1. NAFARROAKO FORU KOMUNITATEA
1.7. BESTELAKOAK
2/2020 EBAZPENA, urtarrilaren 13koa, Lehendakaritzako eta Gobernu Irekiko zuzendari nagusiak emana, zeinaren bidez xedatzen baita Nafarroako Aldizkari Ofizialean argitaratzea Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, Nafarroako Parte-hartze Demokratikoari buruzko martxoaren 22ko 12/2019 Foru Legearen gainekoa.
Aintzat hartuz Konstituzio Auzitegiari buruzko urriaren 3ko 2/1979 Lege Organikoaren 33. artikulua, urtarrilaren 7ko 1/2000 Lege Organikoak aldatu zuena,
EBAZTEN DUT:
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen 2019ko abenduaren 17ko Erabakia, ebazpen honi eranskin gisa gehitu zaiona, Nafarroako Aldizkari Ofizialean argitara dadila xedatzea.
Iruñean, 2020ko urtarrilaren 13an.–Lehendakaritzako eta Gobernu Irekiko zuzendari nagusia, Joseba Asiain Albisu.
ESTATUKO ADMINISTRAZIO OROKORRAREN ETA NAFARROAKO FORU KOMUNITATEAREN ARTEKO LANKIDETZA BATZORDEAREN ERABAKIA NAFARROAKO PARTE-HARTZE DEMOKRATIKOARI BURUZKO MARTXOAREN 22KO 12/2019 FORU LEGEAREN GAINEAN
Estatuko Administrazio Orokorraren eta Nafarroako Foru Komunitatearen arteko Aldebiko Lankidetza Batzordeak erabaki hau hartu du:
1. Estatuko Administrazio Orokorraren eta Nafarroako Foru Komunitatearen arteko Aldebiko Lankidetza Batzordearen 2019ko ekainaren 17ko Erabakiaren bidez lantalde bat sortu zen Nafarroako Parte-hartze Demokratikoari buruzko martxoaren 22ko 12/2019 Foru Legea dela-eta sorturiko desadostasunak aztertzeko eta konponbiderako proposamen bat aurkezteko. Lantalde horretan izandako negoziazioekin bat, bi alderdien iritziz konponduta daude desadostasun horiek, konpromiso hauek hartuta:
a) 12/2019 Foru Legearen 25. artikulua dela-eta izandako auziari dagokionez, bi alderdiek uste dute Konstituzio Auzitegiaren doktrinan zehaztutako eran interpretatu behar dela agindu hori, eta, bereziki, ekainaren 11ko 137/2015 Epaiari jarraitu behar zaiola. Epai horretan, erreferendum mailako kontsultak kontsulta orokor gisa hartzen dira, kasuan kasuko lurralde eremuko hautesle guztiei egiten baitzaie dei. Horrenbestez, agindu horretan aipatzen den Foru Komunitate edo toki mailako herritar-galdeketa, erreferendum mailakoa ez denez, deitutako herritarren talde edo sektore jakin bati galdeketa egiteko izanen da, ez beste deusetarako.
b) 12/2019 Foru Legearen 27. artikulua dela-eta izandako auziari dagokionez, bi alderdiak bat datoz interpretatzean herritar-galdeketetan parte hartzeko eskubidea izanen dutela galdeketaren gaiak ukitzen dituen talde edo sektoreetako herritarrek; horrela, herritar-galdeketa ez zaio hautesleria guztiari zuzenduko.
c) Nafarroako Foru Komunitateko Gobernuak konpromisoa hartzen du interpretazioko konpromiso hauek jasotzeko 12/2019 Foru Legea garatuko duten erregelamenduetan, edo, bestela, 12/2019 Foru Legea bera aldatuz.
2. Lortutako akordioaren bitartez, bi alderdiek uste dute konpondu direla agertutako desadostasunak eta bukatu dela azaldutako auzia.
3. Erabaki hau Konstituzio Auzitegiari jakinaraztea, Konstituzio Auzitegiari buruzko urriaren 3ko 2/1979 Lege Organikoaren 33.2 artikuluan aurreikusitako ondorioetarako, eta erabaki hau Estatuko Aldizkari Ofizialean eta Nafarroako Aldizkari Ofizialean argitaratzea.
Iragarkiaren kodea: F2000526
