1. NAFARROAKO FORU KOMUNITATEA
1.7. BESTELAKOAK
53/2019 EBAZPENA, apirilaren 3koa, Energiaren, Meatzaritzaren eta Industria Segurtasunaren Zerbitzuko zuzendariak emana, aurretiazko administrazio baimena ematen duena 2019an Nafarroako Foru Komunitateko zenbait udalerri eta hirigunetan gas natural kanalizatuaren sareak hedatzeko.
Gas erregaien banaketari eta erabilerari buruzko erregelamendu teknikoaren (uztailaren 28ko 919/2006 Errege Dekretuaren bidez onetsia) ITC-ICG 01eko 2. artikuluan ezarritakoa betez, Nedgia Navarra SA enpresak urteko baimen bateratua eskatu du ondoko udalerri eta hiriguneetan gas natural kanalizatuaren sareak hedatzeko 2019. urtean:
Ablitas, Aiegi, Alesbes, Allo, Altsasu, Andosilla, Antsoain, Agoitz, Aranguren (Mutiloa eta Taxoare), Arbizu, Arguedas, Arroitz, Artaxoa, Atarrabia, Azagra, Azkoien, Bakaiku, Barañain, Barillas, Baztan, Bera, Berbintzana, Beriain, Berriobeiti (Aitzoain), Berriozar, Bertizarana, Buñuel, Burlata, Cabanillas, Cadreita, Caparroso, Cárcar, Cascante, Castejón, Cintruénigo, Corella, Cortes, Doneztebe, Eguesibar (Gorraitz eta Olatz), Elgorriaga, Erriberri, Esteribar, Etxarri Aranatz, Ezkabarte (Arre), Faltzes, Fitero, Fontellas, Funes, Fustiñana, Galar (Cordovilla), Gares, Goizueta, Igantzi, Irunberri, Iruña, Irurtzun, Ituren, Iturmendi, Itza (Zuasti), Kaseda, Lakuntza, Larraga, Leitza, Lekunberri, Lerin, Lesaka, Ledea, Lizarra, Lodosa, Los Arcos, Martzilla, Mélida, Mendabia, Milagro, Miranda Arga, Monteagudo, Murchante, Murillo el Cuende (Arrada), Murillo el Fruto, Noain (Elortzibar) (Elortz, Noain, Torres, Imarkoain eta Zulueta), Obanos, Oibar, Olazti, Oltza Zendea (Arazuri eta Ororbia), Orkoien, Oteitza, Ribaforada, San Adrián, Santakara, Sartaguda, Sesma, Sunbilla, Tafalla, Tiebas Muru-Artederreta, Tutera, Tulebras, Uharte, Uharte Arakil, Urdiain, Valtierra, Viana, Villatuerta, Zangoza, Zarrakaztelu, Ziordia, Zizur (Zizur Txikia eta Gazolatz), Zizur Nagusia.
Instalazioei dagokienez, eskaera horretan aurreikusten dena egungo gas naturalaren sareak hedatzea eta aldatzea da. Sare horien jardueraren gehieneko presioa 5 bar edo gutxiagokoa da eta ez dira sartu berariazko proiektua izan duten edo izanen duten sareak. Sare horiek 16.302 metroko luzera dute, guztira. Aurrekontua 1.077.473,13 eurokoa da.
Nedgia Navarra SA enpresaren eskaera jendaurrean jartzeko tramitean jarri zen, iragarkia paratuz 2019ko 19. Nafarroako Aldizkari Ofizialean, urtarrilaren 29koan, eta “Diario de Navarra” nahiz “Diario de Noticias” egunkarietan, urtarrilaren 24an.
Eskaera jendaurrean jartzeko epean zehar Artaxoako Udalak alegazioak egin ditu, sareetan egin beharreko hedapenari dagokion obra-lizentzia Udalari eskatu behar zaiola eta udal ordenantzek xedatutakoaren arabera ezartzen diren baldintzak, zoladura berriz jartzea barne, bete egin behar direla adierazteko.
Nedgia Navarra SA enpresa banatzaileak, alegazio horiek jaso ondoren, honako hau adierazi du: ITC-ICG 01eko 2. artikuluan xedatutakoarekin bat, “...lehendik dauden sareak hedatzeko kasuetan, aurretiazko administrazio baimena txosten orokor batean oinarrituta eskatuko da, non gasa banatzeko instalazioak eraikitzeko urteko aurreikuspenak sartuko diren. Urte bakoitzeko lehen hiruhilekoan, enpresa banatzaileak aurreko urtean egindako lanen dokumentazio teknikoa jasotzen duen proiektua aurkeztuko du autonomia erkidegoko organo eskudunean, bakoitza zerbitzuan jartzeko eguna zehaztuta”.
Aipatu beharra dago kanalizazio bidez gas erregaiak banatzea ahalbidetzen duen baimen horrek ez duela ordezten udaletan eskatu beharreko obra-lizentzia. Udalak lizentzia horren bidez ezarriko ditu dagozkion baldintzak.
Hori horrela, eta lanak hasi aurretik, Nedgia Navarra SA enpresak nahitaezko udal-lizentzia eskatuko du eta, hala badagokio, udalerri horretako ordenantzek xedatutakoaren arabera egin beharreko birjartzeak egingo ditu.
Adierazitakoarekin bat, Industriaren, Energiaren eta Berrikuntzaren zuzendari nagusiak urtarrilaren 15ean emandako 48/2016 Ebazpenaren bidez eskuordetu dizkidan eskumenak erabiliz (2016ko 20. Nafarroako Aldizkari Ofiziala, otsailaren 1ekoa), eta Nafarroako Foru Komunitateko Administrazioari eta Foru-sektore publiko instituzional buruzko martxoaren 11ko 11/2019 Foru Legearen 32. eta 11. artikuluetan ezarritakoa betez,
EBAZTEN DUT:
1. Nedgia Navarra SA enpresari baimena ematea aipatu diren udalerri eta hiriguneetan gas natural kanalizatuaren sareak hedatzeko instalazioak gauzatzeko 2019. urtean.
2. Instalazio hori egiteko dokumentua, Carlos Álvaro Pereira meatze-ingeniariak sinatua, onestea, eta hamabi hilabete ematea obrak gauzatzeko.
3. Artaxoako Udalak aurkeztutako alegazioa partzialki baiestea.
4. Baimen hau ematen da beharrezkoak diren emakidak eta baimenak galarazi gabe, aplikatzekoak diren bestelako xedapenen, sektoreko legeriaren eta, bereziki, lurraldearen antolamenduari eta ingurumenari buruzko xedapenen arabera, ukitutako ondasun eta zerbitzuen jabe diren erakunde guztienak barne.
5. Bi hilabeteko epean, eta betiere instalazioen exekuzioa hasi baino lehen, aurkeztutako aurrekontuaren %2ko bermea jarri beharko du Nedgia Navarra SAk. Berme hori Nafarroako Gobernuko Garapen Ekonomikorako Departamentuan jarri beharko da eta instalazioak zerbitzuan jartzeko akta egin ondoren itzuliko da.
6. Instalazio berriak eta horien muntaketa, bai eta egungo instalazioen itxiera ere, indarreko araudian ezarritakoaren arabera eginen da.
7. Nedgia Navarra SAk urriaren 7ko 34/1998 Legearen 74. artikuluan ezarritako betebeharrak beteko ditu, zehazki, artikulu horren 1.d) atalean ezarritakoa.
8. Behin proiektua eginik, instalazioak zerbitzuan jarri eta hogeita hamar egun igaro baino lehen, Nedgia Navarra SAk uztailaren 28ko 919/2006 Errege Dekretuaren 5.7 artikuluan adierazitako dokumentazioa aurkeztu beharko du Energiaren, Meatzaritzaren eta Industria Segurtasunaren Zerbitzuan.
9. Ebazpen hau Energiaren, Meatzaritzaren eta Industria Segurtasunaren Zerbitzura igortzea, behar diren ondorioak izan ditzan.
10. Ebazpen hau Nedgia Navarra SAri jakinaraztea, eta ohartaraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Garapen Ekonomikorako kontseilariari zuzendua, hilabeteko epean, jakinarazpena jaso eta biharamunetik hasita. Hartan espediente zenbakia adierazi beharko da.
11. Ebazpen hau Nafarroako Aldizkari Ofizialean argitaratzea, orok jakin dezan.
12. Ebazpen hau Artaxoako Udalari eta ukitutako gainerako udalei jakinaraztea, eta aditzera ematea honen kontra administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, honako hau jakinarazi eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2019ko apirilaren 3an.–Azpiegitura Energetikoen Ataleko burua, Laura Larraya Irigoyen. Energiaren, Meatzaritzaren eta Industria Segurtasunaren Zerbitzuko zuzendariaren ordezkoa (Industriaren, Energiaren eta Berrikuntzaren zuzendari nagusiaren azaroaren 30eko 167/2017 Ebazpenaren bidez, 2017ko 240. Nafarroako Aldizkari Ofizialean argitaratua, abenduaren 18koan).
Iragarkiaren kodea: F1904734
