Iragarkia

55. ALDIZKARIA - 2008ko maiatzaren 2a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Publikoaren Eskaintza, oposizioak eta lehiaketak

DEIALDIA, Nafarroako Administrazio Publikoaren Institutuko zuzendari kudeatzaileak apirilaren 17an emandako 48/2008 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko prestakuntza eta enpleguko erdi mailako tituludunen lau lanpostu oposizio bidez betetzeko.

Nafarroako Administrazio Publikoaren Institutuko zuzendari kudeatzaileak apirilaren 17an emandako 48/2008 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko prestakuntza eta enpleguko erdi mailako tituludunen lau lanpostu oposizio bidez betetzeko deialdia onetsi zen.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta gauzatzeko Sarrera Erregelamendua, gainerako aplikazio arauak eta deialdi honetako arauak.

1.-Deialdiaren xedea.

1.1. Deialdi honen xedea da prestakuntza eta enpleguko erdi mailako tituludunen lau lanpostu oposizio bidez betetzea. Lanpostuak funtzionarioen araubidekoak eta B mailakoak dira, txanda hauetan banatuak:

-1 lanpostu txanda irekian.

-2 lanpostu igoera txandan.

-1 lanpostu txanda murriztuan, %33ko edo hortik gorako ezgaitasuna duten pertsonentzat.

1.2. Hauek dira eskaintzen diren lanpostu hutsak:

-Lau lanpostu huts Berrikuntza, Enpresa eta Enplegu Departamentuan, Nafarroako Enplegu Zerbitzuari atxikiak, plantilla organikoan 6182, 6213, 6215 eta 6231 plantilla-zenbakiak dituztenak.

1.3. Igoera txandako lanpostuak hutsik geldituz gero, izangaiek hautaprobak gainditzeko behar den gutxieneko puntuazioa atera ez dutelako, txanda irekikoei gehituko zaizkie.

Ezgaitasuna dutenentzako txandako lanpostuak, izangaiek hautaprobak gainditzeko behar den gutxieneko puntuazioa atera ez dutelako bete gabe geldituz gero, beste txandetakoei gehituko zaizkie, Nafarroako Administrazio Publikoen zerbitzuko Langileen Estatutuaren 15.3 artikuluan ezarritako ordenaren arabera.

Orobat, igoera txandan edota ezgaitasuna dutenentzako txandan eskaintzen diren lanpostuak baino izangai gehiagok gainditzen badute, txanda horretan lanpostua eskuratzen ez dutenek aukera izanen dute txanda irekiko lanpostu hutsak eskuratzeko, txanda horretako izangaiekin lehia garbian eta eskuratutako azken puntuazioaren arabera.

Era berean, txanda irekiko lanpostuak eskuratzeko aukera izanen dute, aurreko lerroaldean adierazitako moduan, deialdiko 7.2 arauan agiriak aurkezteko ezartzen den epea bukatzen denean deialdiko 2.1.2 arauko eskakizun berariazkoak betetzen ez dituzten igoera txandako izangaiek.

1.4. Lanpostuek B mailako ordainsariak izanen dituzte, uztailaren 4ko 158/1984 Foru Dekretuaren bidez onetsitako Ordainsariei buruzko behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.5. Halaber, deialdi honen bidez hautaprobak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatuko da, deialdi honetako 10. arauan xedaturikoarekin bat.

2.-Izangaiek bete beharreko baldintzak.

2.1. Oposizio honetan onartuak izateko, izangaiek, eskabideak aurkezteko epea amaitzen den egunean eta agiriak aurkezteko 7.2 atalean adierazitako epea amaitzen denetik lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak.

a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek parte hartzen ahal dute, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.

b) Hamasei urte beteak izatea eta erretiroa nahitaez hartzeko ezarritako gehieneko adina ez gainditzea.

c) Unibertsitateko diplomadunaren titulua, ingeniari tekniko edo arkitekto teknikoarena edo horien titulu baliokidea edukitzea, edo eskuratzeko baldintza guztiak betetzea eskabideak aurkezteko epea bukatzen den egunean, edo lizentzia edo ingeniaritza bateko edo arkitekturako lehenengo hiru ikasturteak osorik gaindituak izatea.

Atzerrian lorturiko tituluak badira, homologazioa egiaztatzen duen kredentziala eduki beharko da.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoetan aritzeko ezgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek ez dute izan behar beren estatuko funtzio publikoan sartzea eragozten dien diziplina zehapenik edo zigor penalik.

2.1.2. Igoera txandako izangaiek bete beharreko baldintza berariazkoak.

Igoera txandako izangaiek, aurreko atalean adierazitako betebeharrez gain, hauek ere bete beharko dituzte:

a) Nafarroako edozein administrazio publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta abiapuntuko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo baxuagokoa izatea.

c) Administrazio publikoetan bost urteko antzinatasun onartua izatea, Nafarroako polizia kidegoetako kideen kasuan izan ezik, horiek frogatu beharko baitute zortzi urtez egin dituztela zerbitzuak kidego horietan.

Nafarroako administrazio publikoen zerbitzuko Langileen Estatutuaren zortzigarren xedapen gehigarrian ezarri dena aplikatuz, igoera txandan esku hartzeko baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.1.3. Ezgaitasunen bat duten pertsonentzako txandako izangaiek bete beharreko berariazko baldintza.

Ezgaitasunen bat duten pertsonentzako txandako izangaiek, 2.1.1 atalean aipatzen diren baldintzez gain, ofizialki aitorturik eduki beharko dute %33ko edo hortik goitiko ezgaitasuna.

2.2. Deialdiaren 3.3 arauaren hirugarren puntuan aipatzen den salbuespena salbuespen, izendatuak izateko proposatzen diren izangaiek deialdiaren 7.2 atalean ezarritako epean eta moduan frogatu beharko dituzte betebehar horiek.

3.-Eskabideak.

3.1. Deialdian parte hartzeko eskabideak Nafarroako Gobernuko Erregistro Orokorrean (Karlos III.aren etorbidea, 2; 31002 Iruña) aurkeztu beharko dira, edo Nafarroako Gobernuaren gainerako erregistro bulegoetako edozeinetan (zerrenda 2008ko 14. Nafarroako ALDIZKARI OFIZIALean argitaratu zen, urtarrilaren 30ean), edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazi diren bideetakoren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskaera posta bulego batean aurkeztuz gero, gutun-azal irekian eginen da, postako langileek, ziurtatu aurretik, data eta zigilua jar ditzaten.

Eskabideak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuaren edozein erregistro bulegotan dago eskuragarri. Internet bidez ere lortzen ahal da, www.navarra.es helbidean, bai argitaratzen deneko aldizkari ofizialetik abiatuta bai aipu honetatik abiatuta: "Zerbitzuak", "Enplegu publikoa".

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.

3.3. Eskabideari, behar bezala bete ondoren, agiri hauek erantsiko zaizkio:

Bat.-Nortasun Agiri Nazionalaren fotokopia, edo izangaiaren nazionalitatea eta nortasuna egiaztatzen dituen beste agiri baliokideren batena.

Bi.-Espedientea formalizatzeko eta azterketa eskubideetarako 18 euro ordaindu izanaren frogagiria. Azterketa eskubideen tasa ordaintzen ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

-Behar bezala betetako ordainketa gutunaren bitartez. Sistema horrek Nafarroako Foru Komunitateko banku entitateetan ordaintzeko balio du. Arestian aipatutako webgunean, deialdiaren iragarkian, dago ordainketa gutunaren eredua.

-Banestoko (Banco Español de Crédito) 0030 8124 87 0870002271 kontuan eskudirutan edo bankuko transferentzia bidez ordainduz; horrelakoetan ordainagirian datu hauek jarri beharko dira nahitaez:

-Izangaiaren izen-deiturak.

-NANa/IFZ.

-Ordainketa zein kontutan egiten den, haren zenbakia.

-Kontzeptua: oposizioak.

-Deialdiaren xede den lanpostua.

Honako hauek ez dute tasarik ordaindu beharko:

a) %33ko edo gehiagoko ezgaitasun aitortua dutela frogatzen duten pertsonek. Hori hala dela frogatuko dute organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hautaproben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

Lan-eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lanbide sustapen, prestakuntza edo aldaketarako ekintzetan parte hartzeari ere, justifikaturiko kasuetan izan ezik.

Hilabetero lanbide arteko gutxieneko soldatatik gorako diru-sarrerarik ez duela interesdunaren adierazpenaren bidez frogatuko da. Adierazpen eredua Nafarroako Gobernuko Informazio Bulegoan eskuratzen ahalko da, edo bestela Internet bidez, arestian emandako helbidean.

Hiru.-Deialdian igoera txandan parte hartu nahi duten izangaiek, Nafarroako Foru Komunitateko Administrazioa ez den Nafarroako beste administrazio publikoren bateko langile finkoak badira, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak, lehengoaz gainera, deialdi honen 2.1.2 arauan jasotzen diren eskakizunak betetzen dituztela frogatzen duen agiria gehitu beharko diote eskabideari.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskaerak aurkezteko epea bukaturik, Nafarroako Administrazio Publikoaren Institutuko zuzendari kudeatzaileak ebazpena emanen du, izangai onartuen eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Nafarroako Administrazio Publikoaren Institutuko zuzendari kudeatzaileak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5.-Epaimahaia.

5.1. Epaimahaiak kide hauek izanen ditu:

-Mahaiburua: José Luis Ruiz Ciruelos jauna, Nafarroako Enplegu Zerbitzuko zuzendari kudeatzailea.

-Ordezkoa: Luis García Ortego jauna, Nafarroako Enplegu Zerbitzuko Laguntza Tekniko eta Administratiboaren Zerbitzuko zuzendaria.

-Mahaikidea: Cristina Urdánoz Ezcurra andrea, Nafarroako Enplegu Zerbitzuko Prestakuntza eta Bitartekotza Zerbitzuko zuzendaria.

-Ordezkoa: Lourdes Alforja Sagone andrea, Nafarroako Enplegu Zerbitzuko Iruñeko 3. Enplegu Agentziako burua.

-Mahaikidea: Máximo Esteba Bueno jauna, Nafarroako Enplegu Zerbitzuko Enplegua eta Aukera Berdintasuna Sustatzeko Zerbitzuko zuzendaria.

-Ordezkoa: Josetxo Villanueva Aragües jauna, Nafarroako Enplegu Zerbitzuko Lan-mundura Sartzeko Ataleko burua.

-Mahaikidea: Nafarroako Enplegu Zerbitzuko Langileen Batzordearen ordezkari bat, batzordeak berak proposatua.

-Ordezkoa: Nafarroako Enplegu Zerbitzuko Langileen Batzordearen ordezkari bat, batzordeak berak proposatua.

-Mahaikide idazkaria: Nazareth Yábar Martínez andrea, Nafarroako Enplegu Zerbitzuko Kudeaketa Administratiboaren Ataleko burua.

-Ordezkoa: Ana María Catalán León andrea, administrazio publikoko teknikaria (arlo juridikoa), Nafarroako Enplegu Zerbitzuko Kudeaketa Administratiboaren Atalari atxikia.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoaren batean baldin badaude.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren arauak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6.-Oposizioa nola eginen den.

6.1. Oposizioa 2008ko irailean hasiko da. Onartu eta baztertuen behin betiko zerrenda onesten duen ebazpenean berean finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

Lehen ariketa: deialdi honen eranskineko gaiei buruzko ariketa teorikoa. Bi proba izanen ditu:

-Lehenbiziko proba: deialdiko gai zerrendako gaiei buruzko 70 galdera idatziz erantzutea. Galdera bakoitzarentzat erantzun bat baino gehiago proposatuko dira baina bat bakarra izanen da egokia. Proba hau egiteko 70 minutu izanen dira gehienez. Erantzun okerrak zehatu eginen dira.

-Bigarren proba: deialdiko gai zerrendako gaiei buruzko erantzun laburreko 40 galdera erantzutea, gehienez ere 4 orduz. Proba hau egiteko 3 ordu emanen dira gehienez.

Bigarren ariketa: ariketa praktikoa, gai zerrendaren gainean epaimahaiak proposatzen dituen kasu praktikoak argitzea, gehienez 5 orduan.

6.3. Oposizioko ariketen balorazioan 100 puntu eman daitezke gehienez ere, honela banatuak:

Lehen ariketa: gehienez 50 puntu. Proba bakoitzari 25 puntu emanen zaizkio gehienez.

Bigarren ariketa: gehienez 50 puntu.

6.4. Oposizioko ariketak baztergarriak izanen dira. Lehenengo ariketako proba bakoitzaren gehieneko puntuazioaren erdira iristen ez diren izangaiak bazterturik geldituko dira. Baztertu eginen dira, orobat, bigarren ariketari esleitutako gehieneko puntuazioaren erdia lortzen ez duten izangaiak, baita ariketa honetako kasu praktikoren batean 0 kalifikazioa jasotzen dutenak ere.

6.5. Ariketak plika sistemaren bidez eginen dira.

6.6. Ariketa bakoitza zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo ariketa egiteko tokia, eguna eta ordua, gutxienez 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.7. Ariketa bakoitzerako dei bakarra eginen da. Izangaiek Nortasun Agiri Nazionala, gidabaimena edo pasaportea eraman beharko dute. Oposiziotik kanpo geldituko dira agertzen ez direnak edo nortasuna aipatutako agirien bidez frogatzen ez dutenak.

6.8. Hautaprobak egiteko, ezgaitasun aitortua dutenentzat bidezkoak diren denbora eta baliabide egokitzapenak eginen dira, eskabidean adierazten dutenaren arabera.

7.-Probak gainditu dituztenen zerrenda, izendapen proposamena eta agirien aurkezpena.

7.1. Hautaprobak bukaturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Nafarroako Administrazio Publikoaren zuzendari nagusiari igorriko dio, probak puntuazio altuenekin gainditu dituzten izangaiak izendatzeko proposamenarekin (deialdiko lanpostuak adina izangai) eta espediente osoarekin batera. Proposamen hori Nafarroako ALDIZKARI OFIZIALean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Berdinketarik izanez gero, bigarren ariketan puntu gehien lortu dutenen alde jokatuko da.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiek ondoko agiri hauek aurkeztu dituzte Nafarroako Gobernuko Erregistro Orokorrean (Karlos III.aren etorb. 2, atalondoa), Nafarroako Administrazio Publikoaren Institutuari zuzenduak, prestatu diren berariazko inprimakiak Nafarroako Administrazio Publikoaren Institutua erakunde autonomoko Hautapen Zerbitzuan jaso ondoren (Navarrrería kalea, 39):

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiak:

a) Nortasun Agiri Nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.

b) Deialdiaren 2.1.1.c) arauan eskatzen den tituluaren fotokopia konpultsatua edo lortzeko eskubideak pagatu direla frogatzen duen gordekinarena; bestela, eskabideak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea hartzeko Atalak emandako txostena, interesdunak karguan aritzea eragotziko liokeen eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

Izangaiek Espainiako nazionalitatea ez badute, zinpeko aitorpen bat aurkeztu beharko dute, beren Estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.

e) Zin egin edo hitz ematea Nafarroako Foru Eraentza errespetatu, Konstituzioari eta legeei men egin eta karguari dagozkion eginkizunak zuzen beteko dituela.

f) %33ko edo hortik gorako ezgaitasuna aitortzen duen agiriaren fotokopia konpultsatua izatea, baldin eta ezgaitasuna dutenentzako txanda murriztuan parte hartu nahi bada.

Deialdi hau egin ez duen Nafarroako beste administrazio publikoren bateko langile finko edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Nafarroako Foru Komunitateko Administrazioaren eta haren erakunde autonomoen zerbitzuko langile finkoak diren izangaiak:

a) Deialdiaren 2.1.1.c) arauan eskatzen den tituluaren fotokopia konpultsatua edo lortzeko eskubideak pagatu direla frogatzen duen gordekinarena; bestela, eskabideak aurkezteko epean titulua eskuratzeko moduan dagoela frogatzen duen ziurtagiria.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuak salbuetsiz, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, euren eskabidearen faltsukeria dela eta, legokiekeen erantzunbeharra galarazi gabe.

7.4. Aurreko atalean aurreikusitakoa gertatuz gero, Nafarroako Administrazio Publikoaren Institutuko zuzendari nagusiak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

7.5. Deialdi honen xede diren lanpostuetarako izendatzeko baldintzak eta betebeharrak frogatzeko nahitaezko agiriez gainera, Funtzio Publikoaren Zuzendaritza Nagusiak besteren bat eskatu nahi izanez gero, proposatzen den izangaiari eskatu beharko dio, eta horrek deialdi honen 7.2 arauan ezarritako moduan ekarri beharko du.

8.-Lanpostu hutsak hautatzea.

8.1. Aurreko arauan xedatu dena betetzen duten izangaiek Nafarroako Administrazio Publikoaren Institutuak hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Hautaprobak igoera txandaren bidez gainditzen dituzten izangaiek, 8.3 ataleko bigarren lerroaldean aipatutako kasuan izan ezik, lehentasuna izanen dute deialdiko lanpostu hutsak aukeratzerakoan, txanda horretakoak ez diren izangaien aurretik.

8.3. Lanpostu hutsak aukeratzeko orduan, %33ko ezgaitasun aitortua edo handiagoa duten izangaiek lehentasuna izanen dute txanda irekiko izangaien aurretik.

Ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, ezgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9.-Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko arauetan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, prestakuntza eta enpleguko erdi mailako tituludunen lanpostuetan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko dituzte izendatuak eta, ondorioz, indarra duten xedapenek ezartzen dituzten eskubide eta betebehar guztiak izanen dituzte. Gizarte Segurantzako araubide orokorrean inskribatu eta kidetuko dira, araubide horretan ezarritakoaren babesean.

Aurrekoa gorabehera, Nafarroako administrazio publikoen zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein mutualitatetako eskubide pasiboen araubidean afiliaturik badira, bi aukera izanen dituzte: Nafarroako Foru Komunitateko Administrazioaren mutualitatean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian bizi beharra dute eta, horretarako, udalerri horretan finkatuko dute bizilekua. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako ALDIZKARI OFIZIALean argitaratuko da, eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatu epean eta behar bezain ongi arrazoitutako kasuetan izan ezik, izangairen batek ez baldin badu lanpostua bere egiten, Foru Komunitateko Administrazioaren funtzionario izateko eskubide guztiak galduko ditu. Hala bada, 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data horretan beste administrazio publiko batean ari delako, kasuko lanpostu hutsa ere beteko da deialdiaren 7.4 atalak agintzen duen moduan.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10.-Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta arau honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

a) Probak gainditu bai baina lanposturik lortu ez duten izangaien zerrenda.

b) Hautapen prozesuaren ariketa guztiak gainditu ez dituzten izangaien zerrenda.

10.2. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azkenaurreko ariketa gainditu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

-Deialdiaren 2.1.1.c) arauan eskatzen den tituluaren fotokopia konpultsatua, titulua lortzeko eskubideak pagatu direla frogatzen duen gordekinarena edo sarrera prozesurako eskaerak aurkezteko epean titulua eskuratzeko moduan dagoela frogatzen duen ziurtagiria.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki-oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, betiere, parte hartzeko eskabidea faltsutzeagatik legokiekeen erantzukizuna deusetan ukatu gabe.

10.3. Sarrera prozedurako eskabideak aurkezteko epea bukatzen den egunerako bete beharko dira baldintzak, eta hautaprobek dirauteino eta kontratazioaldiak iraun bitarte bete beharko dira.

10.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrenda hauek onetsiko dira eta Nafarroako Gobernuaren iragarki oholean argitaratuko (Karlos III.aren etorbidea, 2, atalondoa, Iruña):

a) Probak gainditu bai baina lanposturik lortu ez duten izangaien zerrenda.

b) Deialdiaren azkenaurreko ariketa gainditu bai baina lanposturik gabeko gaindituen zerrendan ez daudenen zerrenda.

10.5. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

11.-Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdi honen eta bere arauen kontra eta arauak aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat, eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2008ko apirilaren 17an.-Nafarroako Administrazio Publikoaren Institutuko zuzendari kudeatzailea, Ignacio Bandrés Urriza.

I. ERANSKINA

Eskabidea

Nafarroako Gobernua. Lehendakaritza, Justizia eta Barne Departamentua. Nafarroako Administrazio Publikoaren Institutua.

......................... jaunak/andreak, adinez nagusiak, Nortasun Agiri Nazionalaren zenbakia (edo horren baliokidea den nortasun-agiriarena): ..........., jaioteguna: ..........., jaioterria: ............., nazionalitatea: ................, gaurko helbidea: .............., herria: ...................., probintzia: ..............., posta kodea: ................., etxeko telefonoa: ..............................., laneko telefonoa: ....................

AZALTZEN DUT:

Nafarroako Foru Komunitateko Administrazioaren eta haren erakunde autonomoen zerbitzuko .............. izateko ............lanpostu ....................bidez betetzeko deialdian parte hartzeko onar nazatela eskatzen dudala (deialdia ...... zenbakiko Nafarroako ALDIZKARI OFIZIALean argitaratu zen, .........an), ondoko txanda honetan:

f Txanda irekia

f Igoera txanda*

f Ezgaitasunen bat dutenendako txanda*

Hautaprobak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruotako batean:

f Administrazio erroa*

f Osasunbidea-Nafarroako Osasun Zerbitzua *

f Nafarroako Mendekotasun Agentzia *

(Esparruotako bakar bat aukeratu daiteke)

Ez dudala karguan aritzea galarazten didan eritasunik edo akats fisikorik nahiz psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik kanpo utzia izan eta ez nautela eginkizun publikoak betetzeko gaitasunik gabe utzi.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskabideak aurkezteko epearen azken egunean beharkizun guztiak betetzen ditudala.

f Ezgaitasuna dudala eta orri bereizi batean adierazten ditudan denbora eta baliabide egokitzapenak eskatzen ditudala.

f Ezgaitasuna frogatzen duen agiria aurkezten dudala, erakunde eskudun batek emana.

f Euskara gaitasunaren agiria edo ofizialki baliokidea den beste titulu bat aurkezten dudala.*

f Euskara maila jakiteko proba egitea eskatzen dudala.*

f Frantseseko eta ingeleseko nahikotasun frogak egitea eskatzen dudala.*

Horrenbestez,

Eskabide hau ontzat hartu eta aipatu deialdian onartua izatea eskatzen dut.

Iruñean, 200...ko ................... aren .......(e)an.

(Sinadura)

(*) Bidezkoa bada.

II. ERANSKINA

Gai zerrenda

I. ZATIA

Oinarrizko araudia Nafarroako Foru Komunitateko Administrazioan

1. gaia.-Espainiako 1978ko Konstituzioa. Estatuko aginteak. Koroa. Gorte Nagusiak. Gobernua eta Administrazioa. Botere judiziala Konstituzioan.

2. gaia.-Zuzenbide Publikoaren iturburuak: legeak eta lege motak. Lege-dekretuak. Legegintzako foru dekretuak. Nazioarteko itunak.

3. gaia.-Administrazio Zuzenbidearen iturburuak: erregelamendua eta erregelamendu-ahalmena. Erregelamendu motak. Erregelamendu-ahalmenaren mugak eta haren kontrola.

4. gaia.-Administrazio egintza (I): kontzeptua, motak eta osagaiak.

5. gaia.-Administrazio egintza (II): administrazio egintzen baldintzak, eraginkortasuna, deuseztasuna eta deuseztagarritasuna.

6. gaia.-Administrazio prozedura erkidea (I): kontzeptua eta izaera. Hasiera, antolamendua, instrukzioa eta bukaera.

7 gaia.-Administrazio prozedura erkidea (II): Administrazioarekiko errekurtsoak: printzipio orokorrak eta motak.

8. gaia.-Nafarroako Foru Eraentza Berrezarri eta Hobetzeko Lege Organikoa. Funtsa. Nola egin zen. Oinarrizko printzipioak. Foru Eraentzaren erreforma. Nafarroaren eskumenak.

9. gaia.-Nafarroako Parlamentua edo Gorteak: osaera, antolakuntza eta eginkizunak.

10. gaia.-Nafarroako Gobernuari eta lehendakariari buruzko Foru Legea.

11. gaia.-Nafarroako Foru Komunitateko Administrazioari buruzko Foru Legea.

12. gaia.-Nafarroako Foru Komunitateko arartekoa. Comptos Ganbera. Nafarroako Kontseilua.

13. gaia.-Nafarroako Administrazio Publikoen zerbitzuko Langileen Estatutua (I): langile motak. Funtzionario publikoen hautapena. Funtzionario bihurtzea eta izatetik gelditzea.

14. gaia.-Nafarroako Administrazio Publikoen zerbitzuko Langileen Estatutua (II): karrera administratiboa. Administrazio egoerak. Lanpostuak betetzea. Ordainsariak.

15. gaia.-Nafarroako Ogasun Publikoa: Nafarroako Ogasun Publikoaren eskubide eta betebeharrak. Nafarroako aurrekontu orokorrak: edukia eta onespena; gastuen sailkapen ekonomikoa; betearaztea eta likidazioa.

16. gaia.-Ekainaren 9ko 6/2006 Foru Legea, kontratu publikoei buruzkoa: aplikazio eremua. 6/2006 Foru Legearen mendeko kontratuen definizioa. Administrazio Publikoen kontratuen sailkapena. Araubide juridikoa. Kontratuak esleitu, hobetu, sinatu, bete, aldatu, amaitu eta baliogabetzeko arau orokorrak.

17.-Datu pertsonalen babesa Europan eta Espainian. Printzipioak. Pertsonen eskubideak. Datuen babesari buruzko agentzia. Datuen nazioarteko mugimenduak.

18. gaia.-Azaroaren 9ko 11/2005 Foru Legea, Dirulaguntzei buruzkoa (I): diru-laguntza publikoen aplikazio esparrua eta haien gaineko xedapen komunak.

19. gaia.-Azaroaren 9ko 11/2005 Foru Legea, Dirulaguntzei buruzkoa (II): diru-laguntzak emateko prozedurak. Diru-laguntzen kudeaketa eta justifikazioa. Itzulketa.

20. gaia.-Europar Batasunaren prozesua: aurrekariak, helburuak eta izaera juridikoa. Batasuneko hasierako zuzenbidea: itun eratzaileak. Batasuneko zuzenbide eratorria: erregelamenduak, zuzentarauak eta bestelako iturriak.

21. gaia.-Europar Batasuneko funtsak: motak, helburuak eta kontrola.

22. gaia. -Laneko arriskuen prebentzioa: araudiaren helburua eta aplikazio esparrua. Lan arloko eskumenak dituzten administrazio publikoen jarduketa. Eskubideak eta betebeharrak arriskuen prebentzioaren arloan. Prebentzio zerbitzuak.

23. gaia.-Abenduaren 29ko 21/2005 Foru Legea, Politika publikoak eta zerbitzu publikoen kalitatea ebaluatzeari buruzkoa. Nafarroako Foru Komunitateko Administrazioaren edo haren erakunde autonomoen zerbitzuen karta.

24. gaia.-Apirilaren 4ko 11/2007 Foru Legea, Nafarroako Foru Komunitateko Administrazioan administrazio elektronikoa ezartzeari buruzkoa.

II. ZATIA

Enpleguari buruzko oinarrizko araudia

1. gaia.-Espainiako 1978ko Konstituzioko eskubide ekonomiko eta sozialak. Politika ekonomiko eta sozialaren printzipio gidariak Konstituzioan. Eskubide ekonomiko eta sozialen babesa.

2. gaia.-Estatuaren eta Autonomia Erkidegoen arteko eskumen banaketa. Estatuaren eta Nafarroako Foru Komunitatearen arteko enplegu arloko eskumenen banaketa. Enplegu arloko zerbitzuak Nafarroako Foru Komunitatera eskualdatzea.

3. gaia.-Nafarroako Enplegu Zerbitzua: sorrera eta bilakaera. Antolaketa eta oinarrizko egitura.

4. gaia.-Nafarroako Foru Komunitatearen enplegu politika: Nafarroako Enplegurako Planen bilakaera. Nafarroako Enplegurako Hirugarren Plana: helburu eta xede estrategikoak.

5. gaia.-Lan arloko zuzenbidea. Izaera eta ezaugarriak. Lan harremana arautzen duten oinarrizko printzipioak. Lan arloko Zuzenbidearen iturburuak.

6. gaia.-Lan-kontratua: kontzeptua eta ezaugarriak. Lan-kontratuaren subjektuak: langilea eta enpresaburua. Probaldia. Lan-kontratuaren mota eta ondorioak.

7. gaia.-Kontratu motak (I): kontratu mugagabeak. Kontratu mugagabe hobaridunak. Muga gabeko edo aldi baterako kontratu hobaridunak. Enpleguari eutsi edo lanean berriro hasteko laguntza-neurriak.

8. gaia.-Kontratu motak (II): prestakuntza kontratuak. Iraupen mugatuko kontratuak. Errelebo kontratuak. Ordezte-kontratuak erretiro aurreratua dela-eta. Bestelako lan-kontratuak.

9. gaia.-Lan-kontratuaren etendura: arrazoiak eta ondorioak.

10. gaia.-Lan-kontratua amaitzea eta haren ondorioak: kausa objektiboengatik amaitzea. Lanetik bidaltzea. Lan-kontratua amaitzeko bestelako arrazoiak.

11. gaia.-Atzerritarrak Espainian: kontzeptua. Atzerritarren eskubide eta askatasunak Espainian. Bazterkeriaren kontrako neurriak eta bermeak.

12. gaia.-Espainian dauden atzerritarren araubide juridikoa: Espainian sartu eta hortik ateratzea, atzerritarren egoera, lan baimenak eta egoera bereziak.

13. gaia.-Gizarte-eragileak: sindikatuak: bilakaera. Espainiako sindikatuen askatasunaren eta jarduketaren edukia gaur egun. Sindikatuak sortu eta kontrolatzeko araubidea. Enpresaburuen elkarteak: araubide juridikoa.

14. gaia.-Gizarte Segurantza: arau orokorrak eta aplikazio esparrua. Gizarte Segurantzaren entitate kudeatzaileak, ororendako zerbitzuak, entitate laguntzaileak eta erakunde autonomoak.

15. gaia.-Gizarte Segurantza: ekainaren 20ko 1/1994 Legegintzako Errege Dekretua, Gizarte Segurantzari buruzko Legearen Testu Bategina onesten duena: aurreko xedapenak, aplikazio eremua, sistemaren egitura, araubide bereziak, afiliazioa eta kotizazioa.

16. gaia.-Gizarte Segurantzaren araubide orokorraren babesa: babesten diren egoerak eta prestazioen araubidea.

17. gaia.-Langile autonomoen Gizarte Segurantzaren araubide berezia. Aplikazio esparrua. Afiliazioa eta kotizazioa. Babesa.

18. gaia.-Enpleguaren Sistema Nazionala: kontzeptua eta helburuak. Antolaketa eta eginkizunak. Estatuko Enplegu Zerbitzu Publikoa. Autonomia Erkidegoetako Enplegu Zerbitzu Publikoak.

19. gaia.-Espainiako enplegu politikarako tresnak. Lan-bitartekotza. Enplegurako politika aktiboak. Koordinazioa enplegurako politika aktiboen eta langabeziaren kontrako babes ekonomikoaren artean.

20. gaia.-Abuztuaren 4ko 5/2000 Legegintzako Errege Dekretua, Lan arloko arau-hauste eta zehapenei buruzko Legearen Testu Bategina onesten duena: xedapen orokorrak. Arau-hausteen kontzeptua eta sailkapena. Zehapenak mailakatzeko irizpideak, berregileak eta erantzukizunak.

21. gaia.-Lan arloko arau-hausteak zehatzeko prozedura: eskumenen esleipena. Prozedurari hasiera ematea. Tramitazioa eta ebazpena.

III. ZATIA

Enpleguaren kudeaketa: prestakuntza, bitartekotza eta prestazioak

1. gaia.-Langabezia-babesa Espainian: kontribuzio eta laguntza mailak. Bateraezintasunak. Finantza araubidea.

2. gaia.-Gizarteratzeko Errenta Aktiboa: araudia. Programan sartzea. Prestazio ekonomikoen kudeaketa. Onuradunak: jasotzeko betebeharrak. Eskaera eta agiriak. Programa abian jarri eta garatzea. Iraupena, edukia eta zenbatekoa. Onuradunen betebeharrak. Bateragarritasunak eta bateraezintasunak. Programan baja eman eta berriro hastea.

3. gaia.-Lana eskatzea Enplegu zerbitzu publikoetan. Baldintzak, aurkeztu beharreko agiriak, edukia. Atzerritarrek Enplegu zerbitzu publikoetan izena ematea. Enplegu zerbitzu publikoek lan eskatzaileei emandako zerbitzuak.

4. gaia.-Lanbideari buruzko informazio eta orientazio ekintzak enplegurako eta prestakuntzarako. Ekintza pertsonalizatuak: banan banako tutoretzak eta enpresa proiektuen gaineko aholkularitza: zehaztasun teknikoak.

5. gaia.-Lanbideari buruzko informazio eta orientazio ekintzak enplegurako eta prestakuntzarako. Ekintza kolektiboak: lana aktiboki bilatzeko taldea, Elkarrizketa ikastaroa, enplegurako alderdi pertsonalen garapena, autoenplegurako informazioa eta motibazioa: zehaztasun teknikoak.

6. gaia.-Nafarroako Enplegu Zerbitzuaren entitate laguntzaileak: zentro integralak, entitate laguntzaileak. Lanbide informazio eta orientazioaren arloko ekintzetarako diru-laguntzak: arauak, xedea, entitate onuradunak eta baliabide materialak eta giza baliabideak, programak, pertsona onuradunak, diru-laguntzaren kudeaketa, Nafarroako Enplegu Zerbitzuaren jarduketak.

7. gaia.-Enplegu zerbitzu publikoen lan-eskaintzak. Lan-eskaintzen tramitazioa eta kudeaketa: eskaintzaren aurkezpena, lanpostuaren deskribapena, hautagaien profila, lan baldintzak, enplegu eskatzaileak bildu eta eskaintzarekin kasatzea, hautagaiak bildu eta hautatzeko prozesuak. Emaitzak eta haien segimendua.

8. gaia.-Irabazi-asmorik gabeko enplegu agentziak eta enplegurako zerbitzu bateratuak.

9. gaia.-Aldi baterako laneko enpresak. Langileak lagatzeko kontratua. Aldi baterako laneko enpresako lan harremanak. Langilearen eta enpresa erabiltzailearen arteko harremana. Arau-hausteak eta zehapenak. Aldi baterako laneko enpresen nazioarteko jarduera.

10. gaia.-Europako Enplegu Zerbitzu Publikoak (EURES). EURES karta: EURES jardueren deskribapena, helburu operatiboak, kalitate arauak eta EURESeko kide eta partaideen betebeharrak; informazioaren trukaketarako sistema bateratua eta eredu komunak. Nafarroako Foru Komunitateko egoera.

11. gaia.-Lan kontratuen edukia eta haien oinarrizko kopiak Enplegu zerbitzu publikoei bidaltzeko arauak eta harekiko harremanetan baliabide telematikoak nola erabili ere.

12. gaia.-Ezgaitasunak dituzten langileentzako lanpostuak gordetzeko kuota. Neurri alternatiboak betetzeko arauak. Neurri alternatiboak hartzeari buruzko administrazio prozedura.

13. gaia.-Lantegi-eskolak, Lanbide etxeak eta Sustapen eta garapen unitateak Nafarroan: arauak eta diru-laguntzak. Nafarroako enpleguko lantegiak: arauak eta diru-laguntzak.

14. gaia.-Enpleguaren gaineko programa esperimentalak Nafarroan: kontzeptua, edukia eta diru-laguntzak.

15. gaia.-Nafarroan laneratzeko zailtasun handienak dituztenak lan munduan sartzea: gizartetik bazterturik dauden pertsonei zuzendutako gizarteratze eta laneratze programak.

16. gaia.-Nafarroako enplegua eta toki garapena: garapena eta enplegua bultzatzeko toki ekimenetarako laguntzak. I+E proiektu eta enpresen sustapena. Herriak sustatzeko merkatu-azterketak eta kanpainak. Toki entitateek edo enplegurako eta toki garapenerako agenteen toki administrazio baten mende edo haiei loturik dauden entitateek egindako kontratazioak.

17. gaia.-Toki entitateentzako laguntzak, interes orokorreko edo gizarte intereseko obra eta zerbitzuak egiteko langabeak kontratatzeko. Interes orokorreko eta gizarte intereseko bra eta zerbitzuak egiteko kontratazioak, administrazio publikoek, unibertsitateek eta irabazi-asmorik gabeko erakundeek eginak.

18. gaia.-Enplegua eta ezgaitasuna Nafarroan: elbarrien laneratzea sustatzea enplegu zentro berezietan. Enpresentzako laguntzak, elbarriei kontratu finkoak egiteagatik. Elbarriak beren kasako langile gisa laneratzea sustatzea.

19. gaia.-Enpleguaren sustapena Nafarroako kooperatiba eta lan sozietateetan: kideak bereganatzea, inbertsioak, sustapena eta enpresa horientzako laguntza teknikoa. Autoenplegurako laguntza programak Nafarroan.

20. gaia.-Gizarte Segurantzako kuotaren hobaria, lan sozietateetan eta kooperatibetan langileak hartzeagatik edo langile elbarriak autonomo gisa hasteagatik.

21. gaia.-Aukera berdintasunari eta bereizkeriarik ezari nola heldu enplegu eta prestakuntzarako politika aktiboetan: konpromisoak, ekimenak eta epe labur eta ertaineko ekintzak.

22. gaia.-Negoziazio kolektiboa generoan oinarritutako bereizkeria desagerrarazi eta aukera berdintasuna bultzatzeko tresna gisa.

23. gaia.-Prestakuntza eta enplegurako laguntzak, generoan oinarritutako bereizkeria desagerrarazi eta aukera berdintasuna bultzatzeko. Laneko eta familiako eginkizunak batera eramateko laguntzak. Emakumeak hurbileko zerbitzuetan lanean hasteko laguntzak. Genero-indarkeriari lotutako laguntzak.

24. gaia.-Enplegurako Lanbide Prestakuntzaren azpisistema: martxoaren 23ko 395/2007 Errege Dekretua. Xedapen orokorrak. Eskaeraren araberako prestakuntza. Antolamoldea eta parte-hartzaileak. Prestakuntzaren kalitatea, ebaluazioa, segimendua eta kontrola.

25. gaia.-Eskaintzarako prestakuntza: Martxoaren 7ko TAS/18/2008 Agindua. Hura finantzatzeko diru-laguntzak emateko arauak.

26. gaia.-Nafarroan diru-laguntza publikoak ematea langileen prestakuntzarako programa-kontratuen bidez. Nafarroan diru-laguntza publikoak ematea prestakuntzaren arloko ekintza osagarri eta lagungarriak egiteko.

27. gaia.-Ekainaren 19ko 5/2002 Lege Organikoa, Kualifikazioei eta Lanbide Heziketari buruzkoa. Kualifikazioen Institutu Nazionala.

28. gaia.-Lanbide Kualifikazioen Katalogo Nazionala: araudia eta garapen arauak. Kualifikazioen Katalogo Nazionala egiteko oinarriak.

29. gaia.-Lanbideko ziurtagirien gaineko zuzentarauak: araudia eta garapen arauak. Lanerako hezitzailearen lanbideko ziurtagiria.

30. gaia.-Enplegurako Lanbide Heziketari buruzko 2006ko otsailaren 7ko Akordioa. Nafarroako Lanbide Heziketaren Kontseilua. Nafarroako Gobernuaren 2005eko apirilaren 4ko Erabakia, Kualifikazioei eta Lanbide Heziketari buruzko sistema Nafarroan garatzeko zuzentarauak ezartzen dituena.

31. gaia.-Europako estrategiak hezkuntzaren eta lanbide heziketaren gainean: etengabeko ikaskuntzaren esparru europarra. Etengabeko ikaskuntzari buruzko memoranduma, etengabeko ikaskuntzarako gaitasun gakoak.

32. gaia.-Ekuazioei eta prestakuntzari buruzko Europako estrategiak: Kopenhagueko adierazpena (2002). Maastrichteko Adierazpena (2004). Hezkuntza eta prestakuntzako helburuen segimendurako Kontseiluaren eta Batzordearen arteko erdibideko txostena (2004). Gaitasunak baliozkotzeari buruzko Europako oinarri komunak. Europass Sistema.

33. gaia.-Enplegurako Europako estrategia: 2005-2008ko enplegu politiketarako jarraibideak. Batzordearen ekintza plana eskumenen eta mugigarritasunaren arloan.

34. gaia.-Enplegurako Europako estrategia: enpleguaren inguruko zerbitzu publikoak berritzea enplegurako Europako estrategiari laguntzeko. Tokian tokiko jarduketak enpleguaren arloan: Enplegurako Europako estrategiari tokiko ikuspegia ematea.

35. gaia.-Prestakuntza planak. Prestakuntza bat prestatzeko faseak: "Prestakuntzaren ingeniaritzan" oinarritutako eredua (Luy le Boterf) eta gaitasunen araberako kudeaketa eredua.

36. gaia.-Enplegurako prestakuntza: gaitasunen araberako prestakuntza, prestakuntza ekintza, jarduleak: irakaslea eta ikaslea. Enplegurako prestakuntza ikastaro baten programazioa: programa eta unitate didaktikoak. Prestatzailearen ezaugarriak, irakasteko gaitasuna.

37. gaia.-Enplegurako prestakuntza: ikasle helduen ikaskuntza prozesua. Metodo didaktikoak. Baliabide didaktikoak.

38. gaia.-Prestakuntzaren ebaluazioa enplegurako prestakuntzan. Kontzeptua, motak, teknikak eta baliabideak. Ebaluazio prozesua. Prestakuntza ekintzaren eraginkortasuna ebaluatzea.

Oharra.-Zein egunetan argitaratzen den deialdia Nafarroako ALDIZKARI OFIZIALean, egun horretako legeriaren arabera eskatuko dira gai guztiak.

Iragarkiaren kodea: F0806046