2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ETXABARRI
Hilerriaren erabilera eta hura erabiltzeko eta hartan zerbitzu egiteko eskubideak eta tasak arautzen dituen ordenantza. Behin betiko onespena
Etxabarriko Kontzejuko hilerriaren erabilera eta hura erabiltzeko eta bertako zerbitzuak hartzeko eskubide eta tasak arautzen dituen ordenantza hasieran onesteko erabakia 2021eko 71. Nafarroako Aldizkari Ofizialean argitaratu zen, martxoaren 30ean.
Jendaurreko aldian aurkeztutako alegazioak ebatzita daude. Behin betiko onetsi da Etxabarriko Kontzejuko hilerriaren erabilera eta hura erabiltzeko eta bertako zerbitzuak hartzeko eskubide eta tasak arautzen dituen ordenantza, Etxabarriko Kontzejuak 2021eko abuztuaren 20an egindako osoko bilkuran, eta, Toki Administrazioari buruzko Foru Legearen 326. artikuluan ezarritakoaren arabera, haren testu osoa Nafarroako Aldizkari Ofizialean argitaratzen da.
Etxabarrin, 2021eko irailaren 14an.–Kontzejuko burua, Ignacio Galdeano Ancin.
ORDENANTZA, ETXABARRIKO KONTZEJUKO HILERRIAREN ERABILERA ETA HURA ERABILTZEKO ETA BERTAKO ZERBITZUAK HARTZEKO ESKUBIDE ETA TASAK ARAUTZEN DITUENA
LEHEN KAPITULUA
Hilerriaren erabilera eta erabiltzeko eskubideak
1. artikulua. Bat etorriz Toki Araubidearen Oinarriei buruzko Legearen 4., 25. eta 26. artikuluekin, Nafarroako Toki Administrazioari buruzko Foru Legearen 4., 29., 30. eta 39. artikuluekin, eta Nafarroako Toki Ogasunei buruzko Foru Legearen 12. eta 100. artikuluekin, Etxabarriko Kontzejuari dagozkio kontzejuko hilerriaren administrazioa, zuzendaritza eta zaintza, batere galarazi gabe beste administrazio batzuek alor berean dauzkaten legezko eskumenak.
2. artikulua. Administrazioa. Ahalmen hauek zuzendaritzari eta zaintzari lotuta daude:
a) Hilerriko higienearekin eta osasunarekin ikusteko duen guztia.
b) Hilotzak eramateari dagokiona eta hilerriaren barne araubidea ukitzen duen guztia.
c) Lurren eta hilobien antolaketa, banaketa, erabilera eta aprobetxamendua.
d) Eskubideak eta tasak kobratzea.
e) Hilobiak, kolunbarioak, ehorzketak, hobitik ateratzeak, lekualdaketak eta hilerrian ematen diren beste zerbitzu batzuk erregistratzea eta beharrezko neurriak hartzea, datuen segurtasuna bermatzeko eta horiek aldatzea, galtzea edo baimenik gabe tratatzea edo inor sartzea eragozteko.
3. artikulua. Kontzejuaren ardurapekoak izanen dira hilerriaren antolaketa eta funtzionamendua.
Hilobien eta kolunbarioen erabileraren gaineko eskubidearen emakidak, eskualdaketak eta azkentzeak Kontzejuaren ebazpen bidez onartuko dira, eta ebazpen horrek horren berri emanen die interesdunei, paperean edo euskarri telematikoan.
4. artikulua. Hilerria heriotzak agertu ahala okupatzen joanen da; horretarako, lehendik zeuden hilobiak altxatuko dira, antzinatasun ordenaren arabera, salbu eta familiak ehorzketa berria lehendik dagoen familia hilobi baten gainean egin nahi duenean, betiere legezko epeak betez.
5. artikulua. Ehorzteko ekartzen diren hilotz guztiak lurperatuko dira, legezko izapideak bete badira, eta tasen eranskinean aipatzen diren ehorzketa eskubideak ordaindu beharko dira zerbitzu horiengatik.
6. artikulua. Hilotzak hilerrian bertan lekualdatzeko atera daitezke hobitik, bai eta beste hilerri batera eramateko ere.
Nolanahi ere, osasunari buruz indarra duten xedapenetan ezarritakoari jarraikiz atera behar dira, osasunaren aldetik behar diren neurri guztiak hartuta.
7. artikulua. Antzinatasun ordenaren arabera hustu behar diren hobiei dagokienez, ez da beharrezkoa izanen inolako abisurik ematea.
Eskatzaileak hilotza ateratzeko lanak bere kontura eginen ditu. Alkatetzari jakinaraziko dio aurretik, hark lanak ikuskatu beharko baititu.
8. artikulua. Beste hilerri batetik ekarritako hilotzak ehorzteko ez da lur berria okupatuko. Gutxienez ere hamar urteko antzinatasuna duen hilobian paratuko dira edo, bestenaz, hezurtegira eramanen dira.
9. artikulua. Heriotzaren arrazoiak osasun arriskurik izan ez badu, baltsamatu gabeko hilotzak baldintza hauetan ateratzen ahal dira:
a) Lurpean ehortzitako hilotzak lurperatu zirenetik gutxienez ere hamar urte iraganda atera daitezke, arrunt hezurturik baldin badaude.
b) Hilobi mota guztietan, zinkezko hilkutxan ehortzi bada, noiznahi atera eta lekuz aldatzen ahalko da, hilkutxa kontserbazio egoera ezin hobean badago.
Horiek baino epe laburragoetan ez da hilotzik ateratzeko baimenik emanen, epaile baten aginduz ez bada.
Ekainetik irailera bitarte, biak barne, ez da hilotzik aterako epaileak agindu ezean.
10. artikulua. Hilotz baltsamatuak atera eta lekuz aldatzeko baimena noiznahi eman daiteke, baina zerraldoaren kanpoko kutxa berria ezarri beharko da, baldin ongi kontserbaturik ez badago.
11. artikulua. Ordenantza honek arautzen dituen zerbitzuak egiteagatik kontzejuaren tasak ordaindu ondotik, hilerriko lursailak doan erabiltzen ahalko dira. Ez da inoiz eta inola ere emanen epemugarik gabeko kontzesiorik.
12. artikulua. Hilerriko lurra lurperatzeko eta hilobietako elementuak jartzeko erabiliko da, ez bestetarako, honako honen arabera:
a) Lurreko hilobiak:
1.–Hilarriak eta gurutzeak egitean, honako neurriei jarraituko zaie:
–Diseinu mota: librea.
–Garaiera, gehienez: 65 cm.
–Zabalera, gehienez: 55 cm.
2.–Lauki edo hobiak lurrez edo belarrez estalirik egonen dira; debeku da lauzak paratzea eta orobat edozein motatako fabrika obra.
3.–Hilobietako hilarriak (erdiko ilarakoak) mugikorrak izan beharko dira, makinen lana errazteko.
b) Kolunbarioak:
1.–Kolunbarioa da hilotz erraustuen errautsak dauzkaten errauts kutxatilak paratzeko tokia, eta errauts kutxatiletan edo kutxetan paratu beharko dira. Errautsak kolunbarioan paratu behar dira nahitaez, inoiz ez lehorrean.
2.–Kolunbarioaren hasierako erabilera eskatu ahal izateko, nahitaezkoa izanen da eskatzailea Etxabarrin jaio edo bertan erroldatuta egotea.
3.–Kolunbarioaren hasierako erabilerarako eskubidea izanen dute, halaber, kolunbarioen atal honetako 2. puntuko bi inguruabarretako edozein betetzen duten ezkontideek eta lehen eta bigarren mailako ahaideek.
4.–Kolunbario bakoitzean gehienez 4 pertsonaren errautsak uzten ahalko dira. Horien okupazio ordena: zutabeka, goitik behera, goiko ezkerreko aldetik hasita.
5.–Kolunbarioak familiarrak izanen dira, eta lehenengo errauts kutxatila jarri duen familiari dagokio hurrengo errauts kutxatilak jartzeko baimena ematea.
6.–Kolunbarioak erabiltzeko ordena heriotza berriaren arabera ezarriko da, ordenantza hauek Nafarroako Aldizkari Ofizialean argitaratzen direnetik aurrera.
7.–Familia bat kolunbarioa okupatzen ari bada eta hilobi batean edo beste leku batean errautsak baditu eta familiaren kolunbarioan sartu nahi baditu, erabilera berritzat joko da, eta dagozkion tasak ordaindu beharko ditu.
8.–Identifikazio grabazioak granitozko estalkiaren gainean eginen dira, eta eragindako familiak ordainduko ditu.
Hilerria itxuroso eta eder egonen da beti, beste lurzatiak/hilobiak ukitu gabe eta kontzejuko buruaren mantentze jarraibideei kasu eginez.
13. artikulua. Hobien kokalekua, lur erauzketen gastuak eta hobiak ireki nahiz ixteko kostuak Kontzejuaren kargura izanen dira.
14. artikulua. Hilobiak eta kolunbarioak segur, xahu eta apain atxikitzea titularren betebeharra da.
15. artikulua. Emakidak eta aprobetxamendua honako hauengatik ere iraungi daitezke:
a) Hilerria desagertzeagatik.
b) Interes publikoagatik.
c) Hobiak behar izateagatik, beste ehorzketa batzuk egiteko.
d) Kolunbarioak gehienez ere 30 urtez okupatuko dira (epe hori luzatzen ahalko da); Kontzejuak epe hori laburtzen ahalko du komenigarri zaion heinean, aipatu epea iragan baino lehen kolunbario guztiak okupaturik badaude.
16. artikulua. Leku gutxi dagoenez, eta etorkizunerako aurreikuspena egite aldera, ezin izanen da berriro lurperatu atetik hezurtegirantz bost metroko tartean (sartu eta ezkerretara).
BIGARREN KAPITULUA
Tasak hilerrian zerbitzuak emateagatik
17. artikulua. Zerga-egitatea sortzen da zerbitzu hauek gauzatzean:
a) Ehorzketak.
b) Hilobiei lotutako beste lan batzuk.
c) Hilotzak hobitik ateratzea.
18. artikulua. Ordenantza honetan araututako zerbitzuren bat eskatzen dutenak dira tasa hauen subjektu pasiboak, izan pertsona fisikoak, izan pertsona juridikoak edo izan, nortasun juridikorik gabe, batasun ekonomikoa edo ondare bereizia eratzen duten entitateak.
19. artikulua. Zerga oinarria da ordenantza honen tarifen eranskinean ageri dena. Tributu kuota eta zerga oinarria berdinak dira.
20. artikulua. Hobi berean bi hilotz edo gorpuzki, nahiz gehiago, batera lurperatzeko lizentziak ematen ahalko dira, baldin eta ehorzketa lekuak behar bezain zehazturik badaude, baina hilotz bakarra lurperatzetik gorako lanak partikularraren kontura izanen dira.
21. artikulua. Hilerri honetako hilobi batetik gorpuzkiak atera eta bertako beste batean ehortziz gero, hilobitik ateratzeagatik eta ehorzteagatik ordaindu beharko dira tasak. Gorpuzkiak beste hilerriren batetik ekarriz gero, ehorzketari dagokion tasa ordainduko da bakarrik.
22. artikulua. 17. artikuluko a) eta b) zenbakietan aipatzen diren zerbitzuei dagozkien tasak zerbitzuak egin baino lehen ordaindu behar dira, premia larriko kasuetan edo Kontzejuko bulegoek jaieguna dutenetan izan ezik. Horrelakoetan langileak oharra jasoko du eta horren berri emanen die Kontzejuko bulegoei, behar den tarifa ordainarazteari ekin diezaioten.
Nafarroako Toki Ogasunei buruzko Legearen 108. artikuluan xedatuari jarraituz, tasak autolikidazio bidez eskatuko dira.
AZKEN XEDAPENA
Bakarra.–Ordenantza hau indarrean jarriko da eta ondorio juridiko osoak sortuko ditu testu osoa Nafarroako Aldizkari Ofizialean argitaratu ondoren.
ERANSKINA
Lurpeko ehorzketak eta kolunbarioak
1.–Ehorzketak, lurrean:
a) Etxabarrin erroldatuta daudenak eta bertan bizi direnak: salbuetsita.
b) Etxabarrin erroldatuta ez daudenak: zerbitzuaren kostua + 300 euro.
2.–Kolunbarioak:
a) Etxabarrin erroldatuta daudenak eta bertan bizi direnak: 300 euro lehendabiziko errauts kutxagatik.
b) Etxabarrin erroldatuta ez daudenak eta bertan bizi ez direnak: zerbitzuaren kostua + 500 euro. Lehen errauts kutxarako.
c) Bigarren, hirugarren eta laugarren errauts kutxarako:
–Etxabarrin erroldatuta daudenak eta bertan bizi direnak: 50 euro.
–Etxabarrin erroldatuta ez daudenak edo bertan bizi ez direnak: 200 euro gehi zerbitzuaren kostua.
3.–Hobitik ateratzea: zerbitzuaren kostua.
Iragarkiaren kodea: L2114213
