Iragarkia

250. ALDIZKARIA - 2022ko abenduaren 15a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

174E/2022 EBAZPENA, azaroaren 23koa, Unibertsitateko zuzendari nagusiak emana, zeinaren bidez onesten baita "Diru-sarrera txikiko inguruneetatik datozen gazteak goi mailako hezkuntzan sartzeko bekak, 2022-2023 ikasturtetik aurrera graduko unibertsitate ikasketak egiteko" izeneko dirulaguntzaren deialdia. DDBN identifikazioa: 660526.

Unibertsitateko Zerbitzuko zuzendariak aurkeztu duen txosten batean proposatzen da beken deialdi bat egitea diru-sarrera txikiko inguruneetatik datozen gazteak goi mailako hezkuntzan sar daitezen, 2022-2023 ikasturtetik aurrera graduko unibertsitate ikasketak eginez.

Beka horien helburua da errenta maila baxuko eta errendimendu akademiko oneko pertsonei ikasteko aukera eta dedikazio esklusiboa erraztea, probetxuzko unibertsitate ikasketak egiteko baldintzak betetzen dituen inor aukera horretatik kanpo ez geratzeko arrazoi ekonomikoak direla-eta.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32.1.d) artikuluak ematen dizkidan ahalmenak erabiliz,

EBAZTEN DUT:

1. Honako dirulaguntza honen deialdia onestea: Diru-sarrera txikiko inguruneetatik datozen gazteak goi mailako hezkuntzan sartzeko bekak, 2022-2023 ikasturtetik aurrera graduko unibertsitate ikasketak egiteko.

2. Dirulaguntzak emateko oinarri arautzaileak onestea. Ebazpen honen eranskinean bildu dira.

3. Deialdi honetako konpromisoei aurre egiteko urte anitzeko aurrekontu gastua onestea, guztira 570.000 euro, 2022tik 2028ra bitarteko ekitaldietarako. Gastu hori "Unibertsitate ikasketetarako bekak eta laguntzak" izeneko G10001-G1100-4800-323100 partidaren kargura eginen da, eta 2022tik aurrerako ekitaldietan gaitzen den gastu baliokidea, kreditu egokia eta nahikoa izatearen baldintzapean. Aurrekontuko gastuaren xehetasunak hauek dira, aurrekontu-ekitaldien arabera:

4. Ebazpen hau eta eranskina Nafarroako Aldizkari Ofizialean argitaratzea.

5. Ebazpen honek ez du administrazio bidea amaitzen, eta haren aurka gora jotzeko errekurtsoa jartzen ahal da, Unibertsitateko, Berrikuntzako eta Eraldaketa Digitaleko kontseilariari zuzendua, hilabeteko epean, ebazpena argitaratu eta hurrengo egunetik aurrera. Administrazio publikoek zilegi dute administrazioarekiko auzi-errekurtsoa jartzea, eskumena duen ordena jurisdikzionalari zuzendua, bi hilabeteko epean, argitaratu eta biharamunetik hasita, galarazi gabe Nafarroako Gobernuan aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan xedatutako moduan eta epeetan.

Iruñean, 2022ko azaroaren 23an.–Unibertsitateko zuzendari nagusia, Ana Burusco Juandeaburre.

ERANSKINA

Diru-sarrera txikiko inguruneetatik datozen gazteak goi mailako hezkuntzan sartzeko beken deialdia

Hizkera ez sexistaren adierazpena.

Agiri honetan pertsona, gizatalde edo kargu akademikoak gaztelaniaz genero maskulinoarekin aipatzen direnean, markatu gabeko genero gramatikala dela ulertzen da, eta, beraz, emakumeak nahiz gizonak aipatzen ahal dira horrela.

1.–Deialdiaren xedea.

1.1. Deialdi honen xedea da 10 bekaren deialdia egitea diru-sarrera txikiko inguruneetatik datozen gazteak goi mailako unibertsitate hezkuntzan sar daitezen, 2022-2023 ikasturtean hasten diren graduko ikasketa ofizialak eginez. Beka horien helburua da errenta maila baxuko eta errendimendu akademiko oneko pertsonei ikasteko aukera eta dedikazio esklusiboa erraztea, probetxuzko unibertsitate ikasketak egiteko baldintzak betetzen dituen inor aukera horretatik kanpo gera ez dadin arrazoi ekonomikoengatik.

Bekak kasuan kasuko titulazioaren egiturako ikasturte guztietara zabalduko dira, oinarri hauetan aipatzen diren berritze baldintzak betez eta hamabigarren apartatuan ezarritako prozedurari jarraikiz.

1.2. Laguntzak emateko prozedura norgehiagoka araubidean izapidetuko da, eta haiek eman eta ordaintzeko, aurrekontu-kredituak egon behar du; hala, beka guztiak ordaintzeko behar adinako aurrekontu-krediturik ez badago, bosgarren apartatuan ezarritakoaren arabera ordainduko dira. Kreditu ezagatik ordaindu ezin diren eskaerak ukatutzat joko dira.

2.–Betebeharrak.

2.1. Beken onuradun izaten ahal dira Iruñeko eta Tuterako campusetan ematen diren titulazioetan graduko ikasketa ofizialen lehen mailan matrikulatzen diren ikasleak, baldin eta baldintza hauek betetzen badituzte eta deialdi honetan ezarritako prozedura eta irizpideen arabera hautatuak badira:

a) Nafarroako edozein udalerritan erroldatuta egotea, deialdia Nafarroako Aldizkari Ofizialean argitaratu aurretik.

b) Hezkuntzaren arloan unibertsitate ikasketetarako eskumena duen ministerioaren izaera orokorreko beka baten onuradun izatea 2022-2023 ikasturtean.

c) 2022. urtean Nafarroako Foru Komunitatean Unibertsitatera Sartzeko Ebaluazioaren derrigorrezko fasea edo beste autonomia erkidego bateko proba baliokidea gainditu ondoren, unibertsitatean sartzeko 8,5 puntuko edo hortik gorako sarrera nota izatea, lehen aldiz sartzeko.

Unibertsitatera sartzeko nota izanen da BBNren (Batxilergoko batez besteko nota) %60 + FOKaren (fase orokorreko kalifikazioa) %40 formularen arabera kalkulatutakoa, 0tik 10 puntura bitarteko eskala batean. Beraz, ez dira kontuan hartuko otsailaren 2ko PCM/58/2022 Aginduaren 10. artikuluak aipatzen dituen onarpen nota hobetzeko probetan (Unibertsitatera Sartzeko Ebaluazioaren borondatezko fasea) lortutako kalifikazioak; agindu horretan zehazten dira Unibertsitatera Sartzeko Batxilergoko Ebaluazioaren ezaugarriak, diseinua eta edukia, baita probak egiteko eta 2021-2022 ikasturtean lortutako kalifikazioen berrikuspen prozedurak ebazteko gehieneko datak ere (2022ko 30. Estatuko Aldizkari Ofiziala, otsailaren 4koa).

d) Lehen aldiz matrikula osoa egitea graduko titulu ofiziala lortzeko ikasketetan, gutxienez 60 kreditutan, aurrez aurreko modalitatean, Nafarroako unibertsitate batean, Iruñeko eta Tuterako campusetan 2022-2023 ikasturtean emandako titulazioetan.

e) 2021. urtean Nafarroako PFEZaren zergadun izatea, errenta aitortzera behartua badago.

f) Laguntza eskatzen duen ikasleak bere zerga betebeharrak egunean izan behar ditu Foru Komunitateko Administrazioarekin.

g) Eskatzaileak independentzia familiarra eta ekonomikoa duela alegatzen badu, modu sinesgarrian frogatu beharko ditu ondoko hauek:

–Independentea izateko baliabide propio aski duela.

–Ikasleak bizileku duen etxebizitzaren titulartasuna edo errentamendua; deialdi honen ondorio guztietarako, bizilekua izanen da ikasleak ikasturtean zehar bizitzeko erabiltzen duena.

–Bizilekuari dagokion udalaren erroldatze eta bizikidetza ziurtagiria, 2021. urteari dagokiona.

Deialdi honen ondorioetarako, ulertuko da eskatzailea independentea dela, familia unitateko kide bakarra denean.

h) Familiaren errenta erabilgarriak ez ditu zenbateko hauek gaindituko:

2.2. Eskabidea aurkeztu ondoren, Unibertsitateko Zuzendaritza Nagusiak eskatuta, eta aurreko puntuko c) letran ezarritakoaren ondorioetarako, egiaztatzeko, Nafarroako Unibertsitate Publikoak agiri bidez frogatuko du 2022-2023 ikasturtean eskatzaileak unibertsitatera sartzeko izandako nota, baita nota hori zein urtetan eta sarbide probaren zer modalitatetan lortu duen ere. Eskatzaileak Unibertsitatera Sartzeko Ebaluazioa beste autonomia erkidego batean gainditu badu, lortutako nota agiri bidez frogatu beharko du.

Eskatzaileek frogatu beharko dute aurrez aurreko modalitateko graduko ikasketa ofizialetan sarrera berriko matrikula osoa egin dutela.

2.3. Onuraduna izaten ahalko da, Dirulaguntzei buruzko azaroaren 9ko 11/2005 Foru Legearen 13.2 e) artikuluan ezartzen diren baldintzak bete gabe ere.

3.–Bateragarritasunen gaineko araubidea.

3.1. Beka jasotzea bateraezina da izaera edo helburu bererako Estatuko, Europar Batasuneko edo nazioarteko organismoetako edozein administrazio edo erakunde publiko zein pribatutatik etorritako beste edozein dirulaguntza, laguntza, sarrera edo baliabide jasotzearekin, Nafarroako Gobernuak deitutako unibertsitate ikasketetarako laguntza osagarriak barne.

Ondorio horietarako, beka bateraezina izanen da besteren konturako lanaren errentekin edo norberaren konturako jarduera ekonomikoarekin, unibertsitateko prestakuntza dualaren kasuan eta praktiketako ordainsariak jasotzearekin izan ezik.

3.2. Beka hauekin bateragarriak izanen dira:

a) Unibertsitate ikasketetarako beka orokorrak, hezkuntzaren arloan eskumena duen ministerioak emandakoak.

b) Ikasketetarako Erasmus + programaren eta nazioarteko mugikortasuneko beste programa batzuen eta antzeko beste programa batzuen laguntzen beka osagarriak.

c) Unibertsitateko departamentuetarako ikasleen lankidetza bekak, Unibertsitateek eta Hezkuntza eta Lanbide Heziketaren Ministerioak emandakoak.

3.3. Beka horien eta hezkuntza arloan eskumena duen ministerioak unibertsitateko departamentuetarako ematen dituen ikasleen lankidetza beken arteko bateragarritasuna Ministerio honek deialdi honetarako bateragarritasun horri buruz ematen duen ebazpenaren mende egonen da.

4.–Zenbatekoa eta finantzabidea.

4.1. Laguntza hauen ondoriozko gastuak honako honi egotziko zaizkio 2022an eta hurrengo urteetan, aurrekontuetan eskuragarri dagoen kredituaren arabera: "Unibertsitate ikasketetarako laguntzak" izeneko G10001-G1100-4800-323100 aurrekontu partida.

4.2. Bekaren banakako zenbatekoa, pertsona eta ikasturte bakoitzeko, bederatzi mila eta bostehun eurokoa izanen da, 9.500 eurokoa, bai lehenengoz ematen denean, bai hurrengo berritzeetan.

4.3. Bekaren iraupena ez da izaten ahalko onuraduna matrikulatzen den graduko titulazio ofizialaren ikasturteena baino luzeagoa. Horregatik, 240 kredituko graduetarako bekaren iraupena gehienez ere lau ikasturte akademikokoa izanen da, hau da, beka hasieran emanen da eta gehienez hiru ikasturtetan berrituko da. Gainerako graduetan, iraupena ez da izaten ahalko titulazioak dituen ikasturteena baino luzeagoa, ezta sei ikasturtetik gorakoa ere.

5.–Laguntzak emateko prozedura eta irizpidea.

5.1. Norgehiagokakoa izanen da bekak emateko prozedura, eta publikotasun, objektibotasun, gardentasun eta berdintasun printzipioak betez izapidetuko da.

5.2. Eskaerak familiaren errenta erabilgarriaren arabera ordenatuko dira, tarte hauek eginez:

Ondoren, tarte bakoitzaren barruan, unibertsitatean lehen aldiz sartzeko nota handienetik txikienera ordenatuko dira eskabideak, 2.1.c) apartatuan zehaztutako 8,5 puntutik 10 puntura bitarteko tartean. Lehenik eta behin, baldintza guztiak betetzen dituzten eta 1.A tartean sartzen diren eskaerak emanen dira. Ondoren, irizpide berari jarraikiz, 1.B tartean sartutakoak emanen dira, deialdiko hamar laguntzak osatu arte.

5.3. Berdinketa izanez gero, hurrenkera ezartzeko, irizpide hauek izanen dira kontuan, hurrenez hurren:

a) Eskatzailea guraso bakarreko familia unitate bateko kidea izatea; kategoria berezikoak lehentasuna izanen du kategoria orokorrekoaren aurrean.

b) Eskatzailea familia ugari bateko kidea izatea; kategoria berezikoak lehentasuna izanen du kategoria orokorrekoaren aurrean.

c) %33ko edo hortik gorako desgaitasuna egiaztatua izatea; %65eko desgaitasuna edo handiagoa egiaztatua duen eskatzaileak izanen du lehentasuna %33koa edo handiagoa dutenekiko.

Berdinketak jarraitzen badu, balorazio batzordeak proposatu eta justifikatuko du hartutako irizpidea.

6.–Eskaera aurkeztea: epea eta eskatutako dokumentazioa.

6.1. Eskabideak aurkezteko epea 15 egun naturalekoa izanen da, deialdi hau Nafarroako Aldizkari Ofizialean argitaratu eta hurrengo egunetik zenbatzen hasita.

6.2. Beka eskuratzeko eskaerak "nafarroa.eus" web atariko datu orria betez egiten ahalko dira soilik. Beharrezkoa da aldez aurretik identifikatzea cl@ve sistemaren kredentzialekin edo erabiltzailearen ziurtagiriarekin (ziurtagiri digitala edo NAN elektronikoa).

Beka jasoko duen ikasleak berak eginen du eskaera. Legezko ordezkariak egin behar badu eskaera, aldez aurretik bete beharko da ordezkaritzaren egiaztagiria, izapidetze-prozeduran aurreikusi bezala.

Beka eskaera bete eta ezarritako prozedura telematikoaren bidez igorri ondoren, aurkeztuta eta sinatuta geldituko da, ondorio guztietarako. Ez da beharrezkoa eskaera hori fisikoki inon aurkeztea.

Eskabidea aurkeztutzat joko da, izapidetzeko, erregistroaren frogagiria lortzen den unean, eta gorde egin beharko da, beharrezkoa izanez gero, eskabidea ezarritako epean eta moduan aurkeztu dela frogatzeko.

Ez dira kontuan hartuko telematikoki ez beste modu batez betetako eskaerak.

6.3. Eskatzaileak edo haren legezko ordezkariak baimena ematen ahalko dute Estatuko Administrazio Orokorrean eta beste administrazio publiko batzuetan eskuragarri dauden datuen kontsulta telematikoa egiteko. Horren xedea da zehaztu, ezagutu eta egiaztatzen ahal izatea bekaren eskaera ebazteko beharrezkoak diren identifikazio datu guztiak, inguruabar pertsonalak, akademikoak eta familiakoak, eta errenta eta ondarea. Horretarako, berariaz adierazi beharko dute eskabidean.

6.4. Eskatzaileak edo familia unitateko gainerako kideek legez kontra egiten badute edo, ahal denean, baimenik ematen ez badute datuak edo agiriak beste administrazio batzuetatik jasotzeko, edo espedientea izapidetzen duen unitateak informazioa zuzenean lortzerik ez badu, agiri hauek aurkeztu beharko dituzte:

–Identitatea egiaztatzen duen dokumentazioaren kopia.

–Zerga betebeharrak egunean dituela egiaztatzen duen agiria.

–Errolda agiria.

–Unibertsitatera Sartzeko Ebaluazioaren derrigorrezko fasean lortutako notaren egiaztagiria.

–Hezkuntza arloan eskumena duen ministerioaren izaera orokorreko beka lortu izanaren egiaztagiria.

–Matrikula ordaindu izanaren frogagiria.

–PFEZ 2021. urtean Nafarroan aitortu izanaren frogagiria.

–Hala badagokio, eskatzailearen desgaitasun-ziurtagiria.

–Hala badagokio, familia ugariaren titulu ofiziala.

–Hala badagokio, guraso bakarreko familiaren titulu ofiziala.

–Bidezkotzat jotzen diren dokumentu eta ziurtagiri guztiak.

6.5. Salbuespen gisa, Unibertsitateko Zuzendaritza Nagusiak beharrezkoak diren datu edo agiriak bildu ezin baditu edo horiek eguneratuta ez badaude, pertsona interesdunei eskatuko zaie datu horiek aurkezteko.

Dokumentuak PDF formatuan aurkeztuko dira. Interesduna da aurkezten dituen datu eta dokumentuen egiazkotasunaren erantzule, eta, datu eta dokumentu horiek zuzenak ez direla edo faltsuak direla egiaztatzen bada, dagozkion erantzukizun administratibo edo penalen ondorioak jasoko ditu. Administrazioak datuen egiazkotasunari buruzko zalantzak dituenean, jatorrizkoak aurkezteko eskatzen ahal du.

Nolanahi ere, eskatzaileak bere eskaera baloratzeko beharrezkotzat jotzen dituen agiriak aurkezten ahalko ditu.

7.–Datuak bildu eta lagatzea.

7.1. Eskatzaileek eskaerak aurkezteak honako hau esan nahi du:

–Onartzen dituela deialdiaren oinarriak.

–Badituela eskaerarekin batera aurkeztutako datu guztiak egiaztatzen dituzten jatorrizko frogagiriak, eta horiek ere aurkeztuko dituela horretarako errekerimendua egiten bazaio.

–Jakinaren gainean dagoela, deklaratutako inguruabarretan zerbait zuzena ez bada, egia ez bada, edo ezkutatu bada, beka ukatuko zaiola edo itzuli beharko duela.

–Onespena ematen diola komunikazioak modu telematikoan eskuratzeari, eskaeran horretarako adierazi duen posta elektronikoaren bidez.

–Eskatzailea dela bekaren ordainketa eskuratzeko adierazitako kontu korrontearen titularra edo titularkidea.

–Baimena ematen diola Unibertsitateko, Berrikuntzako eta Eraldaketa Digitaleko Departamentuari jendaurrean jartzeko bekadunen zerrendak, haien datu identifikagarriak eta emandako laguntzen zenbatekoak zehaztuta, dirulaguntzei buruzko oinarrietan eta datu pertsonalen babesari buruzko arauetan ezarritakoarekin bat.

7.2. Eskabidean jarritako datu pertsonalak eta bekak emateko eskatzen diren gainerako agiriak Unibertsitateko, Berrikuntzako eta Eraldaketa Digitaleko Departamentuko Unibertsitateko Zerbitzuaren ardurapeko fitxategi automatizatu batean jasoko dira.

Aipatu unitate organikoak edozein unetan erabil ditzake fitxategi horretako datuak, egiazkoak diren baieztatzeko.

8.–Laguntza ematea eta ukatzea.

8.1. Bekaren kontzesioa ikaslearen alde eginen da legezko ondorio guztietarako.

8.2. Unibertsitateko, Berrikuntzako eta Eraldaketa Digitaleko Departamentuko Unibertsitateko Zerbitzuari dagokio espedientearen instrukzioa.

8.3. Onartu eta ukatzen diren beken behin-behineko zerrenda Unibertsitateko zuzendari nagusiaren ebazpenaren bidez onetsiko da, Unibertsitateko Zerbitzuak proposatuta, eta "nafarroa.eus" atarian argitaratuko da.

Behin-behineko zerrenda horrekin bat heldu ez diren eskatzaileek bidezko iruditzen zaizkien alegazioak aurkezten ahalko dizkiote Unibertsitateko, Berrikuntzako eta Eraldaketa Digitaleko Departamentuko Unibertsitateko Zerbitzuari. Horretarako hamar egun naturaleko epea izanen da, ebazpena "nafarroa.eus" atarian argitaratzen den egunetik. Zerbitzu horrek, ere berean, ofizioz berrikusten ahalko ditu espedienteak, deialdian aurreikusitakoaren aurkako arau-hausterik edo akatsik atzematen badu.

8.4. Prozedura izapidetu ondoren, Unibertsitateko Zerbitzuak behin betiko ebazpen proposamena eginen du, eta, egindako guztiarekin, ebazteko eskumena duen organoari igorriko dio.

Onartu eta ukatzen diren beken behin betiko zerrenda Unibertsitateko zuzendari nagusiaren ebazpenaren bidez onetsiko da, Unibertsitateko Zerbitzuak proposatuta. Emandako eta ukatutako beken behin betiko zerrenda "nafarroa.eus" atariko beken fitxan argitaratuko da.

9.–Beka onartzea eta uko egitea.

9.1. Beka emateko ebazpena argitaratu ondoren, ulertuko da onuradunak beka onartzen duela, salbu eta Unibertsitateko Zuzendaritza Nagusiari berariaz aurkakoa adierazten bazaio, hiru eguneko epean, beka emateko ebazpena deialdiaren fitxan argitaratu eta hurrengo egunetik hasita.

9.2. Berariaz aurkakoa adierazteko, elektronikoki egin beharko da, eskabide orokorraren bidez, eta Nafarroako Gobernuko Unibertsitateko, Berrikuntzako eta Eraldaketa Digitaleko Departamentuko Unibertsitateko Zuzendaritza Nagusiari zuzenduko zaio.

9.3. Beka eman ondoren interesdunak bekari uko egin nahi badio, aurreko puntuan azaldutakoaren arabera aurkeztu beharko da uko egite hori.

10.–Beken edo laguntzen ordainketa.

10.1. Ikaslearen aldeko beka edo laguntzen ordainketa eginen da eskaeran adierazi den banketxearen bidez. Banketxeko kontuak aktibo egon beharko du, laguntza emateko prozesua bukatu arte.

10.2. Ikasturte akademikoak bi aurrekontu-ekitaldi hartzen dituela kontuan hartuta, bi ordainketa partzial eginen dira, eta horien zenbatekoa ekitaldi bakoitzean aurrekontuan dagoen diruaren araberakoa izanen da. Bi ordainketa horietako bakoitzaren zenbatekoen banaketa beka emateko edo, hala badagokio, berritzeko ebazpenean zehaztuko da.

11.–Onuradunen betebeharrak.

11.1. Ebazpen honen bidez deitutako beken onuradunaren betebeharra da beka eman den xederako erabiltzea, eta, bereziki:

a) Ikasturte bakoitzean matrikulatutako kreditu guztiak gainditzea.

b) Bekak irauten duen bitartean, besteren konturako lan jarduerarik edo norberaren konturako jarduera ekonomikorik ez egitea, baldin eta lan jarduera ez badago lotuta prestakuntza dualeko ibilbide bat duten edo praktika ordainduak egiten diren graduko titulazioekin.

c) Unibertsitateko, Berrikuntzako eta Eraldaketa Digitaleko Departamentuaren egiaztatze jarduketak onartzea eta jarduketa horiek gauzatzean eskatzen diren informazio eta agiri guztiak aurkeztea.

d) Frogagiriak gordetzea, egiaztapen eta kontrolen xede izan daitezkeen bitartean.

e) Unibertsitateko Zuzendaritza Nagusiari jakinaraztea diruz lagundutako jarduera bera finantzatzeko beste edozein dirulaguntza, laguntza, diru-sarrera edo baliabide lortu dela, beste administrazio publiko edo erakunde publiko edo pribatu batzuetatik.

f) Foru Komunitateko Administrazioari behar den informazio guztia ematea, betebeharrak eta eskatutako baldintzak frogatzeko betebeharra bete dela ulertzeko.

g) Jasotako funtsak itzultzea, indarreko araudian eta hamaseigarren apartatuan ezarritako kasuetan.

h) Beka berritzeko, hezkuntza arloan eskumena duen ministerioaren beka orokorren deialdian eskabidea aurkeztu izana, beka berritu aurreko ikasturtean.

12.–Beka berritzea.

12.1. Beka eman zen graduko ikasketa ofizialetako ikasturte bakoitzerako beka berritzeko, baldintza hauek bete beharko dira:

a) Diru-sarrera txikiko inguruneetatik datozen gazteak unibertsitateko goi mailako hezkuntzan sartzeko bekaren onuradun izatea aurreko ikasturtean ikasketa beretan.

b) Unibertsitate ikasketetarako beka orokorren onuradun izatea. Beka horiek hezkuntza arloan eskumena duen ministerioak ematen ditu, matrikula bekaren atalean, aurreko ikasturtean, hurrengo artikuluan aurreikusitako salbuespenezko egoeraren bat gertatzen denean izan ezik.

c) Aurreko ikasturtean matrikulatutako kreditu guztiak gainditu izana.

d) Diru-sarrera txikiko inguruneetatik datozen gazteak unibertsitateko goi mailako hezkuntzan sartzeko bekaren xede diren ikasketa berberetan matrikula egina izatea, beka berritzea eskatzen duen ikasturterako, gutxienez 60 kreditutan. Dagokion graduaren azken mailan, matrikulatutako kreditu kopuru txikiagoa onartuko da, haiekin bukatzen bada.

e) Inoren konturako lan jarduerarik edo norberaren konturako jarduera ekonomikorik ez egiteko betebeharra bete izana, 11.1.b) apartatuan aurreikusitako baldintzen arabera.

f) Onuradunari ezarritako baldintzak eta betebeharrak ez betetzeagatik diru-sarrera txikiko inguruneetatik datozen gazteei unibertsitateko goi mailako hezkuntza jasotzeko beka ematea errebokatzeko edo beka ematean jasotako zenbatekoak itzultzeko ebazpenik ez izatea.

g) Diru-sarrera txikiko inguruneetatik datozen gazteak unibertsitateko goi mailako hezkuntzan sartzeko bekaren onuradunek deialdi honetan eskatzen diren gainerako baldintza eta betebeharrak ez betetzea.

12.2. Aurreko atalean aipatzen diren betebeharrak agiri hauek aurkeztuz frogatuko dira:

a) Aurreko ikasturtean matrikula bekaren atalean hezkuntza arloan eskumena duen ministerioaren izaera orokorreko beka lortu izanaren egiaztagiria.

b) Bekaren onuradunaren lan bizitzaren txostena.

c) Deialdiaren oinarrietako seigarren eta zazpigarren apartatuetan jasotzen diren ziurtagiriak, agiriak eta erantzukizunpeko adierazpenak.

12.3. Beka berritzea dagozkion ekitaldietako aurrekontuetan dagoen diruaren mende egonen da.

13.–Beka berritzeko salbuespenezko kasuak, aurreko ikasturtean Ministerioaren beka orokor baten onuraduna ez bada.

13.1. Hezkuntza arloan eskumena duen ministerioak adierazten badu beka orokorra, matrikula bekaren arloan, bateraezina dela diru-sarrera txikiko inguruneetatik datozen gazteak unibertsitateko goi mailako hezkuntzan sartzeko bekarekin, eta onuradunak azken hori aukeratzen badu.

13.2. Onuradunak hezkuntza arloan eskumena duen ministerioaren izaera orokorreko beka eskaera egin ondoren beka eskuratzen ez badu, errenta tarteak gainditzen dituelako familia unitatearen errentaren zenbaketan diru-sarrera txikiko inguruneetatik datozen gazteak unibertsitateko goi mailako hezkuntzara sartzeko bekaren bidez jasotako zenbatekoa soilik hartu delako kontuan.

Horri dagokionez, beka berritzeko, egiaztatuko da familia errentak, Ministerioaren deialdiak ezartzen duen moduan kalkulatuta eta diru-sarrera txikiko inguruneetatik datozen gazteak unibertsitateko goi mailako hezkuntzan sartzeko bekaren bidez lortutako zenbatekoa kenduta, ez duela gainditzen hezkuntza arloan eskumena duen ministerioak beka orokorren onuradun izateko aurreko ikasturtean ez onartzeko ezarritako muga, edo, hala badagokio, argitaratutako azken deialdian ezarritakoa.

Familiaren errenta zehazteko, hura justifikatzen duen zerga-informazioa aurkeztu beharko da.

Nolanahi ere, bekaren onuradunak bere familia unitateko pertsona konputagarriak behar bezala zehazteko egokitzat jotzen duen informazioa alegatzen eta aurkezten ahalko du, eta horretarako beharrezkotzat jotzen den informazio gehigarria eskatzen ahalko du.

14.–Beka berritzeko prozedura.

14.1. Prozedura ofizioz hasiko da, dagokion ikasturteko matrikulazio epe arrunta amaitu ondoren, Unibertsitateko Zuzendaritza Nagusiko titularraren ebazpen baten bidez. Ebazpena egoitza elektronikoan argitaratuko da.

14.2. Unibertsitateko Zerbitzuak hamabigarren apartatuan ezarritako baldintzak betetzen diren egiaztatuko du. Ondorio horietarako, berritu beharreko beken onuradunei hamar eguneko epea emanen zaie 12.2 apartatuan adierazitako agiriak aurkezteko. Dokumentazioa egoitza elektronikoan aurkeztuko da, nafarroa.eus atarian argitaratuko den deialdiaren fitxan.

Hala ere, beka berritzeko baldintza ekonomikoa hamahirugarren apartatuan xedatutakoaren arabera egiaztatzen bada, familiaren errenta erabilgarria kalkulatzeko behar diren agiriak eta datu ekonomikoak eskatuko dira.

Gainera, familia unitateko pertsonen datuak kontsultatzeko instrukzio organoak errekerimenduan emanen duen agiria aurkeztu beharko dute, beteta eta sinatuta.

14.3. Unibertsitateko Zuzendaritza Nagusiko titularrak ebatziko du beka berritzeko prozedura, gehienez ere hiru hilabeteko epean; epe hori prozedura hasteko ebazpena egoitza elektronikoan argitaratzen den egunetik hasiko da kontatzen.

14.4. Berritzeko ebazpenak beka berritu zaien onuradunen zerrenda jasoko du, baita, hala badagokio, berritzea ukatu zaien pertsonena ere, arrazoia adierazita. Hamargarren apartatuan ezarritako ordainketa partzialen araubidearen arabera, beka berritzeko ikasturteari dagokion bi aurrekontu-ekitaldietako bakoitzaren kargura ordainduko den zenbatekoa adieraziko da.

Aipatu den hiru hilabeteko gehieneko epean berariazko ebazpenik argitaratu ez bada, eskatzaileak ulertzen ahalko du bere beka eskaera ezetsia izan dela.

14.5. Ebazpena egoitza elektronikoan argitaratuko da, beka berritzeko prozedura hasteko ebazpenean adierazten den nafarroa.eus atariko deialdiaren fitxan. Horrez gain, banan-banan eta modu elektronikoan jakinaraziko zaie interesdunei.

14.6. Beka berritu ondoren interesdunak bekari uko egin nahi badio, elektronikoki aurkeztu beharko da uko egite hori, Unibertsitateko Zuzendaritza nagusiari bidalita.

15. oinarria.–Diruz laguntzeko jarduketaren kontrola eta jarraipena.

15.1 Unibertsitateko, Berrikuntzako eta Eraldaketa Digitaleko Departamentuak egiaztatuko du onuradunek diruz laguntzeko eman zitzaien jarduketarako erabili dutela beka. Horretarako, beka eman zen unibertsitate titulu ofizialaren ikasturteetako deialdietan matrikulatutako kreditu guztiak gainditu beharko dira ikasturte bakoitzean. Bestela, betebehar hori bete ez den ikasturteko bekaren zenbatekoa itzuli beharko da. Onuradunek agiri bidez egiaztatuko dute hori, Unibertsitateko Zuzendaritza Nagusiak eskatuta.

16.–Errebokatzea eta laguntza itzultzea.

16.1. Onuradunari arlo honetako araudian, deialdi honetan edo dirulaguntza emateko edo berritzeko ebazpenean ezarri zaizkion baldintzak eta betebeharrak ez direla betetzen egiaztatzen bada, dirulaguntza emateko egintza errebokatuko da eta kobratzeko eskubidea galduko da, edo, hala badagokio, jasotako zenbatekoak itzuli beharko dira, eta dagozkion interesak eskatuko dira. Azken kasu horretan, errebokatzeko adierazpena azaroaren 9ko 11/2005 Foru Legean araututako itzulketa prozeduraren bidez eginen da.

Dirua itzultzeko prozedura hasi aurretik, inguruabar horren berri emanen zaio interesdunari, behar ez bezala jasotako dirua itzultzeko, bankuan diru-sarrera eginda.

Jakinarazpen horretan ezarritako epean dirua borondatez itzultzen ez bada, dirua itzularazteko prozedurari ekinen zaio.

16.2. Zientzietako eta Ingeniaritza eta Arkitekturako arloetan matrikulatutako kredituetatik 29 edo gainerako arloetan matrikulatutako kredituetatik 39 gainditzen ez badira gutxienez, Unibertsitateko Zuzendaritza Nagusiko titularrak beka osoa itzultzea erabakiko du.

16.3. Onuradunak Zientzietako edo Ingeniaritza eta Arkitekturako arloetako titulazioetan 30 eta 38 kreditu artean edo gainerako arloetako titulazioetan 40 eta 47 artean gainditu baditu, bekaren zati bat itzultzeko eskatuko da, eta itzuli beharreko zenbatekoa gainditu gabeko kreditu kopuruaren arabera zehaztuko da. Horretarako, gainditu gabeko kreditu bakoitzaren zenbatekoa bekaren urteko horniduraren eta matrikulatutako kreditu kopuruaren arteko zatiduraren araberakoa izanen da.

16.4. Zientzietako edo Ingeniaritza eta Arkitekturako arloetako titulazioen kasuan, matrikulatutako kredituetatik 39 gainditzen badira gutxienez, eta 48 kreditu gainerako arloetan, ez da beka itzultzeko eskatuko.

16.5. Onuraduna hiltzen bada, Unibertsitateko Zuzendaritza Nagusiak ez du bekaren zenbatekoa itzultzeko eskatuko. Halaber, ez da itzuli beharko 12.c apartatuan ezarritako errendimendu akademikoaren betebeharra betetzen ez bada, istripu edo gaixotasun larri baten ondorioz gertatzen denean.

17.–Instrukzioa.

17.1. Unibertsitateko Zuzendaritza Nagusiaren menpekoa den Unibertsitateko Zerbitzuak bideratuko du prozedura.

17.2. Instrukzio organoak, eskaeren agiriak zuzenak direla egiaztatu ondoren, ofizioz eginen ditu behar diren jarduketa guztiak diruz laguntzeko jarduketari buruzko datuak egiaztatzeko eta aztertzeko eta eskatzaileak dirulaguntzaren onuradun izateko baldintzak betetzen dituela egiaztatzeko.

17.3. Instrukzioko jarduketek honako hauek barne hartuko dituzte:

a) Ebazteko beharrezkotzat jotzen diren edo araudi aplikagarriak eskatzen dituen txostenak eskatzea.

b) Ebaluazio aurreko fasea, diruz lagunduko den jarduketari buruzko datuak eta onuradun izateko ezarritako baldintzak betetzen direla egiaztatzeko.

c) Eskabideak ebaluatzea, hurrengo apartatuan aurreikusitakoaren arabera.

18.–Eskabideen balorazioa.

18.1. Eskabideak bosgarren apartatuan ezarritako balorazio irizpideen arabera ebaluatuko dira.

18.2. Kide hauek osatutako balorazio batzordeak baloratuko ditu eskabideak:

a) Unibertsitateko Zerbitzuko zuzendaria.

b) Unibertsitateko Ataleko burua.

c) Gutxienez, Unibertsitateko Zerbitzuari atxikita dagoen eta profil teknikoa duen pertsona bat.

d) APT bat (arlo juridikoa), Unibertsitateko, Berrikuntzako eta Eraldaketa Digitaleko Departamentukoa.

18.3. Balorazio batzordeak hirugarren pertsonen laguntza eskatzen ahalko du, hitzarekin baina botorik gabe, laguntza eskaerei buruzko gaietan aholkularitza teknikoa eman dezaten.

18.4. Balorazio batzordeak bere funtzionamendu arauak ezartzeko aukera izanen du, eta, halakorik izan ezean, Sektore Publikoaren Araubide Juridikoari buruzko urriaren 1eko 40/2015 Legean kide anitzeko organoentzat xedatutakoaren arabera arautuko da.

18.5. Eskabideak aztertu eta ebaluatu ondoren, balorazio batzordeak txosten bat eginen du eta hor azalduko ditu balorazio irizpideen aplikazioa eta ondoriozko lehentasunezko ordena. Txosten hori izanen da instrukzio organoaren ebazpen proposamenaren oinarria.

19.–Errekurtsoak.

19.1. Deialdi honen eta oinarrien aurka gora jotzeko errekurtsoa paratzen ahal da, Unibertsitateko, Berrikuntzako eta Eraldaketa Digitaleko Departamentuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

19.2. Bekak eta laguntzak emateko edo ukatzeko behin betiko ebazpenaren aurka gora jotzeko errekurtsoa aurkezten ahal da, Unibertsitateko, Berrikuntzako eta Eraldaketa Digitaleko Departamentuari zuzendua, hilabeteko epean, ebazpena eta haren eranskinak "nafarroa.eus" atarian argitaratu eta biharamunetik hasita.

Iragarkiaren kodea: F2215687