1. NAFARROAKO FORU KOMUNITATEA
1.1. XEDAPEN OROKORRAK
1.1.1. Foru legeak eta legegintzako foru dekretuak
4/2021 FORU LEGEA, apirilaren 22koa, uztailaren 26ko 1/2017 Legegintzako Foru Dekretuaren bidez onetsitako Lurraldearen Antolamenduari eta Hirigintzari buruzko Foru Legearen testu bateginaren 192. artikulua aldatzekoa.
NAFARROAKO FORU KOMUNITATEKO LEHENDAKARIA NAIZEN HONEK.
Aditzera ematen dut Nafarroako Parlamentuak onetsi duela honako: Foru Legea, uztailaren 26ko 1/2017 Legegintzako Foru Dekretuaren bidez onetsitako Lurraldearen Antolamenduari eta Hirigintzari buruzko Foru Legearen testu bateginaren 192. artikulua aldatzekoa.
HITZAURREA
Urriaren 5eko 15/2018 Errege Lege-dekretua onesteak, energia-trantsiziorako eta kontsumitzaileen babeserako neurri urgenteei buruzkoak, ekarri du autokontsumoa suspertzen hastea, batik bat amaierako kontsumitzaile diren pertsonen artean.
Energia-trantsizioa egitearen aldeko apustua ezinbestekoa eta urgentea da. Premisa horretatik abiatuta, eta elektrizitate-merkatuko prezio-igoeraren egungo testuinguruan, elektrizitate-autokontsumo berriztagarria ezinbesteko elementua da kontsumitzaileak energia garbiagoa eta merkeagoa eskuratzea lortzeko.
Aipatu lege-dekretua onetsi arte, autokontsumo-jarduna ozta-ozta zegoen zabaltzen hasia, oztopo jakin batzuk bazeuden-eta, jarduera hori zailtzen, pizgarrigabetzen edo ekonomikoki bideraezin egiten zutenak. Oztopo horietako bat gisa identifikatu da udal obra-lizentzia bat eskuratzeko administrazio-baimenaren izapidetzea nahitaezkotzat galdatzea, horrek izapidea astundu egin baitu epe oso luzeekin, autokontsumorako instalazio fotovoltaikoen ezarpen egokia behaztopatzen dutenak.
Autokontsumo berriztagarriaren ezarpenak energia-faktura berehalakoan jaisteko modua emanen die autokontsumo hori instalatzen duten kontsumitzailea, eta, gainera, handizkako merkatutik energia-eskaria murriztuko da, halatan ekarpena eginez handizkako elektrizitate-merkatuan prezioak beren horretan eusteari bai eta jaisteari ere, ingurumen-egoera hobetzeari eta hidrokarburo-inportazioa murrizteari, halatan pagamendu-balantzari mesede eginez.
Autonomi erkidegoek onetsitako araudi ezberdinek autokontsumorakoak diren honelako energia-ekoizpeneko instalazioetarako obra-lizentzia lortu behar hori bertan behera utzi dute pixkanaka, eta izapide horren ordez behartzen dute dela aurretiazko jakinarazpena egitera, dela erantzukizunpeko jakinarazpena egitera behin instalazioa paratu eta gero. Legegintzazko erreformen testuinguru horren argipean ikus daitezke Balear Uharteetako 12/2017 Legea, abenduaren 29koa, Hirigintzakoa, Extremadurako 11/2018 Legea, abenduaren 21ekoa, Lurralde- eta Hirigintza-antolamendu jasangarriari buruzkoa, azaroaren 26ko 16/2019 Lege-dekretua, Larrialdi klimatikorako neurri urgenteak hartu eta energia berriztagarriei bultzada ematekoa, martxoaren 9ko 2/2020 Lege-dekretua, Andaluziako ekoizte-jarduna sustatzeko araubidea hobetu eta sinpletzekoa, edo berriagoa den Aragoiko 1/2021 legea, otsailaren 11koa, sinplifikazio administratibokoa.
Nafarroaren kasuan, interpretazio juridiko desberdinak izan dira Lurraldearen Antolamendu eta Hirigintzari buruzko Foru Legearen testu bateginaren 192. artikuluak arautzen duenaz; izan ere, 1. apartatuko e) letrak “obra txikiak” aipatzen ditu, eta udal ordenantzak ziren kontzeptu hori zehazten zutenak, bai eta azaltzen zutenak ere ea obra horietan sartzen ote zen autokontsumorako eguzki-plaka termiko edo fotovoltaikoen instalazioa. Horregatik gertatzen da ezinbesteko, hain zuzen, foru lege honen bidez egiten den aldaketa, xedetzat duena argi uztea eguzki-energiaren autokontsumorako tankera honetako instalazioek ez dutela beharko aurretiaz udal obra-lizentzia lortzea, baizik eta erantzukizunpeko adierazpena edo aurretiazko jakinarazpena egitera behartzen dutela. Zenbait salbuespen ezartzen dira; halatan, obra-lizentzia hori beharrezkoa izanen da instalazioak kultur intereseko ondasun edo ondasun katalogatu gisa deklaraturiko eraikinetan egitekoak izan, eraikinaren zimenduetan edo egituran eragiten dutenean eta ingurumen-inpaktuaren ebaluazioa behar dutenean, aplikatzekoa den ingurumen-araudiaren arabera.
Artikulu bakarra.–Aldatu egiten da Lurraldearen Antolamendu eta Hirigintzari buruzko Foru Legearen testu bategineko 192. artikulua, horri g) eta h) letra berriak gehiturik 1. apartatuan, honako testu hau dutenak:
“g) Eguzki-energia aprobetxatzeko autokontsumorako instalazioak, eraikin edo egituren nahiz aparkaleku-pergolen gainean paratuak, potentzia-mugarik gabe. Honako instalazio hauek ez dira araubide horretara lotuta egonen:
–Kultur intereseko edo katalogaturiko ondasun gisa deklaraturiko eraikinetan eginak direnak; halakoetan, foru lege honen 62.7.c) artikuluak jasotakoa izanen da aplikatzekoa.
–Eraikinaren zimenduei edo egiturari eragiten dietenak.
–Ingurumen-inpaktuaren ebaluazioa behar dutenak, aplikatzekoa den ingurumen-araubidearen arabera”.
“h) Eraikinen barruan dauden ibilgailu elektrikoetarako errekarga-puntuak, non eta ez duten eraginik kultur interesekotzat deklaratutako ondasunetan edo beste edozein babes-araubideren pean dauden ondasunetan”.
Azken xedapen bakarra.–Indarra hartzea.
Foru lege honek Nafarroako Aldizkari Ofizialean argitaratu eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta “Estatuko Aldizkari Ofizialera” igor dadila agintzen dut eta herritar eta agintariei bete eta betearaz dezaten manatzen diet.
Iruñean, 2021eko apirilaren 23an.–Nafarroako Foru Komunitateko Lehendakaria, María Chivite Navascués.
Iragarkiaren kodea: F2106560
