Iragarkia

72. ALDIZKARIA - 2020ko apirilaren 3a

1. NAFARROAKO FORU KOMUNITATEA

1.7. BESTELAKOAK

1880/2020 EBAZPENA, martxoaren 16koa, Pertsonen Autonomiarako eta Garapenerako Nafarroako Agentziako zuzendari kudeatzaileak emana, Nafarroako Foru Komunitatean garatzen duena landa eremuetan eta irletan Autonomiarako eta Mendekotasunaren Arretarako Sistemako zentro eta zerbitzuetarako langileak kontratatzeko erabiltzen den araubide berezia, Autonomiarako eta Mendekotasunaren Arretarako Sistemako Lurralde Kontseiluak 2017ko urriaren 19an hartutako Erabakiaren bidez arautu zena.

Autonomia pertsonala sustatzeari eta mendetasun-egoeran dauden pertsonak zaintzeari buruzko abenduaren 14ko 39/2006 Legeak 34. artikuluan ezarritakoarekin bat, Gizarte Zerbitzuen eta Autonomiarako eta Mendekotasunaren Arretarako Sistemaren Lurralde Kontseiluari dagokio zentroak, zerbitzuak eta entitateak egiaztatzeko irizpide komunak ezartzeko eskumena, deusetan galarazi gabe autonomia erkidego bakoitzak eta Estatuko Administrazio Orokorrak dituen eskumenak.

Horrenbestez, Lurralde Kontseilu horrek, 2015eko urriaren 7an egindako bilkuran, erabaki zuen Autonomiarako eta Mendekotasunaren Arretarako Sistemako zentro eta zerbitzuak egiaztatzeari buruzko 2008ko azaroaren 27ko Erabakia partez aldatzea.

Erabaki horrek landa eremurako eta irletarako araubide berezi bat ezartzen du, zeinaren arabera irletako landa eremuan eta landa eremuko udalerri txikietan kontratatzen ahal baitira eskatutako lanbide kualifikazioa ez duten pertsonak, baldin eta, batetik, bertan ez badago zaintzaile, gerokultore, etxeko laguntzako laguntzaile edo laguntzaile pertsonalaren kategorietarako egiaztagiria duen pertsonarik, eta, bestetik, kasuan kasuko Enplegu Bulegoak emandako ziurtagiriaren bidez frogatzen bada eskualdean ez dagoela ezaugarri horiek dituen enplegu-eskatzailerik; betiere lanpostu horiek horrela beteko dira profesional kualifikatuek bete arte edo horrela ari direnek dagokion kualifikazioa eskuratu arte. Horretarako, administrazio eskudunek, enpresekin batera, profesional horien egiaztapena lortzeko behar diren ekintzak sustatuko dituzte.

Landa eremutzat hartzen da Landa Ingurunearen Garapen Jasangarrirako abenduaren 13ko 45/2007 Legean ezarritakoa betetzen duena, eta, bai horretan, bai lurralde bakoitzaren idiosinkrasian oinarrituta, erabaki horren 10. ataleko hirugarren b) irizpidean aurreikusitako araudi autonomikoan garatuko da.

Landa Ingurunearen Garapen Jasangarrirako abenduaren 13ko 45/2007 Legearen 3. artikuluaren arabera, hau da landa ingurunearen definizioa: eremu geografiko bat, udalerrien edo toki entitate txikien elkartzeak osatua eta administrazio eskudunek zehaztua?, 30.000 biztanletik beherakoa eta km²-ko 100 biztanle baino gutxiagoko dentsitatea duena. Era berean, tamaina txikiko landa udalerriak dira 5.000 biztanletik beherako udalerriak, landa ingurunean daudenak.

Horrenbestez, Gizarte Zerbitzuen eta Autonomiarako eta Mendekotasunaren Arretarako Sistemaren Lurralde Kontseiluak 2017ko urriaren 19ko Erabakian ezarritakoarekin bat, eta Pertsonen Autonomiarako eta Garapenerako Nafarroako Agentziaren Estatutuak onesten dituen azaroaren 6ko 301/2019 Foru Dekretuaren bidez eman dizkidaten ahalmenak erabiliz,

EBAZTEN DUT:

Lehenbizikoa.–Xedea.

Honen xedea da Gizarte Zerbitzuen eta Autonomiarako eta Mendekotasunaren Arretarako Sistemaren Lurralde Kontseiluak 2017ko urriaren 19an hartutako Erabakiaren hirugarren ataleko B.5) puntua garatzea, Nafarroako Foru Komunitatean aplikatzeko.

Bigarrena.–Aplikazio esparrua.

Prozedura hau aplikatzeko esparrua Nafarroako Foru Komunitateko 5.000 biztanle baino gutxiago eta km²-ko 100 biztanle baino gutxiagoko dentsitatea duten udalerriek osatzen dute, alegia, ebazpen honen eranskinean jaso direnak.

Hirugarrena.–Kontrataziorako araubide bereziaren aplikazioa.

1.–Kasuan kasuko eskualdean ez dagoenean zaintzaile, gerokultore, etxeko laguntzako laguntzaile edo laguntzaile pertsonala izateko eskatzen den egiaztapena duen inor, eta frogatzen bada ez dagoela ezaugarri horiek dituen enplegu eskatzailerik, dagokion enplegu bulegoaren egiaztagiri baten bidez, kontratatzen ahalko dira, foru agindu honen eranskinean jasotzen diren udalerrietan, Autonomiarako eta Menpekotasunaren Arretarako Sistemako zentro eta zerbitzuetan eskatzen den lanbide kualifikazioa ez duten pertsonak, lanpostu horiek profesional kualifikatuek bete arte, edo pertsona horiek dagokion kualifikazioa lortu arte.

Horretarako, administrazioek, enpresekin batera, profesional horien egiaztapena lortzeko behar diren ekintzak sustatuko dituzte.

2.–Kontrataziorako araubide berezi hau betetzen dela frogatzeko, entitate kontratatzaileek dokumentazio hau jarri beharko dute Eskubide Sozialetako Departamentuaren eskura, hark eskatzen duenean:

a) Mendekotasuna duenaren errolda-ziurtagiria, ebazpen honen eranskinean jasotako udalerrietako batena.

b) Nafarroako Enplegu Zerbitzuaren ziurtagiria, egiaztatzen duena kasuan kasuko eskualdean ez dagoela kontratazioaren xede den lanbide kategoria duen enplegu eskatzailerik.

c) Langilearen konpromisoa, adieraziz parte hartuko duela lan esperientzia egiaztatzeko eta ebaluatzeko autonomia erkidegoek edo estatuak antolatzen dituzten prozesuetan, edo kasuan kasuko profesionaltasun-ziurtagiriei edo lanbide heziketako tituluei lotutako prestakuntza eginen duela.

Azken xedapena.–Ondorioak sortzeko data.

Ebazpen honen edukiak Nafarroako Aldizkari Ofizialean argitaratu eta biharamunetik sortuko ditu ondorioak.

Iruñean, 2020ko martxoaren 13an.–Pertsonen Autonomiarako eta Garapenerako Nafarroako Agentziako zuzendari kudeatzailea, Inés Francés Román.

ERANSKINA

Udalerria

Iragarkiaren kodea: F2004058