Iragarkia

268. ALDIZKARIA - 2020ko azaroaren 17a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

81/2020 FORU DEKRETUA, azaroaren 4koa, “Nafarroako Ubidearen 1. fasea handitzea” proiektuko eremu ureztagarriaren eremu osagarriak Nafarroako Foru Komunitateko Ureztatze Planeko jarduketen zerrendan sartzea onesten duena.

Nafarroako Foru Komunitateko Ureztatze Planean sartutako ureztalurretako jarduketei eta obrei buruzko martxoaren 16ko 7/1999 Foru Legearen 2. artikuluak hauxe ezartzen du, hitzez hitz: “Nafarroako Gobernuak ahalmena du, foru lege honen eranskinean eta Ureztatze Planean agertzen diren jarduketa, obra, eremu eta diru-zenbatekoetan aldaketa justifikatuak egiteko foru dekretu bidez, Nekazaritzako Azpiegituren Erreformari buruzko abenduaren 9ko 18/1994 Foru Legeari jarraikiz, kasuan-kasuan gertatzen diren inguruabarrak ikusita”.

Aipatu 7/1999 Foru Legearen 3.1 artikuluak ezartzen duenez, foru lege horren eranskinean aipatzen diren jarduketen eta obren onura publikoa eta interes orokorra deklaratzen da, baita, 2. artikuluan adierazitakoari jarraikiz, Nafarroako Gobernuak gehitzen dituenena ere, indarra duen legerian ezarritako bidezko helburu eta ondorioetarako. Gobernuaren ahalmen hori erabili zen Nafarroako Foru Komunitateko Ureztatze Planean sartu ziren aldaketa batzuetan. Horien artean daude irailaren 5eko 102/2012 Foru Dekretuaren bidez sartu zirenak (foru dekretu horren bidez, “Nafarroako Ubidearen 1. fasea handitzea” proiektuko eremu ureztagarria Nafarroako Foru Komunitateko Ureztatze Planeko jarduketen zerrendan sartzea onetsi zen).

Aldez aurretik, Nafarroako Ubidearen eraikuntzari dagokionez, Ingurumeneko eta Landa eta Itsas Inguruneko Ministerioaren eta Nafarroako Foru Komunitatearen arteko Lankidetza Hitzarmenaren Jarraipen Batzordeak egindako zortzigarren bilkuran, 2012ko uztailaren 31n, Batzordeak proposatu zuen bi administrazioei eta Canal de Navarrra, SA sozietateari proposatzea beharrezkoak diren jarduketak egin ditzatela honako alderdi hauek, besteak beste, aintzat hartu eta garatzeko:

1. Nafarroako Ubidearen 1. fasearen handitzea Nafarroako Ubidearen zati gisa ezartzea ondorio guztietarako, alde batera utzi gabe Ebroko Konfederazio Hidrografikoan eremu ureztagarria handitzeko espedientea tramitatu beharra, betiere gaur egungo emakidarekin alderatuta eta emaria handitu gabe.

2. Nafarroako Ubideari eta haren eremu ureztagarriari buruzko Udalez gaindiko plan sektoriala eta ingurumen inpaktuaren adierazpena egunera daitezela sustatzea, Nafarroako Ubidearen 1. fasea handitzearekin lotzeko.

2013ko abuztuaren 28an, Nekazaritza, Elikadura eta Ingurumen Ministerioak eta Nafarroako Foru Komunitateak Nafarroako Ubidea eraikitzeko elkarren arteko lankidetza hitzarmenaren hirugarren gaurkotzea izenpetu zuten. Horretan ezartzen da ezen “Nafarroako ubidearen 1. fasean sartuko dela 1. fasea handitzea, zeinak 15.275 hektarea ureztatzeko aukera emanen baitu, Arga eta Ega ibaien artean. Halaber, Nafarroako Ubidearen 2. fasea eraikiko da hasierako proiektuan ezarri ziren diseinu eta trazadurarekin, Ebroko Plan Hidrologikoan sartu zirenekin, eta 21.522 hektarea ureztatzeko tamaina izanen du”.

Halaber, Nafarroako Gobernuak 2013ko irailaren 25ean hartutako erabakiaren bidez, Nafarroako Ubidearen 1. fasearen eremu ureztagarria handitzeko Udalez gaindiko Proiektu Sektoriala onetsi zen. Sustatzailea Landa Garapeneko, Ingurumeneko eta Toki Administrazioko Departamentuko Landa Garapeneko Zuzendaritza Nagusia da. Bertan Ingurumen eta Uraren zuzendari nagusiaren abuztuaren 19ko 330E/2013 Ebazpenean ezarritako baldintzak sartzen dira (ebazpen horretan Nafarroako Ubidearen 1. fasearen –Arga-Egako adarra– eremu ureztagarria handitzeko proiektuari buruzko Ingurumen inpaktuaren adierazpena egin zen).

Nafarroako Ubidearen 1. fasearen handitzearen eremu ureztagarria sartzeak ekarri zuen Irati ibaitik, Itoizko urtegian, Longidako udal-mugartean (Nafarroa) deribatu beharreko azaleko uren emakidaren ezaugarriak (zeinaren titularra Nafarroako Ubidearen Ureztatzaileen Elkarte Orokorra baita, eta Nekazaritza, Elikadura eta Ingurumeneko ministroaren 2015eko urriaren 29ko Ebazpenaren bidez onetsi baitzen) aldatzea, Nafarroako Ubidearen eremu ureztagarrietako ureztatze-erabileretarako.

“Nafarroako Ubideko eremu ureztagarriaren 1. fasea handitzeko azpiegiturak egin eta ustiatzeko proiektua” adjudikatu eta geroko garapenean, aurreikusten ziren 15.275 ha horietan, alderdi batzuk kentzea erabaki da.

Hori da, esaterako Leringo udal-mugarteko ureztatze eremu tradizionalaren kasua, kendu zena ureztatzaileen elkarteak berak eskatu zuelako. Berdin gertatzen da Faltzesko, Azkoiengo eta Funesko udal-mugarteetako ureztatze eremu tradizionalen alderdi batzuekin, zeinak modernizatuko baitira uholde bidezko ureztapenari eutsiz. Era berean, Carcarko ureztatze eremu tradizionaleko Ureztatzaileen Elkarteak, hasierako proiektuan dagoenak, ez du ezer esan jarduketa horretan sartzeari buruz.

Hainbat udalek eskatu dute zenbait eremu sartzea jarduketa honetan; izan ere Nafarroako Ubidearen 1. fasearen eremu ureztagarria handitzeko Udalez gaindiko Proiektuaren jendaurreko tramitean aurkeztu ziren alegazioetan aditzera eman zen bezala, nahi dena da kendu diren eremuak ordezkatzea, eta haien ordez ondoko beste eremu osagarriak sartzea; eremu hauen jabeen arabera, ureztatzea gehiengoaren nahia bada, eremuok sartuko lirateke Nafarroako Ubidearen 1. fasearen handitzearen eremu ureztagarrian.

Eremu berriak sartzeak eta beste batzuk kentzeak Ega ibai arroa hornitzen duen adarraren trazatua eta ezaugarriak aldatzera behartzen dute. Aldaketa horiek bereziki eragiten diote UPSak Leringo eta Carcarko udal-mugarteetan onetsi duen trazaturari.

Nafarroako Ubidearen eta haren eremu ureztagarriaren lehen fasea handitzen duen udalez gaindiko proiektu sektorialaren aldaketak tramitatu dira. Aldaketek Egako adarraren trazatuari eta sartu beharreko eremu osagarriei eragiten zieten. Behin betiko onetsi ziren biak, Nafarroako Gobernuaren 2017ko uztailaren 19ko Erabakiaren eta 2019ko martxoaren 27ko Erabakiaren bidez, hurrenez hurren.

Erabakiek aintzat hartu dute Nafarroako Ubidearen lehen fasea handitzen duen udalez gaindiko proiektu sektorialaren aldaketaren ingurumen-inpaktuaren adierazpen nahitaezkoak eremu osagarriei buruz ezartzen duena (adierazpena Ingurumeneko eta Lurraldearen Antolamenduko zuzendari nagusiaren abenduaren 19ko 998E/2018 Ebazpenaren bidez onetsi zen). Ebazpen horretan eremu ureztagarri batzuk kentzen dira. Horien artean dago Alloko udal-mugartean dagoena (Okarin).

UPSaren aldaketan, eremu osagarriei buruzkoan, kanpoan geratu ziren Alloko eta Mendabiako udal-mugarteetako jarduketak, Ebroko Konfederazio Hidrografikoaren 2018ko apirilaren 9ko txostenak adierazten baitzuen horiek ez zeudela Nafarroako Ubidearen eremu ureztagarriaren alde ezarritako jabari-erreserbaren barruan. Mendabiako eremu osagarriaren kasuan (Beraza), kanpoan geratzea arrazoi administratibo huts batengatik gertatu zenez, eta hori konponduko denez eremu osagarria jabari-erreserban sartzen denean, bidezkoa da foru dekretu honen I. eranskinean sartzea.

Nafarroako Ubidearen lehen fasearen handitzearen parte direnez, beharrezkoa da eremu osagarriak sartzea Nafarroako Foru Komunitateko Ureztalurren Planaren jarduketa-zerrendan, eta egin beharreko jarduketen onura publikoa eta interes orokorra deklaratzea.

Finantziazioari dagokionez, Nafarroako Foru Komunitateko Ureztatze Planean sartutako ureztalurretako jarduketei eta obrei buruzko 7/1999 Foru Legearen 5. artikuluan ezarritakoari jarraituko zaio.

Horrenbestez, Landa Garapeneko eta Ingurumeneko kontseilariak proposaturik, eta Nafarroako Gobernuak bi mila eta hogeiko azaroaren lauan egindako bilkuran harturiko erabakiarekin bat,

DEKRETATZEN DUT:

1. Onestea “Nafarroako Ubidearen 1. fasea handitzea” proiektuko eremu ureztagarriaren eremu osagarriak Nafarroako Foru Komunitateko Ureztatze Planeko jarduketen zerrendan sartzea.

Eremu osagarri horiek foru dekretu honen I. eranskinean agertzen direnak dira, 2.730 hektareako jarduketa-azalera hartzen dute eta finantzatzeko baldintza da aurrekontuan aski diru erabilgarri izatea, urriaren 7ko 212/2002 Foru Dekretuaren I. eranskineko “Nafarroako Ubidearen eremu ureztagarria” II.2 apartatuaren barruan (dekretu horrek aldaketak onetsi zituen Nafarroako Foru Komunitateko Ureztalurren Planaren jarduketa-zerrendan).

2. Egitekoak diren jarduketen onura publikoa eta interes orokorra deklaratzea.

Nafarroako Foru Komunitateko Ureztatze Planean sartutako ureztalurretako jarduketei eta obrei buruzko martxoaren 16ko 7/1999 Foru Legearen 3.1 artikuluari jarraikiz, onura publikokoak eta interes orokorrekoak deklaratzen dira nekazaritzako azpiegituretako obrak eta jarduketak, beharrezko obra hidraulikoak eraikitzeari buruzkoak eta “Nafarroako Ubidearen 1. fasea handitzea” proiektuko eremu ureztagarria ezarri eta funtzionamenduan jartzeko behar diren linea elektrikoak.

3. Tramitazio administratiboa.

Beraz, foru dekretu honek sartzen du “Nafarroako Ubidearen 1. fasea handitzea” Ureztalurren Foru Planaren barruan; alabaina, eremu ureztagarri hori garatzeko, beharrezkoa da jarduketak edukitzea emakida aldatzeko oniritzia, dagokion espedientean. Nafarroako Ubideko Ureztatzaileen Elkarte Orokorrak tramitatu behar du espediente hori, Ebroko Konfederazio Hidrografikoan, elkarte hori baita Nafarroako Ubidearen eremu ureztagarriaren ur publikoen aprobetxamenduaren emakidaren titularra.

4. Foru dekretu hau Nafarroako Aldizkari Ofizialean argitaratzea, argitaratzen den egunetik beretik ondorioak izateko. Aditzera ematen da ezen foru dekretu honek administrazio bidea amaitzen duela eta haren aurka, hautara, berraztertzeko errekurtsoa jartzen ahal dela, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita; edo, bestela, zuzenean aurkaratzen ahal dela Nafarroako Justizia Auzitegi Nagusiko Administrazioarekiko Auzien Salan, bi hilabeteko epean, argitaratu eta biharamunetik hasita.

Administrazio publikoek, berraztertzeko errekurtsoaren ordez, aurretiazko errekerimendua egin dezakete, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2020ko azaroaren 4an.–Nafarroako Gobernuko lehendakaria, María Chivite Navascués.–Landa Garapeneko eta Ingurumeneko kontseilaria, Itziar Gómez López.

I. ERANSKINA

Nafarroako Ubidearen 1. fasea handitzearen eremu
osagarrien zerrenda

Iragarkiaren kodea: F2013217