Iragarkia

71. ALDIZKARIA - 2018ko apirilaren 13a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

61/2018 FORU AGINDUA, otsailaren 27koa, Landa Garapeneko, Ingurumeneko eta Toki Administrazioko kontseilariak emana, araubide orokorra ezartzen duena Nekazaritza, ingurumen eta klimaren laguntzak (10. neurria) eta nekazaritza ekologikoarena (11. neurria) eman, kudeatu eta kontrolatzeko Nafarroako Foru Komunitatean. Laguntza horiek Nafarroako Foru Komunitateko Landa Garapenerako 2014-2020 Programaren barnean daude.

2015eko 106. Nafarroako Aldizkari Ofizialean, ekainaren 3koan, Landa Garapeneko, Ingurumeneko eta Toki Administrazioko kontseilariaren maiatzaren 20ko 209/2015 Foru Agindua argitaratu zen, araubide orokorra ezartzen duena Nekazaritza, ingurumen eta klimaren laguntzak (10. neurria) eta nekazaritza ekologikoarena (11. neurria) eman, kudeatu eta kontrolatzeko Nafarroako Foru Komunitatean. Laguntza horiek Nafarroako Foru Komunitateko Landa Garapenerako 20142020 Programaren barnean daude.

2016ko 77. Nafarroako Aldizkari Ofizialean, apirilaren 22koan, Landa Garapeneko, Ingurumeneko eta Toki Administrazioko kontseilariak apirilaren 1ean emandako 104/2016 Foru Agindua argitaratu zen, araubide orokorra ezartzen duena Nekazaritza, ingurumen eta klimaren laguntzak (10. neurria) eta nekazaritza ekologikoarena (11. neurria) eman, kudeatu eta kontrolatzeko Nafarroako Foru Komunitatean; laguntza horiek Nafarroako Foru Komunitateko Landa Garapenerako 2014-2020 Programaren barnean daude. Foru Agindu hori aldatu zen maiatzaren 23ko 174/2016 Foru Aginduaren bidez (2016ko 112. Nafarroako Aldizkari Ofiziala, ekainaren 10ekoa) eta akats zuzenketak egin zituen azaroaren 13ko 421/2017 Foru Aginduaren bidez (2017ko 229. Nafarroako Aldizkari Ofiziala, azaroaren 28koa).

2015eko azaroaren 18an Europako Batzordeak Nafarroako Landa Garapenerako 2014-2020 aldirako Programa onetsi zuen. Ondoren aldatu egin zen 2017ko maiatzaren 22ko C (2017) 3638 Erabakiaren bidez; erabaki horren bidez 11. neurriaren (nekazaritza ekologikoa) laguntzen zenbatekoak aldatu ziren eta 10. neurrian (nekazaritza, ingurumena eta klima) sartu ziren eragiketa bat (natura balio handiko zereal-agrosistemetan ardi aziendaren larratze jasangarria) eta azpi-eragiketa bat (estepako habitatak hobetzea basoiloarentzat eta basoilo handiarentzat).

Europako Parlamentuak eta Kontseiluak Landa Garapenerako Europako Nekazaritza Funtsaren (LGENF) bidez landa garapena laguntzeari buruz 2013ko abenduaren 17an onetsitako 1305/2013 (EB) Erregelamenduak zenbait neurri ezartzen ditu landa eremuen garapen jasangarrirako, besteak beste nekazaritza ekologikoaren laguntzak eta nekazaritza, ingurumen eta klimaren laguntzak. Batzordearen 2014ko martxoaren 11ko 807/2014 (EB) Erregelamendu Delegatuak osatzen du Europako Parlamentuaren eta Kontseiluaren 1305/2013 (EB) Erregelamendua.

Batzordearen 2014ko uztailaren 17ko 808/2014 (EB) Exekuzio Erregelamenduak xedapenak ezartzen ditu Europako Parlamentuaren eta Kontseiluaren 1305/2013 (EB) Erregelamendua aplikatzeko.

Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduak, nekazaritzako politika bateratuaren finantzaketari, kudeaketari eta jarraipenari buruzkoak, Kontseiluaren 352/78 (EE), 165/94 (EE), 2799/98 (EE), 814/2000 (EE), 1290/2005 (EE) eta 485/2008 (EE) Erregelamenduak indargabetzen ditu.

Batzordearen 2014ko martxoaren 11ko 640/2014 (EB) Erregelamendu Delegatuak Europako Parlamentuaren eta Kontseiluaren 1306/2013 (EB) Erregelamendua osatzen du kudeaketaren eta kontrolaren sistema integratuari dagokionez, ordainketak ukatu edo kentzeko baldintzei dagokienez eta ordainketa zuzenei, landa garapeneko laguntzari eta baldintzazkotasunari aplika dakizkiekeen zehapen administratiboei dagokienez.

Batzordearen uztailaren 17ko 809/2014 (EB) Exekuzio Erregelamenduak xedapenak ezartzen ditu Europako Parlamentuaren eta Kontseiluaren 1306/2013 (EB) Erregelamendua honako hauei dagokienez aplikatzeko: kudeaketaren eta kontrolaren sistema integratua, landa garapeneko neurriak eta baldintzazkotasuna.

Abenduaren 19ko 1075/2014 Errege Dekretuak erregulatzen ditu nekazaritzari eta abeltzaintzari 2015etik aurrera egiten zaizkien ordainketa zuzenak eta laguntzeko beste araubide batzuk, baita ordainketa zuzenen eta landa garapenerako ordainketen kudeaketa eta kontrola ere.

Abenduaren 26ko 2129/2008 Errege Dekretuak abere arrazak zaindu, hobetu eta sustatzeko programa nazionala ezarri ditu eta arrazen katalogo nazionala arautu.

2014-2020ko landa garapenerako esparru nazionalaren agiriak estatuko eta erregioetako programen estrategiak garatzen ditu, koadro finantzarioa bildu eta landa garapenerako neurriak aplikatzeko baldintzak harmonizatu.

Diru-laguntzei buruzko azaroaren 9ko 11/2005 Foru Legea aplikatuko zaio foru agindu honi.

Nafarroako Landa Garapenerako 2014-2020ko Programak ondoko laguntzak biltzen dituzten neurriak hartzen ditu:

10. neurria.–Nekazaritza, ingurumena eta klima:

1.–Hazitarako patataren nekazaritzako eta ingurumeneko ekoizpenerako laguntza.

2.–Abeltzaintzako sistema jasangarriak, animaliak larratuz eta sistema estentsiboa zabalduz.

3.–Nekazaritzako estepa habitatak hobetzea.

4.–Nekazaritzako sistema mediterraneo jasangarriak zaintzea.

5.–Galzorian dauden tokiko arrazak kontserbatu eta hobetzea.

6.–Natura balio handiko zereal-agrosistemetan ardi aziendaren larratze jasangarria.

7.–Estepako habitatak hobetzea basoiloarentzat eta basoilo handiarentzat.

11. neurria.–Produkzio ekologikoa.

1.–Nekazaritza ekologikoaren metodo eta jardunbideetara aldatzea.

2.–Nekazaritza ekologikoaren metodo eta jardunbideak mantentzea.

Foru agindu honen helburua da laguntza horiek eman, kudeatu eta kontrolatzeko araubide orokorra ezartzea, laguntzen kudeaketa hobetuko duten alderdiak zehazteko eta horiek Nafarroako Landa Garapenerako programaren helburuetara hobeki egokitzeko, izan diren arau aldaketak jasotzea, eta, argitasun eta erraztasunarengatik testu bakar batean biltzea 104/2016 Foru Agindua, egin zaizkion aldaketak eta akats zuzenketak.

Urtarrilaren 23ko 7/2013 Foru Dekretuaren azken xedapenetako bigarrenak (foru dekretu horren bidez Nekazaritza Bermatzeko Europako Funtsak (NBEUF) eta Landa Garapenerako Europako Nekazaritza Funtsak (LGENF) finantzatutako gastuak Nafarroako Foru Komunitatean ordaintzen dituen erakundea baimendu zen eta haren antolamendua eta funtzionamendua ezarri ziren) ahalmena eman dio Landa Garapeneko, Ingurumeneko eta Toki Administrazioko kontseilariari, bere eskumenen barruan, behar diren xedapen guztiak emateko foru dekretua garatu eta betearazteko, eta bereziki, nekazaritzarako Europako funtsekin osorik edo hein batean finantzatzen diren diru-laguntzei buruzko arauak, deialdiak eta oinarri arautzaileak ezartzeko.

Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan eskudantziak erabiliz,

AGINDU DUT:

I. TITULUA

Alderdi orokorrak

1. artikulua. Xedea.

Foru agindu honen helburua da araubide orokorra ezartzea Nafarroako Foru Komunitateko Landa Garapenerako 2014-2020ko Programaren barnean dauden ondoko neurri hauei dagozkien laguntzak eman, kudeatu eta kontrolatzeko Nafarroako Foru Komunitatean:

–10. neurria.–Nekazaritza, ingurumena eta klima:

–11. neurria.–Nekazaritza ekologikoa.

2. artikulua. Jarduteko eremua.

Foru agindu honetan ezarritako laguntzen araubidea Nafarroako Foru Komunitatean kokatutako nekazaritzako eta abeltzaintzako ustiategi guztiei aplikatuko zaie.

3. artikulua. Arau esparrua eta laguntzen identifikazioa.

1. Kontseiluaren 1698/2005 (EE) Erregelamendua indargabetzeko eta Landa Garapenerako Europako Nekazaritza Funtsaren bidezko landa garapeneko laguntzei buruz Europako Parlamentuak eta Kontseiluak 2013ko abenduaren 17an onetsitako 1305/2013 (EB) Erregelamenduaren 28. artikulua (Nekazaritza, ingurumena eta klima) eta 29.a (Nekazaritza ekologikoa).

2. 1305/2013 (EB) Erregelamendua osatzeko Batzordeak 2014ko martxoaren 11n onetsitako 87/2014 (EB) Erregelamendu Delegatuaren 7.a artikulua (Nekazaritza, ingurumena eta klima), 8.a (Baliabide genetikoak kontserbatzea nekazaritzan eta basozaintzan) eta 9.a (Klimarako eta ingurumenerako onuragarriak diren nekazaritzako jarduketen eta antzeko jarduketen finantzabide bikoitza baztertzea).

3. 1305/2013 (EB) Erregelamendua aplikatzeko xedapenak ezartzeko Batzordeak 2014ko uztailaren 17an onetsitako 808/2014 (EB) Exekuzio Erregelamenduaren 10. artikulua (Kostu gehigarriei eta diru-sarreren galerei buruzko hipotesi normalizatuak) eta 11.a (Konpromisoen konbinazioa eta neurrien konbinazioa).

4. artikulua. Nafarroako Landa Garapenerako 2014-2020 Programaren aipamena.

1. Laguntza hauek Nafarroako Landa Garapenerako 2014-2020ko Programaren barnean sartzen dira, zein 1305/2013 (EB) Erregelamendutik baitator, eta Landa Garapenerako Programan neurri hauei buruz ezarritakoari jarraituko diote:

–10. neurria.–Nekazaritza, ingurumena eta klima:

–11. neurria.–Nekazaritza ekologikoa.

2. Aplikagarria izanen da 1305/2013 (EB) Erregelamenduaren 48. artikuluan zehaztutako berrikuspen baldintza foru agindu honen babespean egindako kontratuetan, haiek egokituko direla bermatzeko baldin eta aplikatu beharreko nahitaezko arauak, betekizunak eta betebeharrak aldatzen badira.

5. artikulua. Definizioak.

1. Foru agindu honen ondorioetarako, ondokoetan zehaztutako definizioak aplikatuko dira: Europako Parlamentuaren eta Kontseiluaren 2013ko abenduaren 17ko 1305/2013 (EB) Erregelamendua, Landa Garapenerako Europako Nekazaritza Funtsaren bidezko landa garapeneko laguntzei buruzkoa; Europako Parlamentuaren eta Kontseiluaren 2013ko abenduaren 17ko 1307/2013 (EB) Erregelamendua, nekazaritzako politika bateratuaren esparruan laguntzaren araubideen arabera nekazariei ordainketa zuzenak egiteko aplikagarriak diren arauak ezartzeko; Batzordearen martxoaren 11ko 640/2014 (EB) Erregelamendu Delegatua, kontuan hartzen dituena 1306/2013 (EB) Erregelamendua eta abenduaren 19ko Errege Dekretua, nekazaritzari eta abeltzaintzari 2015etik aurrera egiten zaizkien ordainketa zuzenak eta laguntzeko beste araubide batzuk erregulatzen dituena, baita ordainketa zuzenen eta landa garapenerako ordainketen kudeaketa eta kontrola ere.

2. Halaber, foru agindu honen ondorioetarako, honako definizioak hartuko dira aintzat:

a) Nekazaritza ekologikoaren metodo eta jarduketak mantentzea: ziurtatzeko erakunde ofizial batek kontrolatu eta ziurtatutako produkzioa egitea, hasierako eraldatze epea iraganda, 834/2007 (EE) Erregelamenduaren, 889/2008 (EE) Erregelamenduaren eta 617/1999 Foru Dekretuaren arabera. Haren bidez, onetsi zen Nafarroako Foru Komunitatearen eremuan, nekazaritza produkzio ekologikoaren eta nekazaritzako produktu eta elikagaietan horren igarbidea jartzearen gaineko erregelamendua.

b) Nekazaritza ekologikoaren metodo eta jarduketetara aldatzea: nekazaritza ez-ekologikotik nekazaritza ekologikora pasatzea denbora jakin batean, zeinetan produkzio ekologikoari buruzko xedapenak aplikatuko baitira.

c) Belarkien laborantza: zerealen, proteina-landareen, olio-landareen eta lekadunen laboreak, lur goldagarrien gainean, urtero txandakatuak. Haiekin, tokian tokiko baldintza arruntetan egiten da nekazaritzako jarduera.

d) Bazka laboreak: larre naturaletan dauden ereindako bazka belar guztiak, edo larreetarako edo ebakitzeko belardietarako hazien nahasketetan daudenak, baita bazkarako lekadunak eta bazkarako artoa ere, ebakitzeko izan edo larratzeko izan.

e) Bazka-azalera: Nekazaritzako azalera erabilgarria, abereak bazkatzeko, dela animaliak larratuz dela ebakiz. Halaber, halakotzat joko da ustiategiaren titularrak larratzerako erabiltzen duena, banaka edo taldeka izan, urtaroaren araberako aprobetxamendurako eskubidea edukitzeagatik. Bazkatokiaren eremua honakoek eraturik dago: larre iraunkorrek (larrea, zuhaixka-larrea edo larre zuhaiztuna), kontuan izanda larreen onargarritasunaren koefizientea, eta aurreko atalean zehazturiko bazka-laboreek.

f) Larratzeko belardiak: bazkatzeko belardi naturalak (espontaneoak) edo landutakoak (ereinak), larre iraunkorrak barne daudela, larratzeko erabiliak NELIGS erabilera edozein dela ere.

g) Larreen azalera garbia: azalera gordinari larreen onargarritasunaren koefizientea aplikatzearen emaitza.

h) Abeltzaintza estentsiboa: Nafarroako Abeltzaintzako Ustiategien Erregistroan inskribatutako ustiategiak, elikaduraren zati handi bat larratzearen bidez lortzen dutenak eta ondoko sailkapen zooteknikoak dituztenak:

–Behi azienda: haragitarako ugalketan aritzen diren ustiategiak, zezenketarakoak kanpo utzita. Esnea ekoizten aritzen direnak honetatik kanpo daude, abeltzaintzako ustiategi ekologikoak izan ezik.

–Ardi eta ahuntz aziendak: haragitarako ugalketa edo esnetarako ugalketa, arraza nagusia latxa bada.

–Zaldi aziendak: haragitarako ugalketa.

–Zerri azienda: Euskal Txerri arrazaren haragitarako ugalketa modu estentsiboan.

Nolanahi ere, zezenketarako behi azienda abeltzaintza estentsibotzat hartzen ahal da abereak benetan larrean dabiltzala frogatzen ahal bada, eta hala dokumentatutako azalera, laguntza jaso dezakeen azaleratzat hartuko da.

i) Bazka-labore monofitoak: espezie bakar batek osatutako bazka-laboreak dira. Gehienbat hura ebakiz aprobetxatzen da, eta, maiz, zikloaren bukaeran, abereak hartan larratuz.

Laguntza hauen ondorioetarako, labore monofitotzat hartuko dira honako laboreak eta labore-nahasketak:

j) Azienda larriko unitatea (AzLU): Abeltzaintzako ustiategien erregistroko erregistro ofizialetan sartuta dauden ustiategietako animaliei dagozkienak, baliokidetzen taula honen arabera:

k) Ugalketarako abereak edo etorkizunean ugalketarakoak direnak: umatu diren emeak edo gutxieneko adina dutenak, espeziearen arabera etorkizunean ugalketarako erabiltzeko modukoak:

I. Ugalketarako ardiak eta ahuntzak: ugalketarako direnak, banakako identifikazio ofiziala dutela.

II. Ugalketarako behiak: umatu direnak edo gutxienez 18 hilabete bete dituztenak.

III. Ugalketarako behorrak: umatu direnak edo gutxienez 18 hilabete bete dituztenak.

IV. Ugalketarako ahardiak: umatu direnak edo gutxienez urtebete dutenak.

l) Arraza autoktonoak eta “galzorian” dauden Nafarroako arraza autoktonoak: halakotzat jotako arrazak, Landa Garapeneko, Ingurumeneko eta Toki Administrazioko kontseilariak Nafarroako Abere Arrazen Katalogo Ofiziala onesteko abuztuaren 29an eman 309/2014 Foru Aginduaren arabera.

m) Mahasti zaharra: mahats landaketa erregularrak edo errenkadan eginak finken muga edo ertzetan, baldin eta laboreen %75 gutxienez 1985 baino lehenago landatu bazen eta laborantza baldintza onean badaude.

n) Olibadi zaharra: olibo landaketa erregularrak edo errenkadan eginak finken muga edo ertzetan, baldin eta zuhaitzen %75 gutxienez 1955 baino lehenago landatu bazen eta laborantza baldintza onean badaude.

6. artikulua. Konpromisoak zabaltzea eta luzatzea.

1. Laguntzaren eskaera egin ondoko urteetan laguntzen deialdia egiten bada berriz, konpromisoa duten titularrek aukera izanen dute konpromisoa zabaltzeko gelditzen den aldirako, hasierako emakidaren baldintza beretan, hautatzen ahal diren azienda larriko unitateen edo azaleraren arabera, betiere hasierako konpromisoa baino %10 handiagoa badira.

2. Laguntzen lehendabiziko deialdiaren ondoko urteetan laguntzen deialdia egiten bada berriz baldintza berriekin, konpromisoa duten titularrek aukera izanen dute beren konpromisoak egokitzeko deialdi berrian aurreikusitako baldintzetara, aldi berri baterako.

3. Laguntzak esleitzeari dagokionez, emakida berriek lehentasuna izanen dute lehendik emakida duten titularrei emakida handitzearen aurrean.

4. Hartutako konpromisoen urteko luzapenak baimentzen ahal dira, emakidak egiteko epea bukatu ondoren.

7. artikulua. Konpromisoak eskualdatzea.

1. Konpromisoak iraun bitartean, onuradun batek konpromiso horren eskualdaketa, osoa edo hein batekoa, egiten ahalko du, baldin eta hitzarturiko azalerak edo azienda larriko unitateak eskualdatzen baditu eta haiek jasotzen dituenak ezarri den epea bukatu arte konpromisoari eusten bazaio.

2. Titular berriak azpineurri edo ekintza bakoitzerako ezarritako onargarritasun baldintzak bete beharko ditu konpromisoa eskualdatzen deneko kanpainako eskabide bakarra aurkezteko epea bukatzean.

3. Ustiategia erabat edo partez eskualdatzen denetan, eskualdaketaren agiriaren kopia aurkeztuko da. Horretan, ondoko datu hauek jaso behar dira gutxienez: lagatzailearen eta lagapen-hartzailearen izena eta NANa edo IFZ, eskualdatzen diren lurzatien edo animalien zerrenda, lagapen-hartzaileak mantenduko dituenak konpromisoak irauten duen bitartean.

4. Konpromisoa ez badu bere gain hartzen, onuraduna behartua dago jasotako laguntzak itzultzera.

8. artikulua. Konpromisoak betetzeko salbuespeneko zailtasunak edo ez betetzeko ezinbesteko arrazoiak.

1. Jasotako laguntza itzultzeko ez da eskatuko 1306/2013 (EB) Erregelamenduaren 2. artikuluan eta abenduaren 19ko 1076/2014 Errege Dekretuaren 17. artikuluan bildutako salbuespeneko inguruabarrak eta ezinbesteko arrazoiak suertatuz gero.

2. Onuradunak erretiroa hartzen duenean ere ez da eskatuko.

3. Onuradunek idatziz jakinarazi behar diote Landa Garapeneko, Ingurumeneko eta Toki Administrazioko Departamentuari, horren berri jakin bezain pronto, ustiategian gertatutako edozein gorabehera, baldintzak eta konpromisoak ez betetzea badakar.

II. TITULUA

10. neurria – Nekazaritza, ingurumena eta klima

I. KAPITULUA

Hazitarako patataren nekazaritzako eta ingurumeneko laborantza sustatzea

9. artikulua. Laguntzaren deskripzioa.

Kapitulu honetan araututako laguntzen bidez nekazariei lagundu gogo zaie hazitarako patataren laborantzari euts diezaioten hazitarako patata produzitzeko eremu baimenduetan nekazaritzako eta ingurumeneko laborantzarekin teknikei jarraituz, inguruneak nekazaritzaren eta ingurumenaren aldetik dituen balioak gorde eta zaintzeko.

10. artikulua. Laguntza mota.

1. Laguntza urteroko prima bat da, hazitarako patataren laborantzarako erabiltzen den azalera hautagarriaren hektarea bakoitzeko, nekazaritzako eta ingurumeneko ekoizpenerako arauak betetzen dituena, konpromisoa 5 urtekoa delarik.

2. Foru agindu honen 11. artikuluan jasotzen diren onargarritasun baldintzak betetzen dituztenei emanen zaizkie laguntzak.

3. Laguntzak emateko prozedura norgehiagokako araubideari jarraikiz tramitatuko da.

11. artikulua. Onartua izateko baldintzak.

Laguntzak, soil-soilik, emanen dira laguntza eskatzeko epea bukatzen denean eta konpromisoak irauten duen bitartean ondoko baldintzak betetzen dituzten eskatzaileei edo ustiategiei:

–Onuradunak:

a) Nekazaritza, ingurumen eta klimaren laguntzen araubidetik baztertua ez izatea.

–Ustiategienak.

b) “Nekazari-laguntzaile” gisa integraturik egotea hazitarako edo goi mailako patataren “ekoizle-ugaltzaile” titulua duen entitate batean.

c) Araubideari atxikitzea, beraren urteko ereintza aitorpenean sartuta dauden ustiategiko lurzatiak zehaztuta, hazitarako patata landatzeko Nafarroako eremu baimenduetan baitaude, eta konpromisoa hartzea hazitarako patataren azalera landatua mantentzeko edo handitzeko, gutxienez 5 kanpainako aldian.

d) Laguntzaren azalera hautagarria izatea, gutxienez, hektarea batekoa.

e) Nekazaritza eta ingurumeneko produkzioko hazitarako patata edukitzea Nafarroako Foru Komunitateko lurzatietan, uztailaren 11ko 255/2006 Foru Aginduan eta ondoko aldaketetan zerrendatutako udalerriren batean, zein lau produkzio eremutan banatzen baitira:

I. Pirinio aldea.

II. Kodes aldea.

III. Izarbeibar aldea.

IV. Baimendutako beste eremu batzuk.

12. artikulua. Konpromisoak eta beste betebehar batzuk.

Eskatzaileek bost urtez gutxienez konpromiso hauek borondatez hartu behar dituzte beren gain:

a) Ongarritzeak ez ditu dosi hauek gaindituko: 100 OU N/ha, 100 OU (P2O5)/ha eta 200 OU (K2O)/ha. Soilik limoa edo limo hareatsua duten lurzoruen kasuan %20 handitzen ahalko dira muga horiek.

b) Zipriztingailuek urteko ikuskapen teknikoa gainditua izan behar dute.

c) Lurzoruaren emankortasunaren mantenimendua urtero kontrolatzea, honako hauei dagokienez: PH-aren mailak, azidotasun aldakorra, loi-trukerako ahalmena eta fosforo eta potasio asimilerrazaren mailak.

d) Urtero eskatzea kanpainaren eskaera bakarrean laguntza ordaintzeko, Batzordearen 2014ko martxoaren 11ko (EB) 640/2014 Erregelamendu Delegatuan xedatuarekin bat.

e) Hazitarako patataren nekazaritzako eta ingurumeneko ekoizpenaren azalerari eustea eta, ahal izanez gero, handitzea, eta kanpaina bakar batean ere norberaren ustiategian landatutako azalera ez izatea gehieneko konpromisoaren laguntzaren araubideari atxiki zitzaion urtean zehaztutako azaleraren %90etik beherakoa. Baldintza hau betetzetik salbuetsita daude, ez-betetzerik sortu gabe, hasiera batean laborantza horretarako hartutako soroak, azterketak egin ondoren haietan ezin bada erein nematodoak egoteagatik eta ezin badira beste soro batzuekin ordezkatu.

f) Parte hartzea, hala eskatzen zaioenean, neurriari buruz Landa Garapeneko, Ingurumeneko eta Toki Administrazioko Departamentuak edo Nafarroako Gobernuari atxikitako edozein organok antolatzen dituen prestakuntza ekintzetan. Horri dagokionez, ulertuko da konpromisoa bete dela onuradunaren ordez haren ordezkoa joaten bada. Hala ere, horrek laguntzaren xede diren lurzatietan laborantza ekintza materialak egiteko erantzukizuna eduki beharko du.

g) Nafarroan taldeka antola litezkeen babes fitosanitarioko programetan parte hartzea, baldin eta Landa Garapeneko, Ingurumeneko eta Toki Administrazioko Departamentuak berak, horren entitate instrumentalek hala gomendatzen badute.

h) Eman eta hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea. Hartarako, Administrazioko ikuskatzaileei eta ziurtapen eta kontrol agintaritzari libre utzi beharko zaie lurzatietara sartzen, eta laguntzaren xedeko jardueraren gainean eskatzen zaien informazio guztia emanen zaie.

i) Oinarrizko lerroko konpromisoak betetzea, laguntza horri buruz foru agindu honen II. eranskinean jasoak.

13. artikulua. Araubidean sartzea.

1. Laguntzaren araubidean sartzeko eskaerak laguntzen eskabide bakarrean aurkeztuko dira. 5 urterako urteko laguntza eman ahalko zaie 11. artikuluan ezarritako onargarritasun baldintzak betetzen dituzten eskatzaileei. Laguntzaren eskabideak ebaluatuko dira, eta organo eskudunak onartu edo ukatuko ditu 3 hilabeteko epean, ebazpen baten bidez. Epe hori igarota, administrazioaren isiltasunez ezetsitzat joko dira.

14. artikulua. Laguntzaren zenbatekoa.

1. Hautagarritzat hartutako azalerari aplikatu beharreko zenbateko unitarioa produkzio eremuaren araberakoa izanen da:

I. Pirinio aldea: 600 euro/ha.

II. Kodes aldea: 400 euro/ha.

III. Izarbeibar aldea: 400 euro/ha.

IV. Beste eremu batzuk: 400 euro/ha.

2. Emakidaren zenbatekoa eragiketa honen emaitza izanen da: zenbateko unitarioa bider zehazturiko azalerak, administrazio kontrolak eta tokian bertakoak egin ondoren eta jartzen diren zigorrak aplikatu baino lehen.

3. Onuradun bakoitzari emaniko laguntzaren zenbateko osoa gehieneko muga izanen da, konpromisoaldiaren hurrengo urteetan kobratzeko eskaerari aplikatzeko orduan.

15. artikulua. Urteroko ordainketen eskariak.

1. 5 urteko laguntzaren onuradunek urtero eskatu behar dute hura ordaintzeko laguntzaren eskabide bakarraren bidez. Laguntza jasotzeko, 11. artikuluko baldintzak eta 12. artikuluko konpromisoak eta beste baldintza batzuk bete beharko dituzte.

2. Ordainketaren zenbatekoa kalkulatzeko, zenbateko unitarioa biderkatuko da kasuan kasuko kontrol administratibo eta landa kontrol guztiak egin ondoren ordaintzeko kalkulatzen den azalerarekin, foru agindu honen 17. artikuluko zigorrak aplikatuta.

16. artikulua. Bateraezintasunak eta hautaketa irizpideak.

1. Hazitarako patataren nekazaritzako eta ingurumeneko ekoizpenerako laguntza bateraezina da laborantza bererako produkzio ekologikorako laguntzarekin.

2. 2016ko eta hurrengo urteetako kanpainetarako laguntzak kalkulatuko dira ondoko hautapen irizpideetako baremazioa aplikatuz:

a) Natura 2000 Sarean sartutako azaleraren portzentajea.

> %50: 2 puntu.

> 0 eta < 50: 1 puntu.

b) Ustiategiaren batez besteko maldaren portzentajea:

<%5: 5 puntu.

≥ 5 eta < 10: 4 puntu.

≥ 10 eta < 20: 3 puntu.

≥ 20 eta < 25: 2 puntu.

Eskaera batek laguntza jaso ahal izateko gutxieneko puntuazioa 2 puntukoa da; guztira 7 puntu dira.

Espedienteen puntuazioan berdinketarik gertatzen bada, b) irizpidea (“bataz besteko malda”) erabiliko da berdinketa hausteko. Berdinketak jarraituz gero, lehentasuna eragiketaren xedeko azalera handienei emanen zaie.

17. artikulua. Ez-betetzeen mailaketak.

1. 11. eta 12. artikuluetan zehaztatutako betebeharren eta konpromisoen ez-betetzeak honako taula honetan ezartzen dira, eta haiei dagokien zehapena, III. Eranskinean.

2. Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Kontseiluaren 1306/2013 (EE) Erregelamenduaren aplikazio-xedapenak ezarri ziren. Beste konpromiso edo betebehar batzuk ez betetzeak, Batzordearen martxoaren 11ko 640/2014 (EB) Erregelamendu Delegatuaren 35. artikuluan ezarritakoarekin bat, ekarriko du IV. Eranskinean deskribatutako zehapenak aplikatzea.

II. KAPITULUA

Abeltzaintzako sistema jasangarriak, animaliak larratuz eta sistema estentsiboa zabalduz

18. artikulua. Laguntzaren deskripzioa.

1. Laguntza horren xedea da larratzean oinarritzen diren abeltzaintzako ustiapen sistema estentsibo tradizionalak bultzatzea, abeltzaintzako karga kontrolatuz sistemaren jasangarritasuna bermatzeko. Gainera, nekazariak adoretu nahi ditu lurrari lotutako abere arraza autoktonoak mantentzeko.

2. Ekintza horrekin ondoko onurak bultzatu gogo dira nekazaritzaren, ingurumenaren eta gizartearen arloetan:

a) Abere espezieen dibertsitate genetikoa zaintzea, Nafarroako Foru Komunitateari lotutako arrazak mantenduz, eta, batik bat, arraza autoktonoak eta “galzorian” daudela katalogatu direnak.

b) Laguntzea abeltzaintza ingurune hauskorren zaintzarekin bateragarria izan dadin higadura izateko arrisku handiko tokietan eta larratzeko azalerak era jasangarriak erabil daitezen, abeltzaintzako karga egokitasunez gobernatuz, behar baino gehiago edo gutxiago larratzea saihestuz.

c) Bazkatzeko azaleren kontrol naturala hobetzea, haien narriadura murriztu nahian, eta basoetan suteak sor ditzaketen zuhaixkak kontrolatzea, baita potentzial ekologikoari eustea ere abeltzaintzako bazka aprobetxamendu tradizionaleko eremuetan.

3. Halaber, landa paisaia eta abeltzaintzari lotutako ekosistemak zaintzen dira.

19. artikulua. Laguntza mota.

1. Laguntzak ematen dira kostu gehigarriak, osorik edo partez, konpentsatzeko, baita jaso gabeko errentak ere, modu aktiboan larratzeko hartutako konpromisoen ondorioz, eta ustiategia era estentsiboan gobernatzeko sistema tradizionalei eusteko.

2. Hau da laguntza: prima bat bazkatzeko azaleraren hektarea bakoitzeko, eta ezin izanen du ustiategiko abeltzaintza estentsiboko AzLUen balioa gainditu. Kontuan hartu beharreko AzLUa izanen da SIMOGAN datu basean jasotako bost balioen batez bestekoa. Horretarako, laguntzen eskaerak aurkezteko epea bukatu eta hurrengo bost hilabeteetako bakoitzaren lehendabiziko lanegunean erregistratutako abereak zenbatuko dira. Ardi eta ahuntz aziendarako, ustiategi bakoitzaren urtarrilaren 1eko nahitaezko urteko zentsua hartuko da kontuan.

Tokian berean egindako kontrolik bada, bertatik bertarako ikuskapenean zehaztutako AzLUak bakarrik hartuko dira kontuan laguntza kalkulatzeko.

3. Deialdi honen xedeko diru-laguntzak norgehiagokako araubidea erabiliz emanen dira.

20. artikulua. Onartua izateko baldintzak.

1. Laguntzak, soil-soilik, emanen dira laguntza eskatzeko epea bukatzen denean eta konpromisoak irauten duen bitartean ondoko baldintzak betetzen dituzten eskatzaileei edo ustiategiei:

–Onuradunak:

a) Nekazaritza, ingurumen eta klimaren neurrian sartutako laguntzetatik baztertuta ez izatea.

–Ustiategikoak:

b) Ustiategian ugalketarako abereak izatea (honako espezie hauetakoak: behi, ardi, ahuntz azienda, zerri azienda estentsiboan, edo zaldi azienda), abeltzaintza estentsiboko araubidean.

c) Laguntza jaso nahi duten abeltzainek honako hau egin beharko dute: urtero eskabide bat aurkeztu eta ustiategiko bazkarako azalera osatzen duten lurzatiak adierazi.

21. artikulua. Konpromisoak eta beste betebehar batzuk.

Neurri honi atxikitzen zaizkion titularrek ondoko konpromisoak bete beharko dituzte gutxienez 5 urtez:

a) Ustiategiko bazkarako azalera osoaren urteko aprobetxamendua egitea, animaliak larratuz, bazka-labore monofitoen azaleretan izan ezik. Belardi naturalak mantenduko dira abereak haietan larratuta, errefusak segatuta eta sasiak bitarteko mekanikoen bidez kenduta.

b) Abeltzaintzako dentsitatea izatea 0,4 AzLU/ha-koa edo handiagoa eta 1,5 AzLU/ha edo txikiagoa. Abere dentsitate hori kalkulatzeko, bazka-azalera eta ustiategiaren abeltzaintza estentsiboko AzLUak hartuko dira kontuan. Unitate horiek kalkulatzeko, SIMOGAN datu basean kontabilizatutako bost balioen batez bestekoa aterako da; balioak laguntzaren eskaerak aurkezteko epea bukatu eta hurrengo bost hilabeteetako bakoitzaren lehendabiziko lanegunean hartutakoak izanen dira. Ardi eta ahuntz aziendarako, ustiategi bakoitzaren urtarrilaren 1eko nahitaezko urteko zentsua hartuko da kontuan.

Tokian berean egindako kontrolik bada, abere dentsitatea kalkulatzeko bazka-azalera eta bertatik bertarako ikuskapenean zehaztutako AzLUak bakarrik hartuko dira kontuan.

c) Bazka-labore monofitoen proportzioa %20tik beherakoa izatea bazkarako azalera garbian.

d) Bazkarako azalerak ez dira oinarrizko primarako ezarritako hektareen %90tik beherakoak izanen laguntzaren araubideari atxikitzen zaion urtean.

e) Landa Garapeneko, Ingurumeneko eta Toki Administrazioko Departamentuak agintzen dizkien prestakuntza-ekintzetan parte hartzea. Horri dagokionez, konpromisoa betetzat joko da baldin eta onuradunaren ordez hark eskuordetutako pertsona bat joaten bada. Pertsona horrek, edonola ere, konpromisoaren xede diren lurzatietako laborantza eragiketak egin eta kontrolatzeko ardura izan beharko du.

f) Eman eta hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea. Hartarako, Administrazioko ikuskatzaileei eta ziurtapen eta kontrol agintaritzari libre utzi beharko zaie lurzatietara sartzen, eta laguntzaren xedeko jardueraren gainean eskatzen zaien informazio guztia emanen zaie.

g) Urtero eskatzea kanpainaren eskaera bakarrean laguntza ordaintzeko, Batzordearen 2014ko martxoaren 11ko (EB) 640/2014 Erregelamendu Delegatuan xedatuarekin bat.

22. artikulua. Araubidean sartzea eta laguntzaren zenbatekoa.

1. Laguntzaren araubidean sartzeko eskaerak laguntzen eskabide bakarrean aurkeztuko dira.

2. 5 urterako urteko laguntza eman ahalko zaie 20. artikuluan ezarritako onargarritasun baldintzak betetzen dituzten eskatzaileei.

3. Laguntzaren eskabideak ebaluatuko dira, eta organo eskudunak onartu edo ukatuko ditu 3 hilabeteko epean, ebazpen baten bidez. Epe hori igarota, administrazioaren isiltasunez ezetsitzat joko dira.

4. Honako hau izanen da hautagarritzat hartutako azalerari aplikatu beharreko zenbateko unitarioa:

I. oinarrizko prima: 25 euro/ha.

II. Prima osagarria: 6,25 euro/ha. AzLU ugaltzaileen %50 baino gehiago inskribatuta izatea arrazen liburu genealogikoetan, abenduaren 26ko 2129/2008 Errege Dekretuarekin bat, eskaerak aurkezteko epearen bukaeran.

5. Emakidaren zenbateko kalkulatzeko, oinarrizko primaren zenbateko unitarioa biderkatuko da prima horretarako ezarritako azalerarekin, eta prima osagarriaren zenbateko unitarioa, berriz, prima horretarako ezarritako azalerarekin, bi kasuetan, kontrol administratiboak eta tokian bertakoak egin ondoren eta jartzen diren penaliazioak aplikatu baino lehen.

6. Onuradun bakoitzari emaniko laguntzaren zenbateko osoa gehieneko muga izanen da, konpromisoaldiaren hurrengo urteetan kobratzeko eskaerari aplikatzeko orduan.

23. artikulua. Ordaintzeko eskaerak eta urteroko ordainketak.

1. 5 urteko laguntzaren onuradunek urtero eskatu behar dute hura ordaintzeko laguntzaren eskabide bakarraren bidez. Laguntza jasotzeko, 20. artikuluko baldintzak eta 21. artikuluko konpromisoak bete beharko dituzte.

2. Ordainketaren zenbatekoa kalkulatzeko, zenbateko unitarioa biderkatuko da kasuan kasuko kontrol administratibo eta landa kontrol guztiak egin ondoren ordaintzeko kalkulatzen den azalerarekin, 25. artikuluko zigorrak aplikatuta.

24. artikulua. Bateraezintasunak eta hautaketa irizpideak.

1. Laguntza hau bateraezina da, oro har, Landa garapenari FEADERen eta hura garatzen duen araubidearen bidez laguntzeari buruzko Europako Parlamentuaren eta Kontseiluaren 1305/2013 (EB) Erregelamendutik sortzen direnekin.

2. Nolanahi ere, bateraezina da honako labore motetarako produkzio ekologikoaren laguntzan kontuan hartutako azalerekin: ebakitzeko belarki laboreak eta bazka-laboreak (lehorreko lurretan eta ureztalurretan), eta larratzeko belardiak.

3. Laguntza horretarako prima osagarria bateraezina da “galzorian dauden tokiko arrazak kontserbatu eta hobetzeko” laguntza jaso duten arrazetarako.

4. “Natura balio handiko zereal-agrosistemetan ardiak larratzeko laguntza” eragiketarekin bateraezina da.

5. 2016ko eta hurrengo urteetako kanpainetarako laguntzak kalkulatuko dira ondoko hautapen irizpideetako baremazioa aplikatuz:

a) Naturaz mugatutako eskualdeetan dagoen ustiategiko azalaren portzentajea:

–Mendialdeko eta goiko mendialdeko eskualdeak, %100: 4 puntu.

–Mendialdeko eta goi mendiko eskualdeak (≥ %50): 3 puntu.

–Mendialdeko eta goi mendialdeko eskualdeak, %50 baino gutxiago eta %70 edo gehiago (naturaz mugatutako eskualdeak): 2 puntu.

–Mendialdeko eta goi mendiko eskualdeak: %50 baino gutxiago; eta naturaz mugatutako eskualdeak: %10 edo gehiago eta %70 baino gutxiago: 1 puntu.

b) Natura 2000 sarearen barnean dagoen ustiategiko azalaren portzentajea.

> %50: 3 puntu.

≥ 20 eta < 50: 2 puntu.

> 0 eta < 20: 1 puntu.

c) Ustiategiaren abeltzaintzako karga:

≥ 0,4 AzLU/ha eta <0,6: 10 puntu.

≥ 0,6 AzLU/ha eta <0,8: 20 puntu.

≥ 0,8 AzLU/ha eta <1,1: 30 puntu.

≥ 1,1 AzLU/ha eta <1,3: 20 puntu.

≥ 1,3 AzLU/ha eta <1,5: 10 puntu.

Eskaera batek laguntza jaso ahal izateko gutxieneko puntuazioa 8 puntukoa da; guztira 37 puntu dira.

Espedienteen puntuazioan berdinketarik gertatzen bada, abeltzaintzako karga hartuko da kontuan berdinketa hausteko. Berdinketak jarraituz gero, lehentasuna eragiketaren xedeko azalera handienei emanen zaie.

25. artikulua. Ez-betetzeen mailaketak.

1. 20. eta 21. artikuluetan zehaztatutako betebeharren eta konpromisoen ez-betetzeak honako taula honetan ezartzen dira, eta haiei dagokien zehapena, III. Eranskinean.

2. Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Kontseiluaren 1306/2013 (EE) Erregelamenduaren aplikazio-xedapenak ezarri ziren. Beste konpromiso edo betebehar batzuk ez betetzeak, Batzordearen martxoaren 11ko 640/2014 (EB) Erregelamendu Delegatuaren 35. artikuluan ezarritakoarekin bat, ekarriko du IV. Eranskinean deskribatutako zehapenak aplikatzea.

III. KAPITULUA

Nekazaritzako estepa habitatak hobetzea

26. artikulua. Laguntzaren deskripzioa.

Laguntza honen helburua da Nafarroako Erriberako lehorreko lur erdiaridoetako balio handiko nekazaritzako sisteman dauden intereseko hegaztien populazioak mantentzen laguntzea, haien ugalketa, elikadura eta babeserako habitatak hobetzen dituzten nekazaritzako jarduketak martxan jarriz.

27. artikulua. Laguntza mota.

1. Hektarea bakoitzeko ordainketa bat egiten zaie 28. eta 29. artikuluetako konpromisoak eta onargarritasun irizpideak konpromisoaldiko 5 urtean betetzen dituzten nekazariei.

2. Deialdi honen xedeko diru-laguntzak norgehiagokako araubidea erabiliz emanen dira.

28. artikulua. Onartua izateko baldintzak.

1. Laguntzak, soil-soilik, emanen dira laguntza eskatzeko epea bukatzen denean eta konpromisoak irauten duen bitartean ondoko baldintzak betetzen dituztenei:

a) SIGPACen lehorreko lur goldagarritzat katalogatutako nekazaritzako azalera izan behar du.

b) Azalera hautagarria egonen da ondoko udal mugapeek (haiek barne) osatzen duten lerrotik hegoaldera dauden udalerri edo fazerietan: Viana, Bargota, Armañanzas, Santsol, Los Arcos, Barbarin, Arroitz, Arellano, Deikaztelu, Morentin, Aberin, Villatuerta, Mendigorria, Larraga, Tafalla, Erriberri, Beire, Pitillas, Santacara, Murillo el Fruto eta Zarrakaztelu.

c) Nekazaritza, ingurumen eta klimaren laguntzen araubidetik baztertua ez izatea.

29. artikulua. Konpromisoak.

Neurri honi atxikitzen zaizkion titularrek ondoko konpromisoak bete beharko dituzte gutxienez 5 urtez:

a) Ustiategiaren titularrak eskatu beharko du laguntza urtero pagatu diezaiotela, laguntza eskabide bakarrean, Batzordearen 2014ko martxoaren 11ko 640/640 Erregelamendu Delegatuan ezarririko moduan eta laguntzen deialdian ezarritako tokian, moduan eta epean.

b) Urteko eskabidean, adieraztea ustiategiko zer lurzati den laguntzaren xedeko eta haietarako laguntza eskatzea.

c) Urtero eustea norberaren konpromisoko azaleraren %90ko azalera hautagarriari gutxienez.

d) Eman eta hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea.

e) Landa Garapeneko, Ingurumeneko eta Toki Administrazioko Departamentuak agintzen dizkien prestakuntza-ekintzetan parte hartzea.

f) Gauez ez da uzta jasoko ez eta fardorik eginen ere.

g) Uztondo eta lugorrietan produktu fitosanitariorik ez aplikatzea, irailaren 15etik aurrera zuzenean ereiteko prestakuntza lanetan izan ezik.

h) Lugorriko azalerak laguntzaren xedeko oinarrizko azalera osoarekiko urtero izanen duen portzentajea aldatuko da ustiategiaren udalerriaren arabera. Hartara, %40koa izanen da 1,8 T/ha-ko erregionalizazio indizea dutenetan, %34koa 2,2 T/ha-koa denean, %29koa 2, T/ha-koa denean, %26koa 2,2 T/ha-koa denean, %18koa 3,2 T/ha-koa denean eta %10 3,7 T/ha-koa edo handiagoa denean. Ustiategi batek oinarrizko azalera udalerri batean baino gehiagotan duenean, erregionalizazio indizerik handiena daukan udalerriari dagokion lugorriaren portzentajea eskatuko zaio.

i) Faunarako zerrendak/uztondoak: urtero laguntzaren barnean sartzen den zerealen azaleraren %25ean, gutxienez, urte bateko edo gehiagoko zerrendak paratuko dira, 2 metroko zabalerakoak, lurzatiaren perimetroan. Haietan ez da nekazaritzako lanik eginen: ereitea, fitosanitariorik aplikatzea, biltzea eta abar. Urtero hautatzen diren lurzati horietan bertan, lastoa osorik utziko da, xehatu gabe, uztondoaren gainean, zabaldu edo bildu gabe. Azalera horietan larratzea baimentzen da abuztuaren 1etik aurrera, eta altxatzea irailaren 1etik aurrera.

j) Faunarako lugorriak: urtero laguntzaren barnean sartzen den lugorriko azaleraren %50ean, gutxienez, ez da inolako nekazaritzako lanik eginen: lantzea, nibelatzea, sakanak kentzea, harriak kentzea, ereitea, tratatzea, landare hondarrak erretzea eta abar, aurreko uzta biltzen denetik uzta horren ondoko urteko irailaren 1era arte. Handik aurrea baimentzen da hura altxatzea. Baimentzen da udazkenean azaleko laboratze bakarra egitea, irauli gabe, azaroaren 1etik abenduaren 15era bitarte.

k) Faunarako ereitea: laguntzaren babeseko azaleraren %10ean ereinen da lekaleen estaldura bat izateko, nekazaritzarako aprobetxamendurik izanen ez duena abuztuaren 1era arte. Baimentzen da abereak maiatzaren 1etik aurrera iragatea, lugorrian erein bada, edo abuztuaren 1etik aurrera, berriz, laboreak izan dituen lurzati batean. Irailaren 1etik aurrera altxatzea baimentzen da.

30. artikulua. Araubidean sartzea eta laguntzaren zenbatekoa.

1. Laguntzaren araubidean sartzeko eskaerak laguntzen eskabide bakarrean aurkeztuko dira. 5 urterako urteko laguntza eman ahalko zaie 28. artikuluan ezarritako onargarritasun baldintzak betetzen dituzten eskatzaileei. Laguntzaren eskabideak ebaluatuko dira, eta organo eskudunak onartu edo ukatuko ditu 3 hilabeteko epean, ebazpen baten bidez. Epe hori igarota, administrazioaren isiltasunez ezetsitzat joko dira.

2. Emakidaren zenbatekoa kalkulatzeko, zenbateko unitarioa (34 euro/Tm) biderkatuko da hektarea bakoitzaren kokalekuko udalerriaren erregionalizazio indizea (foru agindu honen I. eranskinean jasotzen da), eta zehaztutako azaleraz, kontrol administratiboak eta tokian bertakoak egin ondoren eta zigorrak aplikatu baino lehen.

3. Onuradun bakoitzari emaniko laguntzaren zenbateko osoa gehieneko muga izanen da, konpromisoaldiaren hurrengo urteetan kobratzeko eskaerari aplikatzeko orduan.

31. artikulua. Ordaintzeko eskaerak eta urteroko ordainketak.

1. 5 urteko laguntzaren onuradunek urtero eskatu behar dute hura ordaintzeko laguntzaren eskabide bakarraren bidez. Laguntza jasotzeko, 28. artikuluko baldintzak eta 29. artikuluko konpromisoak bete beharko dituzte.

2. Ordainketaren zenbatekoa kalkulatzeko, zenbateko unitarioa (34 euro/Tm) biderkatuko da hektarea bakoitzaren kokalekuko udalerriaren erregionalizazio indizearekin (foru agindu honen I. eranskinean jasotzen da), eta ordaindu beharreko azalerarekin, kontrol administratibo eta tokian bertako guztiak egin ondoren eta foru agindu honen 33. artikuluan zehaztutako zigorrak aplikatu ondoren.

32. artikulua. Bateraezintasunak eta hautaketa irizpideak.

1. Laguntza hau ez da bateraezina Nafarroako Landa Garapenerako 2014-2020ko Programako beste laguntza batzuekin, ezta laguntza zuzenekin ez Greening-en ordainketekin ere.

2. 2016ko eta hurrengo urteetako kanpainetarako laguntzak kalkulatuko dira ondoko hautapen irizpideetako baremazioa aplikatuz:

a) Nafarroako Foru Komunitatean estepako hegaztiak zaintzeko intereseko eremuen barnean (AICAENA) dagoen babeseko azaleraren portzentajea, hartutako guztizko azalera kontuan hartuta. Deialdi honen ondorioetarako soilik, Nafarroako Foru Komunitatean estepako hegaztiak zaintzeko intereseko eremuen barnean egonen dira katastroko ondoko poligonoetan dauden lehorreko lur goldagarriak: Aberin (4), Ablitas (2, 6, 7, 9, 11, 12, 13 eta 14), Allo (5 eta 6), Andosilla (1, 6 eta 11), Arellano (4), Arguedas (8, 10 eta 11), Errege Bardeak (denak), Berbintzana (4 eta 5), Cabanillas (6, 7, 8 eta 9), Caparroso (1), Carcar (2, 4, 6, 7 eta 10), Zarrakaztelu (16, 17 eta 18), Cascante (14, 15 eta 1), Castejón (5), Corella (13, 14, 15 y 16), Deikaztelu (9), Faltzes (5, 11, 14, 15, 16, 20 eta 21), Funes (7 eta 8), Fustiñana (1, 4, 5, 6, 7, 8, 10, 11 eta 12), Larraga (4, 5 eta 6), Lerin (1, 5, 6, 7, 8, 9 eta 11), Lodosa (8 eta 9), Los Arcos (13 eta 18), Lukin (3), Martzilla (7 eta 9), Mendabia (10, 11 eta 15), Miranda Arga (1 eta 2), Morentin (2), Erriberri (1, 2, 6 eta 12), Oteiza (1, 3 eta 4), Azkoien (5, 12, 13 eta 14), Sartaguda (2), Sesma (1, 4, 5, 3, 7 eta 10), Tafalla (9, 10, 11, 12, 13, 14 eta 15), Tutera (10, 11, 13, 14, 25, 26, 39, 40, 41, 42, 43, 44, 45, 46, 47, 48 eta 49), Valtierra (12) eta Villatuerta (4).

–Hartutako azaleraren %10era arte: 20 puntu.

–Hartutako azaleraren %10 baino gehiago, %25era arte: 30 puntu.

–Hartutako azaleraren %25 baino gehiago, %50era arte: 40 puntu.

–Hartutako azaleraren %50 baino gehiago, %100era arte: 50 puntu.

b) Neurriaren babeseko azalera handiena duen ustiategiaren azalera. Puntuazioa graduatuko da adierazten den moduan, gehienez ere 50 punturaino.

–Hartutako azaleraren 5 hektarea baino gehiago, 10era arte: 10 puntu.

–Hartutako azaleraren 10 hektarea baino gehiago, 15era arte: 20 puntu.

–Hartutako azaleraren 15 hektarea baino gehiago, 20ra arte: 30 puntu.

–Hartutako azaleraren 20 hektarea baino gehiago: (30 + 0,1 x A) puntu.

A = Neurriaren babeseko azalera (hektareak).

Eskaera batek laguntza jaso ahal izateko gutxieneko puntuazioa 30 puntukoa da; guztira 100 puntu dira.

Berdinketarik gertatuz gero, neurriaren babeseko azalera handiena hartuko da kontuan berdinketa hausteko.

33. artikulua. Ez-betetzeen mailaketak.

1. 28. eta 29. artikuluetan zehaztatutako betebeharren eta konpromisoen ez-betetzeak honako taula honetan ezartzen dira, eta haiei dagokien zehapena, III. Eranskinean.

2. Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Kontseiluaren 1306/2013 (EE) Erregelamenduaren aplikazio-xedapenak ezarri ziren. Beste konpromiso edo betebehar batzuk ez betetzeak, Batzordearen martxoaren 11ko 640/2014 (EB) Erregelamendu Delegatuaren 35. artikuluan ezarritakoarekin bat, ekarriko du IV. Eranskinean deskribatutako zehapenak aplikatzea.

IV. KAPITULUA

Nekazaritzako sistema mediterraneo jasangarriak zaintzea

34. artikulua. Laguntzaren deskripzioa.

Kapitulu honetako laguntzen bitartez sostengua eman gogo zaie ustiategietan mahatsondo zaharrak zein olibondo zaharrak mantendu eta zaintzen dituzten nekazariei, ulertzen baita paisaiaren oinarrizko osagaiak direla eta nekazaritzako sistema mediterraneoei lotuta daudela.

35. artikulua. Laguntza mota.

1. Laguntza urteroko prima bat da, I. tituluko 5. artikuluan definitutako mahatsondo zaharrak eta olibondo zaharrak dituzten azalera hautagarriaren hektarea bakoitzeko, 5 urteko konpromisoaldiarekin.

2. Titulu honen 36. artikuluan jasotzen diren onargarritasun baldintzak betetzen dituztenei emanen zaizkie laguntzak.

3. Laguntzak emateko prozedura norgehiagokako araubideari jarraikiz tramitatuko da.

36. artikulua. Onartua izateko baldintzak.

Laguntzak, soil-soilik, emanen dira laguntzaren epea bukatzen denean eta konpromisoak irauten duen bitartean ondoko baldintzak betetzen dituzten eskatzaileei edo ustiategiei:

–Onuradunak:

a) Nekazaritza, ingurumen eta klimaren neurrian sartutako laguntzen araubidetik baztertuta ez egotea.

–Ustiategikoak:

b) Legez kontrako landaketei dagokienez, mahastizaintzari eta ardogintzari buruz indarra duen araudia betetzea, Mahastizaintza eta ardogintza arautzeari buruzko abenduaren 5eko 16/2005 Foru Legea garatzen duen abuztuaren 16ko 56/2006 Foru Dekretuarekin bat.

c) Nafarroako Foru Komunitateko lurzatietan labore hauetakoren bat izatea:

I. Mahastiak (Vitis vinifera), Nafarroako Mahastien Erregistroan laguntzaren eskatzailearen izenarekin inskribatuak, 5.2. artikuluaren m) epigrafeko baldintzak betetzen badituzte.

II. Olibadiak (Olea europaea), 5.2. artikuluaren n) epigrafeko baldintzak betetzen badituzte.

d) Laguntzan zehaztutako azalera gutxienez 2.000 m²-koa izatea.

37. artikulua. Konpromisoak eta beste betebehar batzuk.

Eskatzaileek bost urtez konpromiso hauek borondatez hartu behar dituzte beren gain:

a) Mahasti eta olibadi zaharren landaketak laborantzarako baldintza egokietan mantentzea, laborantza tradizionalen sistemekin bat, eta beharrezko lan kulturalak egitea (inaustea, ongarritzea, izurriak eta landare espontaneoak kontrolatzea, bilketa egitea, eta abar).

b) Olibondoak inausteko hondarrak lurzatian edukitzea, xehatu gabe, ondoren desegiteko, maiatzaren 30a baino lehenago, Phloeotribus scarabaeoides Bern-aren kontra zeharka egiteko.

c) Bactrocera oleae-ren kontra egiteko tratamenduak aplikatzen direnean, INTIAko abisu estazioaren zehaztapenei jarraituko zaie.

d) Urtero eskatzea laguntzaren urteko ordainketa, kanpainaren Eskaera Bakarrean (Batzordearen 2014ko martxoaren 11ko (EB) 640/2014 Erregelamendu Delegatuan xedatuarekin bat) eta laguntza aitortzea barruti bakoitzean.

e) Konprometitutako mahasti eta olibadien azalera ez murriztea norberaren ustiategia laguntzaren araubidean sartu zen urtean zehaztutako azaleraren %90etik behera.

f) Parte hartzea erakunde publikoek ezartzen dituzten programetan olibondo eta mahatsondo zaharren barietateak identifikatzeko, laginak hartzeko, kontserbatzeko, errendimenduak kontrolatzeko eta hobetzeko.

g) Landa Garapeneko, Ingurumeneko eta Toki Administrazioko Departamentuak adierazitako prestakuntza jardueretan parte hartzea, norberak edo hark eskuordetzen duenaren bidez.

h) Nafarroan taldeka antola litezkeen babes fitosanitarioko programetan parte hartzea, baldin eta Landa Garapeneko, Ingurumeneko eta Toki Administrazioko Departamentuak berak, horren entitate instrumentalek hala gomendatzen badute.

i) Eman eta hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea. Ondorio horietarako, Administrazioko ikuskatzaileei libre utzi beharko zaie lurzatietara sartzen, eta neurriaren xedeko jardueraren gainean eskatzen zaien informazio guztia emanen zaie.

38. artikulua. Araubidean sartzea eta laguntzaren zenbatekoa.

1. Laguntzaren araubidean sartzeko eskaerak laguntzen eskabide bakarrean aurkeztuko dira. 5 urterako urteko laguntza eman ahalko zaie 36. artikuluan ezarritako onargarritasun baldintzak betetzen dituzten eskatzaileei. Laguntzaren eskabideak ebaluatuko dira, eta organo eskudunak onartu edo ukatuko ditu 3 hilabeteko epean, ebazpen baten bidez. Epe hori igarota, administrazioaren isiltasunez ezetsitzat joko dira.

2. Ondoko zenbateko unitarioak aplikatuko dira laborearen arabera:

I. 300 euro hektarea bakoitzeko, olibondoaren kasuan.

II. 450 euro hektarea bakoitzeko, “Nafarroa” Jatorrizko Deiturako mahatsondoaren kasuan.

III. 250 euro hektarea bakoitzeko, “Errioxa” Jatorrizko Deiturako mahatsondoaren kasuan.

3. Emakidaren zenbatekoa eragiketa honen emaitza izanen da: zenbateko unitarioa bider zehazturiko azalerak, administrazio kontrolak eta tokian bertakoak egin ondoren eta jartzen diren zigorrak aplikatu baino lehen.

4. Onuradun bakoitzari emaniko laguntzaren zenbateko osoa gehieneko muga izanen da, konpromisoaldiaren hurrengo urteetan kobratzeko eskaerari aplikatzeko orduan.

39. artikulua. Ordaintzeko eskaerak eta urteroko ordainketak.

1. 5 urteko laguntzaren onuradunek urtero eskatu behar dute hura ordaintzeko laguntzaren eskabide bakarraren bidez. Laguntza jasotzeko, 36. artikuluko baldintzak eta 37. artikuluko konpromisoak eta beste baldintza batzuk bete beharko dituzte.

2. Ordainketaren zenbatekoa kalkulatzeko, zenbateko unitarioa biderkatuko da ordaintzeko kontuan hartutako azalerarekin, kasuan kasuko kontrol administratibo eta landa kontrol guztiak egin ondoren, legerian ezarritako zigorrak aplikatuta.

40. artikulua. Bateraezintasunak eta hautaketa irizpideak.

2016ko eta hurrengo urteetako kanpainetarako laguntzak kalkulatuko dira ondoko hautapen irizpideetako baremazioa aplikatuz:

a) Ustiategiaren lehorreko azaleraren portzentajea:

%100: 5 puntu.

≥ 80 eta < 100: 4 puntu.

≥ 50 eta < 80: 3 puntu.

≥ 20 eta < 50: 2 puntu.

> 0 eta < 20: 1 puntu.

b) Ustiategiaren bataz besteko malden portzentajea:

> %20: 4 puntu.

≥ 15 eta < 20: 3 puntu.

≥ 10 eta < 15: 2 puntu.

> 0 eta < 10: 1 puntu.

c) Natura 2000 sarearen barnean dagoen ustiategiaren azalaren portzentajea:

> %90: 3 puntu.

≥ 50 eta < 90: 2 puntu.

> 0 eta < 50: 1 puntu.

d) Ustiategiko landaketen bataz besteko adina:

70 urte: 18 puntu.

≥ 60 eta < 70: 15 puntu.

≥ 40 eta < 60: 10 puntu.

≥ 30 eta < 40: 7 puntu.

Eskaera batek laguntza jaso ahal izateko gutxieneko puntuazioa 6 puntukoa da; guztira 30 puntu dira.

Espedienteen puntuazioan berdinketarik gertatzen bada, kontuan hartuko da ustiategiko landaketen bataz besteko adina berdinketa hausteko. Berdinketak jarraituz gero, lehentasuna eragiketaren xedeko azalera handienei emanen zaie.

41. artikulua. Ez-betetzeen mailaketak.

1. 36. eta 37. artikuluetan zehaztatutako betebeharren eta konpromisoen ez-betetzeak honako taula honetan ezartzen dira, eta haiei dagokien zehapena, III. Eranskinean.

2. Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Kontseiluaren 1306/2013 (EE) Erregelamenduaren aplikazio-xedapenak ezarri ziren. Beste konpromiso edo betebehar batzuk ez betetzeak, Batzordearen martxoaren 11ko 640/2014 (EB) Erregelamendu Delegatuaren 35. artikuluan ezarritakoarekin bat, ekarriko du IV. Eranskinean deskribatutako zehapenak aplikatzea.

V. KAPITULUA

Galzorian dauden tokiko arrazak kontserbatu eta sustatzea

42. artikulua. Laguntzaren deskripzioa.

1. Ekintzak helburu du nekazariak adoretzea desagertzeko arriskuan dauden tokiko abere arraza autoktonoak eta berezko ustiapen sistema tradizionalak manten ditzaten, galzorian dauden tokiko arrazen zentsua handi dadila sustatzea, eta haien produktibitatea eta errentagarritasuna hobetzea, aldi berean eusten zaiela larrekotasunari eta ingurumenarekiko egokitasunari eta gobernatzeko sistema tradizionalei.

2. Laguntzarekin ondoko onurak bultzatu gogo dira nekazaritzaren, ingurumenaren eta gizartearen arloetan:

a) Abere espezieen dibertsitate genetikoa zaintzea, Nafarroako arraza autoktonoak mantenduz, eta, batik bat, “galzorian” daudela katalogatu diren arrazak.

b) Laguntzea abeltzaintza ingurune hauskorren zaintzarekin bateragarria izan dadin higadura izateko arrisku handiko tokietan eta larratzeko azalerak era jasangarriak erabil daitezen, abeltzaintzako karga egokitasunez gobernatuz, behar baino gehiago edo gutxiago larratzea saihestuz.

c) Bazkatzeko azaleren kontrol naturala hobetzea, haien narriadura murriztu nahian, eta basoetan suteak sor ditzaketen zuhaixkak kontrolatzea, baita potentzial ekologikoari eustea ere abeltzaintzako bazka aprobetxamendu tradizionaleko eremuetan.

3. Landa Garapeneko, Nekazaritza, Abeltzaintza eta Elikadurako kontseilariaren 2003ko maiatzaren 26ko Foru Agindua aldatzeko Ingurumeneko eta Toki Administrazioko kontseilariak abenduaren 29an eman 309/2014 Foru Aginduarekin bat, ondoko arraza autoktono hauek “galzorian diren arraza”-tzat jotzen dira, eta, hortaz, babes berezia merezi dute:

I. Behi aziendak: Betizua.

II. Ardi aziendak: Sasi Ardia.

III. Zaldi aziendak: Auritz, Nafarroako zaldikoa eta Pottoka.

IV. Ahuntz azienda: Pirinioetako ahuntza.

V. Zerri-azienda: Euskal Txerria

43. artikulua. Laguntza mota.

Diru-laguntza bat da, azienda larriko unitate eta urte bakoitzeko ordaintzen den prima. Laguntza urtero emanen da, eta desagertzeko arriskuan dauden tokiko arrazak mantentzeak eta haiek modu estentsibo tradizionalean gobernatzeak sortzen dituzten kostu gehigarriak eta diru-sarreren galerak estaliko ditu, konpromisoa 5 urtekoa delarik.

44. artikulua. Onartua izateko baldintzak.

Laguntzak, soil-soilik, emanen dira laguntzaren epea bukatzen denean eta konpromisoak irauten duen bitartean ondoko baldintzak betetzen dituzten eskatzaileei edo ustiategiei:

–Onuradunak:

a) Nekazaritza, ingurumen eta klimaren neurrian sartutako laguntzetatik baztertuta ez izatea.

–Ustiategikoak:

b) 309/2014 Foru Aginduaren arabera galtzeko zorian dauden arraza autoktonoren bateko ugalketarako abereak –edo etorkizunean ugalketarako direnak– izatea ustiategian, eta dagokion liburu genealogikoan inskribatuta edukitzea eskatzailearen izenean.

c) Gutxienez AzLUen 3 abere izatea inskribatuta dagokion liburu genealogikoan eta abereak inskribatzea liburu genealogikoaren jaiotzen erregistroan.

d) Araubideari atxikitzea, arraza autoktonoa eta abeltzaintzako unitateak zehaztuta, eta konpromisoa hartzea arraza horretako abereen zentsuari eusteko edo hori handitzeko bere ustiategian, 5 kanpainako aldian zehar, urtez urte luza baitaitezke.

45. artikulua. Konpromisoak eta beste betebehar batzuk.

Neurri honi atxikitzen zaizkion titularrek ondoko konpromisoak bete beharko dituzte gutxienez 5 urtez:

a) 2003ko maiatzaren 26ko Foru Aginduan zehaztutako galtzeko zorian dauden arraza autoktonoetakoren bateko abereen zentsuari eutsi eta, ahal izanez gero, handitzea, eta dagokion liburu genealogikoan inskribatuta egotea. Foru agindu horren bidez Nafarroako Abere Arrazen Katalogo Ofiziala onetsi zen, abuztuaren 29ko 309/2014 Foru Aginduak aldatu baitzuen.

b) Abeltzaintzako ustiapeneko sistema estentsiboa mantentzea, non azienda neurri handi batean larratuz elikatzen den, abereen dentsitatea 2 AzLU/ha-tik beherakoa izanda. Abere dentsitate hori kalkulatzeko, bazka-azalera eta ustiategiaren abeltzaintza estentsiboko AzLUak hartuko dira kontuan. Unitate horiek kalkulatzeko, SIMOGAN datu basean kontabilizatutako bost balioen batez bestekoa aterako da; balioak laguntzaren eskaerak aurkezteko epea bukatu eta hurrengo bost hilabeteetako bakoitzaren lehendabiziko lanegunean hartutakoak izanen dira, edo tokian berean egindako kontrolean atzemandako AzLUenak. Ardi eta ahuntz aziendarako ustiategi bakoitzaren urtarrilaren 1eko nahitaezko urteko zentsua hartuko da kontuan.

Tokian berean egindako kontrolik bada, abere dentsitatea kalkulatzeko bazka-azalera eta bertatik bertarako ikuskapenean zehaztutako AzLUak bakarrik hartuko dira kontuan.

c) Ustiategiaren titularrak eskatu beharko du laguntza urtero pagatu diezaiotela, eskabide bakarrean, Batzordearen 640/2014 Erregelamenduan ezarririko moduan eta laguntzen deialdian ezarritako tokian, moduan eta epean, ustiategiko bazkarako azalera osatzen duten lurzatiak adieraztea eta zehaztea arraza autoktonoen zenbat ugalketarako abererengatik eskatzen duen laguntza.

d) Arraza zaindu, hobetu eta sustatzeko programan parte hartzea. Liburu genealogikoak kudeatzen dituen elkarteak ezartzen du programa hori, eta ofizialki onetsi behar da.

e) Landa Garapeneko, Ingurumeneko eta Toki Administrazioko Departamentuak adierazitako prestakuntza jardueretan parte hartzea, norberak edo hark eskuordetzen duenaren bidez.

f) Eman edo jasotako diru-laguntzak eta hartutako konpromisoak direla eta, Landa Garapeneko, Ingurumeneko eta Toki Administrazioko Departamentuak egiten duen egiaztapen ekintza oro onartzea. Hartarako, Administrazioko ikuskatzaileei eta ziurtapen eta kontrol agintaritzari libre utzi beharko zaie lurzatietara sartzen, eta eragiketaren xedeko jardueraren gainean eskatzen zaien informazio guztia emanen zaie.

46. artikulua. Laguntzaren zenbatekoa.

1. Laguntzaren araubidean sartzeko eskaerak laguntzen eskabide bakarrean aurkeztuko dira. 5 urterako urteko laguntza eman ahalko zaie 44. artikuluan ezarritako onargarritasun baldintzak betetzen dituzten eskatzaileei. Laguntzaren eskabideak ebaluatuko dira, eta organo eskudunak onartu edo ukatuko ditu 3 hilabeteko epean, ebazpen baten bidez. Epe hori igarota, administrazioaren isiltasunez ezetsitzat joko dira.

2. Galzorian dauden tokiko arraza bakoitzean ustiategian hautatzen ahal diren azienda larriko unitateei aplikatu beharreko zenbateko unitarioa:

3. Konpromisoa eta ordainketa kalkulatzeko kontuan hartzen diren AzLUak hauetako batezbestekoa izanen da: AZLU onargarriak; dagokion liburu genealogikoetan inskribatuta eta SIMOGAN datu basean kontabilizatuak dauden AzLUak (laguntzaren eskaerak aurkezteko epea bukatu eta hurrengo bost hilabeteetako bakoitzaren lehendabiziko lanegunean hartutakoak). Ardi eta ahuntz aziendarako ustiategi bakoitzaren urtarrilaren 1eko nahitaezko urteko zentsua hartuko da kontuan.

Tokian berean egindako kontrolik bada, bertatik bertarako ikuskapenean zehaztutako AzLUak bakarrik hartuko dira kontuan laguntza kalkulatzeko.

AzLUak zenbatzeko, kontuan hartuko dira ugalketarako diren eme guztiak eta gehienez ere ar bat 30 emeko edo zatiko.

4. Emakidaren zenbatekoa eragiketa honen emaitza izanen da: zenbateko unitarioa bider zehazturiko AzLUak, administrazio kontrolak eta tokian bertakoak egin ondoren eta jartzen diren zigorrak aplikatu baino lehen.

5. Onuradun bakoitzari emaniko laguntzaren zenbateko osoa gehieneko muga izanen da, konpromisoaldiaren hurrengo urteetan kobratzeko eskaerari aplikatzeko orduan.

47. artikulua. Ordaintzeko eskaerak eta urteroko ordainketak.

1. 5 urtez urteko ordainketa emanen zaie 44. eta 45. artikuluetan ezarritakoari jarraikiz onargarritasun baldintza eta konpromisoak betetzen dituzten abeltzainei, betiere dagokion kanpainaren eskabide bakarrean urteko ordainketa eskatu badute (46.3 artikuluaren arabera zehaztutako abereak kontuan hartuta).

2. Ordainketaren zenbatekoa kalkulatzeko, zenbateko unitarioa biderkatuko da kasuan kasuko kontrol administratibo eta landa kontrol guztiak egin ondoren ordaintzeko kalkulatzen diren AzLUekin, 48. artikuluko zigorrak aplikatuta, hala behar denean.

48. artikulua. Bateraezintasunak eta hautaketa irizpideak.

1. Laguntza hau bateraezina da, oro har, Landa garapenari FEADERen eta hura garatzen duen araubidearen bidez laguntzeari buruzko Europako Parlamentuaren eta Kontseiluaren 1305/2013 (EB) Erregelamendutik sortzen direnekin.

2. Galzorian dauden tokiko arrazak kontserbatu eta hobetzeagatik prima jasotzen duten arrazek ez dute jasoko animaliak larratze eta sistema estentsiboa zabaltzearen bidezko abeltzaintzako sistema jasangarrien laguntza osagarria, bi laguntzak bateraezinak direla jotzen baita.

3. 2016ko eta hurrengo urteetako kanpainetarako laguntzak kalkulatuko dira ondoko hautapen irizpideetako baremazioa aplikatuz:

a) Operaziorako definitutako arrazetako ugalketarako eme gutxien duen arraza: Euskal Txerria, Ahuntza piriniotarra, Sasi Ardia, Pottoka, Betizua, Nafarroako zaldizkoa, Auritz.

–1. arraza: 7 puntu.

–2. arraza: 6 puntu.

–3. arraza: 5 puntu.

–4. arraza: 4 puntu.

–5. arraza: 3 puntu.

–6. arraza: 2 puntu.

–7. arraza: 1 puntu.

b) Desagertzeko arriskuan dauden arrazetako 24 hilabetetik gorako UzLUren portzentajea (12 hilabete ardien eta ahuntzen kasuan), ustiategiko UzLU guztien gainean.

≥ %70: 2 puntu.

≥ %20 eta < %70: 1 puntu.

Eskaera batek laguntza jaso ahal izateko gutxieneko puntuazioa 2 puntukoa da; guztira 9 puntu dira.

Espedienteen puntuazioan berdinketarik gertatzen bada, kontuan hartuko da 24 hilabetetik gorako abereen portzentajea berdinketa hausteko. Berdinketak jarraituz gero, lehentasuna eragiketaren xedeko AzLU gehien dituztenei emanen zaie.

49. artikulua. Ez-betetzeen mailaketak.

1. 44. eta 45. artikuluetan zehaztatutako betebeharren eta konpromisoen ez-betetzeak honako taula honetan ezartzen dira, eta haiei dagokien zehapena, III. Eranskinean.

2. Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Kontseiluaren 1306/2013 (EE) Erregelamenduaren aplikazio-xedapenak ezarri ziren. Beste konpromiso edo betebehar batzuk ez betetzeak, Batzordearen martxoaren 11ko 640/2014 (EB) Erregelamendu Delegatuaren 35. artikuluan ezarritakoarekin bat, ekarriko du IV. Eranskinean deskribatutako zehapenak aplikatzea.

VI. KAPITULUA

Natura balio handiko zereal-agrosistemetan ardi aziendaren larratze jasangarrirako laguntza

50. artikulua. Laguntzaren deskripzioa.

Laguntza honen helburua konpentsazio bat ematea da bazkalekuen edo barrutien larre aprobetxamendua esleitua duten ardi aziendako abeltzaintza ustiategien titularrentzat, Nafarroako hegoaldeko estepako nekazaritza sistemetan larratzeko debekuek eta betebeharrek eragindako kostu gehigarriei eta diru-sarreren galerei aurre egiteko, bereziki Nafarroako estepako hegaztiak zaintzeko intereseko eremuetan (AICAENA).

51. artikulua. Laguntza mota.

1. Laguntza gisa, hektarea bakoitzeko prima bat ordaintzen zaie ustiategien titularrei, baldin eta bost urtez betetzen badituzte onargarritasun irizpideak, konpromisoak eta 52. eta 53. artikuluetako murriztapenak.

2. Deialdi honen xedeko diru-laguntzak norgehiagokako araubidea erabiliz emanen dira.

52. artikulua. Onartua izateko baldintzak.

Laguntzak soil-soilik emanen dira laguntza eskatzeko epea bukatzen denean eta konpromisoak irauten duen bitartean (bost urte) ondoko baldintzak betetzen dituzten eskatzaileei edo ustiategiei.

Onartua izateko baldintzak:

–Onuradunari dagokionez:

Ardi aziendako abeltzaintzako ustiategi baten titularra izatea.

b) Bazkaleku/barruti bateko larre aprobetxamendua esleitua izatea laguntza eskatzen den urtean.

c) Bazkaleku/barrutiaren esleipena/titulartasuna aurkeztea, agiri hori eskabide bakarrean laguntza eskaerari erantsiz.

d) Nekazaritza, ingurumen eta klimaren laguntzen araubidetik baztertua ez izatea.

–Ustiategiari dagokionez:

e) Bazkalekua/barrutia kokatua izatea udalerri hauek eratzen duen lerrotik hegoaldera dauden udalerrietako batean (denak barne): Viana, Bargota, Armañanzas, Santsol, Los Arcos, Barbarin, Arroitz, Arellano, Deikaztelu, Morentin, Aberin, Villatuerta, Mendigorria, Larraga, Tafalla, Erriberri, Beire, Pitillas, Santacara, Murillo el Fruto eta Zarrakaztelu.

f) Lurraren erabilera izatea “lur goldagarria”, lehorrekoa, edo “larreak”.

53. artikulua. Konpromisoak.

Neurri honi atxikitzen zaizkion titularrek ondoko konpromisoak bete beharko dituzte gutxienez 5 urtez:

1. Ustiategiaren titularrak eskatu beharko du laguntza urtero pagatu diezaiotela, laguntza eskabide bakarrean, Batzordearen 2014ko martxoaren 11ko 640/2014 Erregelamendu Delegatuan ezarririko moduan eta laguntzen deialdian ezarritako tokian, moduan eta epean.

2. Urteko eskabidean, adieraztea ustiategiko zer lurzati den laguntzaren xedeko eta haietarako laguntza eskatzea.

3. Urtero eustea norberaren konpromisoko azaleraren %90ko azalera hautagarriari gutxienez.

4. Eman eta hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea.

5. Landa Garapeneko, Ingurumeneko eta Toki Administrazioko Departamentuak agintzen dizkien prestakuntza-ekintzetan parte hartzea.

6. Abeltzaintzako aprobetxamenduari dagokionez:

–Neguko debekua errespetatzea: eskaera egiten den urteko azaroaren 1etik hurrengo urteko urtarrilaren 31ra ezin izanen da abeltzaintzako aprobetxamendurik egin neurriaren xedeko larreetan eta lehorreko lurren eremuetan.

–Udako debekua errespetatzea: eskaera egiten den urteko ekainaren 1etik abuztuaren 31ra ezin izanen da abeltzaintzako aprobetxamendurik egin neurriaren xedeko larreetan eta lehorreko lurren eremuetan.

–Nahitaezko larratzea, 20 egunez gutxienez, eskaera egiten den urteko irailaren 1etik urriaren 31ra egin beharrekoa.

Neguko nahiz udako debekuak eta nahitaezko larratzeak “abereen jatorri eta osasun gidak” erabiliz eta bertatik bertarako ikuskapenak eginez kontrolatuko dira.

54. artikulua. Araubidean sartzea eta laguntzaren zenbatekoa.

1. Laguntzaren araubidean sartzeko eskaerak laguntzen eskabide bakarrean aurkeztuko dira. 5 urterako urteko laguntza eman ahalko zaie 52. artikuluan ezarritako onargarritasun baldintzak betetzen dituzten eskatzaileei.

2. Kontzesioaren zenbatekoa eragiketa honen emaitza izanen da: zenbateko unitarioa, 7,65 euro hektareako, bider zehazturiko azalerak, administrazio kontrolak eta tokian bertakoak egin ondoren eta behar baino azalera gehiago deklaratzeagatik jartzen diren zigorrak aplikatu baino lehen. Larreen kasuan, azalera hautagarria zehazteko larreen onargarritasunaren koefizientea erabiliko da.

3. Onuradun bakoitzari emaniko laguntzaren zenbateko osoa gehieneko muga izanen da, konpromisoaldiaren hurrengo urteetan kobratzeko eskaerari aplikatzeko orduan.

55. artikulua. Ordaintzeko eskaerak eta urteroko ordainketak.

1. 5 urteko laguntzaren onuradunek urtero eskatu behar dute hura ordaintzeko laguntzaren eskabide bakarraren bidez. Laguntza jasotzeko, 52. artikuluko baldintzak eta 53. artikuluko konpromisoak eta murrizketak bete beharko dituzte.

2. Ordainketaren zenbatekoa eragiketa honen emaitza izanen da: 7,65 euro/ha (zenbateko unitarioa), bider ordaintzeko kontuan hartutako azalera, kasuan kasuko kontrol administratibo eta landa kontrol guztiak egin ondoren, eta foru agindu honen III. eranskinean aurreikusitako zigorrak aplikatu ondoren, urte bakoitzerako emandako zenbatekoa urte horretan gainditu gabe.

56. artikulua. Bateraezintasunak eta hautaketa irizpideak.

1. Laguntza hau ez da bateraezina Nafarroako Landa Garapenerako 2014-2020ko Programako beste laguntza batzuekin, ezta laguntza zuzenekin ez Greening-en ordainketekin ere.

2. Eskaerek aurrekontuko gehieneko zenbatekoa gaindituz gero, lehentasun irizpideak hauek izanen dira:

57. artikulua. Ez-betetzeen mailaketak.

52. eta 53. artikuluetan zehaztatutako ez-betetzeak honako taula honetan jasotzen dira, eta haiei dagokien zehapena foru agindu honen III. eranskinean zehazten.

Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Kontseiluaren 1306/2013 (EE) Erregelamenduaren aplikazio-xedapenak ezarri ziren. Beste konpromiso edo betebehar batzuk ez betetzeak, Batzordearen martxoaren 11ko 640/2014 (EB) Erregelamendu Delegatuaren 35. artikuluan ezarritakoarekin bat, ekarriko du IV. Eranskinean deskribatutako zehapenak aplikatzea.

VII. KAPITULUA

Estepako habitata hobetzea basoiloarentzat eta basoilo handiarentzat

58. artikulua. Laguntzaren deskripzioa.

Laguntza honen helburua da Nafarroako Erriberako lehorreko lur erdiaridoetako balio handiko nekazaritzako sisteman dauden intereseko hegaztien populazioak mantentzen laguntzea, haien ugalketa, elikadura eta babeserako habitatak hobetzen dituzten nekazaritzako jarduketak martxan jarriz.

59. artikulua. Jarduketa eremua.

Laguntzen araubidea lurzatiak honako udalerrietan dituzten lehorreko nekazaritzako ustiategi estentsiboei aplikatuko zaie:

60. artikulua. Definizioak.

Laguntza hauen ondorioetarako soil-soilik, honako definizio hauek hartuko dira kontuan:

a) Zerealen laboreak: landu gabeko lur-zerrendak uzten diren lurzatietan, lehorreko zerealak bakarrik ereinen dira, lur goldagarrietan, urtero txandakatuak. Haiekin, tokian tokiko baldintza arruntetan egiten da nekazaritzako jarduera.

b) Intereseko lekadunak: talde honetan sartzen dira aprobetxamendu ekonomikorik ez duten luzerna, zalke, astorki, zalke arrunt edo eru laboreak.

c) Bazkatzeko aprobetxamendua: modu estentsiboan dabiltzan abereek egindakoa, belardi naturalak (espontaneoak) erabilita edo lehorreko lur goldagarrietan landutako (ereindako) belardiak larratzeko erabilita.

d) AICAENA: Nafarroako estepako hegaztiak zaintzeko intereseko eremua. Laguntza hauen jarduketa esparruan “AICAENA” horiek hiru mailatan sailkatuak daude, estepako faunarentzat duten interesaren arabera.

61. artikulua. Laguntza mota.

1. Hektarea bakoitzeko ordainketa bat egiten zaie 62. eta 63. artikuluetako konpromisoak eta onargarritasun irizpideak konpromisoaldiko 5 urtean betetzen dituzten nekazariei.

2. Titularrak bi erabilera mota egin ditzake lurzati horietan.

2.1. Zereal laboreak dauden lurzatietan (urtero zehaztuak), zerrendak paratuko dira, 2 metroko zabalerakoak, lurzatiaren perimetroan; haietan ezin da deus erein, ez lurra landu, eta ez inolako tratamendurik eman. Lurzati horietan lastoa bildu gabe utziko da eta lurraren gainean ilaratan geldituko da.

2.2. Zenbait lurzatitan hegaztien intereseko honako lekadunen bat ereinen da: luzerna, zalkea, astorkia, zalke arrunta edo erua. Abuztuaren 1a arte ez dute nekazaritzarako aprobetxamendurik izanen; garai zehatz batzuetan aziendak sartzen utziko da, estepako hegaztien ziklo biologikoei gutxien eragiten dienean.

3. Deialdi honen xedeko diru-laguntzak norgehiagokako araubidearen bidez emanen dira eta eskaerak 66. artikuluan (hautapen irizpideak) adierazitako moduan lehenetsiko dira.

4. Laguntza hauetarako aurrekontuan erabilgarri dagoen kredituarekin ezin balitz eskatutako azalera guztia finantzatu, lehentasuna emanen zaio ustiategiek Nafarroako estepako hegaztiak zaintzeko intereseko eremuetan (AICAENA) duten zatiari. Azalera horietan aurrerago zehazten diren hautapen irizpideak aplikatuko dira; eta eransten joanen dira AICAENA eremuetan ez dauden azalerak, horietan konpromisoetan definitutako erabilera motak egiten badira.

62. artikulua. Onartua izateko baldintzak.

1. Laguntzak, soil-soilik, emanen dira laguntza eskatzeko epea bukatzen denean eta konpromisoak irauten duen bitartean ondoko baldintzak betetzen dituztenei:

a) SIGPACen lehorreko lur goldagarritzat katalogatutako nekazaritzako azalera izan behar du.

b) Azalera hautagarriak 59. artikuluan zehaztatutako udalerrietan egon behar du.

c) Nekazaritza, ingurumen eta klimaren laguntzen araubidetik baztertua ez izatea.

63. artikulua. Konpromisoak.

Neurri honi atxikitzen zaizkion titularrek ondoko konpromisoak bete beharko dituzte gutxienez 5 urtez:

a) Ustiategiaren titularrak eskatu beharko du laguntza urtero pagatu diezaiotela, laguntza eskabide bakarrean, Batzordearen 2014ko martxoaren 11ko 640/640 Erregelamendu Delegatuan ezarririko moduan eta laguntzen deialdian ezarritako tokian, moduan eta epean.

b) Urteko eskabidean, adieraztea ustiategiko zer lurzati den laguntzaren xedeko eta haietarako laguntza eskatzea.

c) Urtero azalera hautagarri jakin bat mantentzea, gutxienez %90ekoa, erabilera mota horretarako.

d) Urtero, laguntzak emandako AICAENA eremuetan edo lehentasunaren aldetik horien pareko direnetan, azalera hautagarri jakin bat mantentzea, gutxienez %90ekoa, AICAENA bakoizteko.

e) Eman eta hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea.

f) Landa Garapeneko, Ingurumeneko eta Toki Administrazioko Departamentuak agintzen dizkien prestakuntza ekintzetan parte hartzea.

g) Faunarako zerrendak/uztondoak: urtero laguntzaren barnean sartzen den zerealen lurzati guztietan, urte bateko edo gehiagoko zerrendak paratuko dira, 2 metroko zabalerakoak, lurzatiaren perimetroan. Haietan ez da nekazaritzako lanik eginen: ereitea, fitosanitariorik aplikatzea, biltzea eta abar. Lastoa ere osorik utziko da, xehatu gabe, uztondoaren gainean ilaratan, zabaldu edo bildu gabe. Azalera horietan larratzea baimentzen da abuztuaren 1etik aurrera, eta altxatzea irailaren 1etik aurrera.

h) Faunarentzat ereitea: titularrak zehaztutako lurzatietan 61. artikuluan zehaztutako intereseko lekadunak ereiten ahal ditu. Abuztuaren 1a arte ez dute nekazaritzarako aprobetxamendurik izanen. Baimentzen da abereak ekainaren 15etik aurrera iragatea, lugorrian erein bada, edo abuztuaren 1etik aurrera, berriz, laboreak izan dituen lurzati batean. Baimentzen da irailaren 1etik aurrera altxatzea edo urriaren 20ra arte larratzea.

64. artikulua. Araubidean sartzea eta laguntzaren zenbatekoa.

1. Laguntzaren araubidean sartzeko eskaerak laguntzen eskabide bakarrean aurkeztuko dira. 5 urterako urteko laguntza eman ahalko zaie 62. artikuluan ezarritako onargarritasun baldintzak betetzen dituzten eskatzaileei. Laguntzaren eskabideak ebaluatuko dira, eta organo eskudunak onartu edo ukatuko ditu 3 hilabeteko epean, ebazpen baten bidez. Epe hori igarota, administrazioaren isiltasunez ezetsitzat joko dira.

2. Emakidaren zenbatekoa:

–Zerrenda periferikoen eta lastoaren konpromisoa. Prima:

Euro/hektarea = 27 (euro/t) × IR (t/hektarea).

–Faunarentzat ereiteen gaineko konpromisoa. Prima:

Euro/hektarea = 220 (euro/t) × IR (t/hektarea).

3. Onuradun bakoitzari emaniko laguntzaren zenbateko osoa gehieneko muga izanen da, konpromisoaldiaren hurrengo urteetan kobratzeko eskaerari aplikatzeko orduan.

65. artikulua. Ordaintzeko eskaerak eta urteroko ordainketak.

1. 5 urteko laguntzaren onuradunek urtero eskatu behar dute hura ordaintzeko laguntzaren eskabide bakarraren bidez. Laguntza jasotzeko, 62. eta 63. artikuluetako baldintzak eta konpromisoak bete beharko dituzte.

2. Ordainketaren zenbatekoa kalkulatzeko, kontuan hartuko dazer azalera betetzen dituen konpromisoak urtero, emakidaren zenbatekoaren mugarekin.

3. Ez da aurreikusten konpromisoak zabaltzea laguntzak onetsi diren hasierako kanpainaren ondoren egiten diren hurrengo kanpainetan. Konpromisoak osorik edo partez eskualdatzea, ordea, posible izanen da, 7. artikuluan adierazi bezala.

66. artikulua. Bateraezintasunak eta hautaketa irizpideak.

1. Laguntza hau ez da bateraezina Nafarroako Landa Garapenerako 2014-2020ko Programako beste laguntza batzuekin, ezta laguntza zuzenekin ez Greening-en ordainketekin ere.

2. Eskaerek aurrekontuko gehieneko zenbatekoa gaindituz gero, lehentasun irizpideak hauek izanen dira:

67. artikulua. Ez-betetzeen mailaketak.

1. 62. eta 63. artikuluetan zehaztatutako betebeharren eta konpromisoen ez-betetzeak honako taula honetan ezartzen dira:

III. TITULUA

11. neurria – Nekazaritza ekologikoa

68. artikulua. Laguntzaren deskripzioa.

1. Produkzio ekologikoa nekazaritzako kudeaketarako eta elikagaien produkziorako sistema orokor bat da, ondokoak biltzen dituena: jardunbide egokienak ingurumenaren arloan, biodibertsitate maila altua, baliabide naturalen babesa eta animalien ongizateari buruzko arau zorrotzen aplikazioa. Halaber, nekazaritza ekologikoak oinarri ditu tokiko nekazaritza sistemetan integratutako baliabide berriztagarriak.

2. Produktu ekologikoen merkatua handitzen ari da; hala ere, azken kontsumitzaileek, ordaintzen duten prezioaren bidez, ez dute erabat konpentsatzen haien kostu handiagoak eta produkzio txikiagoa. Horrenbestez, sektorearen aurrerapena ekarriko duten baldintzak sustatu behar dira, produkzioaren eta merkatuaren bilakaerarekin bat.

3. Nafarroako Landa Garapenerako 2014-2020 Programaren proposamenean, nekazaritza ekologikoari buruzko neurria dago, bi azpineurri hauekin:

a) Nekazaritza ekologikoaren metodo eta jarduketetara aldatzea.

b) Nekazaritza ekologikoaren metodo eta jarduketak kontserbatzea.

4. Titulu honen ondorioetarako, 5. artikuluko definizioak aplikatuko dira.

69. artikulua. Laguntza mota.

1. Laguntza, hektarea bakoitzeko urteko prima bat da, produkzio ekologikorako lurzatien azalera hautagarriaren eta 70. artikuluan definitutako labore moten arabera emandakoa eskaeraren urtean, 5 urteko konpromisoaldiarekin.

2. Titulu honen 69. artikuluan jasotzen diren onargarritasun baldintzak betetzen dituztenei emanen zaizkie laguntzak.

3. Laguntzak emateko prozedura norgehiagokako araubideari jarraikiz tramitatuko da.

70. artikulua. Onartua izateko baldintzak.

1. Laguntzak, soil-soilik, emanen dira laguntza eskatzeko epea bukatzen denean eta konpromisoak irauten duen bitartean ondoko baldintzak betetzen dituzten eskatzaileei edo ustiategiei:

–Onuradunenak.

a) Jarduneko nekazaria izatea, 307/2013 (EB) Erregelamenduaren 9. artikuluaren arabera.

b) Nekazaritza Ekologikoaren neurrian sartutako laguntzetatik baztertuta ez izatea.

c) Nafarroako Nekazal Produkzio Ekologikoaren Kontseiluaren (NNPEK) lizentzia izatea eskaera aurkezteko epea bukatzen denean, eta produkzio unitateak (azalerak eta abereak) eskatzailearen izenean inskribatuak izatea.

d) Laguntzen araubideari atxikitzeko eskatzea, ustiategi ekologikoko lurzatiak zehaztuta, eta konpromisoa hartzea nekazaritza ekologikoa praktikatzeko, 834/2007 (EE) Erregelamenduan, 889/2008 (EE) Erregelamenduan eta 617/1999 Foru Dekretuan ezarritakoaren arabera, gutxienez 5 kanpainan, eraldatze prozesuari dagozkionak barne.

–Ustiategienak.

e) Nafarroako Foru Komunitateko lurzatiak produkzio ekologikorako erabiltzea, labore mota hauekin:

–Ebakitzeko belar laboreak eta bazka-laboreak lehorreko lurretan. Hektarea bakoitzeko 2,2 tonakoa edo gutxiagoko errendimendua duten udalerriak, Produkzioa eskualdekatzeko Planaren arabera.

–Ebakitzeko belar laboreak eta bazka-laboreak lehorreko lurretan. Hektarea bakoitzeko 2,2 tonakoa baino gehiagoko eta 3,7 tonakoa edo gutxiagoko lehorreko errendimendua duten udalerriak.

–Ebakitzeko belar laboreak eta bazka-laboreak lehorreko lurretan. Hektarea bakoitzeko 3,7 tonakoa baino gehiagoko lehorreko errendimendua duten udalerriak.

–Ebakitzeko belar laboreak eta bazka-laboreak ureztalurretan.

–Arroza.

–Ardotarako mahatsa.

–Fruitu oskoldunak.

–Olibondoak.

–Fruta-arbolak.

–Landare usaintsuak, sendabelarrak eta tindatzekoak.

–Aire zabaleko barazkiak eta berotegietakoak.

–Nekazaritza ekologikoaren ustiategi baten larreak, ondoko espezietarako:

I. Behi azienda, zezenketakoa izan ezik.

II. Ardi azienda.

III. Ahuntz azienda.

IV. Zaldi azienda, haragitarako gaitasunarekin.

2. “Nekazaritza ekologikora aldatzeko” laguntzetatik bazterturik daude aurreko aldian “nekazaritza ekologikoa” eta/edo “abeltzaintza ekologikoa” neurrietan laguntzak jaso eta Nafarroako ziurtapen ekologikorako erakunde ofizialean zuten inskripzioa deuseztatu zituzten lurzatiak. Emakida kalkulatuko zaie lurzati horiei eta, aldatzeko aldia gainditu ondoren, nekazaritza ekologikoaren metodo eta jarduketak kontserbatzeagatik ematen den ordainketa onartuko zaie. Bazterketa hori ez da izango lurzatien zati bat edo ustiategi osoa salerosi, eskualdatu edo errentan hartzen direnean.

3. Neurri horretatik kanpo gelditzen dira emankortasuna kontserbatu, mantendu edo hobetzeko lanik jasotzen ez duten azalerak, baita herrilurretako larreen bazka-azalerak ere.

4. Lugorriak ez du laguntza zenbatekorik sortzen; hala ere, hori kontuan hartuko da gutxienez konpromisoko azaleraren %90 mantentzea betetzearren.

71. artikulua. Konpromisoak eta beste betebehar batzuk.

Neurri honi atxikitzen zaizkion titularrek ondoko konpromiso eta baldintzak bete beharko dituzte gutxienez 5 urtez:

a) 834/2007 (EE) Erregelamenduan eta 889/2008 (EE) Erregelamenduan produkzio ekologikorako ezarritako metodoak aplikatzea neurri honen xedeko produkzio unitateetan (azaleretan eta abereetan), eta Nafarroako organismo ziurtatzailearen (NPPEK) ziurtagiria lortzea.

b) Ziurtapen erakundearen gomendioei jarraitzea, arau ekologikoak betetzen ez badira. Egindako gomendioak betetzen direla egiaztatuko da.

c) Ustiategiaren titularrak eskatu beharko du laguntza urtero pagatu diezaiotela, kanpaina bakoitzeko eskabide bakarrean, Batzordearen 640/2014 Erregelamenduan ezarririko moduan eta laguntzen deialdian ezarritako tokian, moduan eta epean. Urtero ustiategiko lurzatiak adieraziko dira, produkzio ekologikorako erabiltzen direnak eta laguntzaren urteko ordainketaren xede direnak azalduz.

d) Laguntza jaso duen azaleraren %90 edo gehiago produkzio ekologikoan mantentzea.

e) Landa Garapeneko, Ingurumeneko eta Toki Administrazioko Departamentuak agintzen dizkien prestakuntza-ekintzetan parte hartzea. Horri dagokionez, konpromisoa betetzat joko da baldin eta onuradunaren ordez hark eskuordetutako pertsona bat joaten bada. Pertsona horrek, edonola ere, konpromisoaren xede diren lurzatietako laborantza eragiketak egin eta kontrolatzeko ardura izan beharko du.

f) Ustiategiko koadernoa eguneraturik edukitzea, non laborantza-lan guztiak adieraziko baitira.

g) Eman eta hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea. Horretarako, baimena eman beharko zaie ikuskatzaileei eta ziurtatu eta kontrolatzeko agintariei lurzatietan eta ustiategiei loturiko instalazioetan askatasun osoz sartzeko.

h) Ustiategiko azienda ekologikoak aprobetxatuko ditu larre iraunkorrak eta larratzeko bazka-azalera ekologikoak.

i) Bazka-azaleren aprobetxamendu estentsiboa mantentzea abeltzaintzaren urteroko karga egokiaren bidez (1,5 AzLUren eta 0,2 AzLUren arteko karga hektareako). Abere dentsitate hori kalkulatzeko, bazka-azalera ekologikoa eta ustiategiaren abeltzaintza estentsibo ekologikoko AzLUak hartuko dira kontuan. Unitate horiek kalkulatzeko, SIMOGAN datu basean kontabilizatutako AzLUen batez bestekoa aterako da; balioak laguntzaren eskaerak aurkezteko epea bukatu eta hurrengo bost hilabeteetako bakoitzaren lehendabiziko lanegunean hartutakoak izanen dira, edo tokian berean egindako kontrolean atzemandako AzLUenak. Ardi eta ahuntz aziendarako ustiategi bakoitzaren urtarrilaren 1eko nahitaezko urteko zentsua hartuko da kontuan.

Tokian berean egindako kontrolik bada, abeltzaintzako karga kalkulatzeko azalera eta bertatik bertarako ikuskapenean zehaztutako AzLUak bakarrik hartuko dira kontuan.

j) Ustiategiaren produktoreek metodo ekologikoak erabili behar dituzte nekazaritzako produkzioaren prozesu osoan, azken kontsumitzailearentzako edo industria eraldatzailearentzako produktu egokia lortu arte.

Nekazaritzako lurzatien kasuan, eskatzen da nekazaritzako jarduera eremuko baldintza arruntetan egitea eta landatutako lurzatietan uzta biltzea.

Hazteko abeltzaintza ekologikoaren kasuan, aldatzeko aldia gainditu ondoren, eskatzen da hiltzeko edo gizentzeko azken ekoizle ekologiko bati saltzea ondoko proportzioan:

–Haragitarako behi eta zaldien produkzioan, 0,25 abere ugalketarako den 36 hilabetetik gorako eme bakoitzeko eta urteko. Betizu behi arrazarako, koefiziente hori 0,20ra murrizten da.

–Haragitarako ardi eta ahuntzen produkzioan, 0,40 abere ugalketarako den eme bakoitzeko eta urteko.

–Esnetarako behi aziendaren kasuan, gutxieneko produkzioa eta salmenta eskatzen da: 3.000 kg esne 24 hilabetetik gorako eme bakoitzeko eta urteko.

–Esnetarako ardi eta ahuntz aziendaren kasuan, 60 eta 100 litro ugalketarako den eme bakoitzeko eta urteko, hurrenez hurren.

–Gizentzeko abeltzaintza ekologikoaren kasuan, eskatzen da hiltzeko saltzea urtean saldutako abereen %50 edo gehiago.

k) Oinarrizko lerroko konpromisoak betetzea, laguntza horri buruz foru agindu honen II. eranskinean jasoak.

l) Aldatzeko aldia gainditu ondoren, neurri honen xede diren produkzio unitateak mantentzea ustiategiaren barnean, bertan produkzio ekologikoaren metodoak erabiliz.

72. artikulua. Araubidean sartzea eta laguntzaren zenbatekoa.

1. Laguntzaren araubidean sartzeko eskaera laguntzen eskabide bakarraren bidez eginen da. 5 urterako urteko laguntza eman ahalko zaie 69. artikuluan ezarritako onargarritasun baldintzak betetzen dituzten eta 70. artikuluan ezarritako konpromisoei atxikitzen zaizkien eskatzaileei. Laguntzaren eskabideak ebaluatuko dira, eta organo eskudunak onartu edo ukatuko ditu 3 hilabeteko epean, ebazpen baten bidez. Epe hori igarota, eskaera ezetsitzat joko da.

2. Laguntza kalkulatuko da azalerari honako modulazio hau aplikatuta:

a) Labore mota guztien azalera bateratzeko eta azalera baliokideak lortzeko, ondoko baliokidetasun koefizienteak aplikatzen zaizkie labora mota bakoitzean zehaztutako azalerei:

b) Lehenbiziko 16,66 unitate baliokideei, labore mota bakoitzean zehaztutako azaleraren arabera banatuak, zenbateko unitario oso aplikatzen zaie. Hurrengo unitate baliokideei, zenbateko unitarioaren %50 aplikatzen zaie. Bi zenbatekoen baturak bat egiten du emandako laguntzaren zenbatekoarekin.

c) Sozietateen kasuan, osotara ordaindu beharreko 16,66 unitate baliokideen kopurua handituko da bazkideen kopuruaz biderkatuz (3 gehienez).

3. 2015eko eta 2016ko kanpainetan onartutako laguntzetarako, ondoko zenbateko unitarioak aplikatuko zaizkie labora mota bakoitzean zehaztutako azalerei, mantentzeko azalerak eta aldatzeko azalerak bereiziz:

2017ko kanpainan onartutako laguntzetarako, ondoko zenbateko unitarioak aplikatuko zaizkie labora mota bakoitzean zehaztutako azalerei, mantentzeko azalerak eta aldatzeko azalerak bereiziz:

4. Ustiategiak aldatzen ari diren lurzatiak baditu, ulertuko da labore bat labore mota batzuetan dagoela aldatzen edo mantentzen ari bada. Titular bakoitzaren laguntza kalkulatuko da “aldatzen” ari diren azaleretarako, ziurtapen erakundeak izendatutako lurzatiak kontuan hartuta, eta lurzatiek aldatze egoeran egon behar duten kanpainetarako. Halaber, “mantentzen” ari diren azaleretarako, kanpaina bakoitzerako kalkulatuko da, egoeran horretan dauden lurzatiak kontuan hartuta, baita aldatzeko aldia gainditu dutenak ere.

5. Onuradun bakoitzari emaniko laguntzaren zenbateko osoa gehieneko muga izanen da, konpromisoaldiaren hurrengo urteetan kobratzeko eskaerari aplikatzeko orduan.

6. Ustiategiaren azienda ekologikoak aprobetxatuko ditu larre iraunkorren azalera eta larratzeko bazka-azalera, eta diru-laguntza jaso dezaketen hektareek ezin dute ustiategiko AzLU ekologikoen balioa gainditu. Unitate horiek kalkulatzeko, SIMOGAN datu basean kontabilizatutako AzLUen batez bestekoa aterako da; balioak laguntzaren eskaerak aurkezteko epea bukatu eta hurrengo bost hilabeteetako bakoitzaren lehendabiziko lanegunean hartutakoak izanen dira, edo tokian berean egindako kontrolean atzemandako AzLUenak. Ardi eta ahuntz aziendarako ustiategi bakoitzaren urtarrilaren 1eko nahitaezko urteko zentsua hartuko da kontuan.

Tokian berean egindako kontrolik bada, bertatik bertarako ikuskapenean zehaztutako AzLUak bakarrik hartuko dira kontuan laguntza kalkulatzeko.

7. Lugorria emakidaren urteko lehorreko belarkietarako deklaratutako azaleraren erdia baino gehiago bada, hori kontuan hartuko da konpromisoaren azalera eta urteko gehieneko zenbatekoa zehazteko, betiere laguntzaren azalerak labore mota horretako lur azalera osoaren %50 gainditu gabe.

8. Eskaeraren urtean lurzatiak berrantolatzeko prozesuan dauden eta landatzea ezinezko duten udalerrien kasuan, berrantolatze prozesuaren hasieraren aurreko urteko laborantzen aitorpena hartuko da laguntzaren zenbatekoa kalkulatzeko erreferentzia gisa.

9. Ez dira emango 100 eurotik beherako emakidarik.

73. artikulua. Ordaintzeko eskaerak eta urteroko ordainketak.

1. Urteko ordainketa laguntzen eskabide bakarraren bidez eskatuko da, non aitortuko diren 70. artikuluan adierazitako konpromisoak mantenduko dituzten lurzatiak edo NELIGS barrutiak, nekazaritza ekologikoaren laguntza zein laboretarako eskatzen den adierazita.

2. Urte bateko laboreen kasuan, urtero pagatzeko eskaera aurkeztu beharko da laborea ezartzen den urte berean.

3. Urteko ordainketa kanpaina horretan adierazitako laboreen arabera (egokitzapena aplikatuta) eta foru agindu honen 71. artikuluan ezarritako labore moten zenbatekoaren arabera kalkulatuko da, kanpaina horretarako emandako laguntzaren mugaraino.

74. artikulua. Bateraezintasunak eta hautaketa irizpideak.

1. Laguntza hau bateraezina da, oro har, Landa garapenari FEADERen eta hura garatzen duen araubidearen bidez laguntzeari buruzko Europako Parlamentuaren eta Kontseiluaren 1305/2013 (EB) Erregelamendutik sortzen direnekin.

2. Nolanahi ere, ondoko hauekin bateraezina da:

a) “Abeltzaintzako sistema jasangarriak sustatzea, animaliak larratze eta sistema estentsiboa zabaltzearen bidez” laguntzarekin, ebakitzeko belarki laboreak eta bazka-laboreak lehorreko lurretan eta ureztalurretan eta larreak labore moten kasuan.

b) Hazitarako patataren nekazaritza eta ingurumeneko produkziorako laguntzarekin, labore horretarako.

c) Ekintza planetan, programa operatiboetan eta berariazko neurrietan konpromiso berak edo antzekoak biltzen dituzten laguntzekin.

3. Produkzio ekologikoa neurriaren onuradunek, ordainketa zuzenak jaso eta, greening-a betetzetik salbuetsita ez daudenez, neurri horretarako konprometitutako azaleran egitea erabakitzen badute, produkzio ekologikoaren ordainketa murriztuko zaie finantzaketa ez bikoizteko, klimarako eta ingurumenerako onuragarriak diren nekazaritzako jarduketetarako ordainketaren onuradunak baitira.

4. 2016ko eta hurrengo urteetako kanpainetarako laguntzak kalkulatuko dira ondoko hautapen irizpideetako baremazioa aplikatuz:

a) Nekazaritzan erabilitako nitratoek ura kutsatzeko arriskua duten eremuen barnean dagoen ustiategiko azaleraren portzentajea:

> %50: 3 puntu.

≥ 20 eta < 50: 2 puntu.

> 0 eta < 20: 1 puntu.

b) Natura 2000 sarearen barnean dagoen ustiategiko azalaren portzentajea:

> %50: 3 puntu.

≥ 20 eta < 50: 2 puntu.

> 0 eta < 20: 1 puntu.

c) Ustiategiak hektareako dituen nekazaritzako lan unitateen (NLU) batura, kontuan hartuta V. eranskinean ageri den sail landatu bakoitzeko esleitutako NLUa, eta honako puntuazioen arabera:

≥ 2 NLU/ha: 7 puntu.

≥ 0,2 eta < 2: 6 puntu.

≥ 0,05 eta < 0,2: 5 puntu.

≥ 0,02 eta < 0,05: 4 puntu.

≥ 0,01 eta < 0,02: 3 puntu.

≥ 0,005 eta < 0,001: 2 puntu.

> 0: 1 puntu.

Eskaera batek laguntza jaso ahal izateko gutxieneko puntuazioa 3 puntukoa da; guztira 13 puntu dira.

Espedienteen puntuazioan berdinketarik gertatzen bada, kontuan hartuko da c) irizpidea “Oso landaketa intentsiboak dituzten azalerak”. Berdinketak jarraituz gero, lehentasuna neurriaren babeseko azalera handienei emanen zaie.

75. artikulua. Ez-betetzeen mailaketak.

1. 69. eta 70. artikuluetan zehaztatutako betebeharren eta konpromisoen ez-betetzeak honako taula honetan ezartzen dira, eta haiei dagokien zehapena, III. Eranskinean.

2. Behar baino azalera gehiago deklaratzeari buruzko neurriak ez badira betetzen, murrizketak eta bazterketak aplikatuko dira, Batzordearen martxoaren 11ko 640/2014 (EB) Erregelamendu Delegatuaren 19. artikuluan ezarritakoarekin bat. Erregelamendu horren bidez, Kontseiluaren 1306/2013 (EE) Erregelamenduaren aplikazio-xedapenak ezarri ziren. Beste konpromiso edo betebehar batzuk ez betetzeak, Batzordearen martxoaren 11ko 640/2014 (EB) Erregelamendu Delegatuaren 35. artikuluan ezarritakoarekin bat, ekarriko du IV. Eranskinean deskribatutako zehapenak aplikatzea.

IV. TITULUA

Xedapen komunak

76. artikulua. Ebaluazioa, jarraipena eta kontrola.

Eskaeren ebaluazioa, kontrol administratiboa eta ordainketaren ebazpen proposamena Nekazaritza Zerbitzuak eginen ditu; tokian berean egindako kontrola, berriz, Ikuskapenen Atalak eginen du; Nekazaritzako estepa habitatak hobetzea, eta Estepako habitata hobetzea basoiloarentzat eta basoilo handiarentzat laguntzen kasuan, Biodibertsitatea Zaintzeko Zerbitzuak eginen du; horretarako, behar diren egiaztapenak eginen dira, eta eskatzaileak eskatzen zaion informazio osagarri osoa eman beharko du.

77. artikulua. Deialdiaren antolamendua, instrukzioa eta ebazpena.

1. Eskabidea jaso ondoren, egiaztatuko da interesdunek onuraduna eta hautatua izateko baldintzak betetzen dituztela, baita Diru-laguntzei buruzko azaroaren 9ko 11/2005 Foru Legearen 9. artikuluan ezarritako betebeharrak ere. Eskaerak zerbait falta badu, hogeita hamar eguneko epean zuzendu dezala eskatuko zaio interesdunari, eta adieraziko zaio, hori egin ezean, eskaerari uko egiten diola ondorioztatuko dela eta artxibatzeko ebazpena, jakinaraziko zaiona, eginen dela.

2. Zerbitzu kudeatzaileak eskaera ebaluatu ondoren, ebazpen proposamena eginen da.

3. Foru agindu honen babespeko laguntzak Landa Garapeneko, Nekazaritzako eta Abeltzaintzako zuzendari nagusiak emanen (eta ordainduko) edo ukatuko ditu modu arrazoituan; Nekazaritzako estepa habitatak hobetzea, eta Estepako habitata hobetzea basoiloarentzat eta basoilo handiarentzat laguntzen kasuan, Ingurumenaren eta Uraren zuzendari nagusiak eginen du.

4. Prozeduraren gainean ebazteko epea hiru hilabetekoa izanen da, eskaerak aurkezteko epea bukatzen denetik hasita. Epea espresuki ebazpenik gabe bukatzen bada, ezetsitzat joko da eskaera.

78. artikulua. Laguntzak ukatzea eta zehapenak.

1. Onargarritasun baldintzak bete ezik, laguntzak ukatuko dira.

2. Ezarritako kontrol administratiboen edo landa kontrolen ondorioz egiaztatzen bada alde bat dagoela eskatutako hektarea edo AzLUen eta egiaztatutakoen artean, dagozkion zehapenak jarriko dira, Batzordearen 640/2014 (EB) Erregelamendu Delegatuaren 19., 31. eta 35. artikuluekin bat.

3. Ustiategiko azalerak erabat ez deklaratzeak Batzordearen 640/2014 (EB) Erregelamendu Delegatuaren 16. artikuluan aurreikusitako zehapena ekarriko du.

4. Laguntzaren xedeko azalerek baldintzazkotasun arauak ezartzen dituen abenduaren 19ko 1078/2014 Errege Dekretuan ezarritako bete beharko dute. Arau horiek bete ezik, dagozkion zehapenak jarriko dira.

5. Aurrekoez gain, Diru-laguntzei buruzko azaroaren 9ko 11/2005 Foru Legean xedatutako arau-hausteen eta zehapenen araubidea aplikatuko da.

79. artikulua. Oker jasotako ordainketen itzulketa.

1. Ordainketa bat oker jasotzen denean, horren zenbatekoa eta interesak, jasotzaileari itzulketa egiteko jakinarazten zaionetik itzulketa edo kenkaria egin arteko denborari dagozkionak, pagatu beharko ditu jasotzaileak, Batzordearen 2014ko uztailaren 17ko 809/2014 (EB) Exekuzio Erregelamenduaren 7. artikuluan xedatuarekin bat.

80. artikulua. Laguntzen publizitatea.

Onuradunen zerrenda argitaratuko da 1306/2013 (EB) Erregelamenduaren IV. kapituluan ezartzen den bezala. Onuradunei jakinaraziko zaie haien datuak aipatu erregelamenduaren 111. artikuluaren arabera argitaratuko direla, eta auditoretzak eta azterketak egiteko erakundeek har ditzaketela datuak, Batasunaren finantza interesak babestuak gelditzeko. Datuak pertsonalak direnean, onuradunei haien eskubideen berri emanen zaie, datuak babesteko arauekin eta eskubide horiek baliatzeko prozedura aplikagarriekin bat.

Xedapen indargabetzaile bakarra.–Arauak indargabetzea.

Indarrik gabe utzi da Landa Garapeneko, Ingurumeneko eta Toki Administrazioko kontseilariak apirilaren 1ean emandako 104/2016 Foru Agindua. Foru agindu horrek araubide orokorra ezartzen du Nekazaritza, ingurumen eta klimaren laguntzak (10. neurria) eta nekazaritza ekologikoarena (11. neurria) eman, kudeatu eta kontrolatzeko Nafarroako Foru Komunitatean; laguntza horiek Nafarroako Foru Komunitateko Landa Garapenerako 2014-2020 Programaren barnean daude.

Azken xedapen bakarra.–Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra. Arau hau 2017ko otsailaren 1etik aurrera aurkeztu diren laguntzen eskaerei aplikatuko zaie.

Iruñean, 2018ko otsailaren 27an.–Landa Garapeneko, Ingurumeneko eta Toki Administrazioko kontseilaria, Isabel Elizalde Arretxea.

ERANSKINAK

I. ERANSKINA

Erregionalizazio indizeak

V. ERANSKINA

Labore mota bakoitzari esleitutako UNLA kopurua, 220/2007 Foru Aginduaren arabera

Iragarkiaren kodea: F1803054