39. ALDIZKARIA - 2010eko martxoaren 29a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

DEIALDIA, Nafarroako Administrazio Publikoaren Institutuko zuzendari kudeatzaileak maiatzaren 12an emandako 51/2010 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko unibertsitateko erdi mailako tituludun (Laneko Arriskuen Prebentzioa) izateko hiru lanpostu oposizio bidez betetzekoa.

Maiatzaren 12an emandako 51/2010 Ebazpenaren bidez, Nafarroako Administrazio Publikoaren Institutuko zuzendari kudeatzaileak Nafarroako Foru Komunitateko Administrazioaren eta haren erakunde autonomoen zerbitzuko unibertsitateko erdi mailako tituludun (Laneko Arriskuen Prebentzioa) izateko hiru lanpostu oposizio bidez betetzeko deialdia onetsi zuen.

Hautapen prozesua honako hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsia, aipatu estatutua garatu eta betearazteko Sarrera Erregelamendua, gainerako aplikazio arauak eta deialdi honen oinarriak.

oinarriak

1.-Deialdiaren xedea.

1.1. Unibertsitateko erdi mailako tituludunen (Laneko Arriskuen Prebentzioa) 3 lanpostu oposizio bidez betetzea du xede deialdi honek. Lanpostuak funtzionarioen araubidekoak eta B mailakoak dira, Iruñean aritzeko, eta txanda hauetan banatzen dira:

-Lanpostu bat txanda irekian.

-Bi lanpostu, igoera txandan.

1.2. Deialdiko lanpostu hutsak hauek dira:

-Lanpostu bat, Hezkuntza Departamentuko Ikuskapenaren eta Zerbitzuen Zuzendaritza Nagusian. Plantillako zenbakia: 38033.

-Bi lanpostu Lehendakaritza, Justizia eta Barne Departamentuko Funtzio Publikoaren Zuzendaritza Nagusian. Plantillako zenbakiak: 5814 eta 8285.

1.3. Igoera txandako lanpostuak hutsik geldituz gero, izangaiek ez dutelako lortu hautaprobak gainditzeko behar den gutxieneko puntuazioa, txanda irekikoei gehituko zaizkie.

Bestaldetik, igoera txandan, hutsik dauden lanpostuak baino izangai gehiagok gainditzen badute, txanda horretan lanpostuak eskuratzen ez dituztenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, deialdiaren 7.2 oinarrian agiriak aurkezteko ezarritako epea bukatzen denean, deialdiaren 2.1.2 oinarriko betebehar berariazkoak betetzen ez dituzten igoera txandako izangaiek aukera izanen dute txanda irekiko lanpostuak eskuratzeko, aurreko lerroaldean adierazitako modu berean.

1.4. Lanpostuek B mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan ezarritakoari jarraikiz.

1.5. Halaber, deialdi honen bidez sarrerako hautapen prozesuan lanposturik lortzen ez duten izangaiekin aldi baterako kontratatuak izateko izangaien zerrenda hauek osatu nahi dira, 10. oinarrian xedatutakoarekin bat:

a) Probak gainditu arren, lanposturik lortzen ez duten izangaien zerrenda.

b) Oposizioko bigarren ariketa gainditu arren ariketa guztiak gainditzen ez dituzten izangaien zerrenda, Administrazio Erroan aldi baterako kontratatuak izateko.

2.-Baldintzak.

2.1. Oposizio honetan onartuak izateko, izangaiek, eskabideak aurkezteko epea bukatzen den egunean eta agiriak aurkezteko epea bukatzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak.

a) Espainiarra izatea, edo Europar Batasuneko beste estatu batekoa edo, Europar Batasunak sinatu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, parte har dezakete espainiarren eta Europar Batasuneko beste estatuetako herritarren ezkontideek, edo aipatu nazioarteko itunen aplikazio eremuan sartutako estatuetako herritarren ezkontideek, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.

b) Hamasei urte beteta izatea eta erretiroa nahitaez hartzeko gehieneko adina gainditua ez izatea.

c) Unibertsitateko diplomadun titulua, ingeniari tekniko edo arkitekto teknikoarena edo horien baliokidea den beste titulu bat edukitzea, edo eskuratzeko baldintza guztiak betetzea eskaerak aurkezteko epea bukatzen den egunean, edo lizentzia edo ingeniaritza bateko edo arkitekturako lehenengo hiru ikasturteak osorik gaindituak izatea.

Atzerrian lortutako tituluak badira, homologazioaren frogagiria eduki beharko da.

d) Prebentzio Zerbitzuen Erregelamenduaren 37. artikuluak ezartzen dituen goragoko eginkizunetan aritzeko gai dela dioen ziurtagiria izatea; hain zuzen, prebentzioko hiru diziplinetan aritzeko: Laneko Segurtasuna, Industria Higienea eta Ergonomia eta Psikosoziologia Aplikatua, aipatu erregelamenduan eta horren ondotik emandako garapen arauetan ezarritakoari jarraikiz.

e) B motako ibilgailuen gidabaimena izatea.

f) Bete behar dituen eginkizunetan aritzeko adinako gaitasun fisikoa eta psikikoa izatea.

g) Eginkizun publikoetan aritzeko ezgaitua edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute ez dutela diziplina zehapenik edo zigor penalik beren estatuko funtzio publikoan sartzea eragozten dienik.

2.1.2. Igoera txandako izangaiek bete beharreko baldintzak.

Igoera txandako izangaiek, aurreko atalean adierazitako baldintzez gain, hauek ere bete beharko dituzte:

a) Nafarroako edozein administrazio publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta abiapuntuko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio publikoetan bost urteko antzinatasun aitortua izatea, Nafarroako polizia kidegoetako kideen kasuan izan ezik, horiek frogatu beharko baitute zortzi urtez benetan eman dituztela zerbitzuak kidego horietan.

Nafarroako Administrazio Publikoen Zerbitzuko Langileen Estatutuaren zortzigarren xedapen gehigarrian ezarri dena aplikatuz, igoera txandan parte hartzeko gainerako baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Deialdiaren 3.3 oinarriaren B) letran aipatzen den salbuespena salbuespen, izendatuak izateko proposatzen diren izangaiek deialdiaren 7.2 atalean ezarritako epean eta moduan frogatu beharko dituzte betebehar horiek.

3.-Eskabideak.

3.1. Deialdian parte hartzeko eskabideak Nafarroako Gobernuko Erregistro Orokorrean (Karlos III.aren etorbidea, 2; 31002 Iruña) edo Nafarroako Gobernuaren gainerako erregistro bulegoetako edozeinetan (zerrenda 2008ko 14. Nafarroako Aldizkari Ofizialean argitaratu zen, urtarrilaren 30ean) aurkeztuko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazi diren bideetakoren bat erabiliz, deialdia Nafarroako Aldizkari Ofizialean argitaratu eta biharamunetik hogeita hamar egun naturaleko epean.

Eskabidea posta bulego batean aurkeztuz gero, gutun-azal irekian eginen da, postako langileek data eta zigilua jar ditzaten, ziurtatu aurretik.

Eskabideak deialdi honen eranskineko ereduari lotu behar zaizkio eta, horietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuaren edozein erregistro bulegotan dago eskuragarri. Interneten bidez ere lortzen ahal da, www.navarra.es helbidean, bai argitaratzen den aldizkari ofizialetik abiatuta, bai atal honetatik abiatuta: "Zerbitzuak", "Enplegu Publikoa".

3.2. Eskabideari, behar bezala bete ondoren, agiri hauek erantsiko zaizkio:

A) Izangai guztiek aurkeztu beharreko agiriak.

Bat.-Nortasun agiri nazionalaren fotokopia, edo izangaiaren nortasuna frogatzen duen beste agiri baliokideren batena.

Bi.-Espedientea formalizatzeko eta azterketa eskubideetarako 40 euro ordaindu izanaren jatorrizko ziurtagiria. Azterketa eskubideen tasa ordaintzen ez bada, baztertu eginen da izangaia.

Sistema hauetako bat erabiliz ordaintzen ahalko da tasa hori:

-Behar den bezala betetako ordainketa gutunaren bidez (Nafarroako Foru Komunitateko banku entitateetan ordaintzeko). Interneten, deialdiaren iragarkian, agertzen da ordainketa gutunaren eredua, arestian aipatutako helbidean.

-Banestoko (Banco Español de Crédito) 0030 8124 87 0870002271 kontuan eskudirutan edo bankuko transferentzia bidez ordainduz; horrelakoetan, ordainagirian datu hauek jarri beharko dira nahitaez:

-Izangaiaren izen-deiturak.

-NAN/IFZ.

-Ordainketa zein kontutan egiten den, haren zenbakia.

-Kontzeptua: oposizioak.

-Deialdiaren xede den lanpostua.

Honako hauek ez dute tasarik ordaindu beharko:

a) %33ko edo hortik gorako desgaitasun aitortua duten pertsonak. C) atalean ezarri bezala frogatu beharko da hori.

b) Deialdia argitaratu aurretik hilabetez edo luzaroago lan eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikatutako kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

Lan eskatzailea dela frogatzeko, enplegu bulegoak emandako agiria aurkeztu beharko du. Bertan, lan eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ezta lanbide sustapen, prestakuntza edo aldaketarako ekintzetan parte hartzeari ere, justifikatutako kasuetan izan ezik.

Interesdunaren aitorpenaren bidez frogatuko da ez duela hilabetero lanbide arteko gutxieneko soldatatik gorako diru-sarrerarik. Aitorpen eredua Nafarroako Gobernuko Informazio Bulegoan eskuratzen ahalko da, edo bestela Interneten bidez, arestian emandako helbidean.

B) Igoera txandako izangaiek aurkeztu beharreko berariazko dokumentazioa, izangai horiek Nafarroako Foru Komunitateko Administrazioa ez den Nafarroako beste administrazio publiko bateko langile finkoak badira edo Nafarroako Foru Komunitatera transferitutako Justizia Administrazioko zerbitzuei atxikitako langile finkoak badira:

A atalean adierazitakoaz gain, ondokoa aurkeztu beharko dute:

-Deialdi honen 2.1.2. ataleko a), b) eta c) letretan aipatzen diren betebeharrak frogatzen dituzten agiriak.

C) Desgaitasuna duten izangaiak.

3.2 oinarriaren A) atalean (tasak ordaindu beharrik ez izatea) eta 8. oinarrian (lanpostuak aukeratzeko lehentasuna) xedatutakoari dagokionez, eta denborak eta baliabideak egokitzea eskatzeko, %33ko edo hortik gorako desgaitasuna duten izangaiek hori frogatu beharko dute, jatorrizko agiri hauetako baten bidez edo kopia konpultsatuaren bidez:

-IMSERSOk edo autonomia erkidegoan eskumena duen organoak luzatutako ziurtagiria.

-Gizarte Segurantzako Institutu Nazionalaren ebazpena, prestazio bat jasotzeko eskubidea onartzen diona hauetakoren bat izateagatik: ezintasun iraunkor osoa, erabateko ezintasun iraunkorra edo baliaezintasun handia.

Desgaitasuna duten izangaiek ariketak egiteko denboren eta baliabideen egokitzapenak eskatzeko, hala adierazi beharko dute eskabidean, eta aparteko orri batean azaldu beharko dute nolako desgaitasuna duten eta zein egokitzapen eskatzen duten. Egokitzapenak eskatzeko bada eredu bat interesdunen eskura www.navarra.es web orrian, Zerbitzuen Katalogoko "Enplegu Publikoa" atalean, deialdiaren aipuan.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskabideak aurkezteko epea bukatuta, Nafarroako Administrazio Publikoaren Institutuko Sarrerarako Hautapenaren Zerbitzuko zuzendariak, erakunde autonomoko zuzendari kudeatzaileak emandako eskuordetzaz (103/2008 Ebazpena, ekainaren 26koa), ebazpena emanen du izangai onartuen eta baztertuen behin-behineko zerrenda onesteko, eta Nafarroako Aldizkari Ofizialean argitara dadila aginduko du.

4.2. Behin-behineko zerrenda Nafarroako Aldizkari Ofizialean argitaratzen denetik, izangai baztertuek hamar egun balioduneko epea izanen dute erreklamazioak aurkezteko eta, akatsik egin badute, haiek zuzentzeko.

4.3. Erreklamazioak aurkezteko epea bukaturik eta haien gainean ebatzi ondoren, Administrazio Publikoaren Institutuko Sarrerarako Hautapenaren Zerbitzuko zuzendariak, erakunde autonomoaren zuzendari kudeatzaileak emandako eskuordetzaz (103/2008 Ebazpena, ekainaren 26koa), ebazpena emanen du izangai onartuen eta baztertuen behin betiko zerrenda onesteko, eta Nafarroako Aldizkari Ofizialean argitara dadila aginduko du.

4.4. Izangaiei ez zaizkie azterketa egiteko eskubideak itzuliko, baldin eta beraiei egotzitako arrazoiengatik baztertzen badira.

5.-Epaimahaia.

5.1. Epaimahaia honako kide hauek osatuko dute:

-Mahaiburua: Carlos Arrieta Del Valle jauna, Lehendakaritza, Justizia eta Barne Departamentuko Gizarte Prestazioen Zerbitzuko zuzendaria.

-Ordezkoa: Francisco Javier Esparza Sánchez jauna, Hezkuntza Departamentuko Ikuskapenaren eta Zerbitzuen zuzendari nagusia.

-Mahaikidea: M.ª del Carmen De Andrés Vierge andrea, Hezkuntza Departamentuko Laneko Arriskuei Aurrea hartzeko Ataleko burua.

-Ordezkoa: Araceli Esandi Santesteban andrea, Laneko Medikuntzako sendagile espezialista, Hezkuntza Departamentuko Laneko Arriskuei Aurrea hartzeko Atalari atxikia.

-Mahaikidea: Francisco Javier Vitrián Ezquerro jauna, Nafarroako Lan Osasunaren Institutuko Laneko Arriskuei Aurrea hartzeko Atal Teknikoko burua.

-Ordezkoa: Javier Razquin Lizarraga jauna, unibertsitateko goi mailako tituluduna, Nafarroako Lan Osasunaren Institutuko Laneko Arriskuei Aurrea hartzeko Atal Teknikoari atxikia.

-Mahaikidea: langileen ordezkari bat, Administrazio Erroko Langileen Batzordeak proposatua.

-Ordezkoa: langileen ordezkari bat, Administrazio Erroko Langileen Batzordeak proposatua.

-Mahaikide idazkaria: Jesús Berraondo Ramírez jauna, Lehendakaritza, Justizia eta Barne Departamentuko Laneko Arriskuei Aurrea hartzeko Ataleko burua.

-Ordezkoa: Víctor Manuel Idoate García jauna, Osasunbidea-Nafarroako Osasun Zerbitzuko Laneko Arriskuei Aurrea Hartzeko Zerbitzuari atxikitako medikua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek egon beharko dute bertan.

5.3. Epaimahaiko kideek ez dute parte hartuko eta, baldin eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretako batean badaude, eta organo dei egileari hala jakinaraziko diote.

Izangaiek, halaber, zilegi dute epaimahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.-Oposizioa nola eginen den.

6.1. Oposizioa 2010eko irailean hasiko da. Onartu eta baztertuen behin betiko zerrenda onesten duen ebazpenean bertan finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

Lehenbiziko ariketa: ariketa teorikoa, gai zerrendako gaiei buruzko 100 galdera erantzun beharko dira. Galdera bakoitzak erantzun batzuk izanen ditu aukeran, baina bat bakarra izanen da egokia. Erantzun okerrengatik puntuak kenduko dira. Ariketa hori egiteko izangaiek zenbat denbora duten adieraziko du epaimahaiak haren hasieran.

Bigarren ariketa: ariketa teorikoa, hiru gai garatu beharko dira idatziz; eranskinean ageri den gai zerrendako zati bakoitzeko bat. Horretarako, epaimahaiak zati bakoitzeko bi gai aterako ditu zozketaz, eta izangaiek horietako bat, nahi dutena, garatu beharko dute. Hiru gaiak garatzeko 5 ordu izanen dira gehienez.

Hirugarren ariketa: praktikoa, non hiru kasu idatzita azaldu beharko diren. Horiek epaimahaiak proposatuko ditu eranskineko gai zerrendako bigarren zatiko (Laneko Segurtasuna eta Industria Higienea) eta hirugarren zatiko (Ergonomia eta Psikosoziologia) gaietatik. Ariketa hasi aurretik, epamahaiak erabakiko du zenbat denbora izanen duten izangaiek ariketa hau egiteko, baina gehienez lau ordu emanen dira.

Laugarren ariketa: ingeleseko probak, borondatezkoak eta ez baztergarriak. Aurreko hiru ariketak gainditu dituzten izangaiek egin ahalko dituzte. Idatzizko proba bat eta ahozko bat eginen dira, izangaien jakite maila zehazteko. Proba horiek Nafarroako Administrazio Publikoaren Institutuak prestatuko ditu eta haren emaitza loteslea izanen da epaimahaiarentzat.

6.3. Oposizioko ariketen balorazioan 100 puntu eman daitezke gehienez, honela banatuak:

-Lehenbiziko ariketa: gehienez ere 30 puntu.

-Bigarren ariketa: gehienez ere 30 puntu.

-Hirugarren ariketa: gehienez ere 30 puntu.

-Laugarren ariketa: gehienez ere 10 puntu.

6.4. Lehenbiziko, bigarren eta hirugarren ariketak baztertzaileak izanen dira. Bazterturik geldituko dira ariketa bakoitzean puntuaziorik altuena lortzen duen izangaiaren puntuazioaren erdira iristen ez diren izangaiak. Nolanahi ere, ariketa gainditutzat hartzeko, deialdiko oinarrietan ezarritako gehieneko puntuazioaren herena atera beharko da gutxienez. Halaber, bazterturik geldituko da bigarren edo hirugarren ariketetako gai edo kasu praktikoetako edozeinetan 0 puntuko kalifikazioa ateratzen duena.

6.5. Bigarren eta hirugarren ariketak plika sistemaren bidez eginen dira.

6.6. Ariketa bakoitza kalifikatu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo ariketa egiteko tokia, eguna eta ordua, gutxienez 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.7. Ariketa bakoitzerako deialdi bakarra eginen da. Izangaiek aldean izan beharko dute nortasun agiri nazionala, pasaportea, gidabaimena edo epaimahaiaren iritziz identifikaziorako balio duen beste agiriren bat. Azterketara agertzen ez direnak edo arestian aipatutako agirietako baten bidez nor diren frogatzen ez dutenak oposiziotik baztertuko dira.

6.8. Hautaprobak egiteko, onartutako desgaitasunen bat dutenentzat beharrezkoak diren denbora eta baliabide egokitzapenak ezarriko dira, eskabidean azaldutakoaren arabera.

7.-Probak gainditu dituztenen zerrenda, izendapen proposamena eta agirien aurkezpena.

7.1. Azken ariketaren kalifikazioa bukaturik, epaimahaiak jendaurrean jarriko du probak gainditzen dituztenen zerrenda, oposizioan lortutako kalifikazioekin, egin direneko tokian eta Nafarroako Gobernuaren iragarki oholean. Gero, zerrenda hori eta espediente osoa igorriko dizkio Nafarroako Administrazio Publikoaren Institutuko zuzendari kudeatzaileari, bai eta puntuaziorik altuenak lortu dituzten eta deialdiko lanpostuetan sartzen ahal diren izangaiak izendatzeko proposamena ere. Proposamena Nafarroako Aldizkari Ofizialean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Berdinketarik gertatuz gero, hirugarren ariketan puntu gehien lortzen dutenen alde ebatziko da. Eta hala ere berdinduta segitzen badute, lehenbiziko ariketan eta bigarren ariketan lortutako puntuazioak hartuko dira kontuan, ordena horrexetan.

7.2. Izendapen proposamena Nafarroako Aldizkari Ofizialean argitaratu ondoko 30 egun naturaleko epean, proposatutako izangaiek berariazko inprimaki batzuk jaso eta honako agiri hauek aurkeztu beharko dituzte Nafarroako Administrazio Publikoaren Institutuko Sarrerarako Hautapenaren Zerbitzuan:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiek:

a) Nortasun agiri nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.

b) Deialdiaren 2.1.1.c) oinarrian eskatzen den tituluaren fotokopia konpultsatua, edo hura lortzeko eskubideak pagatu direla frogatzen duen gordekinarena, edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

c) Prebentzio Zerbitzuen Erregelamenduaren 37. artikuluak ezartzen dituen goragoko eginkizunetan aritzeko gai dela dioten ziurtagirien fotokopia konpultsatua; hain zuzen, prebentzioko hiru diziplinetan aritzeko: Laneko Segurtasuna, Industria Higienea eta Ergonomia eta Psikosoziologia Aplikatua, aipatu erregelamenduan eta horren ondotik emandako garapen arauetan ezarritakoari jarraikiz.

d) B motako ibilgailuak gidatzeko baimenaren fotokopia konpultsatua.

e) Laneko Arriskuei Aurrea Hartzeko Atalak emandako txostena, interesdunak karguan aritzea eragozten dion eritasun edo akats fisiko edo psikikorik ez duela frogatzeko.

Desgaitasunen bat alegatu duten izangaiek, gainera, desgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

f) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

Proposatutako izangaiek Espainiako nazionalitatea ez badute, zinpeko aitorpen bat aurkeztu beharko dute, adierazteko ez dutela beren Estatuko funtzio publikoan sartzea eragozten dien diziplina zehapenik edo zigor penalik.

g) Zin egin edo hitz ematea Nafarroako Foru Araubidea errespetatuko duela, Konstituzioari eta legeei men eginen diela eta karguari dagozkion eginkizunak zuzen beteko dituela.

Deialdi hau egin ez duen Nafarroako beste administrazio publikoren bateko langile finkoek edo Nafarroako Foru Komunitateari transferitutako Justizia Administrazioko zerbitzuei atxikitako langile finkoek, gainera, beste ziurtagiri bat aurkeztu beharko dute, aurreko administrazioko espediente pertsonalean ageri diren inguruabar eta aurrekari guztiak frogatzeko, hots, sarrerari, antzinatasunari, mailari, egoera administratiboari eta abarri buruzko guztiak.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiek:

a) Deialdiaren 2.1.1.c) oinarrian eskatzen den tituluaren fotokopia konpultsatua, edo hura lortzeko eskubideak pagatu direla frogatzen duen gordekinarena, edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

b) Prebentzio Zerbitzuen Erregelamenduaren 37. artikuluak ezartzen dituen goragoko eginkizunetan aritzeko gai dela dioten ziurtagirien fotokopia konpultsatua; hain zuzen, prebentzioko hiru diziplinetan aritzeko: Laneko Segurtasuna, Industria Higienea eta Ergonomia eta Psikosoziologia Aplikatua, aipatu erregelamenduan eta horren ondotik emandako garapen arauetan ezarritakoari jarraikiz.

c) B motako ibilgailuak gidatzeko baimenaren fotokopia konpultsatua.

Desgaitasunen bat alegatu duten izangaiek, gainera, desgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barnean, eta aski justifikaturik dauden ezinbesteko kasuetan izan ezik, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, beren eskabidearen faltsukeria dela-eta legokiekeen erantzukizuna galarazi gabe.

7.4. Aurreko atalean ezarritakoa gertatuz gero, Nafarroako Administrazio Publikoaren Institutuko zuzendari kudeatzaileak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du hutsunea, eta horrekin ere aurreko ataletan adierazitako moduan jokatuko da.

7.5. Nahitaezko betebeharren frogagiriez gain, Funtzio Publikoaren Zuzendaritza Nagusiak, bere eskudantziak erabiltzeko, beste edozein agiri eskatzen badio izangaiari, horrek deialdi honen 7.2 oinarrian ezarritako moduan aurkeztu beharko du.

8.-Lanpostu hutsak hautatzea.

8.1. Aurreko oinarrian xedatu dena betetzen duten izangaiek Nafarroako Administrazio Publikoaren Institutuak (NAPI) hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Lanpostu horiek deialdian sartutakoak izanen dira, edo horien ordezko beste batzuk, zerbitzuaren beharren ondorioz, eta hala jakinaraziko zaie.

8.2. Lanpostu hutsak aukeratzerakoan, %33ko desgaitasun aitortua edo handiagoa duten izangaiek lehentasuna izanen dute gainerako izangaien aurretik, kontuan hartu gabe zein txandaren bidez parte hartu duten.

Hala izanagatik ere, desgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, desgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

8.3. Hautaprobak igoera txandan gainditzen dituzten izangaiek deialdiko lanpostuak betetzeko lehentasuna izanen dute txanda irekiko izangaien aldean, aurreko atalean adierazitako salbuespenarekin betiere.

9.-Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, unibertsitateko erdi mailako tituludun lanpostuetan aritzeko (Laneko Arriskuen Prebentzioa). Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko ditu izendatuak, eta Nafarroako Foru Komunitateko funtzionarioen arloan indarra duten xedapenetan ezarri diren eskubide eta betebehar guztiak izanen dituzte. Gizarte Segurantzako araubide orokorrean afiliatuko dira, araubide horretan ezarritakoaren babesean.

Aurrekoa gorabehera, Nafarroako Administrazio Publikoen zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein montepioren eskubide pasiboetan sarturik daudenek bi aukera izanen dituzte: Nafarroako Foru Komunitateko administrazio publikoen montepioan segitzea, martxoaren 5eko 10/2003 Foru Legearen bidezko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.4. Funtzionarioek bizilekua destinoko herrian ez izateak ez du alde batera uzten lantokira puntual iritsi beharra eta lanaldia eta lanpostuko eginkizunak zuzen bete beharra, eta, gainera, ez da inolako konpentsaziorik jasoko lantokirako joan-etorriengatik.

Behar bezala justifikatutako kasu batzuetan, administrazio publikoek zilegi izanen dute funtzionarioei destinoko herrian bizi daitezela eskatzea, lanpostuko eginkizunengatik eta eskatzen den dedikazioagatik bidezkoa denean.

9.5. Izendapena Nafarroako Aldizkari Ofizialean argitaratuko da eta izangai izendatuek hilabeteko epean jabetu beharko dute lanpostuez, izendapenaren jakinarazpenetik kontatzen hasita.

Aipatutako epean eta ezinbesteko kasuetan izan ezik, izangairen bat lanpostuaren jabe egiten ez bada, Foru Komunitateko Administrazioaren funtzionario izateko eskubide guztiak galduko ditu. Hala gertatzen bada, deialdiaren 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean ari delako, kasuko lanpostu hutsa ere deialdiaren 7.4 atalak agintzen duen moduan beteko da.

Era berean, administrazio publiko berean beste lanpostu bat lortzen duten funtzionarioek, maila berean nahiz beste batean, bat aukeratu beharko dute eta bestean borondatezko eszedentzia eskatzen ahalko dute.

9.7. Aurreko bi idatz-zatietan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10.-Aldi baterako kontratuetarako izangaien zerrenda.

10.1. Kontuan harturik Nafarroako Administrazio Publikoan sartzeko Erregelamenduaren 42. artikulua, Lehendakaritza, Justizia eta Barneko kontseilariaren azaroaren 14ko 146/2005 Foru Agindua (Lanpostuak aldi baterako betetzeko kudeaketa arauak onetsi zituena) eta oinarri honexetan ezarritako prozedura, eta horiei jarraikiz, aldi baterako kontratazioetarako izangaien zerrenda hauek prestatuko dira:

a) Sarrerako hautapen prozesuko ariketa guztiak gainditu arren lanposturik lortu ez duten izangaien zerrenda, bat bera Foru Komunitateko Administrazioko departamentu eta erakunde autonomo guztientzat.

b) Hautapen prozesuko bigarren ariketa gainditu arren ariketa guztiak gainditu ez dituzten izangaien zerrenda, Administrazio Erroan aldi baterako kontratatuak izateko.

10.2. Probak gainditu arren lanposturik lortu ez duten izangaien zerrenda eta Administrazio Erroan aldi baterako kontratatzeko izangaien zerrenda.

Nafarroako Administrazio Publikoaren Institutuko Sarrerarako Hautapenaren Zerbitzuak espedientea igorri ondoren, Funtzio Publikoaren zuzendari nagusiaren ebazpen bidez onetsiko dira probak gainditu arren lanposturik lortzen ez duten izangaien zerrenda eta bigarren ariketa gainditzen dutenena, une horretan indarrean diren kudeaketa arauekin bat, eta argitaratu eginen dira Nafarroako Gobernuko iragarki oholean (Karlos III.aren etorbidea, 2, atalondoa, Iruña) eta Nafarroako Gobernuaren web orrian: www.navarra.es.

Hauxe izanen da aldi baterako kontratazio zerrenden ordena: oposizioa gainditu arren lanposturik lortzen ez dutenen kasuan, sarrerako hautapen prozesuan lortutako puntuaziorik handienaren arabera; gainerako izangaien kasuan, gainditutako ariketetan lortutako puntuazioen batura. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

Aldi baterako kontrataziorako izangaien zerrendan agertzeak ez du esan nahi interesdunei onartzen zaienik 2. oinarrian ezarritako betebeharrak betetzen dituztela; izan ere, horiek oinarri honetan adierazten den bezala frogatu beharko dituzte.

Izangaiei deitu eta, kasua bada, haiek kontratatzerakoan, Administrazio Erroan, honako hauetan xedatutakoari jarraikiz jokatuko da: Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuaren 88.b) artikulua eta hurrengoak; lanpostuak aldi baterako betetzeko arauak ezartzeko Lehendakaritza, Justizia eta Barneko kontseilariak 2005eko azaroaren 14an eman zuen 146/2005 Foru Agindua (2005eko 144. Nafarroako Aldizkari Ofizialean argitaratua, abenduaren 2an); eta aplikatzekoak diren gainerako arauak.

Deia egiterakoan, kontuan hartuko da Nafarroako Foru Komunitateko Administrazioaren zerbitzuko Langileen Estatutuaren Testu Bateginaren zazpigarren xedapen gehigarriaren 4. atalean ezarritakoa.

Deialdiaren 2 oinarrian adierazten diren titulazio betebeharrak eta gidabaimenari dagozkionak betetzen direla frogatzeko agiriak kontratatuak izateko deia jasotzen duten izangaiek bakarrik aurkeztu beharko dituzte, kontratua formalizatzen denean, jatorrizko agiriak edo behar bezala konpultsatutako kopien bitartez.

Eskatzen diren agiriak aipatu epean aurkezten ez dituzten izangaiek, aski justifikatutako ezinbesteko kasuetan izan ezik, eta eskatutako baldintzak betetzen ez dituztenek deialdian parte hartzetik eratorritako eskubide guztiak galduko dituzte; betiere, parte hartzeko eskabidea faltsutzeagatik legokiekeen erantzukizuna galarazi gabe.

Sarrera prozesuko eskaerak aurkezteko epea bukatzen den egunerako bete beharko dira beharkizunak eta, orobat, hautaprobak egin bitartean eta kontratazioaldiak iraun bitartean.

10.3. Sarrera prozesuko eskaerak aurkezteko epea bukatzen den egunerako bete beharko dira beharkizunak eta, orobat, hautaprobak egin bitartean eta kontratazioaldiak iraun bitartean.

10.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrendak onetsiko dira eta Nafarroako Gobernuaren iragarki oholean argitaratuko (Karlos III.aren etorbidea, 2, atalondoa, Iruña).

10.5. Hauxe izanen da aldi baterako kontratazio zerrenden ordena: oposizioa gainditu arren lanposturik lortzen ez dutenen kasuan, sarrerako hautapen prozesuan lortutako puntuaziorik handienaren arabera; gainerako izangaien kasuan, gainditutako ariketetan lortutako puntuazioen batura. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

11.-Errekurtsoak.

Epaimahaiaren egintzen eta ebazpenen kontra, gora jotzeko errekurtsoa jartzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdiaren, oinarrien eta horiek aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, errekurtsoaren xede den egintza argitaratu edo jakinarazi eta biharamunetik hasita hilabeteko epean.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluan eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluetan xedatutakoari jarraikiz.

Iruñean, 2010eko martxoaren 12an.-Nafarroako Administrazio Publikoaren Institutuko zuzendari kudeatzailea, Gregorio Eguilaz Gogorza.

I. ERANSKINA - ESKABIDEA

Hautaprobetan onartua izateko eskabidea

Deialdiaren datuak.

Lanpostua:

Deialdi hau Nafarroako Aldizkari Ofizial honetan argitaratu zen: zenbakia: ....................., eguna: .................

Sartzeko txandak.

Txanda irekia ?

Igoera txanda* ?

Desgaitasunen bat dutenentzako erreserba txanda* ?

Norberaren datuak.

Izen-deiturak:

NANa edo agiri baliokidea:

Jaioteguna:

Jaioterria: ( )

Nazionalitatea:

Helbidea:

Herria:

Probintzia:

Posta kodea:

Sakelako telefonoa:

2. telefonoa:

Posta elektronikoa:

Aurkeztutako agiriak.

Desgaitasunaren frogagiria ?

Denboren eta/edo baliabideen egokitzapenak eskatzen ditu, beste orri batean ?

Euskararen gaitasun agiria edo baliokidea* ?

Ondoko hauen proba eskatzen du:

Euskara* ?

Ingelesa* ?

Frantsesa* ?

Sinatzaileak eskaera egiten du eskabide honetan adierazitako prozesuan onartua izan dadin eta adierazten du, erantzukizuna berea izanik, bertan azaltzen diren datu guztiak egiazkoak direla, deialdiaren oinarrian eskatutako beharkizun guztiak betetzen dituela eta datu horiek guztiak dokumentuen bidez frogatzeko konpromisoa hartzen duela.

(Sinadura)

..............................(e)n, 2010eko ..................aren ..................(e)an

NAFARROAKO ADMINISTRAZIO PUBLIKOAREN INSTITUTUKO ZUZENDARI KUDEATZAILEA.

LEHENDAKARITZA, JUSTIZIA ETA BARNE DEPARTAMENTUA.

(*) Deialdiaren oinarrietan xedatutakoari jarraikiz.

II. ERANSKINA - GAI ZERRENDA

Lehen zatia

1. gaia.-Espainiako 1978ko Konstituzioa: printzipio orokorrak. Oinarrizko eskubide eta betebeharrak. Botere Judiziala. Gorte Nagusiak: osaera eta eginkizunak. Gobernua eta Estatuko Administrazioa. Konstituzio Auzitegia: osaera, izaera eta eskumenak.

2. gaia.-Europar Batasuna. Parlamentua. Europako Kontseilua. Europako Batzordea. Kontseilua (ministroena). Justizia Auzitegia. Beste erakunde batzuk.

3. gaia.-Europar Batasuneko antolamendu juridikoaren iturriak: jatorrizko zuzenbidea eta zuzenbide eratorria.

4. gaia.-Espainiako 1978ko Konstituzioaren lehen xedapen gehigarria. Nafarroako Foru Eraentza Berrezarri eta Hobetzeari buruzko Lege Organikoa: izaera eta esanahia. Atariko titulua. Nafarroaren eskumenak.

5. gaia.-Nafarroako Parlamentua edo Gorteak. Nafarroako Comptos Ganbera. Arartekoa.

6. gaia.-Nafarroako Gobernua. Eginkizunak. Osaera, izendapena, eratzea eta kargu-uztea. Eskudantziak eta eskumenak. Funtzionamendua. Laguntzako eta sostenguko organoak. Nafarroako Parlamentuaren erantzukizun politikoa, kontrola eta desegitea. Nafarroako Gobernuko lehendakaria.

7. gaia.-Nafarroako Foru Komunitateko Administrazioa. Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritako printzipio orokorrak. Herritarren eskubideak Nafarroako Foru Komunitateko Administrazioarekiko harremanetan. Antolaketa: printzipio nagusiak eta egitura organikoa, kide anitzeko organoak eta administrazio organoen eskumenak.

8. gaia.-Administrazio publikoen araubide juridikoaren printzipio orokorrak. Administrazio publikoen organoak. Prozedura administratiboko interesdunak.

9. gaia.-Administrazioaren xedapenak eta egintzak. Egintza administratiboen betebeharrak. Egintzen eraginkortasuna. Deuseztasuna eta deusezgarritasuna.

10. gaia.-Prozedura administratiboen xedapen orokorrak: prozeduraren abiaraztea, antolamendua, instrukzioa eta amaiera. Bide administratiboko egintzen berrikuspena: ofiziozko berrikuspena eta administrazio errekurtsoak.

11. gaia.-Kontratu Publikoei buruzko Foru Legea: aplikaziorako arau orokorrak eta eremua. Kontratistak. Administrazio publikoen kontratu guztietarako xedapenak. Esleipenaren aurreko jarduketak.

12. gaia.-Nafarroako Administrazio Publikoen Zerbitzuko Langileen Estatutua. Langile motak. Funtzionario publikoak hautatzea. Administrazio egoerak. Funtzionarioen eskubideak, betebeharrak eta bateraezintasunak. Ordainsariak.

13. gaia.-11/2007 Foru Legea, apirilaren 4koa, Nafarroako Foru Komunitateko Administrazioan Administrazio Elektronikoa ezartzeari buruzkoa.

14. gaia.-21/2005 Foru Legea, abenduaren 29koa, Politika Publikoak eta Zerbitzu Publikoen Kalitatea Ebaluatzeari buruzkoa.

15. gaia.-15/1999 Lege Organikoa, abenduaren 13koa, Datu Pertsonalak Babesteari buruzkoa. 1720/2007 Errege Dekretua, abenduaren 21ekoa, Datu Pertsonalak Babesteari buruzko abenduaren 13ko 15/1999 Lege Organikoa garatzeko Erregelamendua onesten duena.

16. gaia.-Osasunari buruzko Lege Orokorra. Osasunari buruzko Foru Legea. Horren egitura eta edukiaren analisia. Laneko osasunaren aipamen berezia. Nafarroako Lan Osasunaren Institutua: eginkizunak eta eskumenak.

17. gaia.-Lanerako ezintasunak, aldi baterakoak eta iraunkorrak. Kontzeptu orokorrak. Laneko gorabeheren kontingentziak. Indarra duen araudia. Araubide desberdinen ezaugarri bereizleak: Gizarte Segurantza, Nafarroako Gobernuko Montepioa, MUFACE eta MUGEGU.

18. gaia.-Gizarte Segurantzaren Sistema. Erakunde kudeatzaileak. Entitate laguntzaileak. Gizarte segurantzako lan-istripu eta gaixotasun profesionalen mutualitateak. Alderdi orokorrak eta laneko segurtasun eta osasunarekin zerikusia duten jarduketak. Indarra duen araudia.

19. gaia.-Laneko Arriskuei Aurrea Hartzeari buruzko Legea. Egitura eta edukiaren azterketa. Garatzeko araudia.

20. gaia.-Langileen eta enpresaburuen eskubide eta eginbeharrak, Laneko Arriskuei Aurrea hartzeari buruzko Legearen arabera. Ekoizleen, inportatzaileen eta hornitzaileen betebeharrak. Langileen kontsulta eta parte-hartzea, laneko arriskuei aurrea hartzeko.

21. gaia.-Prebentzio zerbitzuen Erregelamendua. Egitura eta edukiaren azterketa. Garatzeko araudia.

22. gaia.-Prebentzio jardueretarako baliabideen antolaketa. Modalitateak. Prebentzio zerbitzuak. Kotzeptu orokorrak. Betebeharrak. Eginkizunak. Baliabideak eta langileak. Kreditazioa.

23. gaia.-Erantzukizunak eta zehapenak Laneko Arriskuen Prebentzioaren arloan. Lan Arloko Arau-hauste eta Zehapenei buruzko Legea.

24. gaia.-Laneko arriskuen prebentzioko araudia administrazio publikoei egokitzea. Foru Komunitatearen eta haren erakunde autonomoen esparruari egokitzea.

25. gaia.-Langile bereziki sentikorrak babestea. Amatasunaren eta adingabeen babesa.

26. gaia.-Laneko arriskuei aurrea hartzeko plana: politika, printzipioak eta helburuak, antolaketaren egitura, eginkizunak eta erantzukizunak.

27. gaia.-Laneko arriskuen ebaluazioa. Kontzeptu orokorrak. Metodologia. Prebentzio ekintzaren plangintza.

28. gaia.-Birkokatzeko prozedura, lanean aritzeko ezintasunagatik. 114/2002 Foru Dekretua, 2002ko ekainaren 3koa.

Bigarren zatia

Laneko Segurtasuna eta Industria Higienea.

1. gaia.-Laneko segurtasuna eta osasuna. Oinarrizko kontzeptuak. Lan baldintzak eta osasuna. Lan arriskuak. Lanak eragindako kalteak. Prebentzioa eta babesa. Laneko arriskuei aurrea hartzeko teknikak.

2. gaia.-Lan istripuak eta gaixotasun profesionalak. Kontzeptua. Jakinarazpena, erregistroa eta sailkapena. Lege araudia.

3. gaia.-Lan istripuen kostua: lan istripuen kostua, giza bizitzetan eta dirutan. Prebentzioaren analisia, kostua eta onura aztertuta. Enpresako istripuen analisi estatistikoa.

4. gaia.-Segurtasun teknikak. Istripuak ikertzea, prebentzioko teknika gisa.

5. gaia.-Istripuak gertatzeko arriskuaren analisia eta ebaluazio orokorra.

6. gaia.-Segurtasuneko araua eta seinalizazioa. Laneko arau eta prozedurak.

7. gaia.-Taldekako eta banakako babesa.

8. gaia.-Laneko tokiei loturiko berariazko arriskuen analisia, ebaluazioa eta kontrola. Aplikatu beharreko araudia.

9. gaia.-Suteei loturiko berariazko arriskuen analisia, ebaluazioa eta kontrola.

10. gaia.-Larrialdietarako eta autobabeserako planak.

11. gaia.-Laneko makinei eta ekipoei loturiko berariazko arriskuen analisia, ebaluazioa eta kontrola.

12. gaia.-Eraikuntza lanetako segurtasuna eta osasuna. Eraikuntza sektoreko azpikontratazioa.

13. gaia.-Enpresa jardueren koordinazioa. Prebentzioko baliabideak. Aplikatu beharreko araudia.

14. gaia.-Altuerako lanetako arriskuen prebentzioa.

15. gaia.-Lantokiko egurats lehergarrien ondoriozko arriskuen analisia, ebaluazioa eta kontrola. Aplikatu beharreko araudia.

16. gaia.-Gune konfinatuak. Kontzeptu orokorrak. Arriskuak eta jarduketak. Laneko baimena. Larrialdi eta erreskateko prozedurak. Gune konfinatuetako lantaldearen entrenamendua eta betebeharrak.

17. gaia.-Arrisku elektrikoa. Langileen osasunaren eta segurtasunaren babesa arrisku elektrikoaren aurrean.

18. gaia.-Oinarrizko kontzeptuak. Metodologia industria higienean. Kutsatzaile fisiko, kimiko eta biologikoak.

19. gaia.-Agente kimikoak. Lan-toxikologia. Kutsatzaile kimikoen sailkapena. Esposizioa eta dosia. Toxikoen ondorioak. Intoxikazio motak. Dosia-ondorioa eta dosia-erantzuna erlazioak. Esposizioko maila onargarriak.

20. gaia.-Agente kimikoak. Esposizioaren ebaluazioa.

21. gaia.-Agente kimikoak. Esposizioaren kontrola. Printzipio orokorrak. Gune kutsagarriaren aurkako ekintzak. Hedatzeko ingurunearen kontrako ekintzak. Nola jokatu gizabanakoekin.

22. gaia.-Agente kimikoak. Legezko arautegi berariazkoa.

23. gaia.-Lan egitean agente minbizi-sortzaileen aurrean egoteari loturiko arriskuak. Laneko agente minbizi-sortzaileak. Legezko arautegi berariazkoa.

24. gaia.-Segurtasun eta osasun arloko gutxieneko xedapenak, amiantoaren arriskuan egin beharreko lanei aplikatzekoak.

25. gaia.-Agente fisikoak. Zarata. Ezaugarri orokorrak. Zarataren ondorioak organismoan. Ebaluazioa eta kontrola.

26. gaia.-Agente fisikoak. Zarata. Zarataz inguratuta egotearen arriskuak. Legezko arautegi berariazkoa.

27. gaia.-Agente fisikoak. Bibrazioak. Ezaugarri orokorrak. Bibrazioz inguratuta egotearen arriskuak. Ebaluazioa eta kontrola. Legezko arautegi berariazkoa.

28. gaia.-Giro termikoa. Balantze termikoaren ekuazioa. Termorregulazioko eta bero trukeko mekanismoak organismoaren eta ingurunearen artean. Aplikatu beharreko legeria.

29. gaia.-Giro termikoa. Ezaugarri orokorrak. Ondorioak. Ebaluazioa eta kontrola.

30. gaia.-Agente biologikoak. Agente biologikoez inguratuta egotearen arriskuak. Legezko arautegi berariazkoa.

Hirugarren zatia

Ergonomia eta Psikosoziologia.

1. gaia.-Ergonomia eta Psikosoziologia: kontzeptua eta helburuak. Ergonomiako eta Psikosoziologiako ikerketa teknikak: metodo kualitatiboak eta kuantitatiboak.

2. gaia.-Lanpostuko gorputz-jarrera. Oinarrizko gorputz-jarrerak. Bizkar-gerrialdeko patologiei aurrea hartzea.

3. gaia.-Lanaren karga fisikoa eta giharren eta eskeletoaren trastornoak. Arrisku faktoreen identifikazioa eta haien prebentzioa.

4. gaia.-Zamak eskuz jasotzearen ondoriozko arriskua ebaluatzeko metodoak. INSHT eta NIOSH metodoak.

5. gaia.-Giharren eta eskeletoaren trastornoak izateko arriskua ebaluatzeko metodoak. OWAS eta REBA metodoak.

6. gaia.-Goiko gorputz-adarreko giharren eta eskeletoaren trastornoak izateko arriskua ebaluatzeko metodoak. RULA eta Strain Index metodoak.

7. gaia.-Datuak ikusteko pantailak. Lanpostu pantailadunen ebaluazioa eta egokitzapena.

8. gaia.-Ingurumeneko baldintzak. Konfort termikoa. Ebaluazio metodoak: PMV eta PPD.

9. gaia.-Lanpostuen argiztapena. Ebaluatzeko eta egokitzeko irizpideak.

10. gaia.-Barreneko giroaren kalitatea. Eraikin eriaren sindromea. Faktoreka, lotutako arriskuak, haien ebaluazioa, prebentzioa eta kontrola.

11. gaia.-Lan denboraren antolaketari buruzko alderdiak. Erritmo zirkadianoak. Txandakako lana. Gaueko lana.

12. gaia.-Lanaren zama mentala. Zama hori baldintzatzen duten faktoreak. Ebaluatzeko metodoak. Zama mentala egokitzea.

13. gaia.-Laneko estresa I: estresoreak; estresaren faktore modularrak, erantzun fisiologikoak, kognitiboak eta portaerakoak.

14. gaia.-Laneko estresa II: estresaren ondorioak enpresarentzat eta langilearentzat. Prebentzio neurriak antolaketan eta gizabanakoen gainean.

15. gaia.-Burnout sindromea. Laneko estresaren ondoriozko arriskuaren ebaluazioa eta kontrola.

16. gaia.-Jazarpena lanean. Jazarpen psikologikoa: mobbing.

17. gaia.-Indarkeria lanean: indarkeria fisikoa, jazarpen sexuala.

18. gaia.-Arrisku psikosozialeko faktoreak ebaluatzeko metodoak: INSL eta ISTAS 21 metodoak.

19. gaia.-Esku-hartze psikosoziala lanaren antolaketan, zuzendaritzaren estiloan eta gizabanakoekin.

20. gaia.-Prestakuntza laneko arriskuen prebentzioan. Eskubideak eta betebeharrak. Prestakuntzaren plangintza enpresan. Beharren diagnostikoa. Helburuen definizioa. Prestakuntzaren metodo eta teknikak.

Oharra: bigarren zatiko gai guztiak bat etorriko dira deialdi hau Nafarroako Aldizkari Ofizialean argitaratzen den egunean indarrean den legeriarekin.

Iragarkiaren kodea: F1004725