Iragarkia

54. ALDIZKARIA - 2021eko martxoaren 9a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

33/2021 FORU AGINDUA, otsailaren 5ekoa, Eskubide Sozialetako kontseilariak emana, zeinaren bidez onesten baita adingabeen babesaren esparruan aritzen diren irabazi-asmorik gabeko entitateentzako dirulaguntzen deialdia eta 2021. urterako gastua baimentzen baita. DDBN identifikazioa: 548543.

Gizarte Zerbitzuei buruzko abenduaren 14ko 15/2006 Foru Legeak aurreikusten dituen jarduketa-programen artean haurrari eta familiari lehen laguntza ematea agertzen da. Haurrentzako eta nerabeentzako sustapenari, laguntzari eta babesari buruzko abenduaren 5eko 15/2005 Foru Legeak, bestalde, ezartzen du Nafarroako Foru Komunitateko Administrazioaren eginkizunen artean dagoela adingabeak sustatzea eta babestea.

Ekainaren 5eko 7/2009 Foru Legeak, Nafarroako Foru Komunitateko zergadunek gizarte intereseko beste xede batzuetarako bideratzen duten tributuen %0,7 arautzen duenak, jasotzen du funts horien bidez lagundu beharreko taldeen artean dagoela babesik gabe dauden adingabeena.

Bestalde, apirilaren 4ko 17/2019 Foru Legeak, emakumeen eta gizonen arteko berdintasunari buruzkoak, xedatzen duenaren arabera, dirulaguntzen oinarri arautzaileetan berdintasuneko klausulak txertatuko dira balorazioan, baita sexu edo genero ziozko lan-jardunbide baztertzaileak izateagatik edo onartzeagatik zehatu edo zigortu dituzten erakunde eskatzaileei laguntza publikoa ematea eragozteko klausulak ere.

Pertsonen Autonomiarako eta Garapenerako Nafarroako Agentziaren estatutuak onesten dituen azaroaren 6ko 301/2019 Foru Dekretuak xedatzen du Familiaren eta Adingabeen Zuzendariordetzari dagokiola Haurrentzako eta Nerabeentzako Sustapenari, Laguntzari eta Babesari buruzko abenduaren 5eko 15/2005 Foru Legea bete eta gara dadila sustatzea.

Azkenik, Eskubide Sozialetako Departamentuaren egitura organikoa ezartzen duen urriaren 30eko 268/2019 Foru Dekretuak Eskubide Sozialetako kontseilariari esleitzen dio aipatu departamentuaren aurrekontuen kargura emanen diren dirulaguntzen deialdia egiteko eskumena.

Espedientean jaso dira Familiaren eta Adingabeen Zuzendariordetzaren proposamen txostena, txosten juridikoa, Nafarroako Gizarte Ongizatearen Kontseiluaren eta Nafarroako Adingabearen Kontseiluaren ziurtapena eta kontu-hartzaile delegatuaren adostasuna.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen bidez, Dirulaguntzei buruzko azaroaren 9ko 11/2005 Foru Legearen bidez eta Eskubide Sozialetako Departamentuaren egitura organikoa ezartzen duen urriaren 30eko 268/2019 Foru Dekretuaren bidez esleitu dizkidaten eskudantziak erabiliz,

AGINTZEN DUT:

1. Onestea Nafarroako Foru Komunitatean adingabeen babesaren esparruan aritzen diren entitateentzako dirulaguntzen 2021eko deialdia, foru agindu honen eranskinean azaltzen diren oinarrien arabera.

2. 542.728 euroko gastua baimentzea, 2021eko gastu-aurrekontuko 920008 93300 4819 231702 «PFEZren %0,7 Funtsa. Adingabeen arlook dirulaguntzen deialdia» aurrekontu-partidaren kontura.

3. Deialdi honen eta bere oinarrien aurka gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

4. Foru agindu hau, deialdiaren oinarriak eta eranskinak Nafarroako Aldizkari Ofizialean argitaratzea.

5. Foru agindu hau igortzea Eskubide Sozialetako Departamentuko Idazkaritza Tekniko Nagusiko Ekonomia eta Aurrekontuak Kudeatzeko Atalera, Pertsonen Autonomiarako eta Garapenerako Nafarroako Agentziako Familiaren eta Adingabeen Zuzendariordetzara eta Dirulaguntzen Datu Base Nazionalera, behar diren ondorioak izan ditzan.

Iruñean, 2021eko otsailaren 5ean.–Eskubide Sozialetako kontseilaria, M.ª Carmen Maeztu Villafranca.

1. ERANSKINA

Deialdiaren oinarri arautzaileak

1. Xedea eta helburua.

Deialdi honen xedea da babesgabetasun arriskuan dauden familia, haur eta adingabeen babesaren esparruan –familia-harreran eta adopzioan diharduten erakundeak barne– aritzen diren Nafarroako Foru Komunitateko irabazi-asmorik gabeko entitateen funtzionamendurako eta jardueren sustapenerako dirulaguntzak emateko araubidea ezartzea 2021. urterako.

Aipatu dirulaguntza eman, eta babesgabetasun arriskuan dauden familia, haur eta nerabeen arloan diharduten elkarteen nahiz erakundeen prebentzio-jarduerak bultzatu eta sustatu nahi dira, sentsibilizazioa handitzeko, haurren eta nerabeen ongizatea eta tratu ona aldezteko eta arriskuko egoerak murrizteko.

Deialdiaren xedea da, halaber, harrera-familien eta adoptatzaileen elkarteak bultzatu eta sustatzea, familia-harreraren eta adopzioaren gaineko sentsibilizazioa eta ezagutza areagotzeko, prebentzio-neurri izaten ahal diren aldetik.

2. Ekintza diruz lagungarriak.

1. Pertsonen Autonomiarako eta Garapenerako Nafarroako Agentziak (PAGNA) dirulaguntzak emanen ditu ondoren aipatzen diren ekintzetarako (ekintzok gauzatzean genero ikuspegia hartuko da aintzat):

a) Familia-harrerari loturiko sentsibilizazioa, sustapena eta ezagutarazpena.

b) Adopzioari loturiko sentsibilizazioa, sustapena eta ezagutarazpena.

c) Gizarte-egoera ahulean dauden familia, haur eta nerabeei zuzendutako esku-hartze sozioedukatiboa, edo babesgabetasun-arriskua prebenitzera bideratutako programak edo jarduerak, eta, zehazki, haur-nerabeen ongizatea bermatzera bideratutako programak.

2. Haurren eta Nerabeen Sustapenari, Laguntzari eta Babesari buruzko abenduaren 5eko 15/2005 Foru Legearen arabera babesik gabeko egoeran ez dauden haur edo nerabeentzako programak edo ekintzak ez dira diruz lagunduko, ezta adingabeen babesgabetasun egoerei aurrea hartzea helburu ez dutenak ere.

3. Era berean ez dira diruz lagunduko Pertsonen Autonomiarako eta Garapenerako Nafarroako Agentziak deialdi hau argitaratzen den unean garatzen dituen ekintzak, ez eta, prestazio bermatuak izateagatik, Gizarte Zerbitzuen Zorroaren arabera nahitaez eskaini behar dituenak ere.

4. Era berean, ez dira diruz laguntzen ahalko ekintza edo xede berdintsuetarako PAGNArekin hitzarmenen bat duten erakundeak, ezta beste deialdi publikoen bidez berariaz finantzatzen diren erakundeak edo administrazio publikoen eskumenekoak ere.

3. Dirulaguntzaren zenbatekoa eta norgehiagoka.

1. Entitateek deialdi honetako bigarren oinarriko lehen atalean adierazitako ekintzen barnean sartutako programa bakar baterako dirulaguntza jasotzen ahalko dute.

2. Hona hemen programa eta erakunde bakoitzerako aurreikusitako zenbatekoak guztira:

a) Familia-harrerari loturiko sentsibilizazioa, sustapena eta ezagutarazpena. 50.000 euro.

b) Adopzioari loturiko sentsibilizazioa, sustapena eta ezagutarazpena. 50.000 euro.

3. Dirulaguntza gehienez urteko 25.000 euroa izanen da, erakunde eta programa bakoitzeko.

4. Nolanahi ere, dirulaguntza emateko ezinbestekoa izanen da aurrekontuan horretarako krediturik izatea.

5. Dirulaguntzak emateko prozedura norgehiagokako araubideari jarraikiz tramitatuko da.

6. Programetako batean deialdia hutsik geratzen bada edo aurreikusitako aurrekontua agortzen ez bada, kreditu-gerakina aurrekontu nahikoa ez duten programen aurrekontua handitzeko erabiltzen ahalko da, programa bakoitzean aurreikusitako zenbatekoarekiko modu proportzionalean.

4. Gastu diruz lagungarriak.

1. Dirulaguntza jaso dezaketen gastuak dirulaguntzaren xedeko jarduera garatzeko beharrezkoak direnak izanen dira. Zehazki, dirulaguntza jaso dezakete egin beharreko ekintzei lotutako gastuek eta ekintzak garatzen dituzten langileei lotutakoek.

2. Egin beharreko ekintzetan sartzen dira lokalen alokairua edo erabilera, haiek entitatearenak izan edo ez.

3. Langileen gastuaren atalean, entitateak ekintza gauzatzeko propio kontratatzen dituen langileen gastuak sartzen ahal dira, edo entitateko langileek beraiek ekintzan duten dedikazioaren araberako portzentaje bat; kasu horretan, zehatz-mehatz identifikatu beharko dira langile horiek.

4. Entitatearen lokalei edo langileei buruzko justifikazioak aurkeztuz gero, entitateak berariaz ziurtatu beharko du zer portzentajeko dedikazioa izan den dirulaguntzaren xedeko ekintzetan.

5. Lokalak edo izendatutako langileak Nafarroako Foru Komunitateko Administrazioak diruz laguntzen edo kontratatzen duen baliabide bati atxikita daudenean, ezin izanen da dirulaguntzarik eman gastu horretarako.

6. Dirulaguntza jaso dezaketen gastutzat joko dira hornitzaileei pagatzeko bideen ondoriozko interesak eta komisioak, dirulaguntzaren xedeko jarduerari lotuta badaude.

7. Gastu diruz lagungarrien eskuratze-kostua ez da inoiz izanen merkatuko balioa baino handiagoa.

8. Diruz lagunduko diren gastuak 2021eko abenduaren 31tik entregatutako ondasunenak edo emandako zerbitzuenak izanen dira, eta 2022ko otsailaren 28rako ordainduak egon beharko dira.

5. Entitate eskatzaileek bete beharreko baldintzak.

1. Deialdi honetan aipatzen diren dirulaguntzak jaso ahal izateko, entitateek baldintza hauek bete beharko dituzte:

a) Legez eratutako pertsona juridikoa izatea eta bidezkoak diren erregistroetan inskribatuta egotea.

b) Dirulaguntza jasoko duen jarduera Nafarroako Foru Komunitatean egitea.

c) Irabazi-asmorik ez edukitzea.

d) Erakundearen xede izatea, bere estatutuetan xedatuaren arabera, sentsibilizatzeko, tratu ona sustatzeko eta babesgabetasuna prebenitzeko jarduerak gauzatzea, gizarte-egoera ahulean edo babesgabetasun-arriskuan dauden familia, haur eta nerabeei zuzenduta.

e) Zerga arloko eta Gizarte Segurantzako betebeharrak egunean izatea, baita Nafarroako Foru Komunitateko Administrazioari edo haren erakunde autonomoei zorrak ordaintzeko betebeharrak ere.

f) Dirulaguntzen onuraduna izateko Dirulaguntzei buruzko Foru Legearen 13. artikuluko 2. eta 3. apartatuetan ezarritako gainerako debeku-egoeretan ez egotea.

g) Administrazio ebazpen irmoz edo kondena-epai irmoz zehapena edo zigorra jaso ez izana sexu- edo genero-diskriminaziotzat hartutako lan praktikak egiteagatik edo onartzeagatik.

2. Eskaerak aurkezteko epea bukatzen den egunean bete beharko dira baldintza guztiak, eta, orobat, diruz laguntzen den jarduerak irauten duen bitartean.

6. Programa gauzatzeko epea.

Laguntzaren xede diren programak gauzatzeko epea urtebetekoa da (2021. urtean egin behar dira). Edozein egunetan hasten dela ere, diruz lagunduko diren jarduerak 2022ko urtarrilaren 1erako bukatu behar dira

7. Eskaerak aurkezteko epea eta lekua.

Eskaerak aurkezteko epea 1 hilabete baliodunekoa izanen da, deialdia Nafarroako Aldizkari Ofizialean argitaratu eta hurrengo egunetik hasita.

Eskaerak lehentasunez Nafarroako Gobernuaren Erregistro Orokor Elektronikoaren bitartez aurkeztuko dira, Familiaren eta Adingabeen Zuzendariordetzari zuzenduak. Eskubide Sozialetako Departamentuaren Erregistroetan ere aurkezten ahal dira eskaerak, edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16. artikuluan aipatzen diren erregistroetako edozeinetan. Gainera, eskaerak Nafarroako Gobernuarenak ez diren beste erregistro ofizial batzuetan aurkezten badira, aurkezpen horren berri eman beharko diote Familiaren eta Adingabeen Zuzendariordetzari, mezu elektronikoa bidaliz marta.sanz.muruzabal@navarra.es helbidera.

Posta bulegoen bitartez aurkezten diren eskaeren kasuan, Posta zerbitzuak arautzen dituen abenduaren 3ko 1829/1999 Errege Dekretuan ezarritako zehaztapenak bete beharko dira. Entitate eskatzaileek Familiaren eta Adingabeen Zuzendariordetzari iragarri beharko diote eskaera igorri dutela, mezu elektroniko bat igorriz.

8. Aurkeztu beharreko dokumentazioa.

Eskaera egiteko eskabide orokorra aurkeztu beharko da, entitatea legez ordezkatzeko ahalmen nahikoa duen pertsonak sinatua, espresuki adierazita zein programatarako den. Horrekin batera, agiri hauek aurkeztuko dira:

A) Entitate eskatzaileari buruzko agiri orokorrak:

–Entitatearen estatutuak.

–Dirulaguntzaren eskabidea sinatzen duen pertsonaren ordezkaritza frogatzen duen agiria eta pertsona horren nortasun agiri nazionala.

–Kasuan kasuko inskripzioak bidezko diren erregistroetan egin direla frogatzen duten agiriak: Lehendakaritzako, Funtzio Publikoko, Barneko eta Justiziako Departamentuko Elkarteen Erregistroko inskripzioa, edo dagokion beste edozein inskripzio.

–Identifikazio fiskaleko txartela.

–Eskabidea, transferentzia bidez ordaintzeko.

–Erantzukizunpeko adierazpena, entitatearen ordezkariak emana, agerrarazten duena entitateak eta administratzaileek edo ordezkariek ez dutela dirulaguntzen onuradun izateko debekurik. Debeku horiek Dirulaguntzei buruzko Foru Legearen 13. artikuluko 2. eta 3. apartatuetan ageri dira. Eredua atxiki da (II. eranskina)

–Erantzukizunpeko adierazpena, entitatearen ordezkariak egina, adierazten duena entitatea ez dela betetzen ari, edo, hala badagokio, ez daukala betetzeke zehapen administratibo irmorik edo kondena-epai irmorik sexuan edo generoan oinarritutako diskriminazioa dakarten lan arloko jardunbideak gauzatu edo toleratzeagatik.

–Entitateak Gizarte Segurantzarekiko zerga betebeharrak ordainduta dituela frogatzen duen ziurtagiria, edo Nafarroako Foru Komunitateko Administrazioarekin edo haren erakunde autonomoekin dituen zorrak ordainduta dituela; ziurtagiri hori eskaera aurkeztu eta, gehienez ere, bi hilabete lehenagokoa izanen da.

Ez da agiririk aurkeztu beharko, baldin eta ziurtapena egitea Foru Komunitatearen administrazioko organoei badagokie, edo behar diren datuak jada haren esku badaude. Kasu horietan, agirietan aldaketarik izan ez bada, berriz aurkeztu beharrean, entitatearen ordezkariaren aitorpen bat aurkez daiteke, inguruabar hori azaltzeko.

B) Proiektu teknikoa baloratzeko dokumentazioa:

b.1. Proiektuaren memoria, inprimaki elektroniko ofizialean. Erakunde interesdunek eskura izanen dute gobernuaren webgunean eta Familiaren eta Adingabeen Zuzendariordetzaren helbide elektronikoan (II. eranskina).

b.2. Agiri grafiko, tekniko eta ekonomikoak (proformako fakturak, aurrekontu profesionalak eta abar), eta proiektua behar bezala ulertzeko beharrezkotzat jotzen diren bestelako agiriak. Dokumentazio hori guztia memoriaren eranskintzat hartuko da.

C) Agiri ekonomikoak (eredua III. eranskinean):

–Programako gastuen eta diru-sarreren guztirako aurrekontua, kontzeptuz kontzeptu xehakatua: egin beharreko ekintza zehatzak eta ekintza horiek eginen dituzten langileak.

–Kasua bada, zer beste baliabide dituen programa osoa finantzatzeko, kontuan hartuta ezen diru-sarrerak, jaso daitekeen dirulaguntza barne, ezin direla izan programaren kostu osoa baino handiagoak.

–Kasua bada, dirulaguntza osorik aurreratzeko, zinpeko aitorpenaren bidez egindako justifikazio txosten bat, non frogatuko baita entitateak ez duela irabazi-asmorik, ezta behar adinako baliabiderik ere diruz laguntzen den jarduera behin-behinekoz finantzatzeko.

9. Antolamendua eta instrukzioa.

1. Deialdi honen ondorioetarako, Familiaren eta Adingabeen Zuzendariordetzari esleitu zaizkio oinarri hauetan aurreikusitako dirulaguntzak emateko prozedura antolatu eta instruitzeko eginkizunak.

Instrukzio organoak arlo juridikoko administrazio publikoko teknikari baten eta arlo ekonomikoko beste baten laguntza izaten ahalko du.

2. Eskaerak aipatu diren betebeharrak betetzen ez baditu, interesdunari eskatuko zaio 10 egun balioduneko epean zuzendu dezan, eta ohartaraziko zaio ezen, hala egin ezean, ulertuko dela eskaera bertan behera utzi duela, Administrazio Publikoen Administrazio Prozedura Erkideari buruzko urriaren 1eko 39/2015 Legeak ezarritako moduan ebazpena eman ondotik.

3. Eskaeren balorazioa batzorde tekniko batek eginen du. Honako hauek osatuko dute batzorde hori: Familiaren eta Adingabeen zuzendariordeak, Babesgabetasun Egoeren Balorazio Ataleko buruak eta Zaintza Kudeatzeko eta Neurri Judizialak Betearazteko Ataleko buruak.

4. Programak baloratu ondoren, instrukzio organoak ebazpen proposamena igorriko dio organo eskudunari.

10. Baloratzea eta dirulaguntzaren zenbatekoa zehaztea.

1. Eskaerak bereiz eta bakoitza bere aldetik baloratuko dira, bere modalitatearen arabera (3. oinarrian adieraziak), 0tik 100 puntura arteko eskalan, II. eranskinean adierazitako irizpide objektiboak eta haien haztapena kontuan hartuta.

2. Dirulaguntza jaso ahal izateko, proiektuek, guztira, 60 puntu lortu behar dituzte gutxienez, eta 40 puntu hamargarren oinarriaren lehenbiziko ataleko b) letran aurreikusitako programaren balorazioan.

3. Dirulaguntzaren zenbatekoa eskatu eta onartzen den aurrekontuaren %100 adinakoa izanen da, 3.3 oinarrian ezartzen den gehieneko mugarekin.

4. Dirulaguntzak emateko, ezarritako balorazio irizpideak aplikatzeak dakarren lehentasun ordenari jarraituko zaio, erabilgarri dagoen kreditua agortu arte.

5. Eskaera guztietarako behar adinako krediturik ez badago, ez da hainbanaketarik eginen.

6. Eskaeran aurkeztutako kalkulu ekonomikoa benetan justifikatutakoa bezalakoa ez bada, Dirulaguntzei buruzko Foru Legean aurreikusitakoaren arabera erregularizatu beharko da dirulaguntzaren zenbatekoa.

7. Balorazio positiboa lortzen duten eskaeren zenbateko guztiek aurrekontuetan horretarako dagoen kreditua gainditzen badute, lehentasun hurrenkera bat ezarriko da, balorazioan lorturiko puntuazioaren arabera, eta dirulaguntzak muga horretaraino banatuko dira. Prozedura horren arabera dirulaguntza eskuratzen ahal duen azken proiektuarentzat eskatutakoak gainditzen duenean hura finantzatzeko dagoen zenbatekoa, dirulaguntza ematea proposatuko da haren kontzesioa eraginkorra bada, eta, kasu horretan, 11. oinarriko 2. atalean aurreikusitako tramiteari jarraituko zaio.

8. Jarduketaren modalitate berean proiektu batek baino gehiagok puntuazio bera lortu eta horietarako aurrekontu kreditu nahikorik ez balego, II. eranskineko B atalean puntuazio handiena lortzen duena izanen da entitate onuraduna. Atal horretan ere berdinketa balego, proiektuak baloratzeko irizpideen B1 atalean lortutako puntuazioaren arabera ebatziko da.

11. Alegazioetarako tramitea.

1. Instrukzio organoak proposamen-txostena eman aurretik, entzunaldi izapidea egin daiteke, Administrazio Publikoen Administrazio Prozedura Erkideari buruzko urriaren 1eko 39/2015 Legearen 82. artikuluari jarraikiz.

2. Dirulaguntzaren proposamenaren zenbatekoa aurkeztutako eskaeran ageri dena baino txikiagoa baldin bada, eta dirulaguntza ematea efizientea bada, instrukzio organoak eskaera berregiteko eskatzen ahalko du. Nolanahi ere, eskaerak berregiten direnean, dirulaguntzaren xedea, baldintzak eta helburua errespetatu beharko dira, bai eta eskaera edo eskariak direla-eta ezarritako balorazio-irizpideak ere, konpromisoak eta baldintzak egokitu daitezen ematen ahal den dirulaguntzaren arabera. Aldatutako proiektu horren aurrekontua ez da txikiagoa izanen proposatutako dirulaguntzaren zenbatekoaren eta, halakorik badago, hasiera batean antzeko baldintzetan aurreikusitako kofinantzaketaren batura baino (eskaeran ageri den kofinantzaketa portzentaje bera mantenduko da).

12. Dirulaguntza ebaztea.

1. Prozeduraren instrukzioa eginda eta ebazpen-proposamena igorri ondoren, Pertsonen Autonomiarako eta Garapenerako Nafarroako Agentziako zuzendari kudeatzaileari dagokio ebazpena ematea. Dirulaguntza emateko kontuan hartu diren baldintzak aldatuz gero, ebazpen hori aldatzen ahalko da.

2. Ebazpena eman eta jakinarazteko epea hiru hilabetekoa izanen da, eskaerak aurkezteko epea bukatzen denetik hasita. Epe hori bukatuta, berariazko ebazpenik eman eta jakinarazi ez bada, eskaera ezetsi egin dela ulertuko da.

3. Ebazpen horretan honako hauek agertuko dira: dirulaguntzak zer eskatzaileri esleitu zaizkien, laguntzen helburua, zenbatekoa, ordaintzeko eta justifikatzeko modua eta epea, eta gainerako eskaerak ezesteko arrazoiak, Dirulaguntzei buruzko arazoaren 9ko 11/2005 Foru Legearen 21. artikuluan xedatu bezala.

13. Dirulaguntza ordaintzea.

Dirulaguntzei buruzko azaroaren 9ko 11/2005 Foru Legearen 33. artikuluan ezarritakoari jarraikiz ordainduko da dirulaguntza, hau da, ordainketa bakar batean eta dirulaguntzak emateko ebazpenarekin batera, baldin irabazi-asmorik gabeko entitateek edo horien federazio, konfederazio edo taldeek aski baliabiderik ez badute diruz lagundutako jarduera behin-behinekoz finantzatzeko, eta, betiere, hori behar bezala frogatzen badute.

Ordainketa aurreratua egin behar ez den kasuetan, programa bete izana justifikatu ondoren ordainduko da dirulaguntza, 15. oinarrian adierazitakoari jarraikiz. Bi justifikazio partzial aurkeztu beharko dira, lehena 2021eko ekainaren 30ean beranduenez, eta bigarrena 2021eko abenduaren 31n beranduenez. Ordainketa partzialak kasuan kasuko gastuak justifikatu ondoren eginen dira, proportzionalki betiere.

14. Jarraipena eta kontrola.

Instrukzio organoak jarduketen jarraipena, ebaluazioa eta kontrola eginen du, eta haien kalitateaz eta eraginkortasunaz arduratuko da. Horretarako, jarraipen eta kontrolerako beste jarduketa batzuk galarazi gabe, entitate onuradunak egindako jarduerei buruzko urteko memoria tekniko bat aurkeztu beharko du justifikazio ekonomikoarekin batera.

15. Justifikazioa.

1. Erakunde onuradunek txosten tekniko eta ekonomiko partziala aurkeztuko dute, edo amaierakoa, zein dagokion, diruz lagundu den proiektuaren exekuzioa azalduz.

2. Azken txostenak edo txosten partzialak justifikazio-kontuaren itxura izanen du, eta gastu-agiriekin batera aurkeztuko da. Hurrengo alderdi hauek jasoko ditu:

a) Tarteko ordainketak egiteko txosten partzialak:

a.1) Proiektuaren bilakaerari buruzko tarteko txosten laburra, kronograma batean diruz lagundutako jardueren exekuzioa adieraziz, finkatutako helburuen eta gastatutako diru kopuruaren arabera. Tarteko txosten horiek aurkezturik ere, programaren memoriak osorik aurkeztu beharko dira hura bukatutakoan.

a.2) Diruz lagundutako proiektuari aplikatutako gastuen zerrenda, honako hauek zehaztuta: agiri zenbakia, kontzeptua, emailea, igorri zeneko data, zenbatekoa eta egiazki noiz pagatu den. Zerrenda horri behar diren gastu- eta ordainketa-egiaztagiriak gehituko zaizkio. Egiaztagiri gisa, bankuko kontu-laburpenak, ordainagiriak eta fakturak onartuko dira bakarrik, eta horietan jaulkitzailearen eta hartzailearen datuak, data, kontzeptua, prezioa eta ordaintzeko modua adierazi beharko dira, apirilaren 10eko 23/2013 Foru Dekretuan xedatutakoari jarraikiz, horren bidez fakturazio betebeharrak arautzen dituen erregelamendua onetsi baitzen.

b) Proiektua bukatu ondoko azken txostena:

b.1) Proiektuaren exekuzioari buruzko txosten teknikoa, gutxienez honako atal hauek jasoko dituena, aurkeztutako proiektuan adierazitakoarekin bat:

–Lortutako helburuen zehaztapena.

–Sexuaren arabera banatutako datuak.

–Lortutako emaitzak.

–Egindako jarduerak.

–Egindako jarduerak egiaztatzeko iturriak.

Dokumentu horiek hizkera inklusibo eta ez-sexistan idatzi beharko dira.

b.2) Proiektuaren galera-irabazien kontua, kontzeptuen arabera sailkatua.

b.3) Onetsitako aurrekontua eta gauzatutakoa erkatzen dituen taula, desbideratu dena adierazita.

3. Jarduerak, dirulaguntzaz gain, funts berekiekin edo bestelako dirulaguntza edo baliabideekin finantzatu direnean, azken justifikazioan, edo partzialetan (behar balira), funts horien zenbatekoa, jatorria eta helmuga frogatu beharko dira eta, orobat, funtsak dirulaguntza jaso duten jarduerei aplikatu zaizkiela.

4. Dirulaguntzaren azken ordainketarako eskubidea ematen duen azken txosten partziala aurkezteko azken eguna 2021eko abenduaren 31 izanen da.

5. Azken txostena, eta diruz lagundu den proiektuari aplikatutako gastu guztien ordainagiriak, 2022ko otsailaren 28an aurkeztu ahalko dira beranduenez, egun hori barne.

16. Entitate onuradunen betebeharrak.

Proiektu baterako dirulaguntza jasotzen duten entitateek honako betebehar hauek izanen dituzte:

a) Dirulaguntza ematea eragin duten proiektua eta jarduerak gauzatzea deialdi honetako oinarri arautzaileen eta baldintza eta betebehar formal eta materialen arabera, eta dirua zer helburutarako eman zen, hartarako baino ez erabiltzea. Gauzatze horrek, betiere, proiektua osatzen duten jarduerak kudeatzea eta zuzentzea hartzen du bere baitan, baita beharrezkoak diren baliabideak jartzea ere.

b) Oinarri arautzaileotan aipatzen diren frogagiriak, tartekoak eta azkenekoak, aurkeztea.

c) Laguntza ematen duen organoak eta indarra duen antolamendu juridikoaren arabera eskudun diren bestelako organoek egin beharreko egiaztapen lanak onartzea.

d) Lagundutako jarduera finantzatzeko eskatu edo lortutako bestelako dirulaguntza, laguntza, diru-sarrera edo baliabideen berri ematea dirulaguntza ematen duen organoari. Jakin bezain laster emanen da horren berri, eta, betiere, jasotako funtsak zertan erabili diren justifikatu baino lehen.

e) Jasotako diruaren erabilerari buruzko frogagiriak gordeko dira, agiri elektronikoak barne, egiaztatze eta kontrol lanen xede izan daitezkeen bitartean.

f) Entitatearen izaera dela-eta kontabilitatean eskatzen ahal zaizkion betebeharrak betetzea.

g) Familia, Gazteria, Kirol eta Gizarte Gaietako kontseilariak uztailaren 2an emandako 212/2010 Foru Aginduan ezarritako betebeharrak betetzea. Foru agindu horren bidez, Nafarroako Gobernuaren parte-hartzearen zabalkundea egiteko arauak ezarri ziren, gizarte zerbitzuen, garapenerako lankidetzaren, familiaren, haurren eta kontsumoaren arloetan diruz lagundutako edo kontratatutako zerbitzu eta zentroetan egiten diren programa, jarduera, inbertsio eta jarduketetarako.

Diruz lagundutako ekintzetan Nafarroako Gobernuaren eta Pertsonen Autonomiarako eta Garapenerako Nafarroako Agentziaren parte-hartzea azaltzeko betebeharra bete dela frogatzen duen frogagiria aurkeztu beharko da; izan ere, proiektuari lotutako publizitate, hedapen eta agiri guztietan Nafarroako Gobernuaren logotipo ofiziala eta testu hau agertu behar dira, edozein dela ere erabilitako bitartekoa: “Nafarroako Gobernuak-Pertsonen Autonomiarako eta Garapenerako Nafarroako Agentziak diruz laguntzen dute”. Testu horrek bete beharko ditu Nafarroako Gobernuaren sinbolo ofiziala eta haren erabilera arautzen duen urtarrilaren 27ko 4/2016 Foru Dekretuan jasotako ezaugarri teknikoak.

h) Proiektua egiteko hornitzaileen kontrataziorako 12.000 euro baino gehiago behar baldin badira, dirulaguntzaren entitate onuradunak behar den bezala frogatu beharko du hornitzailea efizientziaren eta ekonomiaren irizpideei jarraikiz hautatu dela.

Horretarako, entitateak aski izanen du proiektua egiteko hiru aurrekontu aurkeztea, hori egiterik dagoenean.

i) Diruz lagundutako jardueraren parte bat egiteko hirugarrenekin azpikontratazioa egin behar izanez gero, azpikontratazio horrek ez du hartuko emandako diruaren %25 baino gehiago.

j) Pertsona fisikoei buruzko datu guztiak sexuaren arabera bananduta ematea (programaren onuradaunak, parte hartzen duten profesionalak, eta abar).

k) Eskubide Sozialetako Departamentuaren baimena eskatu eta eskuratzea diruz lagundutako proiektuan funtsezko aldaketak egiteko, baldin proiektua gauzatzea nabarmen aldatzen edo zailtzen duten inguruabarrak gertatzen badira.

Funtsezko aldaketatzat joko dira helburuetan, emaitzetan, onura hartzen duen populazioan edo lurralde kokapenean eragina dutenak, edo, hasierako aurrekontuarekin alderaturik, dirulaguntza jaso dezakeen gastu bakoitzaren %5eko desbideratze ekonomikoa ekartzen dutenak. Programa aldatzeko eskaeretan aldaketa edo zailtasun horren inguruko behar adina arrazoi eman beharko dira, eta inguruabar horiek gertatu eta berehala adierazi beharko dira, betiere diruz lagundutako proiektua egiteko epea bukatu baino lehen. Dirulaguntza emateko kontuan hartutako baldintzetan edozer aldatuz gero, Administrazioak onartu ala ez, dirulaguntza emateko ebazpena aldatzen ahalko da, edo, hala badagokio, kasuan kasuko zenbatekoa itzuli beharko da.

Proiektua gauzatu bitartean gertatzen diren gainerako gorabehera eta aldaketa ez-funtsezkoak arrazoituta adieraziko zaizkio Nafarroako Gobernuari dagokion justifikazio txostenean, barnean dela Nafarroako Gobernutik kanpoko finantzabideak handitzeagatik guztirako kostua handitzea.

l) Deialdi honetan eta aplikatzekoa den legerian ezarritako kasuetan, harturiko funtsak itzultzea.

m) Dirulaguntzei buruzko azaroaren 9ko 11/2005 Foru Legeak onuradunei ezartzen dizkien gainerako betebeharrak.

17. Itzulketak.

1. Hartutako zenbatekoa itzuli beharko da, osorik edo partez, programa gauzatzen ez bada, dirulaguntza emateko ezarritako baldintzak betetzen ez badira, Dirulaguntzei buruzko Foru Legearen 35. artikuluan aipatzen diren zergatikoak gertatzen badira edo deialdi honetan berariaz aipatzen diren betebeharrak betetzen ez badira.

Legez ezarritako kasuetan, gainera, bidezkoa izanen da dirulaguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.

Dirua itzultzea eskatzeko prozedurak aipatutako artikuluan xedatutakoari jarraituko dio, eta hasten denetik hamabi hilabeteko epean ebatzi beharko da. Dena dela, entitateak modu boluntarioan eskatzen ahalko du justifikatu gabeko dirulaguntzaren zenbatekoaren itzulketa. Horretarako, frogagiri bat aurkeztu beharko du erakusteko diru-sarrera bat egin dela Eskubide Sozialetako Departamentuaren alde, aldez aurretik ordaindutako zenbatekoaren eta justifikatutako zenbatekoaren arteko aldearen adinakoa. Kasu horretan, ez da berandutze-interesik aplikatuko, eta ulertuko da entitateak espresuki uko egiten diola itzultzen duen zenbatekoari.

Orobat, entitate onuradunak ia betebehar guztiak betetzen dituenean eta bere konpromisoak betetzeko jarrera garbia erakusten duenean, proportzionaltasun-printzipioari jarraituz zehaztuko da itzuli beharreko zenbatekoa, ikusita dirulaguntza emateko ezarritako baldintzetatik zenbat eta noraino bete diren.

18. Dirulaguntzaren bateragarritasuna.

Foru agindu honen xede diren laguntzak bateragarriak dira helburu bererako emandako beste batzuekin, betiere horien zenbatekoa ez bada inola ere –berez edo beste dirulaguntza, laguntza eta diru-sarrera batzuekin edo dirulaguntzaren xede den jardueraren baliabide propioekin– onuradunak egin beharreko jardueraren kostua baino handiagoa.

Beste laguntza edo diru-sarrera batzuk lortzearen ondorioz diruz lagundutako proiektuaren edo programaren zenbatekoa gainditzen bada, soberakina Nafarroako Foru Administrazioari itzuli beharko zaio.

19. Gardentasun betebeharra.

Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 3.c) artikuluan aipatutako entitate pribatuak behartuak daude arau honetan ezartzen diren gardentasun betebeharrak betetzera, baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko diru-sarrera guztien %20 edo gehiago badira eta, gutxienez, 5.000 euro.

Aurreko atalean ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako dirulaguntza guztien zenbatekoak batuko dira. Urte batean baino gehiagotan ordaintzen diren dirulaguntzen kasuan, aurrekontu ekitaldi bakoitzean emandako kopurua hartuko da kontuan ondorio horietarako, ez guztizko batura. Erreferentziako urteko negozio zifra edo aurrekontua honako hauetako txikiena izanen da:

a) Aurreko urteko negozio zifra edo gauzaturiko aurrekontua.

b) Hala badagokio, dirulaguntza eman den ekitaldi horretan entitatearen organo eskudunak onartutako aurrekontua edo negozio zifra.

Baldintzak betetzeagatik gardentasun betebeharraren mende dauden erakunde onuradunek hilabete bateko epea izanen dute, emakida-ebazpena jakinarazten denetik hasita, jarraian zehazten den informazioa emateko:

a) Entitatearen gobernu, administrazio eta zuzendaritza organoen osaera.

b) Organo horiek osatzen dituzten kargudunen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan dagoena izanen da.

d) Gobernu, administrazio eta zuzendaritza eginkizunetan ematen den dedikazioaren araubidea.

e) Erakunde onuradunaren urteko azken kontuen kopia bat.

Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta dirulaguntza kudeatzen duen administrazio unitateari bidaliko zaio.

Entitateak ez badu gardentasun betebeharra konplitu beharrik horretarako baldintzak ez betetzeagatik, horren gaineko aitorpena aurkeztu beharko du.

Entitateak ekitaldi berean dirulaguntza bat baino gehiago jasotzen badu, ez du informazioa errepikatu behar dirulaguntza bakoitzerako, hasieran eman zituen datuak aldatzen ez badira behintzat. Horretarako, entitateak identifikatu beharko du Foru Komunitateko Administrazioaren zein organoren aurrean aurkeztu zuen, eta noiz.

Betebehar hori bete ezean, emandako dirulaguntza ez da ordainduko, ezta aurrerakinak ere, eta kobratutako zenbatekoak itzuli egin beharko dira, jarraikiz Dirulaguntzei buruzko azaroaren 9ko 11/2005 Foru Legearen 35.1 c) artikuluan ezarritakoari.

Aurrekoa galarazi gabe, errekerimendua eginez gero, entitate onuradun guztiak behartuta daude unitate kudeatzaileari behar den informazio guztia ematera hamar eguneko epean, frogatzeko betetzen dituztela Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen II. tituluan jasotako gardentasun betebeharrak.

Errekerimenduan emandako epea bukatzen bada eskatutakoa bete gabe, hertsapen isunak ezartzea erabakitzen ahalko da, 500 eurotik 5.000 eurora bitartekoak, interesdunari ohartarazpena egin ondoren eta entzunaldia emanda. Isuna hamabost egunetik behin errepikatuko da, errekerimendua bete arte. Isunaren zenbateko osoa ez da izanen dirulaguntzaren zenbatekoaren ehuneko bost baino handiagoa. Zenbatekoa zehazteko, kontuan hartuko dira ez-betetzearen astuntasuna eta proportzionaltasun-printzipioa.

20. Errekurtsoak.

1. Deialdi honen eta bere oinarrien kontra gora jotzeko errekurtsoa jartzen ahalko da, Nafarroako Gobernuari zuzendua, Nafarroako Aldizkari Ofizialean argitaratu eta hurrengo egunetik hasita hilabeteko epean, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean ezarritakoari jarraikiz.

2. Foru agindu hau aplikatzeko egintzen aurka gora jotzeko errekurtsoa jartzen ahalko da Eskubide Sozialetako kontseilariari zuzendua, haiek jakinarazi edo Nafarroako Aldizkari Ofizialean argitaratu edo errekurritutako egintza jakinarazi eta biharamunetik hasita hilabeteko epean, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean aurreikusitakoarekin bat.

21. Aplikatzekoa den legedia.

Foru agindu honetan aurreikusita ez dagoen guztian Dirulaguntzei buruzko azaroaren 9ko 11/2005 Foru Legean eta aplikatu beharreko gainerako arauetan ezarritakoari jarraituko zaio.

II. ERANSKINA

Dirulaguntzetarako proiektuak baloratzeko irizpideak, 2021

A) Entitatearen gaineko balorazioa (15 puntu bitarte).

A.1.–Helburuak, ezarpena eta ahalmen operatiboa (10 puntu bitarte).

A.1.1. Helburuak (3 puntu bitarte).

–3 puntu: deialdiaren helburua entitatearen estatutuen helburuen artean ageri da, zerrendako lehenengo edo bigarren tokian.

–2 puntu: deialdiaren helburua zerrenda horretako hirugarren edo laugarren tokian agertzen da.

–1 puntu: deialdiaren helburua zerrenda horretako laugarren tokitik haratago agertzen da.

A.1.2. Esperientzia (3 puntu bitarte).

(0,25 puntu egiaztatutako esperientzia urte bakoitzeko, edo entitatea erregistratu zen egunetik aurrerako urte bakoitzeko. 3 puntu gehienez).

A.1.3. Zuzendaritzako edo erantzukizuneko karguren bat duen emakumeen kopurua (2 puntu bitarte).

– % 50 eta gehiago: 2 p.

– % 20tik gora eta % 50etik behera: 1 p.

– % 20 baino gutxiago: 0 p.

A.1.4. Prestakuntzako praktiketan ari diren pertsonak: 1 p.

A.1.5. Genero berdintasunerako plan bat ezarria dute: 1 p.

A.3.–Azpiegiturak eta ekipamendua: 2 puntu gehienez.

–1 p. Deialdiaren xede diren jarduera egiteko lokalak ditu.

–1 p. Oinarrizko ekipamendua du.

A.4.–Kofinantzaketa: 3 puntu gehienez

–3 p. Nafarroako Gobernutik kanpoko ekarpena > % 20.

–2 p. Nafarroako Gobernutik kanpoko ekarpena ≤ % 20.

–1 p. Nafarroako Gobernutik kanpoko ekarpena ≤ % 10.

B) Proiektuaren balorazioa (75 puntu bitarte):

B.1.–Proiektuaren koherentzia: 30 puntu gehienez.

b.1.1. Oinarriak eta jarduketa eremua (6 puntu bitarte).

–6 p. Guztiz koherentea da.

–3 p. Partzialki koherentea da.

–0 p. Inkoherentea da, edo oso gutxi zehaztuta dago.

b.1.2. Helburuak: 6 puntu bitarte.

–6 p. Guztiz koherenteak dira, eta ongi zehaztuta daude.

–3 p. Koherenteak dira, baina gutxi zehaztuta daude.

–0 p. Inkoherenteak dira eta gutxi zehaztuta daude.

b.1.3. Jardueren deskribapena (6 puntu bitarte).

–6 p. Zehatz deskribatuak.

–3 p. Ez daude zehatz deskribatuta.

–0 p. Ez daude deskribatuta (aipatuak besterik ez).

b.1.4. Espero diren emaitzak (6 puntu bitarte).

–6 p. Zehatz deskribatuak.

–3 p. Ez daude zehatz deskribatuta.

–0 p. Ez dira bete.

b.1.5. Jardueren egutegia (6 puntu bitarte).

–6 p. Zehatz deskribatuta.

–3 p. Ez daude zehatz deskribatuta.

–0 p. Ez da bete.

B.2.–Ebaluazioaren analisia: 9 puntu gehienez.

b.2.1. Adierazleak (3 puntu bitarte).

–3 p. Oso egokia (5 adierazle baino gehiago).

–2 p. Egokia (3 adierazle baino gehiago).

–1 p. Erdipurdikoa (2 adierazle).

–0 p. Desegokia edo ez dago bat ere.

b.2.2. Egiaztapen iturriak (3 puntu bitarte).

–3 p. Oso egokiak.

–2 p. Egokiak.

–1 p. Erdipurdikoa.

–0 p. Ez dago halakorik.

b.2.3. Ebaluazio eta jarraipen prozesu bat izatea (3 puntu bitarte).

–3 p. Oso xehakatua.

–2 p. Xehakatua.

–1 p. Nahikoa xehakatu gabe.

–0 p. Ez dago halakorik.

B.3.–Giza baliabideen eta baliabide tekniko eta ekonomikoen analisia: 16 puntu gehienez.

b.3.1. Giza baliabideen egokitasuna (4 puntu gehienez).

(Profil teknikoen definizioa eta esleitutako eginkizunak baloratzen dira).

–4 p. Oso egokia.

–3 p. Egokia.

–2 p. Erdipurdikoa.

–0 p. Desegokia.

b.3.2. Boluntarioen parte-hartzea proiektuan (4 puntu bitarte).

(Boluntariorik ba ote den, eta esleitu zaizkien eginkizunen azterketa).

–4 p. Boluntarioek hartu dute parte, funtzio zehatzekin.

–2 p. Boluntarioek hartu dute parte, funtzio zehaztugabeekin.

–0 p. Boluntario parte-hartzailerik ez.

b.3.3. Baliabide teknikoen egokitasuna (4 puntu bitarte).

(Materialak, lokalak, etab.).

–4 p. Oso egokia.

–2 p. Egokia.

–1 p. Erdipurdikoa.

–0 p. Desegokia edo ez dago bat ere.

b.3.4. Aurrekontuaren behar bezalako banakapena (4 puntu bitarte).

–4 p. Oso egokia.

–2 p. Egokia.

–1 p. Erdipurdikoa.

–0 p. Desegokia.

B.4.–Proiektuaren osagarritasuna eta koordinazioa beste entitate batzuekin eta beste gizarte baliabide batzuekin (8 puntu bitarte).

b.4.1. Zerbitzu publikoekin (gizarte, osasun eta hezkuntza arlokoekin eta beste batzuekin) aldian aldiko koordinazioa egiteko egitura bat planteatzea (4 puntu bitarte).

–4 p. Koordinazioa sistematikoa eta erregularra da.

–2 p. Koordinazioa badago, baina ez da sistematikoa.

–1 p. Aldian behin jartzen dira harremanetan.

–0 p. Ez dago koordinaziorik ez harremanik zerbitzu publikoekin.

b.4.2. Antzeko entitateekin aldian aldiko koordinazioa egiteko egitura bat planteatzea (4 puntu bitarte).

–4 p. Koordinazioa sistematikoa eta erregularra da.

–2 p. Koordinazioa badago, baina ez da sistematikoa.

–1 p. Aldian behin jartzen dira harremanetan.

–0 p. Ez dago koordinaziorik ez harremanik antzeko erakundeekin.

B.5.–Pertsona onuradunen parte-hartzearen azterketa (12 puntu bitarte).

b.5.1. Profilaren analisia eta zenbatespen kuantitatiboa (3 puntu bitarte).

–3 p. Oso egokia.

–2 p. Egokia.

–1 p. Erdipurdikoa.

–0 p. Desegokia.

b.5.2. Pertsonen sarbiderako erabilitako prozedura (3 puntu bitarte).

–3 p. Oinarrizko Gizarte Zerbitzuen eta Auzo Unitateen edo beste baliabide publiko batzuen bidez soilik.

–2 p. Gehienbat Oinarrizko Gizarte Zerbitzuen eta Auzo Unitateen edo beste baliabide publiko batzuen bidez.

–1 p. Gehienbat gizarteratze eta laneratze enpresen bidez.

–0 p. Ez dago prozedurarik batere.

b.5.3. Pertsonendako irisgarritasuna (3 puntu bitarte).

–3 p. Irisgarria jende ororendako.

–2 p. Irisgarria kolektibo jakin batzuendako.

–1 p. Irisgarria kolektibo bakar batendako.

–0 p. Irisgarritasun arazo larriak ditu.

b.5.4. Proiektuaren onuradunek parte hartzeko bideak izatea (iradokizunetarako postontzia, gogobetetasun inkestak, ebaluazioko galde sortak, etab.) (3 puntu bitarte).

–3 p. Bada halakorik, eta nahikoa xehakatuta daude.

–1 p. Bada halakorik, baina ez dira nahikoak edo ez daude nahikoa xehakatuta.

–0 p. Ez du halakorik.

C.–Bestelakoak: 10 p bitarte.

C.1.–Teknologia berrien erabilera: 2 puntu gehienez.

–2 p. Parte-hartzaileek eta teknikariek erabiltzen dituzte.

–1 p. Parte-hartzaileek erabiltzen dituzte.

–0 p. Ez dira erabiltzen.

C.2.–Genero ikuspegiaren txertatze maila (2 puntu bitarte).

–1 p. Gaztelania inklusiboa eta ez-sexista erabiltzea: izen generikoak (“profesorado”, “alumnado”…), bi generoen aipamena (“trabajadoras/ trabajadores”):

–1 p. Datuak sexuka banakatzea.

–0 p. Ez da hizkera hori erabiltzen.

C.3.–Proiektuaren jarduketaren lurralde eremua (4 puntu bitarte).

–4 p. Iruña eta Iruñerria ez den Nafarroako Foru Komunitateko lurraldean bakarrik.

–3 p. Iruñean edo Iruñerrian eta Nafarroako Foru Komunitateko gainerako lurraldean.

–2 p. Bakar-bakarrik Iruñean eta/edo Iruñerrian.

–1 p. Bakar-bakarrik Iruñean.

C.4.–Programa berritzailea: 2 puntu gehienez.

–2 p. Berritzailea, ez baita halakorik inoiz egin Foru Komunitatean.

–1 p. Berritzailea, berrikuntzak dakartzalako metodologian, helburuetan, erabilitako baliabideetan, etab.

–0 p. Ez du inolako alderdi berritzailerik.

ERANSKINAK