I. NAFARROAKO FORU KOMUNITATEA
Xedapen Orokorrak. Foru Dekretuak
162/2001 FORU DEKRETUA, ekainaren 25ekoa, apirilaren 14ko 96/1997 Foru Dekretua aldatzen duena. 96/1997 Foru Dekretuak, Nafarroako Administrazio Publikoen zerbitzuko langileen Estatutuaren 24.2 artikulua hein batean garatzeko, Nafarroako Foru Komunitateko Administrazioaren eta haren erakunde autonomoen zerbitzuko langileen lanbide prestakuntza eta hobekuntza errazten zituen.
Apirilaren 14ko 96/1997 Foru Dekretuak hauxe zuen helburua: Nafarroako Administrazio Publikoen zerbitzuko langileen Estatutuaren 24.2 artikulua hein batean garatzeko Nafarroako Foru Komunitateko Administrazioaren eta haren erakunde autonomoen zerbitzuko langileen lanbide prestakuntza eta hobekuntza erraztea.
2000ko uztailaren 18ko Epaiaren bidez, Nafarroako Auzitegi Nagusiaren Administrazioarekiko Auzien Sailak aipatu dekretuaren Bigarren eta Hirugarren Xedapen Gehigarriak ezeztatu zituen, lan baldintzen gaineko akordioaren sinatzaileei mugak jartzen baitzizkieten akordioaren jarraipen batzorde teknikoan parte hartzeko. Beharrezkoa da, beraz, xedapen gehigarri haiek aldatzea Batzorde Teknikoan parte hartu ahal izan dezaten Nafarroako Foru Komunitateko eta haren erakunde autonomoetako Administrazioaren zerbitzuko funtzionarioen eta estatutupeko langileen Negoziazio Mahai Orokorrean edo Lan Kontratatuen Hitzarmen Kolektiborako Negoziazio Batzordean diren sindikatu guztiek.
Bestetik, Administrazioa sindikatuekin akordio batera ailegatu da aldi baterako lan-kontratatuek eta aldizkako kontratu finkoko langileek ere aukera izan dezaten prestakuntza eta hobekuntza prozeduretan parte hartzeko. Horregatik ere beharrezkoa da apirilaren 14ko 96/1997 Foru Dekretua aldatzea adostutakoa sartzearren.
Azkenik, apirilaren 14ko 96/1997 Foru Dekretuak, 2.2 eta 6. artikuluetan irakaskuntzako lanpostuen berezitasunak arautzen ditu, eta aipamen berezia egiten du Hezkuntza eta Kultura Departamentuko eskola-orientatzaileei buruz. Horri dagokionez, Hezkuntza eta Kultura kontseilariak abenduaren 20an emandako 487/1999 Foru Aginduaren bidez, eskola-orientatzaileak Bigarren Hezkuntzako Irakasleen Kidegoan sartu direnez, ageri-agerikoa da irakaskuntzako langiletzat hartzen direla eta, araudia hobetzeagatik, komeni da artikulu horietan orientatzaileei buruz egiten diren aipuak kentzea.
Foru Dekretuaren proiektua Nafarroako Kontseiluak aztertu zuen eta hark horren aldeko txostena eman zuen 2001eko ekainaren 12an. Foru Dekretu hau txosten horren edukiari lotzen zaio.
Hori horrela, Lehendakaritza, Justizia eta Barne kontseilariak proposaturik, eta Nafarroako Gobernuak bi mila eta bateko ekainaren hogeita bostean egindako bilkuran hartutako erabakiari jarraikiz,
DEKRETATU DUT:
Artikulu bakarra.-Aldaketa batzuk egin dira apirilaren 14ko 96/1997 Foru Dekretuan (Nafarroako Administrazio Publikoen zerbitzuko langileen Estatutuaren 24.2 artikulua hein batean garatzeko Nafarroako Foru Komunitateko Administrazioaren eta haren erakunde autonomoen zerbitzuko langileen lanbide prestakuntza eta hobekuntza errazten dituena). Aldaketak hauek dira:
Lehenbizikoa.-2. artikuluko 1. eta 2. atalak honela geldituko dira:
"1. Aldi baterako kontratazioaren aurretik, Nafarroako Foru Komunitateko Administrazioak eta haren erakunde autonomoek bete nahi dituzten lanpostuak eskainiko dizkiete bertako langile finkoei.
2. Hezkuntza eta Kultura Departamentuko irakasle lanpostuek aparte egonen den eremua osatuko dute, Foru Dekretu honen 6. artikuluan zehazten den bezala."
Bigarrena.-6. artikuluko 1. atala honela geldituko da:
"6. artikulua. 1. Hezkuntza eta Kultura Departamentuko B maila edo taldeko irakasleek A maila edo taldeko lanpostuak eskatzen ahalko dituzte, betiere horiek betetzeko eskatutako titulazioaren jabe badira, arestian aipatutako arauei loturik, baino berezitasun hauekin:
-Daukaten titulazioarekin bat datorren espezialitateko lanpostua eskuratu nahi denean, prestakuntzako lanpostuetan sartzeko ez da aldez aurretik hautapenik eginen.
-Bestelako kasuetan, Hezkuntza eta Kultura Departamentuak horretarako deituko dituen hautapen probak gainditu beharko dira."
Hirugarrena.-Bigarren eta hirugarren xedapen gehigarriak honela geldituko dira:
"Bigarrena.-Batzorde Tekniko bat eratuko da, eta Administrazioaren ordezkariek eta Nafarroako Foru Komunitateko Administrazioaren eta haren erakunde autonomoen zerbitzuko funtzionarioen eta estatutupeko langileen Negoziazio Mahai Orokorrean edo Lan Kontratatuen Hitzarmen Kolektiborako Negoziazio Batzordean parte hartzen duten sindikatuen ordezkariek osatua, Foru Dekretu honetan xedatutakoaren interpretazioa, jarraipena eta garapena egiteko xedeaz.
Batzorde Tekniko horretan Foru Dekretu honen 2. artikuluak aipatzen dituen prestakuntza ikastaroen diseinua negoziatuko da."
"Hirugarrena.-Nafarroako Foru Komunitateko Administrazioak eta haren erakunde autonomoek Foru Dekretu hau aurretik aplikatu gabe premiazko kasuetan kanpotik egindako kontratazioen berri emanen die, hiru hilabetetik behin, Nafarroako Foru Komunitateko Administrazioaren eta haren erakunde autonomoen zerbitzuko funtzionarioen eta estatutupeko langileen Negoziazio Mahai Orokorrean edo Lan Kontratatuen Hitzarmen Kolektiborako Negoziazio Batzordean parte hartzen duten sindikatuei.
Era berean, Foru Dekretu honen aplikazioa, haien ezaugarriak direla eta edo/eta bete beharreko eginkizunen izaera dela eta, bidezkoa ez den lanpostuen kasuan, horiek betetzeko egindako kontratazioen berri ere emanen die."
AZKEN XEDAPENAK
Lehenbizikoa.-Lehendakaritza, Justizia eta Barne kontseilariari eta Hezkuntza eta Kulturakoari, bakoitzari bere eskumenen esparruan, ahalmenak ematen zaizkie Foru Dekretu hau garatu eta aplikatzeko behar diren xedapenak eman ditzaten.
Bigarrena.-Foru Dekretu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, bi mila eta bateko ekainaren hogeita bostean.-Nafarroako Gobernuko lehendakaria, Miguel Sanz Sesma.-Lehendakaritza, Justizia eta Barne kontseilaria, Rafael Gurrea Induráin.
Iragarkiaren kodea: A0107149
