1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
10E/2020 EBAZPENA, maiatzaren 27koa, Lurralde Antolamenduko zuzendari nagusiak emana, zeinaren bidez hasiera batez onesten baita “Salestarrak” Udalez gaindiko Plan Sektorialaren (UPS) aldaketa xehatua, Eguesibarko “saltegi handia” etxe-sailari dagokiona, Atalaya Superficies Comerciales SLk sustatua.
Espedientearen helburua da lerrokadurak aldatzea, eraikigarritasuna berrantolatzea, gehieneko solairu kopurua zehaztea eta onartutako erabilerak aldatzea, egokitu daitezen eremu horretan ezartzen ari den merkataritza eredura. Zehazki, hau proposatzen da:
–Aldatzea eraikinaren gehieneko lerrokadurak.
–Eraikigarritasuna solairuz solairu berrantolatzea: beheko solairuko eraikigarritasuna txikitzea, eta goiko solairuetakoa handitzea. Lurzatiaren eraikigarritasuna handitzen da, hirigintzako aprobetxamendua handitu gabe.
–Baimendutako gehieneko solairu kopurua handitzea, B+S+1etik B+2ra, aldatu gabe eraikinaren gehieneko altuera.
–Araudia aldatzea. 12. artikulua. Erabileren bateragarritasuna eta 50. artikulua. Ekonomia jarduerarako erabilera: saltegi handia.
Aldaketak etxe-sail bat ukitzen du, Salestarrak UPSan “Ekonomia jarduera. Saltegi handia” kalifikazioa duena. Lurzati hori C.1 kodearekin identifikaturik dago birpartzelazio proiektuan, baina erabileren araubidearen aldaketak beste etxe-sail batzuk ere ukitzen ditu, “Ekonomia jarduera. Hirugarren sektorekoa” kalifikazioa dutenak, hain zuzen.
“Salestarrak” Udalez gaindiko Plan Sektoriala indarrean dago, zeina onetsi baitzen Nafarroako Gobernuak 2012ko ekainaren 13an hartutako Erabakiaren bidez (2012ko 128. Nafarroako Aldizkari Ofiziala, uztailaren 3koa). Haren araudia 2013ko 29. Nafarroako Aldizkari Ofizialean argitaratu zen, otsailaren 12koan, eta UE-1 jarduketa unitateko C-1 lurzatiko xehetasun azterketa –aurrekoa garatzeko tramitatu zena–, berriz, onetsi zen Lurralde Antolamenduko, Mugikortasuneko eta Etxebizitzako zuzendari nagusiaren maiatzaren 7ko 202E-2015 Ebazpenaren bidez (2015eko 93. Nafarroako Aldizkari Ofiziala, maiatzaren 15ekoa).
2020ko urtarrilaren 15ean, Ingurumen Eraginaren Atalak txosten bat egin zuen, non zehazten baita beharrezkoa dela justifikatzea nola aplikatu diren “Salestarrak” UPSaren ingurumen inpaktuaren ebaluazioko neurriak, urbanizazio eta eraikuntza proiektuei buruzkoak. Halaber, espedientea tramitatzeari dagokionez, zehazten da aldaketa txikiek ingurumen ebaluazio estrategiko sinplifikatua behar dutela.
Horrez gain, txosten bana egiteko eskatu zaie Turismoa eta Merkataritza Antolatu eta Sustatzeko Zerbitzuari eta Iruñerriko Mankomunitateari. Txostenak prest daudenean, horietan ezarritakoa aplikatuko da.
Lurralde eta Paisaia Zerbitzuak txostena egin du espedienteari buruz, 2020ko martxoaren 5ean, eta Lurraldearen Antolamenduari eta Hirigintzari buruzko Foru Legearen testu bateginarekin bat (uztailaren 26ko 1/2017 Legegintzako Foru Dekretuaren bidez onetsia), eta urriaren 30eko 262/2019 Foru Dekretuaren bidez eman dizkidaten ahalmenak erabiliz (haren bidez ezartzen da Lurralde Antolamenduko, Etxebizitzako, Paisaiako eta Proiektu Estrategikoetako Departamentuaren egitura organikoa),
EBAZTEN DUT:
1. Abiaraztea espediente honen tramitazioa: “Salestarrak” Udalez gaindiko Plan Sektorialaren (UPS) aldaketa xehatua, Eguesibarko “saltegi handia” etxe-sailari dagokiona, Atalaya Superficies Comerciales SLk sustatua.
2. Sustatzaileak, espedientea ebatzi baino lehen, erantzuna eman beharko die Lurralde eta Paisaia Zerbitzuaren 2020eko martxoaren 5eko txostenean biltzen diren oharrei.
3. Halaber, sustatzaileak bete beharko du espedientea tramitatzean emandako txosten sektorialetan xedatutakoa.
4. Espedientea jendaurrean jartzea eta ukitutako udalari entzunaldia ematea, ebazpen hau Nafarroako Aldizkari Ofizialean argitaratuz. Bi tramite horiek aldi berean eginen dira, eta hilabete iraunen dute.
Ondorio horietarako, espedientea interesdunen eskura egonen da Lurralde Antolamenduko, Etxebizitzako, Paisaiako eta Proiektu Estrategikoetako Departamentuaren bulegoetan (Gonzalez Tablas kalea 9; 31005 Iruña), eta epe horretan zilegi izanen da idatziz nahi adina alegazio aurkeztea.
Gainera, dokumentua Nafarroako Gobernuaren zerbitzuen katalogoan kontsultatzen ahalko da, bai eta Landa Garapeneko, Ingurumeneko eta Toki Administrazioko Departamentuaren webguneko “Jendaurreko epea eta parte-hartze publikoa” izeneko atalaren bidez ere: www.ExposicionPublicaOT.navarra.es.
5. Ebazpen hau jakinaraztea, behar diren ondorioak izan ditzan, Eguesibarko Udalari, Ingurumen Eraginaren Atalari, Turismoa eta Merkataritza Antolatu eta Sustatzeko Zerbitzuari, Iruñerriko Mankomunitateari, Lurralde eta Paisaia Zerbitzuari eta espedientearen sustatzaileari.
Iruñean, 2020ko maiatzaren 27an.–Lurralde Antolamenduko zuzendari nagusia, Izaskun Abril Olaetxea.
Iragarkiaren kodea: F2005419
