Iragarkia

100. ALDIZKARIA - 2011ko maiatzaren 25a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

1934/2010 EBAZPENA, abenduaren 23koa, Nafarroako Unibertsitate Publikoko errektoreak emana. Haren bidez onesten da Nafarroako Unibertsitate Publikoaren zerbitzuko teknikaria O.L. izateko 3 lanpostu (Ekonomia Adarra) lehiaketa-oposizioaren bidez betetzeko eta kontu-ikuskaria izateko lanpostu 1 barne igoerako sistema murriztuaren bidez betetzeko deialdia.

Nafarroako Administrazio Publikoen zerbitzuko Langileen Estatutuaren Testu Bategina onesten duen 1993ko abuztuaren 30eko 251/1993 Legegintzako Foru Dekretuan eta hura garatu eta betearazteko emandako sarbide Erregelamenduan ezarritakoari jarraikiz, bidezkoa da hautaprobetarako dei egitea teknikaria O.L. izateko 3 lanpostu betetzeko (Ekonomia Adarra), horietatik bi Aurrekontu eta Plangintza Ekonomikoaren Atalari atxikiak eta bat Kontu-ikuskaritza, Antolamendu eta Kalitate Unitateari atxikia, eta kontu-ikuskaria izateko lanpostu 1 betetzeko, Kontu-ikuskaritza, Antolamendu eta Kalitate Unitateari atxikia.

Ikusirik Giza Baliabideen Zerbitzuko buruaren txostena, zeinean baieztatzen baita ezen, 2010eko abuztuaren 20ko Nafarroako Aldizkari Ofizialean argitaratutako Nafarroako Unibertsitate Publikoaren 2010eko urteko Lan Eskaintza Publikoaren arabera, badagoela A mailako aipatu lanpostu hutsak betetzeko aurreikuspena. Aurrekontuan kontusaila daukate eta Plantilla organikoan zenbaki hauek dituzte: 62 eta 511 (teknikaria O.L. izateko lanpostuak (Ekonomia Adarra), Aurrekontu eta Plangintza Ekonomikoaren Atalari atxikiak), 529 zenbakia (teknikaria O.L. izateko lanpostua (Ekonomia Adarra), Aurrekontu eta Plangintza Ekonomikoaren Atalari atxikia), eta 508 zenbakia (kontu-ikuskaria izateko lanpostua, Kontu-ikuskaritza, Antolamendu eta Kalitate Unitateari atxikia).

Kudeatzaileak proposatuta.

Lege indardunek eman dizkidaten eskumenak erabiliz.

EBATZI DUT:

Lehenengoa.-Hautaprobetarako dei egitea Nafarroako Unibertsitate Publikoaren zerbitzuko teknikaria O.L. izateko 3 lanpostu (Ekonomia Adarra) lehiaketa-oposizioaren bidez eta kontu-ikuskaria izateko lanpostu 1 barne igoera murriztuaren bidez betetzeko.

Bigarrena.-Deialdia arautuko duten oinarriak, ebazpen honekin batera doazenak, onestea.

Hirugarrena.-Gastua 2011ko Gastuen Aurrekontuan horretarako eratuko den kontusailari egotziko zaio.

Laugarrena.-Ebazpen hau eta deialdiaren oinarriak Nafarroako Aldizkari Ofizialean argitaratzeko agintzea.

Bosgarrena.-Ebazpen honek administrazio bidea agortzen du, Unibertsitateei buruzko Lege Organikoaren 6.4 artikuluan xedatzen denari jarraikiz, eta zilegi da, aukeran, berraztertzeko errekurtsoa errektorearen aurrean, edo, bestela, zuzenean administrazioarekiko auzi-errekurtsoa Nafarroako Administrazioarekiko Auzietako Epaitegietan, hilabeteko epean lehenengo kasuan, eta bi hilabeteko epean bigarrenean, biak ere ebazpena jakinarazi eta biharamunetik kontatzen hasita.

Iruñean, 2010eko abenduaren 23an.-Errektorea, Julio Lafuente López.

NAFARROAKO UNIBERTSITATE PUBLIKOAREN
ZERBITZUKO TEKNIKARIA O.L. IZATEKO 3 LANPOSTU
(EKONOMIA ADARRA) LEHIAKETA-OPOSIZIOAREN BIDEZ BETETZEKO ETA KONTU-IKUSKARIA IZATEKO LANPOSTU 1 BARNE IGOERA MURRIZTUAREN BIDEZ BETETZEKO DEIALDIA

Oinarriak

1.-Arau orokorrak.

1.1. Deialdi honen xedea da oposizio-lehiaketaren bidez betetzea teknikaria O.L. izateko 3 lanpostu (Ekonomia Adarra) eta barne igoera murriztuaren bidez kontu-ikuskaria izateko lanpostu 1.

1.2. Teknikaria O.L. izateko lanpostuak (Ekonomia Adarra) honako hauek dira:

-Bi lanpostu, 62 eta 511 zenbakidunak, Ekonomia Gaietarako Zerbitzuaren Aurrekontuen eta Ekonomia Plangintzaren Atalean, Iruñean aritzeko.

-Lanpostu bat, 529 zenbakiduna, Kontu-ikuskaritza, Antolamendu eta Kalitate Unitatean, Iruñean aritzeko.

Deialdiko kontu-ikuskaria izateko lanpostuak 508 zenbakia du plantilla organikoan, Kontu-ikuskaritza, Antolamendu eta Kalitate Unitateari atxikia dago eta Iruñean aritzeko da.

1.3. Deialdi hau ondoko hauetan xedatutakoak arautuko du: Nafarroako Administrazio Publikoen zerbitzuko Langileen Estatutuaren Testu Bategina onesten duen 1993ko abuztuaren 30eko 251/1993 Legegintzako Foru Dekretua, hura garatu eta betearazteko emandako Sarbide erregelamendua, Nafarroako Unibertsitate Publikoko Gobernuak 1996ko apirilaren 2an hartutako erabakia, Nafarroako Unibertsitate Publikoan lanpostuak bete eta haietara sartzeko prozeduretan aplikatu beharreko merezimenduen baremoak arautzen dituena, deialdi honen oinarriak, eta aplikatu beharreko gainerako arauak.

1.4. Nafarroako Administrazio Publikoen zerbitzuko Langileen Estatutuaren Testu Bateginaren 15.3 artikuluari jarraikiz, teknikaria O.L. izateko lanpostu hutsak (Ekonomia Adarra) honela banatuko dira:

-Lehena, txanda irekiari esleituko zaio.

-Bigarrena, igoera txandari.

-Hirugarrena, igoera txandari.

1.4. Igoera txandan bete gabe gelditzen diren teknikaria O.L. izateko lanpostu hutsak (Ekonomia Adarra), izangaiek hautaprobak gainditzeko eskatzen den gutxieneko puntuaziora ez iristeagatik, txanda irekikoei gehituko zaizkie.

Igoera txandan izangaientzat erreserbaturiko lanpostu hutsen kopurua txikiagoa bada gainditzen dutenena baino, lanposturik gabe gainditu dutenek txanda irekiko lanpostua eskuratzeko aukera izango dute txanda horretakoekin lehian, beren azken puntuazioaren arabera.

1.5. Deialdi honen xede diren lanpostuetan huts gehiago gelditzen badira, huts horiei dagozkien lanpostuak 1.1 atalean eskainitakoei gehituko zaizkie, Unibertsitate honetako errektoreak emandako ebazpenaren bidez. Hori oposizio-aldiaren azken ariketa egin baino lehen gertatuko da, eta baimena emango da lanpostu horiek deialdi honen helburu diren hautaprobetan betetzeko.

1.6. Halaber, deialdi honen xedea da aldi baterako kontrataziorako izangaien baterako zerrenda bat sortzea, sartzeko hautapen prozeduran lanpostua eskuratzen ez duten izangaiekin, deialdi honen 10. oinarrian xedatutakoari jarraikiz.

2.-Izangaiek bete beharrekoak.

Hautaprobetara onartuak izateko, izangaiek eskaerak aurkezteko epea bukatzen den egunean, ondoko baldintzak bete beharko dituzte:

2.1. Teknikaria O.L. izateko lanpostuetarako (Ekonomia Adarra) izangai guztientzako baldintzak:

a) Espainiako herritarra izatea edo Europar Batasuneko estaturen batekoa izatea edo, Europar Batasunak izenpetu eta Espainiar Estatuak berretsitako nazioarteko itunen arabera, langileen joan-etorri askea aplikatzekoa zaion estaturen batekoa.

Halaber, Espainiako, Europar Batasuneko estatuetako eta aipatu nazioarteko itunak aplikatzen diren eremuko estatuetako herritartasuna dutenen ezkontideek parte hartzeko aukera dute, betiere zuzenbidearen arabera bananduta ez badaude; herritartasuna duenaren ondorengoek eta haren ezkontidearen ondorengoek ere parte hartzeko aukera dute, zuzenbidearen araberako banaketarik ez dagoenean, baldin eta 21 urtetik beherakoak badira edo, adin horretatik gorakoak izanda ere, gurasoen kontura bizi badira.

b) Hamasei urte beteta edukitzea, eta nahitaezko erretirorako gehieneko adina beteta ez edukitzea.

c) Ekonomia Zientzietan edo EAZLn lizentziadun titulua edo haren baliokidea edukitzea, edo, bestela, eskabideak aurkezteko epea bukatzen den egunean, titulua erdiesteko baldintzak beteta izatea.

Atzerrian erdietsitako titulazioak badira, aipatutako egunean izangaiak eskuan izan beharko du homologazioaren egiaztagiria.

d) Dagozkion eginkizunak betetzeko gaitasun fisikoak eta psikikoak edukitzea.

e) Eginkizun publikoetarako desgaitua edo gabetua ez egotea, eta administrazio publiko baten zerbitzutik bereizia ez izatea.

Espainiakoa ez beste nazionalitatea dutenek ere, diziplina-zehapen edo zigor kondenaren bidez beren estatuetako funtzio publikoetan aritzeko gabetuta ez egotearen zinpeko aitorpena aurkeztu beharko dute.

2.2. Teknikaria O.L. izateko lanpostuetarako (Ekonomia Adarra) igoera txandako izangai guztientzako baldintzak:

Igoera txandako izangaiek, aurreko atalean adierazitako baldintzez gain, honako hauek dituzte:

a) Nafarroako Unibertsitate Publikoko karrerako funtzionario izatea eta, zein lanpostutik egin nahi den igoera, lanpostu horretan borondatezko eszedentzian edo nahitaezko eszedentzian ez egotea.

b) Deialdiko lanpostu hutsen mailakoa edo beheragokoa izatea.

c) 2.1. c) oinarrian eskatutako titulua edukitzea, edo eskaerak aurkezteko epea bukatzen den egunean edukitzeko baldintzak beteta izatea, eta administrazio publikoetan bost urteko antzinatasun aitortua egiaztatzea.

2.3. Barne igoera murriztuaren bidez kontu-ikuskaria izateko lanposturako izangaientzako baldintzak:

a) Nafarroako Unibertsitate Publikoaren zerbitzuko karrerako funtzionario izatea.

b) Deialdiko lanpostu hutsak baino maila txikiagoa duen lanpostu baterako izendatua izatea.

c) 2.1. c) oinarrian eskatutako titulua edukitzea, edo eskaerak aurkezteko epea bukatzen den egunean edukitzeko baldintzak beteta izatea, eta administrazio publikoetan bost urteko antzinatasun aitortua egiaztatzea.

d) Zein lanpostutik egin nahi den sustapena, lanpostu horretan borondatezko eszedentzian edo nahitaezko eszedentzian ez egotea.

e) Eginkizun publikoetarako desgaitua edo gabetua ez egotea, eta administrazio publiko baten zerbitzutik bereizia ez izatea.

2.4. Izendapenerako proposatutako izangaiek aurreko baldintzak egiaztatu beharko dituzte deialdiaren 8,6 oinarrian ezarritako epean eta forman, salbu eta eskabidea aurkeztearekin batera egiaztatu behar direnak.

2.5. Aurreko arauetan ezarritako baldintzak eskaerak aurkezteko epea bukatzen denean bete beharko dira, eta karrerako funtzionarioaren jabetza hartu arte beteko dira, beharrezkoa bada.

3.-Eskaerak.

3.1. Eskaerak deialdi honen eranskinean (I. eranskina) dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eskabide eredua Interneten bidez lortzen da www.unavarra.es webgunean, "Concursos y contratos/Personal/Instancias" izeneko helbidean.

3.2. Eskabideak Nafarroako Unibertsitate Publikoko Erregistro Orokorrean aurkeztu behar dira (Soforak eraikina; Arrosadiko campusa; 31006 Iruñea), edo, bestela, Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan ezarritako prozeduraren bidez. Eskabideak Nafarroako Unibertsitate Publikoko errektoreari zuzendu behar zaizkio. Eskaerak aurkezteko epea hogeita hamar egun natural igaro ondoren bukatuko da, deialdi honen iragarkia "Estatuko Aldizkari Ofizialean" argitaratzen den egunaren biharamunetik kontatzen hasita. Deialdia Nafarroako Aldizkari Ofizialean argitaratuko da.

Eskaera posta bulego batean aurkeztuz gero, gutun-azal irekian egingo da, posta zerbitzuko langileak, ziurtatu aurretik, data eta zigilua jar ditzan, eta ondoren egiaztatu eta bidali Nafarroako Unibertsitate Publikoaren Erregistrora (Arrosadiko campusa, z/g, 31006 Iruñea).

3.3. Behar bezala betetako eskabideari, ondoko agiri hauek erantsiko zaizkio:

a) Izangaiaren Nortasun Agiri Nazionalaren edo izangaiaren nazionalitatea eta nortasuna ziurtatzeko agiriaren fotokopia.

b) Deialdian eskatutako tituluaren kopia edo eskuratzeko eskubideak ordaindu izanaren ordezkagiria.

c) Azterketa egiteko eskubideak ordaindu direla erakusten duen bankuaren agiria, 4. oinarrian ezarritakoari jarraikiz.

3.4. Euskararen jakite mailari buruzko borondatezko proba, lehiaketa-aldikoa, egin nahi duten izangaiek eskabidean adieraziko dute, "Euskarazko proba borondatezkoa" laukian marka eginez. Hautaprobetara onartua izateko eskaeran jasota ez badago, ez da onartuko eskaerarik borondatezko proba hori egiteko. Hautaproba hori 7.3 oinarrian ezarritakoari jarraikiz egingo da.

3.5. 4.1 a) oinarrian (tasen salbuespena) xedatutakoa aplikatzeko, eta, halaber, denborak eta baliabideak egokitzeko eskaera egiteko, %33ko edo gehiagoko ezgaitasuna duten izangaiek, hura egiaztatu beharko dute, ondoko agiri hauetako baten jatorrizkoaren edo kopia konpultsatuaren bidez:

-Imsersok edo autonomia erkidegoan eskumena duen organoak emandako ziurtagiria.

-Gizarte Segurantzako Institutu Nazionalaren ebazpena, ezgaitasun iraunkor osoa, ezgaintasun iraunkor absolutua edo baliaezintasun handia izateagatik prestazio bat jasotzeko eskubidea onartzen diona izangaiari.

Ezgaitasuna duten izangaiek ariketak egiteko denboren eta baliabideen egokitzapenak eskatzeko, hala adierazi beharko dute eskabidean, eta aparteko orri batean (I. Bis eranskina) adierazi beharko dute nolako ezgaitasuna duten eta zein egokitzapen eskatzen duten.

3.6. Teknikaria O.L. izateko lanpostuetarako (Ekonomia Adarra) izangaiek igoera txandaren sistema aukeratu nahi badute, eskabidearen "Sarrera mota" izeneko atalean adierazi beharko dute hori. Atal horretan marka jartzen ez badute, eta gainerako eskakizunak betetzen badituzte, ofizioz sartuko dira sarrera libreko sistema orokorrean.

3.7. Eskabideak aurkezteko epea ezin izango da luzatu.

4.-Tasak.

4.1. Azterketa-eskubideak 40 eurokoak izango dira. Azterketa-eskubideen tasa ordaintzen ez duen izangaia hautaprobetatik baztertua izango da.

Tasari dagokion kopurua eskudirutan ordainduko da, edo bestela, transferentzia egingo da, Nafarroako Kutxaren 2054.0000.44.1100110959 kontu korrontera. Ordainagirian izangaia nor den eta "Hautaprobak - Teknikaria O.L. (Ekonomia Adarra)" edo "Hautaprobak (barne-igoera murriztua) - Kontu-ikuskaria" adierazpena agertu beharko dira.

Tasak ordaintzetik salbuetsita egongo dira:

a) %33ko edo gehiagoko ezgaitasun aitortua duten pertsonak.

b) Hautaproben deialdia egin aurretik hilabetez edo luzaroago lan-eskatzaile gisa inskribaturik egon direnak. Salbuetsita egoteko baldintza izango da inskripzio epean eskainitako inolako lan egokiri uko egin ez izana, eta lanbiderako igoera, prestakuntza edo eraberritze ekintzetan parte hartzeko uko egin ez izana, justifikaturiko arrazoirik ez badago, eta, halaber, hilabetean lanbide arteko gutxieneko lansaritik goragoko errentarik ez izatea.

Lan-eskatzaile gisa inskribaturik daudenek dagokien Enplegu Bulegoak emandako ziurtagiaren bidez egiaztatuko dute hori. Bertan adieraziko dute interesduna noiz inskribatu zen lan-eskatzaile gisa, eta espresuki aipatuko dute inskribatuta egon diren bitartean ez diotela ezein lan egokiri uko egin, eta lanbide sustapen, prestakuntza edo eraberritze ekintzetan parte hartzeari ez diotela uko egin, justifikaturiko arrazoirik izan gabe.

Lanbide arloko gutxieneko lansaria, hilabeteko zenbaketan, gainditzen ez duela egiaztatzeko, interesdunak aitorpen nagusia egin beharko du.

4.2. Azterketako eskubideak ordaintzeak ez du inola ere ordeztuko hautapen-prozesuan parte hartzeko eskaera, garaiz eta forman aurkeztea.

5.-Izangaien onarpena eta erreklamazioak.

5.1. Eskaerak aurkezteko epea bukatu eta gero, Nafarroako Unibertsitate Publikoko errektoreak ebazpena emango du, eta "Nafarroako Aldizkari Ofizialean" argitaratuko da. Horretan onartuen eta baztertuen behin-behineko zerrenda onetsitzat emango da; bigarren kasuan baztertzearen zergatia azalduko da.

5.2. Baztertutako izangaiek, behin-behineko zerrenda Nafarroako Aldizkari Ofizialean argitaratu eta hurrengo hamar egun balioduneko epean, zilegi dute erreklamazioa eta, akatsen bat badago, akatsak zuzentzea.

5.3. Erreklamazioetarako epea iragan eta haiek ebatzi ondoren, Nafarroako Unibertsitate Publikoko errektoreak ebazpena emango du eta "Nafarroako Aldizkari Ofizialean" argitaratuko da. Horretan onartuen eta baztertuen behin betiko zerrenda onetsitzat emango da.

5.4. Ez da bidezkoa izango azterketa-eskubideak itzultzea, baztertzeko arrazoia izangaiei egotzi ahal zaien arrazoia denean.

6.-Epaimahaia.

6.1. Epaimahaia honako kide hauek osatuko dute:

Batzordeburua: errektorea edo berak eskuordetua.

Epaimahaikideak:

Nafarroako Unibertsitate Publikoko kudeatzailea edo berak eskuordetua.

Ordezkari bat, Nafarroako Foru Erkidegoan dagoen beste administrazio publiko batekoa edo Estatuko beste unibertsitate publiko batekoa.

Nafarroako Unibertsitate Publikoko administrazio eta zerbitzuetako langile bat, Administrazio eta Zerbitzuetako Langileen Batzordeak izendatua.

Idazkaria: Nafarroako Unibertsitate Publikoko administrazio eta zerbitzuetako langile bat, Giza Baliabideen Zerbitzuko zuzendariak izendatua epaimahaian parte hartzeko interesa erakutsi dutenen artetik.

Hautaprobetako epaimahaiko kide titular eta ordezkoen behin betiko izendapena onartuen eta baztertuen behin-behineko zerrenda onesten duen ebazpen berean egingo da, eta Nafarroako Aldizkari Ofizialean argitaratuko da.

Epaimahaia hautaprobak hasi baino lehen eratu beharko da.

6.2. Epaimahai kalifikatzailearen eraketak eta jardunak balio izan dezaten, gutxienez kide guztien gehiengo osoa beharko da.

Epaimahaiaren eraketak eta jardunak balio izateko, mahaiburuak eta mahaikide idazkariak edo haien ordezkoek egon behar dute bertan.

6.3. Epaimahaiko kideek ez dute parte hartuko, eta organo dei-egileari jakinaraziko diote, Herri Administrazioen Araubide Juridikoari eta Administrazio Prozedura Erkideari buruzko 1992ko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi dute epaimahaikideak errefusatzea, aipatu egoera horietako bat gertatzen denean.

6.4. Deialdi honetako arauak interpretatzeak eta aplikatzeak sorrarazitako zalantzak Epaimahaiaren gehiengoak ebatziko ditu, eta hautaprobak aurrera egin ahala deialdian aurreikusten ez diren eta sor litezkeen auziak ebazteko neurriak hartuko.

6.5. Epaimahai kalifikatzaileak aukera izango du aholkulari adituak sartzeko hautaproba guztietarako zein batzuetarako. Aholkulari horiek beren espezialitate teknikoen esparrura mugatuko dute lankidetza.

6.6. Epaimahai kalifikatzaileak neurri egokiak hartuko ditu beharrezkoa den kasuetan, ezgaitasunak dituzten izangaiek gainontzeko izangaien baldintza berberak eduki ditzaten probak egiteko orduan, 3,6 oinarrian ezarritakoari jarraikiz.

6.7. Epaimahaiburuak behar dituen neurriak hartuko ditu oposizio aldian idatziz egingo diren eta Epaimahaiaren aurrean irakurri behar ez diren ariketen erantzunak zuzentzeko, betiere, izangaiak nor diren jakin gabe.

6.8. Jakinarazpenak emateko eta bestelako gorabeheretarako, Epaimahaiaren egoitza Nafarroako Unibertsitate Publikoko Administrazio eta Kudeaketa eraikina izango da.

6.9. Hautaketa prozesua bukatu ondoren, Epaimahaiak zerrenda bat egingo du; bertan hautaprobaren bat gainditu eta lanposturik atera ez duten izangaiak zerrendatuko dira, proba bakoitzean erdietsitako puntuazioekin. Giza Baliabideen Zerbitzuari bidaliko dio, kontratatzeko zerrendak prestatzeko, Kontratazioa eta izendapen-zerrendak prestatzeko eta kudeatzeko prozedura arautzen duen erabakian ezarritakoa aplikatzeko.

7.-Oposizio-lehiaketaren garapena.

7.1. Oposizio aldiko lehen ariketa 2012ko martxotik aurrera egingo da. Onartutako eta baztertutako izangaien behin-behineko zerrenda onesten duen ebazpen berean, hautaprobak hasteko lekua, eguna eta ordua ezarriko dira. Ondoren, Epaimahaiak gainerako probak egiteko iragarkiak jakinaraziko ditu, arauz egin behar den moduan.

7.2. Hautatzeko prozedura bera erabiliko da bi lanpostu motetarako, eta aldi hauek edukiko ditu:

7.2.1. Oposizio-aldia:

Lehenengo ariketa: Praktikoa, Epaimahaiak proposatzen dituen galderak eta kasuak garatuz eta ebatziz erantzun beharrekoa, gai zerrendako I. parteariari buruz. Epaimahai kalifikatzaileak zehaztuko du, ariketa hasten denean, zenbat denbora duten lehiatzaileek hura egiteko.

Bigarren ariketa: Teorikoa, 60 galderako galdetegi bat, gehienez ere 90 minututan, idatziz erantzun beharrekoa, gai zerrendari buruz. Galdera bakoitzarentzat aukerako erantzun batzuk izango dira, eta horietatik bakar bat izango da zuzena. Akatsengatik zehapenak izango dira.

Hirugarren ariketa: Teorikoa, bi parte izango ditu:

-Lehenengoan idatziz azalduko dira, gehienez ere 4 orduko epean, zozketaz aukeratuko bi gai: Gai zerrendako II. parteko bi ataletatik bana.

-Bigarrenean idatziz azalduko dira, gehienez ere 4 orduko epean, zozketaz aukeratuko bi gai: Gai zerrendako III. parteko bi ataletatik bana.

Laugarren ariketa: Ingeleseko hizkuntza proba. Borondatezkoa eta ez baztertzailea, aurreko hiru ariketak gainditu dituzten izangaiek egingo dute bakarrik.

Oposizio aldiko ariketen balioespena 100 puntukoa izango da gehienez ere, eta puntuak honela banatuko dira:

Lehenengo ariketa: 30 puntu gehienez ere.

Bigarren ariketa: 20 puntu gehienez ere. Galdera guztiek puntuazio bera izango dute.

Hirugarren ariketa: 40 puntu gehienez ere. Gai bakoitzaren puntuazioa, gehienez ere, 10 puntukoa izango da.

Laugarren ariketa: 10 puntu gehienez ere.

Oposizio-aldiko ariketak, laugarren ariketari dagozkionak izan ezik, baztertzaileak izango dira. Ariketa bakoitzari dagokion gehieneko puntuazioaren erdia lortzen ez duten izangaiak baztertu egingo dira. Halaber, baztertu egingo da lehen eta hirugarren ariketetako gai edo kasu praktikoren batean 0 puntu lortzen dituen izangaia.

Lehen, bigarren eta hirugarren ariketak pliken sistemaren bidez egingo dira.

Ariketa bakoitzaren kalifikazioa bukatu ondoren, Epaimahaiak Nafarroako Unibertsitate Publikoaren webgunean www.unavarra.es "Concursos y contratos/Personal/Personal de Administración y Servicios" izenburupeko helbidean, gainditu duten izangaien zerrenda argitaratuko du, haien nortasun agiri zenbakiarekin eta lortutako kalifikazioekin batera, eta, halaber, oposizio aldiko hurrengo ariketa non eta zer egun eta ordutan izango den adieraziko du, gutxienez 48 ordu lehenago.

Ariketa bakoitzerako deialdia bakarra izango da, hau da, deitutako izangaiek epaimahai kalifikatzaileak probak egiten hasteko adierazitako lekuan eta egunean egon beharko dute, epaimahaiak berak esandako orduan, eta deialdi horretara azaltzen ez direnak oposiziotik baztertuak izango dira, probak ekitaldi batzuetan banatu arren. Izangaiek Nortasun Agiri Nazionala, pasaportea, gidatzeko baimena edo Epaimahaiak ontzat eman dezakeen bestelako agiri bat erakutsi beharko dute nortasuna egiaztatzeko. Oposiziotik kanpo geldituko dira beren nortasuna azaldu bezala egiaztatzen ez dutenak.

Ezgaitasun aitortua izanik, eskabidean eskaera egin duten izangaientzat, ariketak egiteko behar diren denbora eta baliabideetan izan litezkeen egokitzapenak ezarriko dira hautaprobak garatzeko.

Hautaproba prozesuan edonoiz, Epaimahaiak jakiten badu izangaietakoren batek ez dituela deialdi honetan eskatzen diren betebeharreko guztiak, eta interesdunari entzun ondoren, Unibertsitateko errektoreari proposatu beharko dio izangai hori baztertzeko, eta esan beharko dio, halaber, zein zehazgabetasun edo faltsutasun jarri dituen izangaiak hautaprobetara onartua izateko eskaeran, horrek bere ondorioak sor ditzan.

7.2.2. Lehiaketa aldia:

Epaimahaiak balioetsi egingo ditu oposizio-aldia gainditu duten izangaiek azaldutako merezimenduak, jarraian zehazten den baremoaren arabera.

Merezimendu guztiak agiriaren bidez alegatu eta frogatu beharko dira, oposizio aldiko emaitzak argitaratu eta hamar egun naturalen epean, dela jatorrizko agiriaren bidez, dela administratiboki egiaztaturiko kopien bidez, deialdi honetan ezartzen den baremoaren arabera. Emandako zerbitzuen agiria, zerbitzuak zein erakundetan eman diren, erakunde horretako langileen bulegoak luzatu beharko du.

Lehiaketa aldiko atal bakoitzari dagozkion merezimenduak batu, eta erdietsitako puntuazioa inoiz ere ez da izango 30 puntu baino gehiagokoa. Horretan erdietsitako puntuazioa oposizio aldia bukatutakoan jakinaraziko da, eta bi aldietako puntuazioen batura izango den behin betiko puntuazioa argitara eman aurretik.

Merezimenduak balioesteko kontuan hartuko dira, bakarrik, deialdiaren iragarkia Nafarroako Aldizkari Ofizialean argitaratzeko epera arte lortu direnak, eta baliogabeak izango dira egun hori eta gero lortutakoak. Epaimahaiak inolaz ere ez du onartuko izangaiek alegatu ez duten edo agirien bidez frogatu ez duten merezimendurik, eta ezin izango du atal bakoitzean adierazitako gehieneko puntuazioa baino handiagorik eman. Epaimahai kalifikatzaileak edozein unetan azalpenak eta datu osagarriak eskatzeko aukera du, izangaiek alegatu eta frogaturiko merezimenduen gainean.

A) Lan esperientzia: jarraian zehazten diren merezimenduak balioetsiko dira; atal honetako gehieneko puntuazioa 16,5 puntu da, eta balioetsi daitekeen gehieneko denbora 4 urte:

a) Eskaerak aurkezteko epea bukatzean unibertsitate publikoetan zerbitzu ematen egindako hilabete bakoitzeko, deialdiko lanpostuari dagozkion titulazioko taldean eta eginkizun antzekoetan 0,35 puntu.

b) Eskaerak aurkezteko epea bukatzean unibertsitate publikoa ez den edozein administrazio, organismo edo erakunde publikotan zerbitzu ematen egindako hilabete bakoitzeko, deialdiko lanpostuari dagozkion titulazioko taldean eta eginkizun antzekoetan 0,15 puntu.

B) Euskarari eta beste hainbat hizkuntzari buruzko jakite-maila: honako merezimendu hauek balioetsiko dira, eta atal honetako gehieneko puntuazioa 9 puntukoa izango da.

-Euskara:

a) Hizkuntzen Europako Erreferentzia Marko Bateratuaren C1 mailako gaitasunaren baliokidea den Euskararen ezagutza maila egiaztatzen duen titulua edo ziurtagiria edukitzeagatik, 6,75 puntu.

b) Hizkuntzen Europako Erreferentzia Marko Bateratuaren B1 mailako gaitasunaren baliokidea den Euskararen ezagutza maila egiaztatzen duen titulua edo ziurtagiria edukitzeagatik, 4,5 puntu; bateraezina da aurreko atalean aipatzen den merezimenduaren balioespenarekin.

c) Nahi izanez gero, a) eta b) atalean aipatzen diren titulazioak egiaztatzeko moduan ez dauden izangaiek, daukaten euskara maila balioesteko proba egiteko aukera dute. Proba hori borondatezkoa eta merezimenduzkoa izango da, eta 0tik 2,7ra bitarteko puntuazioa izango du. Proba hau 7.3 oinarrian ezarritakoari jarraituz egingo da.

-Beste hizkuntza batzuk:

a) Europar Batasuneko edozein hizkuntza ofiziali dagokion Hizkuntzen Europako Erreferentzia Marko Bateratuaren C1 mailako gaitasunaren baliokidea den titulua edo ziurtagiria edukitzeagatik, 4,95 puntu hizkuntza bakoitzeko.

b) Europar Batasuneko edozein hizkuntza ofizialean Hizkuntzen Europako Erreferentzia Marko Bateratuaren B1 mailako gaitasunaren baliokidea den titulua edo ziurtagiria edukitzeagatik, 3,15 puntu hizkuntza bakoitzeko.

Hizkuntza titulazioen baliokidetzak balioesteko, Epaimahaiak kontuan hartuko du ondoko honetan ezarritakoa: 210/2010 Ebazpena, 2010eko irailaren 13koa, Nafarroako Administrazio Publikoaren Institutuko zuzendari kudeatzailearena, euskararen eta Europar Batasuneko hizkuntzen jakite-maila egiaztatzen duten tituluen eta ziurtagirien arteko baliokidetzak ezartzen dituena, Hizkuntzen Erreferentziako Europako Esparru Bateratuak ezartzen duenaren arabera.

C) Beste merezimendu batzuk: gehienez ere 4,5 puntu emango zaie.

-Titulazioak edukitzeagatik, betiere, izangaiek ez badituzte alegatu 2.1.c) oinarrian eskatutakoa betetzeko, gehienez ere, 2 puntu emango zaie, honela:

b) Doktore, lizentziadun, ingeniari edo arkitekto titulu bat edo batzuk edukitzeagatik, 1,5 puntu.

b) Diplomadun, ingeniari tekniko edo arkitekto tekniko titulu bat edo batzuk, edo baliokideak edukitzeagatik, gehienez ere puntu 1.

-Erakunde eta instituzio publikoek antolatutako ikastaroak egin dituztenean, izangaiei 0,1 puntu emango zaizkie 10 prestakuntza ordu-tarte bakoitzeko, eta balioetsiko zaien gehieneko puntuazioa puntu batekoa izango da egindako ikastaro bakoitzeko; atal honetako gehieneko puntuazioa ez da 2,5 puntu baino gehiagokoa izango. Ez dira balioetsiko irakaskuntza-tituluak, graduondokoak edo/eta masterrak erdiesteko diren ikastaro, irakasgai, mintegi edo kidekorik.

7.3. Euskararen jakite-maila neurtzeko proba saio bakar batean egingo da, oposizio aldia bukatu eta gero.

Eguna eta ordua ezartzen duen deialdia, Administrazio eta Kudeaketa eraikineko (Soforak eraikina) iragarki oholean argitaratuko da, eta Interneten bidez ere bai, Nafarroako Unibertsitate Publikoaren webgunean www.unavarra.es "Concursos y contratos/Personal/Personal de Administración y Servicios" izenburupeko helbidean.

Proba osoa euskaraz egingo da, eta atal hauek izango ditu:

a) Idatzizko gaitasuna, gramatika edukiak eta adierazpen idatzia balioetsiko dituena.

b) Ahozko gaitasuna, ulermena eta mintzamena neurtuko dituena.

8.-Gaindituen zerrenda, izendapen proposamena eta agiriak aurkeztea.

8.1. Oposizio aldia bukatu ondoren, Epaimahaiak Administrazio eta Kudeaketa eraikineko (Soforak eraikina) iragarki oholean eta Interneten bidez Nafarroako Unibertsitate Publikoko www.unavarra.es webgunean "Concursos y contratos/Personal/Personal de Administración y Servicios" izenburupeko helbidean, aditzera emango ditu bi zerrenda, bat teknikaria O.L. izateko lanpostuetarako (Ekonomia Adarra) eta beste bat kontu-ikuskaria izateko lanposturako, eta oposizio aldiko hiru probak gainditu dituzten izangaiek lortutako emaitzen batura, eskuratutako puntuazioaren ordenari jarraikiz.

8.2. Lehiaketa aldia bukatu eta gero, epaimahaiak aditzera emango du, aurreko oinarrian esandako tokian, merezimenduen balioespenaren emaitza, eta izangai bakoitzak lortu duen puntuazioa adieraziko du.

8.3. Epaimahaiak gainditu dutenen bi zerrenda argitaratuko ditu, bat teknikaria O.L. izateko lanpostuetarako (Ekonomia Adarra) eta beste bat kontu-ikuskaria izateko lanposturako, lortu duten behin betiko postuaren arabera antolatuta, oposizio aldian eta lehiaketa aldian lortu dituzten puntuazioak batu eta gero.

Hautaproben azken emaitzan gertatzen diren berdinketak ebazteko, oposizio aldian puntuaziorik handiena lortu duenaren alde egingo da; berdinketak segitzen badu, probak egin diren hurrenkeraren alderantzizko hurrenkeran ateratako puntuazioen arabera ebatziko dira eta, hala ere berdinketak irauten badu, izangai zaharrenaren alde ebatziko da.

8.4. Teknikaria O.L. izateko lanpostu hutsen (Ekonomia Adarra) hautaketa izendapen proposamena egin aurretik egingo da, izangaiek hautaprobetan ateratako notaren hurrenkerari jarraikiz.

Hautaprobak igoera txandan gainditzen dituzten teknikaria O.L. izateko lanpostuetarako (Ekonomia Adarra) izangaiek deialdiko lanpostuak betetzeko lehentasuna izango dute txanda irekiko izangaien aldean.

Lanpostuaren hautaketa egiteko, izangaia adierazten den tokian, egunean eta orduan azalduko da. Adierazitako epearen barnean hautaketa egiten ez duten izangaiek, behar bezala justifikaturiko ezinbesteko kasuak alde batera utzita, oposizio-lehiaketako lanpostua betetzeko eskubide guztiak galduko dituzte. Kasu horretan, 8.8 oinarrian ezarritakoari jarraituko zaio.

8.5. Hautaketa ekitaldia bukatu ondoren, Epaimahaiak izendapen proposamena igorriko dio errektoreari, hautaketa prozesua puntuazio handienarekin gainditu duten eta deitutako lanpostu kopuruaren barnean sartzen diren izangaiak izenda ditzan, bai teknikaria O.L. izateko lanpostuari (Ekonomia Adarra) dagozkionak, bai kontu-ikuskaria izateko lanpostuari dagozkionak, betiere parte hartzeko oinarri hauetan ezarritako betekizunak betetzen badituzte. Proposamen hori Nafarroako Aldizkari Ofizialean argitaratuko da.

8.6. Izendapen proposamena Nafarroako Aldizkari Ofizialean argitaratu eta hogeita hamar egun naturaleko epean, proposameneko izangaiek Unibertsitateko Erregistro Orokorrean ondoko agiri hauek aurkeztu beharko dituzte:

a) 2.1 c) oinarrian eskatutako tituluaren jatorrizkoa edo fotokopia kautotua, edo hura eskuratzeko eskubideak ordaindu izanaren ordezkagiriarena.

b) Aitorpena, zeinetan adierazten baita, diziplina espediente baten ondorioz, lehiatzailea ez dagoela bereizita inongo administrazio edo kargu publikotik, eta ez dagoela zigor baten bidez desgaitua eginkizun publikoak betetzeko. Espainiakoa ez beste nazionalitatea duten izangaiek ere, diziplina-zehapen edo zigor kondenaren bidez beren estatuetako funtzio publikoetan aritzeko gabetuta ez egotearen aitorpena aurkeztu beharko dute.

c) Ziurtagiri medikoa, eskaintzen den lanpostuaren eginkizunetan aritzeko gaitasun psikikoa eta fisikoa edukitzea egiaztatzen duena. Horretarako, azterketak Nafarroako Unibertsitate Publikoaren Aurrezaintza Zerbitzuaren mediku zerbitzuek egingo dituzte.

Proposatutako izangaiak ezgaitasuna alegatu badu, ekarri behar du, halaber, organo eskudunen ziurtagiria, deialdiaren xede den lanpostuaren eginkizunak eta lanak egiteko moduan dagoela dioena.

8.7. Behar bezala justifikatutako ezinbesteko kasuak alde batera utzita, ezarri den epean agiriak aurkezten ez dituen, edo agiriak aztertzearen ondorioz, deialdian eskatzen diren betebeharretakoren bat betetzen ez duen izangaia ezin izendatuko dute funtzionario, eta bere jardun guztiak deuseztu egingo dira, hasierako eskaeran faltsukeriatan ibiltzeagatik eduki lezakeen erantzukizuna galarazi gabe.

8.8. Aurreko atalean aurreikusten den kasuan, eta oinarri hau aipatzen dutenetan, Nafarroako Unibertsitate Publikoko errektoreak hutsunea beteko du 8.3 atalean aipatzen den gainditu dutenen zerrendetan ondoren dagoenarekin, deialdiaren oinarrietan ezartzen diren baldintzak betetzen baditu, eta horrekin aurreko ataletan aipatu den moduan jokatuko da.

9.-Funtzionarioak izendatzea.

9.1. Nafarroako Unibertsitate Publikoko errektoreak, karrerako funtzionario izendatuko ditu aurreko oinarrietan ezarritakoa betetzen duten izangaiak, Nafarroako Aldizkari Ofizialean argitaratuko den ebazpenaren bidez. Izendapena jakinarazten denetik hilabete bateko epean hartu beharko dute jabetza.

9.2. Aipatutako epean eta ezinbesteko kasuetan izan ezik, izangaiak lanpostuaren jabe egiten ez badira, Nafarroako Unibertsitate Publikoaren funtzionario izateko eskubide guztiak galduko dituzte. Kasu horretan, 8.8 oinarrian ezarritakoari jarraituko zaio.

9.3. Izangai bat funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean ari delako, kasuko lanpostu hutsa ere deialdiaren 8.8 atalean agintzen den moduan beteko da.

10.-Izendapenetarako edo kontratazioetarako zerrenda prestatzea.

10.1. Kontratazio eta izendapen-zerrendak prestatzeko eta kudeatzeko prozedura arautzen duen erabakian ezarritakoari jarraikiz, hautaketa prozesua bukatu ondoren, Unibertsitateak zerrenda bat prestatuko du, izendapenetarako edo kontratazioetarako, hautaketa prozesuko proba bat, gutxienez ere, gainditu duten izangaiek osatua.

10.2. Zerrenda osatzen dutenak ordenatzeko ondoko irizpide hauek erabiliko dira:

a) lehenbizi, hautaketa prozesuan oposizio aldi osoa gainditu baina lanpostua lortu ez duten izangaiak. Zerrendan edukiko duten puntuazioa izango da oposizio aldiaren eta lehiaketa aldiaren batura.

b) bigarrenik, hautaketa prozesu osoa ez, baina proba bat, gutxienez ere, gainditu duten izangaiak. Zerrendan edukiko duten puntuazioa izango da gainditu dituzten probena eta lanbide-esperientziarena, 10.4 oinarrian ezarritakoaren arabera, batzeak ematen duena.

10.3. b) atalean aipatzen diren izangaiek, lanbide-esperientzia egiaztatzen duten agiriak aurkeztu beharko dituzte, dagokien eskabidearekin batera, oposizio aldiko bigarren probaren emaitzak argitaratzen direnetik, eta, dagokion hautaketa prozesuaren behin betiko emaitzak argitaratu ondoren, hamar egun iragan arte.

Lanbide esperientzia egiaztatzeko aurkeztu beharko da egiaztagiriaren jatorrizkoa edo kopia kautotua, zer administrazio publikotan eman ziren zerbitzuak, horretako langileen unitateak egina. Agirian dagokion titulazio taldea agertu beharko da.

10.4. Lanbide esperientzia honela balioetsiko da:

-0,43 puntu deialdian aipatutako lanpostu berean zerbitzu ematen egindako hiruhileko bakoitzeko. Gehienez ere 8 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren denbora tarteak.

-0,43 puntu azken hamar urtean unibertsitate publiko batean deialdian aipatutako lanpostu berean zerbitzu ematen egindako hiruhileko bakoitzeko. Gehienez ere, 7 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren denbora tarteak.

-0,17 puntu azken hamar urtean Nafarroako Unibertsitate Publikoan deialdian aipatutako titulazio bera edo goragokoa duten lanpostuetan zerbitzu ematen egindako hiruhileko bakoitzeko, edo azken hamar urtean Nafarroako Unibertsitate Publikoan deialdian aipatutako titulazio bera edo goragokoa duten lanpostuetan zerbitzu ematen egindako hiruhileko bakoitzeko. Gehienez ere, 7 urte hartuko dira kontuan. Ez dira, ordea, kontuan hartuko hiruhilekoa baino txikiagoak diren denbora tarteak.

11.-Datu pertsonalen erabilera.

11.1. Zilegi da interesdunek emandako datuak fitxategi automatizatu batean gordetzea. Fitxategi hori langileen datu-basea edo lan-poltsaren datu-basea da, Norberaren Datuak Babesteko 1999ko abenduaren 13ko 15/1999 Lege Organikoari jarraikiz.

11.2. Fitxategia Kudeatzailetzaren ardurapean geldituko da (Arrosadiko campusa, Soforak eraikina).

11.3. Lortutako informazioa langileen kudeaketarako prozesatuko da, ez bestetarako.

11.4. Datu pertsonalak tratatzeko babes maila ezarrita dago Norberaren Datuak Babesteko 1999ko abenduaren 13ko 15/1999 Lege Organikoa garatzeko arautegia onesten duen 2007ko abenduaren 21eko 1720/2007 Errege Dekretuan.

11.5. Interesdunek zilegi dute sarbidea izateko, zuzentzeko, deusezteko eta aurka egiteko eskubidea, Datuak Babesteko Lege Organikoak ezartzen duena betetzeko. Eskabideak Nafarroako Unibertsitate Publikoko kudeatzaileari zuzenduko zaizkio (Arrosadiko campusa, z.g., Soforak eraikina, 31006, Iruñea).

12.-Errekurtsoak.

Deialdi honen aurka, haren oinarrien aurka eta errektoreak harturiko izendapen erabakiaren aurka zilegi da ondoko errekurtsoetako bat, arau indardunekin bat etorriz:

a) Aukerako berraztertze-errekurtsoa errektorearen aurrean, hilabete bateko epean, ekitaldia edo erabakia jakinarazten edo iragartzen den egunaren biharamunetik kontatzen hasita.

b) Administrazioarekiko auzi-errekurtsoa Nafarroako Justizia Auzitegi Gorenaren Administrazioarekiko Auzietako Salan, bi hilabeteko epean, erabakia jakinarazten den egunaren biharamunetik kontatzen hasita.

Epaimahai kalifikatzaileak ematen dituen egintza eta ebazpenen kontra zilegi da gora jotzeko errekurtsoa, errektoreari zuzendua, errekurtsoaren xede den egintza argitaratu edo jakinarazi, eta biharamunetik aurrera, hilabeteko epean. Gorako errekurtso ebazlearen aurka zilegi da administrazioarekiko auzi-errekurtsoa, Nafarroako Justizia Auzitegi Nagusiaren aurrean.

I. ERANSKINA

I BIS ERANSKINA

II. ERANSKINA

Gai Zerrenda

I. Partea.

Kontabilitatea.

Finantza kontabilitatea eta sozietateen kontabilitatea.

Ustiapeneko kontabilitate analitikoa.

Finantzen egoera-orrien analisia.

Kontabilitate publikoa.

Finantza matematika.

Kapitalizazio sinplea eta konposatua.

Errentak, maileguak eta jesapenak.

Eragiketak balore higigarriekin.

Estatistika.

Posizio, sakabanatze, kontzentrazio eta forma neurriak.

Erregresioa eta korrelazioa.

Zenbaki indizeak.

Denbora serieak.

II. Partea.

Sektore publikoaren ekonomia.

1. gaia.-Ekonomia Publikoaren teoria. Estatuaren eginkizun fiskalak. Ogasun Publikoaren teoria positiboa eta araudia.

2. gaia.-Sektore publikoaren esku-hartzea jarduera ekonomikoan. Merkatuaren akatsak. Ondasun publikoak. Kanpoko ondorioak.

3. gaia.-Sektore publikoaren erabakitzeko mekanismoak. Bozketa-arauak. Demokrazia ordezkatzailea.

4. gaia.-Sektore publikoaren funtzionamendu-ereduak. Produkzio publikoa eta burokrazia. Sektore publikoaren akatsak.

5. gaia.-Sektore publikoaren hazkundeari buruzko teoriak. Estatuaren tamainari buruzko eztabaida. Gastu publikoaren bilakaera Europar Batasunean eta Espainian.

6. gaia.-Aurrekontua: Kontzeptua eta edukia. Aurrekontu-printzipio klasikoak eta beren krisia. Aurrekontu-teknikak: Aurrekontu administratibotik aurrekontua egiteko teknika berrietara.

7. gaia.-Aurrekontu-orekaren eta hazkunde eta egonkortasun ekonomikoaren arteko harremana. Diziplina fiskala Europar Batasunean: Egonkortasun eta hazkunderako egiunea. Espainiako legeria aurrekontu-orekari buruz.

8. gaia.-Gastu publikoaren eragina eta ondorioak banaketan. Gastu publikoaren eraginkortasuna eta efizientzia: Kontzeptuak eta analisi teknikak.

9. gaia.-Diru-sarrera publikoak. Sailkatzeko irizpideak. Prezioak eta enpresa publikoa. Prezio publikoak eta tasak: Kontribuzio bereziak. Zerga, kontzeptua eta bereizketak. Zerga motak. Zergen osagaiak.

10. gaia.-Zerga printzipioak. Mozkinaren eta ordaintzeko gaitasunaren printzipioak. Zerga-eragina. Zerga-alderdiak. Zerga-figura nagusiak. Zerga-egitura baldintzatzen duten ezaugarriak. Bilakaera eta nazioarteko ereduak.

11. gaia.-Defizit publikoa eta Ogasun berezia. Finantzabidearen arloko definizioak eta tresnak. Zor Publikoa-kontzeptua, motak eta ondorio ekonomikoak, zorraren zama. Aktibo publikoen pribatizazioak. Inflazioa zerga modura. Inflazio-hedapenaren ondorio ekonomikoak eta kanporatze ondorioa.

12. gaia.-Espainiako Administrazio Publikoen arteko finantza harremanak. Araubide komuniko autonomia erkidegoen finantzaketa sistema: Finantza printzipioak eta baliabideak. Hitzarmen Ekonomikoaren sistema. Estatuko karga orokorretarako eman beharreko ekarpen ekonomikoak.

13. gaia.-Nafarroaren eta Estatuaren arteko harmonizazio fiskala erregulatzen duten arauak. Eskumenen mugaketa eta administrazio eskuduna pertsona fisikoen gaineko errenta, sozietateen gaineko zerga, balio erantsiaren gaineko zerga eta fabrikazioko zerga bereziak ordainarazteko.

14. gaia.-Nafarroako Ogasun Publikoa. Foru Erkidegoko sektore publikoaren aplikazio eta antolaketa eremua. Nafarroako Ogasun Publikoaren eskubide publiko eta pribatuak. Nafarroako Ogasun Publikoaren betebeharrak.

15. gaia.-Nafarroako Aurrekontu Orokorrak. Edukia eta prestakuntza. Hasierako kredituak eta beren aldaketak. Nafarroako Aurrekontuak betetzea eta kitatzea. Nafarroako Ogasun Publikoak eta finantza-eragiketak: zorpetzea eta abalak.

16. gaia.-Gizarte segurantza. Arau orokorrak eta aplikazio-eremua. Gizarte Segurantzako erakunde kudeatzaileak, zerbitzu komunak, erakunde laguntzaileak eta organismo autonomoak.

17. gaia.-Gizarte Segurantzako Araubide Orokorra. Aplikazio-eremua. Afiliazio eta kotizazioa. Ekintza babeslea: Kontingentzia babesgarriak eta prestazioen araubidea.

18. gaia.-Funtzionarioen Gizarte Segurantza. Administrazio-mutualismoa: Funtzionario Publikoen Mutualitate Zibila (Muface): Ekintza babeslea. Kontzeptua eta prestazio-motak. Eskubide pasiboak.

19. gaia.-Kontu-ikuskaritzaren lege esparrua. Kontu-ikuskaritzako lanbidearen arauketa Europar Batasunean. Kontu-ikuskaritzako arauak Espainian. Ikuskaritza-txostena eta kontu-ikuskariak egindako beste txosten berezi batzuk.

20. gaia.-Kontrola eta ikuskaritza Sektore Publikoan. Ikuskaritza printzipioak eta arauak. Ikuskaritza txostena. Kanpoko kontrola eta erakunde-organoak.

Arau orokorrak.

1. gaia.-Espainiako 1978ko Konstituzioa: Estatuko botereak. Koroa. Gorte Nagusiak. Gobernua eta Administrazioa. Botere judiziala Konstituzioan.

2. gaia.-Zuzenbide Publikoaren iturriak: Legeak eta motak. Dekretu-legeak. Legegintzako Foru Dekretua. Nazioarteko Itunak.

3. gaia.-Administrazio Zuzenbidearen iturriak: Erregelamendua eta erregelamenduak egiteko ahalmena. Erregelamendu motak. Erregelamenduak egiteko ahalmenaren mugak eta bere kontrola.

4. gaia.-Administrazio egintza: Kontzeptua eta ezaugarriak. Administrazio-egintzen sailkapenak. Administrazio-egintzaren elementuak: Subjektua, objektua, xedea eta forma. Administrazio egintzen zioak. Administrazioaren isiltasuna.

5. gaia.-Administrazio-egintzaren eraginkortasuna. Jakinarazpena eta argitalpena. Administrazio egintzen exekuzioa. Administrazio-egintzen balioduntasuna eta baliogabetasuna. Administrazio-egintzen ofiziozko berrikuspena.

6. gaia.-Administrazio prozedura: bere izaera eta helburuak. Administrazio prozeduraren arauketa Espainiako Zuzenbidean. Herri Administrazioen Araubide Juridikoari eta Administrazio Prozedura Erkideari buruzko Legea: Administrazio-prozeduraren printzipio orokorrak eta administrazio-prozedura erkidea. Abstentzioa eta errekusazioa.

7. gaia.-Interesdunak administrazio-prozeduran. Herritarren eskubideak. Epemugak eta epeak. Administrazio-prozeduraren hasiera, antolaketa eta instrukzioa. Froga. Interesdunen parte-hartzea. Bukaera: ebazpena. Ohiko bukaera. Bukatzeko beste modu batzuk: atzera egitea, uko egitea, iraungitzea eta preskripzioa.

8. gaia.-Nafarroako Parlamentua edo Gorteak: Aurrekariak. Osaera, antolaketa eta eginkizunak. Parlamentuak Gobernuaren gainean duen kontrol-eginkizuna.

9. gaia.-Nafarroako Gobernua. Aurrekariak. Hobekuntzan eta Gobernua arautzen duen foru legean aurreikusitako jarduteko printzipio oinarrizkoak. Antolaketa, eginkizunak eta eskumenak. Gobernuko lehendakaria. Gobernuko kideak. Nafarroako Gobernuaren ahalmen arauemailea. Erantzukizun politikoa eta parlamentuaren kontrola. Bateraezintasunen araubidea.

10. gaia.-Nafarroako Foru Erkidegoko Administrazioaren araubide juridikoa. Jarduteko printzipio nagusiak. Antolaketa eta funtzionamendua. Administrazio prozeduraren alderdi oinarrizkoak. Foru Erkidegoko Administrazioaren ondare-erantzukizuna. Organismo publikoak eta menpeko beste erakunde batzuk.

11. gaia.-Foru Erkidegoaren beste erakunde batzuk: Nafarroako Kontseilua. Foru Erkidegoko arartekoaren erakundea. Comptos Ganbera. Erakunde hauen arauketa, antolaketa eta eginkizunak. Nafarroako Administrazio Auzitegia: Aurrekariak, antolaketa eta eskumenak.

12. gaia.-Nafarroako administrazio publikoen zerbitzuko langileak. motak. Funtzionario publikoak. Nafarroako administrazio publikoen zerbitzuko langileen estatutuaren alderdi oinarrizkoak. Funtzionario izaera lortzea eta galtzea. Funtzionarioen bateraezintasunak. Eskubideak eta betebeharrak. Oinarrizko lansariak eta lansari osagarriak. Funtzionario publikoen diziplina-araubidea. Garapenerako erregelamenduak. Bateraezintasunen araubidea.

13. gaia.-Sektore Publikoko Kontratuei buruzko Foru Legea. Aurrekariak. Informatzen duten printzipio oinarrizkoak. Legearen egitura eta edukia. Aurreikusten dituen berrikuntzak. Aplikatu beharreko arau orokorrak. Aplikazio-eremua. Kontratuak esleitzeko prozedurak eta irizpideak.

14. gaia.-Sektore Publikoko Kontratuei buruzko Foru Legea. Administrazio Publikoen kontratu motak. Kontratatzeko espediente motak. Kontratatzeko espedientearen eduki oinarrizkoa. Kontratuak gauzatzearen alderdi oinarrizkoak. Kontratuak aldatzea, berrikustea eta iraungitzea. Erreklamazioak eta beste kontrol neurri batzuk kontratazio publikoaren arloan.

15. gaia.-Nafarroako Ondareari buruzko Foru Legea:

Aurrekariak. Ondasun eta eskubideen sailkapena, eskumenak eta ondarea kudeatzeko irizpideak. Ondasunak eskuratzea, besterentzea eta lagatzea. Nafarroako Ondarea administratu, babestu eta defendatzea. Jabari publikoko ondasunen araubide juridikoa. Jabari pribatuko ondasunen araubide juridikoa. Enpresen ondare publikoa.

16. gaia.-Diru-laguntzei buruzko Foru Legea. Aurrekariak eta legearen aplikazio-esparrua. Diru-laguntza publikoen kudeaketaren arloko printzipio orokorrak. Diru-laguntzak eman eta kudeatzeko prozedurak. Diru-laguntzen jarraipena eta kontrola. Diru-laguntzen itzulketa. Diru-laguntza publikoak arautzen dituen estatuko legearen aipamen laburra.

17. gaia.-Norberaren datuen babesa Europan eta Espainian. Norberaren Datuak Babesteko Lege Organikoa.

III. Partea.

Ekonomia Orokorra.

1. gaia.-Agregatu ekonomiko nazionalak. Ondasunen eta zerbitzuen gaineko eragiketak. Banatzeko eragiketak. Erakundeen sektoreen kontuak. Kontu finantzarioa.

2. gaia.-Input-Output eredua. Input-Output taula. Input-Output analisiaren aplikazioak: biderkatzaileak, kateak edo loturak, kanpoko menpekotasuna.

3. gaia.-Inbertsioaren faktore erabakigarriak eta jokabidea. Inbertsioa izakinetan: faktore erabakigarriak. Inbertsioa ekipoan: kapitalaren erabilpen kostua. Doikuntza hobezinaren prozesua. Inbertsioa eraikuntzan: epe labur eta luzeko faktoreak.

4. gaia.-Kontsumo pribatuaren faktore erabakigarriak eta jokabidea. Kontsumo erantsiaren ezaugarriak. Bizi zikloaren teoria. Errenta iraunkorraren teoria. Espektatiben egitekoa.

5. gaia.-Ordainketen balantza eta trukatze tasa. Nazioarteko ekonomiaren eta ordainketen balantzaren arteko harremanak. Ordainketen balantzaren egitura. Kanbioen araubideak: Kanbio finko eta malguen sistema. Europako moneta sistema. Ordainketen balantza eta diru-kopurua.

6. gaia.-Politika ekonomikoaren helburuak. Enplegu betea. Oinarrizko kontzeptuak eta lan motak. Adierazleak eta neurtzeko sistemak. Lan merkatuari buruzko planteamendu teorikoak. Enplegurako politika.

7. gaia.-Prezioen egonkortasuna: kontzeptuak, kuantifikazioa eta aurreikuspena. Inflazioaren ondorioak. Inflazioaren arrazoiak. Inflazioaren aurkako neurriak.

8. gaia.-Hazkunde ekonomikoa. Kontzeptua eta adierazleak. Hazkunde ekonomikoaren faktore erabakigarriak. Hazkunde ekonomikoaren aldeko neurriak.

9. gaia.-Errenta banatzea. Oinarrizko kontzeptuak. Desberdintasunaren arrazoiak. Errenta banatzearen neurketa. Errenta banatzeko politika.

10. gaia.-Bizi kalitatea eta ingurumena zaintzea. Bizi kalitatea neurtzea. Ingurumen baliabideak. Ingurumenerako politikak.

11. gaia.-Diru politika. Funtsak eta oinarrizko edukiak. Diru politikaren oinarrizko baliabideak. Diru politikaren eraginkortasuna.

12. gaia.-Politika fiskala: Funtsak eta oinarrizko edukiak. Gastu publikoa, zergak eta haien eragina jardueraren mailan. Egonkortzaile automatikoak. Gastu publikoa, zergak eta aurrekontuetako saldoa. Zorra eta haren ondorioak defizit publikoan. Politika fiskalaren eraginkortasuna.

13. gaia.-Eskaintza kudeatzeko politika ekonomikoak. Eskaintza politiken ezaugarri doktrinalak. Egitura doitzeko politikak. Eskaintza ekonomia eta alderdi mikroekonomikoak.

14. gaia.-Europar Batasuna: erakundeak eta ordena juridikoa. Europar Batasunaren itunak. Europar Batasunaren aurrekontua. Dirusarreren eta gastuen ezaugarri orokorrak.

15. gaia.-Europar Batasuneko Eskualdeetarako Politika. Helburuak. Estatuetako eskualdeetarako politiken koordinazioa. Finantza baliabideak. Nafarroa, Europar Batasuneko Eskualdeetarako Politika.

16. gaia.-Batasuneko politikak: gizarte eta enplegu politika. Ikerketa eta garapen teknologikoa. Ingurumena. Hezkuntzaren, kulturaren eta lanbide prestakuntzaren arloko politikak.

17. gaia.-Egiturazko eraldaketak Nafarroako ekonomian 1960tik aurrera. Nafarroako ekonomia Espainian. Nafarroako ekonomia Europako eskualdeen artean. Nafarroako populazioaren egitura. Populazioaren mugimendu naturala. Migrazio mugimenduak.

18. gaia.-Nafarroan diharduten administrazioen gastu publikoa. Nafarroako aurrekontu orokorrak: gastuen azterketa ekonomiko eta funtzionala, dirusarreren eta saldoen azterketa. Nafarroako Foru Komunitateko Administrazioko enpresa sektore publikoa.

Unibertsitateko zuzenbidea.

1. gaia.-Unibertsitatea zerbitzu publiko gisa. Unibertsitateei buruzko lege Organikoa. Unibertsitatearen autonomia eta bere mugak. Unibertsitate Publikoen finantza eta ekonomia araubidea.

2. gaia.-Nafarroako Unibertsitate Publikoaren Estatutuak. Edukia eta egitura. Erreforma. Unibertsitateko arartekoa.

3. gaia.-Nafarroako Unibertsitate Publikoa. Ikasketen antolaketa: Sailak, Fakultateak eta Eskolak. Fundazioak eta beste pertsona juridiko batzuk sortzea Unibertsitatean. Unibertsitate arloko lankidetza hitzarmenak.

4. gaia.-Nafarroako Unibertsitate Publikoa. Gobernu eta administrazio organo kolegiatuak: Gizarte Kontseilua. Unibertsitateko Klaustroa. Gobernu Kontseilua. Fakultate eta Eskola batzordeak. Saileko kontseiluak.

5. gaia.-Nafarroako Unibertsitate Publikoa. Kide bakarreko gobernu eta administrazio organoak: Errektorea. Errektoreordeak. Idazkari nagusiak. Kudeatzailea. Dekanoak, dekanordeak eta Fakultateko idazkariak. Unibertsitate Eskoletako zuzendariak, zuzendariordeak eta idazkariak. Saileko zuzendariak eta idazkariak.

6. gaia.-Nafarroako Unibertsitate Publikoa. Irakasle eta ikertzaileak: motak eta araubide juridikoa. Plantilla antolatzeko jarraibideak. Unibertsitateko irakasleen ebaluazioa. Lanpostuen zerrenda. Unibertsitateko irakaskidegoak: araubide juridikoa (sarbidea, administrazio egoerak, arduraldia eta lansariak). Irakaskidegoetako lanpostuak betetzea.

7. gaia.-Nafarroako Unibertsitate Publikoa. Lan kontratupeko irakasle eta ikertzaileak: Araubide juridikoa. Kontratatzeko modalitateak. Lan kontratupeko irakasle eta ikertzaileen I. Hitzarmen Kolektiboa.

8. gaia.-Nafarroako Unibertsitate Publikoa. Administrazio eta Zerbitzuetako Langileak. Araubide juridikoa eta motak. Lanpostuen zerrenda. Ordezkaritza-organoak, lan baldintzak zehaztea eta langileen parte-hartzea.

9. gaia.-Ikasleak. Ikasleen sarbidea eta iraunaldia Unibertsitatean. Eskubideak eta betebeharrak. Zehapen-araubidea. Eskola asegurua.

10. gaia.-Ikasteko laguntzak Espainiako unibertsitate sisteman: beka laguntza eta maileguetarako modalitateak. Araudi erregulatzailea. Nafarroako Foru Erkidegoko bekak eta laguntzak.

11. gaia.-Europako Unibertsitate-eremua. Graduko ikasketa ofizialen arauketa. Nazioarteko harremanetarako programaren arauketa. Graduondoko ikasketa ofizialen arauketa.

12. gaia.-Irakaskuntza-eskaintza Nafarroako Unibertsitate Publikoan. Titulu berekiak eta etengabeko prestakuntza unibertsitateetan. Nafarroako Unibertsitate Publikoko ikasketen antolaketa arautzen duen arautegia.

13. gaia.-Ikerketa unibertsitatean. Proiektuak, kontratuak eta ikerketa programak, nazionalak eta nazioartekoak. Ikerketa taldeak eta Ikerketa Batzordea. Unibertsitatei buruzko Lege Organikoaren 83. artikulua: Aurrekariak eta bere arauketa Nafarroako Unibertsitate Publikoan. NUPeko ikerketa zenbakitan.

14. gaia.-Unibertsitateen finantzabidea. Unibertsitateetako irakasleak: Prezio publikoen bilketa, kudeaketa eta likidazioa. Nafarroako Unibertsitate Publikoaren Aurrekontua: prestakuntza, edukia eta onespena. Gastuen analisi ekonomikoa eta programen arabera, diru-sarreren analisia.

15. gaia.-Ikasleen mugikortasuna. Mugikortasun eta trukerako programak. Mugikortasuna estatuan, mugikortasuna Europan, mugikortasunerako gainerako programak. EBko prestakuntzako praktikak. Unibertsitate sareak.

16. gaia.-Laneratzea eta unibertsitate hezkuntza: Unibertsitatearen eginkizuna. Tituludunen lan jarduera. Unibertsitateko ekimenak lanbidean txertatzeko.

17. gaia.-Kalitate sistemen ezarpena administrazio publikoetan. Kalitatearen kudeaketa unibertsitateetan. Ebaluazioa eta akreditazioa Unibertsitateetan. Kalitatea Ebaluatu eta Egiaztatzeko Agentzia Nazionala.

18. gaia.-La contribución socioeconómica de la Universidad Pública de Navarra. Epe laburreko eragina eskariaren bidez. Epe luzeko eragina eskariaren bidez.

Oharra: Deialdi hau argitaratzen den egunean indarra duten arauei jarraituz eskatuko dira gai guztiak.

Iragarkiaren kodea: F1108786