Iragarkia

145. ALDIZKARIA - 2022ko uztailaren 21a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

1386/2022 EBAZPENA, 2022ko uztailaren 1ekoa, Nafarroako Unibertsitate Publikoko Ikerketako errektoreordeak emana, zeinaren bidez laguntza baten deialdia onesten baita “Gizarte Lana eta Gizarte Zerbitzuak” jakintza-arloarekin loturiko doktoretza aurreko kontratu bat finantzatzeko, Nafarroako Unibertsitate Publikoaren Herritarrei, Bizikidetzari eta Pluralismoari buruzko UNESCO Katedraren esparruan.

Herritarrei, Bizikidetzari eta Pluralismoari buruzko UNESCO Katedrak prestakuntza, ikerketa, hedapen eta elkarrizketa gune bat ezarri nahi du pluralismoaren eta aniztasunaren aberastasuna eta herritarren izaera inklusibo eta berdinzalea uztartzen dituzten prozesu demokratikoei buruz. Katedra horren esparruan, 2022ko martxoaren 11n lankidetza-hitzarmen bat sinatu zuten Nafarroako Unibertsitate Publikoak eta Nafarroako Gobernuaren Migrazio Politiketako eta Justiziako Departamentuak Nafarroako migratzaileen gizarte inklusioa sustatzeko xedez, kulturen arteko bizikidetzari eta diskriminaziorik ezari laguntzeko.

Testuinguru horretan, eta lortu nahi diren helburuak lortzeko, ikertzaileen prestakuntza bultzatu nahi da, tesi bat eginez migratzaileen gizarte inklusioa sustatzen lagunduko duen ezagutza sor dezaten.

Ikusirik Aholkularitza Juridikoaren txostena.

Ikusirik Kontabilitate Atalak egindako kreditu-erreserbaren ziurtagiria eta zerga-tratamenduari buruzko txostena.

Ikerketa Batzordeari 2022ko maiatzaren 30ean horren berri eman ondoren.

Kontuak ikuskaturik eta aldeko fiskalizazioa eginik.

Nafarroako Unibertsitate Publikoko errektoreak 2019ko uztailaren 3an emandako 1420/2019 Ebazpenaren bidez ematen dizkidan eskudantziak erabiliz.

EBAZTEN DUT:

Lehenbizikoa.–Laguntza baten deialdia onestea “Gizarte Lana eta Gizarte Zerbitzuak” jakintza-arloarekin loturiko doktoretza aurreko kontratu bat finantzatzeko, doktoretza-tesi bat egin dezaten Nafarroan migratzaileen gizarte inklusioa sustatzen lagunduko duen ezagutza sortzeko, ebazpen honen eranskinean agertzen diren oinarrien arabera.

Bigarrena.–Baimena ematea deialdi honek sortutako gastua egiteko, 21.722,80 euro gehienez. Ikertzaileak 1.212,26 euro-ko soldata gordina jasoko du hilean gutxienez, eta 14 lansari urtean.

Sorturiko gastua Nafarroako Unibertsitate Publikoak 2022ko eta 2023ko ekitaldietarako dituen Gastuen Aurrekontuetako partida hauen kargura ordainduko da.

–2022:

• 30.31.08.8610-131.10 Prestakuntzan dauden ikertzaileak: 4.242,91 euro.
• 30.31.08.8610-160.00 Gizarte Segurantza: 1.082,79 euro.
• 30.31.08.8610-480.02 Matrikularako laguntzak: 420,00 euro.

–2023:

• 30.31.08.8610-131.10 Prestakuntzan dauden ikertzaileak: 12.728,73 euro.
• 30.31.08.8610-160.00 Gizarte Segurantza: 3.248,37 euro.

Hirugarrena.–Laguntza emateko ebazpenean, beharrezkoak diren aurrekontu doikuntzak eginen dira doktoretza aurreko kontratua noiz hasten den kontuan hartuta.

Laugarrena.–Ebazpen hau aditzera ematea Ikerketako errektoreordeari, Begoña Pérez Eransus Balorazio Batzordeko buruari, Soziologiako eta Gizarte Laneko Saileko zuzendariari, Aurrekontu eta Plangintza Ekonomikoaren Atalari, Kontabilitate Atalari, Ikerketa Zerbitzuari eta Kontu-hartzailetzari.

Bosgarrena.–Ebazpen hau Nafarroako Aldizkari Ofizialean eta Nafarroako Unibertsitate Publikoaren iragarki-ohol elektronikoan argitara dadila agintzea.

Seigarrena.–Ebazpen honek administrazio bidea agortzen du, eta haren aurka zilegi da berraztertzeko errekurtsoa aurkeztea errektoreari zuzendua hilabeteko epean, hura Nafarroako Aldizkari Ofizialean argitaratu eta biharamunetik kontatzen hasita, edo administrazioarekiko auzi errekurtsoa aurkeztea Nafarroako Administrazioarekiko Auzietako Epaitegian bi hilabeteko epean, hura argitaratu eta biharamunetik kontatzen hasita.

Iruñean, 2022ko uztailaren 1ean.–Ikerketako errektoreordea, Francisco J. Arregui San Martín.

I. ERANSKINA

Oinarriak

Laguntza baten deialdia Nafarroako Unibertsitate Publikoan “Gizarte Lana eta Gizarte Zerbitzuak” jakintza-arloarekin loturiko doktoretza-tesi bat egiteko, NUPen Herritarrei, Bizikidetzari eta Pluralismoari buruzko UNESCO Katedraren esparruan

Eranskina, 2022ko uztailaren 1eko 1386/2022 Ebazpenarena

Nafarroako Unibertsitate Publikoak ikerketa sustatu eta bultzatzeko aurrera daraman politikaren barnean, helburuetako bat ikertzaile gazteak prestatzea da, doktoretza aurreko eremuan ikertzen has daitezen bultzatuz.

“Gizarte Lana eta Gizarte Zerbitzuak” jakintza-arloarekin loturiko doktoretza-tesi bat egiteko laguntzaren deialdi honek Herritarrei, Bizikidetzari eta Pluralismoari buruzko UNESCO Katedraren esparruan du jatorria, bai eta Nafarroako Unibertsitate Publikoak eta Nafarroako Gobernuaren Migrazio Politiketako eta Justiziako Departamentuak Nafarroan migratzaileen gizarte inklusioa sustatzeko sinatutako lankidetza-hitzarmenean ere.

Doktoretza aurreko kontratu moduan gauzatuko da laguntza, eta Zientziari, Teknologiari eta Berrikuntzari buruzko 2011ko ekainaren 1eko 14/2011 Legeko 21. artikuluaren babesean sinatuko da (BOE, 2011ko ekainaren 2koa). Kontratuaren helburua doktoretza-tesi bat egitea izanen da gorago aipatutako ikerketa-arloan.

Hori guztia kontuan harturik, Nafarroako Unibertsitate Publikoak doktoretza aurreko laguntza baterako deialdi hau egiten du.

1.–Deialdiaren xedea.

Urtebete iraunen duen laguntza baterako deialdia egiten da, urtero luzatzen ahalko dena 2 urte gehiago egin arte, Nafarroako Unibertsitate Publikoan doktoretza-tesia egiteko, “Gizarte Lana eta Gizarte Zerbitzuak” jakintza-arloari atxikirik, Nafarroan migratzaileen gizarte inklusioa sustatzeko xedez.

Jakintza-arlo horren barrenean, doktoretza aurreko kontratuaren helburua izanen da doktoretza-tesi bat egitea Nafarroan migratzaileen gizarte inklusioa sustatzeko.

Zehazki, azterlanaren abiapuntua izanen da migratzaileen bizi-baldintzak eta inklusiorako aukerak hobetzen laguntzea, horretarako, besteak beste, talde horri buruzko ezagutza hobetzera, esparru horretako esku-hartze sozialari buruz hausnartzera edo mentoretza sozialak esparru horretan esku hartzeko metodologia gisa egiten dituen ekarpenetan aurrera egitera bideratutako ekintzak eginez. Horrenbestez, kontuan hartuko da haurren, gazteen, generoaren, migrazioen, osasunaren eta giza eskubideen alorretan izandako esperientzia edo ezagutza.

Bai laguntza emateko bai kontratua urtero luzatzeko, beharrezkoa izanen da behar besteko aurrekontua egotea eta deialdian ezarritako betebeharrak betetzea.

2.–Eskatzaileek bete beharreko baldintzak.

Honako baldintza hauek bete behar dituzte eskatzaileek eskaera aurkezteko epearen barrenean:

–Nafarroako Unibertsitate Publikoko Giza eta Gizarte Zientzietako Doktoretza Programan sartzeko behar diren ikasketen titulua edukitzea. Laguntza emateko aukeratua izanez gero, aipatutako programako matrikula egin duela egiaztatu beharko du, laguntzaren behin betiko kontzesioa argitaratzen denean ezartzen den epean.

–Esku-hartze Sozialeko Unibertsitate Masterreko titulua edukitzea.

–Deialdi honetan ezin izanen dute parte hartu eskabideak aurkezteko epea bukatu aurreko hamabi hilabeteetan doktoretza-tesia egiteko beste laguntza baliokideren bat izan dutenek.

–Doktoretza-tesirik ez aurkeztu izana defentsarako.

–Doktore titulurik ez eskuratu izana.

3.–Laguntzaren araubide juridikoa.

3.1. Deialdi honetako laguntzaren onuradunaren eskubideak eta betebeharrak dokumentu hauetan zehazten dira: deialdi honetan, Nafarroako Unibertsitate Publikoak eta Nafarroako Gobernuaren Migrazio Politiketako eta Justiziako Departamentuak sinatutako lankidetza-hitzarmenean, eta 2019ko martxoaren 1eko 103/2019 Errege Dekretuak onetsitako Prestakuntzan Dauden Doktoretza Aurreko Ikertzaileen Estatutuan (BOE, 64.a, 2019ko martxoaren 15ekoa).

3.2. Zientziari, Teknologiari eta Berrikuntzari buruzko 2011ko ekainaren 1eko 14/2011 Legearen 21. artikuluan ezarritakoak arautuko du doktoretza aurreko kontratua.

3.3. Balorazio Batzordeak tesiaren zuzendaria nor izanen den proposatuko du, eta laguntza emateko proposamenarekin batera argitaratuko du. Laguntzaren onuradunari doktoretza-tesiaren zuzendariaren ikerketa-talde bera esleituko zaio, eta hark atxikia duen sail berari atxikita geldituko da.

3.4. Deialdi honetako laguntzak ez du inolako konpromisorik ekarriko onuraduna, ondoren, sar dadin Nafarroako Unibertsitate Publikoko plantillan, Nafarroako Gobernuaren Migrazio Politiketako eta Justiziako Departamentukoan edo, laguntza honen esparruan ikerketa-egonaldiak egiten badira, egonaldiak egiten diren zentro edo enpresetan.

3.5. Deialdi honen babesean laguntza bat jasotzea bateraezina da funts publiko edo pribatuekin finantzaturiko beste laguntza edo beka batzuekin, bai eta laguntzaren onuradunari kontratu edo estatutu lotura ekartzen dioten soldata edo lansariekin ere. Nolanahi ere, badira salbuespen batzuk, betiere Ikerketako errektoreordeak horretarako baimena ematen badu:

–Prestakuntzan dauden ikertzaileek egiten duten ikerketa-jarduerarekin zuzenki loturik dauden ikerketa- edo irakaskuntza-lanetatik datozen ordainsariak, bai eta beste hauetatik datozen osagarriekin ere: I+G-ko proiektuetako parte-hartze baimenduak, eta 2001eko abenduaren 21eko Unibertsitateei buruzko 6/2001 Lege Organikoa aplikatuz egindako kontratuak (2007ko apirilaren 14ko 4/2007 Lege Organikoak aldatu zuen aipatutako legea).

–Ikertzaileen mugikortasuna eta prestakuntza sustatzeko laguntza osagarriak.

–Bestelako jarduerengatik noizean behin jasotako laguntzak, baldin eta Nafarroako Unibertsitate Publikoko Ikerketako errektoreordearen ustez emandako laguntzaren xedea garatzeari traba egiten ez badiote.

4.–Eskaeren aurkezpena.

Parte hartzeko eskabideak eta dokumentazioa Nafarroako Unibertsitate Publikoaren Erregistro Orokorrean aurkeztu behar dira (Arrosadiko campusa z.g., 31006 Iruñea / Tuterako campusa, Tarazonako etorbidea z.g., 31500 Tutera), edo, bestela, Herri Administrazioen Administrazio Prozedura Erkideari buruzko Legeak ezarritako tokietako batean.

NUPen egoitza elektronikoan ere aurkezten ahal dira modu telematikoan, helbide honetan hain zuzen:

https://sedeelectronica.unavarra.es/sede/zerbitzu-katalogoa/guztiak/instancia-general+?languageId=100001

“Erantsi fitxategiak” eremuan, 5. oinarrian aipatzen diren dokumentuak aurkeztu behar dira.

Eskaerak aurkezteko epea 10 egun baliodunekoa izanen da, deialdia NAOn argitaratu eta biharamunetik kontatzen hasita. Eskaerak aurkezteko epea ezin izanen da luzatu.

Oro har, eskatzen diren betekizunak eskaerak aurkezteko epea bukatzen denean bete beharko dira.

5.–Eskaera egiteko inprimakiak eta dokumentazioa.

Dokumentu hauek aurkeztu behar dira:

a) Inprimaki normaldua (https://bit.ly/2uyMn48).

b) Nortasun Agiri Nazionalaren, Atzerritarraren Identifikazio Zenbakiaren edo pasaportearen fotokopia.

c) Merezimenduen zerrenda laburtuaren inprimakia (I.I eranskina).

d) Alegatutako merezimenduak egiaztatzen dituzten agiriak. Agiriz egiaztatutako merezimenduak baino ez dira baloratuko, merezimenduak aurkeztea eta egiaztatzea ez baita deialdiko betebehar baztertzailea. Eskatzaileak dokumentazio hori aurkezten ez badu, Unibertsitateak ez ditu merezimenduak baloratuko, eta ez du eskatuko merezimenduak egiaztatzeko. Ez dira kontuan hartuko egiaztatzeko eskumena eskuordetua ez daukaten pertsonek, organoek edo erakundeek jaulkitzen dituzten agiriak.

Merezimenduak egiaztatzen dituzten agiri akademikoak gaztelania, euskara, ingelesa edo frantsesa ez den hizkuntza batean idatzita badaude, hizkuntza horietako batera egindako itzulpen soila erantsi beharko da, eta Ikerketa Batzordearen esku utziko da zinpeko itzulpena eskatzea, beharrezkoa izanez gero.

e) Eskatzaileari doktoretza egiten hasteko modua ematen dioten ikasketen espediente akademiko osoa (masterrarena eta graduarena), zer kalifikazio eta noiz lortu diren jasotzen dituena (batez besteko nota espresuki adierazten duena).

Atzerriko ikastegiek ematen dituzten kalifikazioen ziurtagirietan, dagokion ebaluazio sistemaren barruan kalifikaziorik handiena eta txikiena zein izan diren agertuko da, baita gainditzeko gutxieneko kalifikazioa zein den ere.

Kasu horietan, noten baliokidetza ere erantsi behar da, Hezkuntzako eta Lanbide Heziketako Ministerioari eskatua:

http://www.educacionyfp.gob.es/servicios-al-ciudadano/catalogo/gestion-titulos/estudios-universitarios/titulos-extranjeros/equivalencia-notas-medias.html

Agiri akademikoak gaztelania, euskara, ingelesa edo frantsesa ez den hizkuntza batean idatzita badaude, hizkuntza horietako batera egindako zinpeko itzulpena erantsi beharko da.

f) Laguntzaren deialdi honetara aurkezteko erabili den tituluaren fotokopia, edo titulua eskatu izanaren frogagiria.

Behar bezala eta epean aurkeztutako dokumentazioa bakarrik hartuko da kontuan onartutako eskabideak barematzeko.

Balorazio Batzordeak informazio argigarria eskatuko du, beharrezkoa iruditzen bazaio, izangaia aukeratzeko proposamena egiteko.

6.–Izangaien hautaketa.

Eskaeren balorazioa eta laguntza esleitzeko proposamena Balorazio Batzordeak eginen du. Honako hiru kide hauek osatuko dute:

–Begoña Pérez Eransus, Soziologiako eta Gizarte Laneko Saileko unibertsitateko irakasle titularra, edo hark eskuordetutako pertsona, zeina batzordeburu lanetan arituko baita.

–Lucía Martínez Virto, Soziologiako eta Gizarte Laneko Saileko unibertsitateko irakasle titularra, edo hark eskuordetutako pertsona, zeina idazkari lanetan arituko baita.

–Víctor Sánchez Salmerón, hitzarmena arautzen duen batzorde mistoak izendatua, edo hark eskuordetutako pertsona, batzordekide arituko dena.

Batzordeburuak eskatuta eratuko da Balorazio Batzordea, eta horretarako kideei dei eginen die. Halaber, Nafarroako Unibertsitate Publikoko Ikerketa Zerbitzuak behar diren kudeaketak eginen ditu Balorazio Batzordearen jarduna errazteko.

Balorazio Batzordeak izanen du izangaien eskaerak baloratzeko eskumena, I.II eranskinean ezarritako aukeratze irizpide hauen arabera:

a) Izangaiak doktoretza-programan sartzeko aurkeztu duen titulazioaren espediente akademikoaren batezbestekoa (35 puntu gehienez ere).

Laguntza eskatzeko inprimakian laguntza zein titulaziorekin eskatzen den esanen da, eta titulazio horren arabera kalkulatuko da espediente akademikoaren batez besteko nota.

b) Izangaiaren esperientzia laguntzaren arloan (30 puntu gehienez ere).

c) Argitalpenak eta biltzarretako parte-hartzea (25 puntu gehienez ere).

d) Elkarrizketa pertsonalak 10 puntuko balorazioa izanen du gehienez ere, eta aurreko 3 atalen baturan puntuaziorik handiena duten hiru izangaiei eginen zaie bakarrik.

7.–Eskaeren tramitazioa eta ebazpena.

7.1. Eskaerak aurkezteko epea bukatu eta gero, onartutako eskaeren behin-behineko zerrenda onetsiko da Ikerketako errektoreordearen ebazpen baten bidez, baita eskatutako laguntzarako baldintzaren bat ez egiaztatzeagatik edo eskatutako agiriak garaiz eta forman ez aurkezteagatik baztertutakoena ere.

Ebazpen hori eskaerak aurkezteko epea bukatu eta gehienez ere hilabeteko epean argitaratuko da Nafarroako Unibertsitate Publikoaren iragarki-ohol elektronikoan, eta interesdunei 5 egun balioduneko epea emanen zaie, ebazpena argitaratu eta biharamunetik kontatzen hasita, bazterketaren aurkako erreklamazioa aurkezteko, Ikerketa Zerbitzura zuzendua, eta ebazpenean adierazten diren gabeziak zuzentzeko edo dokumentazioa osatzeko. Izangaiak ez baditu epe horretan gabeziak zuzentzen edo dokumentazioa osatzen, deialditik baztertuta geratzen ahalko da.

7.2. Ikerketa Batzordeak aurkeztutako erreklamazioak ebatziko ditu, eta Ikerketako errektoreordeari bidaliko dio tramitera onartutako eta baztertutako eskaeren behin betiko proposamena.

Ikerketako errektoreordearen ebazpen baten bidez, onartutako eta baztertutako eskaeren behin betiko zerrenda onetsiko da. Ebazpena Nafarroako Unibertsitate Publikoaren iragarki-ohol elektronikoan argitaratuko da eta, haren aurka, interesdunek zilegi dute berraztertzeko errekurtsoa aurkeztea errektoreari zuzendua hilabeteko epean, edo administrazioarekiko auzi-errekurtsoa aurkeztea maila bereko Nafarroako auzitegi batean bi hilabeteko epean, ebazpena iragarki-oholean argitaratu eta biharamunetik kontatzen hasita.

7.3. Geroago, Balorazio Batzordeak onartutako eskaerak ebaluatuko ditu 6. oinarrian ezarritako irizpideekin bat, eta izangai bakoitzaren behin-behineko puntuazioak eta laguntzaren behin-behineko adjudikazio proposamena onetsiko ditu. Behin-behineko adjudikazioak dituen Balorazio Batzordearen erabakia Nafarroako Unibertsitate Publikoaren iragarki-ohol elektronikoan argitaratuko da, eta haren kontra interesdunek erreklamazioa aurkezten ahalko dute, batzordeburuari zuzendua, 5 egun balioduneko epean, proposamen hori argitaratu eta biharamunetik kontatzen hasita.

7.4. Erreklamazioak ebatzi ondoren, Balorazio Batzordeak Unibertsitateko Ikerketako errektoreordeari igorriko dio behin betiko esleipen proposamena eta itxaron zerrendan dauden izangaiena, puntuazioaren arabera ordenatua, ebazpen baten bidez onets ditzan. Ikerketako errektoreordearen ebazpena, behin betiko esleipena eta itxaron zerrendan dauden izangaien lehentasun ordena aditzera ematen dituena, Nafarroako Unibertsitate Publikoaren iragarki-ohol elektronikoan argitaratuko dira.

Laguntza emateko behin betiko ebazpenaren aurka, zilegi da aukerako berraztertzeko errekurtsoa jartzea errektoreari zuzendua hilabeteko epean, hura argitaratu eta biharamunetik kontatzen hasita, edo administrazioarekiko auzi errekurtsoa Nafarroako Administrazioarekiko Auzien Epaitegian bi hilabeteko epean, hura argitaratu eta biharamunetik kontatzen hasita.

8.–Doktoretza aurreko kontratuaren helburua eta baldintzak.

8.1. Laguntzaren xedea doktoretza-tesi bat egitea izanen da, Zientziari, Teknologiari eta Berrikuntzari buruzko 2011ko ekainaren 1eko 14/2011 Legeko 21. artikuluan ezarritako doktoretza aurreko kontratuaren modalitatean. Ezin izanen da kontratua sinatu tesia gordailutu edo defendatu duten eskatzaileekin, eta, horrenbestez, deialdi honetatik kanpo uztea edo, hala badagokio, laguntza ukatzea ekarriko du horrek.

8.2. Kontratuen xedea Nafarroan migratzaileen gizarte inklusioaren arloan ikerketa-lanak egitea izanen da, eta, zehazki, doktoretza-tesia egitea deialdiko 1. klausulan zehaztutako helburuarekin (“Deialdiaren xedea” izeneko klausulakoa).

Laguntzaren onuradunak, langilea den aldetik, eta Nafarroako Unibertsitate Publikoak, enplegatzailea den aldetik, idatziz eginen dute doktoretza aurreko kontratua. Kontratuari erantsiko zaio Nafarroako Unibertsitate Publikoko Giza eta Gizarte Zientzietako Doktoretza Programan onartua dela adierazten duen agiria, programaren unitate arduradunak emana, edo doktoretzako edo graduondoko eskolak emana, hala badagokio.

Kontratua lanaldi osokoa izanen da, eta, hasiera batean, urtebeteko iraupena izanen du, urtebeteko aldietarako luzatzeko aukera egonik doktoretza-programako Batzorde Akademikoak aldez aurretik txostena eginda, edo, kasua bada, doktoretzako eskolak, programan irauten duen bitartean. Kontratuaren iraupena 3 urtekoa izanen da gehienez ere, luzapenak barne, edo aurrekontuko dirua bukatzen den arte.

Horretaz gainera, laguntzaren onuradunak aurkeztutako urteko txostenaren aldeko ebaluazioa egin beharko du tesi zuzendariak, eta behar besteko aurrekontua egon behar da.

8.3. Laguntza emateko aldia honako kasu hauetan bukatuko da:

–Laguntza emateko gehieneko epea betetzen denean, luzapen guztiak barne.

–Giza eta Gizarte Zientzietako Doktoretza Programan egoteko aldia bukatzen denean edo onuraduna doktoretza-programan matrikulatua ez badago.

–Doktoregaiak doktoretza-programako Batzorde Akademikoaren aurkako txostena jasotzen badu.

–Doktoretza-tesia defendatu ondoren.

8.4. Laguntzaren urteko diru-zuzkidura 21.722,80 euro-koa izanen da, eta honako hauek hartuko ditu barne:

–1.212,26 euro-ko soldata gordineko 14 lansari urtean.

–Kopuru horiei Gizarte Segurantzako enpresa kuotak kenduko zaizkie, legedi indardunean ezarritako moduan.

–420,00 euro-ko laguntza doktoretzako matrikularako.

9.–Onuradunaren betebeharrak.

9.1. Onuradunak laguntza onartzeak berekin dakar deialdi honetako oinarriak bete behar izatea, bai Nafarroako Gobernuaren Migrazio Politiketako eta Justiziako Departamentuak laguntza honetarako hitzarmenean bai Nafarroako Unibertsitate Publikoak laguntzaren jarraipen zientifikorako ezartzen dituztenak.

9.2. Laguntzaren onuradunak honako betebehar hauek izanen ditu:

a) Laguntzaren helburuko ikerketa-lana egiteko xedez, laguntza emateko ebazpenean edo kontratuan adierazten den egunean bertan sartzea Nafarroako Unibertsitate Publikoan, eta, orduan sartzen ez bada, laguntzari uko egiten diola ulertuko da. Halaber, laguntzari uko egiten zaiola ulertuko da Giza Baliabideen Zerbitzutik kontratua sinatzeko jakinarazpena jasotzen den egunaren hurrengo 5 egun baliodunetan sinatzen ez bada.

b) Atxiki zaion ikerketa-taldean bere lana aprobetxamenduz egitea, baita beste hainbat erakundetan ere, baldin eta beste zentro edo enpresa batzuetan ikerketa-egonaldiak egin behar direla erabakitzen bada.

c) Laguntzarekin lotutako lana garatzean lortu dituzten informazio zientifikoak edo teknikoak ez zabaltzea, tesiaren zuzendariaren baimenik ez badute. Erabateko sekretua gordetzea bere jarduerak egitearen ondorioz eskuratu lezakeen informazio konfidentzialari buruz, bai Nafarroako Unibertsitate Publikoan eskuratu lezakeenari buruz, baita ikerketa-egonaldiak egiten dituen zentro edo enpresetan ere, eta ez kontatzea, jakinaraztea eta/edo zabaltzea hirugarren pertsonei, ez osorik ezta partez ere.

d) Onuradunak bere ikerketekin lotutako edozein komunikazio, argitalpen edo zabalkunde-lan egin nahi badu, aldez aurretik tesiaren zuzendariaren berariazko baimen idatzia eduki beharko du. Tesiaren zuzendariak baimen horren oniritzia eskatuko dio Ikerketako errektoreordeari. Edonola delarik ere, baimena emateko edo ukatzeko, Nafarroako Unibertsitate Publikoaren eta Nafarroako Gobernuaren Migrazio Politiketako eta Justiziako Departamentuaren arteko hitzarmenak esaten duena hartuko da aintzat.

e) Tesiaren zuzendariari, Nafarroako Unibertsitate Publikoko Ikerketa Zerbitzuari eta Nafarroako Gobernuaren Migrazio Politiketako eta Justiziako Departamentuarekin sinatutako hitzarmena kudeatzen duen batzorde mistoari bidaltzea egindako jarduerari buruz eskatzen zaizkion txostenak, tesiaren zuzendariaren oniritziarekin eta konfidentzialtasun klausulak errespetatuz.

f) Nafarroako Unibertsitate Publikoaren Giza eta Gizarte Zientzietako Doktoretza Programako Batzorde Akademikoaren urteroko nahitaezko jarraipen proba berrienaren aldeko txostena edukitzea, kontratua urtero berritzeko. Onuradunak urteroko proba nahitaez egin beharrik ez badu, egindako lanari buruzko oroitidazki bat aurkeztu beharko du tesiaren zuzendariak egindako txostenekin batera.

g) Laguntzak iraun bitartean egiten diren argitalpen guztietan eta ikerketatik eratorritako beste emaitza guztietan agerraraztea Nafarroako Gobernuaren Migrazio Politiketako eta Justiziako Departamentuak emandako finantzaketa eta laguntza honen oinarrian dagoen hitzarmena.

h) Tesi zuzendariari aurkeztea, laguntza bukatzen denean, egindako lanaren azken txostena, baita lan bizitzaren egiaztagiri bat ere.

i) Doktoretza-tesia defendatzea eta gainditzea 4 urteko epean gehienez ere doktoretza aurreko kontratuaren hasiera egunetik kontatzen hasita. Ikerketako errektoreordeak betebehar hori betetzeko epea luzatuko du, interesdunak aurretiaz eskaera arrazoitua aurkezten badu, tesiaren zuzendariak ontzat emanda eta Doktoretza Programako Batzorde Akademikoak aldeko txostena emanda.

j) Tesiaren zuzendariari eta Nafarroako Unibertsitate Publikoaren Ikerketa Zerbitzuari jakinaraztea laguntzaren esparruan lortzen den edozein emaitzaren berri, baldin eta emaitza hori jabetza intelektualaren edo industrialaren edozein babes-formularekin babestua izateko modukoa bada, edo/eta inolako aplikazio industrial edo komertzial baldin badu.

k) Nafarroako Unibertsitate Publikoari uztea eta esleitzea laguntza honen esparruan sortu diren emaitza guztien gaineko jabetza intelektualari buruzko eskubide guztiak, Nafarroako Unibertsitate Publikoak Nafarroako Gobernuaren Migrazio Politiketako eta Justiziako Departamentuarekin sinatutako hitzarmenean hartutako jabetza intelektualaren gaineko konpromisoak bete ditzan.

9.3. Deialdi honetan aipatzen diren betebeharrak ez betetzeak emandako laguntza baliogabetzea ekarriko du, eta bidegabeki jasotako diru-kopuruak itzuli behar izatea, beharrezkoa bada, hala agintzen baitu dirulaguntzak emateko, kudeatzeko eta kontrolatzeko araubide orokorra arautzen duen 2005eko azaroaren 9ko 11/2005 Foru Legeak.

9.4. Laguntzari uko egiteko, idazki bat bidali behar dio onuradunak Ikerketako errektoreordeari, tesiaren zuzendariak sinatua, eta, bertan, horretarako arrazoiak eman. Laguntzari uko egiteko eskaera ondorio-eguna baino 7 egun baliodun lehenago aurkeztu behar da beranduenez.

Bajarik egonez gero, laguntza emateko behin betiko ebazpeneko itxaron zerrendan dauden izangaien ordena jarraituz ordezkatzen ahalko dira, baldin eta Nafarroako Gobernuaren Migrazio Politiketako eta Justiziako Departamentuak aldez aurretik ados dagoela agertzen badu eta, orobat, tesiaren zuzendariak oniritzia ematen badu, uste duelako laguntzaren xedea bermatua geratuko dela laguntza bukatzeko geratzen den denboran.

9.5. Deialdiko laguntzaren onuradunak bete beharreko zereginak Nafarroako Unibertsitate Publikoaren instalazioetan eginen dira, eta, hala ezartzen bada, ikerketa-egonaldiak egiteko proposatzen diren beste zentro eta enpresetan, Nafarroako Gobernuaren Migrazio Politiketako eta Justiziako Departamentua barne. Egonaldi horietan, onuradunak zentro edo enpresa hartzaile bakoitzeko araudia eta berariaz ezartzen diren arau espezifiko guztiak bete beharko ditu.

10.–Onura sozialak.

Sinatutako kontratuari dagozkion lan arloko eta arlo sozialeko onurak edukiko ditu laguntzaren onuradunak.

11.–Irakaslanetako lankidetza.

Laguntza honen onuradunak zilegi du baimena eskatzea Unibertsitateko sail batean prestakuntzarako xedez irakaskuntza-lanetan laguntzeko, baldin eta laguntzaren zuzendaria eta inplikatutako saileko zuzendaria ados badaude. Urtean gehienez ere 60 ordu har ditzake lankidetza horrek, eta gehienez ere 180 ordu 3 urteko kontratuan.

2018ko maiatzaren 30eko Gobernu Kontseiluak onetsitako prozeduraren arabera eskatuko da baimena, eta behar den inprimaki normalizatua aurkeztuko da Laguntza Administratiborako Unitatean, aipatutako prozeduran ezarritakoaren arabera.

12.–Laguntza etetea.

Laguntza honen onuradunak eskubidea edukiko du Gizarte Segurantzaren araubideko prestazioak jasotzeko, deialdian azaltzen den moduan, Gizarte Segurantzari buruzko Legearen Testu Bateratua onesten duen 1994ko ekainaren 20ko 1/1994 Legegintzako Errege Dekretuan ezarritakoarekin bat, haien sorburu diren gorabeherek irauten duten artean. Baimenei dagokienez, Langileen Estatutuak eta aplikatzekoak diren lege indardunek ezarritakoari jarraituko zaio.

Aldi baterako desgaitasun, haurdunaldiko arrisku, amatasun, adopzio edo harrera, edoskitzaroko arrisku eta aitatasun egoerek eten eginen dute kontratuen iraupenaren zenbaketa, Zientziari, Teknologiari eta Berrikuntzari buruzko 2011ko ekainaren 1eko 14/2011 Legearekin bat.

13.–Jabetza intelektuala.

Nafarroako Unibertsitate Publikoarenak izanen dira laguntza honen esparruan sortutako ikerketa-emaitzei buruzko jabetza intelektualeko eskubide guztiak, eta bera bakarrik izanen da eskubide horien titularra.

Laguntza honen onuradunak Nafarroako Unibertsitate Publikoari utzi eta esleituko dizkio laguntza honen esparruan sortu diren emaitza guztien gaineko jabetza intelektualari buruzko eskubide guztiak, Nafarroako Unibertsitate Publikoak Nafarroako Gobernuaren Migrazio Politiketako eta Justiziako Departamentuarekin sinatutako hitzarmenean hartutako jabetza intelektualaren gaineko konpromisoak bete ditzan.

Nolanahi ere, laguntzaren esparruan sortutako emaitzen gaineko eskubideak ustiatu edo uzteagatik lortzen diren mozkinetan parte hartzeko eskubidea aitortuko dio Nafarroako

Unibertsitate Publikoak onuradunari, bidezkoa bada, Nafarroako Unibertsitate Publikoaren Estatutuen 70. artikuluan ezarritako baldintzen arabera.

Horretaz gainera, laguntza honen onuradunaren eskubide moralak errespetatuko dira, bereziki bere egile eta/edo asmatzaile izaeraren aitorpenari dagokionez, legedi indardunarekin bat etorriz.

14.–Datuen babesa.

Parte-hartzaileek deialdi honetan ematen dituzten datu pertsonalak arau hauen arabera tratatuko dira: Europako Parlamentuaren eta Kontseiluaren 2016/679 Erregelamendua, 2016ko apirilaren 27koa, datu pertsonalen tratamenduaren gaietan pertsona fisikoak babesteari buruzkoa; eta 3/2018 Lege Organikoa, 2018ko abenduaren 5ekoa, Datu Pertsonalak Babesteari eta eskubide digitalak bermatzeari buruzkoa.

Tratamendu honen xedea ikerketaren kudeaketa administratiboa da, eta bere oinarri juridikoa, botere publikoa baliatzea eta interes publikoa betetzea, betiere Europako Parlamentuaren eta Kontseiluaren 2016/679 Erregelamenduko 6.1.e) artikuluaren arabera. Zehazki, xedea ikertzaile gazteak prestatzea da, urtero ikertzaileak prestatzeko laguntzen deialdia eginez prestakuntzan dauden ikertzaileen lana sustatzeko.

Tratamenduaren arduraduna Nafarroako Unibertsitate Publikoa da, eta interesdunek eskubidea dute datuak eskuratzeko, zuzentzeko, ezabatzeko, bai eta beste eskubide batzuk ere, delegado.protecciondatos@unavarra.es helbideaz baliatuz, Datu Pertsonalak Babesteari eta Eskubide Digitalak Bermatzeari buruzko 2018ko abenduaren 5eko 3/2018 Lege Organikoko 11. artikulutik 18. artikulura bitartean ezarritakoaren arabera.

NUPek identifikazio- eta harreman-datuak, sinadura, merezimenduen zerrenda eta titulazioari, kalifikazio akademikoari, curriculumari eta ikerketa-jarduerari buruzko datuak tratatuko ditu. Era berean, zer laguntza esleitu diren eta horien onuradunak nor diren NUPen webgunean argitaratuko da, aurreikuspenen arabera. Azkenik, bankuko datuak ere tratatuko dira onuradunei ordainketak egiteko.

15.–Argitalpena.

Deialdi honen oinarriak Nafarroako Aldizkari Ofizialean eta Nafarroako Unibertsitate Publikoaren iragarki-ohol elektronikoan argitaratuko dira.

Deialdi hau aplikatzearren emandako gainerako egintzak Nafarroako Unibertsitate Publikoaren iragarki-ohol elektronikoan argitaratuko dira.

Iragarki-ohol elektronikoan argitaratzea da Unibertsitateak onarturiko publizitate tresna bakarra. Hala ere, interesdunei posta elektronikoz jakinarazten ahalko zaie, modu osagarrian eta ez-ofizialean.

16.–Errekurtsoak.

Deialdi hau onesten duen ebazpenaren aurka eta deialdiko oinarrien aurka, zilegi da berraztertzeko errekurtsoa jartzea errektoreari zuzendua hilabeteko epean, hura Nafarroako Aldizkari Ofizialean argitaratu eta biharamunetik kontatzen hasita, edo administrazioarekiko auzi errekurtsoa Nafarroako Administrazioarekiko Auzietako Epaitegian bi hilabeteko epean, hura argitaratu eta biharamunetik kontatzen hasita.

I.II. ERANSKINA

Doktoretza aurreko laguntzaren baremoa

1.–Espediente akademikoa, gehienez ere 35 puntu.

Doktoretza-programan sartzeko titulazioaren espediente akademikoaren batezbesteko nota baloratuko da. Ikasketa espedientearen batez besteko nota 0tik 10era bitarteko eskalan kalkulatuko da, kredituen sistema europarra eta lurralde nazional osoan ofizialak eta baliodunak diren unibertsitate titulazioetako kalifikazio sistema arautzen duen 2003ko irailaren 5eko 1125/2003 Errege Dekretuaren 5. artikuluak ezartzen duenaren arabera.

1044/2003 Errege Dekretua ere aplikatuko da, 2003ko abuztuaren 1ekoa, Unibertsitateek tituluaren Europako gehigarria emateko prozedura ezartzen duena.

Baliokideturiko irakasgaiei edo kredituei “Gainditua” kalifikazioa emanen zaie, egokitutako irakasgai edo kredituei jatorrizko kalifikazioa emanen zaie, eta, kalifikaziorik gabeko kredituak aitortuta edukiz gero, hori ez da kontuan hartuko batez besteko nota kalkulatzean.

Espedientean kalifikazio kualitatiboa baizik jaso ez bada, baliokidetasun hau aplikatuko zaio:

–Ohorezko matrikula: 10.

–Bikain: 9,25.

–Oso ongi: 7,75.

–Nahikoa: 5,75.

Aurreko batezbestekoa kalkulatu eta gero, espediente guztiak normalizatuko dira, eta 35 puntu emanen zaizkio espediente onenari, eta gainerakoak normalizazio faktore berarekin biderkatuko dira.

Laguntza eskatzeko inprimakian laguntza zein titulaziorekin eskatzen den esanen da, eta titulazio horren arabera kalkulatuko da espediente akademikoaren batez besteko nota.

2.–Lan esperientzia, 30 puntu gehienez ere.

Izangaiaren esperientzia espezifikoa baloratuko da, nolako esperientzia duen laguntzaren profilean adierazitako arloekin zerikusia duten lan teknikoak eta ikerketakoak egiten. Hori egiaztatzeko, enpresa, ikerketa-zentro edo unibertsitateek emandako lan kontratuak, laguntzak edo bekak aurkeztu behar dira.

0,5 puntu emanen dira arduraldi osoz ikerketako kontratu edo beka batean egin den hilabete bakoitzeko, 20 puntu gehienez ere.

0,5 puntu emanen dira arduraldi osoz deialdiaren jakintza-arloarekin loturiko lan kontratu batean egin den hilabete bakoitzeko, 10 puntu gehienez ere.

Izangai bakoitzaren emaitzak normalizatuko dira, eta 30 puntu emanen zaie balorazio handiena duten izangaiei.

3.–Argitalpenak eta biltzarretako parte-hartzea, 25 puntu gehienez ere.

Laguntzaren xede diren gaiarekin lotuta aldizkarietan egindako argitalpenak eta biltzarretan izandako parte-hartzea baloratuko dira.

Argitalpenak honela baloratuko dira, kontuan hartuta zein motatako argitalpenak diren:

–Indexatutako aldizkarietan argitaratutako edo onartutako artikulua, 5 puntu artikulu bakoitzeko.

–Beste aldizkari batzuetako artikuluak, 4 puntu artikulu bakoitzeko.

–Liburuetako kapituluak, 3 puntu.

–Liburu osoak, 4 puntu.

–Beste argitalpen batzuk, 2 puntu.

Biltzarretako parte-hartzea honela baloratuko da, kontuan hartuta zein motatako ekarpena egin den:

–Biltzarretako txosten gonbidatuak, 3 puntu.

–Biltzarretako komunikazioak edo posterrak, 2 puntu.

–Biltzarretara joatea, 1 puntu.

Azkenik puntuazioak normaltzen dira, gehien baloratzen diren izangaiei 25 puntu emanez.

4.–Elkarrizketa pertsonala, 10 puntu gehienez ere.

Elkarrizketa pertsonala laguntzaren edukiarekin lotua egonen da, eta Balorazio Batzordeak eginen du. Balorazio Batzordeko kide bakoitzak 0 eta 10 puntu artean emanen dio izangai bakoitzari, zenbateraino datorren bat eskatzen den profilarekin. Izangai bakoitzaren atal honetako azken puntuazioa Balorazio Batzordeko hiru kideen balorazioen batezbesteko aritmetikoa izanen da. Baloratu beharreko gainerako atalen batuketa osoan puntuaziorik handiena duten hiru hautagaiei eginen zaie elkarrizketa, ez beste inori.

Merezimendu bakoitza behin bakarrik puntuatuko da, eta ezin izanen da merezimendu bera bi ataletan aurkeztu.

AURKEZTU BEHARREKO DOKUMENTAZIOA

I.I. Eranskina.–Merezimenduen zerrendaren inprimakia.

Deskargatu I.I. eranskina (DOC).

Iragarkiaren kodea: F2209710