen legerian ezarritakoari lotuz.
Enkante bakoitzerako, prestatuko da baldintza osagarrien agiri bat, bi aldeek sinatu behar dutena.
Osoko bilkurak enkanteko behin betiko adjudikazioa egin baino lehen, 11. artikuluari jarraikiz jokatuko da.
IV. KAPITULUA
Arau-hausteak eta zehapenak
13. artikulua. Arau-hausteak
Arau-hauste administratibotzat hartzen dira honako hauek:
a) Herri-larreetan bazkatzen den aziendaren Osasun Babesari buruzko Foru Legean eta Erregelamenduan xedatutakoa ez betetzea.
b) Azienda sartzea ordenantza honen arabera adjudikatu ez diren tokietan eta garaian.
c) Nabarmen gaizki egitea edo osorik ez egitea herritarrentzako aprobetxamendua.
d) Adjudikaturiko bazkalekua azpierrentamenduan ematea edo beste bati eskualdatzea.
e) Kalteak eragitea artegietan, aziendarentzako putzuetan, bideetan edo Kontzejuaren beste ondasun batzuetan.
f) Ordainketa ez egitea ezarritako epeetan.
g) Abeltzainak Kontzejuari ez jakinaraztea, hiru hilabete lehenagotik, abeltzaintzako jardueratik geldituko dela.
h) Ez ematea edo faltsutzea adjudikazioak egiteko erabili diren datuak.
i) Ordenantza honetan xedatutakoari kontra egiten dioten egitate edo egintza guztiak.
14. artikulua. Zehapenak.
Arau-hauste horiek honako zehapen hauek izanen dituzte:
–a), d), e), h) eta i) arau-hausteengatik, kontzesioa kenduko da, galarazi gabe Nafarroako Gobernuaren organo eskudunek ezartzen ahal dituzten zehapenak.
–Gainerako arau-hausteengatik, ordainduko da egindako kaltearen balioa halako bost gutxienez, eta halako hamar, gehienez, zehapen gisa. Balio hori zehazterik ez badago, 300 eurotik 12.000 eurora bitarteko zehapena ezarriko da. Hori guztia, deusetan galarazi gabe ondasun publikoetan edo hirugarrenen ondasunetan eragindako kalteen ordainketa, kalteen egileak bidezko moduan ordainduko baititu.
Egintza gertatzen denetik 2 urteren buruan preskribatuko dute arau-hausteek.
AZKEN XEDAPENA
Ordenantza honek Nafarroako Aldizkari Ofizialean argitaratzen denetik aurrera hartuko du indarra.
Iragarkiaren kodea: L1914757
