Iragarkia

118. ALDIZKARIA - 2010eko irailaren 29a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

DEIALDIA, Nafarroako Administrazio Publikoaren Institutuko zuzendari kudeatzaileak irailaren 13an emandako 209/2010 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko nekazaritzako ingeniari tekniko izateko 8 lanpostu oposizio bidez betetzeko.

Nafarroako Administrazio Publikoaren Institutuko zuzendari kudeatzaileak irailaren 13an emandako 209/2010 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko nekazaritzako ingeniari tekniko izateko 8 lanpostu oposizio bidez betetzeko deialdia onetsi zen.

Hautapen prozesua honako hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsia, aipatutako estatutua garatu eta gauzatzeko Sarrera Erregelamendua, gainerako aplikazio arauak eta deialdi honen,

oinarriak

1.-Deialdiaren xedea.

1.1. Deialdi honen xedea da nekazaritzako ingeniari tekniko izateko 8 lanpostu oposizio bidez betetzea. Lanpostuak funtzionarioen araubidekoak eta B mailakoak dira, Iruñean aritzekoak, eta ondorengo txandetan banatuta daude:

-4 lanpostu, txanda irekian.

-4 lanpostu, igoera txandan.

1.2. Deialdiko lanpostu hutsak hauek dira:

Sei, Landa Garapeneko eta Ingurumeneko Departamentuan:

-2, Nekazaritza eta Abeltzaintza Zuzendaritza Nagusian. Plantillako zenbakiak: 2504 eta 2266, Iruñean aritzeko.

-4, Landa Garapeneko Zuzendaritza Nagusian. Plantillako zenbakiak: 2455, 2178, 2297 eta 3773, Iruñean aritzeko.

Bat, Ekonomia eta Ogasun Departamentuan:

1, Nafarroako Zerga Ogasunean. Plantillako zenbakia: 1244, Iruñean aritzeko.

Bat, Herri Lan, Garraio eta Komunikazio Departamentuan:

1, Herri Lan Zuzendaritza Nagusian. Plantillako zenbakia: 3958, Iruñean aritzeko.

1.2. Igoera txandako lanpostuak hutsik geldituz gero, izangaiek ez dutelako hautaprobak gainditzeko behar den gutxieneko puntuazioa lortu, txanda irekikoei gehituko zaizkie.

Bestalde, igoera txandan hutsik dauden lanpostuak baino izangai gehiagok gainditzen badituzte probak, txanda horretan probak gainditu arren lanposturik eskuratzen ez dutenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta lortutako azken puntuazioaren arabera.

Era berean, deialdiaren 7.2 oinarrian agiriak aurkezteko ezarritako epea bukatzen denean, deialdiaren 2.1.2 oinarriko betebehar berariazkoak betetzen ez dituzten igoera txandako izangaiek aukera izanen dute txanda irekiko lanpostuak eskuratzeko, aurreko lerroaldean adierazitako modu berean.

1.3. Lanpostuen ordainsariak hauek izanen dira: uztailaren 4ko 158/1984 Foru Dekretuaren bidez onetsitako Ordainsarien Behin-behineko Erregelamenduan B mailarentzat oro har ezarritakoak eta aplika daitezkeen gainerako xedapenetan kasu bakoitzerako ezartzen direnak.

1.4. Halaber, deialdi honen bidez, hautapen prozesuan parte hartu eta lanposturik lortzen ez duten izangaiekin aldi baterako kontratatuak izateko izangai zerrenda hauek osatu nahi dira:

-Probak gainditu arren, lanposturik lortu ez duten izangaien zerrenda, departamentu eta erakunde autonomo guztietarako.

-Administrazio Erroan aldi baterako kontratatzeko izangaien zerrendak.

Izangaien zerrenda horiek deialdi honen 10. oinarrian xedatutakoaren arabera onetsi eta kudeatuko dira.

2.-Izangaiek bete beharreko baldintzak.

2.1. Oposizio honetan onartuak izateko, izangaiek, eskaerak aurkezteko epea bukatzen den egunean eta agiriak aurkezteko epea bukatzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak:

a) Espainiarra izatea, edo Europar Batasuneko beste estatu batekoa edo, Europar Batasunak sinatu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, parte har dezakete espainiarren eta Europar Batasuneko beste estatuetako herritarren ezkontideek, edo aipatu nazioarteko itunen aplikazio eremuan sartutako estatuetako herritarren ezkontideek, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.

b) Hamasei urte beteta izatea eta erretiroa nahitaez hartzeko gehieneko adina gainditua ez izatea.

c) Nekazaritzako ingeniari teknikoaren titulua edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lortutako tituluak badira, homologazioaren frogagiria eduki beharko da.

d) B motako ibilgailuen gidabaimena izatea.

e) Bete behar dituen eginkizunetan aritzeko adinako gaitasun fisikoa eta psikikoa izatea.

f) Eginkizun publikoetan aritzeko ezgaitua edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute ez dutela diziplina zehapenik edo zigor penalik beren estatuko funtzio publikoan sartzea eragozten dienik.

2.1.2. Igoera txandako izangaiek bete beharreko baldintza berariazkoak:

Igoera txandako izangaiek, aurreko atalean adierazitako baldintzez gain, hauek ere bete beharko dituzte:

a) Nafarroako edozein administrazio publikotako langile finkoa izatea, edo Nafarroako Foru Komunitateariari transferitutako Justizia Administrazioaren zerbitzuei atxikitako langile finkoa, eta abiapuntuko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio publikoetan bost urteko antzinatasun aitortua izatea, Nafarroako Polizia Kidegoetako kideen kasuan izan ezik, horiek frogatu beharko baitute zortzi urtez benetan eman dituztela zerbitzuak kidego horietan.

Nafarroako Administrazio Publikoen Zerbitzuko Langileen Estatutuaren zortzigarren xedapen gehigarrian ezarri dena aplikatuz, igoera txandan parte hartzeko gainerako baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Izendatua izateko proposatzen den izangaiak betebehar horiek frogatu beharko ditu, deialdiaren 7.2 atalean ezarritako epean eta moduan. Salbuespen izanen dira agiri horiek eskabidearekin batera aurkeztu behar dituzten izangaiak, 3. oinarriarekin bat.

3.-Eskabideak aurkeztea eta tasak ordaintzea.

3.1. Tasak.

Azterketa eskubideengatik eta espedientea formalizatzeko, 40 euroko tasa ordaindu beharko da. Azterketa eskubideen tasa ordaintzen ez bada, baztertu eginen da izangaia.

Honako hauek ez dute tasarik ordaindu beharko:

a) %33ko edo hortik gorako desgaitasun aitortua duten pertsonak, hala onartu bazaie.

b) Deialdia argitaratu aurretik hilabetez gutxienez lan eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskaini zaizkien lan egokiei uko egin ez izatea eta lanbide sustapen, prestakuntza edo aldaketarako ekintzetan parte hartzeari uko egin ez izatea, justifikatutako kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

Lan eskatzailea dela frogatzeko, dagokion enplegu bulegoak emandako agiria aurkeztu beharko du. Bertan, lan eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diela uko egin handik eskainitako lan egokiei, ezta lanbide sustapen, prestakuntza edo aldaketarako ekintzetan parte hartzeari ere, justifikatutako kasuetan izan ezik.

Interesdunaren aitorpenaren bidez frogatuko da ez duela hilabetero lanbide arteko gutxieneko soldatatik gorako diru-sarrerarik. Aitorpen eredua Nafarroako Gobernuko Informazio Bulegoan eskuratzen ahalko da edo, bestela, Interneten bidez, arestian emandako helbidean.

Sistema hauetako bat erabiliz ordaintzen ahalko da tasa hori:

-Telematika bidez, 3.2 oinarriko A.1. letran adierazitako moduan.

-Behar den bezala betetako ordainketa gutunaren bidez, Nafarroako Foru Komunitateko banku entitateetan ordaintzeko. Ordainketa gutunaren eredua Interneten dagoen deialdiaren aipuan dago, www.navarra.es helbidean, "Zerbitzuak", "Enplegu Publikoa" atalean.

-Banestoko (Banco Español de Crédito) 0030 8124 87 0870002271 kontuan eskudirutan edo bankuko transferentzia bidez ordainduz; horrelakoetan, ordainagirian datu hauek jarri beharko dira nahitaez:

-Izangaiaren izen-deiturak.

-NANa/IFZ.

-Ordainketa zein kontutan egiten den, haren zenbakia.

-Kontzeptua: oposizioak.

-Deialdiaren xedeko lanpostua.

3.2. Eskabideak.

Eskabideak deialdi honen eranskineko ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eskabidearen eredua Nafarroako Gobernuaren edozein erregistro bulegotan dago eskuragarri. Interneten bidez ere lortzen ahal da, www.navarra.es helbidean, bai argitaratzen den aldizkari ofizialetik abiatuta, bai atal honetatik abiatuta: "Zerbitzuak", "Enplegu Publikoa".

Deialdian parte hartzeko eskabideak hura Nafarroako Aldizkari Ofizialean argitaratu eta biharamunetik hasita, hogeita hamar egun naturaleko epean aurkeztu beharko dira. Eskabideak aurkezteko epea luzaezina da.

Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

Aurkezteko, baliabide hauetako edozein erabil daiteke:

A) Bide telematikoa.

A.1. Internet bidez, deialdi honen fitxan dagoen "Inskripzioa eta ordainketa telematikoa" izeneko estekan sartuta, Nafarroako Atariaren "Zerbitzuak", "Enplegu Publikoa" atalean, www.navarra.es helbidean.

Aurkezteko eta ordaintzeko modu hau ezin izanen da erabili tasak ordaintzetik salbuesten duen frogagiria aurkeztu behar denean, ezta 3.3 oinarriko Bi eta Hiru zenbakietan aipatzen diren kasuetan ere.

A.2. Nafarroako Foru Komunitateko Administrazioaren Erregistro Orokor Elektronikoan, Nafarroako Gobernuaren web atarian eskura baitago.

B) Aurrez aurre.

Deialdian parte hartzeko eskabideak Nafarroako Gobernuko Erregistro Orokorrean (Karlos III.aren etorbidea, 2, 31002 Iruña) edo Nafarroako Gobernuaren gainerako erregistro bulegoetako edozeinetan (zerrenda 2008ko 14. Nafarroako Aldizkari Ofizialean argitaratu zen, urtarrilaren 30ean) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazi diren bideetakoren bat erabiliz.

Eskabidea posta bulegoan aurkeztea aukeratuz gero, gutun-azalak irekita egon beharko du, postetxeko langileek data eta zigilua jar diezazkioten ziurtatu eta Nafarroako Gobernuaren Erregistro Orokorrera (Karlos III.aren etorbidea, 2; 31002 Iruña) igorri aurretik.

3.3. Eskabidearekin batera aurkeztu beharreko agiriak.

Bat.-Espedientea formalizatzeko eta azterketa eskubideengatik tasa ordaindu izanaren frogagiria.

Bi.-Deialdian igoera txandan parte hartu nahi duten izangaiek, lehengoaz gainera, deialdi honen 2.1.2 oinarrian jasotzen diren betebeharrak betetzen dituztela frogatzen duen agiria gehitu beharko diote eskabideari, baldin eta Nafarroako Foru Komunitateko Administrazioa ez den Nafarroako beste administrazio publikoren bateko langile finkoak edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak badira.

Hiru.-Desgaitasunak dituzten pertsonentzako erreserba txandan onartuak izateko, baita 3.1 oinarriaren (tasak ordaintzearen salbuespena) a) atalaren eta 8. oinarriaren (lanpostuak aukeratzeko lehentasuna) ondorioetarako eta denborak eta baliabideak egokitzeko eskaria egiteko ere, %33ko edo hortik gorako desgaitasuna duten izangaiek hori frogatu beharko dute, agiri hauetariko baten jatorrizkoaren edo kopia konpultsatuaren bidez:

-IMSERSOk edo autonomia erkidegoan eskumena duen organoak luzatutako ziurtagiria.

-Gizarte Segurantzako Institutu Nazionalaren ebazpena, prestazio bat jasotzeko eskubidea onartzen diona hauetakoren bat izateagatik: ezintasun iraunkor osoa, erabateko ezintasun iraunkorra edo baliaezintasun handia.

Desgaitasuna duten izangaiek probak egiteko denboren eta baliabideen egokitzapenak eskatzeko, hala adierazi beharko dute eskabidean, eta aparteko orri batean azaldu beharko dute nolako desgaitasuna duten eta zein egokitzapen eskatzen duten. Egokitzapenak eskatzeko bada eredu bat interesdunen eskura www.navarra.es web orrian, "Zerbitzuak", "Enplegu Publikoa" atalean, deialdiaren aipuan.

4.-Izangaien onarpena eta erreklamazioak.

4.1. Eskabideak aurkezteko epea bukatuta, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa), ebazpena emanen du izangai onartuen eta baztertuen behin-behineko zerrenda onesteko, eta Nafarroako Aldizkari Ofizialean argitara dadila aginduko.

4.2. Behin-behineko zerrenda Nafarroako Aldizkari Ofizialean argitaratu eta biharamunetik hasita, izangai baztertuek hamar egun balioduneko epea izanen dute erreklamazioak aurkezteko eta, akatsik egin badute, haiek zuzentzeko.

4.3. Erreklamazioak aurkezteko epea bukaturik eta haien gaineko ebazpena eman ondoren, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa), ebazpena emanen du, izangai onartuen eta baztertuen behin betiko zerrenda onesteko, eta Nafarroako Aldizkari Ofizialean argitara dadila aginduko.

4.4. Izangaiei ez zaizkie azterketa egiteko eskubideak itzuliko, baldin eta beraiei egotzitako arrazoiengatik baztertzen badira.

5.-Epaimahaia.

5.1. Epaimahaia honako kide hauek osatuko dute:

-Mahaiburua: Juan Pablo Rebolé Ruiz jauna, Landa Garapeneko eta Ingurumeneko Departamentuko Nekazaritzako Azpiegituren Ataleko burua.

-Ordezkoa: José Ignacio Azcoiti Eseverri jauna, Landa Garapeneko eta Ingurumeneko Departamentuko Nekazaritzako Azpiegituren Zerbitzuko Ureztaketa Ataleko burua.

-Mahaikidea: Silvia Borruel Sainz andrea, Landa Garapeneko eta Ingurumeneko Departamentuko Barne Auditoretza Ataleko burua.

-Ordezkoa: Manuela Aleu Bonaut andrea, Landa Garapeneko eta Ingurumeneko Departamentuko Nekazaritzako Merkatuen Erregulazio eta Esku-hartze Ataleko burua.

-Mahaikidea: Sonia Fuentetaja González andrea, Landa Garapeneko eta Ingurumeneko Departamentuko Nekazaritzako Ustiategiak Sustatzeko Ataleko burua.

-Ordezkoa: Ainhoa Bilbao Izco andrea, Landa Garapeneko eta Ingurumeneko Departamentuko Nekazaritzako Ustiategiak Sustatzeko Ataleko nekazaritzako ingeniari teknikoa.

-Mahaikidea: langileen ordezkari bat, Administrazio Erroko Langileen Batzordeak proposaturik izendatua.

-Ordezkoa: langileen ordezkari bat, Administrazio Erroko Langileen Batzordeak proposaturik izendatua.

-Mahaikide idazkaria: Javier Lizarbe Chocarro jauna, Landa Garapeneko eta Ingurumeneko Departamentuko Idazkaritza Tekniko Nagusiko Nekazaritza eta Landa Garapeneko Araubide Juridikoaren Ataleko burua.

-Ordezkoa: Jesús María Munárriz Irigoyen jauna, Zuzenbideko lizentziaduna, Landa Garapeneko eta Ingurumeneko Departamentuko Idazkaritza Tekniko Nagusiari atxikia.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek egon beharko dute bertan.

5.3. Epaimahaiko kideek ez dute parte hartuko, baldin eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretako batean badaude, eta organo dei egileari hala jakinaraziko diote.

Izangaiek, halaber, zilegi dute epaimahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.-Oposizioa nola eginen den.

6.1. Oposizioa 2011ko urtarrilean hasiko da. Onartu eta baztertuen behin betiko zerrenda onesten duen ebazpenean berean finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

-Lehenengo ariketa: teorikoa. Gai zerrendako gaiei buruzko 80 galdera erantzun beharko dira idatziz. Galdera bakoitzak erantzun batzuk izanen ditu aukeran, baina bat bakarra izanen da zuzena. Erantzun okerrengatik puntuak kenduko dira. Ariketa egiteko 3 ordu emanen dira gehienez.

-Bigarren ariketa: teorikoa. Hiru gai garatu beharko dira idatziz, gai zerrendako hiru zatietako bakoitzeko bat. Gehienez ere 5 ordu izanen dira horretarako. Horretarako, epaimahaiak zozketaz aterako ditu aipatutako zati bakoitzeko bi gai, eta izangaiek horietako bat, nahi dutena, aukeratu eta garatu beharko dute.

-Hirugarren ariketa: praktikoa. Epaimahaiak gai zerrendako gaiekin lotuta zehaztutako kasu bat edo batzuk ebatzi beharko dira, 3 orduz gehienez.

-Laugarren ariketa: ingeleseko probak. Borondatezko ariketa da eta ez baztertzailea, eta aurreko hiru ariketak gainditzen dituzten izangaiek egiten ahalko dute. Idatzizko eta ahozko proba bana eginen dira, izangaien jakite maila zehazteko. Proba horiek Nafarroako Administrazio Publikoaren Institutuak prestatuko ditu eta haren emaitza loteslea izanen da epaimahaiarentzat.

6.3. Oposizioko ariketen balorazioan 100 puntu eman daitezke gehienez, honela banatuak:

Lehenengo ariketa: gehienez ere 30 puntu.

Bigarren ariketa: gehienez ere 40 puntu. Lehen zatiko gaiari 10 puntu emanen zaizkio gehienez, eta bigarren eta hirugarren zatiko gaiei 15na puntu gehienez.

Hirugarren ariketa: gehienez ere 20 puntu.

Laugarren ariketa: gehienez ere 10 puntu.

6.4. Oposizioko lehendabiziko, bigarren eta hirugarren ariketak baztertzaileak izanen dira. Bazterturik geldituko dira ariketa bakoitzean kalifikaziorik altuena lortzen duen izangaiaren puntuazioaren erdira gutxienez iristen ez diren izangaiak. Hori hala izanik ere, ariketa gainditutzat jotzeko, deialdiaren oinarrietan ariketarako ezarritako gehieneko puntuazioaren 1/3 atera beharko da gutxienez.

6.5. Bigarren eta hirugarren ariketak plika sistemaren bidez eginen dira.

6.6. Ariketa bakoitzaren kalifikazioa amaitutakoan, epaimahaiak jendaurrean jarriko du, ariketa egiten den lekuan eta Nafarroako Gobernuaren iragarki oholean, probak gainditu dituzten izangaien zerrenda, bakoitzaren kalifikazioekin. Horrez gainera, oposizioko hurrengo proba non, zein egunetan eta zein ordutan eginen den adierazten duen oharra argitaratuko du, gutxienez hura hasi baino 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.7. Ariketa bakoitzerako deialdi bakarra eginen da. Izangaiek aldean izan beharko dute nortasun agiri nazionala, pasaportea, gidabaimena edo epaimahaiaren iritziz identifikaziorako balio duen beste agiriren bat. Azterketara agertzen ez direnak edo arestian aipatutako agirietako baten bidez beren nortasuna frogatzen ez dutenak oposiziotik baztertuko dira.

6.8. Hautaprobak egiteko, desgaitasun aitortua dutenentzat beharrezkoak diren denbora eta baliabide egokitzapenak ezarriko dira, eskabidean azaldutakoaren arabera.

7.-Probak gainditzen dituztenen zerrenda, izendapen proposamena eta agirien aurkezpena.

7.1. Hautaprobak bukaturik, epaimahaiak jendaurrean jarriko du, probak egin diren tokian eta Nafarroako Gobernuaren iragarki oholean, probak gainditu dituztenen zerrenda, oposizioan lortutako kalifikazioekin. Gero, zerrenda hori Nafarroako Administrazio Publikoaren Institutuko zuzendari kudeatzaileari igorriko dio, puntuaziorik altuenak izateagatik deialdiko lanpostuetan sartzen ahal diren izangaiak izendatzeko proposamenarekin eta espediente osoarekin batera. Proposamena Nafarroako Aldizkari Ofizialean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Berdinketarik gertatuz gero, lehenengo ariketan puntu gehien lortu dutenen alde ebatziko da. Eta hala ere berdinduta segitzen badute, bigarren ariketan lortutako puntuazioa hartuko da kontuan.

7.2. Izendapen proposamena Nafarroako Aldizkari Ofizialean argitaratu ondoko 30 egun naturaleko epean, proposatutako izangaiek berariazko inprimaki batzuk jaso eta honako agiri hauek aurkeztu beharko dituzte Nafarroako Administrazio Publikoaren Institutuko Sarrerarako Hautapenaren Zerbitzuan:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiek:

a) Nortasun agiri nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen agiri baliokideren batenak.

b) Deialdiaren 2.1.1.c) oinarrian eskatzen den tituluaren fotokopia konpultsatua, edo hura lortzeko eskubideak pagatu direla frogatzen duen gordekinarena, edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

c) B motako ibilgailuak gidatzeko baimenaren kopia konpultsatua.

d) Laneko Arriskuei Aurrea Hartzeko Atalak emandako txostena, interesdunak karguan aritzea eragozten dion eritasun edo akats fisiko edo psikikorik ez duela frogatzeko.

Desgaitasunen bat alegatu duten izangaiek, gainera, desgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

e) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

f) Zin egin edo hitz ematea Nafarroako Foru Araubidea errespetatuko duela, Konstituzioari eta legeei men eginen diela eta karguari dagozkion eginkizunak zuzen beteko dituela.

Deialdi hau egin ez duen Nafarroako beste administrazio publikoren bateko langile finkoek edo Nafarroako Foru Komunitateari transferitutako Justizia Administrazioko zerbitzuei atxikitako langile finkoek, gainera, beste ziurtagiri bat aurkeztu beharko dute, aurreko administrazioko espediente pertsonalean ageri diren inguruabar eta aurrekari guztiak frogatzeko, hots, sarrerari, antzinatasunari, mailari, egoera administratiboari eta abarri buruzko guztiak.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiek:

a) Deialdiaren 2.1.1.c) oinarrian eskatzen den tituluaren fotokopia konpultsatua, edo hura lortzeko eskubideak pagatu direla frogatzen duen gordekinarena, edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

b) B motako ibilgailuak gidatzeko baimenaren kopia konpultsatua.

7.2.3. Desgaitasunen bat alegatu duten izangaiek, gainera, desgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuetan izan ezik, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, beren eskabidearen faltsukeria dela-eta legokiekeen erantzukizuna galarazi gabe.

7.4. Aurreko atalean ezarritakoa gertatuz gero, Nafarroako Administrazio Publikoaren Institutuko zuzendari kudeatzaileak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du hutsunea, eta horrekin ere aurreko ataletan adierazitako moduan jokatuko da.

7.5. Nahitaezko betebehar eta baldintzen frogagiriez gain, Funtzio Publikoaren Zuzendaritza Nagusiak, bere eskudantziak erabiltzeko, beste edozein agiri eska diezaioke izangaiari, eta horrek deialdi honen 7.2 oinarrian ezarritako moduan aurkeztu beharko du.

8.-Lanpostu hutsak hautatzea.

8.1. Aurreko oinarrian xedatu dena betetzen duten izangaiek Nafarroako Administrazio Publikoaren Institutuak (NAPI) hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharren arabera horiek aldatzea erabakitzen bada.

8.2. Lanpostu hutsak aukeratzerakoan, %33ko desgaitasun aitortua edo handiagoa duten izangaiek lehentasuna izanen dute gainerako izangaien aurretik, kontuan hartu gabe zein txandaren bidez parte hartu duten.

Hala izanagatik ere, desgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, desgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egiten duten txostenaren arabera.

8.3. Hautaprobak igoera txandan gainditzen dituzten izangaiek deialdiko lanpostuak betetzeko lehentasuna izanen dute txanda irekiko izangaien aldean, aurreko atalean adierazitako salbuespena kontuan hartuz.

9.-Izendapena, lanpostu hutsen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitateko Administrazioko funtzionario izendatuko ditu, nekazaritzako ingeniari teknikoen lanetan aritzeko. Ebazpen horren bidez lanpostu hutsen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko ditu izendatuak, eta Nafarroako Foru Komunitateko Administrazioko funtzionarioen arloan indarra duten xedapenetan ezarri diren eskubide eta betebehar guztiak izanen dituzte. Gizarte Segurantzako araubide orokorrean afiliatuko dira, araubide horretan ezarritakoaren babesean.

Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein montepioren eskubide pasiboetan sarturik daudenek bi aukera izanen dituzte: Nafarroako Foru Komunitateko Administrazioaren montepioan segitzea, martxoaren 5eko 10/2003 Foru Legearen bidezko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.4. Funtzionarioek bizilekua destinoko herrian ez izateak ez du alde batera uzten lantokira puntual iritsi beharra eta lanaldia eta lanpostuko eginkizunak zuzen bete beharra, eta, gainera, ez da inolako konpentsaziorik jasoko lantokirako joan-etorriengatik.

Behar bezala justifikatutako kasu batzuetan, administrazio publikoek zilegi izanen dute funtzionarioei destinoko herrian bizi daitezela eskatzea, lanpostuko eginkizunengatik eta eskatzen den dedikazioagatik bidezkoa denean.

9.5. Izendapena Nafarroako Aldizkari Ofizialean argitaratuko da eta izangai izendatuek hilabeteko epean jabetu beharko dute lanpostuez, izendapenaren jakinarazpenetik kontatzen hasita.

Aipatutako epean eta ezinbesteko kasuetan izan ezik, izangairen bat lanpostuaren jabe egiten ez bada, Foru Komunitateko Administrazioaren funtzionario izateko eskubide guztiak galduko ditu. Hala gertatzen bada, deialdiaren 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean ari delako, kasuko lanpostu hutsa ere deialdiaren 7.4 atalak agintzen duen moduan beteko da.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10.-Aldi baterako kontratuetarako izangaien zerrenda

10.1. Nafarroako Administrazio Publikoetan sartzeko Erregelamenduaren 42. artikuluan, Lehendakaritza, Justizia eta Barneko kontseilariaren azaroaren 14ko 146/2005 Foru Aginduan (lanpostuak aldi baterako betetzeko kudeaketa arauak onesten dituena) eta oinarri honetan ezarritako prozedurarekin bat, aldi baterako kontratazioetarako zerrenda hauek prestatuko dira hautapen prozesuan parte hartu eta lanposturik lortzen ez duten izangaiekin:

a) Probak gainditu arren lanposturik lortu ez duten izangaien zerrenda.

b) Administrazio Erroan aldi baterako kontratatuak izateko izangaien zerrendak.

10.2. Probak gainditu arren lanposturik lortu ez duten izangaien zerrenda eta Administrazio Erroan aldi baterako kontratatuak izateko izangaien zerrenda.

Nafarroako Administrazio Publikoaren Institutuko Sarrerarako Hautapenaren Zerbitzuak espedientea igorri ondoren, Funtzio Publikoaren zuzendari nagusiaren ebazpen bidez onetsiko dira probak gainditu arren lanposturik lortu ez duten izangaien zerrenda eta bigarren ariketa gainditu dutenena, une horretan indarrean diren kudeaketa arauekin bat, eta argitaratu eginen dira Nafarroako Gobernuko iragarki oholean (Karlos III.aren etorbidea, 2, atalondoa, Iruña) eta Nafarroako Gobernuaren web orrian: www.navarra.es.

Hauxe izanen da aldi baterako kontratazio zerrendetako izangaien ordena: oposizioa gainditu arren lanposturik lortzen ez dutenen kasuan, sarrerako hautapen prozesuan lortutako puntuaziorik handienaren arabera; gainerako izangaien kasuan, gainditutako ariketetan lortutako puntuazioen batura. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

Aldi baterako kontrataziorako izangaien zerrendan agertzeak ez du esan nahi interesdunei onartzen zaienik 2. oinarrian ezarritako betebeharrak betetzen dituztela; izan ere, horiek oinarri honetan adierazten den bezala frogatu beharko dituzte.

Izangaiei deitu eta, kasua bada, haiek kontratatzerakoan, Administrazio Erroan, honako hauetan xedatutakoari jarraikiz jokatuko da: Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuaren 88.b) artikulua eta hurrengoak; lanpostuak aldi baterako betetzeko arauak ematen dituen Lehendakaritza, Justizia eta Barneko kontseilariaren azaroaren 14ko 146/2005 Foru Agindua (144. Nafarroako Aldizkari Ofizialean argitaratua, abenduaren 2an); eta aplikatzekoak diren gainerako arauak.

Deia egiterakoan, kontuan hartuko da Nafarroako Foru Komunitateko Administrazioaren zerbitzuko Langileen Estatutuaren Testu Bateginaren zazpigarren xedapen gehigarriaren 4. atalean ezarritakoa.

Deialdiaren 2.1 oinarrian adierazten diren titulazio betebeharrak eta gidabaimenari dagozkionak betetzen direla frogatzeko agiriak kontratatuak izateko deia jasotzen duten izangaiek bakarrik aurkeztu beharko dituzte, kontratua formalizatzen denean, jatorrizko agiriak edo behar bezala konpultsatutako kopien bitartez.

Eskatzen diren agiriak aipatu epean aurkezten ez dituzten izangaiek, aski justifikatutako ezinbesteko kasuetan izan ezik, eta eskatutako baldintzak betetzen ez dituztenek deialdian parte hartzetik eratorritako eskubide guztiak galduko dituzte; betiere, parte hartzeko eskabidea faltsutzeagatik legokiekeen erantzukizuna galarazi gabe.

Sarrera prozesuko eskabideak aurkezteko epea bukatzen den egunerako bete beharko dira beharkizunak eta, orobat, hautaprobak egin bitartean eta kontratazioaldiak iraun bitartean.

11.-Errekurtsoak.

Epaimahaiaren egintzen eta ebazpenen kontra gora jotzeko errekurtsoa jartzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xedeko egintza argitaratu edo jakinarazi eta biharamunetik hilabeteko epean.

Deialdiaren, oinarrien eta horiek aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, errekurtsoaren xedeko egintza argitaratu edo jakinarazi eta biharamunetik hasita hilabeteko epean.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluan eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluetan xedatutakoari jarraikiz.

Iruñean, 2010eko irailaren 13an.-Nafarroako Administrazio Publikoaren Institutuko zuzendari kudeatzailea, Gregorio Eguilaz Gogorza.

I. ERANSKINA - ESKABIDEA

Hautaprobetan onartua izateko eskabidea

Deialdiaren datuak.

Sartzeko txanda.

Datu pertsonalak

Aurkeztutako agiriak

Honako hauen proba eskatzen du:

Sinatzaileak ESKAERA egiten du eskabide honetan adierazitako prozesuan onartua izan dadin eta ADIERAZTEN DU, erantzukizuna berea izanik, bertan agertzen diren datu guztiak egiazkoak direla, deialdiaren oinarrian eskatutako betebehar guztiak betetzen dituela eta datu horiek guztiak agirien bidez frogatzeko konpromisoa hartzen duela.

(Sinadura)

.................(e)n, 2010eko .............aren ..............(e)an.

NAFARROAKO ADMINISTRAZIO PUBLIKOAREN INSTITUTUKO ZUZENDARI KUDEATZAILEA. LEHENDAKARITZA, JUSTIZIA ETA BARNE DEPARTAMENTUA.

(*) Deialdiaren oinarrietan xedatutakoari jarraikiz.

II. ERANSKINA

Gai zerrenda

Lehen zatia.

1. gaia.-Espainiako 1978ko Konstituzioa: printzipio orokorrak. Oinarrizko eskubide eta betebeharrak. Botere Judiziala. Gorte Nagusiak: osaera eta eginkizunak. Gobernua eta Estatuko Administrazioa. Konstituzio Auzitegia: osaera, izaera eta eskumenak.

2. gaia.-Europar Batasuna. Parlamentua. Kontseilu Europarra. Europako Batzordea. Kontseilua (ministroena). Justizia Auzitegia. Beste erakunde batzuk.

3. gaia.-Europar Batasuneko antolamendu juridikoaren iturriak: jatorrizko zuzenbidea eta zuzenbide eratorria.

4. gaia.-Espainiako 1978ko Konstituzioaren lehen xedapen gehigarria. Nafarroako Foru Eraentza Berrezarri eta Hobetzeari buruzko Lege Organikoa: izaera eta esanahia. Atariko titulua. Nafarroaren eskumenak.

5. gaia.-Nafarroako Parlamentua edo Gorteak. Nafarroako Comptos Ganbera. Arartekoa.

6. gaia.-Nafarroako Gobernua. Eginkizunak. Osaera, izendapena, eratzea eta kargu-uztea. Eskudantziak eta eskumenak. Funtzionamendua. Laguntza organoak. Erantzukizun politikoa, Parlamentuaren kontrola eta Parlamentuaren desegitea. Nafarroako Gobernuko lehendakaria.

7. gaia.-Nafarroako Foru Komunitateko Administrazioa. Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritako printzipio orokorrak. Herritarrek Nafarroako Foru Komunitateko Administrazioarekiko harremanetan dituzten eskubideak. Antolaketa: printzipio nagusiak eta egitura organikoa, kide anitzeko organoak eta administrazio organoen eskumenak.

8. gaia.-Administrazio publikoen araubide juridikoaren printzipio orokorrak. Administrazio publikoen organoak. Administrazio prozeduraren interesdunak.

9. gaia.-Administrazioaren xedapenak eta egintzak. Egintza administratiboen betebeharrak. Egintzen eraginkortasuna. Deuseztasuna eta deusezgarritasuna.

10. gaia.-Prozedura administratiboen xedapen orokorrak: prozeduraren abiaraztea, antolamendua, instrukzioa eta amaiera. Bide administratiboko egintzen berrikuspena: ofiziozko berrikuspena eta administrazio errekurtsoak.

11. gaia.-Kontratu Publikoei buruzko Foru Legea: aplikaziorako arau orokorrak eta eremua. Kontratistak. Administrazio publikoen kontratu guztietarako xedapenak. Esleipenaren aurreko jarduketak.

12. gaia.-Nafarroako Administrazio Publikoen Zerbitzuko Langileen Estatutua. Langile motak. Funtzionario publikoak hautatzea. Administrazio egoerak. Funtzionarioen eskubideak, betebeharrak eta bateraezintasunak. Ordainsariak.

13. gaia.-11/2007 Foru Legea, apirilaren 4koa, Nafarroako Foru Komunitateko Administrazioan Administrazio Elektronikoa ezartzeari buruzkoa.

14. gaia.-21/2005 Foru Legea, abenduaren 29koa, Politika Publikoak eta Zerbitzu Publikoen Kalitatea Ebaluatzeari buruzkoa.

15. gaia.-15/1999 Lege Organikoa, abenduaren 13koa, Datu Pertsonalak Babesteari buruzkoa.

16. gaia.-Diru-laguntzei buruzko azaroaren 9ko 11/2005 Foru Legea: xedapen orokorrak. Laguntzak emateko eta kudeatzeko prozedurak. Diru-laguntzen itzulketa. Jarraipena eta kontrola. Arau-hausteak eta zehapenak.

Bigarren zatia.

1. gaia.-Espainiako nekazaritzaren antolaketa administratiboa. Estatuko Administrazio Nagusiaren eta autonomia erkidegoen eginkizuna Europar Batasuneko, estatuko eta autonomia erkidegoetako nekazaritza politikan. Konstituzio eta estatutuetako printzipioak eta koordinatzeko mekanismoak. Oinarrizko eraketa administratiboa: zentrala eta periferikoa.

2. gaia.-Espainiako nekazaritzaren oinarrizko ezaugarri makroekonomikoak. Nekazaritzako amaierako ekoizpena: garrantzia, osaera eta banaketa. Nekazaritzako errenta: bilakaera eta banaketa. Biztanleria aktiboa. Sektoretik kanpoko gastuak. Nekazaritzako elikagaien sektorea Espainiako ekonomian. Nekazaritzako kanpo merkataritza Espainian: produktu nagusiak eta trukerako eremuak. Nekazaritzaren arloko merkataritza balantzea Espainian. Estaldura tasa.

3. gaia.-Europar Batasunaren Nekazaritza Politika (PAC). Aurrekariak. PACren aldaketa 1992an. PACa 2000. urtean. PACak 2003. urtean izan zuen berrikuspena. PACaren osasun azterketa. Prezioen eta merkatuen politika eta egituren eta landa garapenaren politika etapa horietan.

4. gaia.-Kontseiluaren ekainaren 21eko 1290/2005 (EE) Erregelamendua, nekazaritzako politika bateratuaren finantziazioari buruzkoa. Nekazaritzako funtsak eta horien erregulazioa. Ordainketarako eta koordinaziorako erakundeak.

5. gaia.-Kontseiluaren urtarrilaren 19ko 73/2009 (EE) Erregelamendua. Zuzeneko laguntzen kudeaketa eta kontrol sistema integratua nekazaritzako politika bateratuaren esparruan Modulazioa eta diziplina finantzarioa. Ordainketa bakarreko araubidea eta bestelako laguntza araubideak.

6. gaia.-Baldintzazkotasuna. Aplikazioa zuzeneko laguntzetan eta Landa Garapenerako programen laguntzetan. Nekazaritzako eta ingurumeneko baldintza egokiak eta kudeaketako legezko betekizunak.

7. gaia.-Kontseiluaren urriaren 22ko 1234/2007 (EE) Erregelamendua, nekazaritzako merkatuen antolakuntza bateratua sortzen duena. Barne merkatuaren erregulazio mekanismoak. Esku-hartzeko neurriak. Merkaturatzea eta ekoizpena. Kanpo merkataritzarako araubidea.

8. gaia.-Landa garapeneko politika. Kontseiluaren irailaren 20ko 1698/2005 (EE) Erregelamendua, Landa Garapenerako Europako Nekazaritza Funtsaren bitartez kudeatzen den landa garapeneko laguntzari buruzkoa (FEADER).

9. gaia.-Nafarroako Foru Komunitatearen Landa Garapenerako 2007-2013ko Programa. Aurrekariak. Ardatz eta neurrien deskrizpioa. Landa Garapenerako Estatuko Esparruarekin eta Landa Garapenerako Europako Jarraibideekin 2007-2013 aldirako zer lotura dagoen.

10. gaia.-Europar Batasunaren konpetentzia politika. Nekazaritza eta oihangintza sektorean Estatuak ematen dituen laguntzei buruzko jarraibideak 2007-2013 aldirako, eta horien salbuespenezko araubideak.

11. gaia.-EBren nekazaritzarako kanpo politika. Hitzarmenak trukerako beste eremu batzuekin. Negoziazioak Munduko Merkataritza Erakundean.

12. gaia.-Nafarroako Foru Komunitateko nekazaritzaren antolaketa administratiboa. Landa Garapeneko eta Ingurumeneko Departamentua: antolaketa eta eginkizunak. Erakunde autonomoak. Landa Garapeneko eta Ingurumeneko Departamentuari atxikitako sozietate publikoak. Nafarroako erakunde ordaintzailea.

13. gaia.-Nafarroako Foru Komunitateko lurraldea, nekazaritza jardueraren oinarri. Jardueren araberako azalera banaketa. Klimatologia. Orografia. Hidrografia. Nafarroako nekazaritza eskualdeak, ekoizpen joerak eta ezaugarri nabarmenenak.

14. gaia.-Nafarroako nekazaritza sektorea. Nafarroako ekonomian duen parte-hartzea. Azpisektoreen araberako azterketa. Jarduera garrantzitsuenen azalerak eta ekoizpenak. Nafarroako nekazaritza sektorearen diagnostikoa: puntu indartsuak eta ahulak gaur egun. Bilakaera eta joerak. Nekazaritzako kanpo merkataritza Nafarroan: merkataritzako balantza, produktu nagusiak eta trukerako eremuak.

15. gaia.-Nafarroako biztanleria aktiboa. Sektoreen eta populazio geruzen araberako azterketa. Analisi konparatiboa Espainiako eta Europar Batasuneko inguruneetan. Bilakaera. Ogibide nagusia nekazaritza duena. Emakumea Nafarroako nekazaritzako elikagaien sektorean. Belaunaldi aldaketa Nafarroako nekazaritza ustiategietan. Immigrazioa, ezaugarriak eta Nafarroako nekazaritza elikagaien sektorean duen parte-hartzea.

16. gaia.-Nekazaritza ustiapena Nafarroan. Nekazaritzako ustiapenak: tamaina, antolaketa eta bilakaera. Lurraren edukitze araubidea. Nekazaritzako ustiapena enpresa gisa. Nafarroako nekazaritza enpresen tipologia: enpresa ezartzeko aplikatu beharreko parametro ekonomikoak (marjina gordina, dimentsio ekonomikoaren unitateak). Nafarroako Nekazaritza Ustiategien Erregistroa. Lehentasunezko ustiategiak.

17. gaia.-Nekazaritzan elkarteak sortzea. Nekazari kooperatibak: araubide juridikoa eta gobernu organoak. Nekazaritzako kooperatibak ezartzea Nafarroan: ekoizpeneko azpisektoreen araberako garapena. Kooperatiben integrazioa. Makineria elkartean erabiltzeko kooperatibak (CUMA). Eraldaketarako nekazaritza sozietateak (ENS): araubide juridikoa eta gobernu organoak.

18. gaia.-Nekazaritzako elikagaien industria Nafarroan. Sektorearen garrantzia: nekazaritzako amaierako ekoizpenean eta Nafarroako Foru Komunitatearen ekonomia orokorrean duen parte-hartzea. Nekazaritzako elikagaien industriari lotutako enplegua eta teknologia. Enpresa egitura. Nekazaritzako industria jardueraren azpisektoreak: ezaugarriak eta berariazko arazoak. Lehengaien ekoizpen sektorean duen esku-hartzea: kontratuzko harremanak.

19. gaia.-Nafarroako nekazaritza sektorearen ekoizpen baliabideak. Deskribapena eta kontsumoa. Bilakaeraren azterketa. Energia aurreztea. Energia berriztagarriak. Nafarroako nekazaritza sektorean energia berriztagarriak erabiltzeari buruzko joerak eta aukerak.

20. gaia.-Jarduketak Nafarroako nekazaritza azpiegituretan. Aplikatu beharreko legeria eta erregelamendua: Nekazaritzako Azpiegiturei buruzko martxoaren 7ko 1/2002 Foru Legea eta martxoaren 24ko 59/2003 Foru Dekretua. Lurzatiketa eta lurraren edukitze araubideak. Bilakaera historikoa eta aukerak. Nekazaritza ustiategietan duten eragina. Jarduketek ingurumenaren gainean duten eraginaren ebaluazioa.

21. gaia.-Ureztalurrak Nafarroako nekazaritza sektorearen ekoizpen egitura gisa. Ezaugarriak: Nafarroako ureztalurren puntu indartsuak eta ahulak. Hornidura, kontsumoa eta urtarokotasuna. Eremu ureztagarrien ustiapena eta kontserbazioa. Ureztatzaileen elkarteak: eremu ureztagarrien ustiapenean duten zeregina. Ura aurreztea. Uraren eta energiaren kostua. Teknologia eta eragimena.

22. gaia.-Nekazaritzako azpiegiturak. Landa bideak: sailkapena, diseinu irizpideak, landa bide baten geometriaren elementuak, lur-berdinketa, zoladura eta fabrikako obrak. Drainatze lanak: motak, diseinua eta banaketa.

23. gaia.-Nekazaritzako merkaturatzea. Nekazaritzako produktuen merkaturatzea baldintzatzen duten alderdi nagusiak. Merkaturatzeko bideak. Nekazaritzako produktuen normalizazioa eta tipifikazioa. Merkaturatzea jatorrian eta destinoan. Handizkako eta txikizkako merkataritza. Jatorrian izaten diren erakundeak merkaturatzea egiteko: nekazaritzako ekoizleen elkarteak (APA) eta fruta eta barazki ekoizleen elkarteak (OPFH). Nafarroan duten ezarpena.

24. gaia.-Nekazaritzako ekoizpenen kalitatearen defentsa Nafarroan. Jatorrizko deitura babestuak, adierazpen geografiko babestuak eta kalitatearen beste ziurtapen batzuk. Definizioa, ezaugarriak eta betekizunak. Indarra duen legeria.

25. gaia.-Landa garapeneko neurriak, nekazaritzako eta oihangintzako sektorearen lehiakortasuna handitzearekin lotuta daudenak. Nafarroan duten aplikazioa.

26. gaia.-Landa garapeneko neurriak, ingurumenaren eta landa ingurunearen hobekuntzarekin lotuta daudenak. Nafarroan duten aplikazioa.

27. gaia.-Landa garapeneko beste neurri batzuk, landa eremuetako bizi kalitatearekin lotuta daudenak, eta landa ekonomiaren dibertsifikazioa eta LEADER. Nafarroan duten aplikazioa.

28. gaia.-Nekazaritzako aseguruak. Eginkizuna. Oinarrizko elementuak. Aplikazioko metodoak. Nafarroan duten aplikazioa: ezarpena eta bilakaera.

29. gaia.-Nafarroako Lurralde Aberastasunaren Erregistroa eta Katastroak, azaroaren 21eko 12/2006 Foru Legearen arabera. Sorrera eta erabilgarritasuna. Kontzeptua eta edukia. Zaintzea. Informazioa eskuratzea. Koordinazioa Jabetza Erregistroarekin.

30. gaia.-Informazio geografikoaren sistemak. Oinarriak, eta nekazaritzako plangintzan eta kudeaketan aplikatzea. Nafarroako Lurraldeari buruzko Informazio Sistema (SITNA). Nafarroako Gobernuaren Landa Garapeneko eta Ingurumeneko Departamentuko Informazio Geografikoaren Sistema (PLANTA).

31. gaia.-Herri ondasunak Nafarroan. Ezaugarriak. Administrazioa eta xedapen egintzak. Herri ondasunen aprobetxamenduak. Defentsa, kontserbazioa eta berreskuratzea.

32. gaia.-Elikagaien segurtasuna. Elikagaien Segurtasunerako Europako Agintaritza. Eginkizunak. Arretaren printzipioa eta haren aplikazioa. Elikagaien Segurtasunerako Espainiako Agentzia. Kalitate-kontrola elikagaietan. Kontrol ofiziala. Borondatezko kontrola: ziurtapen erakundeak. Autokontrola: arriskuen azterketa eta kontrol puntu kritikoak. Trazabilitatea nekazaritzako elikagaien ekoizpenean.

Hirugarren zatia.

1. gaia.-Lurzorua ekoizpen faktore gisa nekazaritzan. Lurzorua nekazaritzaren aldetik aztertzeko teknikak. Lurzoru motak. Lurzoruen eta landareen arteko erlazioak. Nekazaritza lurren ebaluazioa: oinarriak eta aplikazioak. Nafarroako lurzoru mota nagusien ezaugarriak.

2. gaia.-Lurzorua lantzea. Lantze motak lurzoruaren eta helburu teknikoaren arabera. Gutxieneko lanketa. Lanketarik eza. Lurzoruen kontserbazioa. Higadura arazoak. Lurzoruen higadura arazoak Nafarroan.

3. gaia.-Ura ekoizpen faktore gisa nekazaritzan. Uraren, lurzoruaren eta landarearen arteko erlazioa. Ur balantzea. Ureztaketarako uren kalitatea. Ureztaketa. Ureztaketako teknika eta sistema nagusiak. Gazitzearen arazoa.

4. gaia.-Zereal hazien ekoizpena. Sektoreak Nafarroan duen garrantzia. Ernalketa autogamoko zereal hazien Kontrol eta Ziurtapenerako Erregelamendu Teknikoa. Ekoizle biderkatzailearen figura: eskubideak eta betebeharrak. Zereal hazien ziurtapena eta horien merkaturatzea. Ereiteko alea egokitzea.

5. gaia.-Landareak biderketa begetatiboz ekoiztea. Sektoreak Nafarroan duen garrantzia. Hazitarako patataren ekoizpena, frutarbol, mahasti eta baratzeko landareen ekoizpena: kontrol eta ziurtapeneko erregelamendu teknikoak. Landare material autoktonoa: baliabide gisa duen balioa. Kontserbazio ekintzak Nafarroan.

6. gaia.-Ongarriak. Ongarriak ekoizpen faktore gisa. Ongarri motak eta ezaugarriak. Ongarritze arrazionala. Dosi egokien eta ongarria emateko uneen definizioa. Aplikazio sistemak. Ongarritzea lehorreko sistema estentsiboetan. Ongarritzea ureztatze sistema intentsiboetan. Ureztapen ongarriduna. Ongarritzea berotegietan.

7. gaia.-Hondakin organikoak ongarri gisa erabiltzea. Simaurrak, mindak, araztegiko lohiak eta konposta: ezaugarriak eta ongarri gisa duten balioa. Horiek erabiltzean sortzen ahal diren ingurumen eta osasun arriskuak. Horiek erabiltzeko gomendio teknikoak. Abeltzaintza ustiategietako ingurumen betebeharrak, hondakin organikoak sortzearen ondorioz. Nafarroako Foru Komunitatearen legezko xedapenak.

8. gaia.-Ongarritzearen ingurumen arriskuak. Lurzoruak eta urak kutsatzea ongarriak erabiltzeagatik. Kontseiluaren 1991ko abenduaren 12ko 91/676/EEE Zuzentaraua, urak nekazaritzan erabilitako nitratoen ondoriozko kutsaduratik babesteari buruzkoa. Eremu ahulak. Nekazaritza Praktika Egokien Kodea. Nafarroan duen aplikazioa.

9. gaia.-Fitosanitarioak. Fitosanitarioak ekoizpen faktore gisa. Motak eta ezaugarriak. Aplikazio teknikak. Nafarroan izurriak, gaixotasunak eta belar gaiztoak direla eta izaten diren arazo nagusien deskribapena. Horiek kontrolatzeko teknikak.

10. gaia.-Fitosanitarioen babesa beste herrialdeetatik etortzen diren organismo kaltegarrien aurrean. Espainiako araudia. Pasaporte fitosanitarioa. Nafarroan diagnostikatutako berrogeialdia eskatzen duten izurriak: agente eragileak, arazoaren norainokoa, desagertaraztea eta kontrola.

11. gaia.-Fitosanitarioak erabiltzearen ondoriozko ingurumen eta osasun arriskuak. Arriskuaren sailkapenak. Etiketa. Piktogramak. Arrisku faseak. Produktu fitosanitarioak aplikatzen dituenak behar duen txartela. Establezimenduen eta Zerbitzuen Erregistro Ofiziala. Produktu fitosanitarioen erregistroa, Ingurumen, Landagune eta Itsas Inguruetako Ministeriokoa. Fitosanitarioen hondakinak nekazaritzako produktuetan. Hondakinen gehieneko mugak. Horien jarraipena eta kontrola Estatuan. Fitosanitarioen ordez erabiltzen ahal diren beste bide batzuk: borroka biologikoa eta nahaste sexuala.

12. gaia.-Nekazaritzako mekanizazioa. Nekazaritzako makineria ekoizpen faktore gisa nekazaritzako enpresan. Mekanizazioa Nafarroako nekazaritza sektorean. Nafarroako Nekazaritza Makineriaren Erregistro Ofiziala. Makineria erabiltzea elkarte formuletan. Nekazaritzako makineria eta ekipamenduak elkartean erabiltzeak zer egoera duen Nafarroan.

13. gaia.-Nekazaritzako makineria. Trakziozko makineria. Lurra lantzeko makineria. Erein eta landatzeko makineria. Fitosanitarioak aplikatzeko makineria. Ongarriak aplikatzeko makineria. Ekipamendu konbinatuak. Uzta biltzeko makineria. Ezaugarri teknikoak eta joerak. Mekanizazioaren kostuak murriztea.

14. gaia.-Nekazaritzako produktuak bildu eta kontserbatzea. Sistema nagusiak. Instalazioak eta teknologia. Aleak, barazkiak eta frutak, haragiak, esnekiak, ardoa eta olioa kontserbatzeari buruzko aipamen berezia.

15. gaia.-Nekazaritza ekologikoaren ekoizpena. Ekoizpen ekologikoaren ezaugarriak. Desberdintasun handienak beste ekoizpen kontrolatu batzuekin alderatuta. Horri buruzko araudiaren funtsezko alderdiak. Nafarroako ekoizpen ekologikoa: bilakaera eta joerak sektoreen arabera.

16. gaia.-Ekoizpen integratua. Ekoizpen integratuaren ezaugarriak. Desberdintasun handienak beste ekoizpen kontrolatu batzuekin alderatuta. Erregelamendu teknikoak edo berariazko arau teknikoak. Ustiategiaren koadernoak. Ziurtapen eta kontroleko entitateak. Nafarroako ekoizpen integratua: bilakaera eta joerak sektoreen arabera.

17. gaia.-Zerealak ekoizteko teknikak Nafarroan. Ekoizpenetako espezieak, barietateak eta merkataritzako orientazioa. Ekoizpen eremuak, azalerak eta errendimenduak. Ibilbide teknikoak. Lehorreko lurretako ekoizpena. Ureztalurretako ekoizpena. Posizioa laboreen txandakatzean. Merkaturatzeko bideak. Kalitate faktoreak zerealen ekoizpenetan.

18. gaia.-Lekadunak, olio-landareak eta proteaginosoak ekoizteko teknikak. Ekoizpenetako espezieak, barietateak eta merkataritzako orientazioa. Ekoizpen eremuak, azalerak eta errendimenduak. Ibilbide teknikoak. Posizioa laboreen txandakatzean. Merkaturatzeko bideak. Kalitate faktoreak labore mota horietan.

19. gaia.-Barazkiak ekoizteko teknikak Nafarroan. Ekoizpenetako espezieak, barietateak eta merkataritzako orientazioa. Ekoizpen eremuak, azalerak eta errendimenduak. Ibilbide teknikoak. Aukerak eta labore txandaketa. Baratzezaintza intentsiboa eta estentsiboa. Merkaturatzeko bideak. Kalitate faktoreak barazki ekoizpenetan.

20. gaia.-Frutarbolen ekoizpen teknikak Nafarroan. Ekoizpenetako espezieak, barietateak eta merkataritzako orientazioa. Ekoizpen eremuak, azalerak eta errendimenduak. Landaketa berrien diseinua. Ibilbide teknikoak. Merkaturatzeko bideak. Kalitate faktoreak fruta ekoizpenetan.

21. gaia.-Almendronden eta olibonden ekoizpen teknikak Nafarroan. Barietateak eta merkataritzako orientazioa. Ekoizpen eremuak, azalerak eta errendimenduak. Landaketa berrien diseinua. Landaketa estentsiboak eta intentsiboak. Ibilbide teknikoak. Labore horiek nekazaritza eta ingurumen aldetik balioestea. Merkaturatzeko bideak. Kalitate faktoreak almendrondoen eta olibondoen ekoizpenetan.

22. gaia.-Mahatsondoen ekoizpen teknikak Nafarroan. Ekoizpen eremuak, azalerak eta errendimenduak. Barietateak eta industriako orientazioa. Landaketa berrien diseinua. Ibilbide teknikoak. Merkaturatzeko bideak. Kalitate faktoreak mahatsondoen ekoizpenetan.

23. gaia.-Estalkipean ekoizteko teknikak Nafarroan. Berotegiak eta tunelak. Espezieak eta barietateak. Ekoizpenek merkataritzarako duten orientazioa. Oinarrizko teknologia berotegietan: eraikuntzako eta estaldurako materialak, ureztaketa, nutrizioa, substratuak, bero emate pasiboa, berokuntza. Lurzorurik gabeko laborantza: kontzeptua, alde onak eta txarrak. Txandakatzeak eta aukerak Nafarroako berotegi eta tuneletan. Merkaturatzeko bideak. Kalitate faktoreak estalkipeko barazki ekoizpenetan.

24. gaia.-Larre eta bazken ekoizpen teknikak Nafarroan. Espezieak, nahasteak eta barietateak. Ekoizpenek merkataritzarako duten orientazioa. Ekoizpen eremuak, azalerak eta errendimenduak. Ibilbide teknikoak. Lehorreko lurretako ekoizpena. Ureztalurretako ekoizpena. Posizioa laboreen txandakatzean. Merkaturatzeko bideak. Kalitate faktoreak labore mota horietan.

25. gaia.-Esne eta haragitarako behi-aziendaren ekoizpen teknikak Nafarroan. Ekoizpenetako arrazak eta merkataritzako orientazioa. Ekoizpen eremuak, ekoizpen baliabideak, errendimenduak eta ekoizpenak. Ekipamenduak eta instalazioak. Ekoizpen intentsiboa eta estentsiboa. Ustiategietako baldintza teknikoak eta ingurumen baldintzak. Animalien ongizatea. Merkaturatzeko bideak. Kalitate faktoreak ekoizpen horietan.

26. gaia.-Esne eta haragitarako ardi-aziendaren eta ahuntz-aziendaren ekoizpen teknikak Nafarroan. Ekoizpenetako arrazak eta merkataritzako orientazioa. Ekoizpen eremuak, ekoizpen baliabideak, errendimenduak eta ekoizpenak. Ekipamenduak eta instalazioak. Ekoizpen intentsiboa eta estentsiboa. Ustiategietako baldintza teknikoak eta ingurumen baldintzak. Animalien ongizatea. Merkaturatzeko bideak. Kalitate faktoreak ekoizpen horietan.

27. gaia.-Zerri-aziendaren ekoizpen teknikak Nafarroan. Ekoizpenetako arrazak eta merkataritzako orientazioa. Ekoizpenaren antolaketa. Ekoizpen eremuak, ekoizpen baliabideak, errendimenduak eta ekoizpenak. Ekipamenduak eta instalazioak. Ustiategietako baldintza teknikoak eta ingurumen baldintzak. Animalien ongizatea. Merkaturatzeko bideak. Kalitate faktoreak ekoizpen horietan.

28. gaia.-Zaldi-aziendaren, untxien eta hegaztien ekoizpen teknikak Nafarroan. Ekoizpenetako arrazak eta merkataritzako orientazioa. Ekoizpen eremuak, ekoizpen baliabideak, errendimenduak eta ekoizpenak. Ekipamenduak eta instalazioak. Ustiategietako baldintza teknikoak eta ingurumen baldintzak. Animalien ongizatea. Merkaturatzeko bideak. Kalitate faktoreak ekoizpen horietan.

29. gaia.-Nekazaritzako produktuen eraldaketa eta merkaturatzea Nafarroan (I). Ardoaren industria: lehengai nagusien karakterizazioa, elaborazio prozesuak, teknologia, lortutako produktuen ezaugarriak eta horiek merkaturatzea. Olioaren industria: lehengai nagusien karakterizazioa, elaborazio prozesuak, teknologia, lortutako produktuen ezaugarriak eta horiek merkaturatzea.

30. gaia.-Nekazaritzako produktuen eraldaketa eta merkaturatzea Nafarroan (II). Zerealen industria: lehengai nagusien karakterizazioa, elaborazio prozesuak, teknologia, lortutako produktuen ezaugarriak eta horiek merkaturatzea. Frutagintzako eta baratzezaintzako produktuen industria freskoan, izoztuta eta kontserban: lehengai nagusien karakterizazioa, manipulazio edo elaborazio prozesuak, teknologia, lortutako produktuen ezaugarriak eta horiek merkaturatzea.

31. gaia.-Nekazaritzako produktuen eraldaketa eta merkaturatzea Nafarroan (III). Haragiaren industria: lehengai nagusien karakterizazioa, manipulazio edo elaborazio prozesuak, teknologia, lortutako produktuen ezaugarriak eta horiek merkaturatzea. Esnearen industria: lehengai nagusien karakterizazioa, manipulazio edo elaborazio prozesuak, teknologia, lortutako produktuen ezaugarriak eta horiek merkaturatzea.

Oharra.-Gai guztiak bat etorriko dira deialdi hau Nafarroako Aldizkari Ofizialean argitaratzen den egunean indarra duen legeriarekin.

Iragarkiaren kodea: F1015319