Iragarkia

24. ALDIZKARIA - 2023ko otsailaren 3a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

83/2022 Foru Agindua, abuztuaren 8koa, Ekonomia eta Ogasuneko kontseilariak emana, borondatezko ordezkaritzaren errolda arautzen duena Nafarroako Foru Ogasunaren eta Nafarroako Foru Auzitegi Ekonomiko-Administratiboaren eremuan.

Tributuei buruzko abenduaren 14ko 13/2000 Foru Lege Orokorrak zergapekoen ordezkaritza arautzen du 36. artikuluan. Bestalde, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuaren V. kapituluak zerga-prozedurak bide telematikotik izapidetzeko ordezkaritzaren oinarrizko ildoak arautzen ditu, eta, horretarako, Tributuei buruzko Foru Lege Orokorraren 36. artikulua garatzen du, zeinak aukera ematen baitie jarduteko gaitasuna duten zergapekoei ordezkariaren bidez jarduteko. Gainera, Nafarroako Foru Ogasunaren eremuan erregistro elektronikoak sortzeko aukera ematen du, Ekonomia eta Ogasuneko kontseilariaren foru agindu bidez.

Foru agindu honetan arautzen den borondatezko ordezkaritzaren erroldaren helburua da pertsonen eta entitateen borondatezko ordezkaritzaren egiaztapena erraztea Nafarroako Foru Ogasunean eta Nafarroako Foru Auzitegi Ekonomiko-Administratiboan interesdun diren edo izan daitezkeen prozeduretan.

Foru agindu honen aplikazio-eremutik kanpo geratzen da jakinarazpen elektronikorako ordezkaritza, erregulazio propioa baitu; izan ere, modu independentean arautu zen aipatutako 50/2006 Foru Dekretuaren 32.bis artikuluan eta Ogasuneko eta Finantza Politikako kontseilariaren abenduaren 18ko 148/2017 Foru Aginduan (horren bidez, Nafarroako Zerga Ogasunaren eremuan jakinarazpen elektronikoaren zerbitzua arautzen da, baita zergapekoek gaitutako helbide elektronikoan jakinarazpenik ez egiteko egunak adierazteko aukera ere). Bazterketa horrek Nafarroako Foru Auzitegi Ekonomiko-Administratiboari ere eragiten dio, Tributuei buruzko abenduaren 14ko 13/2000 Foru Lege Orokorra garatzeko Erregelamendua, egintzak administrazio bidean berrikusteari dagokionez, onesten duen urriaren 17ko 85/2018 Foru Dekretuaren xedapen gehigarri bakarra aplikatzearen ondorioz. Xedapen horren arabera, aipatutako erregelamenduan arautzen diren egintzak administrazio bidean berrikusteko prozedurei dagokienez, haiek izapidetzeko edo ebazteko ahalmena Nafarroako Foru Auzitegi Ekonomiko-Administratiboari badagokio, Nafarroako Foru Ogasunaren eremuan baliabide elektronikoak, informatikoak eta telematikoak erabiltzeko ezarritako xedapenak aplikatuko zaizkie.

Foru agindu honen aplikazio-eremutik kanpo geratzen da, halaber, Tributuei buruzko Foru Lege Orokorrean 36.6 eta 90.1.f) artikuluetan ezarritako gizarte-lankidetzaren eremuan gauzatutako ordezkaritza.

Foru agindu honen bidez, ordezkaritza inskribatzeko prozedura eta moduak, horren edukia eta ordezkaritzarekin lotutako beste alderdi batzuk zehazten dira. Foru agindu honetan aurreikusten den ordezkaritza mota ere adierazten da.

Amaitzeko, eranskin gisa gehitu da ordezkaritzaren kudeaketarekin lotutako jarduketak egiteko beharrezko edukia jasotzen duen inprimakia.

Hori guztia dela eta,

AGINTZEN DUT:

1. artikulua. Xedea eta aplikazio-eremua.

1. Foru agindu honen xedea da borondatezko ordezkaritzaren erroldaren inskripzioa, funtzionamendua, edukia eta araubidea arautzea Nafarroako Foru Ogasunaren eta Nafarroako Foru Auzitegi Ekonomiko-Administratiboaren eremuan.

2. Foru agindu honetan araututako borondatezko ordezkaritza pertsona bati edo batzuei (fisikoak zein juridikoak) ematen ahalko zaie.

3. Foru agindu honen aplikazio-eremutik kanpo daude jakinarazpen elektronikorako ordezkaritza eta gizarte-lankidetzaren eremuan gauzatutako ordezkaritza.

4. Errolda hau ez da erregistro publiko bat. Interesdunek errolda hori eskuratzen ahalko dute, baina ordezkatu edo ordezkari gisa aipatzen dituzten ordezkaritzen egoera ezagutzeko bakarrik.

2. artikulua. Borondatezko ordezkaritzaren erroldan inskribatzea.

1. Foru agindu honetan araututako borondatezko ordezkaritzaren erroldan inskribatzearen helburua da ordezkaritza egiaztatzea Nafarroako Foru Ogasunean eta Nafarroako Foru Auzitegi Ekonomiko-Administratiboan hirugarren pertsonen edo entitateen izenean egiten diren jarduketetan.

2. Inskripzioak ondorioak izanen ditu, erroldan bai eskabidea, bai ordezkatutako pertsonaren edo erakundearen eta ordezkariaren onarpena agertzen diren unetik.

3. Ordezkaritzaren gehieneko iraupena 5 urtekoa izanen da, eskaera egiten den egunetik zenbatzen hasita.

3. artikulua. Borondatezko ordezkaritzaren erroldaren funtzionamendua.

1. Ordezkaritzaren kudeaketari dagokionez, honako jarduketa hauek egin daitezke:

a) Ordezkapena eskatzea ordezkatua izan nahi duenak; edo erabiltzaile bat ordezkatzea eskatzea ordezkari gisa bere burua eskaintzen duenak.

b) Eskaera onartzea edo ukatzea. Eskaera nork aurkeztu duen, haren onarpena edo ukapena ordezkariak edo ordezkatuak aurkeztuko du. Onartzeko gehieneko epea hilabetekoa izanen da, erroldan inskribatzeko eskaera egiten den egunetik zenbatzen hasita. Epe hori igaro eta inork ez badu prozeduran parte hartu, ulertuko da eskaera iraungi egin dela eta ordezkaritza ez dela onartu. Era berean, ordezkaritzaren eskaera iraungitzat joko da indarraldiaren amaiera-data hilabete hori baino lehen amaitzen bada eta horretan esku hartu ez bada.

c) Eskatzaileak eskaera ezeztatzea, beste parte-hartzaileak onartu baino lehen.

d) Onartutako ordezkaritza ezeztatzea. Parte hartzen duten bi alderdietako edozeinek egiten ahalko du, edozein unetan.

2. Ekonomia eta Ogasuneko kontseilariaren uztailaren 3ko 132/2009 Foru Aginduaren bidez, arautu ziren aitorpen-likidazioak, autolikidazioak, urteko aitorpen-laburpenak, informazio aitorpenak, jakinarazpenak eta zerga arloko araudiak eskatutako beste agiri batzuk baliabide telematikoen bidez eta ordenagailuak irakurtzen ahal duen euskarriaren bidez aurkeztera behartzen duten kasuak. Foru agindu horretan xedatutakoaren arabera, eskabidea, onarpena, ukoa, ezeztapena edo baliogabetzea Internet bidez aurkeztu behar dute, identifikazio, kautotze eta sinadura elektronikoko sistemetako baten bat erabilita. Horretarako, Nafarroako Foru Ogasunak onartzeko moduko ziurtagiri elektroniko kualifikatu bat erabili beharko dute, arloan indarra duen legediarekin bat etorriz.

Ziurtapen zerbitzuen emaileak eta baimenduta dauden ziurtagiri elektronikoak Nafarroako Foru Ogasunaren webgunean daude zerrendaturik, Interneteko helbide honetan: https://hacienda.navarra.es.

Pertsona fisikoek Cl@ve sistema ere erabiltzen ahalko dute, zeina identifikazio, kautotze eta sinadura elektronikorako sistema baita, amankomuna Estatuko Administrazio Sektore Publiko osorako, Nafarroako Foru Komunitateko Administraziorako eta harekin bat egiten duten beste administrazio autonomiko batzuetarako eta toki entitateetarako, eta PRE/1838/2014 Aginduan arautua. Sistema hori erabiliz, herritarrak harreman elektronikoa izan dezake zerbitzu publikoekin gako itunduen bidez, hartan erabiltzaile gisa izena eman ondoren.

Nafarroako Foru Ogasunak zehazten dituen kasuetan, gako itundu bidezko beste identifikazio sistema batzuk onar daitezke pertsona fisikoentzat.

Bat etorriz Nafarroako Zerga Ogasunaren esparruan bide elektroniko, informatiko eta telematikoen erabilera arautzen duen uztailaren 17ko 50/2006 Foru Dekretuaren 14.3 artikuluan xedatutakoarekin, aurreko paragrafoetan ezarritako identifikazio sistemak sinadurarako sistema gisa erabiliko dira.

Ordezkaritzan jarduteko (eskaera, onarpena, ukoa, ezeztapena edo baliogabetzea), Nafarroako Foru Ogasunaren webgunean eskuragarri dagoen inprimakia erabiliko da, zeinaren edukia foru agindu honen I. eranskinaren berdina izanen baita.

3. Aitorpenak eta dokumentuak Internet bidez bide elektronikoz aurkeztera behartuta ez dauden pertsona fisikoek ordezkaritza eskatu, onartu, ukatu, ezeztatu edo baliogabetzen ahalko dute, honako modu hauetakoren batean:

a) Nafarroako Foru Ogasunaren bulegoetan agertuz gero, I. eranskineko inprimakia erabiliz.

Inprimakia osorik bete behar da, egin beharreko jarduketarekin batera, eta bertan esku hartzen duen pertsonaren sinadura jaso behar da.

b) Internet bidez, 2. apartatuan aurreikusitakoaren arabera.

4. Nafarroako Foru Ogasunaren bulegoetan egindako jarduketari dagokionez, Nafarroako Foru Ogasunaren zerbitzuko langileek gehituko dute ordezkaritza erroldan.

Ordezkaritzari buruzko jarduketa Internet bidez kudeatzeari dagokienez, modu automatizatuan gehituko da erroldan; horrela, foru agindu honetan ezarri bezala parte-hartzaileak elektronikoki eman dituen datuak dira erroldan jasoko direnak.

4. artikulua. Borondatezko ordezkaritzaren erroldaren edukia.

Erroldan ordezkaritza bati alta emateko, datu hauek jasoko dira:

a) Ordezkariaren izen-abizenak edo sozietatearen izena eta identifikazio fiskaleko zenbakia.

b) Ordezkatuaren izen-abizenak edo sozietatearen izena eta identifikazio fiskaleko zenbakia.

c) Eskaeraren data.

d) Indarraldiaren amaiera-data, ordezkaritzaren gehieneko balioa 5 urtekoa dela kontuan hartuta, eskaera egiten den egunetik zenbatzen hasita.

e) Ordezkaritza mota.

5. artikulua. Ordezkaritzaren edukia eta dokumentazio osagarria egiaztatzea.

1. Jarduketa elektronikoa duen ordezkaritzari dagokionez, informazio falta edo arazo teknikoak detektatzen direnean, erroldaren aplikazio informatikoak horren berri emanen dio interesdunari, behar diren ondorioak izan ditzan.

2. Pertsona bertan agertuta egiten den jarduketako ordezkaritzari dagokionez, Nafarroako Foru Ogasunaren zerbitzuko langileek honako hau egiaztatuko dute:

a) Bertaratutako pertsonaren identitatea

b) Eranskinaren eredua behar bezala betea dagoela dagokion jarduketari aplikatu beharreko atal guztietan.

c) Hala badagokio, jarduketa pertsona fisiko baten izenean eginen bada, pertsona horren legezko ordezkaritza edo ordezkaritza judiziala egiaztatzen duen dokumentazioa aurkeztea.

6. artikulua. Ordezkaritza mota.

Erroldan inskriba daitekeen ordezkaritza orokorra izanen da Nafarroako Foru Ogasunean eta Nafarroako Foru Auzitegi Ekonomiko-Administratiboan egin beharreko edozein zerga-jarduketatarako.

Aurrekoa gorabehera, elektronikoki egiten diren izapideetan, foru agindu hau bakarrik aplikatuko zaie ordezkaritza erabiliz izapidetzeko aukera duten izapideei.

https://hacienda.navarra.es helbidean, foru agindu honetan arautzen den ordezkaritza erabiltzeko aukera ematen duten izapide elektronikoen zerrenda eguneratua egonen da.

7. artikulua. Ofizioz baja emateko prozedura.

Ordezkaria edo ordezkatua hiltzen bada, horren berri izanez gero, ofizioz jardunen da ordezkaritzari baja emateko.

Azken xedapen bakarra.–Indarra hartzea.

Foru agindu honek indarra hartuko du Nafarroako Aldizkari Ofizialean argitaratu eta biharamunean.

Iruñean, 2022ko abuztuaren 8an.–Ekonomia eta Ogasuneko kontseilaria, Elma Saiz Delgado.