Iragarkia

119. ALDIZKARIA - 2021eko maiatzaren 21a

1. NAFARROAKO FORU KOMUNITATEA

1.7. BESTELAKOAK

12/2021 FORU AGINDUA, apirilaren 21ekoa, Lurralde Antolamenduko, Etxebizitzako, Paisaiako eta Proiektu Estrategikoetako kontseilariak emana, zeinaren bidez hasiera ematen baitzaio proiektu honek ukitutako ondasun eta eskubideak nahitaez desjabetzeko prozeduraren tramitazioari: Iruñerrian gai inerteen hondakindegiak ezartzeko Udalez gaindiko Proiektu Sektoriala eguneratzeko Proiektua, “Espartza Galarkoa handitzea” kokalekuari dagokionez.

Nafarroako Gobernuak 2001eko uztailaren 2an hartutako Erabakiaren bidez onetsi zen Iruñerrian gai inerteen hondakindegiak ezartzeko Udalez gaindiko Proiektu Sektoriala, “ANECOP-Asociación Navarra de Empresas de la Construcción y Obras Públicas” elkarteak sustaturikoa, kokaleku hauetarako: 1. Txitxibar (Getze Galar), 2. Espartza Galar (Galar), 3. Gazolatz (Zizur), 4. Aratzuri (Oltza), 7. Zabaldika (Esteribar) eta 8. Undio (Zizur) (2001eko 110. Nafarroako Aldizkari Ofiziala, irailaren 10ekoa).

Nafarroako Gobernuak 2010eko otsailaren 22an hartutako Erabakiaren bidez, “Iruñerrian gai inerteen hondakindegiak ezartzeko UPSa eguneratzeko proiektua” Udalez gaindiko Proiektu Sektoriala deklaratu zen. UPSa eguneratzeko proiektu hori behin betiko onetsi zen Nafarroako Gobernuak 2018ko maiatzaren 16an hartutako Erabakiaren bidez (2018ko 186. Nafarroako Aldizkari Ofiziala, irailaren 25ekoa). Proiektuaren determinazioak indarrean jartzeko, eskatu zen testu bategin bat aurkeztea eta araudia Nafarroako Aldizkari Ofizialean argitaratzea.

Eskatutako testu bategin hori aurkeztu eta balidatu ondoren, Ingurumeneko eta Lurraldearen Antolamenduko zuzendari nagusiaren martxoaren 1eko 149E/2019 Ebazpenaren bidez, UPSa eguneratzeko proiektuaren araudia Nafarroako Aldizkari Ofizialean argitaratzea xedatu zen (2019ko 76. Nafarroako Aldizkari Ofiziala, apirilaren 23koa). Gero, Abiazio Zibileko Zuzendaritza Nagusiak 2019ko maiatzaren 28an egindako txostenean proposatutako zuzenketak egin ondoren, ekainaren 17ko 350E/2019 Ebazpenaren bidez, araudia berriz argitaratzea xedatu zen (2019ko 150. Nafarroako Aldizkari Ofiziala, abuztuaren 2koa).

UPSa eguneratzeko proiektuak ezartzen du ezen erabiliko den jarduketa sistema nahitaezko desjabetzea izanen dela. Horiek horrela, Nafarroako Gobernuak 2021eko martxoaren 24an hartutako Erabakiaren bidez (2021eko 77. Nafarroako Aldizkari Ofiziala, apirilaren 8koa), deklaratu zen presakoa dela aipatutako eguneratze proiektuak (hots, Iruñerrian gai inerteen hondakindegiak ezartzeko Udalez gaindiko Proiektu Sektoriala eguneratzeko Proiektua, Recuperación Ambiental SLk sustatua, “Espartza Galarkoa handitzea” kokalekuari dagokionez) ukitutako ondasun eta eskubideen okupazioa, nahitaezko desjabetzearen ondorioetarako.

Aurrekoa guztia kontuan harturik, bat etorriz Lurralde Antolamenduko, Etxebizitzako, Paisaiako eta Proiektu Estrategikoetako Departamentuaren egitura organikoa ezartzen duen urriaren 30eko 262/2019 Foru Dekretuaren 2. artikuluak ematen dizkidan eskudantziekin,

AGINTZEN DUT:

1. Hasiera ematea honako proiektu honek ukituriko ondasun eta eskubideak nahitaez desjabetzeko prozeduraren tramitazioari: Iruñerrian gai inerteen hondakindegiak ezartzeko Udalez gaindiko Proiektu Sektoriala eguneratzeko Proiektua, “Espartza Galarkoa handitzea” kokalekuari dagokionez.

2. Espartza Galar aldean gai inerteen hondakindegia handitzeko proiektu horrek ukitutako ondasun eta eskubideen zerrenda jendaurrean jartzea 15 egunez. Zerrenda hori foru agindu honen eranskin gisa agertzen da. Epe horretan proiektuak ukitzen dituela uste dutenek aukera izanen dute egokiak iruditzen zaizkien alegazioak egiteko, bai eta argitaratzen den zerrendan egindako akatsak zuzentzeko behar diren datuak aurkezteko ere. Alegazio-zuzenketa horiek Lurralde Antolamenduko Zuzendaritza Nagusiko Zerbitzu Juridikoaren eta Lurralde Plangintzaren Zerbitzuak Iruñean duen bulegora zuzenduko dira, González Tablas kalea, 9, 4. solairua. Hori helburu, interesdunek espedienteari buruzko dokumentazioa helbide horretan aurkezten ahalko dute, aldez aurretik hitzordua eskatuta sejot@navarra.es helbidearen bidez.

3. Foru agindu hau argitaratzea Nafarroako Aldizkari Ofizialean, Nafarroako Foru Komunitatean gehien zabaltzen diren egunkarietako batean eta Galar Zendeako Udalaren eta Zizur Zendeako Udalaren iragarki tauletan.

4. Foru agindu hau igortzea Ingurumen Zuzendaritza Nagusira, Lurralde eta Paisaia Zerbitzura eta Zerbitzu Juridikoaren eta Lurralde Plangintzaren Zerbitzura, eta jakinaraztea interesdunei, Recuperación Ambiental SLri, Galar Zendeako Udalari eta Zizur Zendeako Udalari, behar diren ondorioak izan ditzan.

Iruñean, 2021eko apirilaren 21ean.–Lurralde Antolamenduko, Etxebizitzako, Paisaiako eta Proiektu Estrategikoetako kontseilaria, José María Ayerdi Fernández de Barrena.

Iragarkiaren kodea: F2106510