1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
344E/2020 EBAZPENA, ekainaren 11koa, Osasuneko zuzendari nagusiak emana, 2020ko deialdia onesten duena lupus gaixotasuna duten pertsonen fotobabeserako dirulaguntzak emateko. DDBN identifikazioa: 513860.
2020ko ekitaldirako Nafarroako Aurrekontu Orokorretan dago “Lupus gaixotasuna duten pertsonen fotobabeserako laguntzak” izeneko 511004 51120 4819 311108 partida, 15.000 eurokoa.
Dirulaguntzei buruzko azaroaren 9ko 11/2005 Foru Legeak araubide juridiko orokorra ezarri zuen Nafarroako Aurrekontu Orokorren kargura ematen diren dirulaguntzetarako. Dirulaguntzak eman baino lehen, organo eskudunak oinarri arautzaileak ezarriko ditu, eta horiek argitaratu beharko dira, dirulaguntza jasotzeko moduan daudenek aukera izan dezaten haiek eskuratzeko.
11/2005 Foru Legearekin bat, ebazpen honen bidez onesten den deialdiaren xedea da dirulaguntzak ematea lupus gaixotasuna duten pertsonek fotobabeseko tratamenduak egin ditzaten 2020. urtean.
Espedienteko txosten tekniko eta juridikoek adierazten dute, hurrenez hurren, dirulaguntzen deialdia egokia eta interes publikokoa dela, eta deialdia eta oinarri arautzaileak legearen araberakoak direla. Espedientean jasota dago Ogasunak Osasun Departamentuan duen kontu-hartzailetza delegatuaren adostasuna.
Adierazitakoarekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32.1.d artikuluak ematen dizkidan eskudantziak erabiliz.
EBAZTEN DUT:
1. 2020ko deialdia onestea lupus gaixotasuna duten pertsonen fotobabeserako dirulaguntzak emateko, dirulaguntzaren oinarri arautzaileekin bat (ebazpen honen eranskinean daude jasota oinarri arautzaileok).
2. 15.000,00 euroko gastu gehienekoa baimentzea, eta hura ordaintzea 2020ko gastu aurrekontuetako “Lupus gaixotasuna duten pertsonen fotobabeserako laguntzak” izeneko 511004 51120 4819 311108 partidaren kargura.
3. Ebazpen hau eta eranskina Nafarroako Aldizkari Ofizialean argitara daitezela agintzea.
4. Dirulaguntzen deialdi hau Dirulaguntzen Datu Base Nazionalean erregistratzea.
Iruñean, 2020ko ekainaren 11n.–Osasuneko zuzendari nagusia, Carlos Artundo Purroy.
ERANSKINA
Oinarri arautzaileak, lupus gaixotasuna duten pertsonen fotobabeserako dirulaguntzak emateko 2020ko deialdiarenak
1. Dirulaguntzen xedea eta helburua.
Lupus gaixotasuna diagnostikatua duten pertsonek fotobabeseko tratamenduetan 2020. urtean egiten duten gastua osorik edo partez estaltzeko izanen dira dirulaguntzak. Haien onura publikoaren helburua da sostengua ematea ukitutako pertsonek fotobabesa egiteko dituzten behar berezietarako.
2. Onuradunen betebeharrak.
Betebehar hauek betetzen dituztenak izan daitezke onuradun:
–Lupus gaixotasuna izatea, medikuntzako profesional batek diagnostikatua.
–Ohiko bizilekua Nafarroan izatea, hots, 2020ko deialdia argitaratu aurreko bi urtean gaixoa Nafarroako Foru Komunitatean benetan bizi izana. Onuraduna bi urtetik beherakoa bada, jaiotzetik beretik Nafarroan benetan bizitzea eskatuko da. Betebehar honetatik salbuesten dira asilo-eskatzaileak eta beren familia-unitatekoak, asilo-eskubidea aitortzeko ebazpenak ezartzen duenaren arabera, edo familia luzapenagatik babes subsidiarioa ezartzen duen ebazpenaren arabera.
–Dirulaguntzei buruzko azaroaren 9ko 11/2005 Foru Legearen 13 artikuluan ezarritako debeku egoeretako batean ere ez egotea.
3. Eskaerak aurkezteko modua, tokia eta epeak.
3.1. Deialdi honetan ezarritako laguntzak eska ditzakete lupus gaixotasuna duten pertsonek, baita haien aitak, amak, tutoreak edo legezko ordezkariak ere, onuradunaren izenean, baldin hura adingabea bada edo ezintasuna badu.
3.2. Eskaerak onuradunaren izenean egon behar du beti. Adingabea edo tutoretzapeko adinez nagusia baldin bada, eskaera aurkezten duena ordezkari gisa agertuko da.
3.3. Eskaerak aurkezteko epea deialdi hau Nafarroako Aldizkari Ofizialean argitaratu eta biharamunean hasi eta hilabeteko epean bukatuko da.
3.4. Dirulaguntza jasotzeko eskaerak, lehentasunez, aurkeztuko dira Nafarroako Gobernuaren zerbitzuen katalogoko fitxa egokiaren bidez, eskaera izapidetzeko botoia sakatuta.
Halaber, aurkez daitezke Nafarroako Foru Komunitateko Administrazioaren Erregistro Orokor Elektronikoaren bitartez, edo Osasun Departamentuaren Erregistroan (Tutera kalea 20, 31002, Iruña), Osasuneko zuzendari nagusiari zuzenduta. Horrek ez du deusetan galaraziko urriaren 1eko 39/2015 Legearen 16.4 artikuluan ezarritakoa; lege horrek hizpide du Administrazio Publikoen Administrazio Prozedura Erkidea. Eskaerari deialdiaren 4. oinarrian adierazitako dokumentuak erantsi beharko zaizkio.
Postetxeetan aurkezten diren eskaerei dagokienez, gutun-azal ireki batean aurkeztuko dira, igorri aurretik aurkezpen datuak adieraz daitezen lehen orrialdearen idazpuruan, hots, bulegoaren izena, data eta tokia. Datu horiek adierazi beharko dira, orobat, eskaera igorri dela frogatzen duen gordekinean.
3.5. Eskaerak aipatutako baldintzak betetzen ez baditu, Osasun arloko Herritartasunaren, Aseguramenduaren eta Bermeen Zerbitzuak interesdunari eskatuko dio 10 egun balioduneko epean zuzendu ditzala, eta adieraziko dio, hala egiten ez badu, eskaerari uko egiten diola ulertuko dela eta artxibatu eginen dela, behar den ebazpena eman ondoren.
3.6. Dirulaguntza eskatzeak berekin dakar deialdi hau arautzen duten oinarriak onartzea.
4. Baldintzak betetzen direla frogatzea.
Deialdi honetako baldintzak betetzen direla frogatzeko, dirulaguntzaren eskaerari honako agiri hauek erantsiko zaizkio:
a) NAN/ANTaren fotokopia, edo onuraduna identifikatzen duen agiriarena.
b) Errolda-ziurtagiria edo, kasua bada, asiloa ematen dion ebazpena.
c) Medikuaren txostena, irizpen klinikoa jasoko duena.
5.1 oinarrian aipatutako batzordeak argibide-txostenak eskatzen ahalko dizkie onuradunei.
d) Lupus gaixotasuna duen pertsona adingabea bada edo ezintasuna badu, pertsona horren legezko ordezkaria izatearen frogagiriak. Aita edo ama bada, familia-liburua eta guraso baten NANa. Dibortzio kasuetan eta zaintza guraso bakar bati dagokionean, dibortzioaren epaia eta/edo dibortzioaren hitzarmena eta haren NANa. Tutorea edo legezko beste ordezkari bat izanez gero, horren frogagiria.
e) Ordainketa transferentzia bidez egiteko eskaera.
f) 5.2 oinarrian adierazitako zuzenketa-faktorea aplikatzen ahal zaien onuradunek gizarteratze-errenta/errenta bermatua onartu zaiela adierazten duen ebazpena aurkeztu beharko dute, edo genero-indarkeriaren biktima direla dioen frogagiria, Nafarroako Berdintasunerako Institutuak edo Nafarroako Delituen Biktimen Arretarako Bulegoak emana.
g) Eskatzailearen adierazpena, ereduaren araberakoa, adostasuna emateko datu pertsonalen tratamenduari, deialdi honen 12. oinarrian xedatutakoarekin bat.
h) Eskatzailearen adierazpena, ereduaren araberakoa, non adostasuna ematen baitu Osasun Departamentuak Ogasun Publikoan eta Estatuko Administrazio Orokorrean informazioa bildu dezan, jakiteko ea eskatzaileak bete dituen bere zerga betebeharrak, dirua itzultzekoak eta Gizarte Segurantzarekikoak.
i) Ez da beharrezkoa izanen a), b) c), d) eta e) puntuetan aipatzen diren agiriak aurkeztea, aurreko deialdietan aurkeztu baziren eta aipaturiko datuak aldatu ez badira.
5. Emateko modua, zenbatekoa eta irizpideak.
5.1. Osasuneko zuzendari nagusiaren ebazpen baten bidez emanen dira dirulaguntzak, instrukzio organoak proposaturik, hots, Herritartasunaren, Aseguramenduaren eta Bermeen Zerbitzuak proposaturik, aurretik ebaluazio batzorde batek eginen duen balorazio loteslea aintzat hartuta. Batzorde hori honako hauek osatuko dute:
–Antonio Merino Diaz de Cerio jauna, Osasun arloko Herritartasunaren, Aseguramenduaren eta Bermeen Zerbitzuko burua, batzordeburua izanen dena; eta ordezko gisa, Marife Idoate Cervantes andrea, Osasun Jardueren Ikuskapenerako Ataleko burua.
–Eva Lorente Elía andrea, Osasun arloko Herritartasunaren eta Aseguramenduaren Ataleko teknikaria; eta ordezko gisa, Mikel Biurrun Elizaga jauna, Osasun Jardueren Ikuskapenerako Ataleko teknikaria.
–Elena Antoñanzas Baztán andrea, Osasun arloko Herritartasunaren eta Aseguramenduaren Ataleko burua, idazkari lanetan ariko dena; eta ordezko gisa, Joaquín Asiain Isturiz jauna, Osasun arloko Herritartasunaren, Aseguramenduaren eta Bermeen Zerbitzuko teknikaria.
5.2. Ebaluazio Batzordeak egiaztatuko du ea onuradunek eta eskatzaileek betetzen dituzten dirulaguntzak jasotzeko betebeharrak, 2. oinarrian eskatzen direnak, eta diruz lagundu beharreko zenbatekoak proposatuko ditu, irizpide hauei jarraikiz:
–Laguntza bakoitzaren zenbatekoa zehaztuko da, aurrekontuko kredituaren eta eskaera kopuruaren arabera.
–Dirulaguntzaren banaketa orekatuagoa izan dadin, 2019. urtean eta/edo 2020. urtean eskatzailea genero-indarkeriaren biktima izan baldin bada, edo gizarteratze-errenta / errenta bermatua jaso duen familia-unitate batekoa, zenbateko unitarioa bider 1,5 eginen da.
–Laguntza bakoitzaren zenbatekoa ez da 271 eurotik gorakoa izanen, baita zenbateko unitarioa bider 1,5 egiten den kasuetan ere.
6. Ebazpena.
6.1. Osasuneko zuzendari nagusiak ebatziko du dirulaguntzak ematearen edo ukatzearen gainean, aurretik proposamena eginda Osasun arloko Herritartasunaren, Aseguramenduaren eta Bermeen Zerbitzuak.
6.2. Ebatzi eta jakinarazteko epea bi hilabetekoa izanen da gehienez, eskaerak aurkezteko epea bukatzen denetik hasita. Epe hori bukatuta, eskaera ezetsi dela ulertzen ahal dute interesdunek. Hala ere, Administrazioa beharturik dago ebazpena ematera.
7. Bateraezintasuna.
Deialdi honetan araututako dirulaguntzak bateraezinak dira entitate publiko edo pribatuek xede bererako ematen duten beste edozein dirulaguntza edo laguntzarekin.
8. Onuradunen betebeharrak.
Onuradunek edo, hala denean, haien legezko ordezkariek erantzukizunpeko adierazpen bat aurkeztu beharko dute, adierazteko ez dutela jaso xede bererako beste laguntzarik. Jasoz gero, haren zenbatekoa ere aipatu beharko dute.
Era berean, Dirulaguntzei buruzko Foru Legearen 9. artikuluan ezarritako betebeharrak bete beharko dituzte.
9. Dirulaguntzaren ordainketa.
Ordainketa bakarra eginen da, kontzesioaren ebazpenarekin batera edo hura onetsi ondoren.
10. Laguntza itzultzea.
Hartutako zenbatekoa itzuli beharko da, osorik edo partez, dirulaguntza emateko ezarritako baldintzak betetzen ez badira, edo Dirulaguntzei buruzko azaroaren 9ko 11/2005 Foru Legearen 35. artikuluan aipatzen diren zergatikoak gertatzen badira. Legez ezarritako kasuetan, gainera, bidezkoa izanen da dirulaguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.
11. Arau-hausteak eta zehapenak.
Dirulaguntzaren onuradunak, edo eskatzaileak, onuraduna adingabea baldin bada, Dirulaguntzei buruzko Foru Legearen 42. artikuluan eta hurrengoetan dirulaguntzen arloko arau-hauste administratiboei buruz ezarritako zehapen araubidearen mende egonen dira, eta hartan ezarritako erantzukizunak izanen dituzte.
Dirulaguntzen arloko zehapenak erregelamendu bidez finkatzen den prozeduraren arabera ezarriko dira, edo, halakorik izan ezean, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen VI. tituluan xedatutakoari jarraikiz.
12. Datuen babesa.
Eskaeran eta deialdi honetan eskatzaileak aurkeztutako gainerako dokumentazioan jasotako datu pertsonalak honako hauei jarraikiz tratatuko dira deialdia ebazteko: Europako Parlamentuaren eta Kontseiluaren apirilaren 27ko 2016/679 (EB) Erregelamendua, Datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa, eta abenduaren 5eko 3/2018 Lege Organikoa, Datu Pertsonalak Babestekoa eta Eskubide Digitalak Bermatzekoa.
Datuen tratamenduari buruzko informazioa Osasun Departamentuaren “Dirulaguntza, beka eta laguntzen kudeaketa” tratamenduan dago jasota; Nafarroako Gobernuko Atarian dago ikusgai, helbide elektroniko honetan:
http://www.gobiernoabierto.navarra.es/eu/gardentasuna/datu-pertsonalen-tratamendua
13. Argitaratzeko araubidea.
Onartzen diren dirulaguntzak ez dira argitaratuko, zeren, dirulaguntzaren xedea dela eta, onuradunen datuak zabaltzea pertsonen intimitatearen aurkakotzat jotzen baita, Dirulaguntzei buruzko azaroaren 9ko 11/2005 Foru Legearen 15.1.b) artikuluan ezarritakoaren arabera.
14. Aplikatu beharreko araudia.
Oinarri arautzaile hauetan ezarrita ez dagoen guztian, Dirulaguntzei buruzko azaroaren 9ko 11/2005 Foru Legearen xedapenak aplikatuko dira.
15. Errekurtsoak.
Deialdi honen, oinarri arautzaileen eta garatzeko egintzen aurka gora jotzeko errekurtsoa aurkezten ahal da, Osasuneko kontseilariari zuzendua, hilabeteko epean, argitaratu edo jakinarazi eta biharamunetik aurrera, bat etorriz Administrazio Publikoen Administrazio Prozedura Erkideari buruzko urriaren 1eko 39/2015 Legearekin eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearekin.
Iragarkiaren kodea: F2007901
