1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
141E/2022 EBAZPENA, azaroaren 16koa, Lurralde Antolamenduko zuzendari nagusiak emana, zeinaren bidez hasiera batean onesten baita Erripagañako Udalez gaindiko Plan Sektorialaren aldaketa, AR-1 banaketa-areako D-10 Unitate Morfologikoko D-10.1 eta D-10.2 lurzatiei eragiten diena, Iribarrengoa SLk sustaturik.
Espedientearen xedea da bi unitate funtzionalen (D-10.1 eta D-10.2) baterako eremuan etxebizitza kolektiboetarako hiru bloke eraiki ahal izatea, B+4 gisakoak, gehienez 16,50 m-ko altuera izanen dutenak eta beheko solairuan etxebizitzak eta sotoan aparkalekuak izanen dituztenak. Horretarako, proposatzen da bi unitate funtzionalak elkartzea (azalera eraikigarria eta hirigintza-aprobetxamendua batera esleituz elkartzearen ondoriozko lurzati berriarentzat) eta gehieneko lerrokadurak, etxebizitza tipologia (familia bakarrekoa izatetik kolektiboa izatera), solairu kopurua (B+4 motakoa izanen da) eta eraikinaren altuerak (16.50 m-koa izanen da) aldatzea.
Lurzatiak UPSaren iparraldeko muturrean daude, Burlatako udal mugartean. Lurzati horientzat proposatutako aldaketek ez diote eragiten 1/2017 Legegintzako Foru Dekretuaren bidez onetsitako Lurralde Antolamenduari eta Hirigintzari buruzko Foru Legearen testu bateginaren 49.2 artikuluan adierazitako determinazio egituratzaileetako bakar bati ere.
Lurralde Antolamenduari eta Hirigintzari buruzko Foru Legearen testu bateginaren 7.3 artikuluan xedatutakoaren arabera, urbanizazio berriko jarduketak planteatzen dituzten planeamendu-aldaketak prestatu eta berrikusten direnean, herritarren parte-hartze erreal eta eraginkorra behar da, dokumentuari hasierako onespena eman aurretik herritarrek parte hartzeko kontsulta-prozesu baten bidez.
Aldaketa honek ez du urbanizazio berriko jarduketarik planteatzen. Hala ere, nahitaezkoa ez bada ere, sustatzaileak partaidetza-prozesu bat egitea erabaki du.
Espedientean, Babes Zibileko Zerbitzuaren eta Iruñerriko Mankomunitatearen aldeko txostenak jaso dira. Eta Ingurumen Eraginaren Atalaren txostenak, 2022ko irailaren 30ekoak, ondorioztatzen du aldaketa ez dagoela jasota Ingurumen Ebaluazioari buruzko abenduaren 9ko 21/2013 Legearen 6. artikuluan aipatutako kasuetan. Era berean, Abiazio Zibileko Zuzendaritza Nagusiaren txostena jasotzeke dago.
Dokumentuak interesdunei entzunaldia emateko eta jendaurrean jartzeko tramiteak egiteko beharrezkoak eta nahikoak diren determinazioak jasotzen ditu. Hala ere, zuzendu beharreko kontu hauek ikusi dira, aurkezten diren alegazioekin batera baloratuko direnak –betiere, horrelakorik aurkeztuz gero–:
–Azalpen eta justifikazio memoriak solairu kopuruan, eraikinaren altueran eta tipologian egindako aldaketen arrazoiak ematen ditu. Ondorio gisa, esaten du proposamenak hobeki erantzuten diela herritarren beharrei, eta, gainera, lurzoru-kontsumo txikiagoa bilatzen duela eta eremu handiagoa bideratzen duela lurzoru libre pribatura, zeina, ziur aski, berdegune pribatuetarako (lorategiak) erabiliko baita.
Azken baieztapen horri dagokionez, ez dugu uste egiazkoa denik, ezta baliagarria ere sartutako aldaketen justifikazio gisa, eskaria eta beharrak nahasten baititu; dokumentuak sestratik beherako eremu pribatu osoa okupatzeko aukera ematen du, eta, beraz, ez da zoruaren kontsumo txikiena gertatzen, esaten den bezala; eta ez du behartzen lurzatiko espazio librea berdegune pribatu gisa erabiltzera. Ondorioz, komeni da baieztapen hori ezabatzea.
Gainera, gehieneko lerrokadurei buruz proposatutako aldaketei dagokienez, ez da justifikatu UPSko gainerako bizitegi-lurzatiekin alderatuta dagoen irizpide aldaketa; izan ere, horietarako finkatutako lerrokadurak mugetatik 3 metrora eraman behar dira gutxienez.
Ildo horretan, D-10 unitate morfologikoaren beheko solairuko eta goiko solairuetako lerrokaduretatik mugetaraino 3 metroko tartea uzteko irizpideari eusteak (gainerakoetan bezala) ez du eragozten egin nahi diren hiru blokeak egikaritzea; aitzitik, hirigintza-antolamenduko determinazioak malgutzen ditu, besterik gabe.
Sotoko solairuaren lerrokadurak aldatzeko arrazoirik ere ez da azaltzen; izan ere, sestratik beherako azalera pribatu osoa okupatzea ahalbidetzen da, eta UPSko gainerako bizitegi-lurzatietan, ordea, mugetaraino 3 metroko tartea errespetatu behar da.
Horrenbestez, sotoko, beheko eta goiko solairuetarako ezarritako gehieneko lerrokadurak aldatu beharko dira, mugetaraino 3 metroko tartea uzteko irizpidea mantentzeko, Udalez gaindiko Plan Sektorialeko gainerako unitateetan bezala, edo, bestela, irizpide horretatik aldentzea eragiten duten arrazoi objektiboak, teknikoak eta hirigintzakoak aurkeztu beharko dira.
–Aurkeztutako dokumentazio grafikoari dagokionez, indarrean dagoen UPSak sotoko, beheko eta goiko solairuetarako lerrokadura-planoak dituenez, sotoko solairuaren lerrokadurak islatu beharko dira "Eraikinaren lerrokadurak, kotak eta altuerak" izeneko O.1 planoan (nahiz eta planoaren argibideekin batera doan testutik ondoriozta daitekeen lurzati pribatuaren eremu guztia eraiki daitekeela sestra mailako solairuan).
–Bideragarritasun eta jasangarritasun ekonomikoari buruzko memoria osatu beharko da, lurzoruak ekoizpen erabileretarako duen nahikotasunaren eta egokitasunaren haztapena barne.
–Honako alderdi hauek falta direla ikusi da, eta dokumentua osatu egin behar da, honako hauek sartuz:
- Aldaketaren eta Lurralde Antolamenduko 3. Planaren arteko koherentzia justifikatzen duen atala. Lurralde Antolamenduari eta Hirigintzari buruzko Foru Legaren testu bateginaren 29.3 artikulua.
- Lurzatiak kokatuak dauden udal mugartean indarrean dagoen hirigintza planeamenduari buruzko aipamena. Lurralde Antolamenduari eta Hirigintzari buruzko Foru Legaren testu bateginaren 43.1h artikulua.
–Herritarrek parte hartzeko prozesuan (ez da nahitaezkoa) jasotako ekarpenei dagokienez, 2D izenekoak dio ez dela kontuan hartu B+4 bloke batek D-10.1 lurzatiaren muturrean, Burlatatik zein Atarrabiatik, eraginen lukeen inpaktu bisuala, eta defendatzen du ezen, B+2 gisakoa eginez gero, inpaktu hori mugatuko litzatekeela.
Dokumentuak iritzi horren aurka egiten du, eta honako hau ondorioztatzen: eremu jakin batean etxebizitza-blokeek konfiguratzen duten profila hautematea ezin da inpaktu bisualtzat hartu; aitzitik, irudiak puntu jakin batetik duen irudia da, bere profila osatzen duena eta eskualdeko hiriaren irudia definitzen laguntzen duena.
Horri dagokionez, ez da egia proposamenak inpaktu bisualik ez dakarrenik, altuago eraikitzea ahalbidetzen baitu; beraz, herritarren parte-hartze prozesuan jasotako 2D ekarpenari dokumentuan jasotako erantzuna hobetu beharko da, proposamenaren inpaktu bisuala aztertuta eta onargarria dela justifikatuta.
Ikusirik Lurralde eta Paisaia Zerbitzuaren 2022ko azaroaren 7ko txostena, eta bat etorriz Lurraldearen Antolamenduari eta Hirigintzari buruzko Foru Legearen testu bateginarekin (uztailaren 26ko 1/2017 Legegintzako Foru Dekretuaren bidez onetsia), eta erabiliz Lurralde Antolamenduko, Etxebizitzako, Paisaiako eta Proiektu Estrategikoetako Departamentuaren egitura organikoa onesten duen urriaren 30eko 262/2019 Foru Dekretuaren bidez eman dizkidaten ahalmenak,
EBAZTEN DUT:
1. Hasiera batean onestea Erripagañako Udalez gaindiko Plan Sektorialaren aldaketa, AR-1 banaketa-areako D-10 Unitate Morfologikoko D-10.1 eta D-10.2 lurzatiei eragiten diena, Iribarrengoa SLk sustaturik.
2. Espedientea ebatzi baino lehen, sustatzaileak osatu egin beharko du, ebazpen honen azalpen zatian jasotakoa kontuan hartuta.
3. Espedientea tramitatzean emandako txosten sektorialetan xedatutakoa beteko da.
4. Espedientea jendaurrean jartzea eta ukitutako udalari entzunaldia ematea, ebazpen hau Nafarroako Aldizkari Ofizialean eta Nafarroan argitaratzen diren egunkarietan argitaratuz. Bi tramite horiek aldi berean eginen dira, eta hilabete iraunen dute.
5. Horretarako, aldaketaren dokumentua Lurralde Antolamenduko Zuzendaritza Nagusiaren web-orri honetan kontsultatzen ahalko da: www.ExposicionPublicaOT.navarra.es. Epe horretan, halaber, egokitzat jotzen diren alegazio guztiak aurkezten ahalko dira, idatziz.
6. Ebazpen hau jakinaraztea Burlatako Udalari, Ingurumen Eraginaren Atalari, Babes Zibileko Zerbitzuari, Iruñerriko Mankomunitateari, Abiazio Zibileko Zuzendaritza Nagusiari eta espedientearen sustatzaileari, behar diren ondorioak izan ditzan.
Iruñean, 2022ko azaroaren 16an.–Lurralde Antolamenduko zuzendari nagusia, Izaskun Abril Olaetxea.
Iragarkiaren kodea: F2215391
