17. ALDIZKARIA - 2010eko otsailaren 8a

1. NAFARROAKO FORU KOMUNITATEA

1.7. BESTELAKOAK

11/2010 FORU AGINDUA, urtarrilaren 22koa, Herri Lan, Garraio eta Komunikazioko kontseilariak emana. Honen bidez behin-behineko onespena ematen zaio "NA-134 errepidean (Ebroko Ardatza) Valtierrako eta Arguedasko saihesbidea egiteko lanetarako" maileguaren eta zabortegiaren proiektuari, eta jendaurrean jartzen da, Ingurumen eraginaren azterlanarekin batera, Ingurumen eraginaren adierazpenaren eta ukitutako ondasun eta eskubideen ondorioetarako.

Proiektu, Trenbide eta Lan Hidraulikoen Zerbitzuak aditzera eman du ezen, Herri Lan, Garraio eta Komunikazioko kontseilariaren abenduaren 31ko 156/2007 Foru Aginduaren bidez, "NA-134 errepidean (Ebroko Ardatza) Valtierrako eta Arguedasko saihesbidea egiteko proiektua" behin-behinekoz onetsi zela, eta jendaurrean jarri eta ukitutako toki entitateei entzunaldia eman zitzaiela.

Herri Lan, Garraio eta Komunikazioko kontseilariak, maiatzaren 7ko 42/2009 Foru Aginduaren bidez, "NA-134 errepidean (Ebroko Ardatza) Valtierrako eta Arguedasko saihesbidea egiteko proiektua" behin betiko onetsi, eta jendaurrean egoteko eta ukitutako toki entitateei entzunaldia emateko fasea ebatzi zuen.

Nafarroako Errepideei buruzko martxoaren 23ko 5/2007 Foru Legearen 20.6 artikuluan ezarritakoarekin bat, eraikitze proiektuen behin betiko onespenak berarekin ekarriko du onura publikoaren deklarazioa eta ondasunak okupatu eta eskubideak erosi beharra, desjabetzearen, aldi baterako okupazioaren edo bide-zorrak ezartzearen edo aldatzearen ondorioetarako.

Nafarroako Gobernuak, 2009ko ekainaren 1ean, presakotzat jo zuen proiektuak ukitutatako ondasun eta eskubideen okupazioa, Nahitaezko Desjabetzeari buruzko Legearen 52.1 artikuluan ezarritako ondorioetarako.

Ingurumenaren eta Uraren Zuzendaritza Nagusiak 2009ko abuztuaren 3an egindako txostenean azaltzen zenaren arabera, proiektuan proposatutako mailegua 200.000 m3-tik gorakoa izatekoa zen urtean eta, beraz, proiektu bereizi bat behar zuen, bai eta Ingurumen eraginaren adierazpena ere.

Horrenbestez, NA-134 errepidean (Ebroko Ardatza) Valtierrako eta Arguedasko saihesbidea egiteko lanetarako maileguari eta zabortegiari buruzko proiektua eta Ingurumen eraginaren azterlana prestatu dira.

Proiektuak deskribatzen ditu materiala ateratzeko egin beharreko lanak, material ezegokien botatzea eta eremua lehengoratzeko plana. Proiektu horretan sartu da mailegu eremura iristeko aukerei buruzko azterlana, mailegu horrek ukitutako finkak okupatu aurreko aktetan jasotakoarekin bat. Aukeren azterlan horrek erakusten du mailegu eremura iristeko bide egokiena Senda Vivako errepidea dela. Hori horrela, 41 tona arteko kamioiak pasatzeko zortasuna ezarri behar da Senda Vivako errepidearen tarte batean (titularra Arguedasko Udala da), hau da, NA-134 errepidearekin (18+265 k.p.) gurutzatzen den puntuaren eta mailegu eremuaren artean, gutxi gorabehera 3,4 km.

Errepide hori orain arte bezala erabiltzen ahalko dute bertaratzen direnek, bai eta obrako ibilgailuek ere Valtierra-Arguedas saihesbidea egin bitartean. Errepideko obrak bukatutakoan, Arguedasko Udalari itzuliko zaio, orain dituen baldintza berberetan.

Horretaz gainera, Arguedasko 5. poligonoko 5113 B azpilurzatian (titularra Arguedasko Udala da) 200 metro koadroko aldi bateko okupazioa eginen da, errepidetik mailegu eremura iristeko.

Ingurumenaren eta Uraren zuzendari nagusiak aldeko txostena eman du, proiektua ingurumenaren aldetik egokia dela adierazteko.

Nafarroako Errepideei buruzko martxoaren 23ko 5/2007 Foru Legearen 20. artikuluko 2. eta 3. idatz-zatietan ezarritakoarekin bat, bidezkoa da proiektua behin-behinekoz onestea eta jendaurrean jartzea.

Era berean, jendaurrean jarri behar da Ingurumen eraginaren azterlana, Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamendua onesten duen abenduaren 28ko 93/2006 Foru Dekretuaren 51.2 artikuluarekin bat.

Horrenbestez, Proiektu, Trenbide eta Lan Hidraulikoen Zerbitzuak jakinarazi eta proposatu duenarekin bat, eta Herri Lan, Garraio eta Komunikazio Departamentuaren egitura organikoa ezartzen duen otsailaren 24ko 47/2005 Foru Dekretuaren 2.2 artikuluaren bidez eskuratu ditudan eskudantziak erabiliz,

AGINDU DUT:

1. Behin-behinez onestea "NA-134 errepidean (Ebroko Ardatza) Valtierrako eta Arguedasko saihesbidea egiteko lanetarako" maileguaren eta zabortegiaren proiektua.

2. Mailegu eremura iristeko bideagatik ukituko diren ondasun eta eskubideei dagokienez, aldi baterako bide-zorra ezartzeko espedientea hastea, azalpen zatian adierazitako moduan.

3. Proiektua eta Ingurumen eraginaren azterlana hilabetez jendaurrean jartzea, Ingurumen eraginaren adierazpenaren eta ukitutako ondasun eta eskubideen ondorioetarako. Bidezkotzat jotzen diren ohar edo alegazioak egiten ahalko dira idatziz epe horretan, bai eta akatsak zuzentzeko datuak aurkeztu ere. Interesdunek eskura izanen dituzte proiektua eta Ingurumen eraginaren azterlana Nafarroako Gobernuko Herri Lan, Garraio eta Komunikazio Departamentuko Proiektu, Trenbide eta Lan Hidraulikoen Zerbitzuko eta Arguedasko Udaleko bulegoetan.

4. Foru agindu hau Nafarroako Aldizkari Ofizialean eta Nafarroan gehien zabaltzen diren egunkarietako batean argitaratzea.

5. Foru agindu hau jakinaraztea Proiektu, Trenbide eta Lan Hidraulikoen Zerbitzuari, Desjabetze Atalari eta Arguedasko Udalari, behar diren ondorioak izan ditzan.

Iruñean, 2010eko urtarrilaren 22an.-Herri Lan, Garraio eta Komunikazioko kontseilaria, Laura Alba Cuadrado.

Iragarkiaren kodea: F1001260