14. ALDIZKARIA - 2000ko urtarrilaren 31

I. NAFARROAKO FORU KOMUNITATEA

- Agintariak eta Langileak

EBAZPENA, 2000ko urtarrilaren 17koa, Funtzio Publikoaren Zuzendari Nagusiak emana, Nafarroako Foru Komunitateko Administrazioaren eta haren erakunde autonomoen zerbitzuko Koordinazioko operadore laguntzaile (SOS Nafarroa) izateko zazpi lanpostu oposizio-lehiaketa bidez betetzeko deialdia onesten duena.

Funtzio Publikoaren Zuzendari Nagusiak 2000ko urtarrilaren 17an emandako Ebazpenaren bitartez Nafarroako Foru Komunitateko Administrazioaren eta haren erakunde autonomoen zerbitzuko Koordinazioko operadore laguntzaile (SOS Nafarroa) izateko zazpi lanpostu oposizio-lehiaketa bidez betetzeko deialdia onetsi da.

1.-Arau Orokorrak

1.1. Deialdi honen xedea oposizio-lehiaketa bidez zazpi lanpostu betetzea da, Koordinazioko operadore laguntzaileenak (SOS Nafarroa) alegia. Lanpostu horiek Lehendakaritza, Justizia eta Barne Departamentuko Herri Babeserako Zerbitzuari atxikiak daude eta txanda hauetan banatuak:

a) 3 lanpostu txanda irekian.

b) 3 lanpostu igoera txandan.

c) 1 lanpostu bat % 33tik goitiko ezgaitasuna duten elbarrituentzat.

1.2. Igoera txandako lanpostuak, izangaiek hautapen probak gainditzeko behar den gutxieneko puntuazioa atera ez dutelako, hutsik geldituz gero, txanda irekikoei gehituko zaizkie.

Elbarrituentzako txanda murriztuko lanpostuak, izangaiek hautapen probak gainditzeko behar den gutxieneko puntuazioa atera dutelako bete gabe geldituz gero, Nafarroako Administrazio Publikoen zerbitzuko Langileen Estatutuaren 15.3 artikuluan ezarritako banatze ordenari jarraikiz dagokion txandari gehituko zaizkio.

Halaber, igoera txandan, betegabeko lanpostu kopurua baino izangai gehiagok gainditzen badituzte probak, txanda horretan gainditu eta lanpostu gabe gelditutakoek txanda irekiko lanpostuen aukera izanen dute, txanda horretako izangaiekin lehiaketa garbian, lortutako azken puntuazioaren arabera.

1.3. Izendapenak nomina eta plantilako funtzionario bihurtuko ditu izendatuak, Nafarroako Foru Komunitatearen Administrazioko funtzionarioei buruz indarra duten xedapenetan adierazitako eskubide eta betebehar guztiekin.

1.4. Lanpostuek D mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta gainerako xedapen aplikagarrietan erabakitakoaren arabera.

1.5. Izangaiak, hautapen probak gainditu eta deialdi honen xedeko lanpostuetan aritzeko izendatu, Nafarroako Foru Komunitateko Administrazioan sartu eta funtzionario eginez gero, Gizarte Segurantzaren Erregimen Orokorrean afiliatuko dira eta alta emanen zaie, erregimen horretan aurrikusitako babesean.

Deialdi honen xedeko lanpostuetarako izendatu eta eskubide pasiboen erregimenean eta osasun eta gizarte laguntzan, Nafarroako Administrazio Publikoen zerbitzuko Langileen Estatutuan eta gainerako xedapen osagarrietan aipatzen den hartan, afiliatuta dauden funtzionarioek bertan segitzea aukeratu ahalko dute edo Gizarte Segurantzan afiliatu.

1.6. Izendatutako izangaiek destinoko herrian bizi beharko dute, eta horretarako, udalerri horretan eduki beharko dute bizilekua. Administrazioko organo eskudunek destinoa aldatu ahalko dute.

1.7. Lanaldiaren erregimena zerbitzuaren beharretara egokituko da, eta administrazioko organo eskudunek edozein unetan aldatzen ahalko dute.

2.-Izangaien betebeharrak

2.1. Oposizio-lehiaketa honetan onartuak izateko, izangaiek, eskaerak aurkezteko epea amaitzen den egunean, baldintza hauek bete beharko dituzte:

a) Nazionalitate espainiarra edo Europako Batasunaren kide den beste edozein estatukoa edo Europako Batasunak egin eta Espainiak berretsi dituen nazioarteko itunak dituzten estatuetakoa.

b) Adin nagusikoa izatea.

c) Eskola Graduatuaren titulua, Lanbide Heziketako Lehen Mailakoa edo baliokideren bat edukitzea, edo eskaerak aurkezteko epea amaitzen den egunean eskuratzeko moduan egotea.

d) Bere eginkizunak betetzeko behar den gaitasun fisiko eta psikikoa izatea.

e) Eginkizun publikoetan aritzeko desgaitu edo gabetua ez egotea eta Administrazio Publikoaren zerbitzutik bereizia ez izatea.

2.2. Igoera txandako izangaiek, eskaerak aurkezteko epea amaitzen den egunean, aipatutako baldintzez gain beste hauek ere bete beharko dituzte:

a) Nafarroako edozein Administrazio Publikotako langile finko izatea eta igoera txandan parte hartu aurretik borondatezko nahiz behartutako eszedentzian ez egotea.

b) Deialdian sartutako lanpostuen maila berekoa edo txikiagokoa izatea.

c) Eskola Graduatua, Lehen Graduko Lanbide Heziketakoa edo baliokidea den beste titulu bat edukitzea edo eskuratzeko moduko egoeran egotea eta administrazio publikoetan bost urteko zerbitzuak eginak izatea frogatzea edo, bestela, zortzi urteko antzinatasun egiaztatua duela frogatzea.

Nafarroako Administrazio Publikoen zerbitzuko Langileen Estatutuaren Zortzigarren Xedapen Gehigarrian xedatutakoa aplikatuz, Nafarroako Parlamentuko funtzionarioek ere parte hartzerik izanen dute igoera txandan, bertan lehiatzeko behar diren gainerako baldintzak betetzen badituzte.

2.3. Hirugarren oinarrian xedatutakoa salbu, lanpostua eskuratzen duten izangaiek betebehar horiek frogatu beharko dituzte deialdi honen zazpigarren oinarrian aurrikusitako epe eta moduan. Eskaerak aurkezteko epea amaitzen den egunean betetzen dituztela ulertuko da eta oposizio-lehiaketan zehar haien jabe izan beharko dute izendapena bitarte.

3.-Eskabideak

3.1. Deialdian parte hartzeko eskabideak Nafarroako Gobernuko Erregistro Orokorrean aurkeztu beharko dira, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean. Eskabide horiek deialdi honetan aurkeztutako ereduari beharko zaizkio lotu. Nafarroako Gobernuko Argibide Bulegoan, Karlos III.a Etorb., 2, atarian, eskuratuko da, eta bertan, izangaiek, eskabideak aurkezteko emandako epea amaitzerako, eskatutako baldintza guztiak betetzen dituztela beharko dute adierazi.

3.2. Elbarrituek ariketak egiteko denbora eta baliabide aldetik behar ditzaketen egokitzapenak eskatzen ahalko dituzte, haien beharrik izanez gero. Kasu horretan, eskabidean beharko dute adierazi zein ezintasun duten eta zein egokitzapen eskatzen duten. Horretarako, elbarritasuna frogatzen duen agiria aurkeztu beharko dute, erakunde eskudunen batek luzatua.

3.3. Eskaerari, Nafarroako Foru Komunitateko Administrazioaren kontuan 1.000 pezeta ordaindu izanaren frogagiria erantsi beharko zaio, espedientea formalizatu eta azterketa eskubideak izateko.

Deialdiaren igoera txandan parte hartzea eskatzen duten izangaiek, gainera, 2.2 atalean adierazitako baldintzak frogatzen dituen ziurtagiria erantsi beharko dute.

3.4. Eskabideak aurkezteko epea luzaezina da.

4.-Izangaien onarpena eta erreklamazioak

4.1. Eskaerak aurkezteko epea amaiturik, Funtzio Publikoaren Zuzendari Nagusiak Ebazpena emanen du, izangai onartu eta baztertuen behin-behineko zerrenda onesten duena, eta Nafarroako ALDIZKARI OFIZIALean argitara dadin aginduko du.

4.2. Baztertutako izangaiek, behin-behineko zerrenda Nafarroako ALDIZKARI OFIZIALean argitaratu ondoko hamar egun balioduneko epean, erreklamazioak egin ahalko dituzte eta, okerrik egin izanez gero, haiek zuzendu.

4.3. Erreklamazio epea iraganik, eta haiek ebatzitakoan, Funtzio Publikoaren Zuzendari Nagusiak Ebazpena emanen du, izangai onartu eta baztertuen behin-betiko zerrenda onesten duena, eta Nafarroako ALDIZKARI OFIZIALean argitara dadin aginduko du.

5.-Epaimahai kalifikatzailea

5.1. Kide hauek osatuko dute Epaimahai kalifikatzailea:

-Mahaiburua: Francisco José Fernández Elizalde jauna, Herri Babeserako Zerbitzuko zuzendaria.

-Ordezkoa: Francisco Javier Echeverría Iriarte jauna, Herri Babeserako Zerbitzuko Plangintza eta Larrialdietarako Ataleko burua.

-Mahaikidea: José Miguel Gorricho Ochoa jauna, Barne Zuzendaritza Nagusiko Araubide Juridiko eta Administratiboaren Zerbitzuko zuzendaria.

-Ordezkoa: Raúl López Merino jauna, Barne Zuzendaritza Nagusiko Lankidetza, Segurtasun eta Udaltzaingoen Koordinaziorako Zerbitzuko zuzendaria.

-Mahaikidea: Eusebio Medina Ureña jauna, Herri Babeserako Zerbitzuko Azpiegitura Teknikoaren Bulegoko burua.

-Ordezkoa: José Miguel Olaiz Zoroquiáin jauna, Herri Babeserako Zerbitzuko Larrialdietarako Bulegoko burua.

-Mahaikidea: Nafarroako Foru Komunitateko Administrazioko Langile Batzordeak hautatutako ordezkari bat.

-Ordezkoa: Nafarroako Foru Komunitateko Administrazioko Langile Batzordeak hautatutako ordezkari bat.

-Mahaikide idazkaria: Purificación González Merchán andrea, Barne Zuzendaritza Nagusiko Araubide Juridikoaren Ataleko burua.

-Ordezkoa: María Jesús González Muñoz andrea, Barne Zuzendaritza Nagusiko Administrazio Publikoko Teknikaria (arlo juridikoa).

Epaimahaia hautapen probak hasi baino lehen eratu behar da.

5.2. Epaimahaia ezin izanen da eratu, ezta jardun ere, kideen gehiengo absolutua bildu gabe.

Organo kolegiatuaren eraketak balioa izateko, Mahaiburua eta Idazkaria, edo horien ordezkoak, eta kideen erdiak bederen elkartu beharko dira.

5.3. Epaimahaiko kideek parte hartzeari uko egin beharko diote eta deialdia egiten duen organoari hala jakinarazi, Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legean horretarako aurreikusiak dauden arrazoiak suertatzen direnean.

Halaber, izangaiek ere errefusa ditzakete epaimahaikideak, aipatu arrazoiak izaten direnean.

5.4. Epaimahaiak gehiengoz ebatziko ditu deialdi honen oinarriak ulertu eta aplikatzerakoan sor daitezkeen arazo guztiak.

5.5. Epaimahaiak proba batzuetarako edo guztietarako aholkulari espezialistei dei egin ahalko die. Aholkulari horiek beren espezialitate teknikoetan aritzera mugatuko dira eta epaimahaiari horietan baizik ez diote lagunduko.

6.-Oposizio-lehiaketa nola eginen den.

6.1. Oposizio-lehiaketa bi alditan eginen da: lehenbizi lehiaketaldia, eta, gero, oposizioaldia, oinarri hauetan adierazitako moduan.

6.2. Oposizio-lehiaketa 2000ko apirilean hasiko da. Izangai onartu eta baztertuen behin betiko zerrenda onesten duen ebazpenean bertan zehaztuko da probak non eta zein egun eta ordutan hasiko diren. Gero, epaimahaiak garaiz jakinaraziko ditu gainerako probak egiteko iragarkiak, arauzko moduan.

6.3. Lehiaketaldia.

6.3.1. Alegatutako merezimenduak deialdi honen II. eranskinean azaldu baremoari jarraikiz puntuatuko dira.

6.3.2. Oposizio-lehiaketan parte hartzeko eskabidea aurkeztearekin batera alegatu eta dokumentu bidez egiaztatu beharko dituzte izangaiek merezimendu guztiak, jatorrizko dokumentuekin edo behar bezala konpultsatutakoekin egiaztatu ere; bestela, aurkeztu gabekotzat joko dira merezimenduok.

6.3.3. Baremoa aplikatzeko behar den informazio guztia eduki beharko dute merezimenduak egiaztatzeko dokumentuek. Ez da justifikatu gabeko merezimendurik zenbatuko.

Epaimahaiak edozein unetan eska ditzake izangaiek alegatutako merezimenduei buruzko azalpenak eta datu osagarriak.

Izangaiek merezimenduak aurkeztu bai baina behar bezala egiaztatu ez dituztenean, epaimahaiak huts hori zuzentzeko aukera ematen ahalko du.

6.3.4. Lehiaketa ez da baztergarria izanen. Bertan gehienez 43 puntu erdiesten ahal dira eta deialdiko II. eranskinari jarraikiz, honela daude banatuak:

a) Merezimendu akademikoak: 6 puntu gehienez.

b) Administrazio Publikoetan emandako zerbitzuak: 12 puntu gehienez.

c) Euskaraz jakitea: 13 puntu gehienez.

d) Beste hizkuntza batzuk: 6 puntu gehienez.

e) Lanbide curriculuma: 6 puntu gehienez.

6.3.5. Izangai bakoitzari dagozkion merezimenduak baloratuko ditu epaimahaiak, baremoaren atal bakoitzaren arabera; edonola ere, ezin izanen da aintzat hartu alegatu gabeko merezimendurik edo dokumentuz egiaztatu gabekorik, ez eta atal bakoitzari dagokion gehieneko puntuazioa gainditu.

6.3.6. Lehiaketaldia bukatu ondoren, epaimahaiak izangai bakoitzak lortutako puntuazioa jarriko du Nafarroako Gobernuko iragarki oholean.

Izangaiek oposizioaldiko probetan ateratako puntuazioari gehituko zaio lehiaketaldian ateratako puntuazioa. Horrela aterako da oposizio-lehiaketaren puntuazio osoa.

6.4. Oposizioaldia.

6.2.1. Oposizioaldiak lau ariketa izanen ditu eta prestakuntza eta praktikako ikastaroa.

6.4.1. Oposizioko probak:

a) Gaitasun administratiboen proba: ortografia, eta honako gaitasunak: mintzamena, zenbakiak eta burokrazia.

Proba honetan izangaiek ez dute erabiltzen ahalko ez hiztegirik ez kalkulagailurik. Probaren iraupena epaimahaiak erabakiko du proba hasi aurretik.

b) Ezagupenei buruzko proba, objetiboa (test), deialdiaren III. eranskinean datorren gai-zerrendari buruz.

Epaimahaiak proba honen gehieneko iraupena erabakiko du hasi aurretik.

c) Mekanografi proba: gehienez 10 minututan Epaimahaiak emandako testu bat kopiatu beharko dute izangaiek, denek berdina.

Proba hori egiteko, izangai bakoitzak bere idazmakina erabiliko du, eta debekatuta dago makina elektriko edo elektronikoak erabiltzea.

Akats mekanografikoengatiko zehapenak eginik, minutuko 220 behatz kolpe baino gehiago atera beharko dira, hau da, 2.200 baino gehiago ariketa osoan.

Honela kontatuko da:

-5 behatz kolpe, lerro aldaketa bakoitzean.

-5 behatz kolpe, lerroalde hasieran.

-Behatz kolpe bat, letra larri bakoitzeko edo haien tekla sakatu behar den zeinu bakoitzeko.

-Behatz kolpe bat, azentu bakoitzeko.

-20 behatz kolpe, orrialde aldaketa bakoitzeko.

Honelako deskontua eginen da:

-5 behatz kolpe, akats mekanografiko bakoitzean.

-7 behatz kolpe, idatzi gabe utzitako hitz edo zeinu bakoitzeko, gehi eman gabeko behatz kopeei dagokien deskontua.

-15 behatz kolpe, testuan adierazitakoaz bestelako formatoan idatzitako lerro bakoitzeko. Kontutan hartu behar da ez dela akats mekanografiko bat baino gehiago kontatuko hitz bakoitzean. Lerroaren bukaean marratxo batez zatitutako hitzak bi hitz balira bezala kontatuko dira.

Jotako behatz kolpe guztiak zenbatzerakoan, ez dira kontuan hartuko transkribatu beharreko testuarekin bat ez datozenak.

d) Proba psikoteknikoak: ariketa psikotekniko bat baino gehiago eginen dira, izangaiak lanpostuaren eskakizun profesiografikoari zenbateraino egokitzen zaizkion neurtzeko. Proba hori Nafarroako Administrazio Publikoaren Institutuko Psikologia Aplikatuaren Zerbitzuak eginen du eta emaitzak lotesleak izanen dira epaimahaiarentzat.

6.4.1.1. Oposizioko probetan guztira 100 puntu ateratzen ahal dira gehienez. Puntuak honela banatuak daude:

a) Gaitasun administratiboen proba: 20 puntu gehienez.

b) Ezagupenei buruzko proba: 30 puntu gehienez.

c) Mekanografi proba: 25 puntu gehienez.

d) Proba psikoteknikoa: 25 puntu gehienez.

6.4.1.2. Oposizioaldiko probak baztergarriak izanen dira. Bazterturik geldituko da aurreko idatz-zatiko c) letrak dioen behatz kolpeen kopurua lortzen ez duena, eta gainerako probetan bakoitzaren puntuazioaren erdira iristen ez dena.

6.4.1.3. Oposizioaldiko proba bakoitzaren ondoren, epaimahaiak, Nafarroako Gobernuko iragarki-oholean eta probak egin diren tokian, proba gainditu duten izangaien kalifikazioen zerrenda jarriko du jendaurrean. Horrekin batera, oposizioaldiko hurrengo proba non eta zein egun eta ordutan eginen den adieraziko du, beti ere gutxienez 48 ordu lehenago.

6.4.1.4. Ariketa bakoitzerako deialdi bakarra eginen da. Izangaiek Nortasun Agiri Nazionala edo epaimahaiak nahikotzat jotzen duen beste identifikazio agiri bat aldean dutela agertu beharko dute, eta oposiziotik baztertuta geratuko dira agertzen ez diren izangaiak. Orobat, ariketak irakurri behar izanez gero, epaimahaiak finkatu egunean irakurtzera agertzen ez diren izangaiak ere baztertu eginen dira.

6.4.1.5. Hautapen probak egiteko, eskaera egin duten elbarrituentzat, denbora eta baliabide aldeko egokitzapenak jarriko dira, eskabidean azaldutakoaren arabera.

6.4.1.6. Oposizioko probak bukaturik, epaimahaiak jendaurrean jarriko du Nafarroako Iragarki Oholean eta azken proba egin den lekuan zein diren prestakuntza eta praktikako ikastaroan onartutako izangaiak, ateratako puntuazioaren arabera ordenatuak eta txandaka banatuak. Kopuru osoa, dena dela, ez da 30 ikasletik goitikoa izanen.

Horretarako, lehiaketaldian eta oposizioaldiko probetan lortutako puntuazioak batuko dira. Ikastarorako plazak honela banatuko dira:

-Igoera txandako izangaientzat 13.

-Txandak irekiko izangaientzat 13.

-% 33tik goitiko ezgaitasuna duten elbarrituentzat, hau da, txanda murriztuko izangaientzat, 4.

Txandaren batean plaza sobranterik baldin badago, beste txandakoei gehituko zaizkie, beti ere aurreko lerroaldean finkatutako proportzioa gordez.

6.4.2. Prestakuntza eta praktikako ikastaroa.

6.4.2.1. Prestakuntza eta praktikako ikastaroa laneko eginkizunei buruzko ikastaro berezia izanen da eta hilabete inguru iraunen du.

6.4.2.2. Prestakuntza eta praktikako ikastaroaren gehieneko puntuazioa 100 puntukoa izanen da. 50 puntu lortu ez edo ikastaroan emandako irakasgairen bat gainditzen ez duten izangaiak baztertuta geratuko dira.

7.-Probak gainditzen dituztenen zerrenda, izendapen proposamena eta agirien aurkezpena

7.1. Prestakuntza eta praktikako ikastaroko kalifikazioa emanik, epaimahaiak jendaurrean jarriko du Nafarroako Gobernuaren iragarki oholean eta Nafarroako Administrazio Publikoaren Institutukoan, probak gainditu dituztenen zerrenda, izangai bakoitzak lehiaketan eta oposizioan izandako kalifikazioak batu ondoren lortutako puntuazio osoaren araberakoa, eta Funtzio Publikoaren zuzendari nagusiari igorriko dio probak gainditu eta deialdiko lanpostuen kopuruan sartzen diren izangaien aldeko izendapen proposamena. Proposamen hori Nafarroako ALDIZKARI OFIZIALean argitaratu beharko da.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturalen barrenean, proposatutako izangaiek dokumentu hauek aurkeztu behar dituzte Funtzio Publikoaren Zuzendaritza Nagusian:

7.2.1. Nafarroako Foru Komunitateko Administrazioaren edo haren erakunde autonomoen zerbitzuko langile finko ez diren izangaiek, agiri hauek aurkeztu beharko dituzte:

a) Nortasun Agiri Nazionalaren fotokopia konpultsatua edo izangaiaren nazionalitatea eta identitatea erakusten dituen agiri baliokidea.

b) Deialdiaren 2. oinarrian eskatutako tituluaren fotokopia konpultsatua, edo hura eskuratzeko eskubideak ordaindu izanaren gordekinarena.

c) Behar den Prebentzio Zerbitzuak luzatutako txostena, karguari dagozkion eginkizunak betetzea galarazten duen eritasun edo akats fisiko nahiz psikikorik ez dela egiaztatzen duena.

Ezintasunen bat alegatu duten izangaiek, gainera, hura deialdiaren xedeko lanpostuarekin bateragarria dela dioen frogagiria, balorazio eta orientazio talde eskudunek luzatua.

d) Zinpeko aitorpena, eginkizun publikoak betetzeko ezgaitua edo gabetua ez dagoela eta inongo Administrazio Publikoren zerbitzutik ez dela bereizia izan dioena.

e) Zin egin edo hitz ematea, Nafarroako Foru Eraentza begiratu, Konstituzioari eta legeei men egin eta karguaren eginkizunak zintzo beteko direla dioena.

Deialdi hau egin ez duen Nafarroako beste Administrazio Publiko bateko langile finkoek, gainera, aurreko Administrazioko espediente pertsonalean ageri diren inguruabar eta aurrekin guztiak frogatzen dituen ziurtagiria, sarrera, antzinatasun, maila, egoera administratibo, e.a.i buruzkoa.

7.2.2. Nafarroako Foru Komunitatearen Administrazioko edo haren erakunde autonomoetako langile finko diren izangaiek, agiri hauek aurkeztu beharko dituzte:

a) Deialdiaren 2. oinarrian eskatutako tituluaren fotokopia konpultsatua, edo hura eskuratzeko eskubideak ordaindu izanaren gordekinarena.

b) Dagokion kasuan, Nafarroako Foru Komunitatearen Administrazioko funtzionario izateko dokumentazioa, Funtzio Publikoaren Zuzendaritza Nagusiak eskaturik.

Ezintasunen bat alegatu duten izangaiek, gainera, hura deialdiaren xedeko lanpostuarekin bateragarria dela dioen frogagiria, balorazio eta orientazio talde eskudunek luzatua.

7.3. Aipatu epearen barrenean, eta behar bezala arrazoitutako ezinbesteko kasuak salbu, agiri horiek aurkezten ez dituztenak ezin izanen dira izendatu, eta haien jarduketa guztiak baliorik gabe geratuko dira, eskabidean faltsukeriagatik izan dezaketen erantzukizuna galarazi gabe.

7.4. Aurreko atalean aurrikusitakoa gertatuz gero, Funtzio Publikoaren zuzendari nagusiak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

8.-Lanpostu hutsen hautaketa.

8.1. Aurreko oinarrian ezarritakoa betetzen duten izangaiek, Funtzio Publikoaren Zuzendaritza Nagusiak ezartzen duen epean, hutsik dauden lanpostuen artean zein lehenesten duten adierazi beharko dute.

8.2. Hautapen probak igoera txandaren bidez gainditzen dituzten izangaiek, edozein kasutan, lehentasuna izanen dute deialdiko lanpostu hutsak betetzerakoan, txanda horretakoak ez diren izangaien aurretik.

9.-Izendapena, lanpostu hutsen esleipena eta jabetza hartzea.

9.1. Funtzio Publikoaren zuzendari nagusiak, aurreko oinarrietan ezarritakoa betetzen duten izangaiak Foru Komunitateko Administrazioaren eta haren erakunde autonomoen funtzionario izendatuko ditu, Koordinazioko operadore laguntzaile izateko (SOS Nafarroa), eta lanpostuak esleituko dizkie, Ebazpen bidez.

9.2. Izendapena Nafarroako ALDIZKARI OFIZIALean argitaratuko da.

9.3. Izendatutako izangaiek lanpostuaren jabetza hartuko dute hilabeteko epean, izendapena jakinarazten denetik hasita. Epe horretan eta ezinbesteko kasuetan salbu, jabetza hartzen ez badute, Foru Komunitateko Administrazioaren funtzionario izateko eskubide guztiak galduko dituzte. Horrelakoetan 7.4. idatz-zatian ezarritakoa aplikatuko da.

9.4. Izangai bat funtzionario bihurtu eta, lanpostu horretan benetan aritu gabe, lanpostuaren jabetza hartzen den egun berean borondatezko eszedentzia ematen bazaio, berak eskaturik (beste administrazio publiko batean lanean ari delako), lanpostu huts hori deialdiaren 7.4. idatz-zatian xedatutakoari jarraikiz beteko da.

9.5. Aurreko bi idatz-zatietako kasuetan ez da aldatuko izendapena baino lehen egindako lanpostu hutsen hautapena, eta zuzenean esleituko zaizkie funtzionario berriei egoera horietatik sortzen diren lanpostuak.

10.-Helegiteak

Deialdi honen aurka, bere oinarri eta egintzen aurka, gora jotzeko helegitea paratzen ahal da, Nafarroako Gobernuari zuzendua, helegiten den egintza argitaratu edo jakinarazi eta hilabeteko epean, Administrazio Publikoen Araubide Juridikoari eta Guztientzako Administrazio Prozedurari buruzko azaroaren 26ko 30/1992 114. eta 115. artikuluetan xedatutakoaren arabera (urtarrilaren 17ko 4/1999 Legeak aldatua).

Iruñean, bi milako urtarrilaren hamazazpian.-Funtzio Publikoaren Zuzendari Nagusia, Ignacio Bandrés Urriza.

I. ERANSKINA

Eskaera eredua

................... jaun/andreak, adin nagusikoa, ..... zk.ko Nortasun Agiri Nazionalaren (edo nortasun agiri baliokidea) jabe, ............(e)n (..........) ....eko ......aren ...(e)an jaioa ........(e)ko (........) ........... kalean, ......... posta kodea, helbidea eta ........... telefonoa duenak,

Zure aurrean agertu eta honako hau dio:

Foru Komunitateko Administrazioaren eta haren Erakunde Autonomoen ....... izateko, .... lanpostu ............. bidez betetzeko deialdian, ..............(e)ko ...... Nafarroako ALDIZKARI OFIZIALean argitaratu zen hartan, onartua izatea eskatzen duela, ondotik aipatzen den txandan:

Txanda irekia

Igoera txanda

Elbarrituentzako txanda murriztua

Karguan aritzea galarazten dioen eritasun edo akats fisiko nahiz psikikorik ez duela.

Ez duela indarra duten xedapenetan ezarritako ezintasunik.

Ez dela disziplina espediente bidez inongo Administrazio Publikoren zerbitzutik bereizia izan, ezta desgaitua ere eginkizun publikoak betetzeko.

Deialdiaren 2. oinarrian adierazitako titulazioaren jabe dela.

Azterketa eskubideak ordaindu dituela deialdian ezarritako moduan eta horren gordekina erantsi duela.

Eskabideak aurkezteko emandako epea amaitzen den egunean, eskatutako baldintza guztiak betetzen dituela.

Baduela ezintasunik, eta horregatik eskatzen duela ondoko egokitzapena, adierazitako arrazoiengatik. (Beste orrialde batean zehaztuko dira ezintasunaren nondik-norakoak eta eskatzen diren egokitzapenak)

Elbarritasuna egiaztatzen duen dokumentazioa eransten duela, erakunde eskudun batek luzatua

Euskara mailari buruzko proba egin nahi duela, deialdiaren ondorioetarako

Azaldutakoaren ondorioz:

Eskatzen dut eskabide hau onar dezatela eta, ondorioz, ni ere onar nazatela Foru Komunitateko Administrazioaren eta zerbitzuko .............. izateko, .... lanpostu ........ bidez betetzeko deialdian.

Iruñean, ....eko ........aren ....(e)an.

(Sinadura)

II. ERANSKINA

Merezimenduen baremoa

1.-Titulu akademikoak

-Batxilergoa edo Lanbide Heziketa 2. mailakoa: 0,75 puntu.

-Unibertsitateko titulua, erdi mailakoa: 2 puntu.

-Unibertsitateko titulua, goi mailakoa: 3 puntu.

-Beste titulu ofizial batzuk: 3 puntu arte.

Titulazio akademikoak ez dira kontutan hartuko maila handiagoko beste bat lortzeko behar badira, biak alegatuz gero.

Atal honen puntuazioa gehienez ere 6 puntukoa izanen da.

2.-Administrazio Publikoetan egindako zerbitzuak.

a) Funtzionario edo lan-kontratatu gisa nahiz kontratu administratiboaz deialdiko lanpostuen pareko eginkizunetan zerbitzu ematen egindako urte bakoitzeko, puntu bat.

b) Gutxienez Eskola Graduatuaren titulua edo baliokideren bat izatera beharturik, beste lanpostu batean zerbitzu ematen egindako urte bakoitzeko, 0,3 puntu.

Ez dira kontatuko aldi berean emandako zerbitzuak eta deialdi hau Nafarroako ALDIZKARI OFIZIALean argitaratu ondoren egindakoak.

Urte kopurua osoa ez bada, zerbitzu ematen egindako egunei proportzioan dagokien puntuazioa emanen da.

Gehienez ere atal honen puntuazioa 12 puntukoa izanen da.

3.-Hizkuntzak.

Euskararen ezagutza.

Euskaraz jakitea 13 puntu bitarte baloratuko da. Halako puntuazioa emanen zaio Hizkuntza Eskola Ofizial batek emandako gaitasun agiria -goi zikloa- edo ofizialki balio bera aitortzen duen bestelako titulazioa izateagatik. Titulurik izan ezean, 2,60 puntu emanen dira Hizkuntza Eskola Ofizial batean gainditutako kurtso bakoitzarengatik, edo 1,083 puntu Nafarroako Gobernuak antolatutako ikastaroetan gainditutako `urrats' bakoitzarengatik; dena dela, beste bide bat ere badago ezagutza maila frogatzeko: Nafarroako Gobernuko Hizkuntza Politikarako Zuzendaritza Nagusiak egindako azterketa egitea.

4.-Beste hizkuntza batzuk.

Ondoko arauei jarraituz puntuatuko da hizkuntzak jakitea:

-Europako Batasuneko hizkuntza ofizialak, gehienez 4 puntu hizkuntza bakoitza.

-Bestelako hizkuntzak: puntu bat hizkuntza bakoitza.

Hizkuntza horien ezagutza erakunde ofizialek luzatutako titulu edo ziurtagirien bidez egiaztatuko da.

Atal honetan gehienez 6 puntu lortzen ahal dira.

5.-Lanbide curriculuma

Atal honetan izangaiek aurkeztutako beste edozein merezimendu baloratuko da, beti ere lanpostuarekin ikustekorik baldin badu eta aurreko ataletan kontuan hartu ez bada.

Atal honetan 6 puntu lortzen ahal dira gehienez.

III. ERANSKINA

Ezagutzen probarako gaien zerrenda

Zuzenbidea

1. gaia.-Nafarroako Erresumaren egitura politiko-administratiboa. Foruei buruzko Legeak, eta bereziki 1841eko Lege Hitzartua. Nafarroako foru araubidea: haren bilakaera.

2. gaia.-Nafarroako Foru Eraentza Berrezarri eta Hobetzeari buruzko 13/1982 Lege Organikoa, abuztuaren 10ekoa. Hura prestatzeko prozesua. Izaera eta esanahia. Egitura eta sistematika. Atariko titulua. Haren erreforma.

3. gaia.-Nafarroako foru erakundeak: Nafarroako Parlamentua edo Gorteak. Eginkizunak. Autonomia instituzionala: haren aurrekontuak, erregelamendua eta barne gobernua. Funtzionamendua: osoko bilkura eta batzordeak. Kontuen Ganbara.

4. gaia.-Nafarroako Foru Diputazioa edo Gobernua: eginkizunak, osaera. Nafarroako Gobernuko lehendakaria: haren hautaketa. Nafarroako Parlamentuaren aurrean daukan erantzukizun politikoa.

5. gaia.-Nafarroako Foru Komunitateko Gobernua eta Administrazioa arautzen dituen Foru Legea: edukia eta egitura. Nafarroaren ahalmen eta eskumenak: edukia eta egitura. Nafarroaren ahalmen eta eskumenak: haiei buruzko laburpen bat.

6. gaia.-Zuzenbide komunitarioa: haren iturriak. Europako Batasunaren Ituna: ezagupen orokorra.

7. gaia.-Europako Komunitatearen antolaketa. Batzordea. Parlamentua. Kontseilua. Europako Komunitatearen Justizia Auzitegia: osaera eta eskumena; haren epaien ondorioak.

8. gaia.-1978ko Espainiako Konstituzioa: sorrera eta ezaugarriak. Egitura eta edukia. Printzipio orokorrak. Oinarrizko eskubideak: bermeak. Konstituzio Auzitegia.

9. gaia.-Nafarroako foru zuzenbide zibilaren bilduma. Nafarroako zuzenbide zibilaren iturriak. Foru araubideko izaera zibila.

10. gaia.-Administrazio publikoen jarduera: arau orokorrak. Egintza administratiboak: betebeharrak eta eragina.

11. gaia.-Administrazio prozedura: haren urratsak. Errekurtso administratiboak: printzipio orokorrak eta errekurtso motak. Administrazioarekiko errekurtsoa.

12. gaia.-Nafarroako administrazio publikoetako langileen Estatutuaren Testu Bategina: edukia eta egitura. Haren azterketa laburra.

13. gaia.-Maiatzaren 4ko 150/1998 Foru Dekretua, Operazioak Koordinatzeko Zentroa arautzen duena.

Informatika

14. gaia.-Oinarrizko informatika: hardware, software eta MS-D.O.S. sistema eragileari buruzko oinarrizko kontzeptuak.

15. gaia.-Windows 3.11: oinarriak, aplikazioak, programen administratzailea, artxiboen administratzailea, kontrolerako panela, inprimaketaren administratzailea.

16. gaia.-Windows 95: oinarriak, mahaigaina eta haren osagaiak, programen administratzailea, windowseko esploratzailea, kontrolerako panela, inprimaketaren administratzailea, hasteko botoia, hasteko karpeta, atazen barra, exekutatzeko komandoa.

17. gaia.-Testu prozesadoreak: oinarrizko kontzeptuak. Windowserako Word 6.0: Wordeko lan esparrua, idatzi eta editatzea, testu formatua, orrialdearen diseinua eta konposaketa, artxiboen administrazioa, gutunak-eta konbinatzea, eremuekin lan egitea, inprimatzea.

18. gaia.-Kalkuluko orriak: oinarrizko kontzeptuak. Windowserako Excel 5.0: oinarrizko kontzeptuak, lan egiteko liburuak, orriak, gelaskak, komandoak eta gelaskak hautatzea, datuak sartzea, formulak eta estekak sortzea, funtzioak erabiltzea, kalkuluko orri bat editatzea, formatuak, grafikoak, inprimatzea.

19. gaia.-Datu basea: oinarrizko kontzeptuak. Windowserako Access 2.0: oinarriak, taulak, kontsultak, formularioak, txostenak, inprimatzea.

Nafarroako Geografia

20. gaia.-Nafarroako geomorfologia: unitate morfoestruktural nagusiak: Ebroko zelaia eta Pirinioetako mendikatea.

21. gaia.-Nafarroako orografia: ezaugarri orokorrak eta iparraldeko mendi-saihets piriniarren eta hegoaldearen deskripzioa.

22. gaia.-Nafarroako klimatologia: Nafarroako kliman eragina duten faktoreak. Klima mota desberdinen aplikazioa Nafarroan. Landaredia: motak eta banaketa.

23. gaia.-Nafarroako hidrologia: Nafarroako ibaien ezaugarriak. Isurialdeak eta arroak: haien azterketa eta deskripzioa. Unitate hidrogeologikoak.

24. gaia.-Nekazaritza Nafarroan: eskualdeak eta motak. Abeltzaintza Nafarroan: espezieak, eskualdeak, ekoizpena eta kokalekuak. Meagintza Nafarroan.

25. gaia.-Industria Nafarroan: bilakaera, kokalekuak, Nafarroan dituen arazoak. Turismoa Nafarroan: kanpinak, hotelak, landa-etxeak, Done Jakue bidea.

26. gaia.-Komunikazioak, merkataritza. Nafarroako errepideen sarea. Mendateak.

27. gaia.-Nafarroako biztanleria: ezaugarriak, bilakaera, banaketa, eskualdeak, migrazio mugimenduak. Nafarroako habitata. Biztanleen egitura sozio-profesionala.

28. gaia.-Nafarroako ipar-mendebaldea eta Pirinio aldeko ibarrak.

29. gaia.-Pirinioetako arroak.

30. gaia.-Nafarroako Erdialdea, ekialdekoa zein mendebaldekoa.

31. gaia.-Ekialdeko eta mendebaldeko Erribera.

Iragarkiaren kodea: A0000438