28. ALDIZKARIA - 2005eko martxoaren 7a

II. NAFARROAKO TOKI ADMINISTRAZIOA

2.1. ORDENANTZAK ETA BESTELAKO XEDAPEN OROKORRAK

ESTERIBAR

Esteribarko udal ludotekaren funtzionamenduari buruzko erregelamendua behin betikoz onetsirik

Indarra duten xedapenei jarraituz, dagoeneko iragan baita jendaurrean egoteko legezko epea, Esteribarko udal ludotekaren funtzionamenduari buruzko erregelamendua 2004ko azaroaren 8ko bilkuran hasiera batez onetsi eta 2004ko 154. Nafarroako ALDIZKARI OFIZIALean, abenduaren 24koan, argitaratu zenetik, eta inork ez baitu alegaziorik aurkeztu, behin betikoz onetsi da, 2005eko otsailaren 3ko osoko bilkuran hartutako erabakiaren bidez.

Hemen jarraian ematen da osorik erregelamenduaren testua, eta indarra hartuko du Nafarroako ALDIZKARI OFIZIALean argitara eman eta biharamunean.

ESTERIBARKO UDAL LUDOTEKAREN FUNTZIONAMENDUARI BURUZKO ERREGELAMENDUA

1._Xedea.

Esteribarko udal ludotekaren funtzionamenduari buruzko arauak ezartzea du xede erregelamendu honek.

2._Zerbitzuaren deskribapena.

Haurrak eta nerabeak jostatzeko tokia da ludoteka, eta helburua haur eta gazteen parte hartzea bultzatzea da, aisia eta astialdiko aukerak ematea, haur eta nerabeen garapen integralean lagunduko duten balore, jarrera eta portaerak jostetaren bidez bultzatzea eta hainbat lantegi eta jarduera egitea, baita helduak helburu horietan arduratzea ere.

3._Jarduerak.

Ludotekaren programan sartutako jarduerak modulu hauetan banatu dira:

a) Jokoak.

b) Lantegiak.

c) Proiekzioak.

d) Ateraldiak edo txangoak.

e) Ipuin kontalariak.

4._Hartzaileak.

Ikasturte hasieran 4-12 urte izan edo egiten dituzten haurren guraso edo tutoreek badute aukera haiek ludotekan inskribatu eta parte hartzeko eskaera egiteko.

5._Egutegia eta ordutegia.

Ludotekaren funtzionamenduko egutegiak abendutik ekainera bitarteko hilabeteak hartzen baditu ere, udan ere irekita egonen da, baina orduan ordutegia eta prezioa desberdinak izanen dira.

Ikasturtean zehar, funtzionamendu orduak honako hauek izanen dira:

_Astelehen eta asteazkenetan, 17:00etatik 19:00etara.

_Larunbatetan, 11:00etatik 13:00etara.

_Udako hilabeteetan, oraindik finkatu gabe.

Udalak, zenbat erabiltzaile inskribatzen diren eta zenbat eskaera dauden ikusita, taldeen osaketa eta funtzionamendu orduak aldatzen ahal ditu.

6._Eskaerak eta haurrak onartzea.

Ludotekan parte hartzeko interesa duten haurren guraso edo tutoreek, ezarritako tarifa ordaindu ondotik, Udal Kiroldegiko bulegoetan berean aurkezten ahal dute inskribatzeko eskaera, Udalaren iragarki oholean argitaratuko den iragarkian zehaztuko den epearen barrenean.

Udalak onesten duen ereduari lotuko zaio inskribatu eta matrikulatzeko eskaera.

Inskripzioa egiteak berarekin dakar ludotekara joateko konpromisoa, funtzionamenduan den denbora guztian, eta zerbitzuaz baliatzeko onesten diren tasak nahitaez ordaindu beharra. Inguruabar ekonomiko, sozial, osasun arloko eta bestelako bereziak gertatzen direnean, Esteribarko Udaleko Gizarte Ongizatearen Batzordeak, egoera baloratu ondoren, salbuespen gisa, kuotaren zenbatekoa murriztu edo hura ordaintzetik salbuesten ahalko ditu erabiltzaileak.

Udalak, egin diren inskripzioen kopurua ikusita eta zerbitzuaren errentagarritasuna ziurtatzearren, hura ez ematea erabakitzen ahalko du, baina inskripzio gisa hartutakoa itzuli beharko du berehala.

7._Ludotekako arduradunak.

Ludotekako arduradunek aisia eta astialdiko begirale titulua izan beharko dute edo, bestela, lanbide prestakuntza edo esperientzia haur eta gazteen hezkuntzan.

Ludotekako arduradunek eginkizun hauek bete beharko dituzte:

1._Taldeak eta orduak antolatzea.

2._Materialaren inbentarioa, sailkapena eta katalogazioa.

3._Zerbitzuari buruzko informazioa eman eta hura bultzatzea.

4._Jarduera eta programak diseinatu eta garatzea.

5._Jarduerak planifikatzea.

6._Jarduerak ebaluatzea.

7._Banan-banako jarraipena haurrei edo nerabeei.

8._Arreta eta orientazioa gurasoei edo tutoreei.

9._Informazioa eta koordinazioa Gizarte Ongizatearen zinegotzigoarekin.

Eginkizunak betetzean, helburu hauek landu beharko dituzte ludotekako arduradunek:

a) Pertsonen arteko komunikazioa bultzatzea.

b) Parte hartzera eta elkarteak sortzera bultzatzea.

c) Sormenaren alde jokatzea.

d) Gizarte integrazioa, elkartasuna eta dibertsitatearen aldeko begirunea sustatzea.

e) Hezkuntza premia bereziak detektatzea.

f) Naturaren eta ingurumenaren aldeko begirunea sustatzea.

8._Erabiltzaileen eskubideak eta betebeharrak.

Erabiltzaileek eskubidea dute ludotekan egiten diren jardueretan parte hartzeko eta instalazioak eta materiala baliatzeko besteek bezala.

Gurasoek edo tutoreek informazioa eskatzen ahal dute ludotekan egiten diren edo egin gogo diren jarduera eta programei buruz.

Guraso edo tutoreek nahiz erabiltzaileek erreklamazioak eta oharrak egiten ahal dizkiete kudeaketaz arduratzen diren langileei eta Esteribarko Udalari.

Erabiltzaileak behartuta daude ludotekako instalazioak eta materiala behar bezala baliatzera.

Behar bezalako begirunea erakutsi beharko dute beste erabiltzaileekin eta zerbitzuko arduradunekin.

Zerbitzuko arduradunak emandako aginduak eta oharrak bete beharko dituzte instalazioak eta materiala erabiltzeko orduan eta programatutako jarduerak burutzerakoan.

Gurasoak edo tutoreak behartuta daude Esteribarko Udalak zerbitzua emateko onartzen dituen tasak ordaintzera.

9._Arau-hausteak.

Erregelamendu honetan ezarritako betebeharrak erabat edo hein batean ez betetzea arau-haustea da.

_Arau-hauste arintzat hartzen da:

a) Instalazioak eta materiala behar adinako arretaz ez erabiltzea.

b) Zerbitzu arduradunek emandako ohar eta aginduei kasu ez egitea.

_Arau-hauste larriak dira:

a) Arau-hauste arinetan berrerortzea.

b) Behar adinako begirunea ez agertzea beste erabiltzaileekin.

c) Behar adinako begirunea ez agertzea zerbitzuko arduradunekin.

d) Ludotekako instalazioetan edo materialean, nahita, kalte egitea.

e) Ordena haustea eta programatutako jarduerak behar bezala egin daitezen galaraztea.

_Arau-hauste oso larriak dira:

Arau-hauste larriak behin eta berriro egitea.

10._Zehapenak.

Ludotekatik astebetez kanporatuta zehatuko dira arau-hauste arinak.

Ludotekatik hilabetez kanporatuta zehatuko dira arau-hauste larriak eta, materiala edo instalazioak hondatuz gero, haien kostuaren adinako isuna jarrita.

Ludotekatik behin betikoz kanporatuta zehatuko dira arau-hauste oso larriak eta, materiala edo instalazioak hondatuz gero, haien kostua halako biko isuna jarrita.

11._Tarifak

Esteribarko Udalak osoko bilkuran ezarriko ditu kasuan kasuko tarifak eta urtero berrikusiko ditu.

2004ko irailetik 2005eko ekainera doan denboraldi honetarako, prezioa 10 euro/ikasturtea finkatu da.

Esteribarren, 2005eko otsailaren 7an._Alkatea, Francisco Javier Borda Garde.

Iragarkiaren kodea: L0502060