1. NAFARROAKO FORU KOMUNITATEA
1.7. BESTELAKOAK
Epe irekiera Manunet Europar Programaren 2020ko deialdian parte hartzeko. Programa horren barrenean, ikerketa arloko Nafarroako enpresa eta erakundeek aurkezten dituzten fabrikazioko teknologia aurreratuei buruzko I+G+b proiektuak egiten ahal dira nazioarteko lankidetzan.
Xedea.–Manunet programa, bereziki, honako enpresentzat dago bideratua: 2021-2022 aldian, proiektuaren lurralde eremuan diharduen beste entitateren batekin lankidetzan, fabrikazioko teknologia aurreratuei buruzko I+G+b jarduerak egin nahi dituzten Nafarroako enpresak. Hauexek dira proiektuak hautagai izateko baldintzak:
–Manunet programaren lurralde eremuko bi herrialde desberdinetako bi entitate independentek edo gehiagok parte hartzea proiektuan.
–Proiektuan, gutxienez ere, bi ETEk parte hartzea; eskualde/herrialde berekoak edo desberdinetakoak izan daitezke.
Ikerketarako eta ezagutzaren hedapenerako erakundeek ere (Batzordearen 651/2014 (EB) Erregelamenduaren 2. artikuluko 83. apartatuan definituak) hartzen ahal dute parte; betiere, proiektuak hautagai izateko baldintzak bete beharko dituzte.
Eskaerak aurkeztea.–Manunet deialdiak 2 fase ditu:
1. Lehen fasea: proiektuaren aurre-proposamenak aurkeztea. Eskaerak lehen fasean aurkezteko epea 2020ko urtarrilaren 13an hasi eta martxoaren 17an bukatuko da. Aurre-proposamenak ebaluatuta, ebaluazioa gainditzen dutenak bakarrik igarotzen ahalko dira bigarren fasera.
2. Bigarren fasea: proposamen xehatua aurkeztea. Eskaerak bigarren fasean aurkezteko epea 2020ko uztailaren 16an bukatuko da.
Parte hartzeko baldintzak, eskaera egiteko inprimakiak eta abar proiektuaren web-orrian aztertu eta jaso daitezke:
http://www.manunet.net.
Finantzaketa.–Unibertsitateko, Berrikuntzako eta Eraldaketa Digitaleko Departamentuaren araudi indardunari jarraituz finantzatuko dira bazkide nafarrei onesten zaizkien proiektuak, horretarako argitaratzen den laguntza-deialdiaren esparruan.
Iruñean, 2019ko abenduaren 20an.–I+G+b Zerbitzuko zuzendaria, Ana M.ª Vicente Alzuaz.
Argibide gehiago nahi izanez gero, hona jo:
–Berrikuntzako Zuzendaritza Nagusia.
–I+G+b Zerbitzua.
–Cabárceno kalea 6, 3. solairua, 31621 Sarriguren.
–Telefonoa: 848 427658.
Iragarkiaren kodea: F1916550
