1. NAFARROAKO FORU KOMUNITATEA
1.1. XEDAPEN OROKORRAK
1.1.2. Foru Dekretuak
79/2010 FORU DEKRETUA, abenduaren 13koa, aldatzen dituena irailaren 4ko 63/2006 Foru Dekretua, Nafarroako Foru Komunitateko Lanbide Heziketako Ikastetxe Integratuak arautzen dituena, eta abenduaren 21eko 421/1992 Foru Dekretua, Musika eta Dantza Eskolen sortzea eta funtzionamendua zuzenduko duten oinarrizko arauak ezartzen dituena, Europako Parlamentuak eta Kontseiluak barne merkatuko zerbitzuei buruz 2006ko abenduaren 12an emandako 2006/123/EE Zuzentaraura egokitzeko.
Zioen azalpena
Europako Parlamentuak eta Kontseiluak barne merkatuko zerbitzuei buruz 2006ko abenduaren 12an emandako 2006/123/EE Zuzentarauaren bidez ezarritako xedapenen arabera, estatu kideek beren legeria eta erregulazioak ebaluatu behar dituzte Europar Batasunean kokatzeko askatasunerako eta zerbitzuak aske emateko dauden oztopo legal eta administratiboei dagokienez. Xedea da zerbitzu emaile nahiz hartzaileei Itunaren bi askatasun funtsezko horiek erabiltzeko beharrezkoa den segurtasun juridikoa bermatzea. Hala, ebaluazio horren helburua da oztopo horiek zerbitzuen zuzentarauaren ikuspuntutik justifikaziorik duten aztertzea, eta hala ez bada, dagokion araudia ezabatu edo aldatzeko beharra ezartzea.
Nafarroako Gobernuak 2007ko urriaren 29an egindako bilkuran hartutako Erabakiaren bidez, barne merkatuko zerbitzuei buruzko zuzentarauaren transposiziorako batzordea sortu zuen, eta departamentu bakoitzaren berezko jarduketak sustatu eta koordinatzeko eginkizunak esleitu zizkion.
Zerbitzuei buruzko zuzentarauak hezkuntza arloan eskumena duen departamentuaren eremuan ukitzen dituen arau guztiak identifikatu eta ebaluatzeko prozesua bukatuta, ondorioztatzen da prozedura gehienetan beharrezkoa dela esku-hartze administratiboaren araubidea mantentzea, ikastetxeak ireki aurreko baimenari eutsiz (baldintza hori nahitaezkoa da hezkuntzarako eskubidea behar bezala bermatzeko), bai eta administrazio-isiltasun negatiboaren araubidea mantentzea ere, interes orokorreko ezinbesteko arrazoi baten ondorioz epearen barnean ebazpenik ematen ez den kasuetan.
Horretarako, ondoko arau hauek identifikatu dira: uztailaren 3ko 251/1992 Foru Dekretua, Nafarroako Foru Komunitatean araubide orokorreko irakaskuntza ez-unibertsitarioa ematen duten ikastetxe pribatuak baimentzeko prozedura ezartzen duena; martxoaren 26ko 28/2007 Foru Dekretua, Nafarroako Foru Komunitatean Haur Hezkuntzako lehen zikloa arautzen duena eta hori ematen duten ikastetxeek bete beharreko baldintzak eta ziklo horren hezkuntza edukiak ezartzen dituena; irailaren 4ko 63/2006 Foru Dekretua, Nafarroako Foru Komunitateko Lanbide Heziketako Ikastetxe Integratuak arautzen dituena, eta abenduaren 21eko 421/1992 Foru Dekretua, Musika eta Dantza Eskolen sortzea eta funtzionamendua zuzenduko duten oinarrizko arauak ezartzen dituena. Azken biak aldatuko dira.
Arau horietan egindako aldaketei esker, kasu batean, Lanbide Heziketako Ikastetxe Integratuen berezko zerbitzua aske emateko aukera izanen da, eta bestean, musika eta dantza eskolen berezko jarduera hastekoa, aldez aurretik administrazio-baimena eskuratu beharrik gabe.
Arau horiek egokitzen zaizkie abenduaren 9ko 15/2009 Foru Legean, enpresa edo lanbide jarduerak abian jartzeko xedearekin administrazioa errazteko neurriei buruzkoan, ezarritako jarraibideei. Foru lege horren bidez, administrazioa errazteko neurri batzuk arautzen dira, pertsona fisiko edo juridikoei Nafarroako Foru Komunitatearen eremuan enpresa edo lanbide jarduerak abian jartzea errazteko.
Horrenbestez, Hezkuntzako kontseilariak proposaturik, Nafarroako Kontseiluarekin bat etorrita, eta Nafarroako Gobernuak 2010eko abenduaren 13ko bilkuran hartutako Erabakiarekin bat,
DEKRETATU DUT:
Lehen artikulua.-Nafarroako Foru Komunitateko Lanbide Heziketako Ikastetxe Integratuak arautzen dituen irailaren 4ko 63/2006 Foru Dekretua aldatzea.
Nafarroako Foru Komunitateko Lanbide Heziketako Ikastetxe Integratuak arautzen dituen irailaren 4ko 63/2006 Foru Dekretua aldatzen da.
Bat. Honela idatzita agertuko da 5. artikuluko 3. idatz-zatia:
"3. Ikastetxe Integratu Politekniko bat hezkuntza arloan eskumena duen departamentuaren izendapen zuzenez sortuko da. Horretarako, Nafarroako Lanbide Heziketaren Kontseiluaren iritzia adituko da aldez aurretik."
Bi. Honela idatzita agertuko da 5. artikuluko 4. idatz-zatia:
"4. Ikastetxe Integratu Pribatu bat sortzeko, hezkuntza arloan eskumena duen departamentuaren administrazio-baimena beharko da. Ikastetxeak ikastetxe pribatuetarako baimenean ezarritako baldintzak bete beharko ditu. Dena dela, baimen hori atzera botatzen ahalko da ikastetxeak hura baimentzeko ezarri ziren baldintzak betetzeari uzten badio, edo zerbitzuak emateari behin betiko uzten badio.
Bigarren artikulua.-Musika eta Dantza Eskolen sortzea eta funtzionamendua zuzenduko duten oinarrizko arauak ezartzen dituen abenduaren 21eko 421/1992 Foru Dekretua aldatzea.
Musika eta Dantza Eskolen sortzea eta funtzionamendua zuzenduko duten oinarrizko arauak ezartzen dituen abenduaren 21eko 421/1992 Foru Dekretua aldatzen da.
Bat. Honela idatzita agertuko da 19.2 artikulua:
"2. Musika eskolak bere heziketa eskaintzan organo ikasketak sartzen dituenean, klaseak tresna dagoen tokian ematen ahalko dira. Horrelakoetan, tresnaren titularraren adostasuna erantsiko zaio jardueraren aldez aurreko jakinarazpena egitean eskatutako dokumentazioari."
Bi. VI. kapituluaren izenburua aldatzen da eta, hemendik aurrera, honela idatzita agertuko da:
"VI. kapitulua.-Musika eta Dantza Eskolen sorrera jakinaraztea, Berariazko Erregistroan inskribatzea, inskripzioa aldatzea eta atzera botatzea.
Hiru. 20. artikulua aldatzen da eta, hemendik aurrera, honela idatzita agertuko da:
"20. artikulua.
1. Ikastetxe horiek ireki eta abian jartzeko baldintza izanen da titularrak hezkuntza arloan eskumena duen departamentuari jarduera jakinaraztea aldez aurretik. Hori ohiko bideetatik nahiz bide elektronikoen bidez eginen da, Nafarroako Foru Komunitateko Administrazioko Erregistro Orokor Elektronikoaren bidez.
Aldez aurreko jakinarazpen hori Musika eta Dantza Eskolen Berariazko Erregistroan inskribatzeko eskaeratzat ere joko da.
2. Jakinarazpenari dokumentu hauek erantsiko zaizkio:
a) Eskolaren izen berariazkoa eta kokapen geografikoa adierazten dituen eskabidea.
b) Titularraren nortasuna egiaztatzen duten agiriak eta dekretu honen 15. artikuluan aipatzen diren kasuetako batean ere ez dagoela azaltzen duen aitorpena edo adierazpena.
c) Foru dekretu honen 6. artikuluan zerrendatutako agiri akademiko eta pedagogikoak.
d) Eskolako instalazioen planoak, zertarako erabiliko diren azalduta, eta ikastetxeko ekipamenduaren zerrenda.
e) Eskolako zuzendari kargua hartuko duen pertsonaren merezimendu akademiko eta pedagogikoak egiaztatzen dituzten agiriak.
f) Irakasleek foru dekretu honen 12. eta 13. artikuluetan aipatzen diren titulazio baldintzak betetzen dituztela egiaztatzen duten agiriak eta emanen duten espezialitatea.
g) Zenbat ikasle hartzeko asmoa dagoen.
3. Eskolaren titularrak jakinarazpena aurkezten duen egunetik aurrera eman ahalko dio hasiera jarduerari, ezertan galarazi gabe gerora hezkuntza arloan eskumena duen departamentuak titularrak foru dekretu honetan ezarritako baldintzak betetzen dituela egiaztatu ahal izatea."
Lau. Honela idatzita agertuko da 21. artikulua:
"21. artikulua.
Nafarroako Gobernuan hezkuntza arloan eskumena duen departamentuaren mendeko ikastetxeen erregistroan, Musika eta Dantza Eskolen Berariazko Erregistro bat sortuko da. Bertan inskribatuko dira titulartasun publiko edo pribatuko eskolak, baldin eta horien helburuak eta funtzionamendurako baldintzak foru dekretu honetan ezarritakora egokitzen badira."
Bost. Honela idatzita agertuko da 22. artikulua:
"22. artikulua.
"Ikastetxea Musika eta Dantza Eskolen Berariazko Erregistroan inskribatzeko, beharrezkoa izanen da hezkuntza arloan eskumena duen departamentuak egiaztatzea 21. artikuluan eskatutako agiriekin batera aurkeztutako eskola proiektua foru dekretu honetan ezarritako helburu eta baldintzetara egokitzen dela eta legeria indardunak ezarritako gutxieneko baldintzak betetzen dituela."
Sei. Honela idatzita agertuko da 23. artikulua:
"23. artikulua.
1. Akatsak zuzentzeko tramitea, halakorik badago, egin ondoren, Ikuskapenaren eta Zerbitzuen zuzendari nagusiak ebazpen bat emanen du, eta bertan aginduko, baldintzak bete direla egiaztatu ondoren, ikastetxea Musika eta/edo Dantza Eskolen Berariazko Erregistroan inskribatzeko.
Ebazpen hori hiru hileko gehieneko epean emanen da, jakinarazpena hezkuntza arloan eskumena duen departamentuaren erregistroan sartzen denetik hasita. Epe horretan ebazpenik ematen ez bada, Berariazko Erregistroan inskribatzeko eskaera baietsi dela ulertuko da."
2. Musika eta/edo Dantza Eskola inskribatzeko agindua ematen duen ebazpenean datu hauek agertuko dira:
a) Ikastetxearen titularra.
b) Helbidea, herria, udalerria, probintzia.
c) Izen generikoa.
d) Berariazko izena.
e) Ematen diren espezialitateak.
3. Ebazpen hori Nafarroako Aldizkari Ofizialean argitaratuko da."
Zazpi. Honela idatzita agertuko da 24.2 artikulua:
"Hezkuntza arloan eskumena duen departamentua adi egonen da, erregistratu gabeko ikastetxeek 1. idatz-zatiaren arabera erregistratuak daudenei dagozkien izenak har ez ditzaten."
Zortzi. 25. artikulua indargabetzen da.
Bederatzi. 26. artikulua indargabetzen da.
Hamar. Honela idatzita agertuko da 29. artikulua:
"29. artikulua.
Eskolako edozein eraldaketaren ondorioz berariazko izena aldatu, instalazioak aldatu, espezialitateak gehitu, eskaintza aldatu eta titulartasuna edo eraikina aldatu egiten badira, Nafarroako Gobernuan hezkuntza arloan eskumena duen departamentuari jakinaraziko zaio. Horrek, gehienez ere hiru hileko epean, jakinarazpena hezkuntza arloan eskumena duen departamentuaren erregistroan sartzen denetik hasita, baldintzak egiaztatu eta, kasua bada, beharrezkoak diren datuak eguneratuko ditu dagokion ebazpenaren bidez.
Epe horretan ebazpenik ematen ez bada, aldaketa egiteko eskaera baietsi dela ulertuko da."
Hamaika. Honela idatzita agertuko da 30. artikulua:
"30. artikulua.
Musika eta Dantza eskola berariazkoek foru dekretu honetan ezarritako baldintzak betetzeari edo funtzionamendurako arauetara egokitzeari uzten badiote, Hezkuntza Administrazioak Musika eta Dantza Eskolen Berariazko Erregistroan egindako inskripzioa atzera botatzeko espedientea irekiko du, entitate interesdunari entzunaldia eman ondoren."
Hamabi. Honela idatzita agertuko da 31. artikulua:
"31. artikulua.
1. Inskripzioa arrazoi hauengatik botako da atzera:
a) Ematen dituen ikasketak ez betetzea.
b) Jarduerak etetea.
c) Foru dekretu honetan ezarritako baldintzak ez betetzea.
2. Nolanahi ere, titularrari aurreko atalean ezarritakoa nabarmenduko zaio, akatsak zuzen ditzan; emandako epean egin ezean, erregistroan egindako inskripzioa atzera botatzeko espedienteari hasiera emanen zaio.
3. Atzera botatzeko espedienteari hasiera eman eta gero, Hezkuntzako Ikuskapen Zerbitzuak entzunaldia emanen dio ikastetxearen titularrari. Tramite hori eginda, Ikuskapenaren eta Zerbitzuen zuzendari nagusiak dagokion ebazpena emanen du.
4. Aurreko atalean aipatutako ebazpenak ikastetxea Musika eta Dantza Eskolen Berariazko Erregistrotik ateratzea ekarriko du, bai eta bere izena egokitzea ere, ikastetxearen funtzionamendua galarazi gabe."
Xedapen iragankor bakarra.-Foru dekretu honek indarra hartu baino lehen hasitako baimena emateko prozedurak.
Foru dekretu honen bidez onetsitako arau-aldaketek ez dute eraginik izanen horrek indarra hartu baino lehen hasitako baimena emateko prozeduretan. Horiek kasuan kasuko eskaera aurkeztu zeneko unean indarrean zegoen araudiaren arabera arautuko dira.
Azken xedapena.-Indarra hartzea.
Foru dekretu honek Nafarroako Aldizkari Ofizialean argitaratzen den egunean hartuko du indarra.
Iruñean, 2010eko abenduaren 13an.-Nafarroako Gobernuko lehendakaria, Miguel Sanz Sesma.-Hezkuntzako kontseilaria, Alberto Catalán Higueras.
Iragarkiaren kodea: F1020468
