Iragarkia

26. ALDIZKARIA - 2023ko otsailaren 7a

1. NAFARROAKO FORU KOMUNITATEA

1.7. BESTELAKOAK

9/2023 EBAZPENA, urtarrilaren 25ekoa, Hezkuntzako zuzendari nagusiak emana, funts publikoak jasotzen dituzten Nafarroako Foru Komunitateko Haur Hezkuntzako lehen zikloko ikastetxeetan 2023-2024 ikasturtean haurrak onartzeko prozedura onartzen duena.

Martxoaren 26ko 28/2007 Foru Dekretuak, Nafarroako Foru Komunitatean Haur Hezkuntzako lehen zikloa arautzen duenak, 12. artikuluko 1. apartatuan ezartzen du Hezkuntza Departamentuak arautuko duela ikasleak nola onartu funts publikoak jasotzen dituzten ikastetxeetan, baldintza beretan sartzeko aukera izan dezaten.

Araudi indarduna aplikatzeko, eta Hezkuntzari buruzko maiatzaren 3ko 2/2006 Lege Organikoak eskolatzearen arloan ezarritako esparruaren barnean, bidezko da prozedura onestea funts publikoak jasotzen dituzten Haur Hezkuntzako lehen zikloko ikastetxe guztietan ikasleak onartzeko.

Haur Eskolen Zerbitzuko zuzendariak aldeko txostena aurkeztu du funts publikoak jasotzen dituzten Haur Hezkuntzako lehen zikloko ikastetxeetan, 2023-2024 ikasturtean, haurrak onartzeko prozedura onesteko.

Hezkuntza Departamentuaren egitura organikoa ezartzen duen urriaren 30eko 267/2019 Foru Dekretuak ematen dizkidan ahalmenak erabiliz,

EBAZTEN DUT:

1. Prozedura onestea haurrak onartzeko, 2023-2024 ikasturtean, funts publikoak jasotzen dituzten Nafarroako Foru Komunitateko Haur Hezkuntzako lehen zikloko ikastetxeetan, oinarri hauekin bat:

OINARRIAK

1.–Ikaspostuen hartzaileak.

2021ean eta 2022an jaiotako haurren aitek, amek edo legezko ordezkariek eska dezakete ikaspostua, baita 2023an jaiotako haurrenek ere, baldin eta 2023-2024 ikasturtea hasi baino 16 aste lehenago jaio badira. Urtebetetik beherakoentzako instalaziorik ez duten haur-eskoletan, ikasturtea hasten den egunean urtebete beteta duten haurrentzako soilik eskatu ahal izango da plaza.

Ebazpen honetan aurreikusitako prozedura aplikatuko zaie 2022-2023 ikasturtean ikastetxean matrikulatuta ez dauden haurrei.

2.–Hezkuntza Departamentuak hizkuntza modalitateak eta unitateak baimentzea.

Toki erakundeek Hezkuntza Departamentuari jakinaraziko diote zenbat unitate eta zein hizkuntza modalitate aurreikusten duten eskainiko direla haur-eskola bakoitzean 2023-2024 ikasturtean, eta zertan oinarritzen den aurreikuspen hori. Aurreikuspen hori 2023ko otsailaren 14a baino lehenago igorriko da helbide honetara: seccion.escuelasinfantiles.escuelasrurales@navarra.es.

Bidezkotzat joz gero, Hezkuntza Departamentuak justifikazio zehatzagoa eska diezaieke toki erakundeei igorritako proposamenari buruz.

Hezkuntza Departamentuak aurreikusitako eskaintza baimendu beharko du, ikaspostuak erreserbatzeko aldia ireki baino lehen.

3.–Onarpen-prozedurako hautapen batzordeak.

Erakunde titular bakoitzak hautapen batzorde bat izendatuko du, gutxienez ere erakunde titularraren ordezkari batek eta ikastetxearen ordezkari batek osatua. Erakunde titularraren ordezkaria izanen da batzordeburua.

Batzordeak eginkizun hauek izanen ditu:

a) Ikaspostuak erreserbatzeko prozedura aurrera eramatea.

b) Baremoa eta izapideak egiteko epeak argitaratzea.

c) Eskatzaile bakoitzari dagokion puntuazioa esleitzea, ebazpen honen eranskinean haurrak onartzeko ezarritako baremoarekin bat.

d) Haurrak onartzeko prozesua ebaztea, eta onartu eta baztertuen behin-behineko eta behin betiko zerrendak argitaratzea, lortutako puntuazioa adierazita.

e) Erreklamazioak ebaztea.

f) Plangintza egitea, haurrak unitateka banatuta, ikasturteko lehen egunean duten adina erreferentzia gisa hartuta.

g) Behin-behineko plangintzaren lehenbiziko plantilla Hezkuntza Departamentura igortzea 2023ko apirilaren 19a baino lehen, aurreinskripzioari buruzko datuekin; behin-behineko plangintzaren bigarren plantilla, matrikulako datuekin, 2023ko ekainaren 9a baino lehen; eta behin betiko plantilla, ikasturteko lehen astean beteta dauden ikaspostuen kopuruari buruzko datuekin, Hezkuntzako Ikuskapen Zerbitzuak eskola horretarako onetsitako egutegiaren arabera.

Ebazpen honen 7. oinarrian ezarritakoaren arabera haurrak onartzeko epeak egokitu dituzten erakundeen kasuan, onartuen behin-behineko zerrendak argitaratu baino lehen igorri beharko dute behin-behineko plangintza, aurreinskripzioari buruzko datuekin.

4.–Haurrak onartzeko prozeduraren barruko jarduketak.

Funts publikoak jasotzen dituzten Haur Hezkuntzako lehen zikloko ikastetxeetan haurrak onartzeko prozeduraren barruan jarduketa hauek eginen dira:

a) Ikaspostuak erreserbatzea, ikastetxe horietan 2022-2023 ikasturtean matrikulatu diren haurrendako.

b) Eskaerak aurkeztu eta jasotzea, baremazioa egitea eta behin-behineko zerrendak argitaratzea.

c) Erreklamazioak ebaztea eta behin betiko zerrendak argitaratzea.

d) Matrikula egitea.

Iruñearen kasuan, batera eginen dira Hezkuntza Departamentuaren ikastetxeetako aurreinskripzioa eta Iruñeko Udalaren ikastetxeetakoa.

5.–Onartzeko prozedura.

5.1. Plazen erreserba.

Hautapen batzordeak jarraibide batzuk ezarriko ditu 2022-2023 ikasturtean ikastetxean ibili diren haurrei ikaspostua erreserbatzeko. Erreserba 2023ko otsailaren 20tik 24ra bitarte eginen da.

Ikastetxe bakoitzean proposatzen den taldekatze modalitatea desberdina izan daiteke, Hezkuntza Departamentuak berrikusitako plangintzaren arabera.

Familiek ezin izanen dute ikaspostuak erreserbatzeko eskatu une horretan ordaindu gabeko kuotaren bat badute.

Haur batek ikaspostua uzten badu hurrengo ikasturterako ikaspostua erreserbatu ondoan, hari loturiko eskubideak galduko ditu; hau da, ikaspostuaren erreserbak ez du ondoriorik izanen.

5.2. Eskaerak.

Erakunde titularrek onarpen eskaerak bildu eta aurkezteko modua antolatuko dute. Eskaerak aurkezteko epea 2023ko martxoaren 6tik 17ra artekoa izanen da, biak barne. Erakunde titularraren ikastetxe bat baino gehiago egonez gero, edo ordutegi edo hizkuntza modalitate bat baino gehiago izanez gero, eskatzaileek lehentasun ordena adierazi beharko dute.

5.3. Dokumentazioa.

5.3.1. Haur eskolan sartzeko eskabideak eredu ofizialaren araberakoak izanen dira, eta dokumentazio hau izanen dute erantsita:

a) Eskaera baldin bada oraindik jaio ez den haur batentzat, aurreikusitako jaiotze-data egiaztatzen duen mediku-txostena erantsiko da. Adopzio edo harrera prozesuan dauden haurren kasuan, jaiotze-data egiaztatzen duen agiria aurkeztu beharko dute.

b) Amaren, aitaren edo legezko ordezkarien NAN, pasaporte, atzerritarrendako bizileku-txartel, nortasun-agiri edo agiri baliokidearen fotokopia.

c) Familia nork osatzen duen frogatzen duen dokumentazioa:

–Familia liburuaren fotokopia edo, horrelakorik ezean, antzeko agiri ofizial osoarena. Familia-nukleoan baldin badaude familia-liburuan jasota ez dauden seme-alabak, beste agiri ofizial batzuen bidez egiaztatu beharko da hori.

–Haurra familia-harreran dagoela edo adoptatua dela frogatzen duen agiria.

–Banantzearen edo dibortzioaren kasuan, hura ezartzen duen epai judiziala edo legez frogatzen duen dokumentua.

–Hala badagokio, familia unitateko kideren batek %33ko edo gehiagoko desgaitasun fisiko, psikiko edo sentsoriala duela egiaztatzen duen ziurtagiria.

–Familia ugariaren titulua.

–Familia gurasobakarraren titulua.

d) Amaren eta aitaren edo legezko ordezkarien lan egoera edo egoera akademikoa frogatzen duen dokumentazioa:

–Besteren konturako langileen kasuan, aurreinskripzioaren epea bukatzeko egunaren aurreko 30 egunetan Gizarte Segurantzan edo dagokion mutualitatean alta emanda zegoela frogatzen duen agiria.

–Norberaren konturako langileen lan egoera frogatzeko, aurreinskripzio-epearen muga egunaren aurreko 30 egunean mutualitate orokorrean edo Gizarte Segurantzaren dagokion araubidean eta ekonomia-jardueren gaineko zergan alta emanda zegoela frogatzen duten agiriak beharko dira.

–Langabeen kasuan, enplegu eskariaren txartela.

–Eszedentzian egonez gero hiru urtetik beherako seme-alabak zaintzeko, eszedentziaren jakinarazpena aurkeztu behar da. Lan egoera aktibotzat hartzeko, idatziz zehaztu beharko da lanera itzuliko dela ikasturtea hasi ondoko hilabete eta erdi baino lehen.

–Eskaera aurkezteko unean ikasten arituz gero, matrikularen, ikasturteko egutegiaren eta ordutegiaren frogagiriak aurkeztuko dira.

–Kasua bada, gurasoetako bati edo familia unitatearen legezko tutoreei ezintasun iraunkor absolutuagatik edo baliaezintasun handiagatik pentsio bat dagokiela frogatzen duen agiria.

e) Errenta mailak frogatzeko agiriak:

–Pertsona fisikoen errentaren gaineko zergaren azken aitorpenen fotokopiak, familia unitatearen kide konputagarri guztienak. Aitorpena egitera behartuta ez badaude, hori frogatzen duen dokumentazio ofiziala aurkeztu beharko da, bai eta bestelako errentak edo diru-sarrerak jasotzen direla frogatzen duena ere, edo, azken buruan, horien gaineko zinpeko aitorpena eta/edo ikastetxearen titularra den toki erakundeak familiaren 2021eko diru-sarrerak zehazteko beharrezkotzat jotzen dituen agiriak, edo 2022ko diru-sarrerei dagozkienak, onarpen prozesua 2023ko ekainaren 30aren ondoren egiten bada.

f) Amaren, aitaren edo legezko ordezkarien bizilekua edo lantokia eraginpeko eremu geografikoan dagoela frogatzen duen dokumentazioa:

–Erroldaren ziurtagiria, kasuan kasuko udalak emana, jasotzen duena bai haurra bai haren gurasoetako bat gutxienez edo haurraren legezko ordezkariak udalerrian erroldatuta daudela 2023ko urtarrilaren 1a baino lehenagotik, edo, udalerri horretara bizitzera joan badira lanagatik edo haurrarekin bizi den gurasoari dagozkion beste arrazoi justifikatu batzuk daudelako, udalerri horretara bizitzera aldatu diren eguneko ziurtagiria.

–Jaio gabeko haurren kasuan, haurraren aitaren eta/edo amaren edo legezko ordezkarien erroldaren ziurtagiria.

–Kasua bada, haurraren zaintza eta jagoletza duen guraso edo legezko ordezkariaren lantokia frogatzen duen dokumentazioa.

–Bizilekuz aldatzea aurreikusi bada, etxebizitza berria ikasturtea hasi baino lehen emanen dietela frogatzen duen agiria aurkeztea baloratuko da. Kasu horretan, gaur egungo bizilekua zein den adieraziko da jakinarazpenetarako, eta bizileku berria, berriz, baremazioa egiteko.

g) Sarbide zuzenerako baldintza bereziak betetzen direla frogatzen duen dokumentazioa:

–Haurraren desgaitasuna kalifikatzeko ziurtagiria edo haurraren mendekotasun handia (III. gradua) aitortzen duen egiaztagiria, eta/edo profesional batek egindako txostena, berariazko hezkuntza premiak ekar ditzaketen ezaugarriak deskribatzen dituena.

h) Beste edozein egoera berezi baloratzeko frogagiriak:

–Egoera frogatzeko txosten bat, mediku edo psikologo batek, gizarte zerbitzuek edo zerbitzu espezializatu ofizialek egina.

5.3.2. Interesdunek berek aurkezten ahal dute dokumentazioa, edo kasuan kasuko entitate titularrari baimena ematen ahal diote administrazio publikoen esku dauden beharrezko datuak biltzeko. Baimen hori eskabide baten bitartez eman beharko da, dokumentazioa aurkezteko ezartzen den epearen barrenean, eta adierazi beharko da agiria noiz eta zein organotan aurkeztu zen.

5.3.3. Alegatzen den egoerari buruzko dokumentazioa aurkezten ez bada, zero puntuazioa emanen da onarpen baremoan dagokion atalean.

5.3.4. Egiaztatzen bada eskabidean edo erantsitako agirietan adierazitako datuak okerrak edo faltsuak direla, dagokion puntuazioa aldatuko da, eta, kasua bada, emandako ikaspostua kenduko zaio.

5.3.5. Hautapen batzordeak edozein unetan eska dezake zuzen daitezela interesdunek aurkeztutako dokumentazioak dituen akats formalak.

5.4. Ebazpenaren faseak.

5.4.1. Eskabideak baloratzeko, hautapen batzordeak ebazpen honen eranskinean ezarritako baremoa aplikatuko du, haurren amak, aitak edo legezko ordezkariek aurkeztutako dokumentazioaren arabera.

5.4.2. Hezkuntza Departamentuak baloratuko du premia pertsonal, familiar edo sozial larriak dituzten haurrak zuzenean sar daitezkeen Haur Hezkuntzako lehen zikloko ikastetxeetan, baldin haur horiek eskaturiko haur eskolan ikasposturik lortzen ez badute, ebazpen honen eranskineko 2.5 atalean aipatzen diren 10 puntuak esleitu ondoan. Premia larri horiek behar bezala justifikatu eta frogatu beharko dituzte toki erakundeek. Onartuen behin-behineko zerrenda argitaratu baino lehen eginen da balorazio hori, hautapen batzordeak hala eskatzen badu.

5.4.3. Onartuen behin-behineko zerrenda eta itxarote-zerrenda hautapen batzordeak zehaztutako moduan argitaratuko dira, 2023ko maiatzaren 9an, ebazpen honetan ezarritako baremoa aplikatu ondoren lortutako puntuazioaren arabera ordenaturik.

5.4.4. Behin-behineko zerrendaren kontra, interesdunek erreklamazioak aurkezten ahal dituzte ikastetxearen titular den erakundean, 2023ko maiatzaren 9tik 12ra, biak barne, hautapen batzordeari zuzenduta, eta erreklamazioan azalduko dute zergatik eskatzen den behin-behineko zerrendan agertutako puntuazioa berrikusteko. Ez da inola ere onartuko eskaerak aurkezteko epean aurkeztu ez zen dokumentazio berririk, non ez den aurkezten dagoeneko aurkeztutako dokumentazioak dituen forma akatsak zuzentzeko.

5.4.5. Onartuen behin betiko zerrenda eta itxarote-zerrenda 2023ko maiatzaren 18an argitaratuko dira.

5.5. Matrikula egitea.

5.5.1. Matrikulak erakunde titularrak finkatzen duen tokian eta moduan eginen dira 2023ko maiatzaren 18tik 25era bitarte, biak barne.

5.5.2. Matrikula egiteko, beharrezkoa da haurrak 16 aste beteak izatea ikasturtea hasten den egunean, edo urtebete, urte batetik beherako haurrendako instalaziorik ez duten ikastetxeen kasuan.

5.5.3. Ezarritako epean matrikularik egiten ez bada, ikaspostuari uko egin zaiola ulertuko da, eta beste bati esleituko zaio itxaron zerrendako hurrenkerari jarraikiz.

5.5.4. Eskatutako aukeretako batean matrikula egiteak ikastetxe bereko beste aukera guztiei uko egitea ekarriko du, edo herri bereko beste edozein ikastetxetakoei, ikastetxearen titular den erakundeak hala ezartzen duen udalerrietan.

5.5.5. Matrikula egiteko honako dokumentazio hau aurkeztu beharko da:

a) Haurra inskribatuta dagoen Gizarte Segurantzako kartillaren edo txartelaren fotokopia.

b) Matrikulari dagokion kuota ordaindu izanaren egiaztagiria.

c) Pertsona fisikoen errentaren gaineko zergaren 2022ko aitorpenaren fotokopia, amarena eta aitarena edo legezko ordezkariena. Aitorpen hori egin beharrik ez bada, hori frogatzen duen dokumentazio ofiziala aurkeztu beharko da edo bestelako errentak edo diru-sarrerak jasotzen direla frogatzen duena,edo, azken buruan, 2022. urteari dagozkion errenten edo diru-sarreren gaineko zinpeko aitorpena eta/edo ikastetxearen titular den toki erakundeak beharrezkotzat jotzen dituen agiriak, kalkulatzeko familiak zer diru-sarrera izan dituen urte horretan.

Agiri hori, beranduenez, pertsona fisikoen errentaren gaineko zergaren 2022ko aitorpenaren kanpaina amaitzen den egunean aurkeztu beharko da.

d) Ordainagiriak helbideratzeko banku entitateko kontu zenbakiaren fotokopia, titularra eta zenbakia agertzen dituena.

e) Kasua bada, beharrezkoa den osasun informazioa, haurrari behar duen arreta eman dakion.

f) Kasua bada, 2023ko urtarrilaren 1etik aurrera izandako jaiotzengatik familia-unitateko kideen kopuruan egondako aldaketa egiaztatzen duen dokumentazioa.

5.5.6. Familiek ezin izanen dute matrikula formalizatu baldin eta haur eskolako bi kuota ordaindu gabe baldin badituzte.

5.5.7. Itxarote-zerrendan dauden haurrak ikaspostu hutsak sortzen direnean matrikulatzen ahalko dira ikastetxean, puntuazio ordenari zorrotz jarraituz, harik eta 2024-2025 ikasturteko ikaspostuen erreserba egiteko epea ireki arte.

5.5.8. Matrikula epe arrunta bukaturik, haurrak onartzeko eskaera gehiago aurkezten ahalko dira, harik eta 2024-2025 ikasturteko ikaspostuen erreserba egiteko epea ireki arte; betiere, aurkezteko unean, ikasturte hasieran haurrak 16 aste beteak izan beharko ditu, edo urtebete, adin horretatik beherako haurrendako instalaziorik ez duten ikastetxeen kasuan.

Eskaera horiek kontuan hartuko dira baldin eta ikaspostu hutsik badago onarpen prozesu arruntean sortutako itxarote zerrenda agortu ondoren. Ikaspostuak matrikula egiteko ordenari jarraikiz esleituko dira.

5.5.9. Oro har, ez da haurrik onartuko ikaspostuen erreserbaren ondoren. Salbuespenez, epe hori bukatutakoan ere matrikulatzen ahalko dira haurrak, erakunde titularrak kasuan kasuko haur eskolarekin koordinaturik hala erabakitzen duenean, betiere Hezkuntza Departamentuak oniritzia ematen badu. Matrikulazio horiek ez dute eskubiderik emanen hurrengo ikasturtean ikaspostua erreserbatzeko.

6.–Zuzeneko sarbidea. Hezkuntza laguntzako premia bereziak dituzten ikasleak.

Hezkuntza laguntzako premia bereziak dituzten haurrek sarbide zuzena izanen dute Haur Hezkuntzako lehen zikloko ikastetxeetan. Hezkuntza Departamentuak (NHBBZ) antolatuko du nola banatu eta non kokatu haur horiek.

Sarbide zuzena emateko beharrezkoa izanen da Hezkuntza Departamentuak (Nafarroako Hezkuntza Bereziko Baliabideen Zentroa) aldeko txostena ematea, baina horrek ez die deusetan eragiten eskaerarekin batera aurkeztutako beste txostenei.

7.–Epeak egokitzea.

Aldez aurretik Hezkuntza Departamentuari jakinarazita, erakunde titularrek egokitzen ahalko dituzte ebazpen honen 5.2, 5.4.3, 5.4.4 eta 5.4.5 apartatuetan aipatutako epeak, baina 2023-2024 ikasturterako ikaspostuen erreserba egiteko azkeneko eguna 2023ko martxoaren 31 izanen da.

8.–Ikasleak onartzeko prozedura berezia.

2023-2024 ikasturtean, haurrak onartzeko prozedura berezi bat hasten ahalko da ikastetxe berrietarako edo diren ikastetxeetan unitate gehiago izateko, betiere abuztuaren 27ko 79/2012 Foru Aginduaren 4.6 artikuluan ezarritakoa errespetatuz.

Ikastetxe berrien kasuan, horretarako eratutako hautapen batzordeak ebazpen honen 5.2, 5.4.3, 5.4.4, 5.4.5, 5.5.1 eta 5.5.7 apartatuetan adierazitako epeak zehaztuko ditu, aldez aurretik Hezkuntza Departamentuari jakinarazita.

9.–Tarifak.

Hezkuntza Departamentuak familien 2023-2024 ikasturteko tarifei buruz onetsi duen foru aginduan ezarritakoarekin bat aplikatuko dira tarifak.

10.–Bajak.

Inguruabar hauek baja ekarriko dute:

a) Amak, aitak edo legezko ordezkariak baja eskatzea.

Banantze eta dibortzio kasuetan, edo adostasunik ez dagoenean, Hezkuntzako kontseilariaren abenduaren 13ko 112/2013 Foru Aginduan ezarritako irizpideak erabiltzen ahalko dira, orientabide gisa.

b) Haurra ikastetxean ez hastea ikasturtea hasi eta 15 egun natural iraganik, non ez dagoen horretarako arrazoi justifikaturik.

c) Behin ikastetxean hasita, ondoz ondoko 15 egun naturalean ikastetxera ez joatea, non ez dagoen horretarako arrazoi justifikaturik.

d) Hileko bi kuota ez ordaintzea, jarraian edo ez.

2. Ebazpen hau eta eranskina Nafarroako Aldizkari Ofizialean argitaratzea.

3. Ebazpen honen eta dagokion eranskinaren kontra gora jotzeko errekurtsoa jartzen ahal da, Hezkuntzako kontseilariari zuzendua, argitaratu eta biharamunetik hilabeteko epean.

4. Ebazpen hau eta bere eranskina igortzea Hezkuntzako Ikuskapen Zerbitzuari, Inklusio, Berdintasun eta Bizikidetza Zerbitzuari, Nafarroako Udal eta Kontzejuen Federazioari eta Haur Eskolen eta Landa Eskolen Atalari, behar diren ondorioak izan ditzan.

Iruñean, 2023ko urtarrilaren 25ean.–Hezkuntzako zuzendari nagusia, Gil Sevillano González.

ERANSKINA

Ikasleak onartzeko baremoa

1.–Baremazioaren ondorioetarako kontuan izan beharreko alderdiak.

1.1. Familiako egoerari dagokionez.

–Familia ugaria edo familia gurasobakarra izateagatik baremoa aplikatzeko, kasuan kasuko txartela aurkeztu beharko da.

–Onartzeko ondorioetarako, honako hau izanen da familia-unitatearen kontzeptua:Pertsona Fisikoen Errentaren gaineko Zergari buruzko Foru Legearen testu bategina onesten duen ekainaren 2ko 4/2008 Legegintzako Foru Dekretuaren 71. artikuluan araututakoa.

"71. artikulua. Familia unitatearen kontzeptua.

1. Zerga honetarako honako hauek dira familia-unitateak:

a) Legez bereizirik ez dauden ezkontideek eta, izanez gero, adingabeko seme-alabek osatua (gurasoen baimena izanda beraiekin bizi ez direnak salbu); unitate horretan sartzen dira, halaber, kuradoretzaren menpe dauden adin nagusiko seme-alabak.

b) Berariazko legeen araberako bikote egonkor bateko kideek eta, izanez gero, adingabeko seme-alabek osatua (gurasoen baimena izanda beraiekin bizi ez direnak salbu); unitate horretan sartzen dira, halaber, kuradoretzaren menpe dauden adin nagusiko seme-alabak.

c) Legezko banantzeetan, edo ezkontzaren bidezko loturarik nahiz bikote egonkorrik ez dagoenean, aitak edo amak eta batarekin nahiz bestearekin bizi diren seme-alaba guztiek osatzen dutena, aurreko paragrafoetan aipatzen diren baldintzak betetzen badituzte.

a), b) eta c) letretan aurreikusitakoaren ondorioetarako, tutoretza edo harrera bitartez subjektu pasiboarekin lotura duten pertsonak seme-alabekin parekatuko dira aplikatzekoa den legeria zibilean ezarritako moduan. Ondorengoekin parekatuko dira epailearen aginduz subjektu pasiboaren zaintza eta babesaren pean dauden pertsonak, lehengo kasuetan ez daudenak.

2. Inor ere ezin da aldi berean bi familia-unitatetako kide izan.

3. Familia-unitateko kideen kopurua urte bakoitzeko abenduaren 31n dagoen egoerari begiratuz zehaztuko da, familia-unitateko kideren bat urtean zehar hil bada salbu; izan ere, kasu horretan gainerako kideek baterako aitorpena aukera baitezakete, hildakoaren errentak ere sartuta.

Aukera hori ez da bidezkoa ezkontideetako bat hil eta, urtea bukatu baino lehen, alarguna berriro ezkontzen bada."

–6 urtetik beherako seme-alabak kontuan hartzeko, seme-alabek ez dituzte 6 urteak beteak izan beharko aurreinskripzioa egiteko epea bukatzen den egunean. Jaio gabeko alaba edo semea ere kontuan hartuko da baldin eta eskaturiko ikaspostua harendako bada.

–"Bi anai-arrebarendako edo gehiagorendako ikaspostua eskatzea deialdi berean" kontzeptuagatik emandako puntuazioa galdu eginen da, eskatzaileari egotz dakizkiokeen arrazoiengatik anai-arreba horiek guztiak matrikulatzen ez badira.

–Familia harreran dauden haurrek, egoera hori behar bezala frogatzen bada, ikastetxean anai-arrebak izateagatik ematen den puntuazioa lortzen ahalko dute, harrerako familiak beste haur bat badu eskolatuta eskatutako ikastetxean.

1.2. Aitaren, amaren edo legezko ordezkarien lan eta gizarte egoerari edo egoera akademikoari dagokionez.

–Gizarte Segurantzan edo, zein den kasua, ekonomia-jardueren gaineko zergan alta eman gabe egindako lana ez da kontuan hartuko.

–Ulertuko da lan eszedentzian dagoen pertsona bat lanean ari dela, lanaldi osoan edo partzialean, baldin eta ikasturtea hasi ondoko hilabete eta erdian hasiko bada berriz lanean. Lan kontraturik ez izateagatik, haur bat jaio ondoan pertsona bat ez bada lanera itzultzen (ordezkapen zerrendak...), egoera hori ez da eszedentziatzat hartuko.

–Ikasketa araututzat hartzen dira titulu akademiko ofizialak eskuratzeari begira egiten direnak: DBH, Batxilergoa, Lanbide Heziketa, unibertsitate tituluak, etab.

–Ikasketetarako dedikazioa lehentasunezkoa dela joko da baldin eta interesduna ikasturtean matrikulatuta badago ikasturte oso bateko kreditu edo orduen %80an, gutxienez ere, ikasketa planaren arabera.

–Pertsona bat lan bila dabilela joko da Nafarroako Enplegu Zerbitzuan enplegu eskatzaile gisa inskribatuta dagoenean.

1.3. Egoera ekonomikoari dagokionez.

–Familia-unitatearen errenta gisa hartuko da honako hauen batura: batetik, PFEZaren aitorpena aurkeztu behar duten familia-unitateko kide konputagarri guztien errenta-aitorpenean agertzen diren likidazio-oinarri guztiak (550. laukitxoa) eta, bestetik, PFEZaren ondorioetarako salbuetsitzat jotzen diren gainerako errenta eskuratuak (529. laukitxoa).

–Per capita errenta honela lortuko da: familia-unitatearen errenta zati familia-unitateko kideen kopurua dagokion urteko abenduaren 31n; hori guztia, eranskin honen 1. puntuan adierazitakoaren arabera.

–Ondorio praktikoetarako, bada, 2023-2024 ikasturteko onarpen-prozesurako per capita errenta honela lortuko da: familia-unitatearen 2021eko ekitaldiko urteko errentaren zenbatekoa zati familia-unitateko kideen kopurua 2021eko abenduaren 31an (aurkeztutako aitorpenean jasotako kide berberak).

2.–Puntuazio baremoa.

2.1. Familia unitatea: gehienez ere 15 puntu.

–Deialdi eta ikastetxe beretan bi seme-alabarendako edo gehiagorendako ikaspostua eskatzen duten familiak (ikaspostuaren erreserba sartzen da, baita jaio gabeko haurrarendako eskaera ere): 15 puntu.

–Familia gurasobakarrak edo gurasobakartasun egoeran daudenak, 5 puntu.

–Familia ugariak: 5 puntu.

–Familia unitateko kideren batek %33ko edo gehiagoko desgaitasun fisiko, psikiko edo sentsoriala badu, behar bezala aitortua: 4 puntu.

–6 urtetik beherako bi haur edo gehiago dituzten familien kasuan: puntu bat haur bakoitzeko.

2.2. Aitaren, amaren edo legezko ordezkarien lan eta gizarte egoera edo egoera akademikoa: gehienez ere 20 puntu.

a) Familia orokorrak.

Guraso berak bi egoera posible baditu, horietako bat bakarrik hartuko da kontuan, puntuaziorik handiena duena:

–Gizarte Segurantzan alta emanda lanaldi osoan edo partzialean lan egiten duen guraso edo legezko tutore bakoitzeko, edo behar bezala justifikatutako dedikazio handia eskatzen duten ikasketa arautuak egiten ari den guraso edo legezko ordezkari bakoitzeko, edo ezintasun iraunkor absolutuko edo baliaezintasun handiko egoera aitortuan dagoen guraso edo ordezkari bakoitzeko: 10 puntu.

–Lana bilatzen ari den guraso edo legezko tutore bakoitzeko: 5 puntu.

b) Familia gurasobakarrak edo gurasobakartasun egoeran daudenak.

–Gizarte Segurantzan alta emanda lanaldi osoan edo partzialean lan egiten duen gurasoa, edo behar bezala justifikatutako dedikazio handia eskatzen duten ikasketa arautuak egiten ari dena, edo ezintasun iraunkor absolutuko edo baliaezintasun handiko egoera aitortuan dagoena: 20 puntu.

–Lana bilatzen ari den gurasoa: 15 puntu.

c) Zaintza eta jagoletza esklusiboa duen gurasoa, guraso bakarreko familia edo guraso bakarreko familia egoeran dagoena izan gabe.

–Gizarte Segurantzan alta emanda lanaldi osoan edo partzialean lan egiten duen gurasoa, edo behar bezala justifikatutako dedikazio handia eskatzen duten ikasketa arautuak egiten ari dena, edo ezintasun iraunkor absolutuko edo baliaezintasun handiko egoera aitortuan dagoena: 20 puntu.

–Lana bilatzen ari den gurasoa: 15 puntu.

2.3. Per capita errenta: gehienez ere15 puntu.

2.4. Eraginpeko eremu geografikoa: 20 puntu, gehienez.

Para los centros de titularidad municipal:

–Haurra eta, gutxienez, gurasoetako edo legezko ordezkarietako bat erroldatua egoteagatik, 2023ko urtarrilaren 1a baino lehenagotik, eskaeraren xedeko ikastetxea dagoen udalerrian edo eraginpeko eremu geografikoaren barneko udalerri batean (horretarako akordioa ezarria duten udalerrietan): 20 puntu.

–Gurasoetako edo legezko ordezkarietako bat, gutxienez, lanean aritzeagatik eskaeraren xedeko ikastetxea dagoen udalerrian edo eraginpeko eremu geografikoan: 8 puntu.

–Gurasoetako edo legezko ordezkarietako bat, gutxienez, lanean aritzeagatik erakunde titularraren Haur Hezkuntzako lehen zikloko ikastetxe batean: 5 puntu.

Hezkuntza Departamentuaren titulartasuneko ikastetxeak.

–Haurra eta, gutxienez, gurasoetako edo legezko ordezkarietako bat erroldatua egoteagatik, 2023ko urtarrilaren 1a baino lehenagotik, Nafarroako Foru Komunitateko udalerri batean: 20 puntu.

–Gurasoetako edo legezko ordezkarietako bat, gutxienez, lanean aritzeagatik Nafarroako Foru Komunitateko udalerri batean: 8 puntu.

–Gurasoetako edo legezko ordezkarietako bat, gutxienez, lanean aritzeagatik erakunde titularraren Haur Hezkuntzako lehen zikloko ikastetxe batean: 5 puntu.

2.5. Beste irizpide batzuk.

Hautapen batzordeak premiazko beste egoera larri batzuk –pertsonalak, familiakoak edo sozialak– hartzen ahal ditu kontuan, behar bezala frogatuak eta aurreko ataletan bildu ez direnak: 10 puntu gehienez.

3.–Puntuazioko berdinketa kasuak ebaztea.

Baremoa aplikatuta, adin talde bakoitzeko azken ikaspostua eskaintzean berdinketa gertatuz gero, irizpide hauek aplikatuko dira, bata bestearen ondoren:

–Familia-unitatean apartatuan (2.1) puntu gehien lortu dituena.

–Per capita errentaren apartatuan (2.3) puntu gehien lortu dituena.

–Eraginpeko eremu geografikoaren apartatuan (2.4) puntu gehien lortu dituena.

–Gurasoen edo legezko ordezkarien lan eta gizarte egoerari edo egoera akademikoari buruzko apartatuan (2.2) puntu gehien lortu dituena.

–Beste irizpide batzuen apartatuan (2.5) puntu gehien lortu dituena.

–Jendaurreko zozketa: Hezkuntza Departamentuan ikasleak onartzearen gaineko eskumena duen organoak 2023ko martxoaren 3an eginen duen zozketaren emaitza aplikatuko da. Hezkuntzako kontseilariaren maiatzaren 4ko 46/2021 Foru Legearen 13.6 artikuluan xedatuta dago zozketa hori.

Iragarkiaren kodea: F2301382