Iragarkia

92. ALDIZKARIA - 2020ko maiatzaren 5a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

64/2020 FORU AGINDUA, apirilaren 17koa, Landa Garapeneko eta Ingurumeneko kontseilariak emana, Landa Garapeneko, Ingurumeneko eta Toki Administrazioko kontseilariaren otsailaren 27ko 61/2018 Foru Agindua aldatzen duena. Foru agindu horren bidez, araubide orokorra ezartzen da nekazaritza, ingurumen eta klimaren laguntzak (10. neurria) eta nekazaritza ekologikoarenak (11. neurria) eman, kudeatu eta kontrolatzeko Nafarroako Foru Komunitatean. Laguntza horiek Nafarroako Foru Komunitateko Landa Garapenerako 2014-2020 Programaren barnean daude.

Landa Garapeneko, Ingurumeneko eta Toki Administrazioko kontseilariaren otsailaren 27ko 61/2018 Foru Aginduaren bidez araubide orokor bat ezartzen da ingurumen eta klimaren laguntzak (10. neurria) eta nekazaritza ekologikoarenak (11. neurria) eman, kudeatu eta kontrolatzeko Nafarroako Foru Komunitatean. Laguntza horiek Nafarroako Foru Komunitateko Landa Garapenerako 2014-2020 Programaren barnean daude.

Landa Garapeneko, Ingurumeneko eta Toki Administrazioko kontseilariak martxoaren 14an emandako 53/20019 Foru Aginduaren bidez, aldatu egin zen 61/2018 Foru Agindu hori, eta VII bis kapitulua erantsi zitzaion, Nafarroako lehorreko lur erdi elkorretan karbonoa atzemateko laguntzak arautzen dituena.

640/2014 Erregelamenduaren 35. artikuluan konpromisoak ez betetzearen ondorioak arautzen dira, eta zehazten da ezen, baldintzak bete ezean, laguntzak ukatu edo partez kenduko direla, eta estatukideak, laguntza zenbatean ukatu edo kenduko den erabakitzeko orduan, kontuan hartuko duela ez-betetzearen larritasuna, hedadura, iraupena eta behin baino gehiagotan egin den.

61/2018 Foru Aginduaren 17.2, 25.2, 33.2, 41.2, 49.2, 57.2 eta 75.2 artikuluetan arautzen da nola aplikatuko diren Batzordearen 640/2014 Erregelamenduaren 35. artikuluan ezarritako penalizazioak. IV. eranskinean, taula bat ere biltzen da, penalizazio ehunekoak jasotzen dituena konpromisoak bete ez dituzten eremuen azaleraren arabera. Penalizazio horiek zenbait urtez aplikatu ondoren, ikusi da gehiegizkoak direla, eta aldatu behar direla, 640/2014 Erregelamenduaren 35.3 artikuluan ezarritakoa kontuan hartzeko.

Bestalde, arauen aplikazioa hobetzeko aldaketa batzuk sartu nahi dira, konpromisoak zehatzagoak izan daitezen, baina hasierako helburua aldatu gabe.

Otsailaren 27ko 61/2018 Foru Agindua aldatzeko prozedurari dagokionez, Nafarroako Foru Komunitateko Administrazioari eta foru-sektore publikoari buruzko martxoaren 11ko 11/2019 Foru Legearen 133. artikuluak xedatzen du ezen, lege aurreproiektu bat egin aurretik, kontsulta publiko bat sustatzen ahal dela, eta, erregelamendu proiektuen kasuan, berriz, kontsulta publiko hori sustatuko dela, Nafarroako Gobernu Irekiaren Atariaren bidez, non bilduko baita zer iritzi duten etorkizuneko arauaren eraginpean gerta litezkeen subjektuek eta ordezkaritza handieneko erakundeek.

Agindu hori betetzeko, otsailaren 27ko 61/2018 Foru Agindua aldatzeko aurretiazko kontsultaren tramitea eta entzunaldia emateko tramitea egin dira Gobernu Irekiaren eta Herritarrentzako Arretaren Zerbitzuaren bitartez, eta zuzenean aldaketa proposamenaren eraginpean dauden herritarrek eta entitate edo erakundeek ez dute inolako iradokizunik aurkeztu, ez tramite batean, ez bestean.

Dena dela, COVID-19ak eragindako ohiz kanpoko osasun egoera larriak eragin du alarma egoera deklaratzea martxoaren 14ko 463/2020 Errege Dekretuaren bidez, zeina martxoaren 27ko 476/2020 Errege Dekretuaren bidez luzatu baita 2020ko apirilaren 12ko 00:00ak arte. Luzapen horretan, deusetan galarazi gabe beste batzuk ere onartzea, martxoaren 14ko 463/2020 Errege Dekretuan ezarritako baldintza berberak bete beharko dira, halaxe ezarri baita martxoaren 27ko 476/2020 Errege Dekretuaren 1. eta 2. artikuluetan.

Horrenbestez, foru agindu hau prestatzeko prozedurari dagokionez, aplikatu beharra dago alarma egoera deklaratzen duen martxoaren 14ko 463/2020 Errege Dekretuaren hirugarren xedapen gehigarriaren 1. eta 2. puntuetan ezarritakoa, administrazio epeak eteteari dagokiona, hain zuzen, bertan ezartzen baita sektore publikoko entitateetako prozeduretako epemugak bertan behera gelditzen direla eta haiek tramitatzeko epeak eteten direla. Epeen zenbaketa berriz hasiko da errege dekretu horrek edo, hala badagokio, haren luzapenek indarra galtzen duten unean.

Dena dela, martxoaren 14ko 463/2020 Errege Dekretuaren hirugarren xedapen gehigarriaren 4. puntuak xedatzen du ezen, deusetan galarazi gabe aurreko ataletan ezarritakoa, errege dekretuak indarra hartzen duen unetik sektore publikoko entitateek ahalmena izanen dutela alarma egoera justifikatzen duten egitateei zuzen-zuzenean lotutako egoerei buruzko prozedura administratiboei jarraipena emateko, behar bezala arrazoituta, baita, interes orokorra babesteko edo zerbitzuen oinarrizko funtzionamenduari begira, ezinbestekoak diren prozedurei ere.

Alarma egoera deklaratu ondoren, zenbait salbuespen onartu dira nekazaritzaren alde egitearren. Hala, martxoaren 20ko INT/262/2020 Aginduak, zeinak COVID-19aren ondoriozko osasun krisiko egoera kudeatzeko xedez alarma egoera deklaratzen duen martxoaren 14ko 463/2020 Errege Dekretua garatu baitzuen trafikoari eta ibilgailu motordunen zirkulazioari dagokienez, 1.-2.k) artikuluan baimena ematen du ibilgailu hauek zirkulatzeko: nekazaritzako, abeltzaintzako eta arrantzako produktuak eta horien intsumoak ekoitzi, merkaturatu, eraldatu eta banatzeko ibilgailuak; nekazaritzarako, arrantzarako, abeltzaintzarako eta horiei lotutako industriarako makineria eta ekipamendua ekoitzi, banatu, alokatu eta konpontzeko ibilgailuak; eta nekazaritzako, abeltzaintzako, arrantzako eta elikagaien industriako hondakinak eta azpiproduktuak garraiatu eta tratatzeko ibilgailuak.

Bestalde, martxoaren 29ko 10/2020 Errege Lege-dekretuak, zeinaren bidez, COVID-19aren aurkako borrokaren testuinguruan herritarren mugikortasuna murrizteko asmoz, ordaindutako baimen berreskuragarri bat arautu baitzen funtsezko zerbitzuak ematen ez dituzten besteren konturako langileentzat, 2. eranskinean, funtsezko zerbitzuen kategorian sartzen ditu, bai merkatuaren hornidura-katean parte hartzen duten jardueretan aritzen diren langileak, bai premiazko ondasun eta zerbitzuak (elikagaiak barne) ekoizteko zentroetako zerbitzuen funtzionamenduan parte hartzen dutenak, eta, ondorioz, horien banaketa baimentzen da, jatorritik hasi eta azken destinoraino.

Azkenik, Lehendakaritzako, Berdintasuneko, Funtzio Publikoko eta Barneko kontseilariaren martxoaren 30eko 54/2020 Foru Aginduak, zeinaren bidez bertan behera uzten baita lantokietako jarduera presentziala Nafarroako Foru Komunitateko Administrazioaren eta haren erakunde autonomoen zerbitzuko langileentzat, funtsezko zerbitzu publikoentzat izan ezik, koronabirusaren (COVID-19) bilakaera epidemiologikoaren ondorioz, 2. puntuko h) letran, honako hauek hartzen ditu funtsezko zerbitzutzat, betiere foru agindu horretan araututako ondorioetarako: edozein kasutan eman beharrekoa den eta erabat ezinbestekoa den Administrazioaren jarduera bermatzeko gutxieneko zerbitzuak, ezartzen direnak, mantentzea bermatzeko beharrezkoak diren langileak. Nolanahi ere, gutxieneko zerbitzutzat hartuko dira edozein prestazio edo laguntza tramitatu eta baimentzeaz arduratzen diren unitateek ematen dituztenak.

Osasun krisialdi honetan, elikagaiak ekoizten lan egiten duten nekazari eta abeltzainen jarduera, beraz, merkatua hornitzeko katearen lehenengo begia da, baita premiazko ondasun eta zerbitzuak ekoizteko zentroetako zerbitzuen funtzionamendurako oinarria ere, ondasun horien barnean direla elikagaiak, edariak eta animalien elikagaiak. Izan ere, azken finean, haien jarduerak ahalbidetzen du gero ondasunak banatzeko kate guztia, jatorritik azken destinoraino.

Arau aldaketa hau, gainera, lagungarria izanen da nekazaritza arloko ekoizle guztientzat, eta hura onesteak aukera emanen du errore-tasak murriztuko dituzten penalizazioak aplikatzeko, eskaera berriak aurkeztu beharrik gabe, eta, orobat, nekazari eta abeltzainen ekonomia bultzatuko duten dirulaguntza hauek ordaintzeko; izan ere, likidezia eskainiko zaio nagusiki ETE gisako enpresek osatutako sektoreari, zeinek, berez, likidezia gabezia larria baitute.

Hori guztia kontuan harturik, eta martxoaren 14ko 463/2020 Errege Dekretuaren hirugarren xedapen gehigarriaren 4. puntuan jasotako salbuespenaren bidez emandako gaikuntza erabiliz, erabaki da foru agindu hau onesteko prozedurari jarraipena ematea, funtsezko helburu honekin: likidezia ematea interes orokorra babesteari begira eta oinarrizko zerbitzu baten funtzionamenduari begira funtsezkotzat jotzen den sektore bati, merkatua elikagaiz hornitzeko sektoreari, alegia.

Urtarrilaren 23ko 7/2013 Foru Dekretuaren azken xedapenetako bigarrenak (foru dekretu horren bidez Nekazaritza Bermatzeko Europako Funtsak (NBEUF) eta Landa Garapenerako Europako Nekazaritza Funtsak (LGENF) finantzatutako gastuak Nafarroako Foru Komunitatean ordaintzen dituen erakundea baimendu zen eta haren antolamendua eta funtzionamendua ezarri ziren) ahalmena ematen dio Landa Garapeneko, Ingurumeneko eta Toki Administrazioko kontseilariari, bere eskumenen barruan, behar diren xedapen guztiak emateko foru dekretua garatu eta betearazteko, eta bereziki, nekazaritzarako Europako funtsekin osorik edo hein batean finantzatzen diren dirulaguntzei buruzko arauak ezartzeko.

Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1 g) artikuluak ematen dizkidan eskudantziak erabiliz,

AGINTZEN DUT:

Artikulu bakarra.–Landa Garapeneko, Ingurumeneko eta Toki Administrazioko kontseilariaren otsailaren 27ko 61/2018 Foru Agindua aldatzea. Foru agindu horren bidez, araubide orokorra ezartzen da nekazaritza, ingurumen eta klimaren laguntzak (10. neurria) eta nekazaritza ekologikoarenak (11. neurria) eman, kudeatu eta kontrolatzeko Nafarroako Foru Komunitatean (laguntza horiek Nafarroako Foru Komunitateko Landa Garapenerako 2014-2020 Programaren barnean daude). Zehazki, artikulu hauek aldatzen dira:

1.–5. artikuluaren n) apartatua (olibadi zaharraren definizioa) aldatzen da, eta honela idatzita geldituko da:

“n) Olibadi zaharra: SIGPAC sistemaren barruko eremuak, laborantza-baldintza onetan mantentzen direnak, non eremuaren %75 baino gehiago 1955 baino lehenago landatutako olibondoek betetzen duten. Eremuaren beste %25a olibondo berriek edo zurezko beste labore batzuek bete dezakete”.

2.–(Nekazaritzako estepa habitatak hobetzeko laguntzan, 29. artikuluko h), j) eta k) konpromisoak aldatzen dira, eta honela idatzita geldituko dira:

“h) Lugorriko azalerak, laguntzaren xedeko oinarrizko azalera osoarekin alderatuta, urtero izanen duen portzentajea aldatuko da ustiategiaren udalerriaren arabera. Hartara, %40koa izanen da 1,8 T/ha-ko erregionalizazio indizea dutenetan, %37koa 2 T/ha-koa denean, %29koa 2,5 T/ha-koa denean, %26koa 2,7 T/ha-koa denean, %18koa 3,2 T/ha-koa denean, eta %10ekoa 3,7 T/ha-koa edo handiagoa denean. Ustiategi batek oinarrizko azalera udalerri batean baino gehiagotan duenean, erregionalizazio indizerik handiena daukan udalerriari dagokion lugorriaren portzentajea eskatuko zaio.

j) Faunarako lugorriak: urtero laguntzaren barnean sartzen den lugorriko azaleraren %50ean, gutxienez, ez da inolako nekazaritzako lanik eginen (lantzea, nibelatzea, sakanak kentzea, harriak kentzea, ereitea, tratatzea, landare hondarrak erretzea eta abar), aurreko uzta biltzen denetik uzta horren ondoko urteko irailaren 1era arte. Handik aurrera baimentzen da hura altxatzea. Baimentzen da udazkenean azaleko lur-lantze bakarra egitea, irauli gabe, azaroaren 1etik abenduaren 15era bitarte. Ingurumeneko lugorri kodeen bitartez deklaratuko da.

k) Faunarentzat ereitea: urtero, laguntzaren xedeko azaleraren %10ean, lekadunen estaldura bat erein eta aurkeztuko da, nekazaritzarako aprobetxamendurik izanen ez duena abuztuaren 1era arte. Baimentzen da abereak maiatzaren 1etik aurrera iragatea, lugorrian erein bada, edo abuztuaren 1etik aurrera, berriz, laboreak izan dituen lurzati batean. Irailaren 1etik aurrera altxatzea baimentzen da. Lekadunen laboreei dagozkien kodeekin edo ingurumeneko lugorri ereinari dagokionarekin deklaratuko da.”

3.–37. artikuluan (Nekazaritzako sistema mediterraneo jasangarriak zaintzeko laguntzaren konpromisoak eta bestelako betebeharrak), b) eta c) atalak aldatzen dira, eta honela idatzita geldituko dira:

“b) Olibondoen neguko inausketaren hondarrak lurzatian edukitzea, xehatu gabe, eta maiatzaren 30a baino lehen suntsitzea, olibondoaren pipiaren (Phloeotribus scarabaeoides Bern) kontra zeharka borrokatzeko.

c) Olibondoaren euliaren (Bactrocera oleae) kontra egiteko tratamenduak aplikatzen direnean, INTIAko abisu estazioaren zehaztapenei jarraituko zaie, eta ustiategiaren liburuan jaso beharko dira.”

4.–17., 25., 33., 41., 49., 57. eta 75. artikuluen 2. apartatua aldatzen da, eta honela idatzita geldituko da:

“2. Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Europako Parlamentuaren eta Kontseiluaren 1306/2013 (EE) Erregelamenduaren aplikazio-xedapenak ezarri ziren. Batzordearen martxoaren 11ko 640/2014 (EB) Erregelamendu Delegatuaren 35. artikuluaren araberako beste konpromiso edo betebehar batzuk ez betetzeak penalizazioak ezartzea ekarriko du, zehazki, IV. eranskinean deskribatutakoak, baldin eta ez-betetzeak egiten diren lurren eremua, guztira, ordainketetarako deklaratutako guztizko eremuaren %20 baino handiagoa edo 0,1 ha baino handiagoa bada”.

5.–63. artikuluko laguntzan (Estepako habitata hobetzea basoiloarentzat eta basoilo handiarentzat), h) konpromisoa aldatzen da, eta honela idatzita geldituko da:

“h) Faunarentzat ereitea: Titularrak zehazten dituen lurzatietan, 61. artikuluan adierazitako intereseko lekadunak ereiten ahal ditu. Abuztuaren 1a arte ez dute nekazaritzarako aprobetxamendurik izanen. Baimentzen da abereak ekainaren 15etik aurrera iragatea, lugorrian erein bada, edo abuztuaren 1etik aurrera, berriz, landuta dagoen lurzati batean. Baimentzen da irailaren 1etik aurrera altxatzea edo urriaren 20ra arte larratzea. Lekadunen laboreei dagozkien kodeekin edo ingurumeneko lugorri ereinari dagokionarekin deklaratuko da.”

6.–VII bis kapituluan (Nafarroako lehorreko lur erdi elkorretan karbonoa atzemateko laguntzak), 63 bis artikuluaren e), konpromisoa aldatzen da, eta honela idatzita geldituko da:

“e) Aragoi barietateko alpapazko landare estalkia mantentzea kontzesioaren xede diren lurzatietan, hitzartutako bost urteetan, estalki hori egoki mantentzeko. Eta, behar izanez gero, berriz ereinen da. Irailaren 1etik urriaren 31ra bitarte, azienda igarotzen ahalko da”.

7.–VII bis kapituluan, 66 bis artikuluaren 2. apartatua aldatzen da (Nafarroako lehorreko lur erdi elkorretan karbonoa atzemateko laguntzaren bateraezintasunak eta hautapen irizipideak), eta honela idatzita geldituko da:

“2. Eskaerek aurrekontuko gehieneko zenbatekoa gaindituz gero, lehentasun irizpide hauek erabiliko dira:

8.–2. apartatua eransten zaio 67 bis artikuluari (Nafarroako lehorreko lur erdi elkorretan karbonoa atzemateko laguntzan izaten diren ez-betetzeen mailaketa). Honelaxe dio:

“2. Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Europako Parlamentuaren eta Kontseiluaren 1306/2013 (EE) Erregelamenduaren aplikazio-xedapenak ezarri ziren. Batzordearen martxoaren 11ko 640/2014 (EB) Erregelamendu Delegatuaren 35. artikuluaren araberako beste konpromiso edo betebehar batzuk ez betetzeak penalizazioak ezartzea ekarriko du, zehazki, IV. eranskinean deskribatutakoak, baldin eta ez-betetzeak egiten diren lurren eremua, guztira, ordainketetarako deklaratutako guztizko eremuaren %20 baino handiagoa edo 0,1 ha baino handiagoa bada”.

9.–71. artikuluko i) konpromisoa aldatzen da (Produkzio ekologikorako laguntza), eta honela idatzita geldituko da:

“i) Bazka-azaleren aprobetxamendu estentsiboa mantentzea urteko abeltzaintza-karga egoki baten bidez (1,5 AzLUren eta 0,2 AzLUren arteko karga hektareako). Abere dentsitate hori kalkulatzeko, kontuan hartuko dira bazka ekologikoaren azalera, NNPEK-k larreetarako baimendutako azalera eta ustiategiaren abeltzaintza ekologiko estentsiboko AzLUak. Unitate horiek kalkulatzeko, SIMOGAN datu basean kontabilizatutako AzLUen batez bestekoa aterako da, eta horretarako, laguntza-eskaerak aurkezteko epea bukatu eta hurrengo bost hilabeteetako bakoitzaren lehendabiziko lanegunean dauden AzLUak kontabilizatuko dira. Ardi eta ahuntz aziendarako, ustiategi bakoitzaren urtarrilaren 1eko nahitaezko urteko zentsua hartuko da kontuan”.

10.–76. artikulua aldatzen da (ebaluazioa, segimendua eta kontrola), eta honela idatzita geldituko da:

“Eskaeren ebaluazioa, kontrol administratiboa eta ordainketaren ebazpen proposamena Nekazaritza Zerbitzuak eginen ditu; tokian berean egin beharreko kontrola, berriz, Ikuskapenen Atalak eginen du; horretarako, behar diren egiaztapenak eginen dira, eta eskatzaileak eskatzen zaion informazio osagarri osoa eman beharko du”.

11.–77. artikuluaren 3. apartatua aldatzen da (deialdiaren antolamendua, instrukzioa eta ebazpena), eta honela idatzita geldituko da:

“3. Foru agindu honetan aipatzen diren laguntzak ematea, ordaintzea eta ukatzea, arrazoibidez betiere, Nekazaritza eta Abeltzaintzako zuzendari nagusiari dagokio”.

12.–IV. eranskina aldatzen da, eta honela idatzita geldituko da:

AzLU edo hektarea kopuruari loturiko konpromisoak edo beste betebehar batzuk ez betetzearen portzentajeak eta penalizazioen mailaketa, tipifikatuak ez badaude bete ez denaren portzentajearen arabera, Batzordearen 640/2014 Erregelamenduaren 35. artikuluari jarraituz.

Azken xedapen bakarra.–Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra. Arau hau 2019ko otsailaren 1etik aurrera aurkeztu diren laguntza-eskaerei aplikatuko zaie.

Iruñean, 2020ko apirilaren 17an.–Landa Garapeneko eta Ingurumeneko kontseilaria, Itziar Gómez López.

Iragarkiaren kodea: F2004571