Iragarkia

2. ALDIZKARIA - 2010eko urtarrilaren 4a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

DEIALDIA, Nafarroako Administrazio Publikoaren Institutuko zuzendari kudeatzaileak abenduaren 17an emandako 240/2009 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko euskara itzultzaile-interpretari izateko 6 lanpostu oposizio bidez betetzekoa.

Nafarroako Administrazio Publikoaren Institutuko zuzendari kudeatzaileak abenduaren 17an emandako 240/2009 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko euskara itzultzaile-interpretari izateko 6 lanpostu oposizio bidez betetzeko deialdia onetsi zen.

Hautaketa prozesua honako hauetan xedatutakoari jarraikiz eginen da: Nafarroako Administrazio Publikoen Zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsia, aipatutako estatutua garatu eta gauzatzeko Sarrera Erregelamendua, gainerako aplikazio arauak eta deialdi honen oinarriak.

Oinarriak

1.-Deialdiaren xedea.

1.1. Deialdi honen xedea da Nafarroako Foru Komunitatearen eta haren erakunde autonomoen zerbitzuko euskara itzultzaile-interpretari izateko 6 lanpostu, A mailakoak eta funtzionarioen araubidekoak, oposizio bidez betetzea. Lanpostuak txanda hauetakoak dira:

-3 lanpostu txanda irekian.

-3 lanpostu igoera txandan.

Deialdiko lanpostu hutsak hauek dira:

-4 Lehendakaritza, Justizia eta Barne Departamentuko Lehendakaritzako Zuzendaritza Nagusian, Iruñean aritzeko. Plantilla organikoko zenbakiak: 36010, 36008, 36009 eta 36062.

-2 Euskarabidea-Euskararen Nafar Institutuan, Iruñean aritzeko. Plantilla organikoko zenbakiak: 36063 eta 38030.

1.2. Igoera txandako lanpostuak hutsik geldituz gero, izangaiek ez dutelako lortu hautaprobak gainditzeko behar den gutxieneko puntuazioa, txanda irekikoei gehituko zaizkie.

Bestalde, igoera txandan hutsik dauden lanpostuak baino izangai gehiagok gainditzen badituzte probak, txanda horretan probak gainditu arren lanposturik eskuratzen ez dutenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta lortutako azken puntuazioaren arabera.

Era berean, deialdiaren 7.2 oinarrian agiriak aurkezteko ezarritako epea bukatzen denean, deialdiaren 2.1.2 oinarriko betebehar berariazkoak betetzen ez dituzten igoera txandako izangaiek aukera izanen dute txanda irekiko lanpostuak eskuratzeko, aurreko lerroaldean adierazitako modu berean.

1.3. Lanpostuen ordainsariak hauek izanen dira: uztailaren 4ko 158/1984 Foru Dekretuaren bidez onetsitako Ordainsariei Buruzko Behin-behineko Erregelamenduan A mailarentzat oro har ezarritakoak eta aplika daitezkeen gainerako xedapenetan kasu bakoitzerako ezartzen direnak.

1.5. Halaber, deialdi honen bidez, aldi baterako kontratatuak izateko izangaien ondoko zerrendak osatu nahi dira, hautapen prozeduran lanposturik lortzen ez duten izangaiekin:

-Probak gainditu arren, lanposturik lortu ez duten izangaien zerrenda, departamentu eta erakunde autonomo guztietarako.

-Bigarren ariketa gainditu dutenen zerrenda, Administrazio Erroan aldi baterako kontratatzeko.

Aldi baterako kontratatuak izateko izangaien zerrendak deialdi honen 10. oinarrian xedatutakoarekin bat onetsi eta kudeatuko dira.

2.-Izangaiek bete beharreko baldintzak.

2.1. Oposizio honetan onartuak izateko, izangaiek, eskaerak aurkezteko epea bukatzen den egunean eta agiriak aurkezteko epea bukatzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:

2.1.1. Txanda irekiko izangaiek bete beharreko baldintzak:

a) Espainiarra izatea, edo Europar Batasuneko beste estatu batekoa edo, Europar Batasunak sinatu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, parte har dezakete espainiarren eta Europar Batasuneko beste estatuetako herritarren ezkontideek, edo aipatu nazioarteko itunek ukitutako estatuetako herritarren ezkontideek, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.

b) Hamasei urtetik gorakoa izatea eta nahitaezko erretiroko gehieneko adina ez izatea.

c) Lizentziadun, ingeniari edo arkitekto titulua izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lortutako tituluak badira, homologazioaren frogagiria eduki beharko da.

d) Euskararen Gaitasun Agiriaren (EGA) titulua edukitzea, Nafarroako Gobernuak luzatua, edo ofizialki balio bera duen beste titulu bat (102/2009 Foru Agindua, Hezkuntzako Kontseilariarena, 2009ko 110. Nafarroako Aldizkari Ofizialean argitaratua, irailaren 7an).

e) Bete behar dituen eginkizunetan aritzeko adinako gaitasun fisikoa eta psikikoa izatea.

f) Eginkizun publikoetan aritzeko ezgaitua edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute ez dutela diziplina zehapenik edo zigor penalik beren estatuko funtzio publikoan sartzea eragozten dienik.

2.1.2. Igoera txandako izangaiek bete beharreko baldintza berariazkoak:

Igoera txandako izangaiek, 2.1.1 atalean adierazitako betebeharrez gain, hauek ere bete beharko dituzte:

a) Nafarroako edozein administrazio publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioko zerbitzuei atxikitako langile finkoa, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio publikoetan bost urteko antzinatasun aitortua izatea, Nafarroako polizia kidegoetako kideen kasuan izan ezik, horiek frogatu beharko baitute zortzi urtez benetan eman dituztela zerbitzuak kidego horietan.

Nafarroako Administrazio Publikoen zerbitzuko Langileen Estatutuaren zortzigarren xedapen gehigarrian ezarri dena aplikatuz, igoera txandan parte hartzeko betebeharrak betetzen dituzten Nafarroako Parlamentuko funtzionarioek ere aukera izanen dute txanda horretan parte hartzeko.

2.2. Deialdiaren 3.2 oinarriaren B) letran aipatzen den salbuespena salbuespen, izendatuak izateko proposatzen diren izangaiek deialdiaren 7.2 oinarrian ezarritako epean eta moduan frogatu beharko dituzte betebehar horiek.

3.-Eskabideak.

3.1. Deialdian parte hartzeko eskaerak Nafarroako Gobernuko Erregistro Orokorrean (Karlos III.aren etorbidea, 2, 31002 Iruña) edo Nafarroako Gobernuaren gainerako erregistro bulegoetako edozeinetan (zerrenda 2008ko 14. Nafarroako Aldizkari Ofizialean argitaratu zen, urtarrilaren 30ean) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazi diren bideetakoren bat erabiliz, deialdia Nafarroako Aldizkari Ofizialean argitaratu eta biharamunetik hogeita hamar egun naturaleko epean.

Eskabidea posta bulego batean aurkeztuz gero, gutun-azal irekian eginen da, postako langileek data eta zigilua jar ditzaten, ziurtatu aurretik.

Eskabideak deialdi honen eranskineko ereduari lotu behar zaizkio eta, horietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuaren edozein erregistro bulegotan dago eskuragarri. Interneten bidez ere lortzen ahal da, www.navarra.es helbidean, bai argitaratzen den aldizkari ofizialetik abiatuta, bai atal honetatik abiatuta: "Zerbitzuak", "Enplegu Publikoa".

3.2. Eskabideari, behar bezala bete ondoren, agiri hauek erantsiko zaizkio:

A.-Izangai guztiek aurkeztu beharreko agiriak:

Bat.-Nortasun agiri nazionalaren fotokopia, edo izangaiaren nortasuna frogatzen duen beste agiri baliokideren batena.

Bi.-Espedientea formalizatzeko eta azterketa eskubideetarako 40 euro ordaindu izanaren jatorrizko ziurtagiria. Azterketa eskubideen tasa ordaintzen ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

-Behar den bezala betetako ordainketa gutunaren bidez (Nafarroako Foru Komunitateko banku entitateetan ordaintzeko). Interneten, deialdiaren iragarkian, dago ordainketa gutunaren eredua, arestian aipatutako helbidean.

-Banestoko (Banco Español de Crédito) 0030 8124 87 0870002271 kontuan eskudirutan edo bankuko transferentzia bidez ordainduz; horrelakoetan, ordainagirian datu hauek jarri beharko dira nahitaez:

-Izangaiaren izen-deiturak.

-NANa/IFZ.

-Ordainketa zein kontutan egiten den, haren zenbakia.

-Kontzeptua: oposizioak.

-Deialdiaren xede den lanpostua.

Honako hauek ez dute tasarik ordaindu beharko:

a) %33ko edo hortik gorako ezgaitasun aitortua duten pertsonak. Hirugarren atalean ezarri bezala frogatu beharko da.

b) Deialdia argitaratu aurretik hilabetez edo luzaroago lan eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izatea eta lanbide sustapen, prestakuntza edo aldaketarako ekintzetan parte hartzeari uko egin ez izatea, justifikatutako kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

Lan eskatzailea dela frogatzeko, enplegu bulegoak emandako agiria aurkeztu beharko du. Bertan, lan eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ezta lanbide sustapen, prestakuntza edo aldaketarako ekintzetan parte hartzeari ere, justifikatutako kasuetan izan ezik.

Interesdunaren adierazpenaren bidez frogatuko da ez duela hilabetero lanbide arteko gutxieneko soldatatik gorako diru-sarrerarik. Adierazpen eredua Nafarroako Gobernuko Informazio Bulegoan eskuratzen ahalko da, edo bestela Interneten bidez, arestian emandako helbidean.

B.-Igoera txandako izangaiek aurkeztu beharreko berariazko dokumentazioa, baldin eta izangai horiek Nafarroako Foru Komunitateko Administrazioa ez den Nafarroako beste administrazio publiko bateko langile finkoak badira edo Nafarroako Foru Komunitatera transferitutako Justizia Administrazioko zerbitzuei atxikitako langile finkoak badira:

A atalean adierazitakoaz gain, aurkeztu beharko dituzte:

-Deialdi honen 2.1.2. ataleko a), b) eta c) letretan aipatzen diren betebeharrak frogatzen dituzten agiriak.

C.-Ezgaitasuna duten izangaiak.

3.2 oinarriaren A) atalean (tasak ordaindu beharrik ez izatea) eta 8. oinarrian (lanpostuak aukeratzeko lehentasuna) xedatutakoari dagokionez, eta denborak eta baliabideak egokitzeko eskatzeko, %33ko edo hortik gorako ezgaitasuna duten izangaiek hori frogatu beharko dute, agiri jatorrizko hauetako baten bidez edo kopia konpultsatuaren bidez:

-Imsersok edo automia erkidegoan eskumena duen organoak luzatutako ziurtagiria.

-Gizarte Segurantzako Institutu Nazionalaren ebazpena, prestazio bat jasotzeko eskubidea onartzen diona hauetakoren bat izateagatik: ezintasun iraunkor osoa, erabateko ezintasun iraunkorra edo baliaezintasun handia.

Ezgaitasuna duten izangaiek ariketak egiteko denboren eta baliabideen egokitzapenak eskatzeko, hala adierazi beharko dute eskabidean, eta aparteko orri batean adierazi beharko dute nolako ezgaitasuna duten eta zein egokitzapen eskatzen duten. Egokitzapenak eskatzeko bada eredu bat interesdunen eskura www.navarra.es web orrian, Zerbitzuen Katalogoko "Enplegu Publikoa" atalean, deialdiaren aipuan.

3.3. Eskabideak aurkezteko epea ezin izanen da luzatu.

3.4. Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskaerak aurkezteko epea bukatuta, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa), ebazpena emanen du izangai onartuen eta baztertuen behin-behineko zerrenda onesteko, eta Nafarroako Aldizkari Ofizialean argitara dadila aginduko.

4.2. Behin-behineko zerrenda Nafarroako Aldizkari Ofizialean argitaratu eta biharamunetik, izangai baztertuek hamar egun balioduneko epea izanen dute erreklamazioak aurkezteko eta, akatsik egin badute, haiek zuzentzeko.

4.3. Erreklamazioak aurkezteko epea bukaturik eta haien gaineko ebazpena eman ondoren, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa) ebazpena emanen du, izangai onartuen eta baztertuen behin betiko zerrenda onesteko, eta Nafarroako Aldizkari Ofizialean argitara dadila aginduko.

4.4. Izangaiei ez zaizkie azterketa egiteko eskubideak itzuliko, baldin beraiei egotzitako arrazoiengatik baztertzen badira.

5.-Epaimahaia.

5.1. Kide hauek osatuko dute epaimahaia:

-Mahaiburua: José Luis Remón Corrales jauna, Lehendakaritza, Justizia eta Barne Departamentuko Nafarroako Aldizkari Ofizialaren Zerbitzuko zuzendaria.

-Ordezkoa: Julen Calvo Jiménez jauna, Hezkuntza Departamentuko Euskarabidea-Euskararen Nafar Institutuko Euskararen gaineko Aholkularitza eta Prestakuntzarako Zerbitzuko zuzendaria.

-Mahaikidea: José María Sestorain Zestau jauna, Lehendakaritza, Justizia eta Barne Departamentuko Nafarroako Aldizkari Ofizialaren Zerbitzuko Itzulpen Ataleko itzultzailea.

-Ordezkoa: Maite Urkia Inza andrea, Lehendakaritza, Justizia eta Barne Departamentuko Nafarroako Aldizkari Ofizialaren Zerbitzuko Itzulpen Ataleko itzultzailea.

-Mahaikidea: Ander Irizar Apaolaza jauna, Nafarroako Parlamentuko euskara itzultzailea.

-Ordezkoa: Mikel Iriarte Cilveti jauna, Nafarroako Parlamentuko euskara itzultzailea.

-Mahaikidea: langileen ordezkari bat, Administrazio Erroko Langileen Batzordeak proposaturik izendatua.

-Ordezkoa: langileen ordezkari bat, Administrazio Erroko Langileen Batzordeak proposaturik izendatua.

-Mahaikide idazkaria: Pascual Recalde Irigoyen jauna, Euskarabidea-Euskararen Nafar Institutuko Euskararen gaineko Ikerketa eta Itzulpenerako Ataleko burua.

-Ordezkoa: Sergio Huarte Garciandía jauna, Euskarabidea-Euskararen Nafar Institutuko Itzulpen Bulegoko burua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek egon beharko dute bertan.

5.3. Epaimahaiko kideek ez dute parte hartuko, eta organo dei egileari hori jakinaraziko diote, baldin eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretako batean badaude.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.-Oposizioa nola eginen den.

6.1. Oposizioa 2010eko maiatzean hasiko da. Onartu eta baztertuen behin betiko zerrenda onesten duen ebazpenean berean finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

A.-Lehen ariketa: ariketa teorikoa izanen da, eta hiru proba egin beharko dira:

1. proba: erantzun laburreko 16 galdera erantzun behar dira, idatziz eta euskaraz, gai zerrendako I. gai zerrendari buruz. Izangaiek 20 galderaren artetik aukeratu beharko dituzte galdera horiek. Ariketa egiteko 3 ordu emanen dira gehienez.

2. proba: I. gai zerrendatik zozketaz ateratako bi gaietatik bat aukeratu eta horren gainean idatzi beharko da, euskaraz. Ariketa egiteko 2 ordu emanen dira gehienez.

3. proba: II. gai zerrendatik zozketaz ateratako bi gaietatik bat aukeratu eta horren gainean idatzi beharko da, euskaraz. Ariketa egiteko ordubete emanen da gehienez.

B.-Bigarren ariketa: ariketa teorikoa izanen da, eta bi proba egin beharko dira:

1. proba: epaimahaiak emandako euskarazko bi testu gaztelaniara itzuli beharko dira. 25 lerrokoak izanen dira biak ere, eta batek eduki teknikoa izanen du eta besteak juridiko-administratiboa. Ordubete emanen da gehienez.

2. proba: epaimahaiak emandako gaztelaniazko bi testu euskarara itzuli beharko dira. 25 lerrokoak izanen dira biak ere, eta batek eduki teknikoa izanen du eta besteak juridiko-administratiboa. Ordubete emanen da gehienez.

Bi probak egiteko, oposiziogileek nahi dituzten hiztegiak eramaten eta erabiltzen ahalko dituzte.

C.-Hirugarren ariketa: praktikoa izanen da. Aldibereko itzulpena egin beharko da gaztelaniara.

D.-Laugarren ariketa: ingeleseko probak. Aurreko hiru ariketak gainditzen dituzten izangaientzat soilik. Borondatezko ariketa da eta ez baztergarria.

Idatzizko eta ahozko proba bana izanen ditu, izangaien jakite maila zehazteko.

Proba horiek Nafarroako Administrazio Publikoaren Institutuak prestatuko ditu eta haren emaitza loteslea izanen da epaimahaiarentzat.

6.3. Oposizioko ariketen balorazioan 100 puntu eman daitezke gehienez, honela banatuak:

-Lehenbiziko ariketa: gehienez ere 36 puntu.

• Lehenbiziko proba: 14 puntu bitarte.
• Bigarren proba: 14 puntu bitarte.
• Hirugarren proba: 8 puntu bitarte.

-Bigarren ariketa: gehienez ere 36 puntu.

• Lehenbiziko proba: 18 puntu bitarte.
• Bigarren proba: 18 puntu bitarte.

-Hirugarren ariketa: gehienez ere 18 puntu.

-Laugarren ariketa: gehienez ere 10 puntu.

6.4. Lehenbiziko, bigarren eta hirugarren ariketak baztergarriak izanen dira. Lehenbiziko eta bigarren ariketetako lehen eta bigarren probetan eta hirugarren ariketan, baztertuta geldituko dira kalifikaziorik onena lortzen duen izangaiaren puntuazioaren erdia gutxienez lortzen ez dutenak; betiere puntuazio hori ariketaren gehieneko puntuazioaren 1/3 edo handiagoa bada. Halaber, baztertuta geldituko dira lehenbiziko ariketako hirugarren proban 0 puntu lortzen dutenak.

6.5. Lehen eta bigarren ariketak plika sistemaren bidez eginen dira.

6.6. Ariketa bakoitzaren kalifikazioa amaitutakoan, epaimahaiak jendaurrean jarriko du, ariketa egin den lekuan eta Nafarroako Gobernuaren iragarki oholean, probak gainditu dituzten izangaien zerrenda, bakoitzaren kalifikazioekin. Horrez gainera, oposizioko hurrengo proba non, zein egunetan eta zer ordutan eginen den adierazten duen oharra argitaratuko du, gutxienez hura hasi baino 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.7. Ariketa bakoitzerako deialdi bakarra eginen da. Izangaiek aldean izan beharko dute nortasun agiri nazionala, pasaportea, gidabaimena edo epaimahaiaren iritziz identifikaziorako balio duen beste agiriren bat. Azterketara agertzen ez direnak edo arestian aipatutako agirietako baten bidez beren nortasuna frogatzen ez dutenak oposiziotik baztertuko dira.

6.8. Hautaprobak egiteko, ezgaitasun aitorturen bat dutenentzat beharrezkoak diren denbora eta baliabide egokitzapenak ezarriko dira, eskabidean azaldutakoaren arabera.

7.-Probak gainditzen dituztenen zerrenda, izendapen proposamena eta agirien aurkezpena.

7.1. Hautaprobak bukaturik, epaimahaiak jendaurrean jarriko du, probak egin diren tokian eta Nafarroako Gobernuaren iragarki oholean, probak gainditu dituztenen zerrenda, oposizioan lortutako kalifikazioekin. Gero, zerrenda hori Nafarroako Administrazio Publikoaren Institutuko zuzendari kudeatzaileari igorriko dio, puntuaziorik altuenak izateagatik deialdiko lanpostuetan sartzen ahal diren izangaiak izendatzeko proposamenarekin eta espediente osoarekin batera. Proposamen hori Nafarroako Aldizkari Ofizialean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Berdinketarik gertatuz gero, lehenbiziko ariketan puntu gehien lortu dutenen alde ebatziko da. Eta hala ere berdinduta segitzen badute, bigarren ariketan lortutako puntuazioa hartuko da kontuan.

7.2. Izendapen proposamena Nafarroako Aldizkari Ofizialean argitaratu ondoko 30 egun naturaleko epean, proposatutako izangaiek berariazko inprimaki batzuk jaso eta honako agiri hauek aurkeztu beharko dituzte Nafarroako Administrazio Publikoaren Institutuko Sarrerarako Hautapenaren Zerbitzuan:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiek:

a) Nortasun agiri nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.

b) Deialdiaren 2.1.1 oinarriaren c) eta d) letretan eskatzen diren tituluen fotokopia konpultsatuak, edo horiek lortzeko eskubideak pagatu direla frogatzen duen gordekinarena, edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea Hartzeko Atalak emandako txostena, interesdunak karguan aritzea eragozten dion eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

Izangaiek Espainiako nazionalitatea ez badute, zinpeko aitorpen bat aurkeztu beharko dute, adierazteko ez dutela beren estatuko funtzio publikoan sartzea eragozten dien diziplina zehapenik edo zigor penalik.

e) Zin egin edo hitz ematea Nafarroako Foru Araubidea errespetatuko duela, Konstituzioari eta legeei men eginen diela eta karguari dagozkion eginkizunak zuzen beteko dituela.

Deialdi hau egin ez duen Nafarroako beste administrazio publikoren bateko langile finkoek edo Nafarroako Foru Komunitateari transferitutako Justizia Administrazioko zerbitzuei atxikitako langile finkoek, gainera, beste ziurtagiri bat aurkeztu beharko dute, frogatzeko aurreko administrazioko espediente pertsonalean ageri diren inguruabar eta aurrekari guztiak, hots, sarrerari, antzinatasunari, mailari, egoera administratiboari eta abarri buruzko guztiak.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiek:

a) Deialdiaren 2.1.1 oinarriaren c) eta d) letretan eskatzen diren tituluen fotokopia konpultsatuak, edo horiek lortzeko eskubideak pagatu direla frogatzen duen gordekinarena, edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

7.2.3. Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barnean, eta aski justifikaturik dauden ezinbesteko kasuetan izan ezik, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, galarazi gabe beren eskabidearen faltsukeria dela-eta legokiekeen erantzukizuna.

7.4. Aurreko atalean ezarritakoa gertatuz gero, Nafarroako Administrazio Publikoaren Institutuko zuzendari kudeatzaileak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du hutsunea, eta horrekin ere aurreko ataletan adierazitako moduan jokatuko da.

7.5. Nahitaezko betebehar eta baldintzen frogagiriez gain, Funtzio Publikoaren Zuzendaritza Nagusiak, bere eskudantziak erabiltzeko, beste edozein agiri eska diezaioke izangaiari, eta horrek deialdi honen 7.2 oinarrian ezarritako moduan aurkeztu beharko du.

8.-Lanpostu hutsak hautatzea.

8.1. Aurreko arauan xedatu dena betetzen duten izangaiek, Nafarroako Administrazio Publikoaren Institutuak (NAPI) hartarako jartzen dien epean, aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo jakinarazten zaizkien beste batzuk, baldin eta zerbitzuaren beharrei jarraikiz horiek aldatzea erabakitzen bada.

8.2. Lanpostu hutsak aukeratzerakoan, %33ko ezgaitasun aitortua edo handiagoa duten izangaiek lehentasuna izanen dute gainerako izangaien aurretik, kontuan hartu gabe zein txandaren bidez parte hartu duten.

Hala izanagatik ere, ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, ezgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

8.3. Hautaprobak igoera txandan gainditzen dituzten izangaiek deialdiko lanpostuak betetzeko lehentasuna izanen dute txanda irekiko izangaien aldean, aurreko atalean adierazitako salbuespenarekin betiere.

9.-Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, euskara itzultzaile-interpretari lanetan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko ditu izendatuak, eta Nafarroako Foru Komunitateko funtzionarioen arloan indarra duten xedapenetan ezarri diren eskubide eta betebehar guztiak izanen dituzte. Gizarte Segurantzako araubide orokorrean afiliatuko dira, araubide horretan ezarritakoaren babesean.

Aurrekoa gorabehera, Nafarroako Administrazio Publikoen zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein montepioren eskubide pasiboetan sarturik daudenek bi aukera izanen dituzte: Nafarroako Foru Komunitateko administrazio publikoen montepioan segitzea, martxoaren 5eko 10/2003 Foru Legearen bidezko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian bizi beharra dute eta, horretarako, udalerri horretan finkatuko dute bizilekua. Administrazio organo eskudunek destinoa aldatzen ahalko dute, aplikatzekoa den araudian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako Aldizkari Ofizialean argitaratuko da eta izangai izendatuek hilabeteko epean jabetu beharko dute lanpostuez, izendapenaren jakinarazpenetik kontatzen hasita.

Aipatutako epean eta ezinbesteko kasuetan izan ezik, izangairen bat lanpostuaren jabe egiten ez bada, Foru Komunitateko Administrazioaren funtzionario izateko eskubide guztiak galduko ditu. Hala gertatzen bada, deialdiaren 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean ari delako, kasuko lanpostu hutsa ere deialdiaren 7.4 atalak agintzen duen moduan beteko da.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10.-Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, Lehendakaritza, Justizia eta Barneko kontseilariaren azaroaren 14ko 146/2005 Foru Aginduan (lanpostuak aldi baterako betetzeko kudeaketa arauak onesten dituena) eta oinarri honetan ezarritako prozedurarekin bat, aldi baterako kontratazioetarako zerrenda hauek prestatuko dira hautaketa prozesuan parte hartu eta lanposturik lortu ez duten izangaiekin:

a) Probak gainditu arren lanposturik lortu ez duten izangaien zerrenda.

b) Bigarren ariketa gainditu dutenen zerrenda, Administrazio Erroan aldi baterako kontratatzeko.

10.2. Probak gainditu arren lanposturik lortu ez duten izangaien zerrenda eta Administrazio Erroan aldi baterako kontratatzeko izangaien zerrendak.

Nafarroako Administrazio Publikoaren Institutuko Sarrerarako Hautapenaren Zerbitzuak espedientea igorri ondoren, Funtzio Publikoaren zuzendari nagusiaren ebazpenaren bidez, aldi baterako kontratazioak egiteko izangaien zerrendak onetsi eta Nafarroako Gobernuko iragarki oholean (Karlos III.aren etorbidea, 2, sarrera, Iruña) argitaratuko dira. Zerrenda horiek Interneten bidez ere kontsultatzen ahalko dira, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

10.3. Honako hau izanen da aldi baterako kontratazioen zerrendetako hurrenkera: probak gainditu arren lanposturik lortu ez dutenen kasuan, sarrerako hautaketa prozesuan lortutako puntuaziorik handienaren arabera, eta gainerako izangaien kasuan, gainditutako ariketetan lortutako puntuazioaren arabera. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

10.4. Aldi baterako kontratazioetarako izangaien zerrendetan agertzeak ez du esan nahi interesdunei onartzen zaienik 2. oinarrian ezarritako betebeharrak betetzen dituztela; izan ere, hori hurrengo atalean adierazten den bezala frogatu beharko dute.

10.5. Izangaiei deitu eta, kasua bada, haiek kontratatzeko orduan, Administrazio Erroan, honako hauetan xedatutakoari jarraikiz jokatuko da: Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuaren 88.b) artikulua eta hurrengoak; lanpostuak aldi baterako betetzeko arauak ematen dituen Lehendakaritza, Justizia eta Barneko kontseilariaren azaroaren 14ko 146/2005 Foru Agindua (144. Nafarroako Aldizkari Ofizialean argitaratua, abenduaren 2an); eta aplikatzekoak diren gainerako arauak.

Deia egiteko orduan, kontuan hartuko da Nafarroako Foru Komunitateko Administrazioaren zerbitzuko Langileen Estatutuaren Testu Bateginaren zazpigarren xedapen gehigarriaren 4. atalean ezarritakoa.

Kontratatzeko deitzen diren izangaiek bakarrik aurkeztu beharko dute dokumentazioa 2 oinarrian, tituluen inguruan, eskatzen zaiena betetzen dutela frogatzeko; hain zuzen ere kontratua formalizatzen den unean, jatorrizko agiriak edo behar bezala konpultsatutako kopiak aurkeztuz.

Eskatzen diren agiriak aipatu epean aurkezten ez dituzten izangaiek, aski justifikatutako ezinbesteko kasuetan izan ezik, eta eskatutako baldintzak betetzen ez dituztenek deialdian parte hartzetik eratorritako eskubide guztiak galduko dituzte; betiere, parte hartzeko eskabidea faltsutzeagatik legokiekeen erantzukizuna galarazi gabe.

Sarrera prozesuko eskaerak aurkezteko epea bukatzen den egunerako bete beharko dira beharkizunak eta, orobat, hautaprobak egin bitartean eta kontratazioaldiak iraun bitartean.

11.-Errekurtsoak.

Epaimahaiak ematen dituen egintza eta ebazpenen kontra, gora jotzeko errekurtsoa jartzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdiaren, oinarrien eta horiek aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, errekurritu nahi den egintza argitaratu edo jakinarazi eta biharamunetik hasita hilabeteko epean.

Hori guztia arau hauekin bat: Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikulua eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluak.

Iruñean, 2009ko abenduaren 17an.-Nafarroako Administrazio Publikoaren Institutuko zuzendari kudeatzailea, Gregorio Eguilaz Gogorza.

I. ERANSKINA

Eskaera

HAUTAPROBETAN ONARTUA IZATEKO ESKABIDEA

Deialdiaren datuak.

Sartzeko txandak.

Datu pertsonalak.

Aurkeztutako agiriak.

Ondoko hauen proba eskatzen du:

Sinatzaileak eskaera egiten du eskabide honetan adierazitako prozesuan onartua izan dadin eta adierazten du, erantzukizuna berea izanik, bertan azaltzen diren datu guztiak egiazkoak direla, deialdiaren oinarrian eskatutako beharkizun guztiak betetzen dituela eta datu horiek guztiak dokumentuen bidez frogatzeko konpromisoa hartzen duela.

(Sinadura)

.........(e)n, 20....(e)ko ......aren ....(e)an.

NAFARROAKO ADMINISTRAZIO PUBLIKOAREN INSTITUTUKO ZUZENDARI KUDEATZAILEA.

LEHENDAKARITZA, JUSTIZIA ETA BARNE DEPARTAMENTUA.

(*) Deialdiaren oinarrietan xedatutakoari jarraikiz.

II. ERANSKINA

Gai zerrenda

I. zatia.

1. gaia-Itzulpena: itzulpen motak. itzulpenaren oinarriak, prozesuak, teknikak eta baliabideak.

2. gaia.-Itzulgarritasuna eta itzulezintasuna.

3. gaia.-Munduaren ikuspegiak; kulturak eta itzulpena; hizkuntzaren unibertsalak.

4. gaia.- Baliokidetasunaren arazoa itzulpenean.

5. gaia.-Itzulpenaren azterlanen inguruko korronte teoriko garaikideak.

6. gaia.-Itzulpenaren historiako zedarri nagusiak: historian zehar itzulpenaren inguruan izandako ekarpen praktikoak eta teorikoak.

7. gaia.-Eredu traduktologikoak: Vinay-Darbelnet.

8. gaia.-Eredu traduktologikoak: V. N. Komissarov; E. A. Nida.

9. gaia.-Zuzeneko itzulpenaren teknikak: hitzez hitzekoa, kalkoa, mailegua. Zuzeneko itzulpenaren arriskuak familia bereko edo desberdineko hizkuntzen artean.

10. gaia.- Zeharkako itzulpenaren teknikak (I): transposizioa, modulazioa eta egokitzapena.

11. gaia.- Zeharkako itzulpenaren teknikak (II): zabalkuntza, murrizketa eta konpentsazioa. Itzulpena eta bertsioa.

12. gaia.- Itzulpenaren eginkizuna gizarte eta administrazio elebidunean: itzultzailearen eginkizuna. Edukiarekiko mendekotasuna eta formarekiko askatasuna.

13. gaia.- Itzulpenaren kalitatea. Berrikuspena eta zuzenketa. Amaierako irakurketa.

14. gaia.- Akatsak itzulpenean: mailak eta ebaluazioa. Zuzentzaile ortografikoak.

15. gaia.- Euskarazko itzulpenaren historia eta literaturarekin duen erlazioa. Itzulpena eta literatura euskararen historian.

16. gaia.- Euskarazko itzulpen administratiboaren historia: joerak eta gaur egungo egoera.

17. gaia.- Itzulpen administratiboaren politika XX. eta XXI. mendeetako Europan.

18. gaia.- Itzulpena Nafarroako Foru Komunitateko Administrazioan: Nafarroako Aldizkari Ofiziala, Hezkuntza Departamentua.

19. gaia.- Itzulpena Nafarroako beste administrazio publiko batzuetan: Nafarroako Parlamentuko Aldizkari Ofiziala, toki entitateak, etab.

20. gaia.-Euskaratik edo euskarara egindako itzulpenean sorturiko arazo nagusiak.

21. gaia.-Itzulpenaren berariazko arazoak euskara-gaztelania binomioan. Esparru juridikoan, teknikoan eta administratiboan gaztelaniatik euskarara itzultzea: horrekin lotutako aferak.

22. gaia.-Itzulpena hizkuntza gutxiagotuetan.

23. gaia.- Estilo eta hizkuntza liburuak. Estilo liburu nagusiak euskaraz.

24. gaia.- Itzultzailea, hizkuntzaren sortzaile eta normalizazio prozesuko protagonista.

25. gaia.- Euskaratik eta euskararako itzulpenaren ikuspegi orokorra. Gaur egungo egoera. Proiektuak eta beharrak.

26. gaia.- Interpretazioa. Itzulpena eta interpretazioa. Esan osteko eta aldibereko itzulpenaren ezaugarriak. Beste interpretazio modalitate batzuk. Rozan eredua.

27. gaia.- Interpretearen abileziak: ahotsa, keinuak, arnasketa, tonua, estiloa. Oroimena, anotazioa, ahozko jariotasuna. Hitzaldietako interpretazioa, aldez aurretiko testuarekin edo testurik gabe.

28. gaia.- Interpretazioa Justizian. Zinpeko itzultzailea. Itzulpena notariotzetan. Lanbideko sekretua. Deontologia.

29. gaia.- Itzultzailearen lan-tresnak: hiztegiak eta entziklopediak. Itzultzailearen lan-tresna elektronikoak: terminologia bankuak, Internet, posta elektronikoa, foroak...

30. gaia.- Teknologia berriak itzulpenean: itzulpen automatikoa, ordenagailuz lagundutako itzulpena, datu-baseak, glosarioak.

31. gaia.- Itzulpen memoriak: haien funtzionamendurako oinarri teorikoak. Itzulpen memoriak sortu, erabili eta mantentzea.

32. gaia.- Terminologia. Oinarrizko elementuak. Munduko terminologia banku nagusiak.

33. gaia.- Terminologia eta dokumentazioa. Terminologiaren eta dokumentazioaren arteko erlazioak. Terminologia, dokumentu modura.

34. gaia.- Terminologia eta informatika. Informatika terminologiaren zerbitzura. Terminologia, informatikarako lan-tresna.

35. gaia.- Espezialitateko hizkuntzak: kontzeptua eta irismena. Definizio irizpideak. Bariazioa.

36. gaia.- Hizkuntza arrunta eta espezialitateko hizkuntza. Alderdi linguistikoak, pragmatikoak eta funtzionalak.

37. gaia.- Terminologia eta itzulpena: alderdi teorikoak eta praktikoak.

38. gaia.- Terminologiaren problematika administrazioko itzulpenean. Euskarazko administrazioko terminologia bateratzea. Euskarazko terminologiaren egoera: Euskalterm.

39. gaia.- Testua. Testu motak: deskribapen, narrazio, azalpen, argudio eta jarraibide testuen ezaugarri orokorrak.

40. gaia.- Perpausa: definizioa. Perpaus motak, haien esanahiaren arabera: adierazpenezkoak, galderazkoak, aginduzkoak eta harridurazkoak.

41. gaia.- Perpausa. Hitzen ordena perpaus barruan. Mintzagaia, iruzkina eta galdegaia. Ordena markatua eta ordena markatu gabea.

42. gaia.- Perpaus bakuna (I). Izen sintagma: egitura. Izena eta izenordaina. Determinatzailea.

43. gaia.- Perpaus bakuna (II). Adjektibo sintagma. Aposizioa.

44. gaia.- Perpaus bakuna (III). Aditz sintagma: egitura. Komunztadura. Adberbio sintagma. Atribuzio perpausa.

45. gaia.- Perpaus bakuna (IV). Aditza: aditzen eta haien morfemen sailkapena. Aditz aspektua. Aditz laguntzailea. Aditz moduak.

46. gaia.- Deklinabidea (I). Definizioa. Forma mugatuak eta mugagabeak. Plural hurbila. Izen arruntak eta izen bereziak.

47. gaia.- Deklinabidea (II). Deklinabideko kasuak.

48. gaia.- Perpaus elkartuak (I). Motak. Perpaus juntatuen eta mendeko perpausen arteko ezberdintasunak.

49. gaia.- Perpaus elkartuak (II). Perpaus juntatuak.

50. gaia.- Perpaus elkartuak (III). Mendeko perpausak: osagarriak eta erlatibozkoak.

51. gaia.- Perpaus elkartuak (IV). Mendeko adberbio-perpausak (kausazkoak, konparaziozkoak, kontzesiozkoak, baldintzazkoak, ondoriozkoak, helburuzkoak, moduzkoak eta denborazkoak).

52. gaia.- Perpaus elkartuak (V). Lokailuak.

53. gaia.- Lexikoa (I). Hitzen sorrera. Neologismoak. Mailegua.

54. gaia.- Lexikoa (II). Hitz elkartuak: definizioa eta sailkapena. Hitz elkartuak eta jatorri erromanikoko adjektibo erreferentzialak.

55. gaia.- Lexikoa (III). Hitz elkartuak: berrelkarketa.

56. gaia.- Lexikoa (IV). Hitz eratorriak: definizioa eta sailkapena. Hitz eratorriak: aurrizkiak, artizkiak eta atzizkiak.

57. gaia.- Lexikoa (V). Hitz eratorriak: izenak, adjektiboak, adberbioak eta aditzak sortzeko atzizkiak. Jatorri erromanikoko atzizkiak eta atzizki graduatzaileak.

58. gaia.- Zabalkuntza semantikoa. Lexikoaren berrezarpena. Berrikuntza fonologikoa.

59. gaia.- Ortografia: puntuazio zeinuak. Maileguen eta hitz elkartu eta eratorrien idazkera.

60. gaia.-Letra larrien eta xeheen erabilera. Euskaltzaindiaren arauak eta EIMAren proposamenak.

61. gaia.- Laburdurak, siglak eta sinboloak euskaraz.

62. gaia.- Estiloa: euskaraz estilo egokia lortzeko oinarrizko gomendio nagusiak.

63. gaia.- Kalko okerrak. Euskaraz kalko okerrak saihesteko formula egokiak.

64. gaia.- Euskaltzaindiaren lana azken 30 urteotan: Orotariko Euskal Hiztegia, Hiztegi Batua, Euskal Gramatika. Lehen urratsak.

65. gaia.-Euskal dialektologia. Literatura euskalkiak eta herri-aldaerak. Nafarroako euskalkiak. Analisi diakronikoa eta sinkronikoa. Galera eta berreskurapena. Gaur egungo egoera. Azken ikerketa eta proposamenak.

66. gaia.- Administrazio hizkera euskaraz eta beste hizkuntza batzuetan. Itzulpena administrazio euskararen normalizazioan. Administrazio testuen itzulpena: zehaztasuna eta komunikagarritasuna; joerak.

67. gaia.- Hizkera estandarraren eta administrazio hizkeraren arteko loturak, eta bien berezitasunak.

68. gaia.- Administrazioko euskararen normalizazioa. Ortotipografia.

69. gaia.- Hizkuntza-aholkularitzarako zerbitzu nagusiak euskaraz: Jagonet, Duda-muda, Ehulku, Elhuyar.

70. gaia.- Perpausaren antolamendua itzulpenean. Ordena logikoa eta estilistikoa.

71. gaia.- Euskararen egoera juridikoa Nafarroako Foru Komunitatean. Espainiako 1978ko Konstituzioa. Nafarroako Foru Eraentza Berrezarri eta Hobetzeari buruzko Lege Organikoa. Euskarari buruzko 18/1986 Foru Legea eta ondorengo arau-garapena.

72. gaia.- Euskara Nafarroan. Analisi diakronikoa eta sinkronikoa. Galera eta berreskurapena. Gaur egungo egoera.

73. gaia.- Euskararen egoera Nafarroan: azterlan soziolinguistiko nagusiak.

74. gaia.- Euskara Nafarroako hezkuntza sisteman.

75. gaia.- Soziolinguistikaren oinarrizko kontzeptuak: elebitasuna, diglosia, hizkuntza gutxiengoak, hizkuntza gutxiagotuak. Euskara, hizkuntza gutxiagotua.

76. gaia.-Hizkuntza normalizazioa. Hizkuntza baten normatibizazioa eta estandarizazioa.

77 . gaia.-Normalizazio ereduak: a) idazkera bateratua, b) dialekto baten hedapena. Hizkuntza baten ezaguera eta erabilera.

78. gaia.-Hizkuntza normalizazioa Administrazioan. Euskarari buruzko Legean hasi eta gaur egun arteko arau-garapena.

79. gaia.- Euskarabidea erakunde autonomoa: egitura, eskumenak eta funtsezko programak. Euskararen Nafar Kontseilua.

80. gaia.- Toponimia eta normalizazioa. Toponimia Nafarroan.

II. zatia.

1. gaia.-Espainiako 1978ko Konstituzioa: printzipio orokorrak. Funtsezko eskubide eta betebeharrak. Botere Judiziala. Gorte Nagusiak: osaera eta eginkizunak. Gobernua eta Estatuko Administrazioa. Auzitegi Konstituzionala: osaera, antolakuntza eta eskumenak.

2. gaia.-Europar Batasuna. Parlamentua. Europako Kontseilua. Europako Batzordea. Kontseilua (ministroena). Justizia Auzitegia. Beste erakunde batzuk.

3. gaia.-Europar Batasuneko ordenamendu juridikoaren iturriak: jatorrizko zuzenbidea eta zuzenbide eratorria.

4. gaia.-1978ko Konstituzioaren lehen xedapen gehigarria. Nafarroako Foru Eraentza Berrezarri eta Hobetzeari buruzko Lege Organikoa: izaera eta esanahia. Atariko titulua. Nafarroaren eskumenak.

5. gaia.-Nafarroako Parlamentua edo Gorteak. Nafarroako Comptos Ganbera. Arartekoa.

6. gaia.-Nafarroako Gobernua. Funtzioak. Osaera, izendapena, eratzea eta kargu-uztea. Eskudantziak eta eskumenak. Funtzionamendua. Laguntza eta sostengu organoak. Nafarroako Parlamentuaren erantzukizun politikoa, kontrola eta desegitea. Nafarroako Gobernuko lehendakaria.

7. gaia.-Nafarroako Foru Komunitateko Administrazioa. Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritako printzipio orokorrak. Herritarren eskubideak Foru Komunitateko Administrazioarekiko harremanetan. Antolaketa: printzipio nagusiak eta egitura organikoa, kide anitzeko organoak eta administrazio organoen eskumenak.

8. gaia.-Administrazio publikoen araubide juridikoaren printzipio orokorrak. Administrazio publikoen organoak. Prozedura administratiboarekiko interesdunak.

9. gaia.-Administrazioaren xedapenak eta egintzak. Egintza administratiboen betebeharrak. Egintzen eraginkortasuna. Deuseztasuna eta deusezgarritasuna.

10. gaia.-Prozedura administratiboen xedapen orokorrak: prozeduraren abiaraztea, antolamendua, instrukzioa eta amaiera. Bide administratiboko egintzen berrikuspena: ofiziozko berrikuspena eta administrazio errekurtsoak.

11. gaia.-Kontratu Publikoei buruzko Foru Legea: aplikaziorako arau orokorrak eta eremua. Kontratistak. Administrazio publikoen kontratu guztietarako xedapenak. Esleipenaren aurreko jarduketak.

12. gaia.-Nafarroako Administrazio Publikoen Zerbitzuko Langileen Estatutua. Langile motak. Funtzionario publikoak hautatzea. Egoera administratiboak. Funtzionarioen eskubideak, betebeharrak eta bateraezintasunak. Ordainsariak.

13. gaia.-11/2007 Foru Legea, apirilaren 4koa, Nafarroako Foru Komunitateko Administrazioan Administrazio Elektronikoa ezartzekoa.

14. gaia.-Abenduaren 29ko 21/2005 Foru Legea, Politika Publikoak eta Zerbitzu Publikoen Kalitatea Ebaluatzeari buruzkoa.

15. gaia.- Abenduaren 13ko 15/1999 Lege Organikoa, Datu Pertsonalak Babesteari buruzkoa.

Oharra: gai guztiak bat etorriko dira deialdi hau Nafarroako Aldizkari Ofizialean argitaratzen den egunean indarrean den legeriarekin.

Iragarkiaren kodea: F0928764