64. ALDIZKARIA - 2007ko maiatzaren 23a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

84/2007 FORU AGINDUA, apirilaren 20koa, Vianako Printzea Erakundea-Kultura eta Turismo Departamentuko kontseilariak emana, Nafarroako Liburutegi Nagusian, Liburutegi Zerbitzuaren menpekoa baita, prestakuntza praktikak egiteko hiru bekatarako deialdia onetsi eta ebaluazio batzordea hautatzen duena.

Kultura Zuzendaritza Nagusiko Liburutegi Zerbitzuak txosten bat aurkeztu du eta bertan proposatu Nafarroako Liburutegian aritzeko prestakuntzako hiru bekaren deialdia eta hura arautuko duten oinarriak onets daitezela.

Nafarroako Foru Komunitateko Administrazioan eta haren erakunde autonomoetan prestakuntzarako bekak emateko araubide orokorra ezartzen duen apirilaren 10eko 172/2004 Foru Dekretuan xedatutakoari jarraikiz,

AGINDU DUT:

1. Nafarroako Liburutegi Nagusian, Liburutegi Zerbitzuaren menpekoa baita, prestakuntza praktikak egiteko hiru bekatarako deialdia egitea.

2. Deialdia arautuko duten oinarriak onestea.

3. Hona hemen eskabideak baloratu beharko dituen batzordeko kideak: Javier Itúrbide Díaz jauna, Kultura Zuzendaritza Nagusiko Liburutegi Zerbitzuko zuzendaria, batzordeburu arituko dena, eta Juan Francisco Elizari Huarte jauna, Nafarroako Liburutegi Nagusiko Ataleko burua, Concepción Vidaurre Donamaría andrea, Fondo Dokumentala Kudeatzeko Bulegoko burua, eta Roberto San Martín Casi jauna, Ondare Bibliografikoaren Bulegoko burua, batzordekide arituko baitira.

4. Guztira, 26.100 euroko gastua onestea. 15.225 euro 2007ko gastuen aurrekontuko "Bekadunak" izeneko A21001 A2410 4800 332200 kontusailaren kargura ordainduko dira eta, gainerakoa, 10.875 euro, 2008ko ekitaldiko aurrekontuan kontzeptu horretarako sortzen den kontusailaren kargura, betiere aurrekontuan behar adina diru bada.

5. Deialdi hau Nafarroako ALDIZKARI OFIZIALean argitara dadila agintzea.

Iruñean, 2007ko apirilaren 20an._Vianako Printzea Erakundea-Kultura eta Turismo Departamentuko kontseilaria, Juan Ramón Corpas Mauleón.

ERANSKINA

Nafarroako Liburutegi Nagusian, Liburutegi Zerbitzuaren menpekoa baita, aritzeko prestakuntzako hiru beka emateko deialdiaren arauak. Deialdia honako hauen menpean egonen da: apirilaren 19ko 172/2004 Foru Dekretua, 2004ko maiatzaren 12ko Nafarroako ALDIZKARI OFIZIALean argitaratua eta Nafarroako Foru Komunitateko Administrazioaren eta haren erakunde autonomoen prestakuntza bekak emateko araubide orokorra ezartzen duena, eta Dirulaguntzei buruzko azaroaren 9ko 11/2005 Foru Legea, 2005eko azaroaren 14ko Nafarroako ALDIZKARI OFIZIALean argitaratua

ARAUAK

1._Prestakuntza beken helburua.

Deialdiko prestakuntza beken helburua unibertsitateko lizentziadunen prestakuntza akademikoa osatzea da Nafarroako Liburutegi Nagusian, liburuzain izateko ezagupide teoriko eta praktikoa jasoz. Izan ere, aipatu liburutegia Nafarroako liburutegi publikoen sareko liburutegi nagusia da, baita Nafarroako ondare bibliografikoaren arduradun nagusia ere.

2._Beka kopurua.

Prestakuntzako hiru beka deitu dira.

3._Beken iraupena.

Prestakuntza bekak hamabi hilabete artekoak izan daitezke, gozatzen hasten direnetik hasita. Dena dela, kasuko unitate administratiboak eskatzen baldin badu, organo eskudunak zilegi izanen du bekak beste horrenbeste luzatzea, baina, gehienez ere, hiru urtez luzatuko dira, hasierako aldia eta luzapenak barne.

4._Beken dotazio ekonomikoa, ordaintzeko modua eta Administrazioarekiko harremana.

4.1. Prestakuntza bekek 8.700 euro izanen dituzte urtean. Zenbateko hori aldian-aldian aldatu edo eguneratuko da, Vianako Printzea Erakundea-Kultura eta Turismo Departamentuko kontseilariaren foru agindu bidez.

4.2. Hilabetero ordainduko dira, dagokien zatia, hilaren bukaeran.

4.3. Prestakuntza beketako onuradunei ematen zaien dirua ez da soldata edo lansaritzat hartuko, dirulaguntza ekonomiko publikotzat baizik.

4.4. Bekak erabiltzea eta bekaduna izatea ez da zerbitzuak ematea, eta egoera horrek ez dakar berarekin lan harremana, administratiboa edo estatutupekoa sortzea Nafarroako Foru Komunitateko Administrazioarekin edo haren erakunde autonomoekin, ez eta antzeko eskubiderik lortzea ere. Administrazioak ez du konpromisorik hartuko beka bukatutakoan bekaduna bere plantillan sartzeko.

4.5. Prestakuntza bekadunei agintzen zaizkien lan edo jarduerak, Liburutegi Zerbitzuko langileek gainbegiratuko dituzte, horiek izanen baitira lanen erantzuleak. Bekadunek ezin izanen dituzte funtzionario publikoen eginkizunak bete edo beretzat hartu, ez eta hirugarrenen aurrean Administrazio Publikoaren kide, ordezkari edo agente gisa agertu ere.

4.6. Praktikaldiak iraun bitartean bekadunek hogeita hamar atseden egun izanen dituzte, hilabete bakoitzeko 2,5 egun natural.

4.7. Bekadunek prestakuntzarako behar diren joan-etorriak eginen dituzte.

4.8. Organo eskudunak prestakuntzarako bekaldia eten ahalko du onuradunaren gaixotasun edo istripu kasuetan, bai eta ezinbesteko arrazoiak edo behar bezala justifikatutako bestelako gorabeherak daudenean ere. Etenaldiak beharrezkotzat jotzen den denbora iraunen du eta haren ondorioak arrazoi bakoitzaren araberakoak izanen dira.

5._Bekadunek bete beharreko baldintzak eta horiek egiaztatzeko modua.

5.1. Beka bat lortu ahal izateko, betebehar hauek izanen dira:

a) Adinez nagusia izatea.

b) Espainiako herritarra izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko itunen arabera, langileen joan-etorri askea aplikatzen duen estaturen batekoa. Dena den, Espainiako nazionalitatea ez dutenek gaztelaniaz behar adina badakitela frogatu beharko dute.

c) Jarduteko gaitasun osoa izatea eta Nafarroako Foru Komunitatearen eta haren erakunde autonomoen laguntza eta dirulaguntza publikoak jasotzeko desgaitua ez egotea.

d) Bizitokia Nafarroan izatea, deialdiaren eguna baino urte bat lehenagotik, gutxienez.

e) Unibertsitateko lizentziadun, arkitekto, goi mailako ingeniari titulua edo baliokidea izatea, Espainiako agintariek luzatua edo homologatua.

f) Eskatutako titulu hori prestakuntza bekarako deialdia egin aurreko hiru urteen barrenean eskuratua izatea.

g) Bekaren prestakuntza jardueran aritzea galaraz dezakeen ezgaitasun fisikorik edo bestelako gaixotasunik ez izatea.

h) Ez dute aukerarik izanen aurretik Liburutegi, Museo eta Agiritegietan praktikak egiteko Nafarroako Gobernuak emandako bekez baliatu direnek.

5.2. Betebehar horiek egiaztagirien bidez eta idatziz frogatu beharko dira, prestakuntza beka jasotzeko eskaera aurkeztearekin batera. Hori guztia Nafarroako Gobernuaren Erregistro Orokorreko bulegoetan (Karlos III.aren etorbidea, 2, Iruña) edo Vianako Printzea Erakundea-Kultura eta Turismo Departamentuko erregistroan (Iruñeko Navarreria kalean, 39. zk.) aurkeztu beharko da, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatutako bideetako bat erabiliz. Hauek dira aurkeztu beharreko agiriak:

a) Eskabidea, http://www.navarra.es/home_es/Catalogo+de+ser- vicios/Todos+los+servicios/Asistentes/default.htm webgunean eskura egonen den eskabide orokorreko ereduari jarraikiz, arau hauetan ezarritako epean eta moduan aurkeztu beharrekoa (ikus 7. puntua).

b) Nortasun Agiri Nazionala edo izangaiaren nazionalitatea eta identitatea frogatzen dituen beste agiri baliokideren bat, eta udalaren errolda ziurtagiria, eskabidea aurkeztu aurreko urte osoan Nafarroan bizi izan dela egiaztatzeko.

c) Espediente akademikoaren ziurtagiria, maila bakoitzeko gai guztien kalifikazioekin, zein deialditan gainditu zituen espresuki aipatzen duena.

d) Izangaiaren "curriculum vitae-a", ikasketa osagarriak, ikastaroak, argitalpenak, lortutako bekak, egindako ikerlanak eta izangaiari egokiak iruditzen zaizkion gainerako jarduera edo merezimendu guztiak adierazten dituena. Agertutako merezimenduak jatorrizko edo ofizialki konpultsatutako agiri egokien bidez behar dira egiaztatu.

e) Nafarroako Ogasun Publikoko zergaduna bada, zerga betebeharrak eguneraturik dituela egiaztatzen duen ziurtagiria.

f) Zinpeko aitorpena, jakinaraziz prestakuntza beken xede bereko beste bekarik edo laguntzarik eskatu den edo jasotzen ari den Vianako Printzea Erakundea-Kultura eta Turismo Departamentutik edo administrazio edo erakunde publiko edo pribatuen eskutik.

Agertutako merezimenduak jatorrizko edo ofizialki konpultsatutako agiri egokien bidez behar dira egiaztatu.

5.3. Prestakuntza bekak jasotzeko eskabidea aurkezteak berarekin dakar eskatzaileak deialdiaren arauak onartzea.

6._Eskatzaileek aurkeztutako merezimenduak baloratzeko modua eta irizpideak.

6.1. Vianako Printzea Erakundea-Kultura eta Turismo Departamentuko kontseilariak izendatuko duen ebaluazio batzordeak hautatuko ditu bekadunak. Batzordeak aurkezten diren eskaerak aztertu eta baloratuko ditu eta horretarako beharrezkotzat jotzen dituen txostenak eskatu ahalko ditu. Baloratu ondoren, bekak puntu gehien ateratzen dituztenei ematea proposatuko du, ondoko baremoan oinarrituz:

a) Espediente akademikoa: 10 puntu gehienez.

Ikasketa espedientea baloratzeko honako irizpide hauek hartuko dira kontuan:

Irakasgaiak ondoko baremo honen arabera kontatuko dira:

Gutxiegi: 0 puntu.

Nahikoa: 1 puntu.

Oso ongi: 2 puntu.

Bikain: 3 puntu.

Ohorezko matrikula: 4 puntu.

Atal honi dagozkion 10 puntuak horrela kalkulatuko dira: emandako irakasgai guztien batuketa egin eta erabilitako deialdi kopuruaz zatitu ondoren, 2,5 koefizienteaz biderkatuko da.

b) Beste ikasketa edo ikastaro batzuk (gehienez ere 5 puntu)

Honako irizpidearen arabera baloratuko dira:

Eskatzen denaz gain, lizentziadun titulua edo Bibliotekonomia eta Dokumentazioko diplomadun titulua: 2,50 puntu.

Bibliotekonomia eta Dokumentazioko Doktorego Kurtsoa edo Masterra: 1,50 puntu.

Bibliotekonomia eta Dokumentazioko ikastaroa, 60 ordutik gorakoa bada: 0,50 puntu.

Bibliotekonomia eta Dokumentazioko ikastaroa, 20 ordutik gorakoa bada: 0,15 puntu.

Bibliotekonomia eta Dokumentazioko ikastaroa, 20 ordutik beherakoa bada: 0,05 puntu.

c) Argitalpenak, komunikazioak biltzarretan, etab.: 5 puntu gehienez.

Honako irizpide honen arabera baloratuko dira:

Monografien argitalpen bakoitzeko, egilea bakarra denean: 1 puntu.

Beste batzuekin batera egindako monografia: 0,50 puntu.

Artikuluen argitalpen bakoitzeko, egilea bakarra denean: 0,50 puntu.

Beste batzuekin batera argitaratutako artikuluak: 0,25 puntu.

Biltzarretan aurkeztu baina argitaratu ez diren komunikazioak: 0,25 puntu.

Azkeneko bi ataletan aipatutako ikasketa, ikastaro, argitalpen, bekek eta gainerakoek Bibliotekonomia eta Dokumentazioaren ingurukoak izan beharko dute. Bestela ez dira puntuatuko.

6.2. Prestakuntza beken banaketa Vianako Printzea Erakundea-Kultura eta Turismo Departamentuko kontseilariak onetsiko du, foru agindu bidez.

6.3. Onuradun bakoitzari ofizialki jakinaraziko zaio prestakuntzarako beka eman zaiola eta, jardunean hasi aurretik, interesatuak idatziz adierazi beharko du onartzen duela.

7._Eskaera egiteko eta eskatutako baldintzak frogatzeko epeak.

Prestakuntza bekak deialdi hau Nafarroako ALDIZKARI OFIZIALean argitara eman eta ondoko hamabost egun naturaleko epean eskatu ahal dira.

8._Ebaluazio Batzordearen osaera.

Ebaluazio Batzordea honako hauek osatuko dute: Batzordeko burua, Javier Itúrbide Díaz jauna, Kultura Zuzendaritza Nagusiko Liburutegi Zerbitzuko zuzendaria. Batzordeko kideak: Juan Francisco Elizari Huarte jauna, Nafarroako Liburutegi Nagusiaren Ataleko burua; Concepción Vidaurre Donamaría andrea, Fondo Dokumentala Kudeatzeko Bulegoko burua eta Roberto San Martín Casi jauna, Ondare Bibliografikoaren Bulegoko burua.

9._Ebazpena jakinarazteko modua eta epea.

9.1. Hautatzeko prozeduraren ebazpena interesatuei jakinaraziko zaie Administrazio prozedura erkideari buruzko legerian ezarritako moduan, eta jendaurrean jarriko da Nafarroako Liburutegi Nagusiko iragarki oholean.

9.2. Prozedura ebazteko hiru hilabeteko epea bukatzen baldin bada berariazko ebazpena jakinarazi edo argitaratu gabe, eskabidea administrazioaren isiltasunaren bidez ezetsi dela ondorioztatu ahalko da.

10._Prestakuntza jarduerak egiteko lokalak eta zuzendaritza emanen dituen unitate administratiboa, eta prestakuntza jarduera horien nondik-norakoak.

10.1. Prestakuntza praktikak Vianako Printzea Erakundea-Kultura eta Turismo Departamentuko Kultura Zuzendaritza Nagusiko Liburutegi Zerbitzuari atxikita egonen dira.

10.2. Bekadunak Liburutegi Zerbitzuan prestatuko dira eta Nafarroako Liburutegi Nagusian (Iruña) arituko dira, ahal dela, nahiz eta salbuespen gisa eta aldi baterako, beste liburutegi batzuetara joan, konparazio batera, Nafarroako Ondare Bibliografikoaren Katalogo Kolektiboa prestatzeko Liburutegi Zerbitzuarekin hitzarmena dutenetara.

10.3. Liburutegi Zerbitzuko zuzendariak izendatuko du tutore bat, eskatutako titulazioa edo goragokoa duena, bekadunen jarduerak zuzendu eta gainbegiratzeko.

10.4. Tutoreak egin beharreko lanak aginduko ditu, programatu eta prestakuntza bekadunek beren eginbehar orokor eta berariazkoak betetzen dituzten begiratuko du.

11._Prestakuntzako praktiken hasiera eta iraupena. Prestakuntza bekari uko egitea.

11.1. Prestakuntza beka jasotzen duenak 2007ko ekainaren 1ean hasi beharko du jardunean. Horrela egiten ez badu, eta organo eskudunak ezinbesteko kasua badela edo behar bezala arrazoitua dagoen bestelako kasua ematen dela uste badu, onuradunak bekari behin betiko uko egin diola ulertuko da.

11.2. Bekadunak hogeita hamar orduko jardunaldia izanen du astean, egun baliodunetan 8:00etatik 14:30ak arte.

11.3. Edozein arrazoi dela-eta, onetsitako prestakuntza bekari uko egiten bazaio, Nafarroako Gobernuko Kultura Zuzendaritza Nagusiko Liburutegi Zerbitzuari jakinarazi behar zaio, idatziz.

11.4. Horrelako kasuetan, organo eskudunak hala erabakita, Ebaluazio Batzordeak prestaturiko puntuazioaren araberako zerrendan hurrengo denari deituko zaio, bekaldia bukatu bitartean jardun dezan. Bigarren onuradun hori bekaduntzat hartuko da ondorio guztietarako, deusetan galarazi gabe lehenengo bekadunak uko egin arte zituen betebeharrak.

12._Bekadunaren berariazko betebeharrak, eskubideak eta administrazioaren aurrean duen erantzukizuna.

12.1. Honako hauek dira bekadunak prestakuntzaldian dituen betebehar orokorrak:

a) Beka emateko arrazoitzat jo den prestakuntza jarduera egitea eta hori frogatzea. Prestakuntzaren administrazio unitate arduradunak lan eta txostenak aurkezteko eskatu ahalko du, bekadunaren errendimenduaren jarraipena eta ebaluazioa egiteko.

b) Beka emateko betebehar eta baldintzak betetzea.

c) Eskumena duten organoek eman den bekaren inguruan egin ditzaketen egiaztapen lan guztiak onartzea.

d) Liburutegi Zerbitzuari jakinaraztea harturiko bekari espresuki uko egiten diola, jarduna utzi baino hamabost egun natural lehenago, gutxienez.

e) Beka dela-eta eginiko jardueraren zuzeneko ondorioa den edozein argitalpenetan bekaduna dela adieraztea.

f) Zein erakundetan jarduten duen, bertako barne edo funtzionamendu araubidea betetzea.

g) Prestakuntzaldia bukaturik, gehienez ere hilabeteko epean, eginiko lanen memoria igorri beharko du Liburutegi Zerbitzura, baita lorturiko ezagutza teknikoei buruzko balorazioa ere.

12.2. Prestakuntza bekadunen eskubideak dira:

a) Bekadunek, prestakuntza egiten ari direneko administrazio publikoarekin duten harreman juridikoa ezertan aldatu gabe, eskubidea izanen dute zerbitzu eta bidaien arabera dituzten gastuengatik funtzionarioei dagozkien ordain berberak jasotzeko.

b) Orobat, bekadunek administrazio publikoaren kalte-ordaina jasotzeko eskubidea izanen dute, zerbitzu publikoen funtzionamenduaren ondorioz kalteak edo lesioak dituztenean, ezinbesteko kasuetan izan ezik. Administrazioaren ondare erantzukizuna administrazio bidetik eskatuko da.

c) Foru Komunitateko Administrazioa izanen da prestakuntza jardueretan bekadunak hirugarrenei sortzen dizkien kalteen erantzulea, baina Administrazio horrek zilegi izanen du iruzur, erru edo zabarkeria larriagatik bekadunak izan dezakeen erantzukizuna eskatzea.

d) Asistentzia eta aprobetxamenduaren ziurtagiria jasotzeko eskubidea izanen dute, Liburutegi Zerbitzuan egindako prestakuntzaldian jasotako jakintza eta ezagutzaren araberakoa. Vianako Printzea Erakundea-Kultura eta Turismo Departamentuko Idazkaritza Teknikoak eginen du ziurtagiri hori.

13._Bateraezintasunak.

1. Prestakuntza beka emateko kontuan hartu diren baldintzak ezertan aldatzen badira eta betiere aldi berean hauekin ezin bateratu den beste dirulaguntzarik eskuratzen bada, deuseztatu edo aldatu eginen da kontzesiorako ebazpena.

2. Beka hauek bateraezinak dira Nafarroako Gobernuak artxibo, liburutegi edo museoetan praktikak egiteko ematen duen beste edozeinekin. Bateragarriak dira Nafarroako Gobernuaren, beste administrazio publiko batzuen, beste entitate publiko eta pribatu batzuen edo partikularren nazioko edo nazioarteko gainerako bekekin. Halakoetan, emandako beken zenbateko osoa ez da izanen 13.000 eurotik gorakoa. Aipatu zenbatekoa gainditzen bada, Vianako Printzea Erakundea-Kultura eta Turismo Departamentuak bekaren zenbatekoa eta iraupena dagokienean murriztuko ditu. Halakoetan, departamentuak gainerako izangaiei beste beka bat eskaini ahalko die, lortutako puntuen hurrenkerari jarraituz, hasierako bekaren iraupenaren eta zenbatekoaren osagarri gisa.

14._Ez-betetzeak.

Bekadunak bere gain hartutako betebehar eta eginkizunak betetzen ez baditu, haiek egiten ardurarik jartzen ez badu, errendimendu eta aprobetxamendu eskasa badu edo lanak kalitate gabekoak badira, beka aldi bateko edo betiko kentzea erabakiko du organo eskudunak, dagokion administrazio unitateak proposaturik eta interesatuari entzunaldia eman ondoren; horrekin batera dotazio ekonomikoaren zati proportzionala ere galduko du.

15._Deialdiko arauen aurka jar daitezkeen administrazio errekurtsoak.

Deialdi honen, bere arauen eta aplikatzeko egintzen kontra gora jotzeko errekurtsoa jartzen ahal da, Nafarroako Gobernuari zuzendua, Nafarroako ALDIZKARI OFIZIALean argitaratu eta biharamunetik hilabeteko epean.

16._Behar diren aurrekontu-kredituak.

Nafarroako Liburutegi Nagusian aritzeko prestakuntzako hiru beka emateko behar diren 26.100 eurotik, 15.225 euro ordaintzen ahal dira 2007ko Gastuen Aurrekontuko "Bekadunak" izeneko A 21001 A2410 4800 332200 kontusailetik, eta gainerakoa, kontzeptu horretarako sortzen den kontusailetik, hurrengo ekitaldi ekonomikorako onesten den aurrekontuan, betiere aurrekontuetan kreditu egokia eta nahikoa baldin bada.

Iragarkiaren kodea: F0707504