Iragarkia

144. ALDIZKARIA - 2007ko azaroaren 19a

I. NAFARROAKO FORU KOMUNITATEA

1.3. BESTELAKO XEDAPENAK

1.3.3. Nahitaezko desjabetzeak

135/2007 FORU AGINDUA, urriaren 30ekoa, Herri Lan, Garraio eta Komunikazio kontseilariak emana, "Zizur Nagusia-Ezkirotz bidea eraikitzea. Tartea: Ezkirozko saihesbidea" proiektua behin-behinekoz onetsi, jendaurrean jarri eta ukitutako toki entitateei entzunaldia ematen diena.

Proiektu, Trenbide eta Lan Hidraulikoen Zerbitzuak aditzera eman du "Zizur Nagusia-Ezkirotz bidea eraikitzea. Tartea: Ezkirozko saihesbidea" proiektua egiteko lanak jaso dituela Nafarroako Errepideen 2002-2009rako II. Plan Zuzentzaileak.

Nafarroako Gobernuak, 2006ko uztailaren 31n hartutako Erabakiaren bidez, "Zizur Nagusia-Ezkirotz bidea eraikitzea. Tartea: Ezkirozko saihesbidea" izeneko Udalez gaindiko Proiektu Sektoriala onetsi zuen, Herrilan, Garraio eta Komunikazio Departamentuak sustatuta.

Proiektu horren bitartez trazadura berria eginen da, saihesbide baten bidez, Ezkirozko hegoaldean, Comarca 2 industrialdea Iruñeko mendebaldeko ingurabidearekin (A-15) lotzeko. 1.700 metroko luzera du denera.

Etorkizunean A-12 Iruña-Logroño autobia eta Iruñeko mendebaldeko ingurabidea (A-15) lotuko dira, eta aipatutako bidea lotura horren lehen fasea izanen da. Bi tartetan garatuko da.

Bi biribilgune jaso dira: bata Ezkirotzen eta Iruñeko mendebaldeko ingurabidearen arteko loturan eta bestea proiektua osatzen duten bi tarteak elkartzen diren gunean.

Enbor nagusian ereduko sekzioak bi galtzada izanen ditu, 2,50 metroko erdibitzaileak bereiziak. Galtzada bakoitzak 3,50 metroko bi errei ditu, 2,50 metroko kanpoko bazterbidea, metro bateko barneko bazterbidea eta metro bateko kanpoko berma bana.

Lau egitura proiektatu dira. Zazpi baoko bidezubi bat da garrantzitsuena, 278,00 metrokoa. Haren azpitik pasatzen dira Elorz erreka eta oraingo trenbidea, eta etorkizunean Abiadura Handiko Trenaren trazadura berria ere igoroko da.

Ezkirotzerako sarbidea bi azpiko pasabiderekin konpondu da (bat Barbatainera sartzeko eta bestea Iruñera sartzeko), eta, horietaz gain, proiektua osatzen duten bi tarteen arteko biribilgunerako sarbide zuzenarekin.

Biribilgune horretatik hurbil oinezkoentzako pasabidea egitea aurreikusi da, bi baokoa, 20 eta 30 metro bitarteko luzerakoa eta 3,00 metro zabalerakoa.

Proiektuan ukitutako zerbitzuak berriz ezarriko dira.

Orobat, lizitazioa egin aurretik, beharrezkoa da obrek ukituriko ondasunak eta eskubideak kudeatzea eta horiek desjabetzeko espedienteari lehenbailehen ekitea.

Nafarroako errepideei buruzko martxoaren 23ko 5/2007 Foru Legearen 20. artikuluko 2. eta 3. idatz-zatietan xedaturikoarekin bat, bidezko da eraikuntza proiektua behin-behinean onetsi eta jendaurrean paratzea, bai proiektuaren eduki teknikoari bai desjabetu ahal izateko lurrak okupatu beharrari dagokienez. Aldi berean, entzunaldia eman behar zaie ukitutako toki entitateei, beren eskumenen esparruan adierazi dezaten proiektua bat datorren udalez gaindiko proiektu sektorialak ezarritako zehaztapenekin.

Horrenbestez, Proiektu, Trenbide eta Lan Hidraulikoen Zerbitzuak jakinarazi eta proposatu duenarekin bat eta Herri Lan, Garraio eta Komunikazio Departamentuaren egitura organikoa ezartzen duen otsailaren 24ko 47/2005 Foru Dekretuko 2. artikuluko 2. idatz-zatiaren bidez eskuratu ditudan eskurantzak erabiliz,

AGINDU DUT:

1. "Zizur Nagusia-Ezkirotz bidea eraikitzea. Tartea: Ezkirozko saihesbidea" proiektua behin-behinekoz onestea.

2. Proiektuak ukituriko ondasun eta eskubideen desjabetze espedienteari hasiera ematea. Zerrenda eranskinean dago.

3. Hilabete batez proiektua jendaurrean jartzea eta ukitutako toki entitateei entzunaldia ematea. Epe horretan interesdunek egokitzat jotzen dituzten oharrak edo alegazioak aurkez ditzakete, eta ondasun eta eskubideen zerrendako okerrak zuzentzeko behar diren datuak idatzita eman. Interesdunek eskura izanen dute proiektua Nafarroako Gobernuko Herri Lan, Garraio eta Komunikazio Departamentuko Proiektu, Trenbide eta Obra Hidraulikoen Zerbitzuko eta Galarko Udaleko bulegoetan.

4. Foru agindu hau Nafarroako ALDIZKARI OFIZIALean eta Nafarroan gehien zabaltzen diren egunkarietako batean argitaratzea.

5. Foru agindu hau jakinaraztea Proiektu, Trenbide eta Lan Hidraulikoen Zerbitzuari, Desjabetze Atalari eta Galarko Udalari.

Iruñean, 2007ko urriaren 30ean.-Herri Lan, Garraio eta Komunikazio kontseilaria, Laura Alba Cuadrado.

ERANSKINA

Ukitutako ondasun eta eskubideen banakako zerrenda zehaztua

GALARKO UDAL MUGAPEA

GA-1 FERRER AZCARATE, MANUELA 6.554 3 114-B LEHORREKO ALORRA