4. PROZEDURA JUDIZIALAK
IRUÑEKO LEHEN AUZIALDIKO 5. EPAITEGIA
Enkante publikoa. 2527/2009 hipoteka-betearazpena
María Victoria Baztan Maisterrak, idazkari judizialak,
Aditzera ematen dut: Nafarroako Aurrezki Kutxa eta Bahitura Etxeak eskaturik, Francisco Javier Hernández Catalánen eta María Josefa Martínez Mejíasen aurka, organo judizial honetan bideratzen ari diren 2527/2009 hipoteka-betearazpenaren autoetan, erabaki da ediktu honen atal nagusian azaltzen diren ondasun higiezinen enkante publikoa egitea, eta halaxe adierazten da ekitaldia organo honetako entzunaldi-aretoan 2010eko abenduaren 20ko goizeko hamarretan egin dadin, baldintza hauei jarraikiz:
1. Posturak egiteko baldintzak: enkantean parte hartzeko, lizitatzaileek beren nortasuna frogatu beharko dute. Enkantearen baldintzak ezagutzen dituztela aitortu beharko dute. Gordailu eta kontsignazioen 3162.0000.05.2527.09 kontuan enkantean jartzen diren ondasunen balioaren %30 sartu izanaren gordekina aurkeztuko dute edo, bestela, kopuru hori adinako banku-abala jarri izanarena. (Gordailu hori osorik edo partez hirugarren batengandik jasotako diruarekin egiten bada, halaxe adierazi beharko da diru sarreraren gordekinean). Alderdi betearazleak enkantean parte har dezake, bakar-bakarrik, lizitatzailerik badago. Kasu horretan, ez du enkantean parte hartzeko dirurik jarri beharko. Posturak egin eta errematea hirugarren bati lagatzeko ahalmena alderdi betearazleari dagokio, ez beste inori (Prozedura Zibilari buruzko Legearen 647., 669.1 eta 666. artikuluak).
2. Idatzizko posturak. Idatzizko posturak enkantea iragartzen denetik hura hasi arte egin daitezke. Gutun-azal itxietan aurkeztuko dira, adierazitako baldintza berberetan. Gutun-azalak enkantearen hasieran irekiko dira. Gutun-azaletako posturak jendaurrean eginen dira, besteekin batera, eta ahoz egiten direnen ondorio berberak izanen dituzte (Prozedura Zibilari buruzko Legearen 648. artikulua).
3. Titulazioa eta zamak. Enkantean parte hartzeak berarekin dakar posturagileek autoetan agertzen den titulazioa askitzat hartzea edo, hala bada, titulaziorik ez dagoela onartzea. Era berean, auzi-jartzailearen kredituaren aurreko zamek eta kargek bere horretan segitzen dutela onartuko dute, halakorik bada, eta errematea beren alde esleituz gero, kredituen erantzukizunean subrogatuko direla.
Erregistroko ziurtagiriak eta, hala badagokio, ondasunen titulazioa epaitegiko idazkaritzan daude ikusgai (Prozedura Zibilari buruzko Legearen 668. eta 669.2 artikuluak).
4. Errematea onesteko baldintzak. Onartzen diren posturak.
1.1. Posturarik onena enkantean jarri den ondasunaren balioaren %70ekoa edo handiagoa bada, errematea posturagile onenaren alde onetsiko da, eta horrek 20 eguneko epea izanen du jarritako diruaren eta errematearen azkeneko prezioaren arteko aldea ordaintzeko.
1.2. Postura guztiak enkantean jartzen den ondasunaren balioaren %70etik gorakoak badira, baina behar adinako banku- edo hipoteka-bermea aurkeztu eta epeka ordaintzea eskaintzen badute, postura horietatik onenaren aldeko errematea onesten ahalko da, salbu eta alderdi betearazleak hurrengo 20 eguneko epean eskatzen badu higiezina berari esleitzea enkantearen hasierako balioaren %70 ordainduta.
1.3. Enkanteko posturarik onena enkantean jartzen den ondasunaren balioaren %70etik beherakoa bada, honako baldintza hauek bete beharko dira posturarik onenaren aldeko errematea onesteko:
Posturarik onena tasazio-balioaren %50etik gorakoa izatea edo, baxuagoa bada, abiarazitako betearazpenaren zenbatekoa berdintzea gutxienez, interesetarako eta kostuetarako aurreikusten den dirua barne.
Betearazpenpeko alderdiak ez erabiltzea PZLaren 670. artikuluaren 4. lerroaldean aitortzen zaion ahalmena (postura hobetzen duen hirugarren bat aurkeztea).
Edo aurreko inguruabarra gertatu gabe, alderdi betearazleak ez eskatzea higiezina tasazio-balioaren %70 ordainduta esleitzea edo kontzeptu guztien ordainean zor zaion diruaren truke, betiere diru kopuru horrek posturarik onena gainditzen badu (Prozedura Zibilari buruzko Legearen 670. artikulua).
5. Posturak egin ahal izateko jarritako gordailuen xedea. Enkantea bukatuta, posturagileei jarritako dirua itzuliko zaie, posturagile onenari izan ezik. Gainerako posturagileek eskatzen ahalko dute bakoitzak jarritako dirua epaitegiaren esku gelditzea, erremategileak gainerako dirua ordaindu ezean, haren ondotik daudenen aldeko errematea onets dadin, egindako posturen arabera. (Prozedura Zibilari buruzko Legearen 652. artikulua).
6. Enkantearen porrota. Erremategileak falta den dirua ezarritako epean ordaintzen ez badu edo bere erruagatik salmenta ondoriorik gabe gelditzen bada, egindako gordailua galduko du. (Prozedura Zibilari buruzko Legearen 653. artikulua).
7. Berariaz adierazten da ediktu honek jakinarazpen gisa balioko duela, betearazpenpekoei enkantea beste modu batean jakinarazterik ez badago.
Etxebizitza, bere eraikineko 2. atariko hirugarren solairuan kokatua, 3 motakoa, D letraz seinalatua, eskaileran gora igo eta eskuinetara laugarren dagoena. 90 metro karratuko azalera erabilgarria du. Atondoa, korridorea, sukaldea, esekilekua, jangela-egongela, hiru logela, bainugela eta garbigela ditu. Mugakideak, eskailera-burutik ikusita: aurrean, gune komuna eta atari bereko C etxebizitza; eskuinean, atari bereko C etxebizitza eta Juslarrocha kalea; ezkerrean, barneko plaza eta gune komuna; eta hondoan, eraikineko 4. atariko A letrako etxebizitza.
Eranskin hauek ditu: eraikineko sotoan dagoen garajeko 99. plaza, 22,45 metro karratuko azalera erabilgarria duena, errodadurarako guneak barne; eta eraikineko sotoko 14. trastelekua, 4,10 metro karratuko azalera erabilgarria duena.
Gaur egun etxebizitza honela dago seinalatuta: Juslarrocha kalea 16, hirugarren solairua, D aldea.
Kalifikazioa: babes ofizialeko etxebizitza, araubide berezikoa, saltzekoa, 2005eko uztailaren 21eko 31/1-003/03 espedientearen arabera.
Iruñeko 1. Jabetza Erregistroan inskribatuta dago: 1.320. liburukia, 791. liburua, 111. orria, 38.400. finka. Balorazioa enkanterako: 88.000 euro.
Iruñean, 2010eko urriaren 18an.-Idazkari judiziala, María Victoria Baztan Maisterra.
Iragarkiaren kodea: J1017107
