139. ALDIZKARIA - 2020ko ekainaren 24a

1. NAFARROAKO FORU KOMUNITATEA

1.7. BESTELAKOAK

51/2020 EBAZPENA, ekainaren 12koa, Lanbide Heziketako zuzendari nagusiak emana, jarraibideak onesten dituena 2020-2021 ikasturtean Nafarroako Foru Komunitateko hezkuntza sistemaren lanbide heziketako ikasketak eta arte plastikoetako eta diseinuko lanbide ikasketak ematen dituzten ikastetxeei dagozkien eskola-egutegia eta ordutegi orokorra prestatzeko.

Ikusirik Lanbide Heziketaren Plangintza eta Berrikuntzarako Zerbitzuko zuzendariak emandako aldeko txostena, zeinean proposatzen baita 2020-2021 ikasturtean Nafarroako Foru Komunitateko lanbide heziketako ikasketei eta arte plastikoetako eta diseinuko lanbide ikasketei dagokien eskola-egutegia prestatzeko jarraibideak onestea.

Hezkuntza Departamentuaren egitura organikoa ezartzen duen urriaren 30eko 267/2019 Foru Dekretuaren bidez esleitutako ahalmenak erabiliz,

EBAZTEN DUT:

1. Jarraibideak onestea Nafarroako Foru Komunitateko hezkuntza sistemaren lanbide heziketako ikasketak eta arte plastikoetako eta diseinuko lanbide ikasketak ematen dituzten ikastetxe publikoetan, ikastetxe pribatu itunduetan eta erakundeetan 2020-2021 ikasturtean izanen dituzten eskola-egutegia eta ordutegi orokorra prestatzeko. Eranskinean zehaztu dira.

2. Ebazpen hau eta eranskina Nafarroako Aldizkari Ofizialean argitara daitezela agintzea.

3. Ebazpen honen aurka gora jotzeko errekurtsoa jartzen ahalko da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

4. Ebazpen hau eta eranskina igortzea Hezkuntza Zuzendaritza Nagusira, Hezkuntza Baliabideen Zuzendaritza Nagusira, Lanbide Heziketaren Plangintza eta Berrikuntzarako Zerbitzura, Lanbide Kualifikazio, Enpresa eta Enplegurako Zerbitzura, Hezkuntzako Ikuskapen Zerbitzura, Antolamendu, Prestakuntza eta Kalitate Zerbitzura, Ikastetxeetako Informazioa Kudeatzeko Bulegora eta Eskolatze Bulegora, behar diren ondorioak izan ditzaten.

Iruñean, 2020ko ekainaren 12an.–Lanbide Heziketako zuzendari nagusia, Tomás Rodríguez Garraza.

ERANSKINA

Jarraibideak Nafarroako Foru Komunitatean hezkuntza sistemaren lanbide heziketako ikasketek eta arte plastikoetako eta diseinuko lanbide ikasketek izanen dituzten eskola-egutegia eta ordutegi orokorra prestatzeko, 2020-2021 ikasturterako

1.–Egutegia.

Nafarroako eskola-egutegiak klausula hauek beteko ditu:

1. Ikastetxeetan, hezkuntza sistemaren lanbide heziketako ikasketetarako eta arte plastikoetako eta diseinuko lanbide ikasketetarako, 2020-2021 ikasturtea 2020ko irailaren 1ean hasiko da, eta 2021eko ekainaren 30ean bukatuko.

Enplegurako lanbide heziketako ikastaroen eta langabe eta langileentzako ikastaroen prestakuntzaldia urte guztian zehar egin daiteke, Lanbide Heziketako zuzendari nagusiaren ebazpen batean garatuko den egutegi eta ordutegi orokor berariazko batekin.

2. Ikastetxeek egutegirako berariazko proposamen bat egin beharko dute hezkuntza sistemako lanbide heziketako ikasketetarako eta arte plastikoetako eta diseinuko lanbide ikasketetarako. Hauek dira baldintzak:

a) Eguberrietako oporrak: abenduaren 23tik urtarrilaren 8ra bitarte, biak barne.

b) Aste Santuko oporrak: apirilaren 1etik 11ra bitarte, biak barne.

c) Jaiegunak, Nafarroako lan egutegi arruntaren arabera: urriaren 12a, abenduaren 3a, abenduaren 7a, abenduaren 8a eta maiatzaren 1a. Gainera, 2021eko martxoaren 19a jaieguntzat hartuko da, printzipioz, 2021eko jaiegunen egutegi ofiziala onetsi bitarte. Egun hori, azkenean, laneguna bada, ikastetxeek eskola-egutegia egokituko dute, Lanbide Heziketaren Plangintza eta Berrikuntzarako Zerbitzuak emanen dituen jarraibideekin bat. Zerbitzu horrek, halaber, beharrezko jarraibideak emanen ditu erabakitzen bada beste jaiegunen bat ezartzea eta, horrenbestez, eskola-egutegia aldatzea.

d) Hezkuntzako zaindariaren jaieguna: urtarrilaren 31 hezkuntza sistemaren lanbide heziketako ikasketetarako, eta urriaren 22a arte plastikoetako eta diseinuko lanbide ikasketetarako. Ikastetxeek zilegi izanen dute beste egun batera pasatzea ospakizun hori.

e) Herriko jaieguna: Nafarroako Foru Komunitateko herrietako jaiegunak zehazten dituen arauan ezarritakoa. Data hori eskola-egun ez den egun batean tokatzen bada, ikastetxeak beste egun bat hautatzen ahalko du.

f) Aukeratutako eskola-egunez gainerako egunak, aurreko ataletan jaiegun gisa finkatu ez direnak, eskola gabeko lanegunak izanen dira, gehienez ere 5 egun, eskolak hasten direnetik amaitzen diren arte.

g) Ezin izanen dira erabili d), e) eta f) letretan aipatzen diren egunak Eguberrietako eta Aste Santuko oporraldiak luzatzeko.

h) Irakaskuntza mota bat baino gehiago ematen duten ikastetxeek egun bakar batean bateratzen ahalko dituzte irakaskuntza mota desberdinei dagozkien zaindarien jaiegunak, baina ez dituzte inolaz ere ezarriko zaindarien jaiegun guztiak ikasle guztientzat.

3. Horrez gain, ikastetxeek prestatuko duten egutegirako berariazko proposamenak baldintza hauek bete beharko ditu, ikasmailaren eta eskaintza modalitatearen arabera:

a) Modalitate presentzial orokorreko eskola-egunen kopurua:

–Lantokiko prestakuntza modulua lantokietan ez duten prestakuntza zikloetan, edo prestakuntzaldi praktikoa enpresa, estudio eta tailerretan ez duten zikloetan: 175 egun.

–Ikasturte guztian zehar prestakuntza modulua lantokietan duten prestakuntza zikloetan, edo prestakuntzaldi praktikoa enpresa, estudio eta tailerretan duten zikloetan: 175 egun.

–Ikasturtearen azken hiruhilekoan lantokiko prestakuntza modulua duten edo prestakuntzaldi praktikoa enpresa, estudio eta tailerretan duten prestakuntza zikloetarako, eskola-egunen kopurua zatiketa honetatik ateratzen dena izanen da: ikastetxeko prestakuntzarako curriculumak ezarritako orduak eguneko 5,5 eskola orduz zatituta ateratakoa. Lantokietan egiten den prestakuntza, oro har, ekainaren 15ean bukatuko da.

b) Eskola-egunen kopurua, modalitate dualeko ikastetxean: ikastetxeek egokituko dute ziklo, talde eta ikasle mota bakoitzarentzako eskola-egunen kopurua, kontuan harturik, horretarako, bai aipatu modalitatea garatzeko enpresa laguntzaileekin sinatutako hitzarmenak, bai prestakuntza planean xedatutakoa. Betiere, Lanbide Heziketaren Plangintza eta Berrikuntzarako Zerbitzuaren oniritzia eta Lanbide Kualifikazio, Enpresa eta Enplegurako Zerbitzuarena beharko dute horretarako.

c) Ikastetxean ematen diren moduluen azken ebaluazioaren deialdiei dagozkien probak egiteko diren ikasturteko egunak eskola-eguntzat joko dira.

Lanbide heziketako zikloak eta arte plastikoetako eta diseinukoak ez ezik, Batxilergoa eta Derrigorrezko Bigarren Hezkuntza ere irakasten dituzten ikastetxeetan, azken hiru eskola-egunak joko dira eskola-eguntzat ikasketa horietarako. Egun horietan, 2020-2021 ikasturteko deialdi bereziko azterketak eginen dira.

d) Lehenbiziko eskola-eguna 2020ko irailaren 4a edo 7a izanen da, eta azkena, berriz, 2021eko ekainaren 21a edo 22a.

e) Hezkuntza sistemako lanbide heziketako ikasketen eta arte plastikoetako eta diseinuko lanbide irakaskuntzen modalitate presentzial orokorra: lantokiko prestakuntza modulurik ez duen edo enpresetan, estudioetan eta lantegietan prestakuntzaldi praktikoa egiteko faserik ez duen ikasturtea:

–Ebaluazio partzialeko azken saioko ebaluazio probak eginen dira ebaluazio partzialeko azken saioa ekainean egin ahal izateko egunetan, kontuan hartuta ekainaren 4a edo 7a dela azken eguna ikasleei jakinarazteko ebaluazio partzialeko azken saioan gainditu diren moduluen edo gainditu gabe gelditu diren moduluen berri.

–Ikastetxeak antolatuko du denboraldi bat (azken ebaluazio partzialean gainditu diren eta gainditu ez diren moduluen berri emateko azken egunaren biharamunetik eskolak amaitzeko finkatu den azken egunera artekoa), berreskurapen programa garatzeko eta moduluaren programazioan ezarritako jarduerak aurrera eramateko, ikasleei aukera emateko dagokion modulua “gainditu gabe” kalifikazioarekin gelditzeko izan zituzten zailtasunak gainditzeko, eta amaierako ebaluazioa modu egokiagoan prestatzeko.

Ikastetxeak, halaber, curriculumeko errefortzurako jarduerak antolatuko ditu egun horietan Oinarrizko Lanbide Heziketako zikloetako ikasleentzat.

Aldi hori antolatzeko orduan, bete beharko da hezkuntza sistemaren lanbide heziketako ikasketak eta arte plastikoetako eta diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Lanbide Heziketako zuzendari nagusiak ematen duen ebazpenean ezarritakoa.

–Amaierako ebaluazioari dagozkion ebaluazio probak eta jarduerak ekainean eginen dira, kontuan izanda ekainaren 21a edo 22a azken eguna dela ikasleei amaierako ebaluazioari dagozkion kalifikazioak emateko.

f) Hezkuntza sistemaren lanbide heziketako irakaskuntzen eta arte plastikoetako eta diseinuko lanbide irakaskuntzen modalitate presentzial orokorra: lantokiko prestakuntza modulua duen ikasturtea, edo enpresetan, estudioetan eta lantegietan prestakuntzaldi praktikoa egiteko fasea duena, ikasturtearen hirugarren hiruhilekoan garatua:

–Prestakuntza modulua edo prestakuntzaldi praktikoa egin baino lehenagoko ebaluazio partzialaren probak eginen dira prestakuntza modulu hori edo prestakuntzaldia hasi baino lehenago. Ebaluazio partzialeko saio horretan erabakiko da moduluak gaindituta edo gainditzeko dauden, eta horretaz gain, prestakuntza modulua edo prestakuntzaldi praktikoa egitera pasatzen den edo ez erabakiko da, baita ere.

–Ikastetxeak antolatuko du denboraldi bat (prestakuntza modulua edo prestakuntzaldi praktikoa egin baino lehenagoko ebaluazio partzialaren emaitzen berri emateko azken egunaren biharamunetik eskolak amaitzeko finkatu den azken egunera artekoa), prestakuntza modulura edo prestakuntzaldi praktikora pasatzen ez diren ikasleentzat, edo gainditu gabeko moduluekin pasatzen diren ikasleentzat, berreskurapen programa garatzeko eta moduluen programazioan ezarritako jarduerak aurrera eramateko, ikasleei aukera emateko dagokion modulua “gainditu gabe” kalifikazioarekin gelditzeko izan zituzten zailtasunak gainditzeko, eta amaierako ebaluazioa modu egokiagoan prestatzeko.

Aldi hori antolatzeko orduan, bete beharko da hezkuntza sistemaren lanbide heziketako ikasketak eta arte plastikoetako eta diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Lanbide Heziketako zuzendari nagusiak ematen duen ebazpenean ezarritakoa.

–Amaierako ebaluazioari dagozkion ebaluazio probak eta jarduerak, oro har, ekainean eginen dira, kontuan izanda ekainaren 21a edo 22a azken eguna dela ikasleei amaierako ebaluazioari dagozkion kalifikazioak emateko.

Aipatu datek badute salbuespen bat: prestakuntza modulura edo prestakuntzaldira pasatu diren goi mailako heziketa zikloetako ikasleentzat, unibertsitatean sartzeko ebaluazio probak egin nahi badituzte, ikastetxean egindako moduluetatik amaierako ebaluazioari dagozkionen kalifikazioak emateko azken eguna izanen da kalifikazio horiek unibertsitatean sartzeko ebaluazio probaren deialdi arrunterako aurkezteko ezartzen den muga-eguna.

g) Lanbide heziketa dualaren modalitatea: enpresaren prestakuntza jarduerara joaten ez den kurtsoan, modalitate presentzial orokorrerako xedatutakoari lotuko zaio.

h) Lanbide heziketa dualaren modalitatea: enpresaren prestakuntza jarduerara joaten den kurtsoan:

–Ebaluazio partzialeko azken saioko probak egiteko egunak egokituko dira, ziklo, talde eta ikasle bakoitzerako, modalitate hori gauzatzeko enpresa laguntzaileekin izenpetutako hitzarmenetan xedatutakora eta kasuan kasuko prestakuntza planean xedatutakora.

–Ikastetxeak antolatuko du denboraldi bat (ebaluazio partzialaren azken saioaren emaitzen berri emateko azken egunaren biharamunetik eskolak amaitzeko finkatu den azken egunera artekoa), prestakuntza modulura edo prestakuntzaldi praktikora pasatzen ez diren ikasleentzat, edo gainditu gabeko moduluekin pasatzen diren ikasleentzat, berreskurapen programa garatzeko eta moduluaren programazioan ezarritako jarduerak aurrera eramateko, ikasleei aukera emateko dagokion modulua “gainditu gabe” kalifikazioarekin gelditzeko izan zituzten zailtasunak gainditzeko, eta amaierako ebaluazioa modu egokiagoan prestatzeko.

Aldi hori antolatzeko orduan, bete beharko da hezkuntza sistemaren lanbide heziketako ikasketak eta arte plastikoetako eta diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Lanbide Heziketako zuzendari nagusiak ematen duen ebazpenean ezarritakoa.

–Amaierako ebaluazioari dagozkion ebaluazio probak eta jarduerak, oro har, ekainean eginen dira, kontuan izanda ekainaren 21a edo 22a azken eguna dela ikasleei amaierako ebaluazioari dagozkion kalifikazioak emateko.

Aipatu datek badute salbuespen bat: goi mailako heziketa zikloetako ikasleentzat, unibertsitatean sartzeko ebaluazio proba egin nahi badute, ikastetxean egindako moduluetatik amaierako ebaluazioari dagozkionen kalifikazioak emateko azken eguna izanen da kalifikazio horiek unibertsitatean sartzeko ebaluazio probaren deialdi arrunterako aurkezteko ezartzen den muga-eguna.

4. Irailaren 1etik eskolak hasi bitarteko egunetan ikasturtearen antolaketarekin zerikusia duten jarduerak eginen dituzte irakasleek.

5. Eskolak bukatu eta ekainaren 30era arte, lan hauek eginen dira: ikasturtearen berrikusketa eta ebaluazio lan berariazkoak, modulu bakoitzaren memoria didaktikoak, departamentuen memoriak, azken memoria, orientazioa, erreklamazioak, ikasleak eta familiak hartzea eta beharrezkoak diren administrazio egintza guztiak, baita hurrengo ikasturtea antolatzearekin lotutako jarduerak ere.

6. Eskola-egunetan eskolak eteten ahalko dira, bai ebaluazio jarduerak egiteko, bai Hezkuntza Departamentuak lehentasunezkotzat jotzen dituen beste batzuk egiteko.

7. Oro har, ebaluazio bilkurak eta klaustroak ezin izanen dira eskola orduetan egin.

8. Ikastetxean egindako prestakuntza modulua, hezkuntza sistemaren lanbide heziketako zikloetan, eta prestakuntzaldia bai arte plastikoetako eta diseinuko heziketa zikloen kasuan, hasiko da ikastetxean egiten den modulua edo moduluen fasea baino lehen egiten den aldez aurretiko ebaluazio partziala egin eta gero; salbuespen dira, horri dagokionez, tenporalizazio desberdina egiteko baimena duten modalitate edo heziketa zikloak.

Orobat, lanbide heziketako zikloetan, proiektuaren lanbide modulua eginen da lantokiko prestakuntzaren modulua egiten den aldian, oro har, eta hori bukatu ondoren ebaluatuko da.

Azkenik, arte plastikoetako eta diseinuko erdi eta goi mailako heziketa zikloen amaierako obra eta amaierako proiektuaren modulua hasiko da egiten ikastetxean egindako moduluen prestakuntzaldia egin baino lehenagoko ebaluazio partziala egin eta gero.

2.–Ordutegi orokorra.

Nafarroako Foru Komunitateko ikastetxeetako ordutegiak baldintza hauek beteko ditu:

1. Eskolak, oro har, goizeko eta/edo arratsaldeko eskolaldietan emanen dira, astelehenetik ostiralera. Astean 30 eskolaldi emanen dira. Nolanahi ere, eskolak bai goizean bai arratsaldean ematen badira, bien artean, oro har, ordu eta erdiko atsedenaldia utzi beharko da gutxienez. Eskola saioak 55 minutukoak izanen dira gutxienez.

Lanbide heziketa dualaren modalitatean, eskolaldia egokituko da modalitate hori garatzeko enpresa laguntzaileekin sinatutako hitzarmenetan xedatutakora eta kasuan kasuko prestakuntza programetan xedatutakora.

Ikasketa metodologia berriak aplikatzen dituzten ziklo eta moduluetan, eskolaldiak metatzen ahalko dira, edo azpi-eskolaldietan zatitu, modu koherentean egokitu ahal izateko proiektu metodologikoak ezartzen duena ikasketaren inguru berriarekin. Metatze eta zatitze hauek egiten ahalko dira 258/1998 Foru Aginduaren 2.1.b) artikuluak ezartzen duena aplikatuz, egun bakoitzeko moduluak irizpide pedagogikoen arabera banatuz.

2. Bizpahiru eskola saioren ondoren, gutxienez ere 20 minutuko atsedenaldia programatuko da, uztailaren 16ko 258/1998 Foru Aginduaren 2.1.b) artikuluan ezartzen den moduan, ikastetxearen antolamendu beharren arabera.

3. Ikastetxeek eskola-ordutegia handitzeko eskatzen ahalko dute, zenbatean luzatu nahi duten proposatuta, ordubete gehienez ere egunean. Luzapen horrek ez du behin ere ekarriko ituna handitzea ikastetxe pribatu itunduetan, ez eta plantilla ere ikastetxe publikoetan. Hezkuntzako Ikuskapen Zerbitzuak onetsi edo ukatuko du, bideragarritasunaren arabera.

4. Lanbide Heziketa, arte plastikoetako eta diseinuko lanbide ikasketak, Batxilergoa eta Derrigorrezko Bigarren Hezkuntza ematen duten ikastetxeak herrigune berean edo eskola garraioaren ibilbide berean baldin badaude, eta gurasoen elkarteen eta Nafarroako Gobernuaren artean partekaturiko garraioaz baliatu ohi badira, beren artean koordinatuko dituzte sarrera-irteerako ordutegiak.

Gainera, eskola garraioaren zerbitzu horrekin bateragarria diren egutegia eta ordutegia aurkeztu beharko dituzte.

5. Egutegia eta ordutegi orokorra, onetsi ondoren, nahitaez bete beharko dituzte Nafarroako Foru Komunitateko ikastetxe publiko eta pribatu itundu guztiek. Ikastetxeko zuzendariaren erantzukizuna izanen da horiek betearaztea. Egutegien ezarpenaren gainbegiratzea eta kontrola, aldiz, Hezkuntzako Ikuskapen Zerbitzuaren gain egonen da.

6. Ikastetxe bakoitzaren egutegia eta ordutegi orokorra ikastetxeko iragarki oholean eta web-orrian jarri beharko dira, eta aldaezinak izanen dira, non eta Hezkuntzako Ikuskapen Zerbitzuak ez duen horretarako baimena ematen.

3.–Salbuespenak.

Aurreko edozein apartaturen gaineko salbuespenak Hezkuntzako Ikuskapen Zerbitzuari eskatu beharko zaizkio, hark aztertu eta onar edo bazter ditzan.

4.–Tramitazioa.

Tramitazioa egiteko, honela jokatuko da:

1. Ikastetxe bateratuetako zuzendariek, BHIen kasuan Eskola Kontseiluak onetsi ondoren, egutegi eta eskolaldi proposamenak bidaliko dituzte Hezkuntzako Ikuskapen Zerbitzura, 2020ko ekainaren 24an beranduenez, EDUCA kudeaketa programa erabiliz.

2. Hezkuntzako Ikuskapen Zerbitzuak egutegiak eta ordutegiak onetsi edo ukatuko ditu, aztertu ondoren. Hezkuntzako Ikuskapen Zerbitzuaren jakinarazpena ikastetxeei iritsiko zaie EDUCA kudeaketa programak ematen duen informatikako euskarriaren bidez. 2020ko ekainaren 26rako inolako jakinarazpenik hartzen ez duten ikastetxeetako egutegiak eta ordutegiak onetsitzat joko dira.

3. Ikastetxeren batek bere egutegiaren proposamena aipatu epean bidaltzen ez badu, Hezkuntzako Ikuskapen Zerbitzuak ofizioz esleituko dio 1. atalean (Egutegia) ezarritako baldintzak betetzen dituen egutegi bat. Eranskin honetako egutegia, hain zuzen.

4. Ikastetxeetako zuzendariek, baldin eta lanbide heziketa dualeko proiektuak garatzeko hitzarmena egutegia onetsi eta gero sinatu badute enpresekin, bidaliko dute egutegi eta eskolaldien proposamen berria Hezkuntzako Ikuskapen Zerbitzura, hitzarmena sinatu baino lehenago betiere, hitzarmen horren ondoriozko aldaketen berri emateko. Hezkuntzako Ikuskapen Zerbitzuak, proposatutako aldaketak aztertu ondoren, oharrak eginen ditu aldaketa horiek onartzearen aldeko txostena egin edo onartu ahal izateko.

5. Ikastetxeren batean onartu bada metodologia aktiboko proiektuak erabiltzea egutegia onartu eta gero, beren zuzendariek egutegiaren eta eskolaldiaren proposamen berria bidaliko diote Hezkuntzako Ikuskapen Zerbitzuari, txertaturik garatu beharreko proiektu metodologikoaren ondoriozko aldaketak. Hezkuntzako Ikuskapen Zerbitzuak, proposatutako aldaketak aztertu ondoren, oharrak eginen ditu aldaketa horiek onartzearen aldeko txostena egin edo onartu ahal izateko.

Iragarkiaren kodea: F2006087