Iragarkia

146. ALDIZKARIA - 2021eko ekainaren 23a

1. NAFARROAKO FORU KOMUNITATEA

1.7. BESTELAKOAK

244/2021 EBAZPENA, maiatzaren 18koa, Basoen eta Ehizaren Zerbitzuko zuzendariak emana, zeinaren bidez aldatzen baita Basoen eta Ehizaren Zerbitzuko zuzendariaren martxoaren 8ko 99/2021 Ebazpena. Horren bitartez, behar den prozedura onetsi zen Urbasa eta Andia ondare mendietan larre azalerak eskatu eta eskaera onartzeko, eta Urbasa eta Andia ondare mendietako larreen erabiltzaileei emandako azalerak onetsi ziren 2021eko kanpainarako.

Basoen eta Ehizaren Zerbitzuko zuzendariaren martxoaren 8ko 99/2021 Ebazpenaren bidez, behar den prozedura onetsi zen Urbasa eta Andia ondare mendietan larre azalerak eskatu eta eskaera onartzeko, eta Urbasa eta Andia ondare mendietako larreen erabiltzaileei emandako azalerak onetsi ziren 2021eko kanpainarako.

99/2021 Ebazpenaren I. eranskinean, behar diren prozedura eta irizpideak ezartzen dira onuradun izan daitezkeenek aldaketak eska ditzaten.

Apirilaren 15eko Ebazpenaren esleipena argitaratu eta jakinarazi ondoren, eskatzaileek 10 eguneko epea zeukaten esleipenaren aldaketa eskatzeko, esleipen berriak, uko egiteak, murriztapenak eta handitzeak eskatzeagatik, baita eskualdaltzeak ere.

Aipatu epea iragan da eta honako hauek jaso dira Nafarroako Gobernuaren erregistroetan: esleipen berrirako 13 eskaera, 3 uko egite, murriztapen bat, 4 handitze eta 10 eskualdatze. Nekazaritza Zerbitzuko Etekinetarako Laguntzen Atalak onartu ditu horiek guztiak.

Nekazaritza Zerbitzuak eta Baso Plangintzarako eta Ingurumen Hezkuntzarako Atalak emandako txostenak ikusi dira.

Horrenbestez, erabiliz Ingurumeneko zuzendari nagusiaren azaroaren 8ko 107/2019 Ebazpenaren bidez emandako eskumenak (ebazpen horren bidez, Basoen eta Ehizaren Zerbitzuaren esku uzten dira Ingurumeneko zuzendari nagusiak esleituta dituen zenbait eskumen),

EBAZTEN DUT:

1. Aldatzea Urbasa eta Andia ondare mendietan erabilera erkideko larre azaleren 2021erako esleipena, eranskinean agertzen denaren arabera. Honako hauek dira aldaketen arrazoiak: uko egiteak, titulartasunaren aldaketak, azaleren murriztapenak eta handitzeak eta eskaera berriak.

2. Ebazpen hau jakinaraztea Baso Plangintzarako eta Ingurumen Hezkuntzarako Atalari, Ingurumena Zaintzeko Atalari eta Nekazaritza Zerbitzuari, behar diren ondorioak izan ditzan.

3. Ebazpen hau Nafarroako Aldizkari Ofizialean argitaratzea.

4. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko eta Ingurumeneko kontseilariari zuzendua, hilabeteko epean.

Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2021eko maiatzaren 18an.–Basoen eta Ehizaren Zerbitzuko zuzendaria, Fermín Olabe Velasco.

Iragarkiaren kodea: F2108453