92. ALDIZKARIA - 2003ko uztailaren 18a

I. NAFARROAKO FORU KOMUNITATEA

Beste Xedapenak

222/2003 FORU AGINDUA, ekainaren 5ekoa, Hezkuntza eta Kultura kontseilariak emana, Nafarroako Liburutegi Nagusian dokumentu fondoaren birkatalogazio automatizatuko lanetan laguntzeko bi bekaren deialdia onesten duena.

Ikusirik "Vianako Printzea" Erakundea-Kultura Zuzendaritza Nagusiko Liburutegi Zerbitzuko Liburutegi Atalak egindako txostena, non proposatzen baita Nafarroako Liburutegi Nagusian dokumentu fondoaren birkatalogazio automatizatuko lanetan laguntzeko bi bekaren Deialdiaren Oinarriak eta horretarako gastua onesteko.

Nafarroako Foru Komunitateko Gobernua eta Administrazioa arautzen dituen apirilaren 11ko 23/83 Foru Legeko 36.2. c) artikuluak ematen dizkidan ahalmenak erabiliz,

AGINDU DUT:

1. Nafarroako Liburutegi Nagusian dokumentu fondoaren birkatalogazio automatizatuko lanetan laguntzeko Beka Deialdia onestea, Foru Agindu honen eranskinean ageri diren oinarrien arabera.

2. 13.560 euroko gastua egiteko baimena ematea, 6.780 euro deialdiko beka bakoitzeko alegia, 2002tik 2003 luzatutako Gastuen Aurrekontuko 450000, 42000, 4809, 451100 "Bekadunak" izeneko kontu-sailaren kargura. Beken zenbateko osotik 4.520 euro 2003. urtean ordainduko dira eta gainerako 9.040 euroak 2004an.

3. Lehendakaritza Departamentuari eskatzea Nafarroako ALDIZKARI OFIZIALean argitara dezala deialdia.

4. Foru Agindu hau "Vianako Printzea" Erakundea-Kultura Zuzendaritza Nagusiari jakinaraztea, eta orobat Zuzendaritza Nagusi horretan Ogasun Departamentuak duen kontuhartzaileari, Nafarroako Liburutegi Nagusiko Liburutegi Atalari eta Nafarroako ALDIZKARI OFIZIALari, bidezko ondorioak izan ditzan.

Iruñean, bi mila eta hiruko ekainaren bostean._Hezkuntza eta Kultura kontseilaria, Jesús María Laguna Peña.

NAFARROAKO LIBURUTEGI NAGUSIAN LAGUNTZEKO BEKEN DEIALDIA

Vianako Printzea Erakundea-Kultura Zuzendaritza Nagusiak, Liburutegi Zerbitzuaren bidez, Nafarroako Liburutegi Nagusian dokumentu fondoaren birkatalogazio automatizatuko lanetan laguntzeko bi bekaren deialdia egin du, katalogazio eta sailkapen automatizatuko lan praktikoa ezagutzen duten eta liburutegiko prozesu teknikoan esperientzia handitu nahi duten unibertsitateko titulatuentzat.

O I N A R R I A K

1._Eskaria egiteko epea.

Bekak deialdi hau Nafarroako ALDIZKARI OFIZIALean argitara eman eta hamabost egun naturaleko epean eskatzen ahal dira.

2._Baldintzak.

2.1. Beka hauek eskatzeko beharrezkoa da Nafarroako erroldan egotea deialdi hau Nafarroako ALDIZKARI OFIZIALean argitaratu aurretik eta gutxienez diplomatu edo gisako mailako unibertsitate-titulua edukitzea.

2.2. Eskatzaileek, Nafarroako Gobernuko Erregistro Nagusian edo Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legearen 38. artikuluan ezarritako moduetako edozeinetan, agiri hauek aurkeztu beharko dituzte:

a) Eskabide-orria.

b) Nortasun Agiri Nazionala eta Nafarroan erroldatua dela egiaztatzen duen ziurtagiria.

c) Ikasketa espedientearen ziurtagiria, ikasturte bakoitzeko irakasgai guztien kalifikazioekin.

d) Izangaiak deialdiko bekekin loturiko arloetan duen prestakuntza osagarria eta laneko esperientzia egiaztatzeko ziurtagiriak.

2.3. Oso-osorik beteta ez dauden eskaera-orriak aurkezten dituztenek eta alegatutako merezimenduak baloratzeko behar diren agiriak eransten ez dituztenek 10 eguneko epea izanen dute akatsak zuzentzeko, jakinarazi eta biharamunetik hasita.

3._Hautatzea.

3.1. Bekak nori eman Batzorde batek erabakiko du. Batzordea honako hauek osatuko dute: Liburutegi Zerbitzuko zuzendaria, Nafarroako Liburutegi Nagusiaren atalburua eta Liburutegi Sareko atalburua. Aurkezten diren eskaerak aztertu eta baloratuko ditu Batzorde horrek, eta bekak puntu gehien ateratzen duten bi izangaiei ematea proposatuko du, ondoko baremoan oinarrituz:

a) Ikasketa espedientea: gehienez ere 5 puntu.

b) Liburutegi arloko prestakuntza: gehienez ere 5 puntu.

c) Katalogazio automatizatuko lanetan duen esperientzia: gehienez ere 10 puntu.

3.2. Bekak Hezkuntza eta Kultura kontseilariaren Foru Aginduaren bidez emanen dira, deialdia Nafarroako ALDIZKARI OFIZIALean argitaratu eta bi hilabeteko epean.

3.3. Bekak emanak direla jakinarazten denean, onuradunek 15 eguneko epean adierazi behar dute espresuki onartzen dutela emandakoa. Edozein arrazoi dela-eta emandako bekari uko egiten bazaio, Vianako Printzea Erakundea-Kultura Zuzendaritza Nagusiaren Kultur Ekintza Zerbitzuari eman behar zaio aditzera.

4._Dirukopurua eta ordainketak.

4.1. Beka bakoitza 6.780 euro da.

4.2. Bi hilabetetik ordainduko da, Agiritegi eta Dokumentu Ondarearen atalburuak aldeko txostena eman ondoan.

5._Iraunaldia.

Nafarroako Liburutegi Nagusian laguntzeko beka hauek hamabi hilabete iraunen dute, eta, gehienez ere, etenik gabeko beste hamabi hilabeterako luzatzen ahal dira, Vianako Printzea Erakundea-Kultura zuzendari nagusiaren Ebazpen bidez, Nafarroako Liburutegi Nagusiko atalburuak aurretik adostasun txostena emanda.

6._Bekadunen eginbeharrak.

6.1. Bekadunak laguntza lanetan arituko dira Nafarroako Gobernuarekin lan harremanik izan gabe.

6.2. Bekadunei Nafarroako Liburutegi Nagusiko edozein bulegotan jarduteko eskatzen ahal zaie, edozein lanaldi motarekin, Liburutegia irekita dagoen ordutegiaren barrenean eta zerbitzuen beharren arabera betiere. Kasu guztietan, astean 32 orduko laguntza eman beharko dute batez beste.

6.3. Bekadunek Nafarroako Liburutegi Nagusiko fondo bibliografikoaren atzera-begirako bihurketarekin eta berrantolaketarekin zerikusia duten lanetan baizik ez dute lagunduko.

7._Laguntza-lanaren ziurtagiria.

7.1. Nafarroako Liburutegi Nagusiko atalburuaren txostena ikusi ondoren, bekak iraun duen denboran egindako laguntza-lanen ziurtagiria luzatuko du Hezkuntza eta Kultura Departamentuak.

8._Gorabeherak.

8.1 Vianako Printzea Erakundea-Kultura Zuzendaritza Nagusiak ebatziko ditu oinarri hauek aplikatu eta interpretatzean sor litezkeen gorabeherak.

8.2. Deialdi honetan aurreikusitako eginbeharrak ez betetzeak beka kentzea ekarriko du berarekin.

8.3. Deialdi honen eta oinarrion aurka gora jotzeko helegitea jartzen ahal da, Nafarroako Gobernuari zuzendua, Nafarroako ALDIZKARI OFIZIALean argitara eman eta biharamunetik hilabeteko epean.

Iragarkiaren kodea: A0306131