39. ALDIZKARIA - 2008ko martxoaren 26a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

183/2008 EBAZPENA, otsailaren 18koa, Arriskuen Prebentziorako eta Lanaren zuzendari nagusiak emana, "Larruaren salerosketa" sektoreko hitzarmen kolektiboa erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 25/2008).

Departamentu honetan 2008ko otsailaren 4an sartu da "Larruaren salerosketa" sektoreko lan hitzarmen kolektiboaren testua, 25 artikuluz, 2 xedapen iragankorrez eta 2 eranskinez (ordainsarien taulak) osatua, sektoreko enpresaburuen elkartearen (ASNACOPI) eta sindikatuetako baten (UGT) ordezkariek osaturiko negoziazio batzordeak 2008ko urtarrilaren 23an izenpetu eta onetsia.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Horiek horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,

EBATZI DUT:

1. Nafarroako "Larruaren salerosketa" sektorearen lan hitzarmen kolektiboa (kodea: 3102205) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jarri ahal dela Berrikuntza, Enpresa eta Enplegu kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2008ko otsailaren 18an.-Arriskuen Prebentziorako eta Lanaren zuzendari nagusia, Imelda Lorea Echavarren.

NAFARROAKO "LARRUAREN SALEROSKETA" SEKTORERAKO LAN HITZARMEN KOLEKTIBOAREN TESTUA

1. artikulua. Eremua.

Hitzarmen kolektibo honek, indarra hartzen duen egunetik, larruzko gaien salerosketan diharduten enpresetako lan harremanak arautuko ditu: larru dendetakoak, larru onduen, larrukien, bidaia-artikulu, eskularru, oinetako eta antzekoen saltegietakoak.

2. artikulua. Indarraldia eta iraupena.

Hitzarmen kolektibo honek Nafarroako ALDIZKARI OFIZIALean argitaratzen denean hartuko du indarra, baina haren ondorio ekonomikoak 2005eko urtarrilaren 1etik aurrerakoak izanen dira, eta 2008ko abenduaren 31ra arte iraunen du.

3. artikulua. Ordainsari orokorrak.

Oinarrizko lansaria:

Oinarrizko lansaria hitzarmen honi erantsitako tauletan lanbide kategoria bakoitzerako ezarritakoa izanen da.

Hitzarmenaren plusa:

Hitzarmenaren plusa hitzarmen honi erantsitako tauletan ezarritakoa izanen da.

Lansarien igoerak eta berrikuspena:

2005erako ezarritako lansari taulak kalkulatzeko, 2004ko behin betiko lansari taulak %3,7 igo dira. 2006ko lansariei aplikatu beharreko taulak kalkulatzeko, 2005ekoak %2,95 igo dira. 2007ko taulak egiteko, 2006ko emaitza hartu eta %5,2 igo da.

2008ko taula egiteko, 2007koa %3 igo da (Gobernuaren 2008rako aurreikuspena gehi ehuneko puntu bat). INEren datuen arabera Estatuko KPIaren urteko benetako igoerak %2tik gorako aldea badu aurreikusitakoarekin, 2008ko abenduaren 31n taula hori berrikusi egingo da. Hala egiten bada, aldea taulari gehituko zaio eta berrikuspenak atzera-eragina izanen du. Taula hori behin-behinekoa izanen da 2008ko abenduaren 31ra arte; orduan haren zenbatekoa KPIak 2008an benetan izandako bilakaeraren arabera doituko da.

Enpresek hilabeteko epea izanen dute aurreikusitako taula aplikatzeko, testu hau Nafarroako ALDIZKARI OFIZIALean argitaratzen denetik hasita. Hori guztia, 2. xedapen iragankorrean 2005., 2006. eta 2007. urteetako atzerakinen ordainketari buruz xedatutakoa galarazi gabe.

4. artikulua. Antzinatasunagatiko igoerak:

1. Zerbitzu denborarengatik aldian behin soldata igotzearen sistema tradizionala ezabatu eginen da eta ezabatze horrek 1994ko maiatzaren 24tik aurrera sortuko ditu ondorioak (10/94 Legeak indarra hartu zuen egunetik).

2. Hala ere, egun horretan sektoreko enpresetan lan egiten zuten langileei finkatu eginen zaie -irensgarria ez den osagarri pertsonal gisa- antzinatasunagatik kobratzen zutena, gehi betetzen ari ziren hirurtekoari dagokion igoera. Osagarri hori ezabatutako sistemaren arabera sorraraziko da, 1994an indarra zuten tauletan oinarrituta.

Horrela ateratzen den zenbatekoa, orduz gero, 1995eko urtarrilaren 1etik aurrera, hitzarmeneko ordainsari orokorretarako ezartzen den portzentaje berean igoko da.

3. Hitzarmen honen eraginpeko langileek, 1995ko maiatzaren 24tik aurrera, lehengo sistemaren ordez antzinatasun saria kobratuko dute, hirurtekoez osatua. Bi hirurteko izanen dira gehienez, eta urteko zenbateko hau izanen dute:

2005. urtean: 327,20

2006. urtean: 336,86

2007. urtean: 354,37

2008. urtean: 365,00

Saria ordainketa batean jaso ahalko da osorik -hura bete eta hurrengo hilean-, edo bestela urteko 15 pagen artean banatu ahalko da.

Lehenbiziko hirurtekoa, artikulu honetako 2. atala aplikatu behar zaien langileentzat, sistema zaharreko azken hirurtekoa finkatu zen egunetik hasita kontatuko da.

4. Sistema zaharra eta berria batera aplikaturik, gehienez 11 hirurteko atera ahal izanen dira.

5. artikulua. Aparteko eskersariak.

Aparteko bi paga ordainduko dira, bakoitza langilearen egiazko lansariaren hileko bat adinakoa. Uztaileko paga kalkulatzeko lehen seihilekoko lansariak hartuko dira kontuan, eta Gabonetako paga kalkulatzeko, bigarren seihilekoak.

6. artikulua. Mozkinak.

Salmenta edo mozkinen araberako eskersaria emanen da, langile bakoitzak urteko bigarren seihilekoan jasotako lansariaren hileko bat adinakoa. Hamabi zati proportzionaletan banatu eta urteko hamabi hiletan ordaindu ahal izanen da.

7. artikulua. Erakusleiho-dekoratzailearen plusa.

Establezimenduetako erakusleihoak apaintzen dituzten langileek beren oinarrizko lansariaren %15eko plusa kobratzeko eskubidea izanen dute, erakusleihoa apaintzen zenbat ordu ematen dituzten kontuan hartu gabe.

8. artikulua. Kutxako plusa.

Kutxako lanak egiten dituzten langileek ere, duten lanbide kategoria dutela, beren oinarrizko lansariaren %15eko plusa jasoko dute.

9. artikulua. Oporrak eta lizentziak.

Langile guztiek urtean 30 egun naturaleko oporrak hartzeko eskubidea dute:

A) Enpresak oporrak zatitzea proposatzen badu, 15 egun naturaleko bi oporralditan zatituko dira. Urte bakoitzean Foru Komunitatean ordaindu beharreko eta berreskuratu ezineko jaiegun izendatzen diren egunak ez dira konputatuko.

Lehenbiziko oporraldia uztailean (7tik aurrera), abuztuan edo irailean izanen da, langilearen nahierara, baina enpresak zehaztuko du, bere antolaketa beharren arabera, gehienez zenbat langilek har dezaketen batera. Langileak ados jarriko dira txandak ezartzeko. Adostasunik ezean, oporraldia aukeratzeko lehentasuna izanen du antzinatasun handieneko langileak, txandaka.

Beste oporraldia enpresak ezarriko du gainerako hiletan.

B) Aurrekoa eragotzi gabe, enpresak eta langileak iraupen desberdineko oporraldiak adostu ahal izanen dituzte.

C) Artikulu honetan ezarritakoaren ondorioetarako, enpresak urtero abenduaren 30a baino lehen eginen ditu bere opor proposamenak, hurrengo urteko oporretarako.

D) Enpresaren opor egunen egutegiaren arabera finkatutako oporraldiak, aurreko paragrafoan aipatutakoak, bat egiten badu langile baten haurdunaldiaren edo erditzearen ondoriozko edo bularra emateko aldi baterako ezintasun egoera batekin edo Langileen Estatutuaren 48.4 artikuluan ezarritako lan kontratua eteteko aldiarekin, langileak eskubidea izanen du opor egunak aldi baterako ezintasuna edo dagokion baimena bukatutakoan edo kontratuaren etenaldia bukatutakoan hartzeko, urte naturala bukatu bada ere.

10. artikulua. Gaixotasunak eta istripuak.

1. Lanbide gaixotasunagatik edo laneko istripuagatik aldi baterako ezintasun egoeran dauden bitartean, langileek hitzarmenean itundutako lansaria kobratzen jarraituko dute, lan eginen balute bezala, eta enpresen betebeharra izanen da langileak Gizarte Segurantzatik egoera horiengatik jasotzen dituen kopuruak osatzea.

2. Gaixotasun arruntagatik edo lanaz kanpoko istripuagatik aldi baterako ezintasun egoeran dauden bitartean, langileek prestazioaren osagarriak jasoko dituzte:

-Lehen egunetik 21. egunera arte, beren lansariaren %85erainoko osagarria.

-21. egunetik aurrera, enpresak Gizarte Segurantzaren prestazioa osatuko die beren lansari osoa jaso dezaten.

Gaixoaldian langilearen ordezkoa izendatzen bada ere, osagarria ordainduko da.

Enpresak bajan dagoen langilearengatik Gizarte Segurantzan kotizatzeko betebeharra duen epea amaitu arte ordainduko da osagarria.

Gaixotasunagatik bajan dauden langileek zehatz-mehatz bete behar dituzte medikuaren aginduak, eta ezin dute bidaiarik egin, Gizarte Segurantzako medikuak berariaz eta idatziz baimena eman ezean. Langileak baimen hori enpresari aurkeztu behar dio.

Hala egiten ez badu, enpresak deskontatu ahal izanen dio araua bete ez duen bitartean ordaindutako osagarria.

11. artikulua. Kalte-ordaina, kontratua amaitzeagatik.

Enpresan hamar urte baino gehiago lan egindako langileei 65 urte betetzeagatik baja ematen bazaie, lau hilabeteko lansaria adinako konpentsazioa emanen zaie baja gauzatzen denean.

Halaber, enpresak 60 eta 65 urte bitarteko langile baten lan kontratua amaitzen badu edo amaitzeko baimena ematen badu, langileak kalte-ordaina jasoko du, adinaren araberakoa:

-61 urterekin: 6 hilabeteko egiazko lansaria.

-62 urterekin: 5,5 hilabeteko egiazko lansaria.

-63 urterekin: 5 hilabeteko egiazko lansaria.

-64 urterekin: 4,5 hilabeteko egiazko lansaria.

Enpresek, langileekin ados jarriz gero, dirua eman ordez lan denboratan konpentsatu ahal izanen dituzte aldi horiek.

12. artikulua. Lanaldia.

Urteko lanaldia 1.730 ordukoa izanen da 2008an.

13. artikulua. Lan ordutegia.

Sektoreko langileek lan ordutegi hau izanen dute, aldeek bestelako akordiorik egin ezean:

a) Urtarrilaren 1etik maiatzaren 31ra arte eta irailaren 16tik abenduaren 31ra arte.

-Goizean: 09:00 - 13:30.

-Arratsaldean: 16:00 - 19:30.

b) Ekainaren 1etik irailaren 15era arte.

-Goizean: 09:00 - 13:30.

-Arratsaldean: 16:30 - 19:30.

Lanaldia amaitzeko ordua heldu arte langileak jaramon egin behar die establezimenduan sartzen diren bezeroei, eta salgai guztiak jaso behar ditu.

14. artikulua. Lanaldia antolatzea.

1. Astelehen goizetan ez da lanik eginen urte osoan.

2. Pazko astelehena eta Mendekoste astelehena jaiegunak dira eta berreskuratu ezinekoak lanaldi osoan.

3. Bestalde, abenduaren 26a jaieguna izanen da eta berreskuratu ezinekoa lanaldi osoan, baina jai bezpera bada, arratsaldean bakarrik eginen da opor.

4. Langile bakoitzak urtean bi atseden egun hartu ahal izanen ditu bere arazoetarako. Egun horiek ezin dira hartu jai bezperetan ez zubietan, eta enpresa berean ezin dituzte bi langilek aldi berean hartu. Merkealdietan, egun horiek hartu ahal izateko beharrezkoa izanen da enpresa eta langilea ados jartzea.

Norberaren arazoetako egun solteak hartu ordez oporraldiei batu ahal izanen zaizkie.

5. Urtean hogeita hamahiru ordu hartu ahal izanen dira -hilean 3 ordu- 09:00etatik 12:00etara bitartean. Langileek hartzen ez dituzten orduak enpresak aparteko orduak balira bezala ordainduko ditu. Enpresak zehaztuko du, bere antolaketa beharren arabera, zenbat langilek hartzen ahal dituzten ordu horiek aldi berean. Langileak elkarrekin ados jarriko dira orduak hartzeko, eta adostasunik ez badago antzinatasun handieneko langileak izanen du aukeratzeko lehentasuna.

6. Enpresa eta langileak ados jarriz gero, aurreko ataletan ezarritako lanik gabeko aldi orokorrak aldatu ahal izanen dira, eta hala egiten bada, nahitaez trukatu beharko dira iraupen bereko beste batzuekin.

7. Itundutako lanaldia lortzeko kendu behar diren gainerako orduak honela zehaztuko dira:

1. Enpresa eta langileak ados jarrita.

2. Adostasunik ez badago, honela eginen da ordu murrizketa:

a) Irailaren 16tik 30era bitartean lanaldia laburtuz. Horretarako, arratsaldeko sarrera ordua atzeratuko da: 16:00etan sartu beharrean 16:30ean sartuko da.

b) Gainerakoa, eguneko lanaldia gutxienez ordu erdi laburtuz, sarrera ordua atzeratuz txandaka, erdiek goizean eta erdiek arratsaldean, enpresa bakoitzeko langileen artean txandak ezarrita, 13. artikuluko A) ordutegiko hilabeteetan.

8. Lanaldia kontrolatzeko, lantokietan orriak jarriko dira langileek sina dezaten, sarrera eta irteera orduak adieraziz, enpresaburuak edo hark izendatzen dituen pertsonak gainbegiraturik eta ontzat emanik.

15. artikulua. Lizentziak eta eszedentziak.

Lizentziak:

Langilea, aurretik abisatu eta justifikatuta, lanetik atera daiteke, ordaindua izateko eskubidearekin, arrazoi hauetako bat dela medio eta honenbeste denborako:

A) Ezkontzeagatik, hamabost egun natural.

B) 1. Seme-alaben jaiotza edo adopzioagatik, hiru lanegun.

2. Bigarren gradura arteko odol-ahaidetasun edo ezkontza-ahaidetasuneko ahaideen eritasun larriagatik edo heriotzagatik, bi egun natural.

Ospitaleratzea eritasun larritzat hartuko da; honelako kasuetan, langileak eskatzen duenean has daiteke baimen ordaindua, ospitalean den artean.

Guraso edo seme-alaben heriotza izanez gero, lizentziari beste egun natural bat gehituko zaio.

Langileak bidaia egin behar badu, lau eguneko baimena hartuko du, edo bost egunekoa, kasuan kasuko inguruabarren arabera.

Odol-ahaidetasun edo ezkontza-ahaidetasuneko bigarren mailara arteko ahaideen ebakuntza kirurgikoagatik, ospitaleratu beharra izan gabe etxean atseden hartzea agintzen bada, bi egun natural.

3. Odol bereko edo ezkontza bidezko guraso, seme-alaba edo anai-arreben ezkontza eguna.

C) Bikoteen erregistroko inskripzioaren bidez bi urteko bizikidetza frogatzen duten bikoteek artikulu honetako lizentziak hartu ahal izanen dituzte, A) atalekoa izan ezik.

Gainerako guztian, emakumeen eta gizonen arteko egiazko berdintasunerako martxoaren 22ko 3/2007 Lege Organikoan xedatutakoari jarraituko zaio.

D) Egun bat ohiko bizilekuz aldatzeko.

E) Publikoa eta pertsonala den eginbehar saihestezina betetzeko behar-beharrezkoa den denbora.

F) Ikasketa zentro pribatuetan nahiz Estatuaren zentroetan azterketak egiteko behar den denbora, beharra justifikatzen baldin bada.

Eszedentziak:

Bi eszedentzia mota onartzen dira: borondatezkoa eta nahitaezkoa. Ez batak ez besteak ez dute soldatarako eskubiderik sortuko eszedentzian dagoen langilea lanera itzultzen ez den bitartean.

Eszedentzia motak eta horien iraupena Langileen Estatutuan ezarritakoak izanen dira, baina borondatezko eszedentzia eskatu ahal izateko beharrezkoa izanen da gutxienez urtebetean lan egin izana enpresan.

16. artikulua. Aitatasun baimena eta bularra ematekoa.

Emakumezko langileek, Langileen Estatutuaren 37.4 artikuluko 2. paragrafoan xedatutakoari jarraituz, 9 hilabetetik beherako haurrari bularra emateko baimena metatzeko eskubidea erabili nahi badute, 9 lanegun gehitu ahal izanen dizkiote baja aldiari.

Aitatasun baimena hartu nahi duten langileek 8 egun lehenago jakinarazi beharko diote enpresari.

17. artikulua. Laneko arriskuen prebentzioa.

a) Aldeek konpromisoa hartu dute indarra duen legea eta hura aplikatzeko emandako erregelamenduak beteko dituztela, lan arriskuen ondorioz ahalik eta kalte gutxien gerta dadin.

b) Osasun azterketa.-Hitzarmen honetara bildutako enpresa guztiek konpromisoa hartu dute urtero osasun azterketa bat eskainiko dietela beren langileei. Enpresek aukeratuko dituzte eguna, tokia eta azterketa eginen duten medikuak.

Hala ere azterketarik egiten ez bada, enpresaburuak bere gain hartu beharko du langileei osasun azterketa eskaintzeko betebeharraren kostua.

18. artikulua. Laneko arropa.

Langileentzat, oro har, Merkataritzako Lan Ordenantzan ezarritako moduan eginen da arropa banaketa.

Saltzaileentzat irizpide hauek ezarri dira:

a) Langileei uniformea ematen dieten enpresetan uniformea honela osatuko da: jaka bat, gona bat, oinetakoak eta 2 alkandora edo antzeko 2 jantzi. Uniforme hori lan harremanaren hasieran emanen zaio langileari, eta honela berrituko da:

Bi urtean behin, jaka eta gona; urtero, oinetakoak; sei hilean behin, alkandora edo antzeko jantzi bat (edo urtean bi).

Uniformea horrela berritzen ez bada, enpresek hitzarmenaren indarraldiko urte bakoitzeko 131,26 euro emanen dituzte ordainetan.

b) Mantala edo gaineko beste jantziren bat erabiltzen den enpresetan, langileek halako bi jantzi jasoko dituzte urtean, eta hitzarmen honen indarraldiko urte bakoitzean enpresak 91,87 euroko kalte-ordaina emanen die beren arroparen higaduragatik.

c) Laneko arroparik ematen ez duten enpresek, aurreko ataletan ezarritakoarekin bat, beren langileei urtean 147,66 euroko kalte-ordaina emanen diete hitzarmen honen indarraldian. Kasu horretan langileek arropa egokia erabili beharko dute lanean, establezimenduaren irudi komertzialarekin bat datorrena.

19 artikulua. Garbiketa.

Enpresek konpromisoa hartu dute establezimenduko hasierako garbiketa eta garbiketa orokorra kontratatuko dituztela enpresako nahiz enpresatik kanpoko langileekin, edo establezimendua ahaide eta lagunen arteko, onusteko edo asmo oneko zerbitzuen bidez garbituko dela. Enpresako langileek garbitzen badute, konpentsazioa emanen zaie, dela dirutan, aldeen artean itundutako plus baten bidez, dela beste edozein formula erabiliz.

Langileen eginbeharra izanen da establezimenduaren garbitasunari eustea, ezusteko edozein gertaerak haren itxura egokiari eragiten badio, eta erakusgai eta salgai dauden produktuak garbitzea.

20 artikulua. Langileen ordezkaria.

Langileen ordezkariek -legeari jarraituz langileek ordezkariren bat izendatzen duten establezimenduetan- indarreko legerian ezarritako eskubide sindikal eta ordezkaritza eskubide guztiak erabili ahal izanen dituzte.

Langileen ordezkariek beren ordu kreditu osoa edo zati bat metatu ahal izanen dute beren arteko ordezkari bakar bati emateko.

21. artikulua. Prestakuntza.

Langileek nahitaez joan beharko dute enpresek aukeratutako prestakuntza ikastaroetara. Ikastaroak astelehen goizetan izanen dira, eta langileari beste goiz batean itzuliko zaizkio ikastaroan emandako orduak. Enpresak prestakuntzaren kostu osoa ordainduko du.

22. artikulua. Hobekuntzen konpentsazioa.

Hitzarmen honetan jasotako hobekuntza ekonomikoak eta lanekoak, baita aurrerantzean ezartzen diren borondatezkoak ere, konpentsatu eta irentsi eginen dira kasuan kasuko mugaraino, urteko konputuaren arabera, etorkizuneko lege xedapenetan ezartzen diren mota guztietako gehikuntza edo hobekuntzekin.

23. artikulua. Nafarroako Lan Auzitegiari men egitea.

Hitzarmen hau sinatu duten alderdiek hitzartu dute interpretazioan eta aplikazioan sortzen diren desadostasun eta gatazka guztiak, bai taldekoak bai banakakoak, Nafarroako Lan Gatazkak Konpontzeko Auzitegiaren esku jarriko direla, bitartekotza eta adiskidetze faseetan, eta alderdiak beren borondatez aipatu auzitegiaren arbitraje prozeduraren esanetara jartzeko ahaleginak eginen direlako konpromisoa agertzea.

Klausula hau, beraz, alderdiak Lan Gatazkak Konpontzeko Auzitegiari atxikitzearen adierazpena da, Langileen Estatutuko 83. artikuluak arautzen duen eraginkortasun orokorreko izaera du eta, horren ondorioz, itunak enpresaburuak, sindikatuak eta langileak behartzen ditu beren desadostasunak epaiketara jo aitzin aipatu auzitegiaren bitartekotza eta adiskidetze prozeduretan azaltzera. Hori horrela, ez da nahitaezkoa atxikimendu espresua eta banakakoa egitea, borondatezko atxikipena behar den prozeduran izan ezik, zein bultzatzeko eta sustatzeko konpromisoa hartu baitute lan hitzarmen honen sinatzaileek.

24. artikulua. Lansarien araubidea ez aplikatzeko klausula.

Bi urtez jarraian behin eta berriz izandako galeren ondorioz, ordezkarien edo batzordeko kideen oniritziarekin, enpresaren batek hitzarmen honetatik kanpo gelditzea erabakitzen badu, Langileen Estatutuan ezarritako moduan egin ahal izanen du. Enpresak ordezkari sindikalik ez badu, hitzarmenaren batzorde mistoari eskatu beharko dio hitzarmenetik kanpo gelditzeko oniritzia. Batzorde horrek bere gain hartuko ditu legeak langileen ordezkariei edo enpresa batzordeko kideei ematen dizkien ahalmen guztiak. Hitzarmenetik kanpo gelditzeko aukera hitzarmen hau Nafarroako ALDIZKARI OFIZIALean argitaratu eta hurrengo 15 egunen barnean erabili behar da.

Hitzarmen kolektibotik kanpo gelditu eta bertako taulak osorik aplikatzen ez dituzten enpresek, errentagarritasuna eta ordaintzeko gaitasuna berreskuratzen dituztenean, hitzarmen kolektiboaren indarraldiaren hasieratik ordaindu gabe utzi dituzten lansariak ordaindu beharko dizkiete langileei.

Kopuru horiek erreklamatzeko eskubidearen preskripzioa ez da hasiko harik eta enpresak lehen balantze positiboa lortu arte, alegia, aitortutako zorra osorik edo hein batean ordaintzeko moduan egon arte.

25. artikulua. Batzorde Mistoa.

Hitzarmenaren interpretazioaren inguruko zalantzak eta, bereziki, lanaldiari eta lan ordutegiari buruz itundutakoaren aplikazioa argitzeko, Batzorde Mistoa sortuko da, hitzarmen honen negoziazioan parte hartu duten langileen bi ordezkarik eta enpresaburuen beste bik osatua.

Auzitara jo baino lehen (aurreko lerroaldean aipatutako gaietan), txostena eskatu beharko zaio Batzorde Mistoari.

Batzorde Mistoak bilera eginen du kideek egokitzat jotzen dutenean, edo txostena eskatzen zaionean, eskaera jaso eta 15 eguneko epean.

Batzorde Mistoak arbitrajeko erabakiak hartu ahal izanen ditu, hitzarmenaren aplikazioa dela-eta desadostasunak dituzten aldeek hala eskatzen badiote. Batzordearen erabakiak lotesleak izanen dira aldeentzat.

XEDAPEN IRAGANKORRA

I.-Kontratazioak.

a) Produkzioaren inguruabarrengatik.-Aldeek adostu dute enpresei baimena ematea behin-behineko langileak kontratatzeko -gehieneko aldirako-, martxoaren 24ko 1/1995 Errege Lege Dekretuaren 15. artikuluko 1. zenbakiko b) letrako lehen paragrafoko azken tartekiak aurreikusten duen moduan.

b) Erretiroa eta errelebo kontratua.-Martxoaren 24ko 1/95 Errege Dekretuaren 12. artikuluko 6. puntuan ezarritako baldintzak betetzen dituzten langileek erretiro partziala hartu ahal izanen dute -lanaldia eta lansaria murriztuta-. Enpresak konpromisoa hartzen du errelebo kontratua eginen diela erretiro partziala hartzen duten langileen ordezkoei, erretirodunak lanik egiten ez duen aldirako. Erretiro partziala onar dadin, ordezkapen kontraturako pertsona egokia aurkitu behar da, behar adinako prestakuntza duena. Enpresak ez badu aurkitzen, erretiroa hartu nahi duen langileak berak proposatzen ahalko du. Erretiro partziala duenak erretiro osoa hartu arte iraunen du errelebo kontratuak.

Bigarrena.-2005eko eta 2006ko atzerakinak 2008ko martxoaren 30a baino lehen ordainduko dira eta 2007koak 2008ko uztailaren 30a baino lehen. 2008ko taulak kalkulatzeko, aurreko urteetako igoeren emaitzako taulei %3 gehituko zaie (aurreikusitako KPIa gehi puntu bat), eta berehala aplikatuko dira, hitzarmen hau argitaratu eta hurrengo hilean.

Enpresek konpentsatu eta irentsi ahal izanen dituzte 2005., 2006. eta 2007. urteetako negoziazio aldi honetan beren langileei emandako soldata igoerak, hitzarmeneko etorkizuneko igoeren kontura edo haiek aurreikusiz emandakoak badira.

LEHEN ERANSKINA

Diziplina araubidea

Enpresetako langileen ekintza edo ez-egite zigorgarriak arinak, larriak edo oso larriak izanen dira, beren izaeraren eta inguruabarren arabera.

Honako hauek hutsegite arinak dira:

1.-Bidezko arrazoirik izan gabe edozein lanetan utzikeriaz aritzea, erratzea edo berandutzea.

2.-Behin, bi aldiz edo hiru aldiz hilabetean, lanera berandu ailegatzea, ordu erditik behera, berandu ailegatzearen ondorioz enpresak enkargatu dion lanean kalte larririk sortzen ez bada, langilearen eginkizun bereziagatik. Kalte larririk sortuko balitz, berandu ailegatzea hutsegite larritzat hartuko litzateke.

3.-Baja dagokion garaian ez aurkeztea, zentzuzko motiboa dela medio lanera huts egiten denean, non eta frogatzen ez den ezinezkoa izan dela.

4.-Lanetik denbora gutxirako alde egitea, bidezko arrazoirik gabe.

5.-Arreta gabezia txikiak materiala zaintzeko orduan.

6.-Jendea behar den adeitasunez eta arretaz ez atenditzea.

7.-Ohiko bizilekuz aldatzearen berri ez ematea enpresari.

8.-Beste langileekin enpresaren esparruan eztabaidan aritzea, jendaurrean gertatu ez bada.

9.-Egun batean lanera huts egitea behar den baimenik edo zentzuzko motiborik gabe.

Honako hauek hutsegite larriak dira:

1.-Lanera berandu iristea hiru alditik gora hilabetean, bidezko arrazoi justifikaturik gabe.

2.-Lanera bi egunez huts egitea hilabetean, bidezko arrazoi justifikaturik gabe. Hutsegite horiek bezeroei kaltea eragiten badiete, hutsegite oso larriak izanen dira.

3.-Edozein jokotan edo jostaketatan aritzea, lanean egon beharreko denboran.

4.-Eritasunaren edo istripuaren itxurak egitea.

5.-Lanean goragokoen esanak ez betetzea. Ez betetze horren ondorioz kalte nabarmenik egiten bazaio lanari edota jokabide horrek enpresari kalte nabaria sortzen badio, hutsegite oso larritzat jotzen ahal da.

6.-Beste langile baten laneratzea simulatzea, haren ordez sinatuz edo fitxatuz.

7.-Establezimenduko hornidurak edo salgaiak zaintzerakoan axolagabekeria larria izatea.

8.-Bezeroenganako begirune edo adeitasun falta nabarmena.

9.-Lankideekin eztabaida gogaikarrietan aritzea bezeroen aurrean.

10.-Beharrezko baimenik gabe lan partikularrak egitea lanorduetan, eta orobat, enpresaren lanabesak norbere probetxurako erabiltzea.

11.-Lanetik kanpora mozkortzea, enpresaren lan-jantzia eramanda.

12.-Hiruhileko berean bost hutsegite arin baino gehiago egitea, nahiz desberdinak izan, eta langileari hitzezko kargu hartzea ez den zigorra jarri izan bazaio.

Honako hauek hutsegite oso larriak dira:

1.-Justifikatu gabe lanera huts egitea, sei hilabetean hamar alditik gora, edo hogei alditik gora urtebetean.

2.-Iruzurra, fideltasun falta edo konfiantza-abusua egindako lanetan, baita lankideekiko harremanetan edo enpresarentzat lanean ari den beste edonorekin; enpresaren baimen espresurik gabe merkataritza edo industria arloko negoziazioak egitea bere kontura edo beste norbaitentzat.

3.-Enpresaren lanabes, tresna, makineria, aparatu, instalazio, eraikin, altzari eta dokumentuak desagerrarazi, hondatu, suntsitu edo haustea.

4.-Enpresan edo enpresatik kanpora ebatsi edo lapurtzea, edo ondasunak bidegabeki erabiltzea.

5.-Mozkortzea edo drogen abusua lanean edo lantokitik kanpora, betiere, bigarren kasuan, maiz egiten badu.

6.-Enpresaren isilpeko gutunen edo agirien sekretua haustea.

7.-Enpresakoa ez den norbaiti nahitaez isilpean eduki beharreko datuak ezagutaraztea.

8.-Bidegabeko lehian edo enpresak lan kontratuan bateraezin izendatu dituen jardueretan aritzea.

9.-Hitzezko eta egitezko tratu txarrak ematea, agintekeria edo errespetu falta larria nagusiei edo haien ahaideei, bai eta lankide eta menpekoei ere.

10.-Biraoka aritzea, maiz egiten bada.

11.-Garbitasun falta, betiere behin baino gehiagotan ohartarazi baldin bazaio langileari, edo harekin lan egiten duten lankideak zentzuzko arrazoiengatik kexatzeko moduko garbitasun falta denean.

12.-Lanean ohiko errendimendua nahita gutxitzea denbora luzean.

13.-Lankideekin liskarrak eta iskanbilak maiz sortzea.

14.-Lehenbiziko hutsegite larria egin ondoko sei hilabeteen barrenean beste hutsegite larri bat egitea, beste mota batekoa izanik ere.

Zehapenak:

Hauek dira hutsegiteengatik jartzen ahal diren gehieneko zehapenak:

Hutsegite arinengatik:

-Ahozko kargu-hartzea.

-Idatzizko kargu-hartzea.

-Bi egunera arteko enplegu-soldaten etenaldia.

Hutsegite larriengatik:

-Hiru egunetik zazpira bitarteko enplegu-soldaten etenaldia.

Hutsegite oso larriengatik:

-Hamasei egunetik hirurogeira bitarteko enplegu-soldaten etenaldia.

-Hitzarmenaren 4. artikuluaren arabera antzinatasunagatik langileari aldian behin legozkiokeen igoerak lau urte atzeratzea, gehienez.

-Mailaz jaistea, are zehatuaren kategoriako azken mailaraino ere.

-Kategoriaz igotzeko desgaitzea bost urtetik beherako aldirako.

-Lantokiz aldatzea nahitaez, beste herri batera, kalte-ordaina jasotzeko eskubiderik gabe.

-Kaleratzea, enpresan izandako eskubide guztiak galduz.

II. ERANSKINA

2005eko lansarien taulak

OINARRIZKO HITZARMENEKO

Arduradun nagusia 1.287,81 112,64 21.006,61

Biltegiko burua 1.042,32 112,64 17.324,35

Sukurtsaleko burua 1.287,81 112,64 21.006,61

Taldeko burua 973,20 112,64 16.287,53

Ataleko burua 961,09 112,64 16.105,93

Saltzailea, eroslea, arduraduna 1.042,32 112,64 17.324,35

Saltzaile bidaiaria 870,54 112,64 14.747,67

Plaza-artekaria 856,47 112,64 14.536,59

Saltzailea, 2 urtetik gora lanean 841,91 112,64 14.318,14

Saltzailea, 2. urtea 767,03 112,64 13.195,00

Saltzailea, 1. urtea 767,03 58,42 12.381,73

Morroi espezializatua 772,14 58,42 12.458,40

Morroia 746,05 58,42 12.066,95

Prestakuntza, 1. urtea 385,40 58,42 6.657,24

Prestakuntza, 2. urtea 439,68 58,42 7.471,39

Administrazioko burua 1.425,02 112,64 23.064,79

Ataleko burua 1.104,24 112,64 18.253,07

Kontularia, kutxazaina etab. 1.021,99 112,64 17.019,39

Adm. ofiziala 918,62 112,64 15.468,82

Adm. laguntz., 2 urtetik gora lanean 841,91 112,64 14.318,14

Adm. laguntz., 2. urtea 767,03 112,64 13.195,00

Adm. laguntz., 1. urtea 767,04 58,42 12.381,79

16-18 urteko izangaiak 555,74 58,42 9.212,34

16-18 urteko kutxazain laguntz. 562,72 58,42 9.317,09

18-20 urteko kutxazain laguntz. 590,68 58,42 9.736,45

20-22 urteko kutxazain laguntz. 698,67 58,42 11.356,32

22-25 urteko kutxazain laguntz. 738,14 58,42 11.948,33

25 urteko kutxazain laguntz. 841,91 112,64 14.318,14

2006ko lansarien taulak

OINARRIZKO HITZARMENEKO

Arduradun nagusia 1.325,80 115,96 21.626,31

Biltegiko burua 1.073,07 115,96 17.835,41

Sukurtsaleko burua 1.325,80 115,96 21.626,31

Taldeko burua 1.001,91 115,96 16.768,02

Ataleko burua 989,45 115,96 16.581,05

Saltzailea, eroslea, arduraduna 1.073,07 115,96 17.835,41

Saltzaile bidaiaria 896,22 115,96 15.182,73

Plaza-artekaria 881,74 115,96 14.965,42

Saltzailea, 2 urtetik gora lanean 866,74 115,96 14.740,52

Saltzailea, 2. urtea 789,66 115,96 13.584,25

Saltzailea, 1. urtea 789,66 60,14 12.746,99

Morroi espezializatua 794,92 60,14 12.825,93

Morroia 768,05 60,14 12.422,92

Prestakuntza, 1. urtea 396,77 60,14 6.853,63

Prestakuntza, 2. urtea 452,65 60,14 7.691,80

Administrazioko burua 1.467,06 115,96 23.745,21

Ataleko burua 1.136,81 115,96 18.791,54

Kontularia, kutxazaina etab. 1.052,14 115,96 17.521,46

Adm. ofiziala 945,72 115,96 15.925,15

Adm. laguntz., 2 urtetik gora lanean 866,74 115,96 14.740,52

Adm. laguntz., 2. urtea 789,66 115,96 13.584,25

Adm. laguntz., 1. urtea 789,66 60,14 12.747,06

16-18 urteko izangaiak 572,13 60,14 9.484,10

16-18 urteko kutxazain laguntz. 579,32 60,14 9.591,94

18-20 urteko kutxazain laguntz. 608,10 60,14 10.023,67

20-22 urteko kutxazain laguntz. 719,28 60,14 11.691,33

22-25 urteko kutxazain laguntz. 759,91 60,14 12.300,81

25 urteko kutxazain laguntz. 866,74 115,96 14.740,52

2007ko lansarien taulak

OINARRIZKO HITZARMENEKO

Arduradun nagusia 1.394,74 121,99 22.750,88

Biltegiko burua 1.128,87 121,99 18.762,85

Sukurtsaleko burua 1.394,74 121,99 22.750,88

Taldeko burua 1.054,01 121,99 17.639,95

Ataleko burua 1.040,90 121,99 17.443,27

Saltzailea, eroslea, arduraduna 1.128,87 121,99 18.762,85

Saltzaile bidaiaria 942,83 121,99 15.972,23

Plaza-artekaria 927,59 121,99 15.743,62

Saltzailea, 2 urtetik gora lanean 911,81 121,99 15.507,03

Saltzailea, 2. urtea 830,72 121,99 14.290,63

Saltzailea, 1. urtea 830,72 63,27 13.409,83

Morroi espezializatua 836,26 63,27 13.492,87

Morroia 807,99 63,27 13.068,91

Prestakuntza, 1. urtea 417,40 63,27 7.210,02

Prestakuntza, 2. urtea 476,18 63,27 8.091,77

Administrazioko burua 1.543,34 121,99 24.979,96

Ataleko burua 1.195,92 121,99 19.768,70

Kontularia, kutxazaina etab. 1.106,85 121,99 18.432,58

Adm. ofiziala 994,90 121,99 16.753,26

Adm. laguntz., 2 urtetik gora lanean 911,81 121,99 15.507,03

Adm. laguntz., 2. urtea 830,72 121,99 14.290,63

Adm. laguntz., 1. urtea 830,73 63,27 13.409,90

16-18 urteko izangaiak 601,88 63,27 9.977,27

16-18 urteko kutxazain laguntz. 609,45 63,27 10.090,72

18-20 urteko kutxazain laguntz. 639,73 63,27 10.544,90

20-22 urteko kutxazain laguntz. 756,68 63,27 12.299,28

22-25 urteko kutxazain laguntz. 799,43 63,27 12.940,45

25 urteko kutxazain laguntz. 911,81 121,99 15.507,03

2008ko lansarien taulak

OINARRIZKO HITZARMENEKO

Arduradun nagusia 1.436,58 125,65 23.433,40

Biltegiko burua 1.162,73 125,65 19.325,74

Sukurtsaleko burua 1.436,58 125,65 23.433,40

Taldeko burua 1.085,63 125,65 18.169,15

Ataleko burua 1.072,12 125,65 17.966,57

Saltzailea, eroslea, arduraduna 1.162,73 125,65 19.325,74

Saltzaile bidaiaria 971,11 125,65 16.451,40

Plaza-artekaria 955,41 125,65 16.215,93

Saltzailea, 2 urtetik gora lanean 939,17 125,65 15.972,24

Saltzailea, 2. urtea 855,64 125,65 14.719,35

Saltzailea, 1. urtea 855,64 65,17 13.812,13

Morroi espezializatua 861,34 65,17 13.897,66

Morroia 832,23 65,17 13.460,98

Prestakuntza, 1. urtea 429,92 65,17 7.426,32

Prestakuntza, 2. urtea 490,47 65,17 8.334,53

Administrazioko burua 1.589,64 125,65 25.729,36

Ataleko burua 1.231,80 125,65 20.361,76

Kontularia, kutxazaina etab. 1.140,06 125,65 18.985,56

Adm. ofiziala 1.024,74 125,65 17.255,86

Adm. laguntz., 2 urtetik gora lanean 939,17 125,65 15.972,24

Adm. laguntz., 2. urtea 855,64 125,65 14.719,35

Adm. laguntz., 1. urtea 855,65 65,17 13.812,20

16-18 urteko izangaiak 619,94 65,17 10.276,59

16-18 urteko kutxazain laguntz. 627,73 65,17 10.393,45

18-20 urteko kutxazain laguntz. 658,92 65,17 10.861,25

20-22 urteko kutxazain laguntz. 779,38 65,17 12.668,26

22-25 urteko kutxazain laguntz. 823,41 65,17 13.328,66

25 urteko kutxazain laguntz. 939,17 125,65 15.972,24

Iragarkiaren kodea: F0803053