II. NAFARROAKO TOKI ADMINISTRAZIOA
2.1. ORDENANTZAK ETA BESTELAKO XEDAPEN OROKORRAK
ARELLANO
Ordenantzaren behin betiko onespena
Arellanoko Udalak, 2006ko apirilaren 27ko osoko bilkuran, hasiera batean onetsi zuen Ingurumena babesteko jarduera sailkatuen kontrolaren arloko baimenak emateagatik ordaindu beharreko tasei buruzko ordenantza fiskala. Jendaurrean paratu zen hogeita hamar egun baliodunean, 2006ko 67. Nafarroako ALDIZKARI OFIZIALean, ekainaren 5ekoan, eta Udaleko iragarki oholean argitaratu ondoan. Inork alegaziorik aurkeztu ez duenez, behin betikoz onetsirik gelditu da.
Arellanon, 2006ko uztailaren 12an._Alkatea, Pedro Luis González Castillo.
ORDENANTZA FISKALA, INGURUMENA BABESTEKO JARDUERA SAILKATUEN KONTROLAREN ARLOKO BAIMENAK EMATEAGATIK ORDAINDU BEHARREKO TASEI BURUZKOA
Oinarria
1. artikulua. Ordainarazpen hau ezarri da Nafarroako Toki Ogasunei buruzko martxoaren 10eko 2/1995 Legearen lehenengo tituluko IV. kapituluko 7. atalean xedatutakoaren arabera eta lege bereko 12. artikuluan jasotzen den baimenari jarraituz.
Zergapeko egintza
2. artikulua. Zergapeko egintza ingurumena babesteko jarduera sailkatuetan aritzeko zerbitzu tekniko eta administratiboak egitea da, ondoko kasuetan:
a) Jarduera lizentzia.
b) Jarduera lizentzia berrikustea.
c) Irekitzeko lizentzia.
d) Irekitzeko lizentziaren aldaketa.
e) Udal txostenak eskatzea.
Zerga ordaindu beharra
3. artikulua. Lizentzia noiz eskatzen den, orduan sortuko da tasa. Ez da tasarik sortuko, interesatuak eskabideari uko egiten badio, lizentzia emateko udal erabakia hartu baino lehen.
Subjektu pasiboa
4. artikulua. Ordenantza honetan ezarritako tasak ordaindu behar dituzte pertsona fisiko eta juridikoek, bai eta, nortasun juridikorik ez izan arren, batasun ekonomikoa edo aparteko ondarea osatzen duten entitateek ere, baldin haien izenean lizentzia eman, aldatu edo berraztertzen bada.
Tarifak
5. artikulua. Tarifak arau honen eranskinean agertzen dira.
Kudeaketa arauak
6. artikulua. Jarduteko eta irekitzeko lizentzia erdiesteko interesa duten pertsonek behar den eskabidea aurkeztuko dute Udaletxean, lokalean egin beharreko jarduera(k) eta horren (horien) kokapena zehazten dituztela, dagozkien udal ordenantzetan eskatutako dokumentazioarekin batera.
7. artikulua. Lizentzia eman eta tasaren likidazioa onetsia dela, interesatuak zenbatekoa ordaindu beharko du, jakinarazpena jasotzen duenetik aitzina borondatezko kobrantza aldiaren barrenean; bestela, inolako gaztigurik gabe, premiamendu bidez kobratuko da.
8. artikulua. Emandako lizentziek balioa galduko dute dagokien arautegian ezarritako epe eta arauen arabera, eta hori gertatuz gero, jardueran aritu nahi duten interesatuek lizentzia berria eskatu beharko dute eta tasa oso-osorik berriz ordaindu.
9. artikulua. Titulartasuna aldatu edo jardueraren eskualdaketa gertatzen denean, lizentziaren titular berriak Udalari jakinaraziko dio, eta horretarako behar diren egiaztagiriak aurkeztuko ditu. Lizentzia egiaztatzen duen titulua titular berriarentzat egiteagatik, dagokion tasa kobratuko zaio.
Arau-hausteak
10. artikulua. Arau-hausteei eta zehapenei dagokien orotan, Ordenantza fiskal orokorrean xedatutakoari jarraituko zaio.
TARIFEN ERANSKINA
I. epigrafea._Jardueren lizentzia edo jarduera lizentzien berrikuspena, Ingurumena babesteko esku hartzeari buruzko martxoaren 22ko 4/2005 Foru Legearen 4D eranskinean zehaztutako jarduera sailkatuen proiektuei buruzkoak.
II. epigrafea._Jardueren lizentzia edo jarduera lizentzien berrikuspena, Ingurumena babesteko esku hartzeari buruzko martxoaren 22ko 4/2005 Foru Legearen 4A, 4B eta 4C eranskinetan zehaztutako jarduera sailkatuen proiektuei buruzkoak.
III. epigrafea._Irekitzeko lizentzia edo irekitzeko lizentzien berrikuspena, Ingurumena babesteko esku hartzeari buruzko martxoaren 22ko 4/2005 Foru Legearen 4D eranskinean zehaztutako jarduera sailkatuen proiektuei buruzkoak.
IV. epigrafea._Irekitzeko lizentzia edo irekitzeko lizentzien berrikuspena, Ingurumena babesteko esku hartzeari buruzko martxoaren 22ko 4/2005 Foru Legeko 4A, 4B eta 4C eranskinetan zehaztutako jarduera sailkatuen proiektuei buruzkoak.
V. epigrafea._Udalaren txostenak eskatzea.
Tasak: Udalaren aholkularitza teknikoak eman beharreko adostasun txosten edota errekerimendu bakoitzeko, aipatu epigrafeetako edozeinetan: teknikariak fakturatzen dituen ordainsariak, aholkularitza teknikorako Udalarekin sinaturiko kontratuari jarraikiz.
Iragarkiaren kodea: L0612065
