Iragarkia

54. ALDIZKARIA - 2002ko maiatzaren 3a

I. NAFARROAKO FORU KOMUNITATEA

Xedapen Orokorrak. Foru Aginduak

89/2002 FORU AGINDUA, martxoaren 27koa, Hezkuntza eta Kultura kontseilariak emana, Nafarroako Foru Komunitatean Batxilergoaren egitura garatu, haren antolaketa arautu, ordutegia finkatu eta aukerako irakasgaien curriculuma onesten duena.

Azaroaren 29ko 1700/1991 Errege Dekretuak Batxilergoko egitura ezarri zuen; urriaren 2ko 1178/1992 Errege Dekretuak Bigarren Hezkuntzako etapa horri dagozkion gutxieneko irakaskuntzak finkatu zituen. Bi Errege Dekretu horiek abenduaren 29ko 3474/2000 Errege Dekretuaren bidez aldatu ziren.

Martxoaren 25eko 62/2002 Foru Dekretuak Nafarroako Foru Komunitatean Batxilergoaren egitura eta curriculuma ezartzen ditu.

Horrenbestez, bidezkoa da Batxilergoaren egitura garatu, haren antolaketa arautu, ordutegia finkatu eta aukerako irakasgaien curriculuma onestea, aipatu araudiari jarraikiz.

Pedagogi Berrikuntzako Zerbitzuko zuzendariak txostena aurkeztu du, Nafarroako Foru Komunitatean Batxilergoaren egitura garatu, haren antolaketa arautu, ordutegia finkatu eta aukerako irakasgaien curriculuma onets dadin.

Batxilergoa modalitate eta ibilbidetan antolatuta dago, ikasten jarraituko duten ikasleak hobeki prestatu eta beraien interes ezberdinei hobeki erantzun ahal izateko.

Batxilergoan irakasgai komunak, modalitatekoak eta aukerakoak daude. Irakasgai komunen bitartez ikasleek prestakuntza orokorra lortzen dute, adimen eta giza heldutasuna, eta beren eginkizun sozialak arduraz betetzeko gaitasunak garatzen dituzte gainera. Modalitateko irakasgaien helburua, berriz, modalitatearen araberako berariazko prestakuntza ematea da eta, kasua denean, oinarrizko lanbide heziketa.

Aukerako irakasgaiek hautatutako modalitateari dagokion berariazko prestakuntza sendotzen laguntzen dute, eta prestakuntza orokorra osatzen. Nabarmendu behar da ikasleak hautatutako modalitatean egin ez dituen irakasgaiak ere aukerako irakasgaien artean sartu ahal izanen direla eta aukerako esparru horretan ikasi; horrela, modalitate bakoitzean, ikasleei ondoko prestakuntzari begira ahalik eta aterabide gehien eman diezaieketen ibilbideak osatuko dira.

Nafarroako errealitateak erakusten du Batxilergoko egitura bakarra bilatzea komeni dela, ikasle guztiendako aukera berdinak ziurtatuko dituena, edozein izanik ere bizi diren alde geografikoa edo aukeratutako hizkuntz eredua.

Foru Agindu hau prestatzeko kontuan hartu dira: irakaskuntza ez-unibertsitarioetako eginkizun eta zerbitzuak Estatutik Nafarroako Foru Komunitatera eskualdatzea onetsi zuen abuztuaren 31ko 1070/1990 Errege Dekretua, eta araubide orokorreko irakaskuntza ez-unibertsitarioak ematen dituzten ikastetxeen gutxieneko baldintzak ezartzen dituen ekainaren 14ko 1004/1991 Errege Dekretua.

Martxoaren 25eko 62/2002 Foru Dekretuko azken xedapenetako lehenak emandako ahalmenak erabiliz, eta Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2 b) eta c) artikuluaren bidez emandakoez ere baliaturik,

AGINDU DUT:

I.-Aplikazio esparrua.

Lehenbizikoa.-Batxilergoaren egitura garatu, antolaketa arautu, ordutegia finkatu eta aukerako irakasgaien curriculuma onesten duen Foru Agindu hau Nafarroako Foru Komunitatean aplikatuko da.

II.-Egitura eta ordutegia.

Bigarrena.-Nafarroako Foru Komunitatean Batxilergoaren egitura eta curriculuma ezartzen dituen martxoaren 25eko 62/2002 Foru Dekretuaren 2 eta 3. artikuluetan xedatutakoarekin bat, Batxilergoak bi kurtso izanen ditu eta modalitate hauek: a) Arteak; b) Natur eta Osasun Zientziak; c) Giza eta Gizarte Zientziak; d) Teknologia.

Hirugarrena.-1. Etapan zehar, ikasleek, irakasgai komunez gainera, modalitateko sei irakasgai eta aukerako bi izanen dituzte.

2. Etapako lehen kurtsoan, lau irakasgai komun, modalitateko hiru, aukerako bat eta Erlijioa edo horren ordezko Hezkuntza Jarduera Antolatua izanen dituzte ikasleek. Bigarren kurtsoan, lau irakasgai komun, modalitateko hiru eta aukerako bat.

3. Batxilergoko ikasketak D edo A hizkuntz ereduetan egiten dituzten ikasleek Euskal Hizkuntza eta Literatura ikasiko dute etapako bi kurtsoetan.

Laugarrena.-1. Batxilergoko kurtso bakoitzean, ikasleen asteko ordutegia, oro har, hogeita hamar ikastordukoa izanen da. I. eranskinean xedatutakoaren arabera banatuko da astean zehar.

2. Batxilergoa D edo A ereduen arabera egiten duten ikasleek hiru ordu izanen dituzte kurtso bakoitzean Euskal Hizkuntza eta Literatura ikasteko, irakasgai komunetarako eta modalitateko irakasgaietarako ordutegia ukitu gabe. Batxilergoa D ereduaren arabera eskaintzen duten ikastetxeek hiru ordu gehituko dizkiote ordutegi orokorrari, Euskal Hizkuntza eta Literatura irakasteko. Ikastetxeak A eredua eskaintzen duenean, Euskal Hizkuntza eta Literatura, oro har, aukerako irakasgaien orduetan ikasiko da.

3. Antolaketa arrazoiak direla eta, D eta A ereduak batera eskaintzen dituzten ikastetxeek hiru ordu gehituko dizkiote ordutegi orokorrari, baita A hizkuntz ereduaren kasuan ere.

4. Salbuespen gisa, Batxilergoko ikasketak D ereduaren arabera eskaintzen dituzten ikastetxeek, eta Ikastetxeko Hezkuntza Proiektuarekin bat, guztira 30 ordu izan nahi badituzte astean, Hezkuntza eta Kultura Departamentuari eskatu ahal izanen diote.

5. Aukerako irakasgaiak hiru ordu izanen ditu astean Batxilergoko bi kurtsoetan, ez bada behintzat Zazpigarrena.1.b) puntuan ageri direnetako bat, orduan lau ordu izanen baitira astean.

Bosgarrena.-1. Batxilergoko modalitateak ibilbidetan antolatuko dira, ikasleen interesak kontuan hartuta, geroagoko ikasketetarako prestakuntza hobea eskaintzeko, unibertsitateko ikasketak izan edo goi mailako berariazko lanbide heziketakoak.

2. Natur eta Osasun Zientzien modalitatea bi ibilbidetan antolatuko da: bata Zientzia eta Ingeniaritzaren inguruan; bestea, Osasun Zientzien inguruan.

3. Giza eta Gizarte Zientzien modalitatea hiru ibilbidetan antolatuko da: horietako bat Giza Zientzien inguruan; beste bat Gizarte Zientzien inguruan; eta hirugarrena Giza eta Gizarte Zientzien inguruan, aurreko ibilbidekin alderatuta mistoa izanen dena.

4. Kontuan hartuta Arteen eta Teknologiaren modalitateen berezitasuna, modalitate horiek irakasten dituzten ikastetxeek ikasleen eskaera eta asmoekin eta ikastetxearen baliabideekin bat datozen ibilbideak antolatuko dituzte.

5. Foru Agindu honen II. eranskinean daude modalitate horietako ibilbideak osatzen dituzten irakasgaiak.

6. Hezkuntza eta Kultura Departamentuak zehaztuko du Batxilergoko zein modalitate eta ibilbide eskainiko dituen Nafarroako Foru Komunitateko Bigarren Hezkuntzako Institutu bakoitzak.

7. Bigarren Hezkuntzako ikastetxe pribatuek dagokion arautegian xedatutakoari lotuko zaizkio.

III.-Aukerako irakasgaiak.

Seigarrena.-1. Aukerako irakasgaiek helburu bikoitza dute: modalitate bakoitzeko berariazko prestakuntza sendotzen lagunduko dute eta Batxilergoko prestakuntza orokorra finkatzen, prestakuntzarako ibilbide egokiagoak ahalbidetuz.

2. Etapako lehen kurtsoan aukerako irakasgai bat izanen da eta bigarrenean beste bat.

Zazpigarrena.-1. Ikastetxeek eskaini ahal izanen dituzten aukerako irakasgaiak honako hauek dira:

a) Batxilergoko modalitate guztietarako aukerako irakasgaiak: Atzerriko Bigarren Hizkuntza I eta II (lehenengo kurtsoa eta bigarrena); Informazioaren Teknologia (lehenengo kurtsoa edo bigarrena); Nafarroako Geografia eta Historia (lehenengo kurtsoa edo bigarrena); Musika (lehenengo kurtsoa edo bigarrena).

b) Modalitate bakoitzeko aukerako irakasgaiak:

b1) Ikasleak hautatutako modalitatean egin ez dituen irakasgaiak.

b2)

-Arteen modalitatea:

-Arte lantegiak (lehenengo kurtsoa edo bigarrena)

Formaren Matematika (lehenengo kurtsoa edo bigarrena); Bolumena II (bigarren kurtsoan bakarrik eskaini ahalko da).

-Natur eta Osasun Zientzien modalitatea:

-Geologia

Ekonomia; Matematikan Sakontzen (hiru irakasgai horiek bigarren kurtsoan bakarrik eskaini ahalko dira).

-Giza eta Gizarte Zientzien modalitatea:

-Literatura Espainiarra eta Unibertsala (lehenengo

kurtsoa edo bigarrena).

-Teknologiaren modalitatea:

-Kimika

Matematikan Sakontzen (bi irakasgai horiek bigarren kurtsoan bakarrik eskaini ahalko dira).

2. Foru Agindu honen bidez onetsitako aukerako irakasgaien curriculuma III. eranskinean ageri da.

3. Ikastetxeek aukerako irakasgaien curriculuma garatuko dute aipatutako irakasgaien programazio didaktikoak prestatuz.

Zortzigarrena.-Goi mailako heziketa zikloak eskaintzen dituzten ikastetxeendako, Hezkuntza eta Kultura Departamentuak zehaztuko du zein diren ikastetxeari hobeki egokitzen zaizkion aukerako irakasgaiak.

Bederatzigarrena.-1. Atzerriko Bigarren Hizkuntza izeneko aukerako irakasgaiak baldintza hauek bete beharko ditu:

a) Irakasgaiaren izaera ziklikoa dela eta, Atzerriko Bigarren Hizkuntza hautatzen duten ikasleek etapako bi kurtsoetan ikasi beharko dute: Atzerriko Bigarren Hizkuntza I lehenengo kurtsoan, eta Atzerriko Bigarren Hizkuntza II bigarren kurtsoan. Salbuespen gisa, lehenengo kurtsoan ikasi ez dutenak, bigarren kurtsoan Atzerriko Bigarren Hizkuntza II irakasgaian sartu ahalko dira, betiere, irakasleen iritziz, kurtso horretan sartzeko behar beste baldin badakite hizkuntza.

b) DBHn Atzerriko Bigarren Hizkuntza ikasi ez dutenek Batxilergoan ikasi nahi badute, proba bat gainditu beharko dute, irakasgai horretan eskatutako mailarako ezagutza egokia dutela egiaztatzeko.

c) Ikasleek Atzerriko Bigarren Hizkuntza ikasteari utzi ahal izanen diote Batxilergoko lehenengo kurtsoa bukatutakoan, aurretik gurasoek, legezko ordezkariek edo ikasleek beraiek, adinez nagusi badira, hala eskatzen badiote, idatziz, ikastetxeko zuzendariari, uzteko eskaeraren arrazoiak adierazirik. Ikastetxeko zuzendariak, dagokion departamentu didaktikoarekin hitz egin ondoren eta alegatutako arrazoiak kontuan harturik, eskabidearen gaineko ebazpena emanen du.

2. Informazioaren Teknologia, Nafarroako Geografia eta Historia, Musika, Arte Lantegiak, Formaren Matematika, Literatura Espainiarra eta Unibertsala izeneko aukerako irakasgaiak departamentu didaktikoek programatuko dituzte, kontuan hartuta kurtso bakar batean ikasiko direla. Ikastetxeek lehenengoan edo bigarrenean eskainiko dituzte.

3. Ikasleak ezin izanen dira matrikulatu bigarren kurtsoko Geologian, lehen kurtsoko Biologia eta Geologia gainditua izan gabe edo bietan batera matrikulatu gabe; ezin izanen dira bigarren kurtsoko Matematikan Sakontzen irakasgaian matrikulatu, lehen kurtsoko Matematika I gainditua izan gabe edo bietan batera matrikulatu gabe; ezin izanen dira bigarren kurtsoko Kimikan matrikulatu, lehen kurtsoko Fisika eta Kimika gainditua izan gabe edo bietan batera matrikulatu gabe; ezin izanen dira bigarren kurtsoko Bolumena II irakasgaian matrikulatu, lehen kurtsoko Bolumena gainditua izan gabe edo bietan matrikulatu gabe.

4. Ikasle bat bigarren kurtsora pasatzen bada lehen kurtsoko aukerako irakasgaia gainditu gabe, errekuperatzeko bi aukera izanen ditu: irakasgai hori errekuperatu edo beste batez ordeztea, errekuperatzeko.

Hamargarrena.-Ikastetxeak eta irakasle tutoreek orientabideak emanen dizkiete ikasleei aukerako irakasgaiak hautatzerakoan; horretarako, urtero, behar diren jarraibideak sartu beharko dituzte Batxilergoko Curriculum Proiektuaren Hezkuntza Orientabiderako eta Tutoretzarako planetan.

Hamaikagarrena.-1. Aukerako irakasgai bakoitzeko ikasketak emateko gutxienez ere 20 ikaslek hautatu behar dituzte.

2. Hezkuntza eta Kultura Departamentuak, Zerbitzuak Ikuskatzeko eta Ikuskapen Teknikorako Zerbitzuak txostena egin ondoren, eta ikastetxearen ezaugarriekin bat, baimena eman dezake aukerako irakasgaietan aurreko idatz-zatian ezarritakoa baino ikasle kopuru txikiagoa izateko.

3. Ikastetxeek gutxienez ere aukerako bi irakasgai eskainiko dituzte lehen kurtsoan eta hiru bigarrenean; Horien artean, ahal dela, Atzerriko Bigarren Hizkuntza eskaini beharko da.

IV.-Erlijioa / Hezkuntza Jarduera Antolatua.

Hamabigarrena.-1. Hezkuntza Sistemaren Antolamendu Orokorrari buruzko urriaren 3ko 1/1990 Legearen bigarren xedapen gehigarrian eta abenduaren 16ko 2438/1994 Errege Dekretuan ezarritakoari jarraikiz, Erlijioa izeneko irakasgaia ikastetxe guztietan eskaini beharko da nahitaez. Ikastetxeek, ikasketa horiek emateko programaturiko denboran, Hezkuntza Jarduera Antolatua eskaini beharko dute, aukeran.

2. Batxilergoa hastearekin batera, ikasleen gurasoek edo legezko ordezkariek edo ikasleek beraiek, adinez nagusi badira, ikastetxeko zuzendaritzari jakinarazi beharko diote aipatu aukeren artean zein hartzen duten, irakasgai hori egiten den ikasturte bakoitzaren hasieran erabakia alda badaiteke ere.

3. Erlijio Katolikoaren irakaskuntza, Nafarroako Foru Komunitatean Batxilergoko Erlijio Katolikoa irakasgaiaren curriculuma onesten duen martxoaren 26ko 88/2002 Foru Aginduan ezarritakoari jarraikiz garatuko da.

4. Hezkuntza Jarduera Antolatua (H.J.A.), Nafarroako Foru Komunitatean Batxilergorako Hezkuntza Jarduera Antolatua arautzen duen martxoaren 26ko 86/2002 Foru Aginduan ezarritakoari jarraikiz garatuko da.

XEDAPEN INDARGABETZAILEA

Indarrik gabe utzi da Hezkuntza eta Kultura kontseilariak emandako otsailaren 17ko 43/1998 Foru Agindua, Batxilergoaren egitura garatu, haren antolaketa arautu, ordutegia finkatu eta aukerako irakasgaien curriculuma onartu zuena Nafarroako Foru Komunitaterako. Hala izanen da, azken xedapenetako hirugarrenean ezarritako aplikazio egutegiaren arabera.

AZKEN XEDAPENAK

Lehenbizikoa.-Ahalmena ematen zaio Hezkuntza zuzendari nagusiari, Foru Agindu honetan xedatutakoa garatu eta betearazteko behar diren xedapenak eman ditzan.

Bigarrena.-Foru Agindu hau igortzea Pedagogi Berrikuntzako Zerbitzura, Ikasketen Antolamendu eta Lanbide Heziketaren Zerbitzura, Zerbitzuak Ikuskatzeko eta Ikuskapen Teknikorako Zerbitzura, Hezkuntza Berriztapenaren Atalera, Ikasketak Antolatzeko Atalera eta Guraso eta Ikasleentzako Argibide eta Aholku Bulegora, behar diren ondorioak izan ditzan.

Hirugarrena.-Foru Agindu honek Nafarroako ALDIZKARI OFIZIALean argitaratu eta biharamunean hartuko du indarra. Batxilergoko lehenengo kurtsorako ezarritakoa 2002-2003 ikasturtetik aurrera aplikatuko da, eta bigarrenekoa, berriz, 2003-2004 ikasturtetik aurrera.

Iruñean, bi mila eta biko martxoaren hogeita zazpian.-Hezkuntza eta Kultura kontseilaria, Jesús María Laguna Peña.

I. ERANSKINA

BATXILERGOKO ASTEKO ORDUTEGIA

G HIZKUNTZ EREDUA

Irakasgai komunak (*)

1. kurtsoa:

-Gaztelania eta Literatura I: 4 ordu

-Atzerriko Hizkuntza I: 3 ordu

-Filosofia I: 3 ordu.

-GorputzaHezkuntza: 2 ordu.

-Erlijioa/H.J.A.: 2 ordu.

2. kurtsoa:

-Gaztelania eta Literatura II: 4 ordu.

-Atzerriko Hizkuntza II: 3 ordu.

-Filosofia II: 3 ordu.

-Historia: 4 ordu.

Modalitateko irakasgaiak

-Modalitateko hiru irakasgai (4 ordu bakoitzak): 12 ordu.

Aukerako irakasgaiak

-Aukerako irakasgai bat (**): 3 ordu.

-Tutoretza (**): ordu 1.

-Aukerako irakasgai bat (**): 3 ordu.

-Tutoretza (**): ordu 1.

(*) G eta A ereduko irakaskuntza batera ematen duten ikastetxeetan, A ereduan, aukerako irakasgaiaren orduak Euskal Hizkuntza eta Literatura irakasgairako erabiliko dira.

(**) Modalitateko berariazko prestakuntza osatu nahi duten ikasleek, baldin eta aukerako irakasgai gisa Zazpigarrena.1.b) puntuan ageri direnetako bat hautatu badute, astean lau ordu izanen dituzte aukerako irakasgairako. Ikasle horiek, tutoretzarako, ez dute beren taldeko gainerakoen ordu bera izanen; irakasle tutorea beste ordu batzuetan arduratuko da beraiez.

BATXILERGOKO ASTEKO ORDUTEGIA

D HIZKUNTZ EREDUA (*)

Irakasgai komunak

1. kurtsoa:

-Gaztelania eta Literatura I: 4 ordu.

-Atzerriko Hizkuntza I: 3 ordu.

-Euskal Hizkuntza eta Literatura I: 3 ordu.

-Filosofia I: 3 ordu.

-Gorputz Hezkuntza: 2 ordu.

-Erlijioa/H.J.A.: 2 ordu.

2. kurtsoa:

-Gaztelania eta Literatura II: 4 ordu.

-Atzerriko Hizkuntza II: 3 ordu.

-Euskal Hizkuntza eta Literatura II: 3 ordu.

-Filosofia II: 3 ordu.

-Historia: 4 ordu.

Modalitateko irakasgaiak

-Modalitateko hiru irakasgai (4 ordu bakoitzak): 12 ordu.

Aukerako irakasgaiak

-Aukerako irakasgai bat (**): 3 ordu.

-Tutoretza (**): ordu 1.

-Aukerako irakasgai bat (**): 3 ordu.

-Tutoretza (**): ordu 1.

(*) A eredurako ere balio du, D eta A ereduak batera ematen dituzten ikastetxeetan.

II. ERANSKINA

NATUR ETA OSASUN ZIENTZIEN MODALITATEA

1. kurtsoa.

-Matematika I.

-Fisika eta Kimika.

-Biologia eta Geologia / Marrazketa Teknikoa I

2. kurtsoa.

1. ibilbidea: Zientziak eta Ingeniaritza.

-Matematika II.

-Fisika.

-Marrazketa Teknikoa II / Biologia / Kimika.

2. ibilbidea: Osasun Zientziak.

-Biologia.

-Kimika.

-Matematika II / Lurraren eta Ingurumenaren Zientziak.

GIZA ETA GIZARTE ZIENTZIEN MODALITATEA

1. kurtsoa.

2. kurtsoa.

1. ibilbidea: Giza Zientziak.

-Mundu Garaikidearen Historia.

-Latina I.

-Grekoa I.

-Latina II.

-Grekoa II / Musikaren Historia.

-Artearen Historia.

2. ibilbidea: Gizarte Zientziak.

-Mundu Garaikidearen Historia.

-Gizarte Zientziei aplikatutako Matematika I.

-Ekonomia.

-Gizarte Zientziei aplikatutako Matematika II.

-Geografia.

-Enpresen Antolaketa eta Ekonomia.

3. ibilbidea: Giza eta Gizarte Zientziak.

-Mundu Garaikidearen Historia.

-Latina I.

-Gizarte Zientziei aplikatutako Matematika I.

-Geografia.

-Latina II.

-Gizarte Zientziei aplikatutako Matematika II.

ARTEEN MODALITATEA

1. kurtsoa.

-Marrazketa Artistikoa I.

-Marrazketa Teknikoa I.

-Bolumena.

2. kurtsoa (**)

-Marrazketa Artistikoa II.

-Artearen Historia.

-Adierazpen Grafiko-Plastikoaren Teknikak.

-Diseinuaren Oinarriak.

-Marrazketa Teknikoa II.

-Irudia.

TEKNOLOGIAREN MODALITATEA

1. kurtsoa (**)

-Matematika I.

-Fisika eta Kimika.

-Teknologia Industriala I.

-Marrazketa Teknikoa I.

2. kurtsoa(**).

-Marrazketa Teknikoa II.

-Elektroteknia.

-Fisika.

-Matematika II.

-Mekanika.

-Teknologia industriala II.

(**) Kurtso honetan, modalitate hau irakasten duten ikastetxeek ibilbideak antolatzerakoan modalitateko hiru irakasgai hautatuko dituzte.

III. ERANSKINA

AUKERAKO IRAKASGAIAK

Edozein modalitatetako aukerako irakasgaiak

-Atzerriko Bigarren Hizkuntza. Alemana.

-Atzerriko Bigarren Hizkuntza. Frantsesa.

-Atzerriko Bigarren Hizkuntza. Ingelesa.

-Informazioaren Teknologia.

-Nafarroako Geografia eta Historia.

-Musika.

Modalitate bakoitzeko aukerako irakasgaiak

Arteen modalitatea

-Arte Lantegiak.

-Formaren Matematika.

-Bolumena II.

Natur eta Osasun Zientzien modalitatea

-Geologia.

-Ekonomia.

-Matematikan Sakontzen.

Giza eta Gizarte Zientzien modalitatea

-Literatura Espainiarra eta Unibertsala.

-Teknologiaren modalitatea

-Kimika.

-Matematikan Sakontzen.

EDOZEIN MODALITATETAKO AUKERAKO IRAKASGAIAK

ATZERRIKO BIGARREN HIZKUNTZA. ALEMANA.

Sarrera

Gainera, teknologia berrien garapenak atzerriko hizkuntzak ezinbesteko tresna bihurtzen ditu lan munduan eta, oro har, komunikazio munduan sartzeko.

Atzerriko hizkuntzak jakiteak beste kultura, ohitura eta idiosinkrasia batzuetara iristeko aukera ematen du. Halaber, pertsonen arteko harremanak errazten ditu, pertsonaren heziketa integralean laguntzen du, beste herri batzuekiko eta hango hiztun eta kulturekiko errespetua garatzen, eta norberaren hizkuntza ulertzeko bide ematen.

Europako Batasunean hizkuntza ezberdinetako herriak sartzeak ere atzerriko hizkuntzak jakitea eskatzen du, erkidego zabal horretako kideen artean komunikazioa izan dadin.

Horiek horrela, atzerriko hizkuntzak gakoa dira identitate europarra eraikitzerakoan: hizkuntz eta kultur aniztasuneko identitatea. Halaber, atzerriko hizkuntzak jakiteak pertsonen joan-etorri askea errazten du eta, hori bezala, herrien arteko lankidetza kultural, ekonomiko, tekniko eta zientifikoa.

Batxilergora iristen diren ikasleek ohiko komunikazio egoeretan moldatzeko adina badakite atzerriko hizkuntza. Etapa horretan, beren autonomia gehiago garatu behar dute, zehatzago ikusiko baitituzte etorkizuneko behar eta interesak.

Hortaz, Batxilergoan atzerriko hizkuntza ikasten denean, alde batetik lehendik dakitena zabaldu eta sendotuko da eta, bestetik, gaitasun espezializatuagoak garatuko dira, ikasleen etorkizuneko lana bideratuko duten interes profesional eta akademikoak kontuan izanda.

Europako Kontseiluak maiz adierazten du herritarrek Europako herrietako jendearekin harremanak izateko behar diren gaitasunak garatu behar dituztela.

Horregatik uste du indartu egin behar dela hizkuntzen irakaskuntza, herritar europarraren ideia garatu ahal izateko; horretaz gainera, Derrigorrezko Bigarren Hezkuntzako etapan, atzerriko hizkuntza batean baino gehiagotan komunikaziorako nolabaiteko gaitasuna lortzea gomendatzen du. Hain zuzen ere, ondoko etapa honetan gehiago garatu behar dira ikasleek helduaroan hizkuntzak ikasten jarraitu ahal izateko mekanismoak.

Horiek horrela, Batxilergoko curriculumaren arabera, ikasleek, alde batetik, Lehen Hezkuntzan eta Derrigorrezko Bigarren Hezkuntzan ikasten hasitako atzerriko hizkuntzan komunikaziorako gaitasuna garatzen segituko dute; beste alde batetik, atzerriko bigarren hizkuntza batean -beharbada aurreko etapan hasi dena- komunikazio maila egokia lortuko dute.

Europako Kontseiluak Europa mailako erreferentzi esparru komun bat ezarri du atzerriko hizkuntzen ikaskuntzarako. Horri loturik, adierazi du hizkuntza batean komunikaziorako gaitasuna pixkanaka garatu ahal izateko, ikasleek gai izan behar dutela komunikazio ariketa batzuk egiteko.

Komunikazio ariketak ekintza multzo bat dira eta ekintza horiek komunikazio xede zehatz bat dute berariazko esparru batean. Hori gauzatzeko, komunikaziorako gaitasuna aktibatzen da, estrategia batzuk lanean jartzen dira eta hizkuntzari nahiz diskurtsoari lotutako zenbait trebetasun erabiltzen, testuinguru baten barruan. Beraz, atzerriko hizkuntzaren bidezko jarduerak zenbait esparrutan ageri dira: esparru publikoa (eguneroko elkarreragin soziala), pertsonala (famili harremanak eta gizabanakoaren praktika sozialak), lan esparrua edo hezkuntzakoa.

Komunikazio gaitasuna komunikazio ariketak egiteko prozesuan garatuko da eta azpigaitasun hauek izanen ditu: hizkuntz gaitasuna (elementu semantiko, morfosintaktiko eta fonologikoak), gaitasun pragmatiko edo diskurtsiboa (funtzioak, hizketako egintzak, elkarrizketa, e.a.) eta gaitasun soziolinguistikoa (gizarteko konbentzioak, komunikazio asmoa, erregistroak, e.a.). Gaitasun estrategikoa ere komunikazio gaitasunaren barreneko atal gisa har liteke.

Ikasleek komunikazio estrategiak modu natural eta sistematikoan erabiliko dituzte, komunikazio trebetasunez baliaturik komunikazio ekintzak eraginkorrak izan daitezen. Garatuko diren trebetasunak honako hauek dira: produktiboak (ahoz eta idatziz adieraztea), hartzaileak (ahozkoa eta idatzizkoa ulertzea eta hitzezkoak ez diren kodeak interpretatzea), eta elkarreraginean edo bitartekaritzan oinarrituak.

Edukiak kurtsoz kurtso zehaztu izana garapen jarraitu baten moduan ulertu behar da, zeinetan komunikazio trebetasunak, hizkuntzari buruzko hausnarketa eta alderdi soziokulturalak pixkakana osatuko diren. Beraz, lehenago landutako edozein ezagutza berriz agertuko da testuinguru ezberdinetan. Era berean, hizkuntzaren funtzioen eta alderdi gramatikalen arteko loturan ez da zorrotz jokatuko; horrek esan nahi du hizkuntzaren funtzio bat hizkuntz forma desberdinez gauza daitekeela eta alderantziz.

Lehenago azaldu den ikuspegiak inplikazio metodologiko batzuk ditu; alegia, lan unitateak garatzeko gaiak hautatu beharra eta, gai horiek, adin horretako gazteentzat interesgarriak izateaz gainera, etorkizuneko beharrei begira ere egokiak izatea. Ikaskuntza ariketak gaietatik abiatuko dira, ikasleek aurretik duten ezagutza kontuan hartuta, eta, ariketa horien inguruan, helburuak planteatu eta helburuak lortzen lagunduko duten edukiak sortuko. Ariketak ikaskuntzaren gune direnez, ebaluazioa haietan integratuta egonen da eta kontuan hartuko ditu bai lortutako emaitzak bai agertzen diren zailtasunak ere.

Bai ikasleen aldez aurreko ikaskuntza bai autonomi prozesuen garapena lagungarri izanen dira, nahiz eta atzerriko bigarren hizkuntza izan, ikaskuntzako ariketak atzerriko lehenengo hizkuntzaren eduki eta helburuen paretsukoekin agertzeko. Era berean, ikaskuntzaren autonomiak lagunduko du ikaskuntza pertsonalizatuagoa izaten eta atzerriko beste hizkuntza batzuetarako interesa sortzen.

Halaber, atzerriko hizkuntzen irakaskuntza eta ikaskuntza prozesuak ikasleak ikuspegi zabal baten bidez hezten lagunduko du, horrela errazagoa izan dadin nortasuna garatzea, integrazio soziala eta datu interesgarrietara iristea. Hezkuntza etapa honetan, bereziki, hizkuntzak erabiliko dira heziketa intelektuala bultzatzeko eta beste jakintza arlo batzuetako informazioak ezagutzeko, ikasleek jakintza zientifiko, humanistiko eta teknologian izaten ari diren etengabeko aldaketen berri izan dezaten.

Horrela, Batxilergoan, atzerriko hizkuntzako jatorrizko dokumentuak erabiliz aurrera eginen da ezagutzan, eta horri esker ikasleen ikuskera zabalduko da, beste bizimodu eta gizarte antolamendu batzuetara gehiago hurbilduko dira, nazioartean denenak diren arazoei buruzko iritziak trukatuko dituzte, beren interes profesionalak dibertsifikatuko eta balio sozialak sendotuko, nazioarteko komunikazioa hedatzen ari den mundu batean elkarretaratzea errazagoa izan dadin.

Helburuak

1. Ohiko komunikazio egoeretan eta komunikabideek sortutako ahozko, idatzizko eta ikusizko testuak ulertu eta modu kritikoan interpretatzea.

2. Ulermen estrategiak erabiltzea, ezagutzen ez den lexikoaren esanahia honako hauen bidez ateratzeko: testuingurua, munduaz duten ezagutza eta hizkuntz alderdiak, esate baterako hitzen eratzea, aurrizkiak eta atzizkiak, sinonimoak eta antonimoak, e.a.

3. Gai orokorreko testuak edo beren interesei egokitzen zaizkienak hiztegirik gabe irakurtzea, funtsezko elementuak ulertzea eta testuen funtzioaz eta diskurtsoaren antolaketaz ohartzea.

4. Atzerriko hizkuntza ahoz eta idatziz erabiltzea, estrategia egokiez baliaturik arin eta zuzen komunika daitezen.

5. Alemanak komunikazioan duen funtzionamenduaz hausnarketa egitea, norberaren produkzioak hobetu eta besteenak ulertzeko, pixkanaka-pixkanaka, era askotako eta ustekabeko egoeretan.

6. Norberaren ikaste prozesuei buruzko hausnarketa egitea, behaketan, zuzenketan eta ebaluazioan oinarritutako baliabide propioak erabiliz, aurrerantzean ere alemana ikasten jarraitu ahal izateko.

7. Ikasten duten hizkuntzaren inguru soziokulturaleko funtsezko alderdiak ezagutzea, komunikazioa hobea izan dadin eta beste kultura batzuk hobeki uler eta interpreta ditzaten.

8. Alemana beste ezagutza eta kultura batzuetara iristeko bide gisa baloratzea, eta norberaren hizkuntza eta kultura hobeki ulertzeko duen garrantziaz jabetzea; baloratzea, halaber, kultura anitzeko mundu baten barnean nazioartean komunikatu eta elkar ulertzeko balio duelako.

9. Bizitza antolatu eta harreman pertsonalak egituratzeko beste era batzuk modu kritikoan baloratzea, eta konbentzioen eta arau kulturalen balioa erlatiboa dela ulertzea.

ATZERRIKO BIGARREN HIZKUNTZA. ALEMANA I

Edukiak

I.-Komunikazio trebetasunak.

1. Ahozko eta idatzizko testuetan informazio orokorra eta berariazkoa lortzea, eta testuetako ideia nagusiak identifikatzea eskatutako lanak egin ahal izateko: informazio transferentzia, aurretiazko datuak egiaztatzea, e.a.

2. Testu mota ezberdinetan informazioaren predikzio eta dedukzioa egitea, eta ideia aurreratuak edo usteak egiaztatzea ondorengo entzunaldi edo irakurketaren bidez.

3. Doinu ezberdineko hiztunek emandako mezuak entzun eta ulertzea.

4. Testuetan erreferentzi elementuak eta lotura hitzak identifikatzea, testuen kohesio eta koherentzia interpretatu ahal izateko.

5. Beste pertsona batzuekin hitz egitea, eman nahi den mezua edo eskatu nahi den informazioa aldez aurretik planifikatuta, koherentzia nahiz zuzentasun formala zainduz.

6. Norberaren esperientzia edo iritzietan oinarritutako deskribapen eta narrazioak.

7. Testu hartzaileek izaten ahal dituzten espektatiba, interes edo jarrerei buruzko hipotesiak eratzea.

8. Esaldien eta lerroaldeen antolamendu logikoa testu koherente bat egin ahal izateko, loturazko elementu egokiak erabiliz.

9. Zenbait testu mota (narratiboak, deskribapenekoak, gutunak), bai formalak bai informalak, idaztea, egitura errespetatuta.

10. Aipamenak, laburpenak, txosten laburrak eta abar idazten direnean ideien sintesia egitea.

II.-Hizkuntzari buruzko hausnarketa.

A.-Hizkuntzaren eta gramatikaren funtzioak.

1. Gauzak eta pertsonak deskribatzea, pertsona eta gauzei buruzko iritziak ematea. Konparatu eta alderatzea.

-Adjektibo predikatibo eta atributiboa.

-Adjektiboaren deklinabidea. Perpausen koordinazioa (und, oder, aber, denn, sondern). Perpauseko elementuen ordena. Adjektiboaren konparazioa (wie; so...wie). Perpaus erlatiboa.

2. Norabidea adieraztea, gonbidatzea eta gonbitari ezetza ematea. Diskurtsoa antolatzea eta ulertzen dela ziurtatzea.

-Norabidezko preposizioak.

-Pertsona izenordainak: es eta man.

-Ahozko eta idatzizko diskurtsoko lokailuak.

3. Gogo-aldartea adieraztea, filiazioa adieraztea, konparatzea.

-Galderazko izenordaina: welch-.

-Adjektiboaren graduak. Forma erregularrak eta irregularrak.

-Galderazko perpaus positiboak eta negatiboak. Adjektiboaren graduen atribuzio erabilera.

4. Iraganeko gertaerak kontatzea, barkamena eskatzea, modalitatea adieraztea.

-Iraganaldi burutuaren konjugazioa.

-Adjektibo mugagabeak eta posesiboak.

-Moduzko aditzen konjugazioa.

-Denborazko perpausak (als, wenn, bevor, bis, nachdem, w„hrend).

5. Norberari buruzko datuak ematea, gustoko gauzak adieraztea, gonbidatzea.

-Pertsona izenordainen deklinabidea.

-Konparaziozko perpausak.

-Preposizioen erabilera.

6. Beharra, zergatia, jabetza adieraztea.

-Genitiboa. Kausazko perpausak.

-Perpaus konpletiboak.

-Mendeko perpausak: so dass, so ... dass.

-Perpauseko elementuen ordena.

7. Deskribatzea, iritzi bat ematea eta oinarritzea.

-Adjektibo atributiboaren deklinabidea, artikuluarekin eta artikulurik gabe.

-Sistema pronominala. Erlatibozko izenordainak.

-Substantiboak eratzea atzizki hauekin: -ung, -heit,-keit.

-Adjektiboak eratzea atzizki hauekin: -lich, -sam, -bar,-haft.

8. Denborazkotasuna adieraztea, informazioa ematea.

-Preposiziozko osagaia duten aditzak.

-Adberbio pronominalak.

-Perpaus kontzesiboak.

B.-Lexikoa-semantika.

-Aurreko etapan aurreikusitako hiztegiaz gainera, gai hauekin zerikusia duena: esperientziak, albisteak, tokiak, adiskidetasuna, gutunak, lan mundua, e.a.

-Natura, ingurumena, klima.

-Etxeko tresnak eta PC-a.

-Esapideak.

C.-Fonetika.

-Ahoskera finkatzea.

-Zailak diren kontsonante multzoak: schr, mpfst, kst.

-Hitzen azentuazioa. Esaldien intonazioa.

III.-Alderdi soziokulturalak.

1. Alemana herrien arteko ulermen eta komunikazio oztopoak kentzeko duen balioaz ohartzea.

2. Alemanak islatzen dituen eguneroko bizitzako alderdi kulturalak eta norberarenak alderatzea: famili ohiturak, kirolak, hezkuntza sistema, e.a.

3. Mezuak solaskidearen ezaugarrien arabera moldatzea.

4. Alemanez hitz egiten duten beste herri eta kultura batzuetako eguneroko bizitzan ageri diren ohitura eta ezaugarriak identifikatzea: ordutegiak, jaiegunak, e.a.

5. Komunikazio egoeretan egokiak diren hizkuntz formulak erabiltzea: agurrak, adeitasunez eginiko eskariak, e.a.

6. Alemanaren aldaerek erakusten dituzten alderdi soziokulturalak identifikatzea.

7. Alemana informazio eta komunikazioko teknologia berrietan nola agertzen den eta duen garrantzia ezagutzea: web orriak, albiste taldeak, e.a.

8. Alemanez hitz egiten duten herriei buruzko kultur informazioak ezagutzeko interesa: mitoak, elezaharrak, literatur lanak, e.a.

9. Alemanez egiten dutenekin harremanak izateko interesa: gutunak, turismoa, ikasketak, e.a.

Ebaluazio irizpideak

I.-Komunikazio trebetasunak.

1. Ikaskideek, irakasleak edo komunikabideek ahoz igorritako mezuetan informazio orokorra eta berariazkoa ateratzea, solaskideek eta jatorrizko testuek (interes orokorreko gaiak dituztenek) erabiltzen dituzten komunikazio estrategiak atzematea, eta irakurketa mota nahiz xede ezberdinekin zerikusia duten trebetasun eta estrategiak erabiltzea.

2. Aurrez prestatutako elkarrizketa edo eztabaidetan parte hartzea, solaskidearekin komunikazioa izateko egokienak diren estrategiak erabiltzea eta komunikazioa posible izateko mezu koherenteak eta zuzentasun formalekoak igortzea.

3. Zenbait testutan funtsezko informazioa ulertzea; testu horiek izanen dira gaur egungo gaiei buruzkoak, alemana erabiltzen duten herrien egoera soziokulturalaren ingurukoak edo interesgarriak informazioaren aldetik; datuak aurrez eman eta deduzituko dira, testuingurutik abiatuta.

4. Testuak sintaxi aldetik zuzen idaztea ongi ulertu ahal izateko, eta testuaren kohesio eta koherentzia ziurtatzeko elementuak erabiltzea.

II.-Hizkuntzari buruzko hausnarketa.

5. Hizkuntzaren funtzionamenduari buruz hausnartzea erregelak induzituz edo deduzituz, eta ikaskuntza sistematizatzen lagunduko duten erreferentziako hizkuntz elementuak erabiltzea (elementu gramatikalak, lexikokoak, ortografikoak, fonetikoak eta testualak).

6. Egoera berrietan aplikatzea alemanaren funtzionamendu erregelei buruzko ezagutza.

7. Baliabideak, informazio iturriak eta erreferentzi materialak beren kabuz erabiltzea, ondorioak alderatzeko eta ezagutzak sistematizatu eta sendotzeko.

8. Norberaren ikaskuntza prozesuari buruz hausnartzea, horri esker erregelak berriz formulatzeko, ikasitakoaren gaineko definizioak emateko eta ikaskuntza berrietan aurrera egiteko.

III.-Alderdi soziokulturalak.

9. Alemanez hitz egiten duten herrien kultura edo kulturak definitzen dituzten ezaugarriak interpretatzea, datu geografiko, historiko, artistiko eta literarioak eta abar ezagutzen dituztela erakustea, eta ezagutza hori kontestu baten barneko egoeretan komunikatzeko aplikatzea.

10. Alemanez komunikatzean transmititzen den aniztasun sozial eta kulturalera hurbiltzea eta antzekotasunak nahiz desberdintasunak bilatzea.

11. Alemana nazioarteko komunikaziorako eta herriek elkar ulertzeko duen balioa positiboki baloratzeko interesa garatzea, eta teknologia berrietan duen presentzia kontuan hartzea.

12. Nork bere kulturaren ezagutza sakontzea, alemanak ematen dituen informazio soziokulturalez baliaturik.

ATZERRIKO BIGARREN HIZKUNTZA. ALEMANA II.

Edukiak

I.-Komunikazio trebetasunak.

1. Ahozko eta idatzizko testuetan informazio orokorra eta berariazkoa lortzea, eta testuetako ideia nagusiak identifikatu eta doinu ezberdinekin ohitzea, eskatutakoa egin ahal izateko.

2. Testu mota ezberdinetan informazioaren predikzioa eta inferentzia egitea, eta ideia aurreratuak edo usteak egiaztatzea ondorengo entzunaldi edo irakurketaren bidez.

3. Testuetan lotura hitzak eta erreferentzi elementuak identifikatzea, testuen kohesio eta koherentzia interpretatu ahal izateko.

4. Beren kabuz irakurtzea gaur egungo gaiei, bizitza kulturalari, literaturari edo ikasleen oraingo edo geroko interes profesionalei buruzko testuak.

5. Zenbait komunikabidetan gai bati buruz argitaratu edo zabaldutako informazioak konparatu eta alderatzea.

6. Gai batzuei buruzko eztabaidetan aktiboki parte hartzea, argumentazioa eta kontra-argumentazioa erabiliz, arazoak konpontzeko edo gai zehatz bati buruzko erabakiak taldean hartzeko.

7. Gertaerei edo norberaren nahiz besteen esperientziei buruzko ahozko eta idatzizko narrazioak.

8. Testu koherenteak osatzea (narratiboak, deskripziozkoak, argudiozkoak, gutunak, artikuluak, txostenak, laburpenak), testu horien ezaugarriak kontuan hartuta, hizkuntz elementuak zuzen erabiliz, esaldiak eta lerroaldeak ongi egituratuz eta gai jakin baten inguruko edukia eta ideiak nabarmenduz.

9. Igorri nahi diren mezuak planifikatzea, solaskideak, komunikazio asmoa eta testu eskema egokiak kontuan harturik.

II.-Hizkuntzari buruzko hausnarketa.

A.-Hizkuntzaren eta gramatikaren funtzioak.

1. Iraganeko gertaerei buruzko kontakizun idatziak ulertzea.

-Aditz erregularren Pr„teritum.

-Aditz irregularren Pr„teritum.

-Aditzen denborazko korrespondentzia.

2. Iraganeko eta oraingo gertaerak kontatzea. Beste norbaitek esandakoaren berri ematea.

-Aditz erregularren eta irregularren iraganaldi burutua.

-Pluskuanperfektua.

-Denborazko perpausak.

-Era aktiboko aditz sistemaren konjugazio osoa.

-Zeharkako estiloa (Konjunktiv 1).

3. Helburu eta murrizte erlazioak adieraztea, zenbait ekintzaren artean.

-Helburuzko perpausak (damit, um ... zu + infinitiboa).

-Perpaus kontzesiboak.

4. Espazio, denbora, kausa, helburu eta murrizketa erlazioak adieraztea, objektuen edo pertsonen artean.

-Datibozko preposizioak.

-Genitibozko preposizioak.

-Preposiziozko osagaia duten aditzak.

-Galderazko zeharkako perpausak.

5. Gertaerak kronologikoki antolatzea, informazioak nabarmentzea, matizatzea, gertaerak koherentziaz adieraztea.

-Perpauseko elementuen ordena.

-Diskurtsoa antolatzea.

6. Jabetza adieraztea, objektu eta pertsonei buruzko informazioa zabaltzea.

-Izenordain erlatiboaren deklinabidea genitiboan.

-Izenordain posesiboaren deklinabidea genitiboan.

-Substantibo eta adjektiboen osaera.

-Egoerazko era pasiboa.

7. Objektuak eta pertsonak denborazkotasuna adierazten duten ezaugarrien bidez deskribatzea.

-Partizip I.

-Partizip II.

8. Baldintza, irrealtasuna adieraztea. Adeitasunez eskatu eta galdetzea. Iritziak ematea, proposamenak egitea.

-Aditz perifrasia: würde ... infinitiboa.

-Konjunktiv II formak: moduzko aditzak, laguntzaileak eta aditz irregular batzuk.

-Baldintzazko perpausak lokailuarekin eta lokailurik gabe.

9. Elaborazio prozesuak adierazi eta ulertzea. Ekintzak modu inpertsonalean adieraztea.

-Era pasiboaren konjugazioa indikatiboko orainaldian, Pr„teritum eta iraganaldi burutua.

-Agentea.

-Joskera inpertsonalak man erabiliz eta era pasiboan.

10. Zerbait egiteko nahia, gogoa, aukera, egokitasuna edo desegokitasuna adieraztea. Iragarpenak egitea.

-Infinitibozko joskerak zu erabiliz.

-Infinitibo aktibo, pasibo eta perfektuak.

-Geroaldiko aditz-jokoa.

B.-Lexikoa-semantika.

-Aurreko kurtsoetan landutako gaien hiztegia finkatu eta zabaltzea.

-Komunikabideak: prentsa, irratia eta telebista.

-Formulak eta esapideak.

C.-Fonetika.

-Ahoskera hobetzea.

-Zail samarrak diren kontsonante multzoak.

-Hitz konposatuen azentuazioa.

-Esaldien intonazioa.

-Erritmoa.

III.-Alderdi soziokulturalak.

1. Alemanaren ezaugarri dialektal garrantzitsuenak identifikatzea.

2. Norberarenak ez diren eredu kulturalen balorazio positiboa egitea.

3. Hizkuntz komunitate bateko hiztun taldeen arteko ezberdintasun kulturalak eta jokabide sozial ezberdinak ikustea.

4. Kulturen arteko antzekotasun eta desberdintasunez hausnarketa egitea.

5. Alemana baloratzea beste kultura batzuetara iristeko eta nazioarteko komunikaziorako tresna den aldetik.

6. Esperientziak antolatzeko beste modu batzuei buruzko hausnarketa egitea, beste konbentzio kultural batzuk ulertzeko jarrerak gara daitezen.

7. Komunikazio egoeraren, solaskidearen eta solaskideen asmoen araberako erregistroak erabiltzea.

8. Alemanak bizitza profesionalean interesgarriak izanen diren ezagutzak sakontzeko duen garrantzia ikustea.

Ebaluazio irizpideak

I.-Komunikazio trebetasunak.

1. Ikusizko laguntza duten ahozko testuetatik aurrez eskatutako informazio orokor eta berariazkoak ateratzea; testu horiek komunikabideetan azaldutakoak izanen dira, gaur egungo gai orokorrei buruzkoak, alemanari lotutako kulturen zenbait arloren ingurukoak eta beren ikasketa eta interesekin zerikusia duten gai orokorrei buruzkoak. Idatzizko testu mota ezberdinetatik ere atera beharko dute informazioa, datu ezezagunetatik esanahaiak ondorioztatzeko estrategia egokienak erabiliz. Testuak ulertu dituztela erakusteko, berariazko lan bat egin beharko dute.

2. Arintasunez parte hartzea bat-bateko elkarrizketetan eta aurrez prestatutako narrazio, azalpen, argudiatze eta eztabaidetan, ikasleentzat interesgarriak diren gaietan, gaiek zerikusia dutela curriculumeko beste gai batzuekin edo alemanez egiten duten herrietako alderdi sozial eta kulturalekin; egoeraren araberako komunikazio estrategiak eta diskurtsoa erabiltzea.

3. Beren kabuz irakurtzea gaur egungo gaiei, bizitza kulturalari edo ikasleen oraingo edo geroko interes profesionalei buruzko testu idatziak.

4. Edukien plangintza eta elaborazio gogoetatsua behar duten testuak idaztea egokia den kontsulta materiala erabiliz, eta hizkuntz zuzentasuna, kohesioa eta koherentzia zaintzea.

II.-Hizkuntzari buruzko hausnarketa.

5. Lortutako ezagutza linguistiko, soziolinguistiko, estrategiko eta diskurtsiboak hausnarketa bidez erabiltzea, eta autozuzenketako mekanismoak aplikatzea, ikaskuntzan autonomia indartzeko.

6. Lortutako ikaskuntza estrategiak natural erabiltzea, eta erreferentzi materialak kontsultatzea, hala nola hiztegiak, gramatikak, grabaketak eta beste iturri batzuk, komunikazioan agertutako arazo berriak konpontzeko edo hizkuntz sistemaren eta datu soziokulturalen ikaskuntza sakontzeko.

7. Komunikazio gaitasunaren osagai ezberdinak aztertu eta horien gaineko hausnarketa egitea, komunikazioan arrakasta lortzen laguntzen duten elementuak diren aldetik.

8. Indukzio-dedukzio prozesuen ondorioz ezagutzen diren erregelen eraginkortasuna baloratzea eta, beharrezkoa bada, horiek aldatzeko prest agertzea.

III.-Alderdi soziokulturalak.

9. Alemanaren bidez transmititutako agerpen kulturalak eta alderdi soziolinguistikoak aztertzea benetako testuak erabiliz, ikasleek ezagutzen dituzten hizkuntza eta kulturek aberastutako ikuspegitik begiratuta.

10. Hizkuntz komunitate bateko taldeen artean eta beste kultura batzuetako kideen artean ezberdinak diren elementu zinetikoak eta keinuzkoak eta jokabideak identifikatzea.

11. Komunikazioan egokiak diren erregistroak erabiltzea eta ingurua kontuan hartzea.

12. Garapen profesionalean lagunduko duten datu eta informazioak ulertzea; hots, alemanez egiten duten herrietako zibilizaziokoak direnak, nazioarteko komunikazioaren esparruan beti.

ATZERRIKO BIGARREN HIZKUNTZA. FRANTSESA

Sarrera

Gainera, teknologia berrien garapenak atzerriko hizkuntzak ezinbesteko tresna bihurtzen ditu lan munduan eta, oro har, komunikazio munduan sartzeko.

Europako Batasunean hizkuntza ezberdinetako herriak sartzeak ere atzerriko hizkuntzak jakitea eskatzen du, erkidego zabal horretako kideen artean komunikazioa izan dadin. Horiek horrela, atzerriko hizkuntzak gakoa dira identitate europarra eraikitzerakoan: hizkuntz eta kultur aniztasuneko identitatea. Halaber, atzerriko hizkuntzak jakiteak pertsonen joan-etorri askea errazten du eta, hori bezala, herrien arteko lankidetza kultural, ekonomiko, tekniko eta zientifikoa.

Europako Kontseiluak maiz adierazten du herritarrek Europako herrietako jendearekin harremanak izateko behar diren gaitasunak garatu behar dituztela.

Edukiak kurtsoz kurtso zehaztu izana garapen jarraitu baten moduan ulertu behar da, zeinetan komunikazio trebetasunak, hizkuntzari buruzko hausnarketa eta alderdi soziokulturalak pixkanaka osatuko diren. Beraz, lehenago landutako edozein ezagutza berriz agertuko da testuinguru ezberdinetan. Era berean, hizkuntzaren funtzioen eta alderdi gramatikalen arteko loturak esan nahiko du hizkuntzaren funtzio bat hizkuntz forma desberdinez gauza daitekeela, eta alderantziz.

Hortik inplikazio metodologiko batzuk ateratzen dira; alegia, lan unitateak garatzeko gaiak hautatu beharra, eta gai horiek, adin horretako gazteentzat interesgarriak izateaz gainera, etorkizuneko beharrei begira ere egokiak izatea. Ikaskuntza ariketak gaietatik abiatuko dira, ikasleek aurretik dakitena kontuan hartuta, eta, ariketa horien inguruan, helburuak planteatu eta helburuak lortzen lagunduko duten edukiak sortuko. Ariketa horiek ikaskuntzaren ardatz hartuta, ebaluazioa prozesu guztian integratuta egonen da eta kontuan hartuko ditu bai lortutako emaitzak bai agertzen diren zailtasunak ere.

Helburuak

1. Ohiko komunikazio egoeretan eta komunikabideek sortutako ahozko, idatzizko eta ikusizko testuak ulertu eta modu kritikoan interpretatzea.

3. Gai orokorreko testuak edo beren interesei egokitzen zaizkienak hiztegirik gabe irakurtzea, funtsezko elementuak ulertzea eta testuen funtzioaz eta diskurtsoaren antolaketaz ohartzea.

4. Frantsesa ahoz eta idatziz erabiltzea, estrategia egokiez baliaturik arin eta zuzen komunika daitezen.

5. Frantsesak komunikazioan duen funtzionamenduaz hausnarketa egitea, norberaren produkzioak hobetu eta besteenak ulertzeko, pixkanaka-pixkanaka, era askotako eta ustekabeko egoeretan.

6. Norberaren ikaste prozesuei buruzko hausnarketa egitea, behaketan, zuzenketan eta ebaluazioan oinarritutako baliabide propioak erabiliz, aurrerantzean ere frantsesa ikasten jarraitu ahal izateko.

7. Ikasten duten hizkuntzaren inguru soziokulturaleko funtsezko alderdiak ezagutzea, komunikazioa hobea izan dadin eta beste kultura batzuk hobeki uler eta interpreta ditzaten.

8. Frantsesa beste ezagutza eta kultura batzuetara iristeko bide gisa baloratzea, eta norberaren hizkuntza eta kultura hobeki ulertzeko duen garrantziaz jabetzea; baloratzea, halaber, kultura anitzeko mundu baten barnean nazioartean komunikatu eta elkar ulertzeko balio duelako.

9. Bizitza antolatu eta harreman pertsonalak egituratzeko beste era batzuk modu kritikoan baloratzea, eta konbentzioen eta arau kulturalen balioa erlatiboa dela ulertzea.

ATZERRIKO BIGARREN HIZKUNTZA. FRANTSESA I

Edukiak

I.-Komunikazio trebetasunak.

2. Testu mota ezberdinetan informazioaren predikzioa eta dedukzioa egitea, eta ideia aurreratuak edo usteak egiaztatzea ondorengo entzunaldi edo irakurketaren bidez.