58. ALDIZKARIA - 2008ko maiatzaren 9a

II. NAFARROAKO TOKI ADMINISTRAZIOA

2.1. ORDENANTZAK ETA BESTELAKO XEDAPEN OROKORRAK

ORKOIEN

Telekomunikazioetako antenen instalazioari eta funtzionamenduari buruzko ordenantza. Behin betiko onespena

Honako honen bidez aditzera ematen da Udalak, 2008ko martxoaren 26an egindako osoko bilkuran, behin betiko onetsi zuela telekomunikazioetako antenen instalazioari eta funtzionamenduari buruzko ordenantza. Ondotik ematen da argitara ordenantzaren testu osoa, indarra hartuko duena Toki Araubidearen Oinarriak arautzen dituen apirilaren 2ko 7/1985 Legearen 65.2 artikuluan ezarritako epea (hamabost egun baliodun) amaitzen denean.

Orkoienen, 2008ko apirilaren 1ean.-Alkatea, Casimiro Larrea Ruiz.

TELEKOMUNIKAZIOETAKO ANTENEN INSTALAZIOARI ETA FUNTZIONAMENDUARI BURUZKO UDAL ORDENANTZA

1. artikulua. Xedea.

Ordenantzaren xedea da Orkoiengo udalerrian telekomunikazioetako antenen instalazioak eta funtzionamenduak bete behar dituzten baldintzak arautzea.

Halaber ordenantzak arautuko du nola kokatu mota guztietako antenak eta haien elementu osagarriak, bai euskarriak bai konexioak, eraikinen kanpoaldean eta eraikuntzarik gabeko tokietan.

Bai uhin elektromagnetikoak hartzeko antenak eta bai igortzekoak arautuko dira, irrati, telebista, telekomunikazio, teleaginte eta abarretakoak, izan ditzaketen forma guztietan: orratzak, zutabeak edo dorreak, parabolikoak, elementudunak, eta egungo edo etorkizuneko teknologiak ahalbidetzen duen beste edozein forma.

Ordenantzaren xedea da, halaber, udal lizentzia eta dagokion administrazio prozedura zein instalaziok behar dituzten zehaztea.

I. KAPITULUA

Irrati-komunikazioko instalazioak telefonia mugikor automatikorako

2. artikulua. Aplikatu beharreko araudia.

Ordenantza honetan arautzen ez den gai orotan ondoko xedapenak aplikatuko dira:

-Telekomunikazioei buruzko azaroaren 3ko 32/2003 Lege Orokorra.

-Lurreko uhinen bidezko toki telebistari buruzko abenduaren 22ko 41/1995 Legea.

3. artikulua. Plan berezia.

Irrati-komunikazioko instalazioak (hala nola sakelako telefono-deien banaguneak, antenak, horien lotura-elementu osagarriak eta behar diren beste osagai tekniko batzuk) direla-eta, Udalak aurretiaz plan berezi bat tramitatu behar du, udal mugapean haien sarea garatzeko.

Planaren edukia:

Sarearen eskema orokorra, herriburua, esteka nagusiak eta lotuneak non egon litezkeen adierazita.

Sakelako telefono-deien banaguneen, telefonia mugikorreko antenen eta irrati-komunikazioko beste elementu batzuen ezarpena.

Sakelako telefono-deien banaguneak eta antenak: kopurua, kokalekua, lurralde estaldura, potentzia, laneko maiztasunak eta kanalen kopurua.

Udalerrian edo, kasua bada, udalez gaindi proposatutako irtenbide teknikoaren justifikazioa.

Ekipoak berritik non ezarri gogo diren, aurreikusitako lurralde estaldura justifikatuta.

Plan berezi indardunik ez dagoenean, lizentzia eskuratu nahi duten operadoreek plan bereziaren proiektua aurkeztu ahal izanen dute.

Plana onesten den egunetik aurrera, operadoreek lizentziarako eskabideak aurkeztu ahal izanen dituzte.

4. artikulua. Instalazioaren mugak.

a) Irrati-komunikazioko instalazioek ingurumenaren eta paisaiaren gaineko eragin txikiena duen teknologia erabili beharko dute.

b) Udalak operadoreei kokalekuak elkarrekin partekatzeko agindu ahal izanen die, proposaturiko plan bereziaren arabera. Instalazio partekatuen kostua osorik hartu beharko dute beren gain irrati-komunikazioko zerbitzuen arloko enpresa operadoreek. Zenbait operadorek instalazioak batera erabiltzen dituztenean, Udalak baterako instalazioaren titular gisa jardun ahal izanen du eta kanona kobratu enpresa erabiltzaileei.

c) Irrati-komunikazioko instalazioak ingurunearekin bateragarriak ez badira, paisaian edota ingurumenean duten eragina onargarria ez bada, alegia, baimentzeko mugak jarriko zaizkie. Instalazioak ezkutatzeko eta inguruneari egokitzeko behar diren ekintzak ezarri beharko dira.

d) Eraikin edo multzo babestuetan irrati-komunikazioko instalazioak mugatu eginen dira, ez badira justifikatzen haien beharra eta mimetizazio neurriak edo ikus-eragina arintzen duten konponbide berariazkoak.

5. artikulua. Hirigintzako lizentzia.

Hiri lurzoruan edo lurzoru urbanizagarrian kokatzen diren irrati-komunikazioko instalazioek jarduera sailkatuei dagokien esku-hartze administratiboaren araubidea izanen dute.

Lurzoru urbanizaezinean, berriz, hirigintzako araudian ezarritako prozedura beteko da.

Instalazioen plan berezia, ordenantza honen 2. artikuluan araututakoa, onetsi arte, ezin izanen da hirigintzako lizentziarik eman.

Eskabidearen hiru kopia aurkeztuko dira. Eskabideari erantsi beharreko agiriak Udaleko Erregistro Orokorrean aurkeztuko dira.

Agiri horiekin batera, Udalaren zerga ordenantzetan ezarritako zerga betebeharrak bete izanaren frogagiriak ere aurkeztuko dira.

Hona hemen dokumentazioaren edukia:

Lehena: enpresaren datuak:

1.-Izen soziala eta IFZa.

2.-Helbide osoa.

3.-Legezko ordezkaritza.

Bigarrena: instalazioaren proiektua, teknikari eskudun batek sinatua:

1.-Kokalekuaren garaiera.

2.-Estaldura eremuak.

3.-Igorpen maiztasunak, igorpen potentziak eta polarizazioa.

4.-Modulazioa.

5.-Instalatu nahi diren antena motak.

6.-Onurak, antena isotropikoaren aldean.

7.-Sistema erradiatzailearen gorapen angelua.

8.-Sortaren irekidura.

9.-Sistema erradiatzailearen antenen garaiera.

10.-Potentzia-dentsitatea (W/cm²).

11.-Antenaren kokalekua UTM koordenatuen bidez adierazia, eta kokapen planoa, gehienez 1:2000 eskalako kartografian, lauki-sarearekin. Ingurumen ebaluazioan kontuan hartu beharreko azpiegiturak planoetan marraztu behar dira.

12.-Inguruko erakinekiko kokapen erlatiboa erakusten duen planoa, 1:500 eskalakoa.

13.-Instalazioa kokatuko den tokian hirigintzako planeamendu indardunaren arabera lurzoruak dituen sailkapenaren eta kalifikazioaren ziurtagiria.

14.-Eskala egokiko planoak, erradiatutako potentzia isotropo baliokide (EPIB) maximoa grafikoki adierazten dutenak, W-etan, diseinuaren norabide guztietan.

15.-Azpiegitura beste operadore batzuekin partekatzeko ahalbidearen justifikazio teknikoa.

16.-Instalazioaren egitura eta hura eraikinari lotzeko euskarriak egonkorrak direla frogatzen duten kalkuluak, dagozkien eraikuntza planoekin batera.

17.-Instalazioa atmosferako deskarga elektrikoetatik babesteko eta beste instalazio batzuekiko interferentzia elektromagnetikoak eragozteko hartuko diren zuzenketa neurrien azalpena eta justifikazioa.

18.-Ikus-eraginari buruzko argazkiak, grafikoak eta agiri idatziak, zehatz-mehatz erakusten dutenak instalazioaren kokalekua, lanari eta kokapenari lotuta: ingurunearen deskripzioa, tamaina, forma, materialak eta beste ezaugarri batzuk. Ikus-eraginaren simulazio grafikoa erantsi behar da, oinezkoen ikuspegitik egina.

19.-Instalazioa segurtasun baldintza egokietan izateko deklarazioa edo konpromisoa.

20.-Azpiegiturak instalatuko diren lurzati edo finkaren titularraren adostasun agiria.

Aurkeztu beharreko agiriren bat falta bada, Udalak eskatzaileari hamar eguneko epea ezarriko dio hutsuneak betetzeko.

Eskatutako informazioa aurkeztu ezean, epe hori amaiturik, eskabidea bertan behera utzi dela ulertu eta espedientea artxibatu eginen da.

Irrati-komunikazioko instalazioetarako lizentzia eskatzen denean udal teknikariek txostena eginen dute. Udalak laguntza eskatu ahal izanen die udalez gaindiko erakundeei, nahi dituen teknikariei edo Kataluniako Telekomunikazio Zentroari.

Aurreko paragrafoaren arabera eskumena duen teknikariak txostena emanen du hamar eguneko epean. Agiri teknikoek araudi aplikagarria betetzen duten ala ez adieraziko du, eta, ondorioz, lizentzia ematearen alde edo aurka agertuko da.

Aurkako txostena ematen badu, espedientean antzeman dituen akatsak zuzentzen ahal diren ala ez zehaztu beharko du.

Lizentziaren eskatzaileari 10 eguneko epea emanen zaio akatsa zuzentzeko, eta bost egun gehiago emanen zaizkio, hala eskatzen badu.

Ebazpen proposamenaren aurretik, lizentziaren eskatzaileari eta espedientean agertu direnei 10 eguneko entzunaldia emanen zaie nahi dituzten alegazioak egiteko.

Entzunaldia amaitutakoan, eta, behar izanez gero, alegazioei buruzko txostenak egin ondoren, behin betiko ebazpen proposamena eginen da. Proposamen horretan lizentziaren baldintzak edo preskripzioak zehaztuko dira.

6. artikulua.

Lizentzien titularrek bermatu egin beharko dute irrati-komunikazioko instalazioak unean uneko teknologiarik onenetara egokituko direla, ikus-eragina, ingurumen eragina edo inguruneko baldintzen aldaketak ahalik ongien arintzeko. Instalazioak aldian behin berrikusiko dira, araudi tekniko indardunari jarraituz.

Administrazioaren laguntzaile diren entitateek egin ahalko dute berrikuspena, behar bezala kreditaturik. Berrikuspen horietan kontuan hartuko da ea ikus-eragina edo ingurumen eragina arintzeko teknologia berririk sortu den.

Lizentzia eman ala ez erabakitzeko eskumena alkateak izanen du, edo hark eskuorde izendatzen duen pertsonak.

Hirigintzako lizentzia emateko edo ukatzeko ebazpena bi hilabeteko epean eman behar da, ordenantzaren 3. artikuluan ezarritako moduan prozedura hasi eta hurrengo egun baliodunetik aurrera.

Interesdunari akatsak konpontzeko ematen zaion epea amaitu arte ebazpen epea etenik egonen da. Etenaldi horrek hiru hilabete iraunen du gehienez.

Ezarritako epea bukaturik, ebazpenik ezean, lizentzia eman dela ulertuko da, salbu eta instalazioa jabari publikoko finka edo instalazioetan egitekoa denean; halakoetan lizentzia ukatu dela ulertuko da.

Administrazioaren isiltasunaren bidez eskuratutako lizentziak ondorioak sortuko ditu Administrazio Prozedura Erkideari buruzko Legean aipatzen den ziurtagiria ematen denetik.

Lurzoru urbanizaezinean irrati-komunikazioko instalazioak jartzeko hirigintzako lizentzia eskatzen denean, hirigintzako legeriak ezarritako prozedura beteko da eskabidea tramitatzeko.

7. artikulua. Instalazioen zainketa eta segurtasuna.

Lizentzia eta kontzesioen titularrak arduratuko dira instalazioen segurtasunaz eta zainketaz.

Udal zerbitzuek kontserbazio egoera kaskarra dela atzemanez gero, lizentziaren titularrei jakinaraziko diete, handik 15 eguneko epean neurri egokiak har ditzaten. Jendearentzat edo ondasunentzat arriskua dagoenean, berehala hartuko dira neurriak, hirigintzako araudiak dioen bezala.

Jarduera edo erabiltzen ez diren osagaiak behin betikoz utziz gero, lizentziaren titularrak beharrezko guztiak eginen ditu irrati-komunikazioko ekipoak eta haien elementuak desmuntatu eta kentzeko, instalatu aurretik zeuden bezala uzteko lurzorua eta instalazioaren euskarria den eraikina.

Udalak fidantza eskatu ahal izanen du, operadoreek arriskuak beren gain hartuko dituztela bermatzeko.

8. artikulua. Zehapenen araubidea.

1. Arau-hauste eta zehapenen araubidea Telekomunikazioen antolamenduari buruzko abenduaren 18ko 31/1987 Legean, uztailaren 22ko 25/1994 Legean eta autonomia erkidegoetako arauetan ezarritakoa izanen da, deusetan ukatu gabe administrazio publikoen kontratuei buruzko legeria urratzeagatik kontzesiodunak izan lezakeen erantzukizuna.

Udal lizentziarik ez dagoenean, hautsitako legeria betearazteko neurri egokiak hartuko dira, hirigintzako araudi orokorrean ezarritakoari jarraituz.

II. KAPITULUA

Bestelako instalazioak, irratia, telebista, telekomunikazioak eta teleagintea

9. artikulua. Kokalekuak.

Irrati eta telebista zerbitzu publikoen edo/eta merkataritzakoen programak hartzeko antenak (a mota).

Ez dira paratzen ahalko eraikinen hutsune, leiho, balkoi, fatxada eta perimetroko paramentuetan, non ez diren estaltzen, erabilera publikoko inongo toki edo eremutatik ikus ez daitezen. Horretarako egokiak diren eraikuntza elementu iraunkorrak erabiliko dira.

Ez dira paratzen ahalko eraikuntzarik gabeko eremu publiko zein pribatuetan.

Eraikinen estalkietan paratzen direnean, gutxien ikusten diren aldean kokatuko dira, betiere beren funtzioa betetzen ahal duten tokian.

Hiru dimentsioetako bat nagusi ez duten antenak, adibidez parabolikoak eta dorre konposatuak (A-2 azpimota), eraikin edo multzo katalogatuetan edo kale nagusietako eraikinetan paratu behar direnean, babestutako eraikin, multzo edo kalearen gaineko edozein eragin kaltegarri saihesteko modurik egokienean kokatuko dira.

Horretarako, instalazioaren proiektuan konponbide bat proposatuko da eta hura aukera guztietan onena dela frogatuko da, arrazoiak eta zioak azalduz. Historia, arte eta monumentu ondarearen babesaren arloan eskumena duten zerbitzu teknikoen adostasun txostena beharko da. Eragina maila onargarrietara murrizterik ez badago, instalaziorako baimena ukatu ahal izanen da.

A2 azpimotakoak ez diren A motako antena guztiak A1 azpimotakotzat hartuko dira.

Eraikuntzaren bolumenetik kanpo, antena bakar bat jarri ahal izanen da eraikin bakoitzeko eta beste funtzio batzuekin batera antena berean elkartu ezin den funtzio bakoitzeko. Artikulu honetako lehen paragrafoan ezarritako baldintzak betez bistatik ezkutatzen diren antenak salbuetsiko dira.

Antenaren oinetik hargailuetaraino doazen banaketa lineak landatuta edo estalita egonen dira. Salbuespenez baizik ez dira paratzen ahalko jadanik zutituriko eraikin behar bezala baimenduen gainean, horretarako hodi zurruna edo kolore neutroko kable agerikoa erabiliz, teilatu lauetan, ikusten ez diren barne paretetan eta eraikinen barneko zerbitzu-patioetan. Salbuespen horietarako, kokapenaren eta materialen proposamena aurkeztuko da, bai eta trazaduraren planoak ere, 1:50 eskalan, gutxienez.

Antenetan ezin izanen da inoiz jarri publizitateko idazkun edo anagramarik, eta ikusgai diren antena guztiek kolore neutroa izanen dute.

10. artikulua.

Irrati eta telebista zerbitzu publikoen edo/eta merkataritzakoen programak igortzeko antenak (B mota).

Irrati eta telebista zerbitzu publikoen edo/eta merkataritzakoen programak igortzeko antenak berariaz izendatutako tokietan bakarrik jarri ahal izanen dira.

11. artikulua.

Irrati-amateurren antenak (C mota).

Irrati-amateurren antenak eraikinetako baoetan instalatu beharko dira, edo bestela, inongo eremu publiko nahiz komunitariotatik ikusten ez diren tokian.

Eraikin eta multzo katalogatuetan edo kale nagusietan halako antenak instalatzen direnean, III. kapituluko 1.4 puntuan aipatzen diren bermeak jarri beharko dira babestu beharreko elementuetarako, kanpoko itxura edozein dela ere. Eraikin batean halako antena bat baino gehiago jartzeko baimena eman ala ez Udal Administrazioak erabakiko du, eraikinaren itxuran izan dezaketen eragina kontuan izanik.

Irrati-amateur bakoitzak horrelako instalazio bakarra eduki dezake eraikin berean, eta hori eraikineko etxebizitza edo lokal baten titularra bada soilik.

12. artikulua.

Irrati-loturak eta komunikazio pribatuak (D mota).

Arau orokor gisa, irrati-loturetarako eta komunikazio pribatuetarako antenak, telekomunikazioen arloan eskumena duten Estatuko zerbitzuek behar bezala baimenduak, berariaz izendatutako tokietan kokatu behar dira, III. kapituluko 1. puntuan aipatzen diren horietan (D1 azpimota), salbu eta inongo bide publikotatik edo erabilera publiko nahiz komunitarioko eremutatik ikusten ez direnak.

Salbuespenez, eta sareko elementuren bat beste toki batean jartzeko beharra frogatzen duen plano teknikoa aurkeztuz gero, baimena eman ahal izanen da elementu hori eraikinaren estalki gainean jartzeko (D2 azpimota); nolanahi ere, babestu beharreko elementuei kalterik ez egiteko bermeak eskatuko dira, III. kapituluko 1.4 puntuan aipatzen diren berberak, eta itxurari edo formari erreparatu gabe aplikatuko dira.

Komunikazio ofizialetako antenek ere, bereziki segurtasun publikokoek eta defentsakoek, aurreko arau horiek beteko dituzte, beren inguruabar eta ezaugarriek eskatzen dituzten berezitasunekin. Komunikazio dorreetan jartzen direnak D1 azpimotakoak izanen dira, eta eraikuntzetan jartzen direnak, D2 azpimotakoak.

13. artikulua. Lizentzia behar duten instalazioak.

Titularra pertsona pribatua, fisikoa, juridikoa nahiz erakunde publikoa izanda ere, udal lizentzia eskuratu behar da erakinen bolumenetik kanpo edozein antena jarri aurretik, salbu eta irrati edo/eta telebista programak hartzeko antena kolektiboak edo banakakoak, A1 azpimotakoak. Halaber, aurretiazko lizentzia eskuratu beharko da komunikazio dorre deritzen egituretan multzokatutako instalazio bakoitzeko.

Baldin eta, II. kapituluaren arabera, aurretiazko plano teknikoaren beharra badago, plan hori onetsi ondoren eman ahalko da sareko banakako instalazio bakoitzerako lizentzia, betiere instalazioa planean ezarritakoarekin bat badator.

14. artikulua. Plano teknikoak.

Aurreko artikuluetan aipatutako plano teknikoak onets daitezen, eskaera egin beharko da, administrazio prozedurari buruzko legean ezarritako formazko baldintza orokorrak betez, eta eskabidearekin batera planoaren hiru ale aurkeztuko dira.

Planoan ondokoak azaldu behar dira, modu arrazoituan eta ulertu eta aztertu ahal izateko adina:

Sarearen banaketa geografikoa eta hura osatzen duten antenen kokapena, behar den lurralde estaldurari lotuta eta beste hautabide batzuekin alderatuta.

Instalazioko elementu agerikoek babestu beharreko elementuen gainean (eraikin edo multzo katalogatuak, kale nagusiak eta, oro har, hiri paisaia) duten eragina, eta haien kanpo itxura inguruneko baldintzetara egokitzeko proposamenak. Ukitutako eraikin edo/eta inguruaren argazkiak erantsi behar dira beti.

Amaierako zerbitzuen edo zerbitzu eramaileen kasuan, plano teknikoak Garraio eta Komunikazio Ministerioak onetsitako proiektu teknikoei lotu behar zaizkie, Telekomunikazioen antolamenduari buruzko Legearen 13., 14. eta 17. artikuluekin bat.

Indarra duten prozeduretako arauak beteko dira tramitazioan; betiere derrigorrezkoa izanen da historia, arte eta monumentu ondarearen babesaren arloan eskumena duten zerbitzuen adostasun txostena.

Eskaera ebazteko eskumena alkateari dagokio, Toki Araubidearen Oinarriei buruzko Legearen arabera eginak izan ditzakeen edo egin ditzakeen delegazioak ukatu gabe.

15. artikulua. Eskabidea eta tramitazioa.

Telekomunikazioetako organo eskudunen baimena edo kontzesio administratiboa beharrezkoa denean, baldintza hori modu sinesgarrian frogatu beharko da eskabidea aurkeztean.

Aurretiazko plano teknikoa behar duten instalazioak eta komunikazio dorreak (B, D eta E motak).

Eraikuntzari buruzko udal ordenantzek antenen eta haien instalazio osagarrien gaineko puntuetan ezartzen duten moduan eginen dira eskaerak.

Hauek ere erantsiko dira:

Antenaren egonkortasuna frogatzeko kalkuluak, dagozkien eraikuntza-planoekin.

Instalazioa atmosferako deskarga elektrikoetatik babesteko eta beste instalazio batzuekiko irrati-interferentziak eta parasitoak eragozteko hartuko diren zuzenketa neurrien azalpena eta justifikazioa.

Plano teknikoa onesteko espedienteko datu administratiboen aipamena (B mota eta D1 azpimota).

Eskaera ebazteko eskumena alkateari dagokio, eginak izan ditzakeen edo egin ditzakeen delegazioak ukatu gabe.

Irrati-amateurrentzako antenak (C mota), eta irrati eta telebista programak hartzeko A-2 azpimotako antenak.

Lizentzia eskatu, tramitatu eta ebazteko orduan instalazio hauek obra txikitzat hartuko dira ondorio guztietarako.

Eskabidearekin batera ondokoak aurkeztu behar dira:

Eraikinaren eta inguruaren argazki egin berriak.

Ordenantza honetako 1. puntuan edo/eta 3. puntuan azaldutako baldintza guztiak betetzen direla frogatzeko agiri teknikoak.

16. artikulua. Arau-hausteak eta zehapenak.

Lurzoruari buruzko Legean hirigintzako arau-hausteetarako araubide orokorra erabiliko da, eta, behar izanez gero, toki araubideari buruzko araudian xedatutakoari eutsiko zaio.

17. artikulua. Zerga araubidea.

1. Operadoreek eta jabari publiko irrati-elektrikoa edo zenbaki-baliabideak erabiltzeko eskubideen titularrek antolamendu juridikoan ezarritako tasak ordaindu behar dituzte.

Ordenantza honetan araututako instalazioek, lizentzia eskuratu ala ez, zerga ordenantzetan ezarritako tasak eta zergak ordaindu beharko dituzte.

Halaber, instalazio horiek gauzatuz gero, lizentziarekin edo lizentziarik gabe, eraikuntza, instalazio eta obren gaineko zerga ordaindu beharko da, Toki Ogasunak arautzen dituen Legean eta Udalaren zerga ordenantzan ezarritakoa, hain zuzen ere.

Hirigintzako zerbitzuen tasari dagokionez, A2 azpimotako eta C eta D motetako antenak instalazio txikitzat joko dira, eta B eta E motetakoak lehen eta laugarren kategorietako industria jarduera gisa hartuko dira.

Eraikuntza, instalazio eta obren gaineko zergari dagokionez, araubide orokorra erabiliko da, hau da:

Obra edo instalazioaren benetako kostua izanen da zerga oinarria, unean uneko zerga ordenantza aplikagarrian ezarritako karga tasarekin.

Irrati edo/eta telebista programak hartzeko A1 azpimotako antena kolektibo edo banakakoek ez dute udal zergarik izanen.

XEDAPEN IRAGANKORRA

Lehenbizikoa.-Ordenantza honek indarra hartu aurretik lizentzia jaso duten irrati-komunikazio mugikorreko instalazioek, hemen ezarritako irizpideen arabera ingurumenean edo paisaian eragin onartezina badute, urtebeteko epea izanen dute egokitzeko, ordenantza honek indarra hartzen duen egunetik hasita.

Bigarrena.-Irrati-komunikazioetako instalazioek, eremu elektromagnetikoen eraginari dagokionez, administrazio eskudunek igorpen elektromagnetikoei buruz ezartzen ahal dituzten arauak bete beharko dituzte. Araudirik ez dagoen bitartean, Europako Kontseiluak 1999ko uztailaren 12an emandako Gomendioa aplikatuko da, jendea eremu elektromagnetikoen eraginpean jartzeari buruzkoa.

Iragarkiaren kodea: L0805198